အခန်း ၁၃၃ : ငါက ပြဿနာ မရှာပေမဲ့ ပြဿနာက ငါ့ကိုရှာနေတယ်
အနီးအနားရှိ သာမန်လူများဟာ ဤအသံကို ကြားလိုက်ရသည့်အခါ အလွန် ကြောက်လန့်သွားကြပြီး လမ်းဘေးရှိ အိမ်များထဲသို့ အလျင်အမြန် ပုန်းအောင်းလိုက်ကြလေသည်။
ဤသည်မှာ ခွင့်လွှတ်၍ မရနိုင်သည့် မြင့်မြတ်သောနှလုံးသား နန်းတော်မှ မိစ္ဆာတစ်ကောင် ဖြစ်ရာ ဤသာမန်လူများက ကြမ်းကြုတ်သည့် မိစ္ဆာတစ်ကောင်ကို မည်သို့ ရင်ဆိုင်ရဲပါမည်နည်း။
ကျင့်ကြံသူ အချို့ပင် ပုန်းအောင်းလိုက်ကြလေသည်။ သူတို့ဟာ အားနည်း၍ အနာဂတ်တွင် လက်စားချေခြင်းခံရမည်ကို ကြောက်ရွံ့သဖြင့် မြင့်မြတ်သောနှလုံးသား နန်းတော်မှ မိစ္ဆာကို ရန်မစရဲကြခြင်း သို့မဟုတ် သူတို့ ပြဿနာ မဖြစ်လိုကြခြင်း ဖြစ်နိုင်ပေသည်။
ချန်ချန်ရွှယ်ဟာလည်း ထိုနှစ်မျိုးအနက် ဒုတိယ အမျိုးအစားတွင် ပါဝင်နေပေသည်။
သတိကြီးသည့် ချန်ချန်ရွှယ်ဟာ မိစ္ဆာကို ချေမှုန်းရန်နှင့် ဖြောင့်မတ်လမ်းစဉ်ကို ကာကွယ်ရန် အပြင်ထွက်မည် မဟုတ်ပေ။
အကယ်၍ ဤအရာက ထောင်ချောက်တစ်ခု ဖြစ်နေလျှင်ကော....
အကယ်၍ အလိုက်ခံနေရသည့် မိစ္ဆာက ကျားကို စားရန် ဝက်အဖြစ် ဟန်ဆောင်နေခြင်း ဖြစ်နေလျှင်ကော...
ဥပမာအားဖြင့် သူက အားနည်းကြောင်း ပြသရန် အလိုက်ခံနေရသကဲ့သို့ ဟန်ဆောင်ကောင်း ဟန်ဆောင်နိုင်ပေသည်။
ထို့နောက် မိစ္ဆာကို ဖယ်ရှားပြီး လမ်းစဉ်ကို ကာကွယ်လိုသည့် ဖြောင့်မတ်သော ကျင့်ကြံသူ ပိုများလာပြီး ဂနာမငြိမ် ဖြစ်လာသည့်အခါ မိစ္ဆာက သူ၏ ပိုမို ထက်မြက်ပြီး ပိုမို ကြမ်းကြုတ်သော လက်သည်းများနှင့် သွားများကို ရုတ်တရက် ထုတ်ဖော်ပြသလိုက်နိုင်လေသည်။
သူဟာ ဤကျင့်ကြံသူ အားလုံးကို တစ်ကြိမ်တည်းဖြင့် ဖမ်းဆီးလိုက်နိုင်ပေသည်။
ဤကဲ့သို့သော ကိစ္စမျိုး ဖြစ်မလာနိုင်ဟု ပြော၍ မရပေ။
ဖြစ်နိုင်ချေ အနည်းငယ်သာ ရှိလျှင်ပင် ဖြစ်ပျက်လာနိုင်သေးလေသည်။
ထို့ကြောင့်…
......
