အခန်း ၁၃၄ : လေးနက်နေသည့် မင်းသမီး ဖူရွှမ်နီ
နန်းတော်မှ ကျင့်ကြံသူ တစ်ဦးဟာ ခါးသီးသည့် အပြုံးဖြင့် ပြောလိုက်၏"အကယ်၍ ကျွန်တော်တို့ မိစ္ဆာကျင့်ကြံသူ တစ်ယောက်ကို လွတ်ပေးလိုက်မှန်း ချင်းဟယ် ခရိုင်မှာ ရှိနေတဲ့ စီရင်စု အစိုးရရုံးက သခင်ကြီးတွေ သိသွားရင် ကျွန်တော်တို့ နှစ်ယောက်လုံး ဒုက္ခရောက်တော့မှာ"
"ချင်းဟယ် ခရိုင်..."
ချန်ချန်ရွှယ် သူတို့နှင့် စကားမပြောလိုသော်လည်း သူမ ရုတ်တရက် စကားလုံး တစ်လုံး ကြားလိုက်ရသည်။
၎င်းက သူမ၏ အာရုံစိုက်မှုကို ဆွဲဆောင်လိုက်လေသည်။
"စီနီယာ ရှင် မသိဘူးလား" နန်းတော်မှ ကျင့်ကြံသူက အံ့သြစွာ ပြောလိုက်၏။"လွန်ခဲ့တဲ့ ရက်အနည်းငယ်က ချင်းဟယ် ခရိုင်မှာ မြင့်မြတ်သောနှလုံးသား နန်းတော်က မိစ္ဆာတစ်ကောင် ပြဿနာ ရှာနေခဲ့တယ်... ဒါကြောင့် စီရင်စု အစိုးရက အဲဒါကို ဖြေရှင်းဖို့ လူအနည်းငယ် စေလွှတ်ခဲ့ပါတယ်"
ချန်ချန်ရွှယ် မျက်မှောင်ကြုတ်လိုက်၏။
'ချင်းဟယ် ခရိုင်မှာ မြင့်မြတ်သောနှလုံးသား နန်းတော်က မိစ္ဆာတစ်ကောင် ရှိနေတာလား... သူမ ချင်းဟယ် ခရိုင်မှာ ရှိတုန်းက ဘာလို့ မကြားဖူးတာလဲ..'
'ဖြစ်နိုင်တာက သူမ ချင်းဟယ် ခရိုင်ကနေ ထွက်ခွာလာပြီးမှ အဲဒီ မိစ္ဆာတွေ ပေါ်လာတာလား..'
&အကယ်၍ မိစ္ဆာတစ်ကောင် ချင်းဟယ် ခရိုင်မှာ ပေါ်လာရင် ချန်မိသားစု အဆင်ပြေသင့်ပါတယ်... ဟုတ်တယ်မလား....'
သူမရဲ့ မိသားစု အားလုံးက ချင်းဟယ် ခရိုင်မှာ ရှိနေပေသည်။
"ဒါနဲ့ စီနီယာ" နန်းတော်၏ ကျင့်ကြံသူက ရုတ်တရက် ပြောလိုက်၏။"အကယ်၍ ရှင် မိစ္ဆာကျင့်ကြံသူတွေကို သတ်ရာမှာ နန်းတော်ကို ကူညီပေးရင် ဆုလာဘ် ရယူဖို့ ရှင် ရုံးတော်ကို သွားလို့ ရပါတယ်…"
ချန်ချန်ရွှယ် သတိပြန်ဝင်လာခဲ့သည်။
တည်ငြိမ်သော မျက်နှာဖြင့် သူမ ခေါင်းခါလိုက်သည်။ "မလိုပါဘူး... ဒီအလောင်းကောင်ကို ကျွန်မ ရှင့်ကို ပေးလိုက်မယ်.... ရှင်ကိုယ်တိုင် သတ်လိုက်တယ်လို့ သဘောထားလိုက်ပါ.... တခြားသူတွေကို ပြောပြတဲ့ အခါ ကျွန်မ အကြောင်း မပြောပါနဲ့.... ကျေးဇူးပြုပြီး မှတ်ထားပေးပါ"
......
