အခန်း ၁၃ : လီမျိုးနွယ်စုမှ လူများနှင့် ချောင်ဂိုဏ်းသားများ
ချန်အိမ်တော်တွင်.....
ချန်ချန်ရွှယ်၏ မျက်နှာက သိပ်မကောင်းလှပေ။ မူလက သူမ တွေးထားသည်မှာ ပုံမှန်အတိုင်း အေးအေးဆေးဆေး ဆက်လက် ကျင့်ကြံနေနိုင်သရွေ့ မသေမျိုးကျင့်ကြံခြင်း သရုပ်ဖော် စနစ်ထဲတွင် အခြေတည်အဆင့် ကျင့်ကြံသူ ဖြစ်လာနိုင်လိမ့်မည် ဟူ၍ ဖြစ်၏။
ထို့နောက် သရုပ်ဖော်မှု ပြီးဆုံးပါက ဆုလာဘ် အများအပြား ရရှိနိုင်ပေလိမ့်မည်။
ထိုဆုလာဘ်များက သူမကို အခြေတည်အဆင့် (၂) သို့ တစ်ရှိန်ထိုး ရောက်ရှိသွားစေနိုင်ပြီး လက်ရှိ ကြုံတွေ့နေရသော အဆို့အတားကိုပါ ချိုးဖျက်ပေးနိုင်လိမ့်မည်။
ထို့ကြောင့် သူမဟာ ကျင့်ကြံခြင်းကို အာရုံစိုက်ရန် တောနက်ထဲသို့ ဝင်ရောက်ခဲ့လေသည်။ သို့သော် ထိုကဲ့သို့ အန္တရာယ်မျိုးနှင့် ကြုံတွေ့ရလိမ့်မည်ဟု သူမ ထင်မထားခဲ့မိပေ။
မိစ္ဆာအဖြစ် ပြောင်းလဲပြီးသား မိစ္ဆာသားရဲတစ်ကောင်နှင့် သူမ ကြုံတွေ့ခဲ့ရပေပြီး ထိုမိစ္ဆာသားရဲ၏ ချောင်းမြောင်းတိုက်ခိုက်ခြင်းကို ခံလိုက်ရကာ သေဆုံးခဲ့ရလေသည်။
ချန်ချန်ရွှယ်ဟာ အံကို ကြိတ်လိုက်မိ၏။
အကယ်၍သာ ထိုမိစ္ဆာသားရဲနှင့် သေချာ တိုက်ခိုက်ရမည်ဆိုလျှင် သူမဟာ လုံးဝ ကြောက်ရွံ့နေမည် မဟုတ်ပေ။ ပြဿနာမှာ ထိုကောင်က သူမ ကျင့်ကြံခြင်း၌ အာရုံစိုက်နေပြီး အကာအကွယ်မဲ့နေသည့် အချိန်ကို အခွင့်ကောင်းယူကာ နောက်ကျောဘက်မှ အလစ်ဝင်တိုက်ခိုက်ခဲ့ခြင်း ဖြစ်၏။ တစ်ချက်တည်းနှင့် သူမဟာ ပြင်းထန်စွာ ဒဏ်ရာရသွားခဲ့ပေသည်။
နောက်ဆုံးတွင် သူမ ပြန်လည် တုံ့ပြန်နိုင်ခဲ့ပေမဲ့ ဒဏ်ရာပြင်းထန်စွာ ရထားသော ခန္ဓာကိုယ်ဖြင့် တိုက်ခိုက်ခဲ့ရတာကြောင့် ရလဒ်က ရှင်းနေလေသည်။
သူမ သေဆုံးသွားခဲ့ရ၏။