ချန်ချန်ရွှယ်ဟာ ဤကိစ္စတွင် ပါဝင်ပတ်သက်လိုခြင်း မရှိပဲ သူမ ဘေးကင်းလုံခြုံစွာသာ နေလိုခဲ့သည်။
ကံမကောင်းစွာဖြင့် အရာအားလုံးက အစီအစဉ်အတိုင်း ဖြစ်မလာခဲ့ပေ။
နန်းတော်၏ ကျင့်ကြံသူများနှင့် မြင့်မြတ်သောနှလုံးသား နန်းတော်မှ မိစ္ဆာတို့၏ တိုက်ပွဲ အသံများက ပို၍ ပို၍ ကျယ်လောင်လာပြီး ပို၍ ပို၍ နီးကပ်လာသကဲ့သို့ ဖြစ်နေခဲ့သည်။
ရုတ်တရက် ကျယ်လောင်သည့် ကွဲအက်သံ တစ်ခု ထွက်ပေါ်လာခဲ့သည်။ ချက်ချင်းပင် ပုံရိပ်တစ်ခုဟာ ချန်ချန်ရွှယ် ရှိနေသည့် တည်းခိုခန်းထဲသို့ တည့်တည့် ဝင်တိုက်လာပြီး နံရံ အမြောက်အမြားကို ဖျက်ဆီးပစ်လိုက်သည်။
နောက်ဆုံးတွင် ၎င်း ရပ်တန့်သွားခဲ့သည်။
တကယ့်ကို တိုက်ဆိုင်လိုက်တာပင်။
ပုံရိပ်တစ်ခု ဧည့်သည်တော် အခန်း၏ နံရံကို ဝင်တိုက်ပြီးနောက် သူမရှေ့ရှိ ကြမ်းပြင်ပေါ်သို့ လဲကျသွားသည်ကို ချန်ချန်ရွှယ် မျှော်လင့်ချက်မဲ့စွာ ကြည့်နေမိခဲ့သည်။
"အဟွတ် အဟွတ်.."
သူမရှေ့တွင် ပေါ်လာသည့် လူက အလွန် သနားစရာကောင်းသည့် ပုံပေါက်နေပြီး သွေးအချို့ သူ့အဝတ်အစားများမှ စိမ့်ထွက်နေခဲ့သည်။
သူ့ရင်ဘတ်ကလည်း ချိုင့်ဝင်နေခဲ့ပြီး အရိုးမည်မျှ ကျိုးသွားသည်ကို မသိရပေ။ သူ့မျက်လုံးများတွင်တော့ ရက်စက်ကြမ်းကြုတ်မှုနှင့် သတ်ဖြတ်လိုစိတ်များ ပြည့်နှက်နေခဲ့သည်။
တစ်ချက် ကြည့်လိုက်ရုံဖြင့် သူက နန်းတော်၏ ကျင့်ကြံသူများ လိုက်လံဖမ်းဆီးခြင်း ခံနေရသည့် မြင့်မြတ်သောနှလုံးသား နန်းတော်မှ မိစ္ဆာ ဖြစ်ကြောင်း ပြောနိုင်ပေသည်။
တစ်ဖက်လူဟာ အံကြိတ်လိုက်ပြီး သူ့အသံက အက်ကွဲနေခဲ့သည်။ "တောက်… ဒီနန်းတော်က ခွေးတွေက လေ့ကျင့်ပေးထားတဲ့ ကျွန်တစ်သိုက် နဲ့ တူတာပဲ.."
"အယ်... ဒီမှာ လူတစ်ယောက် ရှိနေတာလား..."
သူ လျင်မြန်စွာ တုံ့ပြန်လိုက်ပြီး ခေါင်းကို အမြန် လှည့်လိုက်ပြီး ရက်စက်သည့် မျက်လုံးတစ်စုံဖြင့် ချန်ချန်ရွှယ်ကို တည့်တည့် စိုက်ကြည့်လိုက်၏။
"ကျင့်ကြံသူ..."
သူဟာ ချန်ချန်ရွှယ်ကို ကျင့်ကြံသူ တစ်ဦး ဖြစ်ကြောင်း တစ်ချက်ကြည့်တာနဲ့ သိလိုက်သည်။ ဘာပဲဖြစ်ဖြစ် ကျင့်ကြံသူ တစ်ဦး၏ ထူးခြားသည့် အရှိန်ဝါက သာမန်လူများတွင် မရှိသော အရာ ဖြစ်သည် မဟုတ်ပါလော။
ဤလူ၏ စိတ်ထဲမှ ပထမဆုံး တုံ့ပြန်မှုမှာ ဒီလူကလည်း နန်းတော်က ခွေး တစ်ကောင်ပဲ ဖြစ်ရမယ်ဆိုတာပင်။
လွတ်မြောက်၍ မရနိုင်သည့် ပိုက်ကွန် တစ်ခုကို ဤနေရာတွင် ကြာမြင့်စွာကတည်းက တပ်ဆင်ထားပြီး သူ ထောင်ချောက်ထဲ ကျရောက်လာမည့် အချိန်ကို စောင့်ဆိုင်းနေကြခြင်း ဖြစ်ပေမည်။
ဒါကို တွေးမိတော့ သူဟာ ချက်ချင်း ရက်စက်သော မျက်နှာထားကို ထုတ်ဖော်လိုက်၏။ "နန်းတော်ရဲ့ ခွေးကောင်.. သေစမ်း..."
