ကျင့်ကြံခြင်း သရုပ်ဖော်စနစ် – Chapter 124: အခန်း ၁၂၄ : ရွေးချယ်ခံနှစ်ယောက်၏ ပထမဆုံး ပူးပေါင်းဆောင်ရွက်မှု | Lazy Nerds

အခန်း ၁၂၄ : ရွေးချယ်ခံနှစ်ယောက်၏ ပထမဆုံး ပူးပေါင်းဆောင်ရွက်မှု

ချင်းကျောက်၏ မျက်နှာက ရုတ်တရက် တောင့်တင်းသွားခဲ့သည်။ အဘယ်ကြောင့်ဆိုသော် ချန်ချန်ရွှယ် ပြောလိုက်သည့် စကားက သူမ၏ ကိုယ်ပိုင်အမှတ်အသားကို ဝန်ခံလိုက်ခြင်း ဖြစ်နေသောကြောင့် ဖြစ်၏။

မသေမျိုးကျင့်ကြံခြင်း သရုပ်ဖော် စနစ်ထဲသို့ ဖိတ်ခေါ်ခံရသူမှာ သူမ တစ်ဦးတည်း မဟုတ်ကြောင်း ချင်းကျောက် နောက်ဆုံးတွင် သဘောပေါက်သွားလေသည်။

အမှန်တရားကို သိရှိလိုက်ရပြီးနောက် သူမ လက်ခံရန် ခက်ခဲနေကြောင်း တွေ့ရှိလိုက်ရသည်။

ဤအရာ မတိုင်မီက ချင်းကျောက်ဟာ သူမကိုယ်သူမ အထူးခြားဆုံး လူသားဟု ထင်မှတ်နေခဲ့သည်။

ထို့အပြင်... မသေမျိုးကျင့်ကြံခြင်း သရုပ်ဖော် စနစ်မှတဆင့် လျင်မြန်သည့် အရှိန်အဟုန်ဖြင့် ပိုမို သန်မာလာနိုင်မည်ဟု သူမ တွေးထင်ထားခဲ့ပေသည်။

ထိုအခါ သူမဟာ လက်တွေ့ကမ္ဘာ၌ ချန်ချန်ရွှယ်ကို အနိုင်ယူနိုင်ပေလိမ့်မည်။

သူမ၏ အတိတ်က အရှက်ရမှုတို့အတွက် လက်စားချေနိုင်ပေလိမ့်မည်။

သို့သော်... သူမရှေ့မှောက်တွင် ရှိနေသည့် အမှန်တရားမှာ သူမသာ အထူးခြားဆုံး လူသား မဟုတ်ကြောင်းပင်။

တကယ်တော့ ချင်းကျောက်ဟာ အံကြိတ်ပြီး ဤအမှန်တရားကို လက်ခံနိုင်သော်လည်း သူမ လက်မခံနိုင်သည့် အရာမှာ မသေမျိုးကျင့်ကြံခြင်း သရုပ်ဖော် စနစ်က ဖိတ်ခေါ်လိုက်သော အခြားလူတစ်ဦးမှာ ချန်ချန်ရွှယ် ဖြစ်နေခြင်းပင်။ 'ဘာလို့ သူမ ဖြစ်နေရတာလဲ...'

ထို့အပြင် လွန်ခဲ့သည့် ရက်အနည်းငယ်က ဤအမျိုးသမီး၏ အရူးလုပ်ခြင်းကို သူမ အမှန်တကယ် ခံလိုက်ရသည် မဟုတ်ပါလော။

...

ဒါကို တွေးမိတော့ ချင်းကျောက် ချက်ချင်း အံကြိတ်လိုက်မိပြီး ပုန်းစရာ တွင်းတစ်တွင်း ရှာတွေ့ချင်စိတ် ပေါက်သွားခဲ့သည်။

'ရှက်စရာ ကောင်းလွန်းတယ်..'