[ဒုတိယအကြိမ် မသေမျိုးကျင့်ကြံသူ ဘဝ သရုပ်ဖော်မှုတွင် သင်ဟာ (၈) နှစ်၊ (၄) လ နှင့် (၆) ရက်တိုင်တိုင် အသက်ရှင် နေထိုင်ခဲ့ပါသည်။ သင်ဟာ ဆုလာဘ်ရယူရန် အရည်အချင်း ပြည့်မီပါသည်။ နောက်တစ်ကြိမ် သရုပ်ဖော်မှု မပြုလုပ်မီ (၁၂) နာရီ အချိန်စောင့်ဆိုင်းရပါဦးမည်။]
[ချန်ချန်ရွှယ်... သင်ဟာ ဒုတိယအကြိမ် သရုပ်ဖော်မှုတွင် လက်စားချေခြင်း အောင်မြင်မှုကို ရယူနိုင်ခဲ့ပါသည်။ သင်ဟာ ထပ်ဆောင်း ဆုလာဘ်ကို ရရှိလိုက်ပါသည်]
[သင်သည် အောက်ပါ ဆုလာဘ်များကို ရရှိလိုက်ပါသည် - ]
[ဆုလာဘ် - ဓားကျင့်စဉ် (မပြည့်စုံ)]
[ထပ်ဆောင်း ဆုလာဘ် - ဝိညာဉ်စွမ်းအင် (၁) မျှင်]
ချန်ချန်ရွှယ် ကြောင်အသွားခဲ့သည်။ ချက်ချင်းပင် သူမစိတ်ထဲရှိ စိတ်ပျက်စရာ ခံစားချက်များ အားလုံးဟာ ပျောက်ကွယ်သွားခဲ့ပြီး ဝမ်းသာပီတိများက လှိုင်းထလာခဲ့လေသည်။
ဓားကျင့်စဉ်....
ဒီဆုလာဘ်မျိုး ရရှိလိမ့်မည်ဟု သူမ ထင်မထားခဲ့ပေ။ ဘာပဲဖြစ်ဖြစ် ပထမအကြိမ်တုန်းက သရုပ်ဖော် စနစ်ပေးတဲ့ ဆုလာဘ်က တော်တော်လေး ကပ်စေးနည်းခဲ့တာပြီး အဲဒီတုန်းက တစ်နှစ်တာ အတွင်းအားနဲ့ သိုင်းပညာ အတွေ့အကြုံလောက်ပဲ ပေးခဲ့ပေသည်။
ဒါပေမဲ့ ဒီတစ်ခါတော့ ဓားကျင့်စဉ် (မပြည့်စုံ) ကို ဆုချလိုက်ရုံသာမကပဲ ထပ်ဆောင်း ဆုလာဘ်လည်း ပါသေးလေသည်။
ဝိညာဉ်စွမ်းအင် (၁) မျှင် ကို ဆုချလိုက်ခြင်းပင်။
ဒီထူးခြားတဲ့ မသေမျိုးကျင့်စဉ် စာအုပ်ကို မူလဝိညာဉ်အဆင့် ကျွမ်းကျင်သူ တစ်ယောက်က ဖန်တီးခဲ့မှန်း ချန်ချန်ရွှယ် ကောင်းကောင်း သိထားခဲ့သည်။ မူရင်းရဲ့ သုံးပုံတစ်ပုံလောက်ပဲ ရှိတဲ့ မပြည့်စုံတဲ့ ဗားရှင်း ဖြစ်နေရင်တောင်မှ ဒါက အလွန် တန်ဖိုးရှိတဲ့ မသေမျိုးကျင့်စဉ် တစ်ခု ဖြစ်နေဆဲပင်။
အကယ်၍ ဒီ ဓားကျင့်စဉ် (မပြည့်စုံ) ကိုသာ ဝိညာဉ်ဓားဂိုဏ်းရဲ့ ကျမ်းစာမျှော်စင်မှာ ထားရှိမယ်ဆိုရင် သေချာပေါက် အမြင့်ဆုံးအဆင့် နေရာကို ရောက်ရှိသွားပေလိမ့်မည်။
ဝိညာဉ်ဓားဂိုဏ်းရဲ့ ထိပ်တန်း ကျင့်စဉ်တွေနဲ့ ယှဉ်တွဲထားရှိဖို့ အရည်အချင်း ပြည့်မီသည်မှာ သေချာလေသည်။
