အခန်း ၁၂ : ဓားကျင့်စဥ် အခြေခံ ( ဓားကျင့်စဥ် အပြည့်အစုံ )

​နောက်ဆုံးတော့ ချန်ချန်ရွှယ်ဟာ ပိုင်ယီအား စိတ်ပျက်အောင် မလုပ်ခဲ့ပေ။ မသေမျိုးကျင့်ကြံခြင်း သရုပ်ဖော် စနစ်ထဲမှာ (၃) နှစ်တိတိ ပြင်းပြင်းထန်ထန် ကျင့်ကြံအားထုတ်ပြီးတဲ့နောက် သူမဟာ သာမန်လူ တစ်ယောက် အဖြစ်ကနေ မသေမျိုးကျင့်ကြံသူ တစ်ယောက် အဖြစ်ကို အောင်မြင်စွာ ကူးပြောင်းနိုင်ခဲ့လေသည်။

​ချီစုစည်းမှု အဆင့် (၁) ကျင့်ကြံသူတွေက အလွန် အားနည်းပြီး မသေမျိုးကျင့်ကြံသူလောကရဲ့ အနိမ့်ဆုံး အဆင့်မှာ ရှိနေပေမယ့် မသေမျိုးကျင့်ကြံသူတွေ ဖြစ်နေတုန်းပင်။ အနိမ့်ဆုံးအဆင့် ကျင့်ကြံသူ ဖြစ်ရင်တောင်မှ သာမန်လူတွေထက်တော့ အများကြီး ပိုသန်မာပေသည်။

​ပိုင်ယီ အနေနဲ့ သူ့ရဲ့ လုပ်ပိုင်ခွင့်အာဏာကို အသုံးပြုပြီး သရုပ်ဖော် စနစ်ထဲက ချန်ချန်ရွှယ်ရဲ့ တစ်ကိုယ်လုံးဟာ စွမ်းအင်တွေနဲ့ ပြည့်နေတာကို ရှင်းလင်းစွာ အာရုံခံမိနေခဲ့သည်။ သူမက အရင်ကနဲ့ မတူတော့ပေ။

​သာမန်လောကရဲ့ အငွေ့အသက်တွေက သူမဆီကနေ ပျောက်ကွယ်သွားခဲ့ပြီး  မသေမျိုးကျင့်ကြံသူတွေရဲ့ ထူးခြားတဲ့ အငွေ့အသက်၊ သာမန်အရာတွေကို ကျော်လွန်နေတဲ့ အထူးအငွေ့အသက် တစ်ခု ရရှိလာခဲ့သည်။

​မသေမျိုးကျင့်ကြံခြင်း သရုပ်ဖော် စနစ်ထဲက ချန်ချန်ရွှယ်ရဲ့ အောင်မြင်မှုတွေက ပိုင်ယီရဲ့ မူလရွေးချယ်မှု မှန်ကန်ကြောင်း ထပ်မံ သက်သေပြလိုက်ပြန်ပေသည်။

​ဝိညာဉ်ဓားဂိုဏ်း သူတော်စင်မကို သရုပ်ဖော် စနစ်ထဲ ဆွဲသွင်းလိုက်တာက တကယ့်ကို ပညာသားပါတဲ့ ရွေးချယ်မှုပင်။

​သိထားရမှာက... ပိုင်ယီ ကိုယ်တိုင် သရုပ်ဖော် စနစ်ထဲမှာ အကြိမ် (၃၀) ကျော် သေဆုံးခဲ့ဖူးပေမယ့် တစ်ခါမှ မသေမျိုးကျင့်ကြံခြင်း ကျင့်စဉ် တစ်ခုကိုတောင် ထိတွေ့ဖူးဖို့ မပြောနဲ့ သိုင်းလောကသားတွေရဲ့ သိုင်းပညာ ကျင့်စဉ်တွေကိုတောင် မထိတွေ့ဖူးခဲ့ချေ။