"ရှင်က အရာအားလုံးကို တစ်ဦးတည်း ပိုင်ဆိုင်နိုင်မယ်လို့ ထင်နေတာလား"

ချင်းကျောက် သူမ၏ ဒေါသကို ဖုံးကွယ်မထားဘဲ ဒေါသတကြီး ဝင်ထိုင်လိုက်သည်။ သူမဟာ ယုတ်မာသည်ဟု ထင်ရသောအကြည့်ဖြင့် ချန်ချန်ရွှယ်ကို ကြည့်လိုက်သည်။ "နန်းတော်ထဲမှာ ဆိုရင် ငါက တကယ်ပဲ ရှင့်ပြိုင်ဘက် မဟုတ်ပါဘူး ဒါပေမဲ့ ငါ့ပိုင်နက်ထဲမှာ ဆိုရင် ငါ့ကို လိုက်ဖမ်းပြီး သတ်နိုင်တဲ့ စွမ်းရည် ရှင့်မှာ ရှိလို့လား"

ချန်ချန်ရွှယ် သူမ၏ လက်ဖက်ရည်ခွက်ကို ချလိုက်ပြီး ပြုံး၍ မေးလိုက်၏။ "ငါတို့ နှစ်ယောက်စလုံး တစ်ယောက်ကို တစ်ယောက် ဘာမှ လုပ်လို့ မရမှတော့ ဘာလို့ ထိုင်ပြီး စကားမပြောကြတာလဲ"

ချင်းကျောက် မျက်မှောင်ကြုတ်လိုက်သည်။ "ဘာအကြောင်း ပြောမှာလဲ"

လက်တွေ့ကမ္ဘာတွင် ချန်ချန်ရွှယ် သူမအပေါ် လုပ်ခဲ့သည့် ကိစ္စရပ်များကို ပြန်ကြည့်လျှင် ချင်းကျောက် ဤကိစ္စကို လွှတ်ချ၍ မရနိုင်ပေ။

သူမအပေါ် ကောင်းမွန်သော အမြင်လည်း မရှိနိုင်ပေ။

သူမ၏ စွမ်းရည်များက ချန်ချန်ရွှယ်အောက် နိမ့်ကျနေသောကြောင့် ဖြစ်သော်လည်း တကယ်ကို ရှက်စရာ ကောင်းလွန်းလှသည်။

ချန်ချန်ရွှယ် ပြောလိုက်သည်။ "မကြာခင် မဟာဝေ မင်းဆက်မှာ တစ်ခါမှ မကြုံဖူးလောက်အောင် ကြီးမားတဲ့ ပုန်ကန်ထကြွမှု ဖြစ်ပေါ်လာတော့မယ်... ပြီးတော့ ဒီပုန်ကန်ထကြွမှုက နန်းတော်ထဲက အရာတစ်ခုခုကြောင့် ဖြစ်ပေါ်လာတာလေ..... ဒီဖြစ်ရပ်ကြောင့် ဖြစ်ပေါ်လာမယ့် ပုန်ကန်ထကြွမှုက မဟာဝေ မင်းဆက် တစ်ခုလုံးကို ထိခိုက်စေလိမ့်မယ်"

"မင်းမှာတောင် ထွက်ပြေးဖို့ နည်းလမ်း မရှိဘူး... ဒါမှမဟုတ် မင်း မဟာဝေ မင်းဆက်ကနေ ထွက်ခွာလို့ မရနိုင်တဲ့ အကြောင်းရင်း တစ်ခု ရှိနေလို့ မင်းပါ ထိခိုက်မှု ရှိလာနိုင်တာလေ.... ဒီပုန်ကန်ထကြွမှုရဲ့ ထိခိုက်မှုကို ရှောင်ရှားဖို့ အတွက် မင်း ကြိုတင်စီစဉ်ဖို့ နည်းလမ်း ရှာတွေ့ခဲ့တာပဲ"

"ငါပြောတာ မှန်လား"

ချင်းကျောက် မလိုလားသည့် အသံဖြင့် နှာခေါင်းရှုံ့လိုက်သော်လည်း ပြန်လည် ငြင်းဆန်ခြင်း မပြုခဲ့ပေ။

ဒီအမျိုးသမီးက သဲလွန်စတွေကိုတောင် ခန့်မှန်းနိုင်လောက်အောင် ဘယ်လောက် ကြောက်စရာကောင်းလဲ ဆိုတာ တွေးမိပြီး သူမ တိတ်တဆိတ် တုန်လှုပ်သွားခဲ့သည်။

'သူမက သိပ်အကြံအစည်ကြီးလွန်းတယ်..'