နန်းတော်မှ ကျင့်ကြံသူ နှစ်ယောက် ကြောင်အသွားကြပြီး အနည်းငယ် ရှုပ်ထွေးကာ တစ်စုံတစ်ရာ ပြောတော့မလို ပြုလုပ်လိုက်ကြသည်။
ရုတ်တရက် သူတို့၏ အမြင်အာရုံ ဝေဝါးသွားပြီး ချန်ချန်ရွှယ်၏ ပုံရိပ် ပျောက်ကွယ်သွားခဲ့သည်။
နန်းတော်မှ ကျင့်ကြံသူ နှစ်ယောက်ဟာ တစ်ယောက်ကို တစ်ယောက် ကြည့်လိုက်ကြရာ တစ်ဖက်လူ၏ မျက်လုံးများထဲမှ အံ့သြမှုကို မြင်တွေ့လိုက်ကြရသည်။
ခဏအကြာ သူတို့ထဲမှ တစ်ယောက်က မြေပြင်ပေါ်ရှိ မိစ္ဆာကျင့်ကြံသူ၏ အလောင်းကောင်ကို ကြည့်လိုက်ပြီး အသံတိုးတိုးဖြင့် မပြောဘဲ မနေနိုင်တော့ပေ။ "အဲဒီ ဝိညာဉ်ဓားဂိုဏ်းက ကျင့်ကြံသူက ဒီအတိုင်း ထွက်သွားတာလား.... သူမက နန်းတော်က ပေးတဲ့ ဆုလာဘ်ကို မလိုချင်ဘူးလား.... အဲဒါက ကျင့်ကြံခြင်းကို အထောက်အကူ ပြုတဲ့ ဆေးလုံးအများကြီးနော်..."
အခြားတစ်ယောက်က ခဏလောက် စဉ်းစားပြီး ပြောလိုက်သည်။ "အဲဒီ စီနီယာက သူမအကြောင်း ထုတ်မပြောဖို့ ကျွန်တော်တို့ကို ပြောခဲ့တယ်လေ.... သူမက ဝိညာဉ်ဓားဂိုဏ်းရဲ့ တာဝန်တစ်ခုခုကို လက်ခံထားပြီး လျှို့ဝှက်ထားဖို့ လိုအပ်လို့များလား"
"ရှူး… မင်း ပြောလိုက်မှပဲ တကယ် ဖြစ်နိုင်တယ်... ငါတို့ တကယ် ဒီအတိုင်း လုပ်ရမလား"
"မင်း ဝိညာဉ်ဓားဂိုဏ်းက ကျင့်ကြံသူ တစ်ယောက်ကို ရန်စချင်တယ်လို့တော့ ငါ့ကို မပြောနဲ့နော်"
"အား… အဟွတ် အဟွတ်... ဒါဆိုရင် လုပ်ကြတာပေါ့"
"…"
…
ညနေခင်းတွင် ချင်းဟယ် ခရိုင်။
တတိယမြောက် ရွေးချယ်ခံ ဖူရွှမ်နီဟာ ရှေးဟောင်း စာအုပ် တစ်အုပ်ကို သူမ၏ ဘယ်လက်တွင် ကိုင်ထားပြီး အနက်ရောင် အမွေးတစ်ချောင်း နှင့် ကစားနေခဲ့သည်။
သူမဟာ စာအုပ်ထဲမှ အကြောင်းအရာကို လေးလေးနက်နက် ကြည့်ရှုနေပြီး ရံဖန်ရံခါ စဉ်းစားဟန်ဖြင့် ခေါင်းငြိမ့်နေခဲ့သည်။
