အခန်း ၁၂၇ : အခြေတည်အဆင့်(၅)သို့ရောက်ရှိခြင်း၊ ထပ်ဆောင်းဆုလာဘ်- သတ်ဖြတ်ခြင်းစာအုပ်
"အဲဒီအမျိုးသမီးက ငါ့ထက် ပိုကြာကြာ အသက်မရှင်နိုင်လောက်ဘူး မဟုတ်လား.... ဖြစ်နိုင်ချေက နည်းနည်း မြင့်နေတယ်... ဘာပဲဖြစ်ဖြစ် သူမက မဟာဝေ မင်းဆက်ရဲ့ မင်းသမီးပဲ.... သူမကိုလည်း လုပ်ကြံမဲ့သူတွေ အများကြီး ရှိလောက်တယ်"
"ဒါပေမဲ့ သူမဆီမှာ ဧကရာဇ်မင်းမြတ် ဖြစ်တဲ့ အဖေတစ်ယောက် ရှိနေသေးတော့ သူမက အန္တရာယ် အများအပြားကို ဖြေရှင်းနိုင်မှာပဲ"
"ချီး....."
ဒါကိုတွေးမိတော့ စိတ်ညစ်သွားပြီး သူမရဲ့ သိက္ခာအားလုံး ဆုံးရှုံးလိုက်ရပြီလို့ ခံစားလိုက်ရသည်။
ဒါက သူမ အဲ့ဒီအမျိုးသမီးနဲ့ ယှဉ်ပြိုင်ရာ၌ ရှုံးနိမ့်ခဲ့တာ ဒုတိယအကြိမ်ပင်။
'ရှက်စရာပဲ... ရှက်စရာပဲ...'
သူမ မသေမျိုးကျင့်ကြံခြင်း သရုပ်ဖော် စနစ်ထဲမှာ တွေးခဲ့တာက ချန်ချန်ရွှယ်နဲ့ ပူးပေါင်းဆောင်ရွက်ခြင်း မပြုရင်တောင် သူမဟာ ချန်ချန်ရွှယ်ထက် ပိုကြာကြာ အသက်ရှင်နိုင်မည်ဆိုတာပင်။
သို့သော် နောက်ဆုံးတော့ သူမဟာ အချိန်မတိုင်ခင် အရာအားလုံး ဆုံးရှုံးခဲ့ရပြီး ကိုယ့်ပါးကိုယ် ပြန်ရိုက်နေသလိုပင်။
ကံကောင်းစွာနဲ့ ဒီအကြောင်း သူမ ဘယ်သူ့ကိုမှ မပြောခဲ့ချေ..........
...
...
တစ်ချိန်တည်းမှာပင်။
ချင်းဟယ် ခရိုင်။
ချင်းကျောက် ဒီအတိုင်း သေဆုံးသွားတာ မြင်ရတော့ ပိုင်ယီ သိပ်မအံ့သြခဲ့ပေ။
တကယ်တော့ သရုပ်ဖော် စနစ်ထဲမှာ ရွေးချယ်ခံတွေ အချင်းချင်း ကူညီကြတာ မြင်ရတာကို သူ ပိုနှစ်သက်ပေသည်။
အကယ်၍ သူတို့ အခက်အခဲ တစ်စုံတစ်ရာ ကြုံတွေ့ရပါက အတူတကွ ဖြေရှင်းကြပြီး အကျိုးအမြတ် တစ်စုံတစ်ရာ ရှိရင်လည်း သူတို့ အတူတကွ မျှဝေသင့်လေသည်။
ဥပမာအားဖြင့် ချင်းကျောက်မှာ အဘွားအိုရဲ့ ကျောထောက်နောက်ခံ ရှိပြီး သူမဆီမှာ ကြီးမားသော ကြေးဝါရောင် တံခါးကြီးထဲက ဂူသင်္ချိုင်းရှိရာ သူမဟာ ဒီအရာ နှစ်ခုကို ချန်ချန်ရွှယ်နဲ့ လုံးဝ မျှဝေနိုင်ပေသည်။
ချန်ချန်ရွှယ်ရဲ့ စွမ်းရည်နဲ့ ဆိုရင် ကြီးမားသော ကြေးဝါရောင် တံခါးကြီးကို လုယက်ရာမှာ ချင်းကျောက်ကို ကူညီပေးတာက စွမ်းဆောင်ရည်ကို မရေမတွက်နိုင်အောင် သေချာပေါက် တိုးတက်စေမည်ပင်။
ဒါ့အပြင် ချန်ချန်ရွှယ်ရဲ့ အကာအကွယ်နဲ့ ဆိုရင် ချင်းမိသားစု ဘေးကင်းလုံခြုံနေမှာဖြစ်ပြီး မဟာဝေ မင်းဆက်ရဲ့ အချစ်ဆုံး မင်းသမီးက ချင်းမိသားစုကို ကာကွယ်ပေးထားပေမည်။
ထို့ကြောင့် ဘယ်သူက သူတို့ကို ရန်စရဲမည်နည်း။
ပြီးတော့ ချင်းကျောက်ရဲ့ အဲဒီ အဘွားအိုကလည်း အတွေ့အကြုံရှိတဲ့ စီနီယာ တစ်ယောက်ဖြစ်ရာ သူမက ချန်ချန်ရွှယ်ကို လမ်းညွှန်မှုတချို့ ပေးဖို့ လုပ်နိုင်သည်။
အဲဒီ လမ်းညွှန်မှုတွေနဲ့ ချန်ချန်ရွှယ်ဟာ ရုတ်တရက် ကြီးမားတဲ့ ထိုးထွင်းသိမြင်မှု တချို့ ရရှိလာဖို့ ဖြစ်နိုင်လေသည်။ ဘာပဲဖြစ်ဖြစ် အဘွားအို အသက်ရှင်စဉ်တုန်းက မူလဝိညာဉ်အဆင့် ကျင့်ကြံသူဖြစ်၏။
ချန်ချန်ရွှယ် အတွက် ဆိုရင်တော့...