"ဒါဆို ဘာဖြစ်လဲ"

ချင်းကျောက် သူမဘေးနားရှိ အဘွားအို၏ စူးရှသည့် မျက်လုံးများကို လစ်လျူရှုလိုက်၏။ ထို့နောက် သူမဟာ လက်ဖက်ရည်အိုးကို ဆွဲယူပြီး အလွတ်ဖြစ်နေသော လက်ဖက်ရည်ခွက်ထဲသို့ ဝိညာဉ် လက်ဖက်ရည်ကို ကိုယ်တိုင် ငှဲ့ကာ၊ တစ်ကျိုက်တည်း မော့သောက်လိုက်သည်။

သူမ ချန်ချန်ရွှယ်ကို တည့်တည့် စိုက်ကြည့်လိုက်ပြီး သူမ၏ သဘောထားမှာ သိပ်ကောင်းမွန်လှခြင်း မရှိပေ။

သူမ၏ သဘောထားက ချန်ချန်ရွှယ်ကို တော်တော်လေး အံ့သြသွားစေခဲ့သည်။

ချန်ချန်ရွှယ် နားမလည်ပေ။ သူမနှင့် ချင်းကျောက် ကြားတွင် နက်ရှိုင်းသော ရန်ငြိုးရန်စ မရှိပဲနဲ့ ဘာလို့ ချင်းကျောက်က သူမကို အမြဲတမ်း ရိုက်နှက်ချင်နေသလို ခံစားနေရသည်နည်း။

သူမရင်ထဲမှ သံသယများကို ဖိနှိပ်လိုက်ပြီး ချန်ချန်ရွှယ် ပြောလိုက်၏။"ငါတို့ နှစ်ယောက် ပူးပေါင်းဆောင်ရွက်သင့်တယ်လို့ ထင်တယ်... ငါတို့က လူစားတူတွေပဲ.... မင်းနဲ့ ငါ နှစ်ယောက်စလုံးမှာ တခြားသူတွေ မရှိတဲ့ ထူးခြားတဲ့ အရာတစ်ခု ရှိနေတယ်... ငါ မသိတဲ့ အရာကို မင်း သိတယ်....မင်း မသိတဲ့ အရာကို ငါ သိတယ်"

"အကယ်၍ ငါတို့ တစ်ဖက်လူ မသိတဲ့ အရာအားလုံးကို ထုတ်ပြပြီး အပြန်အလှန် ဖလှယ်ကြမယ် ဆိုရင် ဒါက ဖော်ရွေတဲ့ ပူးပေါင်းဆောင်ရွက်မှု တစ်ခု ဖြစ်မလာဘူးလား"

ချင်းကျောက်၏ အလိုအလျောက် တုံ့ပြန်မှုမှာ ငြင်းဆန်ရန် ဖြစ်သော်လည်း သူမ တစ်စုံတစ်ရာ မပြောနိုင်မီ အဘွားအို ချင်း၏ အသံ ထွက်ပေါ်လာသည်။ "မိန်းကလေး... မင်းတို့ နှစ်ယောက် ဘာအကြောင်း ပြောနေကြလဲ ဆိုတာ ငါ မသိပေမယ့်..."

"အကယ်၍ မင်း မဟာဝေ မင်းသမီးနဲ့ ပူးပေါင်းဆောင်ရွက်နိုင်ရင် ဒါက နှစ်ဦးနှစ်ဖက် အကျိုးရှိတဲ့ ကိစ္စ ဖြစ်မယ်လို့ ငါ ထင်တယ်"

ချန်ချန်ရွှယ်နှင့် ချင်းကျောက်တို့၏ စကားဝိုင်းက ပဟေဠိတစ်ခုနှင့် တူနေခဲ့သည်။ ထို့ကြောင့် အခြားသူများ အမှန်တကယ် နားမလည်နိုင်ကြပေ။

'ချန်ချန်ရွှယ်နဲ့ ပူးပေါင်းဆောင်ရွက်မယ်....ဘယ်လိုဟာသလဲ...'

'ဖြစ်နိုင်တာက ငါဆိုတဲ့ ချင်းကျောက်က ကိုယ်တိုင် မသေမျိုးကျင့်ကြံခြင်း သရုပ်ဖော်မှုကို ကောင်းကောင်း မလုပ်နိုင်လို့လား....'

ချင်းကျောက် ပြန်လည် ငြင်းဆန်ချင်သော်လည်း ရုတ်တရက် ငြင်းဆန်ရန် မည်သည့် အကြောင်းပြချက်မှ စဉ်းစားမရ ဖြစ်နေခဲ့သည်။

သူမ ဘယ်လောက်ပဲ မလိုလားပါစေ မသေမျိုးကျင့်ကြံခြင်း သရုပ်ဖော် ကမ္ဘာထဲမှာ အနည်းဆုံး ဒီဘဝမှာတော့... ချန်ချန်ရွှယ်ရဲ့ နောက်ခံက သူမထက် ပိုသန်မာတယ် ဆိုတာ ဝန်ခံရပေမည်။

