အခန်း ၁၃၅ : ဖူရွှမ်နီ၏ ဒုတိယအကြိမ်မြောက် အတွေ့အကြုံ စတင်ခြင်း
ညအမှောင် ကျရောက်လာခဲ့သည်။
ချင်းဟယ် ခရိုင်၏ ညအချိန်ဟာ အလွန် တိတ်ဆိတ်နေခဲ့လေသည်။ သာမန်လူ အများစုဟာ ညဘက် အပြင်ထွက်ရဲခြင်း မရှိကြပဲ ရုတ်တရက် မိစ္ဆာတစ်ကောင် သို့မဟုတ် သရဲတစ်ကောင်နှင့် တွေ့ဆုံမလား ဆိုတာ ဘယ်သူ သိနိုင်ပါမည်နည်း။
ထိုသာမန်လူများ အတွက် သာမန် လှည့်လည်သွားလာနေသော သရဲတစ်ကောင်ကပင် သူတို့အား ကြောက်လန့်တကြား ဖြစ်သွားစေရန် လုံလောက်ပေသည်။
ထို့အပြင် လွန်ခဲ့သည့် ရက်အနည်းငယ်က ချင်းဟယ် ခရိုင်အတွင်းမှာ မိစ္ဆာကျင့်ကြံသူတစ်ဦး စိမ့်ဝင်လာသည့် သတင်းက အကြောင်းပြချက် တစ်စုံတစ်ရာကြောင့် ခရိုင်တစ်ခုလုံး ပျံ့နှံ့သွားခဲ့သည်။
ဤအရာက ချင်းဟယ် ခရိုင်ရှိ လူတိုင်းကို စိုးရိမ်ပူပန်မှု ဖြစ်သွားစေခဲ့သည်။
ပုံမှန်အားဖြင့် သူတို့ဟာ သာမန် လှည့်လည်သွားလာနေသော သရဲတစ်ကောင်ကိုပင် ကြောက်ရွံ့တတ်ကြရာ မျက်တောင်မခတ်ဘဲ လူသတ်တတ်သည့် မိစ္ဆာကျင့်ကြံသူ တစ်ဦး ဆိုလျှင် ပြောစရာ မလိုတော့ပေ။
ဤအချိန်တွင် ဖူရွှမ်နီဟာ သူမလက်ထဲမှ အစိုးရ ကိစ္စရပ်များအားလုံးကို ချထားလိုက်ပြီ ဖြစ်၏။အဘယ်ကြောင့်ဆိုသော် မသေမျိုးကျင့်ကြံခြင်း သရုပ်ဖော် စနစ်၏ ပြန်လည်အသုံးပြုနိုင်မည့် အချိန် ပြည့်သွားသောကြောင့်ပင်။
သူမ အနည်းငယ် စိတ်လှုပ်ရှားနေခဲ့သည်။
သူမ စိတ်လှုပ်ရှားရသည့် အကြောင်းရင်းမှာ သဘာဝကျစွာပင် သူမဟာ မသေမျိုးကျင့်ကြံခြင်း သရုပ်ဖော် စနစ်ထဲသို့ နောက်တစ်ကြိမ် ဝင်ရောက်ခွင့် မရတော့မည်ကို စိုးရိမ်နေသောကြောင့် ဖြစ်လေသည်။
ကံကောင်းစွာဖြင့် သူမ ရင်းနှီးသည့် စာသားများပေါ်လာသည်ကို မြင်လိုက်ရသောအခါ ဖူရွှမ်နီ တိတ်တဆိတ် သက်ပြင်းချလိုက်၏။
သူမ သရုပ်ဖော် စနစ်ထဲ ဝင်ရောက်နိုင်သေးပေသည်။
[မသေမျိုးကျင့်ကြံခြင်း သရုပ်ဖော် စနစ်မှ နောက်တစ်ကြိမ် ကြိုဆိုပါသည်။ သင့်တွင် လက်ရှိ ရွေးချယ်စရာ (၂) ခု ရှိပါသည်]
......
