အခန်း ၁၂၉ : မဟာဝေမင်းဆက်၏ နိုင်ငံ ကံကြမ္မာ ကျဆင်းလာခြင်း၊ ရင်းနှီးနေသည့် ဇာတ်ကွက်
မသေမျိုးကျင့်ကြံခြင်း သရုပ်ဖော် စနစ်အတွင်း။
ချင်းကျောက်တစ်ယောက် မသေမျိုးကျင့်ကြံခြင်း သရုပ်ဖော်မှုကို ပြီးဆုံးသွားပြီ ဖြစ်ကြောင်း သဘောပေါက်လိုက်သည့် ချန်ချန်ရွှယ်ဟာ ချင်းကျောက်နှင့် ဆက်သွယ်ရန် မကြိုးစားတော့ပေ။ ထိုအစား သူမ ကိုယ်တိုင် ဘယ်လို ပိုကြာကြာ အသက်ရှင်သန်ရမလဲ ဆိုတာကို အာရုံစိုက်လိုက်၏။
[အသက် ၄၀ နှစ် - မဟာဝေ မင်းဆက် တစ်ခုလုံးကို အနောက်မှ အရှေ့သို့ ဖြတ်သန်း စီးဆင်းသည့် မြစ်ကြီးတစ်စင်းဟာ တစ်ခါမှ မဖြစ်ဖူးလောက်အောင်ကမ်းပါးများကို ချိုးဖျက်ကျော်လွန်ခဲ့သည်။ အရှိန်အဟုန်ပြင်းသည့် ရေများဟာ ကြီးမားသည့် ရေလွှမ်းမိုးမှုတစ်ခု အဖြစ် ပြောင်းလဲသွားခဲ့သည်။ ဒီမြင်ကွင်းကို မြင်လိုက်ရတဲ့ ကျင့်ကြံသူတွေတောင် သူတို့ရဲ့ မျက်နှာတွေက ပြင်းထန်စွာ ပြောင်းလဲသွားခဲ့သည်။]
[ကြီးမားသည့် သဘာဝ ကပ်ဘေးကို ခံစားခဲ့ရသည့် မဟာဝေ မင်းဆက်တွင် မရေမတွက်နိုင်သည့် သေဆုံးမှုများနှင့် ထိခိုက်ဒဏ်ရာရမှုများ ဖြစ်ပေါ်ခဲ့ရသည်။ အားနည်းသည့် ကျင့်ကြံသူ အများအပြားပင် ကြီးမားသည့် ကပ်ဘေးဒဏ်ကို ခံစားခဲ့ရပြီး အသက်ဆုံးရှုံးခဲ့ကြသည်။]
[ကြီးကြီးငယ်ငယ် ကျင့်ကြံခြင်း ဂိုဏ်းပေါင်း ရာပေါင်းများစွာဟာ သူတို့၏ တောင်တံခါးများကို စွန့်လွှတ်ပြီး အခြား အခြေစိုက်စခန်းများ ရှာဖွေရုံမှတစ်ပါး အခြား ရွေးချယ်စရာ မရှိတော့ပေ။]
[မဟာဝေ မင်းဆက်၏ ဧကရာဇ်မင်းမြတ်ဟာ ရေလွှမ်းမိုးမှုကို ကုစားရန် အရာရှိ အမြောက်အမြား စေလွှတ်ခဲ့သည်။]
[သို့သော် ဤရေလွှမ်းမိုးမှုက မတော်တဆ ဖြစ်ရပ်တစ်ခု မဟုတ်နိုင်ဟု သင် ယူဆခဲ့သည်။]
[အသက် ၄၃ နှစ် - ကပ်ဘေး ကယ်ဆယ်ရေးအတွက် နန်းတော်က ဖြန့်ဝေပေးသည့် ကောက်ပဲသီးနှံများဟာ လမ်းခရီးတွင် ခြေရာလက်ရာ မကျန် ပျောက်ဆုံးသွားခဲ့ပြီး ကလေးငယ်များ အစာငတ်မွတ်သည့် အကြီးစား ဖြစ်စဉ်တစ်ခု ဖြစ်ပေါ်စေခဲ့သည်။ မဟာဝေ မင်းဆက်မှ ပြည်သူများသည် မကျေနပ်ချက်များဖြင့် ပြည့်နှက်နေခဲ့ကြသည်။]
[ဒါက တကယ် မတော်တဆ ဖြစ်ရပ် တစ်ခု မဟုတ်ဘဲ တစ်စုံတစ်ယောက်က တမင်သက်သက် ဖရိုဖရဲ ဖြစ်အောင်ဖန်တီးနေတာ ဖြစ်ကြောင်း သင် နားလည်လိုက်သည်။]
"တစ်ဖက်လူက လူတွေရဲ့ သေဆုံးမှုကို လစ်လျူရှုနေတဲ့ လုပ်ရပ်က.. သင့်ကို အနည်းငယ် ဒေါသထွက်စေခဲ့သည်။"
...