မဟာဝေ မင်းသမီး ဆိုတဲ့ သူမရဲ့ ကိုယ်ပိုင်အမှတ်အသားကနေ တဆင့် ချင်းကျောက်ကို အကူအညီ အများကြီး ပေးနိုင်သည်။
ချန်ချန်ရွှယ်ရဲ့ အကူအညီနဲ့ ဆိုရင် ချင်းမိသားစုက နေမင်း ဂိုဏ်းကိုတောင် ကြောက်နေစရာ မလိုတော့သလို ပုန်းအောင်းနေစရာလည်း မလိုတော့ပေ။
"နှမြောစရာ ကောင်းလိုက်တာ.."
ရွေးချယ်ခံ နှစ်ယောက် အနက် ချန်ချန်ရွှယ်က ပူးပေါင်းဆောင်ရွက်ဖို့ တိုက်တွန်းခဲ့တဲ့ လူဖြစ်ပြီး ချင်းကျောက် ကတော့ သူမရဲ့ စွဲလမ်းမှုကို မစွန့်လွှတ်နိုင်ခဲ့တာ ဒါမှမဟုတ် သူမက ကိုယ့်ကိုယ်ကို အထင်ကြီးလွန်းနေခဲ့တာပင်။
ဒါက ရွေးချယ်ခံ နှစ်ယောက် အချင်းချင်း ပူးပေါင်းဆောင်ရွက်ဖို့ ခက်ခဲစေခဲ့သည်။
အကယ်၍...
အကယ်၍သာ ချန်ချန်ရွှယ်နဲ့ ဖူရွှမ်နီ ဒါမှမဟုတ် ချင်းကျောက်နဲ့ ဖူရွှမ်နီ ဆိုရင် ပူးပေါင်းဆောင်ရွက်မှု တည်ငြိမ်မယ်လို့ ပိုင်ယီ ခန့်မှန်းမိလေသည်။
.
ပြဿနာက သရုပ်ဖော် စနစ်ထဲမှာ ဆုံတွေ့တဲ့ ရွေးချယ်ခံ နှစ်ယောက်က ချန်ချန်ရွှယ်နဲ့ ချင်းကျောက် ဖြစ်နေတာပင်။
ထို့အပြင် သူတို့က ရန်ဘက်တွေဖြစ်နေခဲ့သည်။
[ချင်းကျောက်ဟာ ဤမသေမျိုးကျင့်ကြံခြင်း သရုပ်ဖော် ဘဝတွင် ၃၈ နှစ်၊ ၀၁ လ၊ ၁၂ ရက် နေထိုင်ခဲ့ပါသည်။ သူမသည် တာအိုမိတ်ဆွေဘွဲ့ထူးကို အသက်သွင်းနိုင်ခဲ့ပြီး ထပ်ဆောင်း ဆုလာဘ် တစ်ခု ရရှိခဲ့ပါသည်။ သင်သည် အောက်ပါ ဆုလာဘ်ကို ရရှိပါသည် ]
[ဆုလာဘ် ၁ - အခြေတည်အဆင့် (၅) ၏ ဝိညာဉ်စွမ်းအား အားလုံး (ဖြစ်နိုင်သည်မှာ ၎င်းက သင့်ကို အခြေတည်အဆင့် အဆင့် (၅) သို့ တစ်ရှိန်ထိုးချိုးဖျက်ဝင်ရောက်သွားနိုင်သည်)]
[ဆုလာဘ် ၂ - ပျံသန်းနိုင်သည့် သင်္ဘော တစ်စင်း (ချင်းကျောက် ထွက်ခွာလာစဉ် ချန်ချန်ရွှယ် သူမအား ပေးခဲ့သော ပျံသန်းနိုင်သည့် သင်္ဘော)]
[ဆုလာဘ် ၃ - အဖြူရောင် အမွေး တစ်စည်း (အိမ်မွေးတိရစ္ဆာန် ဝှိုက်တီ၏ ခန္ဓာကိုယ်မှ အမွေးများကို စုတ်တံအဖြစ် ပြုလုပ်နိုင်သည်)]
[ထပ်ဆောင်း ဆုလာဘ် - သတ်ဖြတ်ခြင်း စာအုပ် (ကြီးမားသော ကြေးဝါရောင် တံခါးကြီး အတွင်းမှ ချင်းကျောက် ရရှိခဲ့သော ကျင့်ကြံခြင်း နည်းစနစ်)]