​သေဆုံးတိုင်း တစ်လတောင် မခံခဲ့ခြင်းက တကယ့်ကို စိတ်ပျက်စရာ ကောင်းလိုက်ပင်။

​တစ်ဖက်မှာကျတော့... ချန်ချန်ရွှယ်ဟာ သူနဲ့ လုံးဝ ကွာခြားကြောင်း သက်သေပြနေခဲ့သည်။

​ပထမအကြိမ်တုန်းက ချန်ချန်ရွှယ်ဟာ အသက်ရှူနည်းစနစ် တစ်ခု ရခဲ့ပြီး ဒုတိယအကြိမ်ကျတော့ မသေမျိုးကျင့်ကြံခြင်း ကျင့်စဉ် တစ်ခု ရခဲ့ပြန်လေသည်။

​ဒါကို မြင်တော့ ပိုင်ယီဟာ တော်တော် ပျော်သွားခဲ့၏။

​ထို့အပြင် သူ အသုံးမကျဘူးလို့ ခံစားနေရသရွေ့တော့ သူဟာ စိတ်ဓာတ်ကျစရာ အကြောင်း မရှိပါဘူး။

​ပိုင်ယီဟာ ချန်ချန်ရွှယ် ပိုမြင့်တဲ့ အဆင့်ကို တက်လှမ်းနိုင်ဖို့ မျှော်လင့်နေတုန်းမှာပဲ သူမဟာ သေဆုံးသွားသည်အား ရုတ်တရက် တွေ့လိုက်ရလို့ လန့်သွားခဲ့လေသည်။

​"ဟမ်...ဘာဖြစ်သွားတာလဲဟ.."

​သူ စိတ်လွတ်သွားတာ စက္ကန့် (၃၀) လောက်ပဲ ရှိသေးတယ်လေ... ချန်ချန်ရွှယ် သေသွားပြီတဲ့လား.....

​သူ လွတ်သွားခဲ့တဲ့ သရုပ်ဖော် စနစ်ရဲ့ အသိပေးချက်တွေကို အမြန် ပြန်ကြည့်လိုက်၏။

​[ချီစုစည်းမှု အဆင့် (၁) သို့ ရောက်ရှိသွားသော ချန်ချန်ရွှယ်ဟာ ကျင့်ကြံရာ နေရာ၌ ဝိညာဉ်စွမ်းအင် ပါးလွှာလွန်းသဖြင့် အဆင့်တက်ရန် ခက်ခဲကြောင်း သတိပြုမိလိုက်သည်။ ထို့ကြောင့် သူမဟာ လေ့ကျင့်ရန် တောနက်ထဲသို့ ဝင်ရောက်ရန် ရွေးချယ်လိုက်သည်။]

​[ပြင်းပြင်းထန်ထန် လေ့ကျင့်နေသည်...]

​[ချန်ချန်ရွှယ်ဟာ တောင်ပေါ်တွင် ဝိညာဉ်ဆေးမြစ် တစ်ပင်ကို တွေ့ရှိခဲ့သည်။ စားသုံးပြီးနောက် သူမ၏ ခန္ဓာကိုယ်ဖွဲ့စည်းပုံ သိသိသာသာ တိုးတက်လာကြောင်း ခံစားလိုက်ရသည်။]

​[ခန္ဓာကိုယ်ဖွဲ့စည်းပုံ +၂]

​[မိစ္ဆာအဖြစ် ပြောင်းလဲပြီးသား မိစ္ဆာသားရဲ တစ်ကောင်ဟာ ချန်ချန်ရွှယ် ပြင်းပြင်းထန်ထန် လေ့ကျင့်နေစဉ်မှာ အလစ်ဝင်တိုက်ခိုက်ခဲ့သည်။ ချန်ချန်ရွှယ်ဟာ လျင်မြန်စွာ တုံ့ပြန်ပြီး ပြန်လည် တိုက်ခိုက်ခဲ့သော်လည်း နောက်ဆုံးတွင် သူမ ယှဉ်မနိုင်ခဲ့ပေ]

​ချန်ချန်ရွှယ် သေဆုံးသွားပါပြီ......

​[အသက် - ၈ နှစ်၊ ၄ လ၊ ၆ ရက်]

​[...]

​"..."

​"ဘာကြီး......"

