အခန်း ၁၄၅ : ဝိညာဥ်ဂိုဏ်း၊ ဝိညာဥ် ကူးပြောင်းသွားခြင်း
"သောက်ကျိုးနည်း မိစ္ဆာကွာ ဘာလို့ ငါတို့ ဂိုဏ်းကိုမှ ရွေးချယ်ခဲ့တာလဲ... အခုတော့ ငါတို့ အပြင်စည်း ဂိုဏ်းသားတွေပဲ ကျန်တော့တယ်... ဒါတောင် တိုက်ပွဲ အစပိုင်းတုန်းက ငါတို့ပဲ ခိုလှုံရာ ရှာခဲ့ကြတာကြောင့် လွတ်သွားကြတာ"
"ဟူး ငါတို့မှာ ရွေးချယ်စရာ မရှိဘူးလေကွာ... ငါတို့ အပြင်စည်း ဂိုဏ်းသားတွေက ဒီလိုတိုက်ပွဲမျိုးမှာ ပါဝင်ဖို့ အရည်အချင်းမှ မပြည့်မီကြတာကို"
"တခြား ဂိုဏ်းတစ်ခုကို ပြောင်းရွှေ့ရင် ဘယ်လိုလဲ"
"အင်း..."
"ရှူး... မင်း ဘာတွေ အဓိပ္ပာယ်မရှိတာတွေ ပြောနေတာလဲ... ဂိုဏ်းသခင်ရဲ့ ဇနီးသည်နဲ့ ငါတို့ ဆရာသခင်ရဲ့ ဇနီးသည်လည် ဒီမှာ ရှိနေတုန်းပဲ..."
"မှန်တယ်... ငါတို့ အားကိုးလို့ ရတဲ့ လူတချို့ ရှိနေတုန်းပဲ"
"ဟူး"
"..."
သူတို့စကားတွေက အဆိုးမြင်ဝါဒတွေနဲ့ ပြည့်နှက်နေပြီး ဝိညာဉ်ဂိုဏ်းက အခြေအနေ တကယ် မကောင်းတော့ဘူး ဆိုတာ ထင်ရှားနေခဲ့သည်။။
'နေပါဦး... ဝိညာဉ်ဂိုဏ်း...'
ဒီနာမည်က ရင်းနှီးနေတယ်လို့ ပိုင်ယီရုတ်တရက် ခံစားလိုက်ရသည်။ သူ တစ်နေရာရာမှာ မြင်ဖူးသလိုပင်။
သူ ရုတ်တရက် မျက်လုံး ဖွင့်လိုက်ပြီး ကုတင်ပေါ်ကနေ မတ်မတ် ထထိုင်လိုက်၏။
'ဝိညာဉ် ဂိုဏ်း...'
သူ ချက်ချင်း ခေါင်းငုံ့ပြီး သူ့ခန္ဓာကိုယ်ကို ကြည့်လိုက်တော့ သူဟာ မွေးကင်းစ ကလေး တစ်ယောက် မဟုတ်ကြောင်း သဘောပေါက်လိုက်သည်။
သူက လူကြီး တစ်ယောက်ဖြစ်နေလေသည်။
'ကောင်းလိုက်တာ..'
'ဝိညာဉ် ကူးပြောင်းခြင်း...'
'ချန်ချန်ရွှယ်နဲ့ တူညီတဲ့ ဝင်စားခြင်း နည်းလမ်းပဲလား...'
[အသက် ၂၃ နှစ် - သင့်ဝိညာဉ်ဟာ ဝိညာဉ်ဂိုဏ်းမှ အတွင်းစည်း ဂိုဏ်းသားတစ်ဦး၏ ခန္ဓာကိုယ်ထဲသို့ ဝင်ရောက်သွားခဲ့သည်။ သူက ဝိညာဉ်ဂိုဏ်း၏ တစ်ဦးတည်းသော အသက်ရှင်ကျန်ရစ်သည့် စစ်မှန်သော တပည့် ဖြစ်သည်။ ကံမကောင်းစွာဖြင့် သူဟာ နောက်ဆုံးထွက်သက် ရှူပြီးချိန်တွင် သင့်၏ဝင်ရောက်စီးနင်းခြင်း ခံလိုက်ရသည်။]
[သင့်လက်ရှိ မျက်နှာကို မထိဘဲ မနေနိုင်အောင် ဖြစ်သွားပြီး ဒီမျက်နှာက သင့်မျက်နှာနဲ့ အတိအကျ တူညီနေကြောင်း သင် သဘောပေါက်လိုက်သည်။ ဆလိုက်ထဲက အကြောင်းအရာတွေ အရ ဒီလူရဲ့ နာမည်ကလည်း သင့်နာမည်နဲ့ အတိအကျ တူညီနေကြောင်း သင် သဘောပေါက်လိုက်သည်။]
[သင် နိုးထလာခြင်းက အပြင်ဘက်က အပြင်စည်း ဂိုဏ်းသားတွေရဲ့ အာရုံစိုက်မှုကို ဆွဲဆောင်လိုက်ပြီး သူတို့ဟာ ချက်ချင်း ဝမ်းသာအားရ ဖြစ်သွားခဲ့ကြသည်။]
"နိုးလာပြီ... နိုးလာပြီ... စီနီယာ အစ်ကို ပိုင်သတိမေ့မြောနေတာ ငါးရက်နဲ့ ငါးည ရှိပြီ.... သူ နောက်ဆုံးတော့ နိုးလာပြီကွ..."
