အခန်း ၁၂၅ : ယှဥ်ပြိုင်ဖို့ ဇွဲမလျော့သေးသည့် ချင်းကျောက်၊ နေမင်းဂိုဏ်း
[သူမ၏ ရိုးသားမှုကို ပြသရန်အတွက် ချန်ချန်ရွှယ်ဟာ မဟာဝေ ဧကရာဇ်မင်းမြတ် သူမအား ပေးသနားထားသည့် ရွှေအမြုတေ အဆင့်ရုပ်သေးကို သင့်အား ပေးအပ်ခဲ့သည်။]
[ဘာတွေ ဖြစ်ပျက်နေလဲ ဆိုတာ သင် နောက်ဆုံး သဘောပေါက်သွားတဲ့ အချိန်မှာတော့ သင်ဟာ သူမရဲ့ ထောင်ချောက်ထဲ ကျရောက်နေပြီ ဖြစ်သည်။]
[အသက် ၂၃ နှစ် - သင် နေပြည်တော်တွင် နေထိုင်ခဲ့သည်မှာ တစ်နှစ် ရှိခဲ့ပေပြီ။ ချန်ချန်ရွှယ်နှင့် သင့်ဆက်ဆံရေးမှတဆင့် သင်ဟာ အကျိုးအမြတ် အများအပြား ရရှိခဲ့သည်။ နန်းတော်ထဲမှ ကြီးမားသည့် ကျင့်ကြံခြင်း အရင်းအမြစ်များကို ခံစားရန် သင် အရည်အချင်း ပြည့်မီခဲ့ပေပြီ။]
[သင့်ကျင့်ကြံမှု အခြေခံ အဆင့်ချိုးဖျက် အောင်မြင်သွားခဲ့သည်။]
[သင့်နှလုံးနှင့် သွေးများ ဆူပွက်နေခဲ့သည်။ မသေမျိုးကျင့်ကြံခြင်း သရုပ်ဖော် စနစ်ထဲတွင် လက်စားချေခြင်းက မဆိုးဘူးဟု သင် ခံစားရသဖြင့် သင်ဟာ ချန်ချန်ရွှယ်ကို တိုက်ခိုက်ရန် ဆုံးဖြတ်လိုက်သည်။ နောက်ဆုံးတွင် မမျှော်လင့်ထားသည့် အရာတစ်ခု ရုတ်တရက် ဖြစ်ပျက်လာပြီး သင့်အတွေးများကို အနှောင့်အယှက် ဖြစ်စေခဲ့သည်။]
ဤနေ့တွင်။
မဟာဝေ မင်းဆက်၏ နန်းတော်အတွင်းရှိ လေထု အခြေအနေသည် အတော်လေး တင်းမာနေခဲ့သည်။ မည်သူမျှ စကားတစ်ခွန်း မပြောရဲကြပေ။ အဘယ်ကြောင့်ဆိုသော် နန်းတော်ထဲရှိ လူများအတွက် ဖြစ်ပျက်ခဲ့သည့် အရာက အလွန် ကြီးမားလွန်းသောကြောင့် ဖြစ်၏။
ချင်းကျောက်ဟာလည်း ချန်ချန်ရွှယ်ထံမှ တဆင့် ဘာဖြစ်ပျက်ခဲ့လဲ ဆိုတာ သိရှိလိုက်ရသည်။
"ဘာ..."
ချင်းကျောက် ကြောင်အသွားပြီး ယုံကြည်ရန် ခက်ခဲနေခဲ့သည်။ "ပဉ္စမ မင်းသား ရေနစ်သေဆုံးသွားတယ် ဟုတ်လား"
သူမ အံ့သြသွားခဲ့သည်။
...
