အခန်း ၁၄၄ : ပါရမီ (၁၀) ခုအား ရွေးချယ်ခြင်း
[၁။ အမေရိကန် စတိုင် (သင့်တွင် ကျည်ဆန် အကန့်အသတ် မရှိသော Colt 1911 ပစ္စတို တစ်လက် ရှိလိမ့်မည်)]
[၂။ ဆပ်ကျူဘက်စ် (ဆပ်ကျူဘက်စ် တစ်ကောင် အနေဖြင့် သင်ဟာ အမျိုးသားများ၏ အထူး ချစ်ခင်ခြင်းကို ခံရမည်)]
[၃။ စီနီယာ အစ်ကိုကြီး (သင်သည် မသေမျိုးကျင့်ကြံခြင်း ဂိုဏ်းတစ်ခုခု၏ စီနီယာ အစ်ကိုကြီး သေချာပေါက် ဖြစ်လာလိမ့်မည်)]
[၄။ ကလေးတစ်ယောက်တည်းတွင် ရတနာ ဆယ်ပါး (သင့်တွင် အမြွှာ ညီအစ်ကို မောင်နှမ ကိုးယောက် ရှိမည်)]
[၅။ တာအိုကို အောင်မြင်ရန် သင့်ပါတနာကို သတ်ပါ (သင့်ပါတနာကို သတ်ဖြတ်ခြင်းက သင့်ကျင့်ကြံမှု အဆင့်ကို တိုက်ရိုက် မြှင့်တင်ပေးလိမ့်မည်)]
[၆။ ဖြောင့်မတ်သူ (ဖြောင့်မတ်လမ်းစဉ်၏ သင့်အပေါ် အထင်ကြီးလေးစားမှု +၁၀၀ ၊ မိစ္ဆာလမ်းစဉ်၏ သင့်အပေါ် အထင်ကြီးလေးစားမှု -၁၀၀ )
[၇။ အခြေတည်အဆင့် ဆေးလုံး (သင် ခြေတစ်လှမ်းတည်းဖြင့် အခြေတည်အဆင့်သို့ ရောက်ရှိနိုင်သည်။)]
[၈။ ရေဘဝဲလက်တံများ (အဲဒီ ထူးဆန်းတဲ့ ကိစ္စတွေ လုပ်ဖို့ မစဉ်းစားပါနဲ့)]
[၉။ သူခိုး ချောင် (အိမ်ထောင်သည် အလှပဂေးများဟာ သင့်ကို အမြဲတမ်း မျက်နှာသာ ပေးလိမ့်မည်)]
[၁၀။ ပုန်ကန်တတ်သော ဖခင်(သင့်တွင် ပုန်ကန်တတ်သော ဖခင်တစ်ဦး ရှိလိမ့်မည်)]
[ကျေးဇူးပြု၍ ရွေးချယ်ပါ]
မသေမျိုးကျင့်ကြံခြင်း သရုပ်ဖော် စနစ်ထဲတွင် စာရင်းပြုစုထားသည့် ကနဦး မွေးရာပါ ပါရမီ ဆယ်ခုလုံးက ပိုင်ယီ၏ မျက်စိရှေ့တွင် ပေါ်လာခဲ့သည်။
သူနှင့် ရွေးချယ်ခံ သုံးယောက်ကြား ကွာခြားချက်မှာ သူက ဤမွေးရာပါ ပါရမီ အားလုံးကို နားလည်နိုင်ခြင်း ဖြစ်လေသည်။
ပါရမီ ၁ ကို သူ လုံးဝ လစ်လျူရှုလိုက်၏။
ကျင့်ကြံခြင်း ကမ္ဘာတစ်ခုမှာ ကျည်ဆန် အကန့်အသတ် မရှိတဲ့ ပစ္စတို တစ်လက် ရှိတာက ဘာအသုံးဝင်မည်နည်း။
ပါရမီ ၂ က ကြည့်ဖို့ ပိုလို့တောင် သည်းမခံနိုင်စရာဖြစ်နေခဲ့သည်။ အကယ်၍ သူသာ ဒီပါရမီသစ်ကို ရွေးချယ်လိုက်ရင် သူ့လိင်အမျိုးအစား ပြောင်းလဲသွားဖို့ ဖြစ်နိုင်ချေ များတယ်လို့ ပိုင်ယီ လေးလေးနက်နက် သံသယ ဝင်မိလေသည်။
ထိုသို့ဆိုပါက တကယ့် ကြေကွဲစရာ ဖြစ်နေပေမည်။
ဒါက ပိုင်ယီကို ကျင့်ကြံခြင်း ကမ္ဘာထဲ ပထမဆုံးအကြိမ် ဝင်ရောက်ခဲ့တဲ့ ချင်းကျောက်ကို မတွေးဘဲ မနေနိုင်အောင် ဖြစ်သွားစေခဲ့သည်။
အဲဒီအချိန်တုန်းက...