​ပိုင်ယီ ဘာပြောရမှန်း မသိတော့ပေ။ ကံတရားက သူ့ကို နောက်ပြောင်နေတာလားပင်။ လွန်ခဲ့တဲ့ တစ်စက္ကန့်ကမှ ချန်ချန်ရွှယ်က မသေမျိုးကျင့်ကြံခြင်း လမ်းကြောင်းပေါ် ရောက်ရှိသွားပြီး နောက်တစ်စက္ကန့်ကျတော့ မိစ္ဆာကောင်ရဲ့ ညစာ ဖြစ်သွားရပြန်လေသည်။

​ချန်ချန်ရွှယ်ရဲ့ ကံတရားက ကောင်းတယ် ပြောရမလား၊ ဆိုးတယ် ပြောရမလား သူ မသိတော့ပေ။ သို့မဟုတ် မသေမျိုးကျင့်ကြံခြင်း သရုပ်ဖော် စနစ်က ရက်စက်လွန်းတာလည်း ဖြစ်နိုင်ပေသည်။

​"မဟုတ်မှ ဒီလို အံ့သြစရာ ကံကောင်းခြင်းတွေ ရဖို့အတွက် သူမရဲ့ သက်တမ်းနဲ့ လဲလိုက်ရတာများလား...

​ဒါက ဒဏ္ဍာရီလာ အသက်ရိတ်သိမ်းခြင်းဆိုတာလား..."

​'ဖြစ်နိုင်တာက... သူများ သူမကို ကျိန်စာတိုက်မိလိုက်တာလား....'

​'ဟင့်အင်း...မဖြစ်နိုင်ဘူး....လုံးဝ မဖြစ်နိုင်ဘူး...တိုက်ဆိုင်တာ ဒါကသပ်သပ်ကို တိုက်ဆိုင်တာပဲ...'

​ပိုင်ယီဟာ သူ့အပြစ် မဟုတ်ကြောင်း ငြင်းဆန်လိုက်သည်။

​[သင် ဖိတ်ကြားထားသော ကိုယ်စားလှယ်လောင်း ချန်ချန်ရွှယ်ဟာ သရုပ်ဖော် မသေမျိုးကျင့်ကြံခြင်း ဘဝတွင် (၈) နှစ်၊ (၄) လ နှင့် (၆) ရက်တိုင်တိုင် အသက်ရှင် နေထိုင်ခဲ့ပါသည်။ နောက်တစ်ကြိမ် သရုပ်ဖော်မှု မပြုလုပ်မီ (၂၄) နာရီ အချိန်စောင့်ဆိုင်းရပါဦးမည်။]

​[ချန်ချန်ရွှယ်ဟာ ဒုတိယအကြိမ် သရုပ်ဖော်မှုတွင် လက်စားချေနိုင်ခဲ့ပါသည်။ ထပ်ဆောင်း ဆုလာဘ် ရှိပါသည်]

​[သင်သည် အောက်ပါ ဆုလာဘ်များကို ရရှိလိုက်သည် - ]

​[ဆုလာဘ် ၁ - ဓားကျင့်စဉ် အခြေခံ (ဓားကျင့်စဉ် အပြည့်အစုံ)]

​[ဆုလာဘ် ၂ - ချီစုစည်းမှု အဆင့် (၁) (ချန်ချန်ရွှယ်၏ (၃) နှစ်တာ ကြိုးပမ်းခဲ့သော ကျင့်ကြံမှုအဆင့်)]

​[ဆုလာဘ် ၃ - ဘိုးဘေးပိုင် ကျောက်စိမ်းဆွဲပြား (ကံကောင်းခြင်း အနည်းငယ် ယူဆောင်လာပေးမည်)]

​[ထပ်ဆောင်း ဆုလာဘ် - ဝိညာဉ်စွမ်းအင် (၅) မျှင်]

​[ကျေးဇူးပြု၍ ဆုလာဘ် တစ်ခုခုကို ရွေးချယ်ပါ။ ထပ်ဆောင်း ဆုလာဘ်က မဖြစ်မနေ ရရှိမည့် ဆုလာဘ် ဖြစ်ပါသည်။ သီးသန့် ရွေးချယ်စရာ မလိုပါ။]