ဒီအချက် တစ်ခုတည်းနဲ့တင် သေစေနိုင်သည့် တိုက်ခိုက်မှုတစ်ခု ဖြစ်ပေါ်စေပြီး သူမအတွက် ပြန်လည် လက်တုံ့ပြန်နိုင်စွမ်း ရှိဖို့ ခက်ခဲစေပေသည်။

ချင်းကျောက် တစ်စုံတစ်ရာကို ရုတ်တရက် တွေးမိလိုက်သည်။

အကယ်၍ ချန်ချန်ရွှယ်က ကြီးမားသော ကြေးဝါရောင် တံခါးကြီးနောက်ကွယ်က ဂူသင်္ချိုင်းကို လုယူလိုက်ရင်ကော.....

ချန်ချန်ရွှယ်ရဲ့ အဆင့်အတန်းနဲ့ ဆိုရင် အဲဒီနေရာကို လုယူဖို့ ပိုလွယ်ကူလိမ့်ပေမည်။

သူမ အားနည်းချက် ရှိနေတာ ထင်ရှားပြီး အကယ်၍ သူမ ချန်ချန်ရွှယ်နဲ့ ပူးပေါင်းဆောင်ရွက်လိုက်ရင်... သူမက နောက်လိုက်တစ်ယောက် ဖြစ်သွားမည်ဖြစ်ရာ ချင်းကျောက် ဒါကို ဘယ်လို လက်ခံနိုင်မည်နည်း။

"မဖြစ်..."

သူမ မဖြစ်ဘူးဆိုတဲ့ စကားလုံး ပြောလိုက်ရုံ ရှိသေး ချန်ချန်ရွှယ် ရုတ်တရက် ဖြတ်ပြောလိုက်၏။"စဉ်းစားကြည့်ပါ မင်းရဲ့ ရည်မှန်းချက် အစစ်အမှန်က ဘာလဲ... တကယ်ပဲ မဟာဝေ မင်းဆက်ကို ကယ်တင်ဖို့လား... ဒါမှမဟုတ် မင်းကိုယ်တိုင် အတွက်လား"

ချင်းကျောက် ကြောင်အသွားခဲ့သည်။

သူမရဲ့ ရည်မှန်းချက် အစစ်အမှန်က သေချာပေါက် မသေမျိုးကျင့်ကြံခြင်း သရုပ်ဖော် စနစ်ထဲမှာ အချိန်ကြာကြာ အသက်ရှင်ဖို့ပင်။

အဘယ်ကြောင့်ဆိုသော် ဒီနည်းလမ်းနဲ့မှသာ ရမှတ် တွက်ချက်ခြင်း ဆုလာဘ်များတွင် ပိုမို ရက်ရောသည့် ဆုလာဘ်များ ရရှိနိုင်မှာ ဖြစ်လို့ပင်။

'အဲဒါမှ သူမဟာ ပိုသန်မာလာနိုင်ပြီး ချန်ချန်ရွှယ်ကို ရိုက်နှက်နိုင်မှာ...'

'အဟွတ် အဟွတ်...'

ချင်းကျောက်ရဲ့ အတွေးများ လွင့်မျောသွားချိန်မှာပင် ချန်ချန်ရွှယ် ဆက်ပြောလိုက်သည်။ "ဒီလိုလုပ်ရင်ကော မင်းနဲ့ ငါ ပူးပေါင်းပြီး ကနဦး ယုံကြည်မှု တည်ဆောက်ကြမယ်... မင်းကငါ့ကို ကူညီ.. ငါက မင်းကို ကူညီမယ်"

"ငါတို့ အကျိုးအမြတ် အစစ်အမှန်ရပြီးတဲ့ အခါကျမှ ငါတို့ နှစ်ယောက် သေချာ ပူးပေါင်းဆောင်ရွက်ကြမယ်"

"ဒါဆို ဆုံးဖြတ်လိုက်ပြီနော်"

ချင်းကျောက် တိတ်ဆိတ်သွားခဲ့သည်။

[သင့်အတွေးများက မသိလိုက်ဘဲ ချန်ချန်ရွှယ် ပြောသည့် အတိုင်း လိုက်ပါသွားခဲ့သည်။ ခေါင်းရှုပ်ထွေးနေသော အခြေအနေတွင် သင်ဟာ ချန်ချန်ရွှယ်နှင့် ပူးပေါင်းဆောင်ရွက်ရန် သဘောတူလိုက်သည်။]