ရိုးအတဲ့ ရွေးချယ်ခံနံပါတ် (၂) က တခြားသူတွေကို လှည့်စားဖို့ မွေးဖွားလာတဲ့ ပါရမီ တစ်ခုကို ရွေးချယ်ခဲ့သည်။
နောက်ဆုံးတော့... အဖြစ်အပျက်က သိပ်မျက်စိပသာဒ ဖြစ်စရာကောင်းခဲ့လေသည်။
ပါရမီ ၃ က ပိုင်ယီရဲ့ မျက်လုံးတွေကို အရောင်တောက်သွားစေခဲ့၏။ သူက မသေမျိုးကျင့်ကြံခြင်း ဂိုဏ်းတစ်ခုခုရဲ့ စီနီယာ အစ်ကိုကြီး သေချာပေါက် ဖြစ်လာမှာ ဖြစ်ပြီး ၎င်းက သူ့ကို သိပ်မြင့်မားတဲ့ စမှတ်တစ်ခု ပေးနိုင်ပေသည်။
အကယ်၍ အဲဒါက နိမ့်ကျတဲ့ကျင့်ကြံခြင်း ဂိုဏ်းတစ်ခု ဖြစ်နေရင်တောင်...
'စီနီယာ အစ်ကိုကြီး ဖြစ်လာနိုင်ဖို့ ဆိုတာ သူ့မှာ မသေမျိုးကျင့်ကြံခြင်း အရိုးက သေချာပေါက် ရှိနေရမယ်... ဒါက သိပ်မဆိုးလောက်ပါဘူး... ဟုတ်တယ်မလား...'
ပါရမီ ၄ ကိုလည်း ပိုင်ယီ လစ်လျူရှုလိုက်၏။
သူ ဘာလို့ ဒီလောက်များတဲ့ ညီအစ်ကို မောင်နှမတွေကို လိုအပ်ရမည်နည်း။ အကယ်၍ သူက ဒီလောက်များတဲ့ ညီအစ်ကို မောင်နှမတွေ ရှိတဲ့ ဆင်းရဲတဲ့ မိသားစုတစ်ခုမှာ ဝင်စားရင်...
သူ ရောင်းစားခံရလိမ့်မယ်လို့ ပိုင်ယီ လေးလေးနက်နက် သံသယ ဝင်မိလေသည်။
ပါရမီ ၅ က ကောင်းမွန်ပုံ ရပေမယ့် ပြဿနာက... ဒီအထဲမှာ လှည့်ကွက်တစ်ခု ရှိနေတယ်လို့ ပိုင်ယီ ခံစားလိုက်ရသည်။ သူက တစ်ကြိမ်ပဲ အဆင့်ချိုးဖျက်နိုင်မလား ဒါမှမဟုတ် အကြိမ်ကြိမ် အဆင့်ချိုးဖျက်နိုင်မလား ဆိုတာ မပြောထားချေ။
အကယ်၍ တစ်ကြိမ်တည်း ဆိုရင် ဒါက သိပ်အသုံးဝင်မှာ မဟုတ်ပေ။
'ပါရမီ ၆.... 'ပိုင်ယီ မေးစေ့ကို ပွတ်သပ်လိုက်ပြီး ခဏလောက် စဉ်းစားလိုက်၏။
ဒီရွေးချယ်မှုမှာ အားသာချက်ရော အားနည်းချက်ရော ရှိပြီး အားသာချက်က အကယ်၍ သူက ဖြောင့်မတ်သော ကျင့်ကြံခြင်း ဂိုဏ်းရဲ့ စီနီယာ အစ်ကိုကြီး ဖြစ်ခဲ့ရင် အရာအားလုံး အဆင်ပြေမှာ ဖြစ်ပြီး အကယ်၍ သူက မိစ္ဆာတစ်ကောင်အဖြစ် ဝင်စားရင်တော့ အဲဒါက ကိုယ့်သေတွင်း ကိုယ်တူးတာသလိုဖြစ်ကာ အလဟဿ ဖြစ်သွားပေမည်။
ပါရမီ ၇ ကတော့ ပိုင်ယီကို ကျော်သွားလို့ မရအောင် လုပ်လိုက်သည်။ အခြေတည်အဆင့်ဆိုတဲ့ စကားလုံးတွေက သူ့အတွက် ဆွဲဆောင်မှုရှိလွန်းနေခဲ့ပေသည်။
နှိုင်းယှဉ်ကြည့်လိုက်ရင် ပါရမီ ၈ က နည်းနည်း လွန်ကဲနေပြီး အကယ်၍ သူသာ ဒါကို ရွေးချယ်လိုက်ရင် သေချာပေါက် ဘီလူး တစ်ကောင် ဖြစ်လာမှာဖြစ်ပြီး ဒီဘီလူးက သန်မာမလား၊ အားနည်းမလား ဆိုတာ သူ မသိချေ။
ပါရမီ ၉ က ပိုင်ယီကို ကြောင်အသွားစေသည်။။
'သေစမ်း...'