"ဒါကြောင့် ဒီလိုဖြစ်နေတာကိုး... ဒါက ရွှေအမြုတေ အဆင့် မိစ္ဆာသားရဲတွေရဲ့ ပုံမှန် အသုံးပြုနေကျ နည်းလမ်းလား"
"မသေဆုံးခင် ကိုယ့်ရဲ့ လက်ကျန် ဝိညာဉ်ကို ကိုယ့်ခန္ဓာကိုယ်ထဲက မိစ္ဆာ အမြုတေထဲမှာ ချိပ်ပိတ်လိုက်တာ"
"အကယ်၍ တစ်စုံတစ်ယောက်က ဒီမိစ္ဆာ အမြုတေကို အသုံးပြုပြီး ကျင့်ကြံရင်… သူတို့က ဝင်ရောက်စီးနင်းခံရတော့မယ့် ကံဆိုးသူ တစ်ယောက် ဖြစ်လာလိမ့်မယ်"
ဖူရွှမ်နီ ကိုယ့်ကိုယ်ကိုယ် ရေရွတ်လိုက်ပြီး ရုတ်တရက် နားလည်သွားခဲ့သည်။
အကယ်၍ သူမသာ ဒီအကြောင်း သိခဲ့ရင် သရုပ်ဖော် စနစ်ထဲမှာ (၁၀) နှစ်ကျော်ပဲ အသက်ရှင်ခဲ့မှာ မဟုတ်ပေ။
ဖူရွှမ်နီ ဖတ်နေသည့် စာအုပ်က မိစ္ဆာသားရဲများနှင့် သက်ဆိုင်သည့် စာအုပ်ဖြစ်ကာ မဟာယန်နန်းတော်ထဲမှ စာအုပ်တစ်အုပ် ဖြစ်လေသည်။
ကံကောင်းစွာဖြင့် သူမ စာဖတ်ရတာ စိတ်ဝင်စားသောကြောင့် သူမ၏ သိုလှောင်အိတ်ထဲတွင် ထူးခြားသည့် စာအုပ် အမျိုးမျိုးနှင့် ပြည့်နှက်နေခဲ့သည်။
သူတို့ထဲတွင် မိစ္ဆာသားရဲများနှင့် ပတ်သက်သည့် လျှို့ဝှက်ချက် အများအပြားကို မိတ်ဆက်ပေးထားသည့် ရှေးဟောင်း စာအုပ် တစ်အုပ် ရှိကာ ၎င်းက သူမလက်ထဲမှ စာအုပ်ပင် ဖြစ်လေသည်။
မူလက သူမဟာ မြင့်မြတ်သောနှလုံးသား နန်းတော်မှ မိစ္ဆာကျင့်ကြံသူများ၏ ကိစ္စအား စုံစမ်းစစ်ဆေးရန် ချင်းဟယ် ခရိုင်သို့ ရောက်လာခဲ့ခြင်း ဖြစ်၏။ နောက်ဆုံးတွင် သူမဟာ မသေမျိုးကျင့်ကြံခြင်း သရုပ်ဖော် စနစ်ထဲသို့ ဆွဲခေါ်ခံလိုက်ရသည်။
ထို့ကြောင့် ရုတ်တရက် သူမ အာရုံစိုက်မှုကို မသေမျိုးကျင့်ကြံခြင်း သရုပ်ဖော် စနစ်အပေါ် ထားရှိလိုက်သည်။
ဖူရွှမ်နီ ဘယ်အရာက အရေးအကြီးဆုံးလဲ ဆိုတာ သိပေသည်။
"(၄) နာရီပဲ လိုတော့တယ်.."