[ရွေးချယ်စရာ ၁ - မသေမျိုးကျင့်ကြံခြင်း ဘဝ သရုပ်ဖော်မှုကို ဆက်လက် လုပ်ဆောင်ပါ။ ဤရွေးချယ်မှုက ယခင် သရုပ်ဖော် ဘဝ၏ အရည်အသွေးများနှင့် မွေးရာပါ ပါရမီကို ဆက်ခံရရှိမည် ဖြစ်သော်လည်း သင် အစမှ ပြန်စရပါမည်။]
[ရွေးချယ်စရာ ၂ - ဘဝသစ် တစ်ခု ပြန်လည်စတင်ပါ။ ဤရွေးချယ်မှုက မွေးရာပါ ပါရမီကို ပြန်လည်ရွေးချယ်ရမည် ဖြစ်ပြီး တစ်ကိုယ်ရေ အရည်အသွေးများကို ကျပန်း သတ်မှတ်ပေးမည် ဖြစ်ပြီ အရာအားလုံး အစမှ ပြန်စရပါမည်။]
[ကျေးဇူးပြု၍ ရွေးချယ်ပါ]
သူမရှေ့တွင် ပေါ်လာသည့် စာသားများကို ကြည့်ပြီး ဖူရွှမ်နီ ကိုယ့်ကိုယ်ကိုယ် တွေးလိုက်၏။ 'ငါ နောက်ထပ် ဘဝတစ်ခု စတင်လို့ ရနိုင်တာလား'
သို့သော် သူမ ဒုတိယ ရွေးချယ်စရာကို မရွေးချယ်ခဲ့ပေ။ အကြောင်းရင်းမှာ သူမ နေ့ခင်းဘက်တွင် မိစ္ဆာသားရဲများ အကြောင်း လေ့လာခဲ့ပြီးခါစ ဖြစ်သောကြောင့် ဖြစ်၏။
နောက်ဆုံးတော့ သူမဟာ သရုပ်ဖော် ဘဝသစ် တစ်ခု ပြောင်းလဲလိုက်ရင် သူမ၏ အချိန်တွေ ဖြုန်းတီးရာ ရောက်ပေမည်။
"ငါ နံပါတ် (၁) ကို ရွေးမယ်"
ဖူရွှမ်နီဟာ မိစ္ဆာသားရဲ အဖြစ် ဆက်လက် နေထိုင်ရန် ရွေးချယ်လိုက်သည်။ အဘယ်ကြောင့်ဆိုသော် သူမ၏ မွေးရာပါ ပါရမီကို သူမ အတော်လေး ကျေနပ်နေသောကြောင့် ဖြစ်လေသည်။
ရွှေအမြုတေအဆင့် မိစ္ဆာ အမြုတေကို ကောင်းကောင်း အသုံးပြုနိုင်သရွေ့ သူမဟာ သေချာပေါက် ပိုသန်မာလာနိုင်ပေသည်။
ဒါ့အပြင် ပထမ ရွေးချယ်စရာကို ရွေးချယ်ပြီးနောက် အနာဂတ်မှာ ဘာဖြစ်လာမလဲ ဆိုတာ သူမ သိနေပေပြီ။
ဒါက သူမကို လှုပ်ရှားဆောင်ရွက်ဖို့ လုံလောက်တဲ့ အခွင့်အရေး ပေးထားတာဖြစ်ပြီး အနာဂတ်ကို ကြိုသိနေပေသည်။
သူမ၌ အားသာချက် ရှိနေပေသည်။
[သင်ဟာ မသေမျိုးကျင့်ကြံခြင်း ဘဝ သရုပ်ဖော်မှုကို ဆက်လက် လုပ်ဆောင်ရန် ရွေးချယ်လိုက်သည်။ သင့်မွေးရာပါ ပါရမီများမှာ - လူသားမဟုတ်သူ (မည်သို့ပင် ဖြစ်စေ၊ သင် လူသားအဖြစ် ဝင်စားမည် မဟုတ်ပါ)၊ မိစ္ဆာ အမြုတေ(ရွှေအမြုတေ အဆင့် မိစ္ဆာသားရဲ တစ်ကောင်၏ မိစ္ဆာ အမြုတေ)၊ ပြန်ကန်ခြင်း (သင့်တွင် ရန်သူ၏ တိုက်ခိုက်မှုကို တွန်းလှန်နိုင်သည့် ၅၀% အခွင့်အလမ်း ရှိသည်။ သင့်နောက်တစ်ကြိမ် တိုက်ခိုက်မှုက ရန်သူကို ၁၀၀% ထိမှန်ပါမည်)]
.
