အခန်း ၁၂၂ : ရှုံးနိမ့်သွားသည့် ချင်းကျောက်
ချင်းကျောက်၏ ဦးနှောက်က သိပ်ကောင်းကောင်း အလုပ်မလုပ်ဘူးလို့ ချန်ချန်ရွှယ် ခံစားလိုက်ရသည်။
တစ်နည်းအားဖြင့်… သူမက နည်းနည်း အပြစ်ကင်းလွန်းနေပေသည်။
ချင်းကျောက်ဆီက ရရှိလိုက်တဲ့ သတင်းအချက်အလက် တချို့ကနေ တဆင့် ဒီမိန်းကလေးက ကျင်းရှင်း နန်းတော်သခင်ရဲ့ သမီး ဆိုတာ ချန်ချန်ရွှယ် (၁၀၀) ရာခိုင်နှုန်း သေချာသွားပေပြီ။
သူမက ဂိုဏ်းပြိုင်ပွဲတုန်းက ဆံပင်တစ်ဝက် ပြတ်သွားပြီး ငိုလုနီးပါး ဖြစ်သွားခဲ့တဲ့ အဲဒီ မိန်းကလေးပင်။
'သူမလည်း မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်နိုင်တာပဲ... သူမလည်း မသေမျိုးကျင့်ကြံခြင်း သရုပ်ဖော် စနစ်ရဲ့ ဖိတ်ခေါ်ခြင်း ခံရတာပဲ..'
'ပြီးခဲ့တဲ့ သရုပ်ဖော် ဘဝမှာ ချင်းကျောက်က သူမထက် ပိုကြာကြာ အသက်ရှင်ခဲ့တာ ဖြစ်ရမယ်..'
မဟုတ်ရင်သူမ အသက် (၂၇) နှစ်မှာ သေဆုံးရမယ် ဆိုတာ သူမ ဘယ်လို သိနိုင်မည်နည်း။
ဒါပေါ့ ချင်းကျောက်ဆီမှာ ရှိတဲ့ သတင်းအချက်အလက်က တိကျပြီး ပြည့်စုံတာတော့ မဟုတ်ချေ။
သူမက ပုန်ကန်သူတွေနဲ့ သူခိုးတွေရဲ့ လက်ချက်နဲ့ သေဆုံးခဲ့ရတာလို့ သူမ ထင်နေတာပင်။
...
တကယ်တော့ ပြီးခဲ့တဲ့ အကြိမ် မသေမျိုးကျင့်ကြံခြင်း သရုပ်ဖော် စနစ်ထဲမှာ သူမ သေဆုံးခဲ့ရတာက ကိုယ့်သေတွင်း ကိုယ်တူးခဲ့လို့ပင်။ သူမက လျှို့ဝှက်ဆန်းကြယ်တဲ့ မျက်နှာဖုံးရဲ့ ကြောက်မက်ဖွယ် ကောင်းတဲ့ တန်ပြန်မှု ကြောင့် သေဆုံးခဲ့ရခြင်းဖြစ်လေသည်။
ဆိုလိုတာက မသေမျိုးကျင့်ကြံခြင်း သရုပ်ဖော် စနစ်ထဲမှာ ချင်းကျောက် ရရှိထားတဲ့ သတင်းအချက်အလက် အဆင့်က မမြင့်မားပေ။ ပြီးတော့ သူမ ရရှိထားတဲ့ သတင်းအချက်အလက်ရဲ့ တိကျမှုကလည်း အကန့်အသတ်ရှိပေသည်။
ဒါက သွယ်ဝိုက်ပြီး ရှင်းပြရပါပ…
ချင်းကျောက်က သူမထက် ပိုကြာကြာ အသက်ရှင်ခဲ့ရင်တောင် လက်တွေ့မှာတော့ သိပ်မကြာလှပေ။
ဖြစ်နိုင်တာက… သူမ သေဆုံးပြီး နှစ်အနည်းငယ် အကြာလောက်မှာပဲ သူမလည်း သေဆုံးသွားခဲ့တာ ဖြစ်ပေမည်။
နှစ်ဖက်စလုံးက အမွှေးတိုင် တစ်တိုင် ထွန်းညှိထားတဲ့ အချိန်ထက်တောင် နည်းပါးတဲ့ အချိန်အတွင်း သတင်းအချက်အလက်တွေ ဖလှယ်ခဲ့ကြပြီး ချန်ချန်ရွှယ်က ချင်းကျောက်နဲ့ ပတ်သက်တဲ့ သတင်းအချက်အလက် အများစုကို ကောက်ချက်ချ နိုင်ခဲ့သည်။
လက်ရှိ သူမရှေ့က ချင်းကျောက်က အဝတ်အစားတွေ ချွတ်ခံထားရတဲ့ ယုန်ဖြူလေး တစ်ကောင်လို ဖြစ်နေပေပြီ။
ဒါပေမဲ့... ဒီအနည်းငယ် အပြစ်ကင်းတဲ့ ယုန်ဖြူလေးက သူမကိုယ်သူမ ကျေနပ်နေတုန်းပင်။
သူမ လုံးဝ ဖော်ထုတ်ခံ လိုက်ရပြီ ဆိုတာ သူမ သတိမပြုမိသေးပေ။
'ဟူး...သူမ ငယ်ပါသေးတယ်...'