"ဒါဆိုရင် မိစ္ဆာသားရဲတွေရဲ့ နည်းလမ်းတွေကို တန်ပြန်ဖို့ ငါ ဘယ်လို နည်းလမ်း အသုံးပြုသင့်လဲ... မိစ္ဆာ အမြုတေကို အသုံးမပြုပဲနေရမလား....မဖြစ်ဘူး… တကယ်လို့ ငါသာ အဲဒီ မိစ္ဆာ အမြုတေကို အသုံးမပြုရင် သရုပ်ဖော်စနစ်ထဲက ငါ့ပါရမီနဲ့ ကျင့်ကြံဖို့က ဘယ်လောက် ခက်ခဲလိုက်မလဲ"
"နှစ် (၁၀၀) ကြာချင် ကြာလိမ့်မယ် ဒါပေမဲ့ ငါ ချီစုစည်းမှု အဆင့် အဆင့် (၅) ကိုတောင် အဆင့်ချိုးဖျက် ဝင်ရောက်နိုင်မှာ မဟုတ်ဘူး…"
ဖူရွှမ်နီ သူမလက်ထဲက စာအုပ်ကို အကြိမ်များစွာ ဖတ်ရှုသော်လည်း သက်ဆိုင်ရာ နည်းလမ်းကို မရှာတွေ့ခဲ့ပေ။
ဒါက သူမကို မျက်မှောင်ကြုတ်သွားစေခဲ့သည်။
ဒီအချိန်မှာ တံခါးခေါက်သံ တစ်ခုက သူမရဲ့ အတွေးတွေကို အနှောင့်အယှက် ဖြစ်စေခဲ့ပြီး ဖူရွှမ်နီဟာ မပျော်မရွှင် မဖြစ်ဘဲ တည်ငြိမ်စွာ ပြောလိုက်၏။"ဝင်ခဲ့ပါ"
စီရင်စု အစိုးရရုံးမှ အရာရှိ တစ်ဦးဟာ လေးစားစွာ ဝင်လာပြီး စာရွက်တစ်ထပ်ကမ်းပေးသည်ကို တွေ့လိုက်ရသည်။ သူ ပြောလိုက်သည်။ "မင်းသမီး ဒါက မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေနဲ့ ပတ်သက်ပြီး ကျွန်တော်စုဆောင်းထားတဲ့ သတင်းအချက်အလက်တွေပါ....ဒီသတင်းအချက်အလက်တွေက ချင်းဟယ် ခရိုင်ကတင် မဟုတ်ဘဲ အနီးအနားက ခရိုင်အနည်းငယ်ကပါ ရရှိထားတာပါ"
ပြောပြီးနောက် စီရင်စု အစိုးရရုံး အရာရှိဟာ ဖူရွှမ်နီ၏ လက်ထဲမှ မိစ္ဆာသားရဲ အမွေးကို တိတ်တဆိတ် ကြည့်နေစဉ် စူးစမ်းလိုသော အကြည့်တစ်ခု ရှိနေခဲ့သည်။
'ဒါက ဘယ်လို မိစ္ဆာသားရဲ အမွေးမျိုးလဲ...'
'ငှက်အမျိုးအစား မိစ္ဆာသားရဲလား...'
ဖူရွှမ်နီဟာ လမင်းကျီးကန်းအမွေးနှင့် စာအုပ်များကို သူမ၏ သိုလှောင်အိတ်ထဲ ပြန်ထည့်လိုက်ပြီ စာရွက်တစ်ရွက် ထုတ်ယူပြီး ကြည့်လိုက်သည်။
"အနောက် တိမ်တိုက် မြို့မှာ မိစ္ဆာကျင့်ကြံသူ တစ်ယောက်ရဲ့ ခြေရာပေါ်လာတာလား... နန်းတော် အရာရှိ နှစ်ယောက်က မိစ္ဆာကျင့်ကြံသူ နောက် လိုက်ပြီး သတ်လိုက်တယ်..."