ချင်းကျောက် နန်းတော်ထဲတွင် ရှိနေစဉ် အချိန်အတွင်း သူမဟာ ဟိုဟိုဒီဒီ လျှောက်သွားခြင်း မပြုလုပ်ခဲ့ပေ။ သူမ အရာအချို့ကိုလည်း လေးလေးနက်နက် လေ့လာသင်ယူခဲ့သည်။
နန်းတော်ထဲရှိ မင်းသားများနှင့် မင်းသမီးများ အနက် အားနည်းသူ အလွန် နည်းပါးကြောင်း သူမ သိထားခဲ့သည်။
ပါရမီအဆိုးရွားဆုံး မင်းသားတွင်ပင် ချီစုစည်းမှု အဆင့် (၅) ကျင့်ကြံမှု အခြေခံ ရှိပေသည်။
ထို့ကြောင့် အအားနည်းဆုံး မင်းသား ဖြစ်ရင်တောင် ရေနစ်သေဆုံးမှာ မဟုတ်ချေ။
ချင်းကျောက်၏ မျက်နှာက လေးနက်လာခဲ့သည်။ ထိုလူများ လှုပ်ရှားလိုက်ကြပြီ ဖြစ်ကြောင်း သူမ သိလိုက်၏။
ဒီတစ်ခါ... အနာဂတ် ပြောင်းလဲမှုများကို ဖြစ်စေသည့် အကြောင်းရင်းက ဘယ်သူလဲ ဆိုတာ သူမ မသိပေ။
ပထမဆုံး သေဆုံးသူမှာ ချန်ချန်ရွှယ် မဟုတ်ပဲ ၎င်းက ပဉ္စမ မင်းသား ဖြစ်နေခဲ့သည်။
"ရှင် အရင်ဆုံး သေဆုံးလိမ့်မယ်လို့ ကျွန်မ ထင်ထားတာ" ချင်းကျောက် ဘယ်သူ့ကိုမှ စော်ကားမိမှာ မကြောက်ဘဲ ပြောလိုက်၏။ သူမရှေ့က ချန်ချန်ရွှယ်ကို ကြည့်လိုက်သည်။ "နောက်ဆုံးတော့ ကံဆိုးတဲ့ ကောင်လေး တစ်ယောက် အရင် ထွက်ခွာသွားလိမ့်မယ်လို့ ကျွန်မ မျှော်လင့်မထားခဲ့ဘူး... ပြီးတော့ ဒီလောက် အချိန်အကြာကြီး ရှိနေပြီကို နောက်ကွယ်က ကြိုးကိုင်သူက ဘယ်သူလဲ ဆိုတာ ရှင် ရှာမတွေ့သေးတာ တကယ် မကောင်းဘူး"
ချန်ချန်ရွှယ် စိတ်လှုပ်ရှားခြင်း မရှိပေ။ တစ်နှစ် ကြာပြီးနောက် ချင်းကျောက် ဘာလို့ သူမအပေါ် ဒီလောက် ရန်လိုနေရတာလဲ ဆိုတာ သူမ နောက်ဆုံးတော့ နားလည်သွားပေပြီ။
ထိုအချိန်တုန်းက သူမ သဘောပေါက်သွားတဲ့ အခါ အသံထွက်ပြီး ရယ်မောလုနီးပါး ဖြစ်သွားခဲ့ရသည်။
ချင်းကျောက်က မသေမျိုးကျင့်ကြံခြင်း သရုပ်ဖော်မှုကို အကြိမ်အနည်းငယ် လုပ်ဆောင်ဖူးတဲ့ လူတစ်ယောက်ပင်။ ဒါပေမဲ့ ဒီလောက် သေးငယ်ပြီး အသေးအဖွဲ ကိစ္စလေးကို သူမ ဘယ်လိုလုပ် စွဲလမ်းနေနိုင်ရသည်နည်း။
၎င်းကိစ္စအား သူမဟာ ဒီလောက် အချိန်အကြာကြီး တွက်ကပ်နေခဲ့လေသည်။