[သင့်တစ်ကိုယ်ရေ အရည်အသွေးများက ယခင် မသေမျိုးကျင့်ကြံခြင်း သရုပ်ဖော် ဘဝမှ အရည်အသွေးများကို ဆက်ခံရရှိပြီး ဖြစ်သည်။]
[သရုပ်ဖော်မှု စတင်ပါပြီ]
ဒီစာသား အနည်းငယ် ပေါ်လာပြီနောက် သူမရဲ့အမြင်အာရုံက မည်းမှောင်သွားပြီး သူမရဲ့ အသိစိတ် ထိန်းချုပ်မှု လွတ်သွားသလို ခံစားလိုက်ရသည်။
သူမ အသိစိတ် ပြန်ဝင်လာသည့် အခါ ဥတစ်လုံးထဲ ရောက်ရှိနေကြောင်း သဘောပေါက်လိုက်သည်။
ဖူရွှမ်နီ ဘာမှ မပြောဘဲ ဥခွံကို စတင် ဆိတ်လိုက်၏။
[အသက် ၀ နှစ် - သင်ဟာ မသေမျိုးကျင့်ကြံခြင်း ကမ္ဘာထဲသို့ ဝင်စားခဲ့သည်။ သို့သော် သင် ဝင်စားသည့် မျိုးနွယ်စုမှာ အတော်လေး ထူးခြားပြီး မိစ္ဆာသားရဲ တစ်ကောင် ဖြစ်လာခဲ့သည်။ မိစ္ဆာသားရဲများ အနက် သင့်မျိုးနွယ်စု အမည်မှာ — လမင်းကျီးကန်းဖြစ်သည်]
[ဥခွံကို ဖောက်ထွက်ရန် အားထုတ်မှု အများအပြား ပြုလုပ်ပြီးနောက် သင်ဟာ ကျိုးပဲ့နေသည့် ဥခွံ အားလုံးကို ဗိုက်ထဲသို့ မျိုချလိုက်သည်။]
[မိစ္ဆာသားရဲ၏ ခန္ဓာကိုယ်ကို အသုံးပြုပြီး ကောင်းကင်မြေကြီးဝိညာဥ်ချီကို စုပ်ယူရန် စတင် ကြိုးစားသော်လည်း အထူးတလည် ချောမွေ့ခြင်း မရှိခဲ့ပေ။]
ဖူရွှမ်နီ စိတ်ဓာတ်မကျခဲ့ပေ။ သူမ ဝင်စားခဲ့သည့် လမင်းကျီးကန်း မိစ္ဆာသားရဲက ရှားပါးသည့် မိစ္ဆာသားရဲ တစ်ကောင် မဟုတ်ကြောင်း သူမ သိလေသည်။
၎င်းတွင် ထူးခြားသည့် သွေးမျိုးဆက် မရှိသလို ချဲ့ကားလွန်းသော ပါရမီ သို့မဟုတ် အရိုးဖွဲ့စည်းပုံလည်း မရှိပေ။
အကယ်၍ သူမ ပိုသန်မာလာချင်ပါက သူမ အလျင်လိုလို့ မရပေ။
"အဲဒီ ရွှေအမြုတေ အဆင့် မိစ္ဆာသားရဲ မပေါ်လာသေးဘူး... သူ မပေါ်လာခင် ပြင်ဆင်ဖို့ အခွင့်အရေး ယူလို့ ရတယ်... ပထမဆုံး အရေးအကြီးဆုံး အချက်က ငါ့ရဲ့ စိတ်ဆန္ဒနဲ့ ဝိညာဉ်ကို လေ့ကျင့်ဖို့ပဲ.... ဘာလို့လဲဆိုတော့ ဒါက ငါ့ဝိညာဉ်ရဲ့ ခွန်အားနဲ့ နီးကပ်စွာ ဆက်စပ်နေလို့ပဲ"
"အကယ်၍ ငါ့ဝိညာဉ်ရဲ့ ခွန်အားက ပိုမြင့်မားလာရင် အဲဒီ ရွှေအမြုတေအဆင့် မိစ္ဆာက ငါ့ကို ဝင်ရောက်စီးနင်းဖို့ အချိန်နဲ့ စွမ်းအင်တွေ ပိုလိုအပ်လာလိမ့်မယ်"
ဖူရွှမ်နီဟာ သူမရဲ့ နောက်တစ်ဆင့် အစီအစဉ်အတွက် ကိုယ့်ကိုယ်ကိုယ် ရေရွတ်ရင်း ထူးဆန်းသော လေသံတစ်ခုကို အသုံးပြုလိုက်သည်။
[အသက် ၁ နှစ် - သင့်စိတ်ဆန္ဒကို လေ့ကျင့်ရန် သင် နည်းလမ်း အမျိုးမျိုး အသုံးပြုခဲ့သည်။ ၎င်းတွင် လက်ရှိ သင်ပင် လွတ်မြောက်ရန် မဖြစ်နိုင်သည့် အန္တရာယ်ရှိသည့် အခြေအနေများ ထဲသို့ ဝင်ရောက်ခြင်း ပါဝင်ခဲ့သည်။]