'ကြည့်ရတာ သူမ မသေမျိုးကျင့်ကြံခြင်း သရုပ်ဖော် စနစ်ထဲမှာ သိပ်ကြာကြာ အသက်မရှင်ခဲ့ပုံ ရတယ်...'
'သူမ နှစ်ပေါင်းများစွာ ကြာအောင် အတွေ့အကြုံ ရင့်ကျက်မှု မရှိခဲ့သေးဘူး....သူမဆီမှာ အဲဒီ ဖြူစင်တဲ့ စိတ်နေသဘောထား ကျန်ရှိနေသေးတယ်...'
ထို့ကြောင့် နောက်ဆုံးတော့... သူမ ချန်ချန်ရွှယ်ရဲ့ အသုံးချတာ ခံလိုက်ရပေပြီ။
"မင်း နေပြည်တော်ထဲ ရောက်နေတာ သိပ်မကြာသေးဘူး မဟုတ်လား... မင်းရဲ့ ရည်ရွယ်ချက်က မဟာဝေ မင်းဆက်ကို ကယ်တင်ဖို့ ဆိုမှတော့ နန်းတော် အပြင်ဘက်ကနေ ဘယ်လို လုပ်ပြီး မဟာဝေ မင်းဆက်ကို ကယ်တင်မှာလဲ... မင်း ငါနဲ့အတူ နန်းတော်ထဲ လိုက်ချင်လား"
"မင်းဆီမှာ တခြားသူတွေ မသိတဲ့ အရာတွေ အများကြီး သိနေတာ ငါ တွေ့ရတယ်... ဒီအရာတွေကို မင်း အသုံးမချချင်ဘူးလား.... ဒါမှမဟုတ် ဒီသတင်းအချက်အလက်တွေကို မင်းတစ်ယောက်တည်းဆီမှာပဲ ပုပ်သိုးသွားအောင်သိမ်းထားချင်တာလား" ချန်ချန်ရွှယ် ရုတ်တရက် ပြောလိုက်၏။
ဘာသတိပေးချက်မှ မရှိဘဲ သူမ ကမ်းလှမ်းမှု တစ်ခု ပြုလုပ်လိုက်သည်။
ဒီအခြေအနေကြောင့် ချင်းကျောက်ဟာ ကြောင်အမသွားဘဲ မနေနိုင်တော့ပေ။
'အာ...ဒါက ဘယ်လို အခြေအနေကြီးလဲ..'
