အခန်း ၁၁၈: အဘွားအိုချင်၏ အကြံ၊ ရွှေအမြုတေအဆင့် (၃)ယောက်နှင့် အခြေတည်အဆင့် (၁)တို့ ရောက်ရှိလာခြင်း
ဒီမိစ္ဆာတွေ ဘယ်လို လျှို့ဝှက်ချက်တွေပဲ သိထားပါစေ... ဒီလျှို့ဝှက်ချက်တွေကို အသုံးပြုပြီး အသက်ရှင်သန်ဖို့ အပေးအယူလုပ်ချင်ရင်တောင် အသုံးမဝင်ခဲ့ကြပေ။
မင်းသမီး ချန်နင်းက အဲဒီလူတွေကို စိတ်မဝင်စားသလို အဲဒီ လျှို့ဝှက်ချက်တွေကိုလည်း သူမ သိချင်စိတ် မရှိခဲ့ချေ။
ဒါက အသက်ရာပေါင်းများစွာ ရှင်သန်ခဲ့ကြတဲ့ မိစ္ဆာအိုကြီးတွေရဲ့ မျက်လုံးထဲမှာ ငယ်ရွယ်တဲ့ မင်းသမီး ချန်နင်းကို ပိုပြီး ကြောက်စရာကောင်းသည့် မိစ္ဆာကြီးတစ်ကောင်လို ဖြစ်လာစေခဲ့သည်။
မကြာမီ ချန်ချန်ရွှယ်ဟာ နန်းတော်ထဲကနေ ထွက်ခွာလာခဲ့သည်။ အပေါ်ယံမှာတော့ အဘွားအို တစ်ယောက်တည်းပဲ သူမနောက်က လိုက်ပါလာခဲ့လေသည်။
ချင်းကျောက်ရဲ့ နာမည်က စာရင်းပေါ်မှာ ရှိနေရုံသာမက သူမ လက်ရှိ နေထိုင်နေတဲ့ နေရာကလည်း စာရင်းပေါ်မှာ ပါဝင်နေခဲ့ရာ ချင်းကျောက် တခြားနေရာကို မပြောင်းရွှေ့သရွေ့ ချန်ချန်ရွှယ်က သူမကို ရှာတွေ့နိုင်မည်ပင်။
…
အခြားတစ်ဖက်တွင်...
ချင်းကျောက်က သူမ နေ့ရောညပါ တွေးတောနေတဲ့အမျိုးသမီး တစ်ယောက်က သူမဆီ ချဉ်းကပ်လာနေမှန်း လုံးဝ မသိရှာပေ။
ဒီအချိန်မှာ ချင်းကျောက် ရှုပ်ထွေးနေခဲ့သည်။ မဟာဝေ ဧကရာဇ်မင်းမြတ် ရူးသွပ်သွားတာကို သူမ ဘယ်လို တားဆီးရမည်နည်း။
သူမရဲ့ မျက်လုံးထဲမှာ မဟာဝေ ဧကရာဇ်မင်းမြတ် ရူးသွပ်သွားရတဲ့ အကြီးမားဆုံး အကြောင်းရင်းက သူ့သားနဲ့ သမီး သေဆုံးသွားလို့ပင်။
မေးခွန်းက...သူ့သားနဲ့ သမီးတွေ ဒီလောက် မြန်မြန်ဆန်ဆန် သေဆုံးသွားတာကို သူမ ဘယ်လို တားဆီးရမည်နည်း။
......
ဒီမေးခွန်းက ချင်းကျောက်ကို ရက်အနည်းငယ်လောက် ဒုက္ခပေးနေခဲ့လေသည်။
သူမဟာ အခုထိ သဲလွန်စတစ်ခုမှ စဉ်းစားလို့ မရသေးရာ မျှော်လင့်ချက်မဲ့စွာနဲ့ သူမ အရာအားလုံးကို လုပ်နိုင်တဲ့ အဘွားအိုကိုပဲ မေးလိုက်ရတော့သည်။
"စီနီယာချင်း အကယ်၍ မဟာဝေ မင်းဆက်ရဲ့ တော်ဝင် မျိုးဆက်တွေ အကျပ်အတည်းထဲ ကျရောက်တော့မယ်ဆိုရင် တစ်စုံတစ်ယောက်က သူတို့ကို သတ်ချင်နေပြီဆိုရင် "
"ပြီးတော့ ကျွန်မက လက်ကမ်းပေးပြီး သူတို့ကို ကပ်ဘေးကနေ ကယ်တင်ဖို့ဆိုရင် ဘာလုပ်ရမလဲ" သူမ ချက်ချင်း မေးလိုက်၏။
အဘွားအိုရဲ့ ရှုပ်ထွေးနေတဲ့ လေသံ ထွက်ပေါ်လာခဲ့သည်။ "တစ်စုံတစ်ယောက်က သူတို့ကို သတ်ချင်နေမှန်း မင်း ဘယ်လို သိတာလဲ"
'သူမ ဘယ်လို သိတာလဲ...'