အခုတော့ သူမဟာ ဒီဓားကျင့်စဉ်ကို လက်တွေ့ကမ္ဘာမှာ အသုံးပြုလို့ ရပေပြီ။
တစ်ချိန်တည်းမှာပင် ချန်ချန်ရွှယ်ဟာ သူမ ခန္ဓာကိုယ်ထဲတွင် ဝိညာဉ်စွမ်းအင် တစ်မျှင် တိုးလာသည်ကို ခံစားလိုက်ရသည်။ ကျင့်ကြံမှု အတားအစီး ဖြစ်နေသူ တစ်ယောက်အတွက် ခန္ဓာကိုယ်ထဲမှာ ဝိညာဉ်စွမ်းအင် တစ်မျှင် ပိုရလာတာက အလွန် ရှားပါးသော အခွင့်အရေး ဖြစ်၏။
အကယ်၍ သူမသာ နောက်ထပ် ဝိညာဉ်စွမ်းအင် ရာဂဏန်းလောက် ထပ်ရမယ်ဆိုရင် အခြေတည်အဆင့် (၂) ကို ရောက်ဖို့ ယုံကြည်မှု ရှိလာပေလိမ့်မည်။
'သူမရဲ့ ကျင့်ကြံမှု အတားအစီးကို ချိုးဖျက်နိုင်တော့မယ်....'
ဒီအချိန်မှာ ချန်ချန်ရွှယ်၏ စိတ်အခြေအနေဟာ အလွန် ကောင်းမွန်နေခဲ့လေသည်။
...
တစ်ချိန်တည်းမှာပင် ပိုင်ယီဟာ နှလုံးသားသန့်စင်ဆေးလုံးကို လက်ထဲတွင် ကိုင်ထားခဲ့သည်။ နှလုံးသားသန့်စင်ဆေးလုံးကို စားသုံးခြင်းက သူ့ခန္ဓာကိုယ်ထဲရှိ ဝိညာဉ်စွမ်းအင်ကို တိုးပွားစေနိုင်ခြင်း ရှိမရှိ မသိသောကြောင့် သူဟာ ခေတ္တမျှ တွန့်ဆုတ်နေမိလေသည်။
ရိုးရိုးသားသား ပြောရရင် သူဟာ ဒီအရာနဲ့ ပတ်သက်ပြီး ဘာမှ မသိပေ။ ပြောပလောက်တဲ့ မသေမျိုးကျင့်ကြံခြင်း အတွေ့အကြုံလည်း သူ့မှာ မရှိချေ။
နှလုံးသားသန့်စင်ဆေးလုံးက နတ်ဘုရားမျက်လုံးကို နိုးကြားစေပြီး ခန္ဓာကိုယ်ကို ကာကွယ်ဖို့ အတွက် ဇီဝစွမ်းအင်ကို စုစည်းပေးနိုင်တယ်လို့ ချန်ချန်ရွှယ် ပြောခဲ့တာကို သူ သတိရလိုက်၏။
ဒါက လမ်းဘေးဆေးဆရာတွေရဲ့နတ်ဆေး ကြော်ငြာသံနဲ့ တော်တော် ဆင်တူနေကာ ယုံချင်စရာ မကောင်းလောက်အောင် ကောင်းလွန်းနေပေသည်။
"ထားလိုက်ပါတော့... စမ်းကြည့်လိုက်တာပေါ့..."
ဘာပဲဖြစ်ဖြစ် သူ့လက်ထဲမှာ ဆေးလုံး (၃) လုံးတောင် ရှိနေတာပင်။
ဝိညာဉ်ဓားဂိုဏ်းရဲ့ သူတော်စင်မ ဖြစ်တဲ့ ချန်ချန်ရွှယ်က သူ့ကို လိမ်မှာတော့ မဟုတ်တော့ မဟုတ်လောက်ပါဘူး........