ချန်ချန်ရွှယ်ဟာ သူမရဲ့ ဒီထင်မြင်ယူဆချက်ကို ချန်ဖုန်းယင်အား ပြောပြလိုက်သောအခါ ချန်ဖုန်းယင် သူ့မျက်ခုံးနှစ်ခုကြားက နေရာလွတ်ကို ပွတ်သပ်လိုက်ပြီး မျှော်လင့်ချက်မဲ့စွာ ပြောလိုက်၏။ "တစ်စုံတစ်ယောက်က တမင်သက်သက် လုပ်တယ် ဆိုတာ ငါ သိပါတယ်... ဒါပေမဲ့ အခု တစ်ဖက်လူရဲ့ ပူးပေါင်းကြံစည်မှု အောင်မြင်သွားပြီ ဆိုတော့ ငါတို့ လုပ်နိုင်တာက လူတွေကို ကယ်တင်ဖို့ အစွမ်းကုန် ကြိုးစားပြီး ရေကာတာကျိုးပေါက်သွားတဲ့ နေရာကို ရှင်းလင်းဖို့ အစွမ်းကုန် ကြိုးစားရုံပဲ"
ချန်ဖုန်းယင် ဒေါသ မထွက်တာ မဟုတ်ချေ။ သူ မရေမတွက်နိုင်အောင် ဒေါသထွက်ခဲ့ရပြီး ခေါင်းပေါင်း မရေမတွက်နိုင်အောင် ဖြတ်ခဲ့ပြီးပေပြီ။
သို့သော် အဲဒါက ဘာအသုံးဝင်ခဲ့သနည်း။
မိစ္ဆာများ။
သဘာဝ ကပ်ဘေးများ။
နောက်ကွယ်က ကြိုးကိုင်သူတွေက မဟာဝေ မင်းဆက်ကို ဖျက်ဆီးဖို့ ဒီနည်းလမ်း နှစ်ခုကို အသုံးပြုခဲ့ကြပြီး ဒါက သိသာထင်ရှားစွာ သေချာ စီစဉ်ထားတာပင်။ မဟုတ်ရင် သူတို့ ဒီလောက် ကြီးမားတဲ့ လှုပ်ရှားမှု တစ်ခုကို ပြီးမြောက်အောင် လုပ်နိုင်မှာ မဟုတ်ချေ။
အဓိက အချက်က သူတို့ဟာ ချန်ဖုန်းယင်ရဲ့ အားနည်းချက်ကို ဆုပ်ကိုင်ထားကြလေသည်။ တော်ဝင်မိသားစုက ပြည်သူတွေရဲ့ နှလုံးသားကို ဂရုစိုက်ဆုံးပဲ ဆိုတာ သူတို့ သိကြသည်။
ချန်ဖုန်းယင် လေးနက်သည့် အသံဖြင့် ပြောလိုက်သည်။ "မင်းဆက်တစ်ခု အတွက် ပြည်သူတွေရဲ့ နှလုံးသားက အထူး အရေးကြီးတယ်... ဘာလို့လဲဆိုတော့ ပြည်သူတွေရဲ့ နှလုံးသားက မင်းဆက်တစ်ခုရဲ့ နိုင်ငံတော် ကံကြမ္မာကို ပိုပြီး စည်ပင်ဝပြောလာအောင် လုပ်ပေးနိုင်လို့ပဲ"
"နိုင်ငံတော် ကံကြမ္မာ စည်ပင်ဝပြောလာတဲ့ အခါ မင်းဆက်က ပိုပြီး စည်ပင်ဝပြောလာမယ်... ပြီးတော့ သဘာဝ ကပ်ဘေး အရေအတွက်လည်း လျော့နည်းသွားလိမ့်မယ်... မင်းဆက်ထဲက ဝိညာဉ်ချီတွေတောင် ပိုသိပ်သည်းလာလိမ့်မယ်"
"အကယ်၍ နိုင်ငံတော် ကံကြမ္မာက အတိုင်းအတာ တစ်ခု အထိ စည်ပင်ဝပြောလာရင် မင်းဆက်ထဲက လူတိုင်းက တကယ် နဂါးတစ်ကောင်လိုဖြစ်လာနိုင်တယ်"
"ဒါပေမဲ့..."
.
