အခန်း ၁၃၁ : အဆင့်တက်ရတာ လွယ်ကူလွန်းတယ်
ပြောရမည်ဆိုလျှင် သူမ ရှောင်လွှဲနိုင်သလို ထွက်ပြေးနိုင်ပေသည်။
သို့သော် ထာဝရ ရှောင်လွှဲ၍တော့ မရနိုင်ပေ။
မဟာဝေ ဧကရာဇ်မင်းမြတ် မည်သည့်အရာများ ကြုံတွေ့ရသည်ဖြစ်စေ၊ ဝမ်းနည်းကြေကွဲမှုနှင့် ဒေါသများ မည်မျှပင် ခံစားရသည်ဖြစ်စေ သူ့ကို စိတ်မဖောက်ပြန်စေရန်နှင့် ရုတ်တရက် မသေဆုံးစေရန် သူမဟာ လျှို့ဝှက်ဆန်းကြယ်သော မျက်နှာဖုံး၏ လက္ခဏာရပ်များကို အသုံးပြုပြီး တားဆီးနိုင်ခဲ့သည်။
ထို့အပြင် ဧကရာဇ် အာဏာကို လုယူလိုသည့် နောက်ကွယ်မှ ပူးပေါင်းကြံစည်သူများ အခွင့်အရေး မရရှိစေရန် သူမ ပိုမို သတိထားပြီး ဂရုတစိုက်ရှိခဲ့သည်။
သူမ ပြုလုပ်ခဲ့သည့် ဤအရာ နှစ်ခုကို အလွန် ကောင်းမွန်နေပြီဟု ချန်ချန်ရွှယ် ထင်မှတ်ခဲ့၏။
နောက်ဆုံးတွင် ရှေးဟောင်း မိစ္ဆာကြီး ရုတ်တရက် ပေါ်လာခဲ့ရာ သူမကို အလစ်အငိုက် မိသွားစေခဲ့သည်။
သူမ ရှောင်လွှဲ၍ မရခဲ့ပေ။
"ဘာလို့ အဲဒီ ရှေးဟောင်း မိစ္ဆာကြီးက မဟာဝေ မင်းဆက်ကို တမင်သက်သက် ရွေးချယ်ပြီး လာခဲ့တာလဲ... အနီးအနားမှာ မင်းဆက်တွေ အများကြီး ရှိတာကို ဘာလို့ သူက မဟာဝေ မင်းဆက်ကို ရွေးချယ်ခဲ့တာလဲ" ချန်ချန်ရွှယ် ရေရွတ်လိုက်၏။ "ဖြစ်နိုင်တာက မဟာဝေ မင်းဆက်ထဲမှာ သူ့ကို ဆွဲဆောင်နေတဲ့ အရာတစ်ခုခု ရှိနေလို့လား"
သူမဟာ နားမလည်နိုင်ခဲ့ပဲ ကံဆိုးသည်ဟုသာ ပြောရပေတော့မည်......
......
ရှေးဟောင်း မိစ္ဆာတစ်ကောင် မဟာဝေ ပိုင်နက်ထဲတွင် ရာဇဝတ်မှုများ ကျူးလွန်ပြီး သန်းပေါင်းများစွာသော လူများကို အစုလိုက်အပြုံလိုက် သတ်ဖြတ်နေခြင်းအား နန်းတော် အနေဖြင့် မျက်ကွယ်ပြုထားရန် မဖြစ်နိုင်ပေ။
၎င်းက နောက်ဆက်တွဲ ဖြစ်ရပ်များစွာကို ဖြစ်ပေါ်စေခဲ့ပြီး နောက်ကွယ်မှ ပူးပေါင်းကြံစည်သူများကို မဟာဝေ မင်းဆက်အပေါ် သေစေနိုင်သည့် တိုက်ခိုက်မှုတစ်ခု ပေးရန် နောက်ထပ် အခွင့်အရေး တစ်ခု ရရှိစေခဲ့သည်။
ချန်ချန်ရွှယ်ဟာ ထိုနောက်ကွယ်မှ ပူးပေါင်းကြံစည်သူများ ဤသို့ လုပ်ဆောင်ရသည့် ရည်ရွယ်ချက်ကို နားမလည်တော့ပေ။