ပိုင်ယီသည် နှလုံးသားသန့်စင်ဆေးလုံးကို ယူပြီး ပါးစပ်ထဲ ပစ်ထည့်လိုက်လေသည်။
မကြာခင်မှာပဲ ပါးစပ်ထဲမှာတင် အရည်ပျော်သွားတယ် ဆိုတာ ဘာလဲဆိုတာ သူ သိလိုက်ရ၏။ နှလုံးသားသန့်စင်ဆေးလုံးက ပါးစပ်ထဲမှာတင် ဝိညာဉ်စွမ်းအင် အလုံးလိုက် အဖြစ် ပြောင်းလဲသွားခဲ့ပြီး သူ့ခန္ဓာကိုယ်ထဲကို စီးဝင်သွားခဲ့သည်။
၎င်းက ခြေလက်အင်္ဂါများနှင့် အရိုးများထဲသို့ စတင် စီးဝင်သွားပြီး ချီကြောများနှင့် ဒန်ထျန်းဆီသို့ ရောက်ရှိသွားခဲ့သည်။
ကြီးမားသော ဝိညာဉ်စွမ်းအင်များက ပိုင်ယီ၏ ချီကြောများထဲတွင် အရိုင်းဆန်စွာ ပြေးလွှားနေသော်လည်း သိပ်ပြီး ကြမ်းတမ်းလွန်းသော ခံစားချက်မျိုး မပေးပေ။ အနည်းဆုံးတော့ ပိုင်ယီ အနေဖြင့် နေမထိထိုင်မသာ ဖြစ်ခြင်းမျိုး လုံးဝ မခံစားရပေ။
ပိုင်ယီဟာ ဓားကျင့်စဉ်ထဲတွင် ဖော်ပြထားသော ညွှန်ကြားချက်များ အတိုင်း ချက်ချင်း တရားထိုင်လိုက်၏။
ထို့နောက် သူ့ခန္ဓာကိုယ်ထဲရှိ ကြီးမားသော ဝိညာဉ်စွမ်းအင်များကို သန့်စင်နေလိုက်လေသည်။
အချိန်များ ကုန်ဆုံးသွားခဲ့သည်။
မကြာမီ မွန်းတည့်ချိန် ရောက်လာပြီး ပိုင်ယီဟာ နှလုံးသားသန့်စင်ဆေးလုံးမှ ရရှိသော ဝိညာဉ်စွမ်းအင်များကို အသုံးပြု၍ရသော ဝိညာဉ်စွမ်းအင်များ အဖြစ် အပြည့်အဝ သန့်စင်နိုင်ခဲ့သည်။
ဒီလုပ်ငန်းစဉ်က အလွန် ခက်ခဲသည်ဟု ပြောရပေမည်။အကြောင်းမှာ သူ့၏ အရိုးတည်ဆောက်ပုံက သိပ်မကောင်းသောကြောင့် ဖြစ်၏။ သန့်စင်သည့် လုပ်ငန်းစဉ်က သွားတိုက်ဆေးကို နည်းနည်းချင်းစီ ညှစ်ထုတ်ရသလိုမျိုး ဖြစ်နေခဲ့သည်။
ထိုအချိန်တွင် အသံတစ်ခု ကြားလိုက်ရသဖြင့် သူ၏ ကျင့်ကြံခြင်းကို ရပ်တန့်လိုက်ပြီး မျက်မှောင်ကြုတ်လိုက်လေသည်။
"ရောက်လာပြီပဲ" သူဟာ တိုးညှင်းစွာ ရေရွတ်လိုက်သည်။
မနေ့က လီမျိုးနွယ်စုရဲ့ ခြိမ်းခြောက်မှုကို ပိုင်ယီ မမေ့သေးပေ။ လီမျိုးနွယ်စုက လီကျင်းဖူက သူ့ကို စဉ်းစားဖို့ တစ်ရက်ပဲ အချိန်ပေးမယ်လို့ သတိပေးခဲ့သည်။ တစ်ရက်ပြည့်ပြီးနောက် နောက်ဆုံးအကြိမ် စကားပြောဖို့ လာလိမ့်မည်ဖြစ်ရာ အဲဒီနေ့က ဒီနေ့ပင် ဖြစ်လေသည်။