သူ ဒီစကား ပြောတဲ့ အခါ သူ့လေသံက ပြောင်းလဲသွားပြီး ဆက်ပြောလိုက်သည်။ "တကယ်လို့ မင်းဆက်တစ်ခုက ပြည်သူတွေရဲ့ နှလုံးသားကို ဆုံးရှုံးလိုက်ရပြီ ဆိုတာနဲ့ နိုင်ငံတော်ရဲ့ စည်ပင်ဝပြောမှုက ဆက်လက် ကျဆင်းပြီး အားနည်းလာလိမ့်မယ်... စည်ပင်ဝပြောမှု ကျဆင်းနေတဲ့ မင်းဆက်တစ်ခုက သဘာဝ ကပ်ဘေးတွေရဲ့ နှိပ်စက်မှုကို ခံရလိမ့်မယ်.... ပြီးတော့ ပြည်သူတွေ အသက်မွေးဝမ်းကျောင်း ပြုနိုင်တော့မှာ မဟုတ်ဘူး"
"ဒါကြောင့်လည်း ပြည်သူတွေကို ချစ်ဖို့နဲ့ မင်းရဲ့ ကလေးတွေကို ချစ်ဖို့ ငါ မင်းကို အမြဲတမ်း သင်ပေးနေတာ.... မဟာဝေ မင်းဆက်ရဲ့ ပြည်သူတွေက ကျယ်ပြောတဲ့ သမုဒ္ဒရာကြီးနဲ့ တူတယ်....ငါတို့ ကတော့ သမုဒ္ဒရာကြီးက မတည့်ပေးထားတဲ့ ရွက်လွှင့် သင်္ဘောကြီး တစ်စင်းနဲ့ တူတယ်"
"သမုဒ္ဒရာကြီးက တည်ငြိမ်လေလေ ငါတို့ ရွက်လွှင့်တဲ့ အခါ ပိုတည်ငြိမ်လေလေပဲ... သမုဒ္ဒရာကြီးက လှိုင်းလေထန်လေလေ ငါတို့ ရေနစ်ပြီး သေဆုံးနိုင်ခြေ ပိုများလေလေပဲ..."
ချန်ဖုန်းယင်ရဲ့ စကားတွေကို ကြားတော့ ချန်ချန်ရွှယ် စဉ်းစားဟန်ဖြင့် ခေါင်းငြိမ့်လိုက်၏။ "မဟာဝေ မင်းဆက် မတိုင်ခင်က မင်းဆက်လိုမျိုးလား"
ချန်ဖုန်းယင် ခဏတာမျှ လန့်သွားပြီးမှ ပြုံး၍ ပြောလိုက်သည် - "မှန်တယ်... မဟာဝေက ယခင် မင်းဆက်ရဲ့ လူကြိုက်မများမှုနဲ့ နိုင်ငံတော် ကံကြမ္မာ ကျဆင်းမှုကို အခွင့်ကောင်းယူပြီး တော်လှန်ရေး အလံကို ပြတ်ပြတ်သားသား လွှင့်ထူခဲ့တာ... ယခင် မင်းဆက်ရဲ့ အာဏာရှင်ဖြုတ်ချခံခဲ့ရတယ်"
ဒီအထိ ပြောပြီးတော့ အေးစက်တဲ့ အရောင်တစ်ချက် ချန်ဖုန်းယင်ရဲ့ မျက်လုံးထဲ ဖြတ်သန်းသွားခဲ့သည်။ "အကယ်၍ တစ်စုံတစ်ယောက်က ဒီနည်းလမ်းကို အသုံးပြုပြီး မဟာဝေရဲ့ ပြည်သူတွေကို သူတို့ရဲ့ နှလုံးသား ဆုံးရှုံးသွားအောင် ရည်ရွယ်ချက်ရှိရှိ လုပ်ဆောင်ချင်ရင် သူတို့က ကမ္ဘာလောကရဲ့ အပြစ်သားတွေပဲ"
"သူတို့ကို ကွပ်မျက်ရမယ်"
မဟာဝေ ဧကရာဇ်မင်းမြတ်ဟာ မဟာဝေ ပိုင်နက်ထဲက ဖရိုဖရဲ ဖြစ်မှုတွေရဲ့ အကြောင်းရင်းကို စုံစမ်းစစ်ဆေးဖို့ လူတွေ စီစဉ်ခဲ့သည်။ ဒီအချိန်ကာလ အတွင်း မရေမတွက်နိုင်တဲ့ နန်းတွင်း အရာရှိတွေ ခေါင်းဖြတ်ခံခဲ့ရလေသည်။
ဒါပေမဲ့ ပြည်သူတွေရဲ့ ဒေါသက အလွယ်တကူ ငြိမ်းအေးသွားမှာ မဟုတ်ပေ... မဟာဝေ နိုင်ငံတော်ရဲ့ ကံကြမ္မာက တစ်နေ့ထက် တစ်နေ့ အားနည်းလာပြီး နိုင်ငံတော် ပိုင်နက်ထဲတွင်လည်း သဘာဝ ကပ်ဘေးတွေ မကြာခဏ ပေါ်လာခဲ့သည်။