မိစ္ဆာကြီးမှာ အလွန် ရက်စက်ပြီး ကြောက်မက်ဖွယ် ကောင်းလှလေသည်။ သူတို့တွင် မိစ္ဆာကြီးကို ကိုင်တွယ်ဖြေရှင်းနိုင်သည့် ယုံကြည်မှု ရှိ၍လော။
အကယ်၍ သူတို့ ရှေးဟောင်း မိစ္ဆာကြီးကို ကိုင်တွယ်ဖြေရှင်း၍ မရပါက… မြောင်းပုပ်ထဲတွင် ပုန်းအောင်းနေသည့် ကြိုးကိုင်သူများဟာ ဤပိုင်နက်ကို မည်သို့ သိမ်းပိုက်ကြမည်နည်း။
သို့တည်းမဟုတ်…
သူတို့ ဤကဲ့သို့သော ကိစ္စမျိုးကို တစ်ခါမျှ မတွေးဖူးကြခြင်းလော။
သို့တည်းမဟုတ် အဓိက ပဋိပက္ခ အစစ်အမှန်က ဘာလဲ ဆိုတာ သူတို့ မသိကြခြင်းလော။
ချန်ချန်ရွှယ် ခေါင်းခါလိုက်၏။
ကြီးမားပြီး စွမ်းအားကြီးသည့် မဟာဝေ မင်းဆက်ဟာ တကယ်တော့ မြောင်းပုပ်ထဲတွင် ပုန်းအောင်းနေသော ကြွက်တစ်သိုက် ကြောင့် ပျက်စီးသွားခဲ့ရသည်။
၎င်းက ပြဇာတ် တစ်ပုဒ်ကဲ့သို့ပင် ဖြစ်နေပေသည်။
…
[သင် ဖိတ်ခေါ်ခဲ့သည့် ချန်ချန်ရွှယ်ဟာ မသေမျိုးကျင့်ကြံခြင်း သရုပ်ဖော် ဘဝတွင် ၅၂ နှစ်၊ ၅ လ၊ ၆ ရက် နေထိုင်ခဲ့ပြီး တာအိုမိတ်ဆွေနှင့် မိစ္ဆာ၏ အိမ်မက်ဆိုးအောင်မြင်မှု နှစ်ခုကို အသက်သွင်းနိုင်ခဲ့ပါသည်။ သင်သည် ထပ်ဆောင်း ဆုလာဘ် နှစ်ခု ရရှိပါသည်]
[သင်သည် အောက်ပါ ဆုလာဘ်များကို ရရှိပါသည် - ]
[ဆုလာဘ် ၁ - ကျောက်စိမ်း တိုကင်(တော်ဝင်မိသားစုဝင် တစ်ဦး၏ ကျောက်စိမ်း တိုကင်၊ စိတ်ကို ရှင်းလင်းစေပြီး တက်ကြွလန်းဆန်းမှုကို အားဖြည့်ပေးသော အကျိုးသက်ရောက်မှု ရှိသည်)]
[ဆုလာဘ် ၂ - အခြေတည်အဆင့် အဆင့် (၆) ၏ ဝိညာဉ်စွမ်းအား အားလုံး (ဤသည်မှာ အလွန် သန့်စင်သော ဝိညာဉ်စွမ်းအား ဖြစ်သည်)]
[ဆုလာဘ် ၃ - ဓားလမ်းစဉ် အတွေ့အကြုံ (ချန်ချန်ရွှယ်၏ ၅၂ နှစ်ကြာ ဓားလမ်းစဉ် အတွေ့အကြုံ)]
[ထပ်ဆောင်း ဆုလာဘ် ၁ - မပြည့်စုံသော ကောင်းကင်ဝါးမျိုးခြင်း မိစ္ဆာ နည်းစနစ်(ပြည့်စုံသော မူကွဲ အကြောင်းအရာ၏ ဆယ်ပုံနှစ်ပုံ ပါဝင်သည်)]
[ထပ်ဆောင်း ဆုလာဘ် ၂ - ထိုးထွင်းသိမြင်မှု တိုးတက်ခြင်း(ချန်ချန်ရွှယ်၏ သာရုပ်ဖော် မသေမျိုးကျင့်ကြံခြင်းမှ ထိုးထွင်းသိမြင်မှုကို ရရှိသည်)]