ချန်ချန်ရွှယ် တည်ငြိမ်စွာ ပြန်ဖြေလိုက်၏။"အဲဒီကောင်တွေ မကြာခင် ပေါ်လာကြမှာပါ... ပြီးတော့ ဒီတစ်ခါ ခမည်းတော် ဒီကိစ္စကြောင့် ထပ်ပြီး ရူးသွပ်သွားမှာ မဟုတ်ဘူး"
ချင်းကျောက် မျက်မှောင်ကြုတ်ပြီး မေးလိုက်သည်။ "ရှင့်ရဲ့ မျက်နှာဖုံးက ဒီလိုအရာမျိုး လုပ်နိုင်တယ် ဆိုတာ ရှင် ဒီလောက် သေချာနေလား"
ချန်ချန်ရွှယ် ပြုံးပြီး ပြောလိုက်သည်။"ငါ ကောင်းကင်အကျဉ်းထောင်ကို သွားတော့မယ်...မင်း လိုက်ချင်လား"
"ကောင်းကင်အကျဉ်းထောင်....." ချင်းကျောက် မျက်မှောင်ကြုတ်လိုက်သည်။
သူတို့ နှစ်ယောက် စလုံး သတင်းအချက်အလက် အများအပြား ဖလှယ်ပြီးကြပေပြီ။
မဟာဝေ ဧကရာဇ်မင်းမြတ် ဘယ်လို သေဆုံးခဲ့လဲ ဆိုတာ ချင်းကျောက်ဆီကနေ ချန်ချန်ရွှယ် သိလိုက်ရသည်။
ထို့အပြင် ချန်ချန်ရွှယ်ဆီမှာ ထူးဆန်းတဲ့ မျက်နှာဖုံး တစ်ခု ရှိနေမှန်း ချင်းကျောက် သိပေသည်။
မျက်နှာဖုံး ပေါ်လာတဲ့ အခါ အဘွားအို ချင်းတောင် တုန်လှုပ်သွားခဲ့ရသည်။
ဒါပေမဲ့ အဘွားအိုချင်းက မျက်နှာဖုံးရဲ့ မူလဇစ်မြစ်ကို မသိချေ။ ဒီမျက်နှာဖုံးက သူမကို ကြီးမားတဲ့ ကြောက်ရွံ့မှုတစ်ခု ခံစားရစေတယ် ဆိုတာပဲ သူမ သိပြီး ၎င်းက တွင်းနက်ကြီး တစ်ခုကို ရင်ဆိုင်နေရသလိုပင်။
[မဟာဝေ မင်းဆက်၏ ပဉ္စမ မင်းသား သေဆုံးမှုက မဟာဝေ ဧကရာဇ်မင်းမြတ် ချန်ဖုန်းယင်ကို ဒေါသထွက်စေခဲ့သည်။ ဘယ်သူ့ လက်ချက်လဲ ဆိုတာ စုံစမ်းစစ်ဆေးဖို့ လူအများအပြား စေလွှတ်လိုက်သော်လည်း နောက်ကွယ်က လူက အလွန် ကောင်းမွန်စွာ ပုန်းအောင်းနေခဲ့သည်။ သူတို့ တစ်နှစ်ပတ်လုံး ရှာဖွေသော်လည်း သဲလွန်စ တစ်ခုမျှ မရရှိခဲ့ပေ။]
[အသက် ၂၄ နှစ် - ချင်းကျောက်ဟာ ပင်လယ်ရပ်ခြား ကျွန်းသို့ ပြန်သွားရန် ဆုံးဖြတ်လိုက်သည်။ ချန်ချန်ရွှယ်၏ လျှို့ဝှက်ဆန်းကြယ်သည့် မျက်နှာဖုံးကြောင့် မဟာဝေ ဧကရာဇ်မင်းမြတ် ရူးသွပ်သွားရန် မဖြစ်နိုင်တော့ပေ။ အဘယ်ကြောင့်ဆိုသော် မျက်နှာဖုံးက စိတ်နှလုံးမိစ္ဆာ များကို အမှန်တကယ် ဝါးမျိုးနိုင်သောကြောင့် ဖြစ်သည်။]