"မြန်မြန်...မြန်မြန် .. မြန်မြန် စီနီယာ အစ်ကို ပိုင်ကို ဆေးလုံး တစ်လုံး မြန်မြန် တိုက်လိုက် ပြီးတော့ သူ့ကို ကောင်းကောင်း ပြန်လည်သက်သာလာအောင် လုပ်ပေးလိုက်"
"စီနီယာ အစ်ကို ပိုင်.... ရှိုက်...ရှိုက်...ရှိုက်... အစ်ကိုက ကျွန်တော်တို့ ဝိညာဉ်ဂိုဏ်းရဲ့ နောက်ဆုံး ကျန်ရစ်တဲ့ စစ်မှန်သော တပည့်ပဲ....ကံကောင်းစွာနဲ့ အစ်ကို နိုးလာပြီ.... ရှိုက်... ရှိုက်...ရှိုက်..."
"မင်း ဘာလို့ ငိုနေတာလဲ.... စီနီယာ အစ်ကို ပိုင် အဆင်ပြေပါတယ်... မငိုနဲ့ လေထုကို မပျက်စီးစေနဲ့"
"စီနီယာ အစ်ကို ပိုင် နိုးလာပြီ....."
"..."
လူပျိုပေါက် အရွယ်လူတစ်စု အတင်းဝင်ရောက်လာကြသည်။ သူတို့ထဲက တစ်ယောက် နှစ်ယောက်က ပိုင်ယီကို ဝိုင်းရံလိုက်ကြပြီး သူတို့ မျက်နှာ အနှံ့ အံ့သြဝမ်းသာမှုတွေ ပြည့်နက်နေခဲ့ကြလေသည်။
သူတို့ထဲမှာ အမျိုးသားရော အမျိုးသမီးရော ပါဝင်ကြပေမယ့် သူတို့ အားလုံး ငယ်ရွယ်ကြကြောင်း မြင်တွေ့နိုင်ပေသည်။
အသက်အကြီးဆုံး တစ်ယောက်က (၁၇) နှစ် သို့မဟုတ် (၁၈) နှစ်လောက်ပဲ ရှိပြီး သူတို့ရဲ့ ခွန်အားက သိပ်မသန်မာလှချေ။
ကျင့်ကြံမှု အမြင့်ဆုံး တစ်ယောက်ကတောင် ချီစုစည်းမှု အဆင့် (၃) မှာပဲ ရှိသေးလေသည်။
'ဒီဝိညာဉ်ဂိုဏ်း အပြင်စည်း ဂိုဏ်းသားတွေက... အရည်အသွေး သိပ်မြင့်မားပုံ မရဘူး...'
