အခန်း ၁၃၈ : ပထမဆုံး လူသားများကို တွေ့ရခြင်း
ဖူရွှမ်နီဟာ မိကျောင်းလိပ်နှင့် တူသည့် မိစ္ဆာသားရဲ တစ်ကောင်ကို သူမ၏ လက်ထောက်အဖြစ် ထားရှိခဲ့သည်။ အဘယ်ကြောင့်ဆိုသော် ဤမိစ္ဆာသားရဲက မိစ္ဆာသားရဲ အုပ်စုထဲတွင် ဉာဏ်အကောင်းဆုံး ဖြစ်ပြီး အသန်မာဆုံးလည်း ဖြစ်သောကြောင့် ဖြစ်လေသည်။ သို့သော် ဖူရွှမ်နီ မတတ်သာလို့သာ လူပုလေးတွေထဲက အရပ်အရှည်ဆုံး လူကို ရွေးချယ်သကဲ့သို့ ရွေးချယ်ခဲ့ရပေသည်။
[တစ်ရက် ကြာပြီးနောက် ဖူရွှမ်နီဟာ သူမ၏ ပိုင်နက်ကို စစ်ဆေးခဲ့သည်။ သူမဟာ အတော်လေး ကျေနပ်အားရနေခဲ့ပြီး နောက်ထပ် မိစ္ဆာသားရဲ တစ်အုပ်ကို ခေါ်ဆောင်သွားပြီး မိစ္ဆာသားရဲ အသုတ်သစ် တစ်ခုကို ယဉ်ပါးအောင် ပြုလုပ်ခဲ့သည်။]
[သူမ၏ ဂန်းစတာဂိုဏ်းအဖွဲ့တွင် မိစ္ဆာသားရဲ (၃၅) ကောင် အထိ ရှိလာခဲ့သည်။]
[အသက် ၁၅ နှစ် - ဖူရွှမ်နီ၏ လမ်းညွှန်မှုမှတဆင့် သူမ၏ ဂန်းစတာဂိုဏ်းအဖွဲ့ထဲရှိ မိစ္ဆာသားရဲ တိုင်းဟာ အနည်းဆုံး စာလုံးရေ (၂၀၀) ဖတ်ရှုတတ်လာခဲ့ကြသည်။]
[သူမ၏ လက်ထောက် မိကျောင်းလိပ်ကတောပ စာလုံးရေ (၈၀၀) ဖတ်ရှုနိုင်ခဲ့သည်။]
[အသက် ၁၆ နှစ် - ဖူရွှမ်နီဟာ အဆင့်ချိုးဖျက်ရန် ကြိုးစားခဲ့သည်…]
[သူမ အောင်မြင်သွားခဲ့သည်]
[ဖူရွှမ်နီဟာ ချီစုစည်းမှု အဆင့် (၆) သို့ ရောက်ရှိသွားခဲ့ပါပြီ]
[…]
ချင်းဟယ် ခရိုင်။
ပိုင်ယီဟာ ဖူရွှမ်နီ၏ (၁၆) နှစ်ကြာ မသေမျိုးကျင့်ကြံခြင်း သရုပ်ဖော် ဘဝကို ကြည့်ပြီး ကိုယ့်ကိုယ်ကိုယ် ရေရွတ်လိုက်၏။ "သူမက အလိုက်သင့် ပြောင်းလဲတာတော်တော် မြန်ဆန်တာပဲ... ပထမဆုံးအကြိမ် မသေမျိုးကျင့်ကြံခြင်း သရုပ်ဖော်တုန်းက သူမမှာ အခက်အခဲ တချို့ ရှိခဲ့တယ်... ဒါပေမဲ့ ဒုတိယအကြိမ် ကျတော့ အရာအားလုံး ချောမွေ့သွားခဲ့ပြီပဲ"
ပိုင်ယီဟာ ရွေးချယ်ခံတိုင်းရဲ့ မသေမျိုးကျင့်ကြံခြင်း သရုပ်ဖော်မှုကို အလေးအနက်ထား ဂရုစိုက်လေ့ရှိသည်။
......