'ငါ ဒီစကားတွေ ပြောလိုက်ရုံနဲ့ ဒီလူက ငါ့ကို ဒီလောက် ယုံကြည်သွားတာလား' ချင်းကျောက် သူမစိတ်ထဲတွင် ရေရွတ်လိုက်၏။
အချိန်ကိုက် အဘွားအို ချင်းဟာလည်း သူမကို သတိပေးလိုက်သည်။ "မိန်းကလေး ဒီလူကို သိပ်လွယ်လွယ် မယုံနဲ့... ဒါက ထင်ယောင်ထင်မှား ဖြစ်တာလား ငါ မသိပေမယ့် သူမက သူမရဲ့ ပုံပန်းသဏ္ဍာန်ကို ပြောင်းလဲထားတယ်လို့ ငါ ခံစားနေရတယ်.... သူမရဲ့ မျက်နှာအစစ်အမှန်ကို ထုတ်မပြတဲ့ လူတစ်ယောက်က ယုံကြည်ရမယ့် လူစား မဟုတ်ဘူး"
"ဒါ့အပြင် အရင်တုန်းက မင်းပြောခဲ့တဲ့ စကားတွေက ငါ့အမြင်မှာတောင် ရယ်စရာ ကောင်းနေသေးတာ... သူစိမ်းတစ်ယောက်က မင်းရဲ့ စကားတွေကို ဒီအတိုင်း ယုံကြည်လိမ့်မယ်လို့ မျှော်လင့်နေတာလား"
"အခု သူမက မင်းကို ဒီကမ်းလှမ်းမှု ပြုလုပ်လိုက်ပြီ ဆိုတော့ ဖြစ်နိုင်တာက သူမဆီမှာ တခြား ရည်ရွယ်ချက်တွေ ရှိနေလိမ့်မယ်"
နားထောင်ပြီးနောက် ချင်းကျောက်ဟာ သူမ၏ စိတ်ကို အသုံးပြုပြီး ပြန်ဖြေလိုက်သည်။ "စီနီယာ ချင်း၊ တကယ်တော့ ကျွန်မမှာ ရွေးချယ်စရာ သိပ်များများစားစား မရှိဘူး မဟုတ်လား"
အဘွားအို ချင်း ခဏလောက် ကြောင်အသွားပြီး လက်ရှိ အခြေအနေကို စဉ်းစားလိုက်ကာ သူမ နားလည်လိုက်သည်။ "မင်း ပြောတာ မှန်ပါတယ်... ငါတို့ တစ်ဆင့်ချင်းစီပဲ သွားလို့ ရတော့မယ်"
တကယ်ပဲ ရန်သူက သန်မာပြီး ကိုယ်က အားနည်းနေတဲ့ အခြေအနေမှာ ပြီးတော့ တစ်ဖက်လူက ဦးဆောင်ပြီး ကမ်းလှမ်းမှု ပြုလုပ်လာတဲ့ အခြေအနေမှာ အကယ်၍ မင်း လက်မခံရင်...မမျှော်လင့်ထားတဲ့ အဆုံးသတ် တစ်ခုနဲ့ ကြုံတွေ့ရဖို့ ဖြစ်နိုင်ချေ များပေသည်။
ဘာပဲဖြစ်ဖြစ် ကောင်းကောင်း အဆုံးသတ်မှာ မဟုတ်ချေ။
ထို့ကြောင့် ရွေးချယ်စရာ ချယ်စရာ မရှိချေ။
အဘွားအို ချင်း မသိပေမယ့် ချင်းကျောက်ကတော့ သူမရင်ထဲကနေ လုံးဝ ကိစ္စမရှိဘူးလို့ ခံစားနေခဲ့ရသည်။ ဘာပဲဖြစ်ဖြစ် သူမဆီမှာ မသေမျိုးကျင့်ကြံခြင်း သရုပ်ဖော် စနစ် ရှိနေပြီး အစကနေ ပြန်စဖို့ အခွင့်အရေး မရေမတွက်နိုင်အောင် ရှိလေသည်။
အကယ်၍ သူမသာ မတော်တဆ တွင်းထဲ ကျသွားရင်တောင် အဆိုးဆုံး အခြေအနေမှာ သူမ ကိုယ့်ကိုယ်ကိုယ် သတ်သေလိုက်ပြီး အဆုံးသတ်လိုက်ရုံပင်။
နောက်တစ်ကြိမ် သူမ မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်တဲ့အခါ သူမ လက်စားချေပေမည်။