ချန်ချန်ရွှယ်၏ ရမှတ် တွက်ချက်ခြင်း ဆုလာဘ်က ချင်းကျောက်ထက် ပို၍ပင် များပြားနေခဲ့သည်။
အဘယ်ကြောင့်ဆိုသော် ဒီတစ်ခါ သူမဟာ အောင်မြင်မှု နှစ်ခုကို အသက်သွင်းနိုင်ခဲ့သောကြောင့် ဖြစ်၏။
တာအိုမိတ်ဆွေအောင်မြင်မှုက ချင်းကျောက် အသက်သွင်းခဲ့သည့် အောင်မြင်မှုနှင့် အတိအကျ တူညီနေခဲ့သည်။
ဖြစ်နိုင်သည်မှာ သူတို့ နှစ်ယောက်က မသေမျိုးကျင့်ကြံခြင်း သရုပ်ဖော် စနစ်ထဲတွင် ဆုံတွေ့ခဲ့ကြပြီး တစ်ယောက်နှင့် တစ်ယောက် ကိုယ်ပိုင်အမှတ်အသားကို အသိအမှတ်ပြုခဲ့ကြသောကြောင့် ဖြစ်ပေမည်။
ပြီးတော့ မိစ္ဆာ၏ အိမ်မက်ဆိုး အောင်မြင်မှုက ချန်ချန်ရွှယ်၏ ကိုယ်ပိုင် ကြိုးစားအားထုတ်မှု ပင် ဖြစ်သည်။ သူမ ကောင်းကင်အကျဉ်းထောင်ထဲမှ မိစ္ဆာ အများအပြားကို ဝါးမျိုးခဲ့သည် မဟုတ်ပါလော။
ပိုင်ယီဟာ ပျင်းရိနေချိန်တွင် ချန်ချန်ရွှယ်က မဟာဝေ မင်းဆက်၏ ကောင်းကင်အကျဉ်းထောင်ထဲမှ မိစ္ဆာ (၁၀၈) ကောင်ကို ဝါးမျိုပစ်ခဲ့သည်ဟုပင် ရေတွက်ခဲ့သေးလေသည်။
ဤအချက်ကို ကြည့်လျှင် သိသာထင်ရှားလှပေသည်…
အကယ်၍ သူမသာ ဤအောင်မြင်မှုကို အသက်မသွင်းနိုင်ခဲ့ပါက တကယ့် ပြဿနာ ရှိနေပေလိမ့်မည်။
ဆုလာဘ် ၁ ဖြစ်သည့် ကျောက်စိမ်း တိုကင်က ပိုင်ယီ အတွက် သိပ်ပြီးအသုံးမဝင်သလို ၎င်းအား ဝိညာဉ် လက်နက် အဖြစ်ပင် သတ်မှတ်၍ မရပေ။
ထို့ကြောင့် သူဟာ ၎င်းကို လစ်လျူရှုရန် ဆုံးဖြတ်လိုက်သည်။
ဆုလာဘ် ၂ နှင့် ဆုလာဘ် ၃က မကြာခဏ ပေါ်လာတတ်သည့် ဆုလာဘ်များ ဖြစ်ကြပေသည်။
(၅၂) နှစ်ကြာ ဓားလမ်းစဉ် အတွေ့အကြုံနှင့် ယှဉ်လိုက်လျှင် ပိုင်ယီဟာ အခြေတည်အဆင့် အဆင့် (၆) ၏ ဝိညာဉ်စွမ်းအား အားလုံးကို ပို၍ လိုလားမိသည်။
အဘယ်ကြောင့်ဆိုသော် ပိုင်ယီဟာ ချန်ချန်ရွှယ်ထံမှ (၁၆၄) နှစ်ကြာ ဓားလမ်းစဉ် အတွေ့အကြုံကို ရရှိပြီးသား ဖြစ်သောကြောင့် ဖြစ်၏။
ထို့ကြောင့် ဤ (၅၂) နှစ်ကြာ ဓားလမ်းစဉ် အတွေ့အကြုံသည် မလိုအပ်တော့ပေ။
"ဆုလာဘ် ၂"
တစ်ရက်ပင် မကြာသည့် အချိန်အတွင်း ပိုင်ယီဟာ အခြေတည်အဆင့် အဆင့် (၄) မှ အဆင့် (၅)၊ ထို့နောက် အဆင့် (၆) အထိ အဆင့်ချိုးဖျက်နိုင်ခဲ့သည်။ ဤအချိန်ကာလ အတွင်း သူ့ကျင့်ကြံမှု နယ်ပယ်ကို တည်ငြိမ်အောင် လုပ်ရန်ပင် မလိုအပ်ခဲ့ပေ။