[ကျေးဇူးပြု၍ ရွေးချယ်ပါ]
ချင်းကျောက်၏ ရမှတ် တွက်ချက်ခြင်း ဆုလာဘ်က မကြာမီ ပေါ်လာခဲ့သည်။ ရွေးချယ်ရန် လိုအပ်သည့် ဆုလာဘ် (၃) ခုကို ကြည့်ပြီး ပိုင်ယီ ဆုလာဘ် ၁ ကို ရွေးချယ်လိုက်၏။
ပျံသန်းနိုင်သည့် သင်္ဘောက သူ့အတွက် ကောင်းမွန်သည့် အရာတစ်ခု အဖြစ် သတ်မှတ်နိုင်ပြီး ဘာပဲဖြစ်ဖြစ် မည်သည့် ပျံသန်းနိုင်သည့် လှေမဆို ဝိညာဉ်ပစ္စည်းအဖြစ် သတ်မှတ်နိုင်သည် မဟုတ်ပါလော။
သို့သော် အခြေတည်အဆင့် အဆင့် (၅) ၏ ဝိညာဉ် ချီဆုလာဘ်နှင့် ယှဉ်လိုက်လျှင် ၎င်းက မှေးမှိန်သွားလေသည်။
ထို့ကြောင့် ဤသာမန် ပျံသန်းနိုင်သည့် လှေက မလုံလောက်တော့ပေ။
ဆုလာဘ် ၃ အတွက်မူကား...
သူ ဘာလို့ ဝှိုက်တီရဲ့ အမွေးကို လိုချင်ရမည်နည်း။ သူဟာ စုတ်တံကို မလိုအပ်သလို လက်ရေးလှရေးခြင်း ကိုလည်း စိတ်မဝင်စားပေ။
ထို့အပြင် အဆောင်ရေးဆွဲတာတို့ ဘာတို့ကိုလည်း သိပ်စိတ်မဝင်စားချေ။
ဒါကြောင့် ၎င်းကို လစ်လျူရှုလိုက်သည်။
သူဟာ ဆုလာဘ်ကို ရွေးချယ်ပြီးနောက် သန့်စင်သည့် ဝိညာဉ်စွမ်းအင်များက သူ့ခန္ဓာကိုယ်ထဲသို့ ချက်ချင်း တိုးဝင်လာပြီး တစ်ကိုယ်လုံး တုန်ခါသွားစေခဲ့သည်။
သူ အဆင့်ချိုးဖျက် အောင်မြင်တော့ပေမည်။
ပိုင်ယီဟာ မူလက အခြေတည်အဆင့် အဆင့် (၅) သို့ ရောက်ရှိရန် ခြေတစ်လှမ်းသာ လိုတော့သည် ဖြစ်ရာ ယခုကဲ့သို့ များပြားလှသည့် ဝိညာဉ်စွမ်းအင်များ သူ့ခန္ဓာကိုယ်ထဲ ဝင်ရောက်လာပြီး မွေးရာပါ ဝိညာဉ် ခန္ဓာ၏ အကျိုးသက်ရောက်မှုများနှင့် ပေါင်းစပ်လိုက်သောအခါ ၎င်းက သူ့ကို တိုက်ရိုက် အဆင့်ချိုးဖျက်သွားနိုင်လေသည်။
၎င်းက လုံးဝ မခက်ခဲခဲ့ပေ။
ဒီတစ်ခါ ပိုင်ယီ၏ အဆင့်ချိုးဖျက်မှုကလည်း မသေးငယ်ပေ။ သို့သော် ခြံဝင်းထဲရှိ အရာအားလုံးကို သူဟာ အထူး အားဖြည့်ထားခဲ့သည်။
အဆင့်ချိုးဖျက်စဉ် အတွင်း ကြီးမားသည့်လှုပ်ရှားမှုများကို ဖုံးကွယ်ရန် သူဟာ ခြံဝင်းထဲတွင် ဤအစီအရင်ကိုပင် တည်ဆောက်ထားခဲ့သည်။
ဤအရာက ဆူညံမှု အများအပြား မဖြစ်စေဘဲ အခြေတည်အဆင့် အဆင့် (၅) သို့ အဆင့်ချိုးဖျက်ခွင့် ပေးခဲ့သည်။
မဟုတ်ရင်...