[ချင်းကျောက်ဟာ ကြီးမားသည့် ကြေးဝါရောင် တံခါးကြီးကို ဆက်လက် လုယက်လိုနေဆဲ ဖြစ်သည်။]
[ချင်းကျောက် ပြန်သွားချင်နေကြောင်း သိလိုက်ရသဖြင့် ချန်ချန်ရွှယ်က သူမကို မတားဆီးခဲ့ပေ။ ချန်ချန်ရွှယ်ဟာ ချင်းကျောက်ကို ပျံသန်းနိုင်သည့် သင်္ဘောတစ်စင်း ပေးလိုက်သည်။]
[ပျံသန်းနိုင်သည့် သင်္ဘော၏ အမြန်နှုန်းက ရယ်စရာကောင်းလောက်အောင် မြန်ဆန်နေပြီး ချင်းကျောက်ဟာ ချင်းမိသားစု အခြေစိုက်စခန်းသို့ ပြန်ရောက်ရန် အချိန်ကြာကြာ မယူလိုက်ရပေ။]
[အသက် ၂၆ နှစ် - ချင်းကျောက်ဟာ ကြီးမားသော ကြေးဝါရောင် တံခါးကြီးကို လုယက်နေခဲ့သည်။]
[အသက် ၂၈ နှစ် - ချန်ချန်ရွှယ်နှင့် တိုတောင်းသော ပူးပေါင်းဆောင်ရွက်မှုက တကယ် အလုပ်ဖြစ်ပုံ ရလေသည်။ မဟာဝေ မင်းဆက်၏ ဧကရာဇ်မင်းမြတ် အသက်ရှင်လျက်ဖြစ်ကြောင်း ချင်းကျောက် တွေ့ရှိလိုက်ရသည်။]
[အသက် ၃၁ နှစ် - ဤမသေမျိုးကျင့်ကြံခြင်း သရုပ်ဖော် ဘဝတွင် ချင်းမိသားစု ဘေးကင်းလုံခြုံနေခဲ့သည်။ ချင်းကျောက် ပြီးခဲ့သည့် မသေမျိုးကျင့်ကြံခြင်း သရုပ်ဖော် ဘဝက အသက်ရှင်သန်ခဲ့သည့် စံချိန်ကို ချိုးဖျက်နိုင်ခဲ့ပေပြီ။]
[သူမ၏ ခံစားချက်များ ရောထွေးနေခဲ့သည်။]
[...]
ချန်ချန်ရွှယ်နှင့် သတင်းအချက်အလက် ဖလှယ်လိုက်ရုံဖြင့် လုံလောက်ခဲ့လေသည်။
၎င်းက မဟာဝေ ဧကရာဇ်မင်းမြတ် စိတ်မဖောက်ပြန်အောင် ထိန်းသိမ်းထားဖို့ လုံလောက်ခဲ့ပြီး ချင်းမိသားစု အနှောင့်အယှက် မဖြစ်အောင် ထိန်းသိမ်းထားဖို့လည်း လုံလောက်ခဲ့သည်။
ပြီးခဲ့တဲ့ သရုပ်ဖော် ဘဝထက် တစ်နှစ် ပိုကြာကြာ အသက်ရှင်ဖို့လည်း လုံလောက်ခဲ့ပေသည်။
ချင်းကျောက် နက်ရှိုင်းစွာ စဉ်းစားခန်း ဝင်သွားခဲ့သည်...
'ဖြစ်နိုင်တာက...'
'မသေမျိုးကျင့်ကြံခြင်း သရုပ်ဖော် စနစ်ထဲမှာ တစ်ကိုယ်တည်း တိုက်ခိုက်ဖို့ တကယ် မဖြစ်နိုင်ဘူးလား...'
'သူတို့ ပေါင်းစည်း ရမှာလား...'