"ရွှပ်"
ဓားပျံ၏ လေတိုးသံ ဖြတ်သန်းသွားပြီး အေးစက်သော အလင်းတန်း တစ်ခု လက်ခနဲ ဖြစ်သွားခဲ့သည်။
မြင့်မြတ်သောနှလုံးသား နန်းတော်မှ ဤမိစ္ဆာဟာ လှုပ်ရှားရန်ပင် အချိန်မရလိုက်ပဲ သူ့ခေါင်းကို ဓားက ချက်ချင်း ဖောက်ထွက်သွားခဲ့သည်။
တုန်လှုပ်မှု အရိပ်အယောင် တစ်ခု သူ့မျက်လုံးများထဲ ဖြတ်သန်းသွားပြီး မျက်နှာပေါ်မှ အမူအရာက ချက်ချင်း တောင့်တင်းသွားခဲ့ကာ ခေါင်း စောင်းကျသွားလေသည်။
အသံ တစ်စုံတစ်ရာ မရှိတော့ပေ.........
"ကံဆိုးလိုက်တာ…" ချန်ချန်ရွှယ် မျှော်လင့်ချက်မဲ့စွာ ရေရွတ်လိုက်၏။ "ငါ မြင့်မြတ်သောနှလုံးသား နန်းတော်နဲ့ ပတ်သက်တဲ့ ဂိုဏ်းတာဝန်တစ်ခုကို လက်ခံထားပေမယ့် ဒီမြင့်မြတ်သောနှလုံးသား နန်းတော်နဲ့ တကယ် မပက်သတ်ချင်ဘူး... "
"ဟူး...မူလက ဒီလိုကိစ္စမျိုးမှာ မပါဝင်ချင်သလို ပြဿနာ အများကြီး ဆွဲဆောင်လာမှာ မလိုချင်ဘူး… ဒါပေမဲ့ တခြားသူတွေ သေလမ်းရှာနေတာကိုတော့ ငါလည်း မတားဆီးနိုင်ဘူးလေ"
တစ်ဖက်လူက တကယ် ဦးဆောင်ပြီး တံခါးလာခေါက်လိမ့်မယ်လို့ ဘယ်သူ ထင်မည်နည်း။
အရေးအကြီးဆုံး အချက်က သူက သူမအပေါ် သတ်ဖြတ်လိုစိတ်တောင် ထုတ်ဖော်ပြသခဲ့ပြီး သူမကို တိုက်ခိုက်ဖို့ ကြံစည်ခဲ့ခြင်းပင်။
ဒီလို အခြေအနေမျိုးမှာ ချန်ချန်ရွှယ်ဟာ လှုပ်ရှားရုံကလွဲပြီး ရွေးချယ်စရာ သေချာပေါက် မရှိတော့ပေ။
နန်းတော်ရဲ့ ကျင့်ကြံသူတွေ လိုက်လံဖမ်းဆီးခြင်း ခံနေရတဲ့ မြင့်မြတ်သောနှလုံးသား နန်းတော်က မိစ္ဆာဟာ ချီစုစည်းမှု အဆင့်ကျင့်ကြံမှုပဲ ရှိသေးပေသည်။
ထို့ကြောင့် ချန်ချန်ရွှယ်ရဲ့ လက်ရှိ အခြေတည်အဆင့်အဆင့် (၃) ကျင့်ကြံမှုနဲ့ ဆိုရင် သူ့ကို သတ်ရတာက လွယ်ကူလွန်းနေခဲ့သည်။
ထို့အပြင် မသေမျိုးကျင့်ကြံခြင်း သရုပ်ဖော် စနစ်ထဲမှာ သူမဟာ မိစ္ဆာ အများအပြားကို သတ်ဖြတ်ခဲ့တယ်လို့ ပြောလို့ရပြီး သူတို့ထဲမှာ ရွှေအမြုတေ အဆင့်မိစ္ဆာတွေတောင် မနည်းပေ။
ထို့ကြောင့် အခု သူမ ချီစုစည်းမှုအဆင့် မိစ္ဆာတစ်ကောင်ကို သတ်လိုက်ရတော့ သူမ ဘယ်လိုမှ မခံစားရပေ။
ချန်ချန်ရွှယ်ဟာ ဒီအလောင်းကောင်ကို စွန့်ပစ်ဖို့ ပြင်လိုက်ချိန်မှာပဲ လူနှစ်ယောက် သူမရှေ့မှာ ပေါ်လာတာ မြင်လိုက်ရသည်။ ဒါပေမဲ့ သူတို့က မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ မဟုတ်ပဲ နန်းတော်က ကျင့်ကြံသူတွေပင်။
'ဟူး နောက်ထပ် ပြဿနာ တစ်ခု ပေါ်လာပြန်ပြီ... ပြီးတော့ ဒါက ပေါ့ပေါ့ပါးပါး သတ်ဖြတ်လိုက်ရုံနဲ့ ဖြေရှင်းလို့ ရမယ့် ပြဿနာမျိုး မဟုတ်ဘူးပဲ...'