ဒီအတွေး သူမစိတ်ထဲ ဖြတ်သန်းသွားပြီး ချင်းကျောက် ချက်ချင်း သဘောတူလိုက်၏။ "ကောင်းပြီ... ငါ မင်းနဲ့အတူ မဟာဝေ နန်းတော်ထဲ လိုက်ခဲ့မယ် ဒါပေမဲ့ ငါ ဘာပဲပြောပြော မင်း ယုံကြည်ရမယ်နော်"
ချန်ချန်ရွှယ် ပြုံးပြီး ပြောလိုက်သည် - "ငါ ယုံကြည်မှာပါ"
ချန်ချန်ရွှယ် ဒီစကားကို ရိုးသားစွာ ပြောလိုက်ခြင်း ဖြစ်၏။
သူမ တကယ် ယုံကြည်ပေသည်။
အကယ်၍ တခြားလူ တစ်ယောက်က ဒီလိုစကားမျိုး ပြောရင် အဲဒီလူရဲ့ ဦးနှောက်မှာ တစ်ခုခု မှားယွင်းနေတယ်လို့ သူမ ထင်ကောင်း ထင်မိပေလိမ့်မည်။
ဒါပေမဲ့ ဒီစကားကို ပြောတဲ့လူက မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်နိုင်တဲ့ အခြားလူ တစ်ယောက်ဖြစ်ရာ သူမ မယုံဘဲ နေလို့ မရပေ။
ဘေးနားမှာ ဒီအရာအားလုံးကို မြင်တွေ့လိုက်ရတဲ့ အဘွားအိုက ပြောဖို့ တွန့်ဆုတ်မနေဘဲ မနေနိုင်တော့ပေ။ မင်းသမီးက သိပ်မဆင်မခြင် နိုင်လွန်းတယ်လို့ သူမ ခံစားလိုက်ရပြီး သူမ ဒီလူကို နန်းတော်ထဲ ပေါ့ပေါ့ပါးပါး ဖိတ်ခေါ်လိုက်လေသည်။
အရေးအကြီးဆုံး အချက်က... ဒီမိန်းကလေးက ထူးဆန်းနေခြင်းပင်။
အဘွားအိုရဲ့ မျက်လုံးထဲမှာ ချင်းကျောက်က ထူးဆန်းတဲ့ လူတစ်ယောက်... သိပ်ကိုထူးဆန်းသည့် လူတစ်ယောက်ပင်။
သူမက အဓိပ္ပာယ်မရှိတဲ့ စကားတွေကို ဆက်တိုက် ပြောနေပြီး သူမမျက်နှာပေါ်မှာ လေးနက်တဲ့ အမူအရာတောင် ရှိနေသေးကာ ၎င်းက အနာဂတ်မှာ ဒီလို ကိစ္စမျိုး တကယ် ဖြစ်လာမယ့် အတိုင်းပင်။
ကြည့်ရတာ လိမ်ညာနေတာနဲ့ လုံးဝ မတူချေ။
ဒါ့အပြင် အဘွားအိုရဲ့ အာရုံစိုက်မှုကို အဆွဲဆောင်နိုင်ဆုံး အရာက ချင်းကျောက်ရဲ့ ရင်းနှီးတဲ့ သားရဲဝှိုက်တီ ပင်။ ဒီအဖြူရောင် သန့်သန့် မိစ္ဆာသားရဲက သေချာပေါက် မျိုးသုဉ်းသွားပြီ ဖြစ်တဲ့ မိစ္ဆာသားရဲ တစ်ကောင်ပင်။
၎င်းတို့ မျိုးသုဉ်းသွားတာ အနည်းဆုံး နှစ်သန်းပေါင်းများစွာ ကြာနေပေပြီ။
'ချင်းကျောက်လို့ နာမည်ရတဲ့ ဒီမိန်းကလေးဆီမှာ ဘာလို့ ဒီလို ရင်းနှီးတဲ့ သားရဲမျိုး ရှိနေရတာလဲ...'
ထို့အပြင်... တစ်ဖက်လူရဲ့ မသေမျိုး အခြေခံအုတ်မြစ်ကလည်း အလွန် တုန်လှုပ်စရာ ကောင်းနေခဲ့သည်။
ထူးဆန်းတဲ့ အရာအားလုံး ပေါင်းစပ်လိုက်တဲ့ အခါ ပို၍ ထူးဆန်းလာပေသည်။
'အဓိက အချက်က မင်းသမီးက တစ်ဖက်လူရဲ့ အဓိပ္ပာယ်မရှိတဲ့ စကားတွေကို တကယ် ယုံကြည်လိုက်တာပဲ...'