များပြားလှသည့် ဝိညာဉ်စွမ်းအင် ပမာဏဟာ သူ့၏ ဒန်ထျန်းနှင့် ချီသွေးကြောများထဲသို့ ဝင်ရောက်လာပြီး ဝိညာဉ်စွမ်းအင် အများအပြားက သူ့၏ ခြေလက်အင်္ဂါများနှင့် အရိုးများကို ဆေးကြောပေးနေခဲ့သည်။
မွေးရာပါဝိညာဉ်ခန္ဓာကလည်း အတားအဆီးများ သို့မဟုတ် ကန့်သတ်ချက်များ အားလုံးကို ဖယ်ရှားပေးခဲ့ခေသည်။
လက်ဖျောက်တစ်ချက် တီးလိုက်သလောက်တောင် အခက်အခဲ လုံးဝ မရှိခဲ့ပေ။
၎င်းက ရိုးရှင်းပြီး လွယ်ကူနေခဲ့သည်။
ထပ်ဆောင်း ဆုလာဘ် နှစ်ခုကလည်း ကောင်းမွန်ပြီး အထူးသဖြင့် ကောင်းကင်ဝါးမျိုးခြင်း မိစ္ဆာ နည်းစနစ်၏ ဆယ်ပုံနှစ်ပုံပင်။
ပိုင်ယီ၏ ကောင်းကင်ဝါးမျိုးခြင်း မိစ္ဆာ နည်းစနစ် ဆယ်ပုံတစ်ပုံနှင့် ပေါင်းလိုက်လျှင် သူဟာ ဆယ်ပုံသုံးပုံ စုဆောင်းမိပေပြီ။
မကြာမီ သူဟာ ကျန်ရှိသည့် ဆယ်ပုံခုနစ်ပုံ အားလုံးကို စုဆောင်းနိုင်လိမ့်မည်ဟု ခန့်မှန်းရလေသည်။
သူဟာ ကောင်းကင်ဝါးမျိုးခြင်း မိစ္ဆာ နည်းစနစ်ကို ရရှိပေတော့မည်။
နောက်ထပ်ထပ်ဆောင်း ဆုလာဘ်ကလည်း လက်ခံနိုင်စရာပင်။ ၎င်းက သူ၏ ထိုးထွင်းသိမြင်နိုင်စွမ်းကို ထာဝရ တိုးတက်စေခြင်းဖြစ်၏။ ၎င်းက ကျင့်ကြံခြင်း လမ်းစဉ်ပေါ်တွင် ပိုမို ခိုင်မာသော အခြေခံအုတ်မြစ် ချထားလိုက်ခြင်းနှင့် အတူတူပင်။
သူ့၏ လက်ရှိ ခွန်အားနှင့် ကျင့်ကြံခြင်း အခြေခံအုတ်မြစ်ကို သူ ခံစားလိုက်ရပြီး အခြားသူများထက် မနိမ့်ကျပေ။
ပိုင်ယီ ရေရွတ်လိုက်၏။"အခု ငါက ကောင်းကင်သားတော်တစ်ယောက် အဖြစ် သတ်မှတ်လို့ ရပြီလား"
"ပြီးတော့ ငါက ချန်ချန်ရွှယ်တို့နဲ့ ပါရမီတူလို့ သတ်မှတ်လို့ ရပြီ မဟုတ်လား"
"ဒါဆိုရင်…"
အကြံဉာဏ် တစ်ခု သူ့စိတ်ထဲ ပေါ်လာခဲ့သည်။ "အကယ်၍ ငါ ကျင့်ကြံခြင်း သရုပ်ဖော်မှုကို ကိုယ်တိုင် ပြန်လုပ်ကြည့်ရင် အရင် အကြိမ်ပေါင်း ဒါဇင်များစွာတုန်းကလို တစ်လတောင် အသက်မရှင်နိုင်ဘဲ ဖြစ်ရလောက်အောင် ကံဆိုးတော့မှာ မဟုတ်ဘူး မဟုတ်လား"