သူနှင့် လီမျိုးနွယ်စုကြားတွင် ဆွေးနွေးစရာ ဘာမှမရှိဟု ပိုင်ယီ ခံစားရ၏။
သူ့ရှေ့လူ သေဆုံးမှုက လီမျိုးနွယ်စုနဲ့ သေချာပေါက် ပတ်သက်နေပေသည်။
ဒီလို အခြေအနေမျိုးမှာ သူက ဘယ်လိုလုပ် ဆွေးနွေးနိုင်မည်နည်း။
တစ်ဖက်လူက အခုချိန်မှာ သူ့ကို ဘယ်လိုသတ်ရမလဲ ဆိုတာကို စဉ်းစားနေလောက်ပြီလို့ ပိုင်ယီ သံသယရှိနေမိခဲ့သည်။
ဒါမှသာ အချိန်ဖြုန်းစရာ မလိုဘဲ မြေဂရန်ကို ရရှိနိုင်မှာ ဖြစ်လေသည်။
ပိုင်ယီဟာ တံခါးကို ဖြည်းဖြည်းချင်း တွန်းဖွင့်လိုက်သောအခါ သူကြားနေရသော ဆူညံသံများက ပိုကျယ်လောင်လာခဲ့သည်။ ဆူညံသံများက သူ့ကို စိတ်အနှောင့်အယှက် ဖြစ်စေပေသည်။ သူဟာ တိတ်ဆိတ်သော ပတ်ဝန်းကျင်ကို နှစ်သက်သူ ဖြစ်၏။
အိမ်တံခါးကို ဖွင့်လိုက်သောအခါ အပြင်ဘက်တွင် လူအုပ်စုလိုက်ကို တွေ့လိုက်ရပြီး မနေ့ကထက်ပင် လူပိုများနေလေသည်။
အဲဒီအထဲမှာ သူသိတဲ့ လူတစ်ယောက် ပါနေခဲ့ပြီး ၎င်းက လီမျိုးနွယ်စုက လီကျင်းဖူပင်။
သူ့အဝတ်အစားတွေက ကြည့်လိုက်တာနဲ့ ဈေးကြီးမှန်း သိသာပြီး သူ့မျက်နှာပေါ်တွင်လည်း ကြင်နာတတ်သော အပြုံးတစ်ခု ရှိနေခဲ့သည်။
ပိုင်ယီ တံခါးဖွင့်လာတာကို မြင်တော့ လီကျင်းဖူက ချက်ချင်း လိုရင်းကို ပြောလိုက်၏။ "သခင်လေးပိုင်က တကယ့်ကို အားလပ်နေတဲ့သူပဲ... နေ့ခင်းကြောင်တောင် အိမ်ထဲက အိမ်ပြင်မထွက်ဘဲ နေနေတာကိုး.... ဒီတော့ သခင်လေးပိုင် သေချာ စဉ်းစားပြီးပြီလား မသိဘူး"
"တစ်ရက်အချိန် ကုန်သွားပြီ.... သခင်လေးပိုင် မစဉ်းစားရတာတော့ မဟုတ်ပါဘူးနော်"
ပိုင်ယီဟာ ဒီလူအုပ်စုကို ဝေ့ကြည့်လိုက်သည်။ လီမျိုးနွယ်စုက လူတွေအပြင် လူကောင်း ပုံစံမပေါက်တဲ့ နောက်ထပ် လူတစ်စု ပါလာကြောင်း သူ သတိထားမိလိုက်၏။
သူတို့က စုတ်ပြတ်နေသော အင်္ကျီများကို ဝတ်ဆင်ထားပြီး သူတို့၏ အသားအရေက သာမန်လူတွေထက် ပိုကြမ်းတမ်းကာ ပိုမည်းနက်နေခဲ့သည်။
သူတို့ တစ်ယောက်ချင်းစီက သန်မာပုံ ရပေသည်။
'ဒါက...'