ဖူရွှမ်နီဟာ မိစ္ဆာသားရဲ တစ်အုပ်ကို အနိုင်ယူ သိမ်းသွင်းပြီး ဘုရင်မတစ်ပါး ဖြစ်လာသည်ကို သူ မြင်လိုက်ရသောအခါ သူ့မျက်နှာက အနည်းငယ် ထူးဆန်းသွားခဲ့သည်။
"သူမက မိစ္ဆာသားရဲ တစ်ကောင် ဆိုတဲ့ သူမရဲ့ ကိုယ်ပိုင်အမှတ်အသားကို လက်ခံလိုက်ရုံတင် မကဘူး ပြီးပြည့်စုံစွာ ရောနှောနေထိုင်သွားတာပဲ"
"မိစ္ဆာသားရဲ တစ်အုပ်ကို စာဖတ်ဖို့ သင်ပေးနေတာ…"
"ဒါက နည်းနည်း ရယ်စရာ ကောင်းနေတယ်......"
ဖူရွှမ်နီ၏ ရည်မှန်းချက်က ဒေသတစ်ခုထဲက မိစ္ဆာသားရဲ ဘုရင် ဖြစ်လာရုံနဲ့ ကန့်သတ်ထားမှာ မဟုတ်ကြောင်း ပိုင်ယီ သိလေသည်။ ဒီလိုလုပ်ဆောင်ရတဲ့ ပိုနက်ရှိုင်းတဲ့ အကြောင်းပြချက် သူမဆီမှာ သေချာပေါက် ရှိနေပြီး သူမဆီမှာ ပိုကြီးမားတဲ့ ရည်မှန်းချက်လည်း ရှိနေလေသည်။
ပြဿနာက… ဒီလောက် တုံးအပုံရတဲ့ မိစ္ဆာသားရဲ တစ်သိုက်နဲ့ သူတို့ ကြီးကျယ်တဲ့ ကိစ္စရပ်တွေကို အောင်မြင်အောင် လုပ်နိုင်မလားဆိုတာပင်။
…
"ချီစုစည်းမှု အဆင့် (၆)… ဟူး... မိစ္ဆာသားရဲ ခန္ဓာကိုယ်ရဲ့ ကျင့်ကြံမှုက နှေးလွန်းတာပဲ... အကယ်၍ မိစ္ဆာ အမြုတေရဲ့ အကူအညီသာ မရှိရင် ငါ အများဆုံး ချီစုစည်းမှုအဆင့် (၁) လောက်မှာပဲ ရှိနေဦးမှာလား"
သူမကို စောင့်ကြည့်နေတဲ့ မျက်လုံးတစ်စုံ ရှိနေမှန်း ဖူရွှမ်နီ မသိခဲ့ပေ။
မျက်လုံး ဖွင့်ပြီးနောက် သူမခန္ဓာကိုယ်ပေါ်က အမွေးတွေကို ခါလိုက်ပြီး မျှော်လင့်ချက်မဲ့စွာ ခေါင်းခါလိုက်၏။
အကယ်၍ လက်တွေ့ဘဝက သူမသာ ဆိုရင် ထူးချွန်တဲ့ ပါရမီနဲ့ သူမဟာ အခုလောက်ဆို ချီစုစည်းမှု အဆင့် (၉) ကို အဆင့်ချိုးဖျက် ဝင်ရောက်နိုင်နေပြီလို့ ခံစားရလေသည်။
ဒါမှမဟုတ် ချီစုစည်းမှု အဆင့် (၁၀)......
မဖြစ်နိုင်တာတော့ မဟုတ်ချေ။
'နှမြောစရာ ကောင်းလိုက်တာ..'