ဘာပဲဖြစ်ဖြစ် သူဟာ မသေမျိုးကျင့်ကြံခြင်း သရုပ်ဖော် စနစ်ထဲ၌ သေဆုံးမည် မဟုတ်ပဲ အများဆုံးမှ သူ့၏ စိတ်အခြေအနေကိုသာ ထိခိုက်ပေလိမ့်မည်။
'အင်း…'
ပိုင်ယီ မေးစေ့ကို ပွတ်သပ်လိုက်ပြီး နက်ရှိုင်းစွာ စဉ်းစားခန်း ဝင်သွားခဲ့သည်။
…
မကြာမီ အခြားတစ်ဖက်မှ ချန်ချန်ရွှယ်ဟာလည်း သူမ၏ ဆုလာဘ်ကို ရရှိလိုက်၏။
[ဆုလာဘ် - အခြေတည်အဆင့် အဆင့် (၃) ကျင့်ကြံမှု အဆင့် (အတားအစီးတစ်စုံတစ်ရာ မရှိဘဲ သင့်ကို အခြေတည်အဆင့် အဆင့် (၃) သို့ တိုက်ရိုက် ဝင်ရောက်ခွင့် ပေးနိုင်သည်)]
[ထပ်ဆောင်း ဆုလာဘ် ၁ - မပြည့်စုံသော ကောင်းကင်ဝါးမျိုးခြင်း မိစ္ဆာ နည်းစနစ် မူကွဲ၊ အပိုင်းအစ (၉) ခု (အားလုံး စုဆောင်းမိသည့် အတွက် ဂုဏ်ယူပါသည်)]
[ထပ်ဆောင်း ဆုလာဘ် ၂ - ဝိညာဉ် ခန္ဓာ တစ်ဝက်(ချင်းကျောက်၏ အဆင့်နိမ့် မူလ ပါရမီ)
"အယ်..."
ထပ်ဆောင်း ဆုလာဘ် ၂ ကို မြင်လိုက်ရသောအခါ ချန်ချန်ရွှယ်၏ ခံစားချက်များ လှုပ်ရှားသွားပြီး တုန်လှုပ်ကာ အံ့သြသွားခဲ့ရသည်။ "ချင်းကျောက်ရဲ့ အဆင့်နိမ့် မွေးရာပါ ပါရမီ.... အဆင့်နိမ့် မွေးရာပါ ပါရမီ.... ဘာလို့ သူမရဲ့ အဆင့်နိမ့် မွေးရာပါ ပါရမီက ငါ့ရဲ့ ရမှတ် တွက်ချက်ခြင်း ဆုလာဘ် ဖြစ်လာရတာလဲ"
"ဖြစ်နိုင်တာက ငါတို့ နှစ်ယောက် မသေမျိုးကျင့်ကြံခြင်း သရုပ်ဖော် စနစ်ထဲမှာ ပူးပေါင်းဆောင်ရွက်ခဲ့ကြလို့လား"
ချန်ချန်ရွှယ် ကြောင်အသွားခဲ့ပြီး မျက်နှာပေါ်တွင် သံသယများ ပြည့်နှက်သွားခဲ့လေသည်။
သို့သော် နောက်တစ်ခဏ၌ သူမရင်ထဲမှ သံသယကို ယာယီ ဖိနှိပ်လိုက်ရ၏။
အဘယ်ကြောင့်ဆိုသော် သူမဟာ ကျင့်ကြံမှု အဆင့်ကို မထိန်းချုပ်နိုင်တော့ပဲ အဆင့်ချိုးဖျက်ပေတော့မည်။
အခြေတည်အဆင့် အဆင့် (၂) မှ အဆင့် (၃) သို့ ချိုးဖျက်ဝင်ရောက်ရန် ချန်ချန်ရွှယ်ဟာ လဝက်ပင် အချိန်မကုန်ခဲ့ပေ။
သူမ အောင်မြင်စွာ အဆင့်ချိုးဖျက်ပြီးသည့်အခါ သူမ၏ ခံစားချက်များ အလွန် ရှုပ်ထွေးနေခဲ့သည်။
ဤအရာက သိပ်ပြီးရိုးရှင်းလွန်းလှပေသည်။
ရိုးရှင်းလွန်းသဖြင့် သူမ၏ အရင်က ကြိုးစားအားထုတ်မှုများအားလုံးက အလဟဿ ဖြစ်သွားသကဲ့သို့ သူမ ခံစားလိုက်ရ၏။