ဖူရွှမ်နီ မျက်ခုံးပင့်လိုက်၏။"သူတို့ ဘယ်လိုလုပ် မိစ္ဆာကျင့်ကြံသူ တစ်ယောက်ရဲ့ ခြေရာကို ဒီလောက် မြန်မြန်ဆန်ဆန် ရှာတွေ့နိုင်တာလဲ"
သူမ မပျော်ရွှင်ခဲ့ပဲ ထိုအစား စိုးရိမ်နေခဲ့သည်။
မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေက လန့်ဖျပ်နေတဲ့ ငှက်တစ်သိုက်လို အားလုံး ကောင်းကောင်း ပုန်းအောင်းနေကြတာပင်။
အခု သူတို့ကို ဒီလောက် အလွယ်တကူ ရှာတွေ့နိုင်ခဲ့သည်။
ဆိုလိုတာက မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ ကြီးမားတဲ့ လှုပ်ရှားမှုတစ်ခု လုပ်တော့မယ် ဆိုတဲ့ ဖြစ်နိုင်ချေ များလေသည်။
မိစ္ဆာကျင့်ကြံသူတွေရဲ့ ကြီးမားတဲ့ လှုပ်ရှားမှု ဆိုတာသေချာပေါက် ကောင်းတဲ့ ကိစ္စ မဟုတ်ပေ။
ဥပမာအားဖြင့် ချင်းဟယ် ခရိုင်က မိစ္ဆာကျင့်ကြံသူတွေရဲ့ ခြေရာကို ရှာဖွေတွေ့ရှိတုန်းက ချင်းဟယ် ခရိုင် တစ်ခုလုံးကို မိစ္ဆာကျင့်ကြံသူတွေက ဆန်ခါလို ဖြစ်အောင် လုပ်လုနီးပါး ဖြစ်ခဲ့သည်။ ခရိုင်ရုံးတောင် မိစ္ဆာကျင့်ကြံသူတွေရဲ့ ထိန်းချုပ်မှုကို ခံရလုနီးပါး ဖြစ်ခဲ့ရသည်။
အရေးအကြီးဆုံး အချက်က ချင်းဟယ် ခရိုင်က မိစ္ဆာကျင့်ကြံသူတွေ အသတ်ခံရပြီး မကြာခင်မှာပဲ နောက်ထပ် မိစ္ဆာကျင့်ကြံသူ တစ်ယောက် ပေါ်လာပြန်လေသည်။
'မိစ္ဆာကျင့်ကြံသူတွေ အရေးတကြီး ပြီးမြောက်အောင် လုပ်ချင်နေတဲ့ အရေးပေါ် ကိစ္စတစ်ခုခု ရှိနေမှာ သေချာတယ်...'
ဖူရွှမ်နီဟာ ကျင့်ကြံသူ ပိုင် သူမကို ပြောပြခဲ့တဲ့ သတင်းအချက်အလက်ကို တွေးမိလိုက်၏။
"အမိန့် ပေးလိုက်" ဖူရွှမ်နီ လေးနက်စွာ ပြောလိုက်သည်။ "ချင်းဟယ် ခရိုင် ဝန်းကျင် မိုင် (၅၀၀) အချင်းဝက်အတွင်းက ခရိုင်ရုံးတွေ အားလုံးကို အမြင့်ဆုံး သတိပေးချက်အနေအထားမှာ ရှိနေစေ ပြီးတော့ မိစ္ဆာကျင့်ကြံသူတွေရဲ့ ပူးပေါင်းကြံစည်မှုကို ခုခံဖို့ လေလွှင့်ကျင့်ကြံသူတွေ နဲ့ တစ်ခြညးကျင့်ကြံသူ တချို့ကို စည်းရုံးပါ "
"တစ်ချိန်တည်းမှာပဲ ဆက်သွယ်ရေးအဆောင်ကို အသုံးပြုပြီး ပြည်နယ် အစိုးရဆီ သတင်းပို့လိုက်.... ပြီးတော့ လူအင်အား အမြောက်အမြား ချက်ချင်း စေလွှတ်ပေးဖို့ တောင်းဆိုလိုက်"
ဖူရွှမ်နီတွင် ဆိုးရွားသည့် ကြိုတင်နိမိတ်တစ်ခု ရှိနေခဲ့သည်။ ၎င်းကဆိုးရွားသည့် အရာတစ်ခု ဖြစ်ပျက်လာနိုင်သည်ဟုပင်။
အရာရှိ၏ နှလုံးသား ရုတ်တရက် အေးစက်သွားပြီး မင်းသမီး ဒီလောက် လေးနက်နေသည်ကို မြင်လိုက်ရသဖြင့် သူ ပေါ့ပေါ့ဆဆ မနေရဲတော့ပေ။
"ဟုတ်ကဲ့ပါ" သူ အလျင်အမြန် ပြောလိုက်၏။
"…"