မသေမျိုးကျင့်ကြံခြင်း သရုပ်ဖော် စနစ်ထဲက မသေမျိုးကျင့်ကြံခြင်း ကမ္ဘာမှာ ဝိညာဉ်ဂိုဏ်းက အလတ်စားဂိုဏ်းတစ်ခုသာ ဖြစ်လေသည်။ မိစ္ဆာရဲ့ လက်ချက်နဲ့ သေဆုံးသွားတဲ့ ဂိုဏ်းသခင်ကတောင် ရွှေအမြုတေ အဆင့်မှာပဲ ရှိသေးရာ ဒီလို အခြေအနေမျိုးမှာ ဝိညာဉ်ဂိုဏ်းရဲ့ အပြင်စည်း ဂိုဏ်းသားတွေ သိပ်မသန်မာကြတာ မဆန်းပေ။
မကြာမီ ဝိညာဉ်ဂိုဏ်းမှ အပြင်စည်းဂိုဏ်းသားတစ်ဦးက သူ့ကို ဆေးလုံး တစ်လုံး ကမ်းပေးသည်ကို ပိုင်ယီ တွေ့လိုက်ရသည်။
တစ်ဖက်လူ ပြောလိုက်၏။ "စီနီယာ အစ်ကို ပိုင် ဒါက ဝိညာဉ်ပျိုးထောင်ခြင်း ဆေးလုံးပါ... ဆရာသခင်ရဲ့ ဇနီးသည်က ကျွန်တော်တို့ကို မှာထားတယ်... အကယ်၍ အစ်ကို နိုးလာရင် ဒီဆေးလုံး အစ်ကို့ကို တိုက်လိုက်ပါတဲ့"
တစ်ဖက်လူ၏ လေသံက အလွန် လေးစားသမှု ရှိနေခဲ့သည်။ ဘာပဲဖြစ်ဖြစ် သူက အပြင်စည်း ဂိုဏ်းသား တစ်ဦးသာ ဖြစ်သည် မဟုတ်ပါလော။
မသေမျိုးကျင့်ကြံခြင်း ကမ္ဘာတွင် အထက်နှင့် အောက် အဆင့်အတန်း ခွဲခြားမှုက အလွန် ရှင်းလင်းပေသည်။
"ကျေးဇူးတင်ပါတယ်" သူ့ရဲ့ လက်ရှိ ခန္ဓာကိုယ် ဘယ်လောက် အားနည်းနေလဲ ဆိုတာ ပိုင်ယီ ခံစားလို့ ရနေခဲ့ရာ လက်လှမ်းလိုက်ပြီး ဆေးလုံးကို ယူကာ မျိုချလိုက်၏။
ထို့နောက် သူဟာ ဖြည်းညှင်းစွာ စတင် သန့်စင်လိုက်သည်။
[သင် ဝိညာဉ်-ပျိုးထောင်ခြင်း ဆေးလုံး တစ်လုံး သောက်သုံးလိုက်ပြီး သင့်ခန္ဓာကိုယ် အနည်းငယ် တိုးတက်လာခဲ့သည်။ သို့သော် ဤတိုးတက်မှုက သိသာထင်ရှားခြင်းမရှိပေ။ ၎င်းက သင့်ကို ငရဲတံခါးဝမှ လွတ်မြောက်စေရုံ သက်သက်သာ ဖြစ်သည်။]
[သင့်ခန္ဓာကိုယ်၏ ကျင့်ကြံမှုက ချီစုစည်းမှု အဆင့် အဆင့် (၈) တွင်သာ ရှိကြောင်း သင် တွေ့ရှိလိုက်ရသည်။]
[ကံကောင်းစွာဖြင့် သင့်တွင် အခြေတည်အဆင့် ဆေးလုံးရှိနေသည့် အတွက် သင် ဝမ်းသာမိသည်။]
ချီစုစည်းမှုအဆင့်(၈)ရောက်ရှိပါက ဆက်ခံသူ တပည့် တစ်ယောက် ဖြစ်လာနိုင်ပေသည်။
ဝိညာဉ်ဂိုဏ်းက တကယ် သိပ်မကောင်းမွန်လှချေ။ ဝိညာဉ်ဓားဂိုဏ်းနဲ့ ကျင်းရှင်း နန်းတော်တို့နဲ့ ယှဉ်လိုက်ပါက သူတို့က အများကြီး နိမ့်ကျလေသည်။
ထို့အပြင် ဝိညာဉ်ဂိုဏ်းက ဒီလိုပြင်းထန်တဲ့ ဆုံရှုံးမှုဖြင့် ကြုံတွေ့ခဲ့ကြရာ ပိုလိုတောင် သနားစရာ ကောင်းနေခဲ့သည်။
လက်ရှိ ဝိညာဉ်ဂိုဏ်းက မသေမျိုးကျင့်ကြံခြင်း ကမ္ဘာထဲက သေးငယ်တဲ့ ကျင့်ကြံခြင်း ဂိုဏ်းတွေနဲ့ပဲ ယှဉ်နိုင်တော့ပေသည်။
အချိန်နွေကုန်ဆုံးသွားခဲ့သည်။
[ပြန်လည်ကျန်းမာလာအောင် အနားယူပြီး ကာလတစ်ခု အကြာ သင့်ခန္ဓာကိုယ်က နောက်ဆုံးတွင် (၇၀) မှ (၈၀) ရာခိုင်နှုန်း အထိ ပြန်လည် သက်သာလာခဲ့သည်။ တွန့်ဆုတ်ခြင်း တစ်စုံတစ်ရာ မရှိဘဲ သင်ဟာ အခြေတည်အဆင့် ဆေးလုံးကို မျိုချလိုက်သည်။ သင် ချီစုစည်းမှု အဆင့် (၈) မှ အခြေတည်အဆင့် (၁) သို့ တိုက်ရိုက် အဆင့်ချိုးဖျက် ဝင်ရောက်နိုင်ခဲ့သည်။]
[ပေါက်ကွဲထွက်လာသည့် ကျင့်ကြံမှု တိုးတက်လာခြင်းက သင့်ခန္ဓာကိုယ်ကို လုံးဝ ပြန်လည် ကောင်းမွန်လာစေသည်။ တစ်ချိန်တည်းမှာပင် သင် ရောက်ရှိနေသည့် ဝိညာဉ်ဂိုဏ်း အကြောင်းကို သင် ပိုမို ကောင်းမွန်စွာ နားလည်လာခဲ့သည်။]
ပိုင်ယီဟာ ဝိညာဉ်ဂိုဏ်းထဲတွင် နေထိုင်ခဲ့သည်မှာ လဝက်ရှိပြီ ဖြစ်လေသည်။ ဤလဝက် အတွင်း...