ရက်အနည်းငယ် အတွင်း လူတစ်ယောက်က အကြိမ်များစွာ အဆင့်ချိုးဖျက်နိုင်တာကို တခြားသူတွေ သိသွားရင် ကျင့်ကြံခြင်း ကမ္ဘာ တစ်ခုလုံးကို သတိပေးလိုက်သလို ဖြစ်သွားပေမည်။
ဘာပဲဖြစ်ဖြစ် ၎င်းက မယုံနိုင်စရာ ကောင်းလွန်းနေပေသည်။
"ဒါက သတ်ဖြတ်ခြင်း စာအုပ်လား"
ပိုင်ယီ သူ့လက်ထဲက အပို ကျမ်းစာအုပ်ကို ကြည့်ပြီး မရေရွတ်ဘဲ မနေနိုင်တော့ပေ။ "ချင်းကျောက် ရခဲ့တဲ့ သတ်ဖြတ်ခြင်း စာအုပ်က ပျက်စီးနေပြီး မပြည့်စုံတဲ့ မူကွဲတစ်ခု ဆိုတာ မှတ်မိပါတယ်... ပြီးတော့ ခုငါရတဲ့ ပထမဆုံး သတ်ဖြတ်ခြင်း စာအုပ်က ပြည့်စုံတဲ့ မူကွဲဖြစ်ပုံရတယ်"
"ဘုရားရေ... ဒီမသေမျိုးကျင့်ကြံခြင်း သရုပ်ဖော် စနစ်က ငါ့အတွက် မပြည့်စုံတဲ့ ကျင့်ကြံခြင်း နည်းစနစ် တစ်ခုကို ဖြည့်စွက်ပေးလိုက်တာလား"
ပိုင်ယီ ကျမ်းစာအုပ်ကို ဖွင့်လိုက်၏။
တစ်ခဏချင်း။
အဖြူရောင် အလင်းတန်း တစ်ခုဟာ သူ့ဦးနှောက်ထဲသို့ ပေါင်းစပ်သွားပြီး အတွင်းထဲက အကြောင်းအရာ အားလုံးကို ချက်ချင်း မှတ်မိသွားစေခဲ့သည်။
ပိုင်ယီ မျက်လုံးများ မှိတ်လိုက်ပြီး ခဏတာမျှ ချေဖျက်လိုက်သည်။
ထို့နောက် သူ မျက်လုံးများ ဖွင့်လိုက်သည်။
သူဟာ စိတ်လှုပ်ရှားစွာဖြင့် သက်ပြင်းချလိုက်ပြီး ကိုယ့်ကိုယ်ကိုယ် ပြောလိုက်သည်။ "သတ္တဝါပေါင်း ထောင်သောင်းချီ သတ်ဖြတ်ပြီး ကိုယ့်ကိုယ်ကိုယ် မကောင်းဆိုးဝါးဆန်တဲ့ သတ်ဖြတ်လိုစိတ်နဲ့ အာဟာရဖြည့်တင်းတာပဲ... ဒါကအစွန်းရောက်တဲ့ ကျင့်ကြံခြင်း နည်းစနစ် တစ်ခုပဲ... တကယ်လို့ မသေမျိုးကျင့်ကြံခြင်း ကမ္ဘာထဲ ထားလိုက်ရင် ဒီလို ကျင့်ကြံခြင်း နည်းစနစ်မျိုးက သေချာပေါက် မိစ္ဆာ နည်းစနစ် စာရင်းထဲ အသွင်းခံရမှာ"
"ဒါ့အပြင် ဒီကျင့်ကြံခြင်း နည်းစနစ်ကို ဖန်တီးခဲ့တဲ့ လူက တကယ်တော့ ရှေးခေတ်ကာလက ဝိညာဉ်ဖွဲ့စည်းခြင်း အဆင့်မိစ္ဆာတစ်ကောင် ဖြစ်နေတာပဲ... ဒါက မိစ္ဆာက သူ့ကိုယ်သူ အတွက် ဖန်တီးခဲ့တဲ့ မိစ္ဆာ နည်းစနစ် တစ်ခုပဲ"