'ပိုင်ယီ.... အို... ပိုင်ယီ မင်း ဘယ်လိုလုပ် ဒီမွေးရာပါ ပါရမီသစ်ကြောင့် စိတ်လှုပ်ရှားနေရတာလဲ...'
ပါရမီ ၁၀ က သိသာထင်ရှားစွာ ထောင်ချောက်တစ်ခုပင်။ ပိုင်ယီ နောက်တစ်ကြိမ် လစ်လျူရှုဖို့ ရွေးချယ်လိုက်၏။
ဘာပဲဖြစ်ဖြစ် သူက မသေမျိုးကျင့်ကြံခြင်း သရုပ်ဖော် စနစ်ထဲ နောက်တစ်ကြိမ် မဝင်ရောက်ခဲ့တာ ရက်ပေါင်းများစွာ ကြာခဲ့ပြီဖြစ်တာကြောင့် ဒီပါရမီသစ် (၁၀) ခု ရွေးချယ်မှုရာ၌ သဘာဝကျစွာ သေချာ စဉ်းစားဖို့ လိုအပ်လေသည်။
ခဏလောက် စဉ်းစားပြီးနောက် ပိုပြီး ကျိုးကြောင်းဆီလျော်တယ်လို့ သူ ထင်တဲ့ ဆုံးဖြတ်ချက် တစ်ခုကို နောက်ဆုံး ပြုလုပ်လိုက်သည်။
"၃..."
"၇...."
"၉..."
[သင်သည် ပါရမီ ၃ စီနီယာ အစ်ကိုကြီး၊ ပါရမီ ၇ အခြေတည်အဆင့် ဆေးလုံး၊ ပါရမီ ၉ သူခိုး ချောင်တို့ကို ရွေးချယ်လိုက်ပါသည်]
[သင့်တစ်ကိုယ်ရေ အရည်အသွေးများကို ကျပန်း သတ်မှတ်နေပါသည်...]
[ဖြန့်ဝေမှု ပြီးဆုံးပါပြီ]
[ရေတွက်ခြင်း - ၁၀...]
[...]
မသေမျိုးကျင့်ကြံခြင်း သရုပ်ဖော် စနစ်၏ ရေတွက်ခြင်း ပြီးဆုံးသွားသည့်အခါ ပိုင်ယီ သူ့အမြင်အာရုံ ရုတ်တရက် မည်းမှောင်သွားသည်ကို ခံစားလိုက်ရ၏။ သူ တစ်စုံတစ်ရာ ထိတ်လန့်ခြင်း မခံစားရပေ။ အဘယ်ကြောင့်ဆိုသော် သူ ကြာမြင့်စွာကတည်းက နေသားကျနေပြီဖြစ်သောကြောင့် ဖြစ်ပေသည်။
ဒါပေါ့ သူ့စိတ်အခြေအနေ လုံးဝ မပြောင်းလဲဘူးလို့ ပြောဖို့ သဘာဝကျစွာ မဖြစ်နိုင်ပေ။
လွန်ခဲ့တဲ့ မသေမျိုးကျင့်ကြံခြင်း သရုပ်ဖော်မှု အကြိမ် (၃၀) ကျော် အတွင်း သူဟာ ဘယ်တုန်းကမှ တစ်လထက် ပိုပြီး အသက်မရှင်ခဲ့ဖူးချေ။
အကယ်၍ ဒီလောက် အချိန်အကြာကြီး နေပြီးတာတောင် သူ ထိတ်လန့်နေသေးရင် အဲဒါက အလွန် ရှက်စရာ ကောင်းနေမည်ပင်။
မကြာမီမှာ ပိုင်ယီဟာ သူ့အသိစိတ်ကို တဖြည်းဖြည်း ပြန်လည် ထိန်းချုပ်နိုင်လာခဲ့သည်။ တစ်ချိန်တည်းမှာပဲ ဆလိုက်နဲ့တူတဲ့ပုံရိပ် တစ်ခု သူ့စိတ်ထဲ ရုတ်တရက် ဖြတ်သန်းသွားခဲ့သည်။
လူတစ်ယောက်ရဲ့ ဘဝကို မိတ်ဆက်ပေးသလိုမျိုး ပုံရိပ်တွေ သူ့စိတ်ထဲ ဖြတ်သန်းသွားခဲ့လေသည်။