ချန်ချန်ရွှယ် ပို၍ပင် မျှော်လင့်ချက်မဲ့သလို ခံစားလိုက်ရ၏။
"ဒါက..."
တည်းခိုခန်းထဲ အတင်းဝင်ရောက်လာတဲ့ ကျင့်ကြံသူ နှစ်ယောက်က မြင့်မြတ်သောနှလုံးသား နန်းတော်က မိစ္ဆာကျင့်ကြံသူရဲ့ အလောင်းကောင်ကို မြင်လိုက်ရသည့် အခါ ချက်ချင်း တုန်လှုပ်သွားခဲ့ကြသည်။ "မိစ္ဆာကျင့်ကြံသူ သေသွားပြီလား"
နောက်တစ်ခဏမှာ သူတို့ဟာ ချန်ချန်ရွှယ်ကို ရှေ့မှာ မြင်လိုက်ရပြီး ချက်ချင်း ကြောင်အသွားခဲ့ကြ၏။
'လှပတဲ့ အမျိုးသမီး မသေမျိုးကျင့်ကြံသူတွေ အများကြီး ရှိပေမယ့် ဒီလောက် လှပတဲ့ တစ်ယောက်ကတော့…'
ဒါက သေချာပေါက် သူတို့ဘဝမှာ ဒီလိုအလှပဂေးမျိုး ပထမဆုံး မြင်ဖူးခြင်းပင်။
ဒါပေမဲ့ သူတို့ရဲ့ နှလုံးသားထဲမှာ စည်းကျော်တဲ့အတွေး တစ်စုံတစ်ရာ ရှိရဲခြင်း မရှိကြပေ။ ဒီသိပ်ပြဿနာပေးတဲ့ မြင့်မြတ်သောနှလုံးသား နန်းတော်က မိစ္ဆာကျင့်ကြံသူကို သူတို့ရှေ့က အမျိုးသမီး ကျင့်ကြံသူက သတ်လိုက်တာကို သိကြပေသည်။
ထို့အပြင် တစ်ချက်တည်းနဲ့ အသတ်ခံလိုက်ရခြင်းပင်။
နန်းတော်ရဲ့ ကျင့်ကြံသူတွေထဲက တစ်ယောက်က ချန်ချန်ရွှယ် ဝတ်ဆင်ထားသည့် အဝတ်အစားတွေကိုတောင် သတိထားမိလိုက်ကာ သူ့လေသံထဲမှာ လေးစားမှု အနည်းငယ် ပါဝင်နေခဲ့သည်။ "စီနီယာ ရှင်က ဝိညာဉ်ဓားဂိုဏ်းက ကျင့်ကြံသူလား"
"ဟုတ်ပါတယ်" ချန်ချန်ရွှယ် ဝိညာဉ်ဓားဂိုဏ်းရဲ့ တပည့် ဆိုတဲ့ သူမရဲ့ ကိုယ်ပိုင်အမှတ်အသားကို တမင်သက်သက် ဖုံးကွယ်မထားခဲ့ပေ။
ဘာပဲဖြစ်ဖြစ် ကျင့်ကြံခြင်း ဂိုဏ်းတစ်ခုရဲ့ တပည့် ဆိုတဲ့ ကိုယ်ပိုင်အမှတ်အသားက ပြင်ပကမ္ဘာမှာ အသုံးဝင်လှပြီး မလိုအပ်တဲ့ ပြဿနာအများအပြားကို ရှောင်ရှားနိုင်လေသည်။
တစ်နေ့ကျရင် တခြားသူတွေက သူမကို စီနီယာ လို့ ခေါ်ကြလိမ့်မယ် ဆိုတာကိုပဲ ချန်ချန်ရွှယ် မျှော်လင့်မထားခဲ့တာပင်။
ပြဿနာက လက်တွေ့ကမ္ဘာမှာ သူမက ဒီလူနှစ်ယောက်ထက် အများကြီး ငယ်ရွယ်နေရာ ဒါက နည်းနည်း ထူးဆန်းနေခဲ့သည်။
"နန်းတော်ကို ကူညီပြီး မိစ္ဆာကျင့်ကြံသူကို သတ်ပေးတဲ့ အတွက် ဝိညာဉ်ဓားဂိုဏ်းက စီနီယာကို ကျေးဇူး အများကြီး တင်ပါတယ်... အကယ်၍ စီနီယာရဲ့ အချိန်မီ အကူအညီသာ မရရင် ဒီယုတ်မာတဲ့ မိစ္ဆာကျင့်ကြံသူ ထွက်ပြေး လွတ်မြောက်သွားမှာ စိုးရိမ်ရပါတယ်"