ဒါပေမဲ့ အကယ်၍ သူမသာ ချန်ချန်ရွှယ်နဲ့ ပေါင်းစည်းလိုက်ရင် စိတ်မသက်မသာ ဖြစ်နေဦးမယ်လို့ ခံစားရတာကြောင့် သူမဟာ နေပြည်တော်ကနေ ဒီလောက် စောစော ထွက်ခွာလာခဲ့ခြင်းပင်။
"တောက်..." ချင်းကျောက် မပျော်မရွှင် ညည်းတွားလိုက်၏။"ငါ တစ်ယောက်တည်း တကယ် မလုပ်နိုင်တာလည်း မဟုတ်ပါဘူး... ဒီတစ်ခါ ငါ ချန်ချန်ရွှယ်ကို ရှောင်ရှားလိုက်မယ်... သူမ မရှိဘဲ ငါ အသက်မရှင်နိုင်ဘူးလို့ မယုံပါဘူး"
"ပြီးတော့ ဒီတစ်ခါ ငါ သူမထက် ပိုကြာကြာ အသက်ရှင်ပြမယ်..."
တကယ်တော့ သူမဆီမှာ ပြိုင်ဆိုင်လိုစိတ် ရှိနေခဲ့ပြီး ဘယ်သူ ပိုကြာကြာ အသက်ရှင်နိုင်မလဲ ဆိုတဲ့ အပိုင်းမှာ ချန်ချန်ရွှယ်နဲ့ ယှဉ်ပြိုင်နိုင်မယ်လို့ သူမ ခံစားရလေသည်။
အကယ်၍ သူမဟာ ချန်ချန်ရွှယ်ထက် ပိုကြာကြာ အသက်ရှင်နိုင်ခဲ့ရင် လက်တွေ့ဘဝမှာ ချန်ချန်ရွှယ်ကို သူမ လိုချင်သလောက် လှောင်ပြောင် နိုင်မည်ပင်။
ထို့ကြောင့် ချင်းကျောက် ပျော်ရွှင်သွားခဲ့သည်။
...
အခြားတစ်ဖက်တွင်။
ချန်ချန်ရွှယ် သတင်းတစ်ခု ရရှိလိုက်သဖြင့် မျက်မှောင်ကြုတ်သွားခဲ့သည်။ သူမ အဘွားအိုကို မေးလိုက်၏။"နေမင်းဂိုဏ်းက သစ္စာဖောက်ပြီး မိစ္ဆာဂိုဏ်း နဲ့ ပူးပေါင်းသွားတာလား.... သူတို့ကို ဖြောင့်မတ်လမ်းစဥ်ကျင့်ကြံခြင်း ဂိုဏ်းတွေက သတ်လိုက်ကြတာလား...ဒါက နာမည်ကြီး ကျင့်ကြံခြင်း ဂိုဏ်းတစ်ခု ဆိုတာ ကျွန်မ မှတ်မိပါတယ်"
အဘွားအို ပြန်ဖြေလိုက်သည်။ "မင်းသမီး... နေမင်း ဂိုဏ်းရဲ့ အကြီးအကဲချုပ်တစ်ယောက်က မူလဝိညာဉ်အဆင့် ကျင့်ကြံသူ တစ်ယောက်ပါ... ဟိုတုန်းက သူက တော်တော်လေး နာမည်ကြီးခဲ့ပါတယ်"
"ဒါ့အပြင် နေမင်း ဂိုဏ်းရဲ့ ဂိုဏ်းချုပ်ကလည်း မူလဝိညာဉ် အဆင့် ကျင့်ကြံသူပါပဲ... ဂိုဏ်းတစ်ခုတည်းမှာ မူလဝိညာဉ် အဆင့် ကျင့်ကြံသူ (၂) ယောက် ရှိတာ တွေ့ရခဲပါတယ်"
အဘွားအို စိတ်လှုပ်ရှားစွာ သက်ပြင်းချလိုက်၏။ "နေမင်း ဂိုဏ်းရဲ့ ဂိုဏ်းချုပ်က ကောက်ကျစ်စဉ်းလဲတယ်... သူက မိစ္ဆာလမ်းစဉ်ဘက် မကူးပြောင်းခင် သူက ဂိုဏ်းရဲ့ အင်အားကို ဖြန့်ကျက်ထားခဲ့တယ်.... ရလဒ်အနေနဲ့ ဟို ဖြောင့်မတ်လမ်းစဥ် ကျင့်ကြံခြင်း ဂိုဏ်းတွေ အားလုံး ကျရှုံးခဲ့ရတယ်"