​မသေမျိုးကျင့်ကြံခြင်း သရုပ်ဖော် စနစ်၏ တွက်ချက်ထားသော ဆုလာဘ်များကို ကြည့်ပြီး ပိုင်ယီဟာ အနည်းငယ် စဉ်းစားခန်း ဝင်သွားခဲ့သည်။

​ချန်ချန်ရွှယ်က (၈) နှစ်ကျော်လောက်ပဲ အသက်ရှင်ခဲ့ရပြီး ဒီတစ်ခါလည်း ကမန်းကတန်း သေဆုံးသွားခဲ့ရပြန်သည်။

​သူဟာ အံ့သြလို့ မဆုံးသေးချေ။

​ဒါပေမဲ့... သူ ဘာမှ ဆုံးရှုံးသွားပုံ မရပဲ ဆုလာဘ်တွေကလည်း တကယ့်ကို ရက်ရောလွန်းပေသည်။

​ဆုလာဘ် (၃) ခု အပြင် ထပ်ဆောင်း ဆုလာဘ်တောင် ပါသေးလေသည်။

​ဝိညာဉ်စွမ်းအင် (၅) မျှင်က ဘယ်လောက် တိုးတက်မှု ပေးနိုင်မလဲ ဆိုတာ ပိုင်ယီ မသိပေမယ့် တစ်အားတော့မဆိုးလောက်ပေ။

​"ဓားကျင့်စဉ် အပြည့်အစုံ၊ ချီစုစည်းမှု အဆင့် (၁) ကျင့်ကြံမှု... အဲဒီ ကျောက်စိမ်းဆွဲပြားကိုတော့ ခဏထားလိုက်ဦးမယ်"

​"ငါ ဘယ်ဟာ ရွေးသင့်သလဲ"

​ပိုင်ယီဟာ ရွေးချယ်ရ ခက်ခဲနေခဲ့လေသည်။

​သူ ဓားကျင့်စဉ် အပြည့်အစုံကို တကယ် လိုအပ်နေလေသည်။ ဘာလို့လဲဆိုတော့ ဒါက မသေမျိုးကျင့်ကြံခြင်း ကျင့်စဉ် တစ်ခုဖြစ်ပြီး ဒါကို ရွေးရင် ဓားကျင့်စဉ်နဲ့ ပတ်သက်တဲ့ နားလည်မှုက အခြေခံအဆင့်ကို ရောက်သွားပြီး တိုက်ခိုက်နိုင်စွမ်းကလည်း အတိုင်းအတာ တစ်ခုအထိ ရရှိလာပေလိမ့်မည်။

​ဒါပေမဲ့ ချီစုစည်းမှု အဆင့် (၁) ကျင့်ကြံမှုကလည်း သူလိုချင်တဲ့ အရာပင်။ ဒါကို ရွေးရင် သူ ချက်ချင်း မသေမျိုးကျင့်ကြံသူ ဖြစ်သွားမှာ ဖြစ်သည်။

​ပြဿနာက သူ မသေမျိုးကျင့်ကြံသူ ဖြစ်သွားရင် သာမန် ဓားသိုင်းတွေ သုံးပြီး တိုက်ခိုက်လို့မှ မဖြစ်နိုင်တော့ပေ။

​ပိုင်ယဟာ နောက်ဆုံး ထပ်ဆောင်း ဆုလာဘ်ကို ကြည့်လိုက်၏။ ဝိညာဉ်စွမ်းအင် (၅) မျှင်က သူ့ကို ချီစုစည်းမှု အဆင့် (၁) ရောက်အောင် လုပ်ပေးနိုင်မှာ မဟုတ်ပေမယ့် ဝိညာဉ်စွမ်းအင် ဖြစ်နေသေးတာမို့ ဓားကျင့်စဉ်ကို အသက်သွင်းဖို့တော့ လုံလောက်မည်ပင်။

​"ငါ ဆုလာဘ် ၁ ကို ရွေးမယ်"

​ချက်ချင်းပင် သူဟာ သတင်းအချက်အလက် အမြောက်အမြားကို လက်ခံရရှိလိုက်၏။

​သူဟာ အဆင့်မြင့် မသေမျိုးကျင့်စဉ် တစ်ခုကို ချက်ချင်း တတ်မြောက်သွားပြီး အခြေခံအဆင့်သို့ ရောက်ရှိသွားခဲ့လေသည်။