စကားလုံး နှစ်လုံး သူ့ခေါင်းထဲ ရုတ်တရက် ပေါ်လာခဲ့သည်။
ချောင်ဂိုဏ်း.....
သူ့မူလခန္ဓာကိုယ်ရဲ့ မှတ်ဉာဏ်ထဲမှာ ဒီလူအုပ်စုနဲ့ ပတ်သက်တဲ့ အမှတ်တရ ရှိနေပေသည်။ ကျင့်ကြံခြင်းလောကရှိ သာမန်လူများအကြားတွင် သူတို့က သိုင်းပညာ လေ့ကျင့်သူများ ဖြစ်ကြ၏။
ချောင်ဂိုဏ်းသည် ချင်းဟယ် ခရိုင်၏ အဓိက မြစ်ကြောင်း ပို့ဆောင်ရေးကို ထိန်းချုပ်ထားပြီး ထိုလုပ်ငန်းမှ မသိနိုင်လောက်အောင် များပြားသော ငွေကြေးများကို ရှာဖွေနေခဲ့ကြသည်။
တစ်ချိန်တည်းမှာပင် သူတို့က အလွန် ဗိုလ်ကျစိုးမိုးတတ်ကြလေသည်။
ထို့ကြောင့် ချင်းဟယ် ခရိုင်တွင် သူတို့၏ နာမည်ဂုဏ်သတင်းက သိပ်မကောင်းလှပေ။
ဒီ ချောင်ဂိုဏ်းသားတွေကို လီကျင်းဖူက ဦးဆောင်လာတာ မြင်တော့ ပိုင်ယီ နားလည်သွားခဲ့သည်။ ဒီ ချောင်ဂိုဏ်းသားတွေက လီကျင်းဖူ ငွေပေးပြီး ငှားလာတာ မဟုတ်ပဲ သူတို့က မူလကတည်းက လီမျိုးနွယ်စု မွေးထားတဲ့ ခွေးတွေပင်။
ဂိုဏ်းတစ်ခုက ဒီလောက် ကြီးပွားနေပြီး အစိုးရဘက်က ဘာပြဿနာမှ မရှာတာ မဆန်းတော့ချေ။
အဘယ်ကြောင့်ဆိုသော် လီမျိုးနွယ်စုက သူတို့ကို အကာအကွယ် ပေးထားခြင်းကြောင့်ပင်။
သူတို့အထဲမှာ လူအတော်များများ ရှိနေကြောင်း ပိုင်ယီ ခံစားမိခဲ့သည်။ သူတို့ရဲ့ ဒန်ထျန်းထဲမှာ အတွင်းအား လှုပ်ရှားမှုတွေ ရှိနေကြတာကြောင့် သာမန်လောကမှာတော့ သူတို့ကို သိုင်းပညာရှင်တွေလို့ သတ်မှတ်နိုင်ပေသည်။
'လီမျိုးနွယ်စုက တော်တော် သတိထားတတ်တာပဲ...'
သူ့လို တစ်ကောင်ကြွက် တစ်ယောက်ကို ရှင်းဖို့အတွက် လူအများကြီး ခေါ်လာခဲ့ကြသည်။
"သခင်လေးပိုင်... ခင်ဗျား အကောင်းအဆိုး နားမလည်သေးဘူး ဆိုရင်တော့ ငါကိုယ်တိုင် ဝင်ယူရင် ငါ့ကို အပြစ်မတင်နဲ့နော်"
လီကျင်းဖူဟာ မျက်လုံးကျဉ်းကာ ပြောလိုက်၏။
သူ့လေသံထဲက ခြိမ်းခြောက်မှုတို့က ထင်ရှားလွန်းနေလေသည်။
...