ချန်ချန်ရွှယ် နက်ရှိုင်းစွာ စဉ်းစားခန်း ဝင်သွားခဲ့သည်။
[အသက် ၃၄ နှစ် - ချန်ချန်ရွှယ် နောက်ထပ် သတင်းတစ်ခု ရရှိလိုက်သည်။ ဖြောင့်မတ်လမ်းစဉ်ကို သစ္စာဖောက်ပြီး မိစ္ဆာလမ်းစဉ်နှင့် ပူးပေါင်းသွားသည့် နေမင်း ဂိုဏ်းမှ တပည့်များဟာ မဟာဝေ နိုင်ငံ၏ ကမ်းရိုးတန်း ဒေသများ တစ်လျှောက် လှည့်လည်သွားလာနေခဲ့ကြသည်။]
[နန်းတော်က သူတို့ကို ဝိုင်းရံပြီး ချေမှုန်းရန် ကျင့်ကြံသူများ စေလွှတ်ခဲ့သော်လည်း သူတို့က အရေးမပါတဲ့ ကောင်လေးအနည်းငယ်ကိုသာ သတ်နိုင်ခဲ့ကြသည်။ ထိုအစား သူတို့ဟာ ရန်သူကို သတိပေးလိုက်သလို ဖြစ်သွားခဲ့သည်။]
[အသက် ၃၅ နှစ် - နေမင်း ဂိုဏ်းမှ မိစ္ဆာတစ်ကောင်ကို မဟာဝေ မင်းဆက်၏ ကောင်းကင်အကျဉ်းထောင်ထဲသို့ ခေါ်ဆောင်လာခဲ့သည်။ ဤသူက နေမင်း ဂိုဏ်း၏ အကြီးအကဲချုပ် မူလဝိညာဉ် အဆင့် (၂) ကျင့်ကြံသူ ဖြစ်ကြောင်း ပြောဆိုကြသည်။]
[သူ့ကို ကောင်းကင်အကျဉ်းထောင်ထဲသို့ ခေါ်ဆောင်လာခဲ့သည့်အချိန်၌ တိုက်တိုက်ဆိုင်ဆိုင် ချန်ချန်ရွှယ်ဟာလည်း ကောင်းကင်အကျဉ်းထောင်ထဲတွင် ရှိနေခဲ့သည်။]
[မသိရသော အကြောင်းရင်း တစ်စုံတစ်ရာကြောင့် နေမင်း ဂိုဏ်းမှ မိစ္ဆာဟာ ချိပ်ပိတ်မှုမှ လွတ်မြောက်အောင် ပြုလုပ်နိုင်ခဲ့သည်။ ချန်ချန်ရွှယ်ကို ကာကွယ်ပေးနေသည့် ရွှေအမြုတေ အဆင့် ကျင့်ကြံသူ အနည်းငယ်ဟာ အတူတကွ လှုပ်ရှားပြီး ချန်ချန်ရွှယ်၏ အသက်ကို ကယ်တင်ခဲ့သည်။ သို့သော် သူတို့ အားလုံး တိုက်ပွဲတွင် သေဆုံးသွားခဲ့ကြသည်။]
[နေမင်းဂိုဏ်းမှ မိစ္ဆာဟာ ကောင်းကင်အကျဉ်းထောင်ထဲမှ မိစ္ဆာ အမြောက်အမြားကို လွှတ်ပေးလိုက်ပြီး သူတစ်ဦးတည်း နေပြည်တော်မှ ထွက်ပြေး လွတ်မြောက်သွားခဲ့သည်။ တစ်ဖက်လူဟာ ရည်ရွယ်ချက်ရှိရှိ အဖမ်းခံခဲ့ပုံ ရလေသည်]
[ထို့ကြောင့် မဟာဝေ ဧကရာဇ်မင်းမြတ်ဟာ ဒေါသထွက်နေခဲ့သည်။]
[...]