​အဲဒီကျမှ ပိုင်ယီ သိလိုက်ရတာက ဓားကျင့်စဉ်ထဲမှာ ကောင်းကင်နှင့် မြေကြီး ဝိညာဉ်စွမ်းအင်များကို သန့်စင်တဲ့ နည်းစနစ်တွေ ပါဝင်နေတယ် ဆိုတာပင်။

​ကျင့်စဉ်နဲ့ အလွန် လိုက်ဖက်တဲ့ ဓားသိုင်းတစ်ခု ပါဝင်ပြီး ခြေလှမ်းကွက် တစ်ခုလည်း ပါဝင်သလို အဓိက ကျတဲ့ ဓားကျင့်စဉ်လည်း ပါဝင်သေးပေသည်။

​တစ်ချိန်တည်းမှာပဲ အလွန် သန့်စင်တဲ့ ဝိညာဉ်စွမ်းအင် တစ်ခုက သူ့ရဲ့ ချီကြောတွေနဲ့ ဒန်ထျန်းထဲ ဝင်ရောက်လာပြီး (၃) နှစ်တာ အတွင်းအားတွေကို ဝိညာဉ်စွမ်းအင် အဖြစ် အတင်းအဓမ္မ ပြောင်းလဲလိုက်လေသည်။

​ဝိညာဉ်စွမ်းအင်များက စမ်းချောင်းလေး တစ်ခုလို သူ့ချီကြောတွေထဲ စီးဆင်းနေခဲ့ပြီး ပိုင်ယီရဲ့ ခန္ဓာကိုယ်ကို အဆက်မပြတ် ပြောင်းလဲမှုတွေ ဖြစ်ပေါ်စေခဲ့သည်။

​သူ့ရဲ့ ခွန်အားတွေ တိုးလာခဲ့ပြီး စိတ်ဓာတ်တွေကလည်း နှစ်ဆ တက်လာကာ အာရုံခံနိုင်စွမ်းတွေ မြင့်တက်လာခဲ့သည်။

​သူ့လက်ဝါးမှ ဒဏ်ရာပင် တဖြည်းဖြည်း ပြန်ကောင်းလာပြီး ဘာမှ မဖြစ်ခဲ့သလိုပင်။

​ပိုင်ယီဟာ သူ့စိတ်ထဲက စိတ်လှုပ်ရှားမှုတွေကို ထိန်းချုပ်လိုက်၏။ ထို့နောက် သူဟာ တစ်ခုခု သတိရသွားပုံ ရလေသည်။ "ငါ မှတ်မိပြီ ငါအရင်က ဓားရှည်တစ်ချောင်း ဝယ်ထားဖူးတာပဲ..."

​စိတ်လှုပ်ရှားစရာ ကောင်းတဲ့ ကျင့်ကြံခြင်းလောကကို ရောက်လာမှတော့ မသေမျိုးကျင့်ကြံသူ ဖြစ်ချင်တဲ့ အိပ်မက်ဟာ ပိုင်ယီမှာ ဘယ်လိုလုပ် မရှိဘဲ နေမည်နည်း။

​ကူးပြောင်းရောက်ရှိပြီး မကြာခင်မှာပဲ သူ စိတ်လှုပ်ရှားစွာဖြင့် ဓားရှည်တစ်ချောင်း ဝယ်ခဲ့ဖူးလေသည်။

​ထို့နောက် သူဟာ တစ်နေ့လုံး အဲဒီဓားနဲ့ ကစားပြီး စိတ်ကူးယဉ်ခဲ့ပေသည်။

​နောက်ဆုံးတော့... သူ့ရဲ့ အခြေခံအုတ်မြစ်က မကောင်းမှန်း သိလိုက်ရတော့ ဓားရှည်ကို တစ်နေရာရာမှာ ပစ်ထားခဲ့လိုက်၏။