အပြင်စည်း ဂိုဏ်းသား အချို့မှတဆင့် အသုံးဝင်သော သတင်းအချက်အလက် အများအပြား သူ ရရှိခဲ့သည်။
လက်ရှိတွင်...
ဝိညာဉ်ဂိုဏ်းတွင် တပည့် ဒါဇင်အနည်းငယ်သာ ကျန်ရစ်တော့ပြီး ပိုင်ယီမှလွဲ၍ ကျန်လူ အားလုံးက အပြင်စည်း ဂိုဏ်းသားများ ဖြစ်ကြသည်။
မူလက ဝိညာဉ်ဂိုဏ်းတွင် အပြင်စည်း ဂိုဏ်းသား အရေအတွက် အတော်လေး များပြားခဲ့သည်။
သို့သော် အပြင်စည်း ဂိုဏ်းသား အများအပြားဟာ မိစ္ဆာဂိုဏ်း၏ တိုက်ခိုက်မှုကို ရှောင်ရှားရန် အချိန်မီ နေရာရှာမတွေ့ခဲ့ကြပေ။
ထို့ကြောင့် သူတို့ဟာ ထိုကြောက်မက်ဖွယ် တိုက်ပွဲတွင် သေဆုံးခဲ့ကြရသည်။
ကံကောင်းထောက်မစွာ အသက်ရှင်ကျန်ရစ်ခဲ့သည့် အပြင်စည်း ဂိုဏ်းသား အချို့ဟာ တိုက်ပွဲကြီး အပြီးတွင် ဝိညာဉ်ဂိုဏ်း ဤမျှ ဆိုးရွားသည့် အခြေအနေရောက်နေသည်ကို မြင်လိုက်ရသဖြင့် သူတို့ အားလုံးဟာ အခြား လမ်းကြောင်းတစ်ခု ရှာဖွေခဲ့ကြသည်။
အချို့မှာ အလွန် ကြောက်လန့်သွားသဖြင့် မသေမျိုးကျင့်ကြံခြင်း လမ်းစဉ်ကို ဆက်မလျှောက်ရဲကြတော့ပေ။ သူတို့ဟာ ပြန်သွားပြီး ခွန်အား အနည်းငယ် ရှိသည့် သာမန်လူ တစ်ယောက် အဖြစ်သာ နေထိုင်လိုကြသည်ဟု ဆိုကြလေသည်။
အချို့မှာ အခြား ဂိုဏ်းများသို့ ပြောင်းရွှေ့လိုကြပြီး ဝိညာဉ်ဂိုဏ်းတွင် အနာဂတ် မရှိတော့ဟု ခံစားကြရသည်။
မှန်ပေသည်။ ဝိညာဉ်ဂိုဏ်းက ယခုအခါ ဒေဝါလီခံထားရသည့် လုပ်ငန်းတစ်ခုနှင့် တူနေခဲ့သည်။
ထို့အပြင် သူတို့၏ အသက်အန္တရာယ်က အချိန်မရွေး ကျရောက်နိုင်ရာ အကယ်၍ ဘယ်သူမှ ထွက်မပြေးရင်သာ ထူးဆန်းနေပေမည်။
ဝိညာဉ်ဂိုဏ်း၏ အထက်ပိုင်း ခေါင်းဆောင်များအားလုံးနီးပါး တိုက်ပွဲတွင် သေဆုံးခဲ့ကြရသည်။