လက်တွေ့ကမ္ဘာမှ မသေမျိုးကျင့်ကြံခြင်း အမြစ်အရိုး အခြေခံအုတ်မြစ်ကို မသေမျိုးကျင့်ကြံခြင်း သရုပ်ဖော် စနစ်ထဲ လုံးဝ ယူဆောင်လာလို့ မရပေ။
ထို့အပြင် အကယ်၍ သူမ ယူဆောင်လာနိုင်ရင်တောင် မေးခွန်းက လူသား တစ်ယောက်ရဲ့ မသေမျိုးကျင့်ကြံခြင်း အမြစ်အရိုး အခြေခံအုတ်မြစ်နဲ့ မိစ္ဆာသားရဲ တစ်ကောင်ရဲ့ ခန္ဓာကိုယ်နဲ့ ပြီးပြည့်စုံစွာ ပေါင်းစပ်နိုင်ပါ့မလားဆိုတာပင်။
သူမ ဝင်စားတဲ့ အခါ ပေါက်ကွဲပြီး သေဆုံးသွားမှာ မလိုလားပဲ အဲဒါက သိပ်ကြည့်ရဆိုးနေပေမည်။
"အရှင်မ… အရှင်မ" အသံတစ်ခု အဝေးကနေ ရုတ်တရက် ထွက်ပေါ်လာခဲ့သည်၊ "အရှင်မ ကျွန်… ကျွန်တော်… ကျွန်တော် တစ်ခုခု တွေ့ခဲ့တယ်"
အသံ နီးကပ်လာတာနဲ့ အမျှ သူမခြေအောက်က မြေကြီး တုန်ခါသွားသလို ဖြစ်သွားခဲ့သည်။
အလွန် ကြီးမားသည့် မိကျောင်းလိပ်တစ်ကောင်ဟာ အလွန် မြန်ဆန်သည့် အရှိန်အဟုန်ဖြင့် ပြေးလာနေတာကို တွေ့လိုက်ရသည်။
၎င်း၏ တုတ်ခိုင်သည့် ခြေလက်များက ကြီးမားသည့်တွင်းပေါက်ကြီးတစ်ခုကို ဖန်တီးနိုင်လေသာ်။
အကယ်၍ ၎င်းဟာ ကျောက်တုံး တစ်တုံးကို နင်းမိပါက ကျောက်တုံးက ကြေမွသွားပေလိမ့်မည်။
၎င်းဟာ ဖူရွှမ်နီအနီးရောက်တာနဲ့ ရပ်တန့်လိုက်သည်။ ၎င်း၏ ကြမ်းကြုတ်သည့် ပုံစံ ရှိသည့် ခေါင်းက စကားလုံးများကို စီစဉ်ရန် ကြိုးစားနေသကဲ့သို့ တုံးအသည့် မျက်နှာအမူရာဖြင့် ဖြစ်နေခဲ့သည်။ အချိန်အကြာကြီး နေပြီးနောက် ၎င်း ပြောလိုက်သည်။ "အရှင်မ...လူသားတွေ… ကျွန်တော်တို့ ပိုင်နက်ထဲ ဝင်ရောက်လာတဲ့ လူသားတွေ ရှိတယ်"
မိစ္ဆာသားရဲ တစ်ကောင် အတွက် လူစကား ပြောဖို့ ခက်ခဲလေသည်။
ရလဒ်အနေနဲ့ ၎င်း စကားပြောသည့်အခါ ထူးဆန်းတဲ့ လေသံထွက်ပေါ်နေခဲ့သည်။
ဝေးလံခေါင်သီတဲ့ နေရာဒေသ တစ်ခုက လူတစ်ယောက်စကားပြောနေသလိုပင်။
အကယ်၍ ဖူရွှမ်နီသာ နေသားမကျခဲ့ရင် ၎င်း ဘာပြောနေလဲ ဆိုတာ သူမ သိတောင် သိမှာ မဟုတ်ပေ။
"လူသားတွေ ရှိတယ်" ဖူရွှမ်နီ ပြီးပြည့်စုံစွာ ပြောလိုက်၏။
မိကျောင်းလိပ်က ၎င်း၏ ခေါင်းကို ခပ်ဖွဖွ ပုတ်လိုက်ပြီး မပြောမီ ခဏလောက် စဉ်းစားလိုက်သည် ။"လူသား… (၃) ယောက် ရှိတယ်.... သူတို့မှာ… ဝိညာဉ်စွမ်းအင် အတက်အကျတွေ ရှိတယ်... အဲဒါ မသေ… မသေမျိုး…"