​အိမ်ထဲမှာ ခဏလောက် ရှာဖွေပြီးနောက်မှာ ပိုင်ယီဟာ ဓားရှည်ကို ပြန်တွေ့သွားခဲ့သည်။

​ဓားအိမ်နဲ့ ဓားရိုးပေါ်မှာ ဖုန်တွေပင် အလွှာလိုက် တက်နေခဲ့လေသည်။

​ပိုင်ယီဟာ ဓားရိုးကို ကိုင်ပြီး ဆွဲထုတ်လိုက်သည်နှင့် တောက်ပနေသော ငွေရောင် ဓားသွားက ချက်ချင်း ထွက်ပေါ်လာခဲ့သည်။ သူဟာ ဓားလမ်းစဉ်မှာ နှစ်ပေါင်းများစွာ နစ်မြုပ်နေခဲ့သူ တစ်ယောက်လိုမျိုး ကျွမ်းကျင်စွာ ကစားလိုက်၏။ ဒါက ဓားကျင့်စဉ်ထဲမှာ ဓားသိုင်း ပါဝင်နေလို့ပါပင်။

​သူ့စိတ်ထဲက ဓားကျင့်စဉ် အချက်အလက်တွေကို ရှာဖွေရင်း ပိုင်ယီဟာ ဓားရှည်ကို လေထဲ ပစ်မြှောက်လိုက်၏။

​ထို့နောက် သူ့ညာလက်က ဓားလက်ချောင်းပုံစံ လုပ်လိုက်ရာ ခန္ဓာကိုယ်ထဲက ဝိညာဉ်စွမ်းအင်တွေက လှိုင်းထလာခဲ့လေသည်။

​"ထိန်းချုပ်စမ်း"

​အော်သံဖျော့ဖျော့လေး နဲ့အတူ ပြုတ်ကျလုနီးပါး ဖြစ်နေသော ဓားရှည်၏ ပြုတ်ကျနေတဲ့ အရှိန်ဟာ ရုတ်တရက် ရပ်တန့်သွားခဲ့သည်။

​မမြင်ရတဲ့ စွမ်းအားတစ်ခုက ပင့်တင်ထားသလိုမျိုး  လေပေါ် ပျံဝဲနေခဲ့လေသည်။

​သို့သော် လေပေါ် ပျံဝဲနေတဲ့ ဓားရှည်က နည်းနည်း ယိမ်းယိုင်နေခဲ့သည်။

​"ဓားကျင့်စဉ် အရ ဆိုရင် ဓားပျံစီးနိုင်တဲ့ မသေမျိုးကျင့်ကြံသူ ဆိုတာ အနည်းဆုံး ချီစုစည်းမှု အဆင့် (၅) ရှိရမယ်တဲ့... ဒါပေမဲ့ ဓားကျင့်စဉ်က အတော်လေး ထူးခြားနေလို့ ငါ့မှာ ချီစုစည်းမှု အဆင့် (၁) မရှိရင်တောင် ခန္ဓာကိုယ်ထဲက ဝိညာဉ်စွမ်းအင် (၅) မျှင် ရှိနေတဲ့အတွက် ဓားကို နည်းနည်း ထိန်းချုပ်လို့ ရနေတာပဲ"

​"ပြီးတော့ ဒီဓားက ဘာပဲဖြစ်ဖြစ် သာမန် ဓားရှည်တစ်ချောင်းပဲလေ... တကယ်လို့ ငါသာ ဝိညာဉ်ဓားတစ်ချောင်း ရခဲ့ရင် ဓားပျံစီးရတာ ပိုလွယ်ကူလာမှာ ပြီးတော့ ငါ့လက်လိုပဲ စိတ်တိုင်းကျ သုံးလို့ရမှာ"

​ပိုင်ယီဟာ ကိုယ့်ဘာသာ ရေရွတ်လိုက်၏။

​သူ ဓားလက်ချောင်းကို ရုပ်သိမ်းလိုက်ပြီး ဓားကို ဖမ်းဖို့ လက်လှမ်းလိုက်သည်။

​ထို့နောက် ဓားရိုးကို တည်ငြိမ်စွာ ဖမ်းယူလိုက်ပြီး ဓားအိမ်ထဲ ပြန်ထည့်လိုက်လေသည်။

​...