[အန္တရာယ်ရှိသည့် အခြေအနေများက ယူဆောင်လာသည့် အန္တရာယ်နှင့် ကြောက်ရွံ့မှု အာရုံခံစားချက်ကို အသုံးပြုပြီး သင့်အသက် အန္တရာယ် စိုးရိမ်ရသည့်ကြုံတွေ့မှု အနည်းငယ် အပြီးတွင်…]
[သင့်စိတ်ဆန္ဒ စွမ်းအားက အောင်မြင်စွာ ပိုမို မြင့်မားလာခဲ့သည်]
[အသက် ၂ နှစ် - သင့်အတောင်ပံများက ပြီးခဲ့သည့် အကြိမ်ထက် တစ်နှစ် စောပြီး အပြည့်အဝ ကြီးထွားလာခဲ့ကာ သင်ဟာ တစ်ကြိမ်တည်း ကြိုးစားရုံဖြင့် ပျံသန်းနိုင်ခဲ့သည်။ ပျံသန်းနိုင်သည့် စွမ်းရည်ဖြင့် သင့်ကို ပိုမို သန်မာလာစေနိုင်သည့် ဝိညာဉ် ဆေးဖက်ဝင် အပင်များကို တောင်တန်းများထဲတွင် ရှာဖွေခဲ့သည်။]
[သင် ဝိညာဉ် ဆေးဖက်ဝင် အပင် တစ်ပင် ရှာတွေ့ပြီး တွေဝေခြင်း မရှိဘဲ စားသုံးလိုက်ရာ သင့်ခန္ဓာကိုယ် ဖွဲ့စည်းပုံက အများအပြား တိုးတက်လာခဲ့သည်။]
[ခန္ဓာကိုယ် ဖွဲ့စည်းပုံ +၃]
[သင်ဟာ ချီစုစည်းမှု အဆင့် (၁) မိစ္ဆာသားရဲ တစ်ကောင်နှင့် တွေ့ဆုံခဲ့ပြီး ၎င်းက သင့်ကို အစာအဖြစ် သတ်မှတ်ခဲ့သည်။ သင့်ပျံသန်းနိုင်သည့် စွမ်းရည်ဖြင့် သေလုနီးပါး တိုက်ပွဲတစ်ခု အပြီးတွင် ၎င်းကို အောင်မြင်စွာ သတ်ဖြတ်နိုင်ခဲ့သည်]
[ချီစုစည်းမှုအဆင့် (၁) မိစ္ဆာသားရဲ တစ်ကောင်၏ ခွန်အားနှင့် ဆိုလျှင် ချီစုစည်းမှု အဆင့် (၁) မိစ္ဆာသားရဲ တစ်ကောင်ကို အနိုင်ယူနိုင်ခြင်းသည် မယုံနိုင်စရာ ကောင်းသည်ဟု သင် ထင်မှတ်ခဲ့သည်။]
[သင် မိစ္ဆာသားရဲ၏ အလောင်းကောင်ကို စားသုံးလိုက်သည်။]
[မိစ္ဆာသားရဲ၏ အသားနှင့် သွေးက သင့်ခန္ဓာကိုယ် ဖွဲ့စည်းပုံကို အကြီးအကျယ် တိုးတက်စေခဲ့ပြီး ပို၍ပင် သန်မာလာခဲ့သည်]
[အသက် ၃ နှစ် - ရွှေအမြုတေ နယ်ပယ်မိစ္ဆာတစ်ကောင် ပေါ်လာမည်ကို သင် စောင့်မျှော်နေခဲ့သည်။ မိစ္ဆာဟာ တောင်တန်းများထဲသို့ ပြင်းထန်စွာ ပြုတ်ကျလာပြီး မြေပြင်ပေါ်တွင် ကြီးမားသည့် တွင်းကြီးတစ်တွင်း ဖြစ်ပေါ်စေကာ တောအုပ်ထဲမှ မရေမတွက်နိုင်သည့် တောရိုင်းတိရစ္ဆာန်များကို ခြောက်လှန့် မောင်းထုတ်လိုက်သည်။]
[…]
"ရောက်လာပြီ..."
ရွှေအမြုတေ အဆင့် မိစ္ဆာသားရဲ တစ်ကောင်၏ ဖိအားကို ခံစားလိုက်ရသဖြင့် ဖူရွှမ်နီဟာ သူမ၏သွေးမျိုးဆက်ထဲမှ လာသည့် ဖိအားတစ်ခုကို ခံစားလိုက်ရသည်။
ဖူရွှမ်နီ ကြောက်ရွံ့ခြင်း မရှိရုံသာမက သူမဟာ အနည်းငယ်ပင် စိတ်လှုပ်ရှားနေခဲ့သည်။