'တောက်...'
သူမရဲ့ တွေးခေါ်ပုံက မျိုးဆက်သစ် ကျင့်ကြံသူတွေနဲ့ အမီမလိုက်နိုင်တော့ဘူးလို့ အဘွားအို ခံစားလိုက်ရ၏။
မင်းသမီး ဘာလုပ်ချင်နေလဲ ဆိုတာ သူမ နားမလည်တော့သလို ချင်းကျောက် လို့ ခေါ်တဲ့ ဒီမိန်းကလေးရဲ့ ရည်ရွယ်ချက်ကိုလည်း သူမ နားမလည်ပေ။ သူမရဲ့ အဓိပ္ပာယ်မရှိတဲ့ စကားတွေ အားလုံးနဲ့ သူမ ဘာလုပ်ဖို့ ကြိုးစားနေသည်နည်း။
အဘွားအိုရဲ့ စိတ်ထဲမှာ မေးခွန်းထုတ်စရာတွေ ပြည့်နှက်နေခဲ့သည်။
သူမ တစ်ခုခု ပြောချင်ပေမယ့် ရပ်တန့်လိုက်၏။
...
ချင်းဟယ် ခရိုင်...
သနားစရာကောင်းတဲ့ ချင်းကျောက် တစ်ယောက် ချန်ချန်ရွှယ်ရဲ့ ကစားတာ ခံလိုက်ရတာကို ပိုင်ယီ မျှော်လင့်ချက်မဲ့စွာ ကြည့်နေမိခဲ့သည်။ လာမယ့် အချိန်ကာလ တစ်ခု အထိ ချင်းကျောက်က ချန်ချန်ရွှယ်ရဲ့ အလုပ်သမားအဆင့်ကို လျှော့ချခံလိုက်ရပြီ ဆိုတာ သူ သိလိုက်သည်။
ချင်းကျောက် ကိုယ့်အတွက် သူဌေး တစ်ယောက် ရှာတွေ့လိုက်တာနဲ့ အတူတူပင်။ ထို့အပြင် ဒီသူဌေးက သူမရဲ့ လျှို့ဝှက်ချက် အားလုံးနီးပါးကို သိနေခြင်းပင်။
'ဘယ်လို မိန်းကလေးလဲကွာ..'
ပေးဆပ်နိုင်တဲ့ လူတွေကို ပိုင်ယီ မြင်ဖူးပေမယ့် ချင်းကျောက်လောက် ပေးဆပ်နိုင်သည့် လူမျိုး တစ်ခါမှ မမြင်ဖူးပေ.......
နောက်ဆုံးတော့ နားလည်မှုလွဲမှားခြင်းထဲ ကျရောက်သွားတာ ချင်းကျောက်ပင်။ မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်နိုင်တာ သူမ တစ်ယောက်တည်း ရှိတယ်လို့ သူမ ထင်နေခဲ့ခြင်းပင်။
ချန်ချန်ရွှယ်ကတော့ သူမရဲ့ လက်ထဲမှာ နောက်ထပ် လှည့်ကွက်တစ်ခု ရှိနေပြီး သူမ ပုံပန်းသဏ္ဍာန် ပြောင်းလဲပြီးနောက် ချင်းကျောက်ကို သွားရောက် တွေ့ဆုံခဲ့သည်။
ဒါက ချန်ချန်ရွှယ်ကို မသေမျိုးကျင့်ကြံခြင်း သရုပ်ဖော် စနစ်ထဲ ဖိတ်ခေါ်ခံရတဲ့ လူတစ်ယောက်မက ရှိနေတယ် ဆိုတာ ကြိုတင် သိရှိခွင့် ရစေခဲ့သည်။
အစကတည်းက သတင်းအချက်အလက် ပိုင်းဆိုင်ရာမှာ နှစ်ဖက်စလုံး တန်းတူညီမျှမှုမရှိခဲ့ပေ။
ချင်းကျောက် ရှုံးနိမ့်သွားခဲ့ပေပြီ။
တကယ်တော့ သူမ ဆိုးဆိုးရွားရွား ရှုံးနိမ့်သွားခဲ့လို့ အခုလောက်ဆို ထုံကျင်နေလောက်ပေပြီ။
...