၎င်း၏ စကားထစ်သွားပြီး ဆက်ပြောရမည် စကားလုံးများကို မေ့သွားခဲ့သည်။
သို့သော် ဒီလောက် ပြောပြီးမှတော့ အဲဒီ လူသား (၃) ယောက်က ကျင့်ကြံသူတွေ ဖြစ်ကြောင်း ဖူရွှမ်နီ သဘာဝကျစွာ သိလိုက်သည်။
ဒါက ဖူရွှမ်နီရဲ့ မျက်လုံးထဲမှာ အံ့သြမှု အရိပ်အယောင် တစ်ခု လက်ခနဲ ဖြစ်သွားစေပေမယ့် သူမမျက်လုံးထဲက ခံစားချက်တွေ လျင်မြန်စွာ ပျောက်ကွယ်သွားခဲ့သည်။
"ငါ့ကို လိုက်ပြစမ်း ပြီးတော့ တခြား မိစ္ဆာသားရဲတွေကိုလည်း ခေါ်လိုက်... ငါတို့ အတူတူ သွားကြည့်ကြမယ်" ဖူရွှမ်နီ ပြောလိုက်သည်။
"ဟုတ်ကဲ့ အရှင်မ"
ဖူရွှမ်နီဟာ မိကျောင်းလိပ် မိစ္ဆာသားရဲ၏ ကျောပေါ်သို့ တက်လိုက်သည်။ လိပ်ကျောပေါ်တွင် ရပ်နေသည့် သူမဟာ အလွန် သက်သောင့်သက်သာ ရှိနေပုံရပြီး မိကျောင်းလိပ် မိစ္ဆာသားရဲက ၎င်း၏ တုတ်ခိုင်သည့် ခြေလက်များကို လှုပ်ရှားကာ လှည့်ထွက်ပြီး ရှေ့သို့ တစ်လှမ်းချင်း လျှောက်သွားလိုက်သည်။
ရိုးသားစွာ ပြောရရင် ဒီမသေမျိုးကျင့်ကြံခြင်း ကမ္ဘာထဲမှာ လူသား မသေမျိုးကျင့်ကြံသူတွေ ရှိနေတာက သူမကို အနည်းငယ် အံ့သြမိစေခဲ့သည်။
ဘာပဲဖြစ်ဖြစ် သူမ ဒီနေရာမှာ ဝင်စားခဲ့တာ စုစုပေါင်း (၁၆) နှစ် ရှိပြီး ပြီးခဲ့တဲ့ သရုပ်ဖော် ဘဝက (၁၂) နှစ်နဲ့ ပေါင်းလိုက်ရင် စုစုပေါင်း (၂၈) နှစ် အတွင်း သူမဟာ လူသား တစ်ယောက်မှ မမြင်ဖူးခဲ့ပေ။ ထို့ကြောင့် လူသား မသေမျိုးကျင့်ကြံသူ ဆိုရင် ပြောစရာတောင် မလိုတော့ချေ။
ဒီကမ္ဘာမှာ မိစ္ဆာသားရဲတွေပဲ ရှိတယ်လို့တောင် ဖူရွှမ်နီ သံသယ ဝင်မိခဲ့သည်။
သူမ မြင်တွေ့နိုင်တဲ့ တိရစ္ဆာန်တွေက… ဉာဏ်ရည်မရှိတဲ့ သားရဲတွေက လွဲရင် တုံးအတဲ့ မိစ္ဆာသားရဲ တစ်သိုက်ပင်။
အဲဒါက လွဲရင် သူမ တခြား ဘာမှ မမြင်ဖူးခဲ့ပေ။
အခု သူမရဲ့ ပိုင်နက်ထဲ အတင်းဝင်ရောက်လာတဲ့ လူသားကျင့်ကြံသူ (၃) ယောက် ရှိနေရာ ဖူရွှမ်နီက သဘာဝကျစွာ သွားကြည့်ချင်မိခဲ့သည်။
ဒီကမ္ဘာက လူသားကျင့်ကြံသူတွေနဲ့ လက်တွေ့ကမ္ဘာက လူသားကျင့်ကြံသူတွေကြားက ကွာခြားချက်ကို သူမ မြင်ချင်ခဲ့သည်။
ဘာကွာခြားချက် ရှိလဲဆိုတာကိုပေါ့.....
ဒါပေမဲ့ သူမ အလျင်စလို သွားရောက်ခြင်း မပြုဘဲ အမိန့်ကိုသာ ပေးလိုက်သည်။