[မိုးခေါင်ခြင်း၊ ရေကြီးခြင်း၊ငလျင်လှုပ်ခြင်း... နဲ့ အခြား သဘာဝ ကပ်ဘေးတွေ အားလုံး မဟာဝေ မင်းဆက် အပေါ် ကျရောက်လာနေခဲ့သည်။]
[ပုန်ကန်သူ တပ်မတော်တွေတောင် ရှိနေခဲ့သည်]
[ဒီလို အခြေအနေမျိုးကို သင် ပိုပိုပြီး ရင်းနှီးသလို ခံစားလာရသည်။ သင် ချင်းကျောက်ရဲ့ ခြေရာအတိုင်း လိုက်ပါသွားဖို့ ဖြစ်နိုင်ချေ မြင့်မားကြောင်း ခံစားလိုက်ရသည်။]
[အသက် ၄၅ နှစ် - အရာများစွာ ဖြစ်ပျက်ခဲ့သဖြင့် သင်ဟာ ကျင့်ကြံဖို့ မကြာခဏ ပျက်ကွက်ခဲ့သော်လည်း သင့်ရဲ့ ထူးချွန်တဲ့ ကျင့်ကြံခြင်း အမြစ်နဲ့ ကြွယ်ဝတဲ့ ကျင့်ကြံခြင်း အတွေ့အကြုံကြောင့် သင်ဟာ အခြေတည်အဆင့်အဆင့် (၆) သို့ အဆင့်ချိုးဖျက် ဝင်ရောက်နိုင်ခဲ့သည်]
[မဟာဝေ မင်းဆက်နှင့် နယ်နိမိတ်ချင်း ထိစပ်နေသည့် မင်းဆက်တစ်ခုတွင် ကျင့်ကြံခြင်း ကမ္ဘာကို တုန်လှုပ်သွားစေသည့် အဖြစ်အပျက်ကြီးတစ်ခု ဖြစ်ပွားခဲ့သည်။ မဟာဝေ နန်းတော်ထဲတွင် ရှိနေသည့် သင်ပင်လျှင် ထိုအကြောင်း ကြားသိခဲ့ရသည်...]
[ရှေးဟောင်း မိစ္ဆာတစ်ကောင် ချိပ်ပိတ်မှုမှ အဆင့်ချိုးဖျက် ထွက်လာပြီး ကျင့်ကြံခြင်း ကမ္ဘာသို့ ပြန်လာကြောင်း သင် ကြားသိလိုက်ရသည်]
[ဒီဇာတ်ကွက်က အတော်လေး ရင်းနှီးနေကြောင်း သင် ရုတ်တရက် သဘောပေါက်လိုက်သည်။]
[ရှေးဟောင်း မိစ္ဆာက ကောင်းကင်ဂိုဏ်းလို့ ခေါ်တဲ့ ဂိုဏ်းတစ်ခုကို ဖျက်ဆီးလိုက်ကြောင်း သင် သိလိုက်ရသည့် အချိန်အထိပင်...]
[ဒီဇာတ်ကွက်က ဘာလဲ ဆိုတာ သင် နောက်ဆုံး အတည်ပြုနိုင်လိုက်သည်။]
[သင့်စိတ်ခံစားချက်များ အလွန် ရှုပ်ထွေးနေခဲ့သည်။]
"မိစ္ဆာ-ချိပ်ပိတ် မျှော်စင်..."
"ရှေးဟောင်း မိစ္ဆာ..."
"ကောင်းကင်ဂိုဏ်း..."
တစ်ခုပြီး တစ်ခု ရင်းနှီးသည့် စကားလုံးများက သိပ်မကြာသေးမီက သူမရဲ့ မှတ်ဉာဏ် တစ်ခုကို သတိရစေခဲ့သည်။
ချန်ချန်ရွှယ် ဒီလို ရင်းနှီးတဲ့ အရာမျိုးနဲ့ တကယ် ကြုံတွေ့ရလိမ့်မယ်လို့ မျှော်လင့်မထားခဲ့ပေ။
"ဟူး.."
သူမမျှော်လင့်ချက်မဲ့စွာခေါင်းခါလိုက်၏။ "အဲဒီမင်းဆက်ကမဟာဝေမင်းဆက်နဲ့ဆက်စပ်နေပေမယ့်နန်းတော်ကနေအဲဒီမင်းဆက်ကိုသွားရတဲ့ခရီးကဝေးလွန်းပြီးနှစ်ဝက်လောက်အချိန်မယူဘဲရောက်ဖို့မဖြစ်နိုင်ဘူး.."