သူ မွေးကင်းစ အရွယ်တုန်းက ကြီးမားတဲ့ မိသားစုတစ်ခုထဲမှာ မွေးဖွားခဲ့ပြီး သူ ငယ်စဉ်ကတည်းက အစားအသောက်၊ အဝတ်အစား အတွက် ဘယ်တုန်းကမှ ပူပန်စရာ မလိုခဲ့ပေ။ သူက သခင်လေးတစ်ယောက်အဖြစ် မွေးဖွားလာခဲ့သည်။
သူ ကလေးဘဝတုန်းက သူ့ကျင့်ကြံမှုကို စစ်ဆေးဖို့ စေလွှတ်ခြင်း ခံခဲ့ရပြီး ရလဒ်အနေနဲ့ သူ့မှာ ကောင်းမွန်တဲ့ ကျင့်ကြံခြင်း အခြေခံအုတ်မြစ်ရှိခဲ့ပြီး မသေမျိုး ဂိုဏ်းတစ်ခုထဲ ဝင်ရောက်နိုင်ခဲ့သည်။
သူ လူငယ်ဘဝတုန်းက ကြိုးစားအားထုတ်မှုနဲ့ ကံတရား အနည်းငယ်ကြောင့် အတွင်းစည်း ဂိုဏ်းသားတစ်ယောက် ဖြစ်လာခဲ့သည်။
သူ အရွယ်ရောက်လာတဲ့ အခါ ဂိုဏ်းပြိုင်ပွဲကို ဖြတ်ကျော်ပြီး စစ်မှန်သော တပည့်တစ်ယောက် ဖြစ်လာခဲ့သည်။
သို့သော် ကောင်းသည့် အချိန်ကာလတွေက ကြာကြာ မခံခဲ့ပေ။
အဓိက ဇာတ်ကောင်က အသက် (၂၃) နှစ် အရွယ်မှာ သူ ပါဝင်တဲ့ မသေမျိုးကျင့်ကြံခြင်း ဂိုဏ်းက မိစ္ဆာကျင့်ကြံသူတစ်ယောက်ရဲ့ တိုက်ခိုက်ခြင်းကို ခံခဲ့ရသည်။ တိုက်ပွဲက တစ်လတိတိ ကြာမြင့်ခဲ့ပြီး မသေမျိုးကျင့်ကြံခြင်းဂိုဏ်းက ပြိုကွဲသွားပြီး ဂိုဏ်းသခင်ကလည်း တိုက်ပွဲမှာ သေဆုံးသွားခဲ့ရသည်။
ဒါပေမဲ့ မိစ္ဆာကျင့်ကြံသူတွေက ပိုတောင် သနားစရာ ကောင်းသေးလေသည်။ သူတို့ သံပြားကို ကန်မိလိမ့်မယ်လို့ မျှော်လင့်မထားခဲ့ကြပေ။ ပြီးတော့ ဒီမသေမျိုးကျင့်ကြံခြင်းဂိုဏ်းက ကိုင်တွယ်ဖြေရှင်းဖို့ ဒီလောက် ခက်ခဲလိမ့်မယ်လို့ သူတို့ မျှော်လင့်မထားခဲ့ကြချေ။
မိစ္ဆာကျင့်ကြံသူ အားလုံး ချေမှုန်းခြင်း ခံလိုက်ရသည်။
ဆလိုက်ထဲက အဓိက ဇာတ်ကောင်လည်း ဒီတိုက်ပွဲကြီး အပြီးမှာ ပင်ပန်းနွမ်းနယ်မှုကြောင့် သတိလစ်သွားခဲ့တယ်။
အဲဒီနောက်ပိုင်း ဘာမှ မရှိတော့ပဲ ဆလိုက်က ပြီးဆုံးသွားခဲ့သည်။
ချက်ချင်းပင် ပိုင်ယီဟာ ဖြည်းညှင်းစွာ နိုးထလာပြီး တိုးညင်းတဲ့ အသံတချို့ကို သူ ကြားလိုက်ရ၏။
"ဟူး... ငါတို့အဲဒီသောက်ကျိုးနည်းမိစ္ဆာတွေကိုအောင်မြင်စွာသတ်ဖြတ်နိုင်ခဲ့ပေမယ့်ငါတို့ရဲ့ဝိညာဉ်ဂိုဏ်းကတော့အပျက်အစီးဖြစ်သွားပြီ... ဒီတိုက်ပွဲကြီးမှာတပည့်ထောင်ပေါင်းများစွာအသက်ဆုံးရှုံးခဲ့ရပြီးဂိုဏ်းသခင်တောင်မိစ္ဆာတွေရဲ့လက်ချက်နဲ့သေဆုံးသွားခဲ့ရသေးတယ်"