ဒါပေါ့ သူမ မသေမျိုးကျင့်ကြံခြင်း သရုပ်ဖော် စနစ်ကနေ တဆင့် သိခဲ့တာပင်။ ပြီးခဲ့တဲ့ တစ်ခေါက် မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်တုန်းက သူမဟာ နေပြည်တော်ထဲက ပုန်ကန်ထကြွမှုတို့ကို ကိုယ်တိုင် ကြုံတွေ့ခဲ့ရလေသည်။
ဘယ်မင်းသား၊ ဘယ်မင်းသမီး၊ ပြီးတော့ သူတို့ ဘယ်အချိန် သေဆုံးမလဲ ဆိုတာကိုတောင် သူမ ရှင်းရှင်းလင်းလင်း မှတ်မိနေခဲ့သည်။
ဒါပေါ့ သူမ စိတ်ထဲမှာပဲ တွေးနေဖို့ လိုတာပင်။
ချင်းကျောက် ပြောလိုက်သည်။ "ဒါက ယူဆချက်သက်သက်ပါပဲ... အကယ်၍ တစ်စုံတစ်ယောက်က တော်ဝင်မိသားစုဝင်တွေကို တိုက်ခိုက်ဖို့ ကြံစည်နေပြီး မဟာဝေ မင်းဆက်ရဲ့ တည်ငြိမ်မှုကို ဖျက်ဆီးချင်နေရင် သူတို့ရဲ့ ပူးပေါင်းကြံစည်မှုတွေကို ပျက်စီးသွားအောင်ကျွန်မတို့ ဘာလုပ်ရမလဲ"
အဘွားအို တိတ်ဆိတ်သွားခဲ့ပြီး ဒီကလေးမလေး ချင်းကျောက်က ထူးဆန်းတယ်လို့ သူမ အမြဲတမ်း ခံစားလိုက်ရသည်။
သူမ နားမလည်နိုင်တဲ့ အရာတွေကို ချင်းကျောက်ဟာ ရံဖန်ရံခါ ပြောတတ်ပြီး သူမရဲ့ အတွေးတွေကလည်း သာမန်နဲ့ မတူပေ။
အရေးအကြီးဆုံး အချက်က... ဒီကလေးမလေးက သိသာထင်ရှားစွာ မကြီးပြင်းသေးပေမယ့် သူမက အရာရာကို သိနေသလိုပင်။
အထူးသဖြင့် သူတို့ လူသူကင်းမဲ့တဲ့ ကျွန်းပေါ်က ကြေးဝါရောင် တံခါးကြီးကို ရှာဖွေနေတုန်းကပင်။
၎င်းက အဲဒီနေရာမှာ ကြီးမားတဲ့ ကြေးဝါရောင် တံခါးကြီး ရှိနေတာကို ချင်းကျောက်က ကြိုသိနေသလိုပင်။
အကယ်၍ ချင်းကျောက်ရဲ့ ရံဖန်ရံခါ ကလေးဆန်တဲ့ အပြုအမူတွေကြောင့်သာ မဟုတ်ရင် ချင်းကျောက်ကို မိစ္ဆာအိုကြီးတစ်ကောင် ဝင်ရောက်စီးနင်းထားတယ်လို့ အဘွားအို သံသယ ဝင်မိလောက်ပေသည်။
တိတ်ဆိတ်မှုက တစ်ခဏ ဖြစ်ပေါ်သွားခဲ့သည်။
လူတိုင်းမှာ ကိုယ်ပိုင် လျှို့ဝှက်ချက်တွေ ရှိကြရာ ချင်းကျောက်ဆီမှာ လျှို့ဝှက်ချက် အများကြီး ရှိမှန်း သူမသိရာ သူမ အဲဒီအကြောင်းတွေ မမေးခဲ့ချေ။
ဘာပဲဖြစ်ဖြစ် သူမဆီမှာလည်း သူမ မပြောနိုင်တဲ့ ကိုယ်ပိုင် လျှို့ဝှက်ချက်တွေ ရှိနေခဲ့တာပင်။
ဒါကို တွေးမိတော့ အဘွားအို သူမရင်ထဲက သံသယတွေကို ဖယ်ရှားလိုက်ပြီး ပြောလိုက်သည်။ "အကယ်၍ အဲဒီလို ကိစ္စမျိုး တကယ် ဖြစ်လာရင် မင်း ဝင်မပါဖို့ ငါ အကြံပြုချင်တယ်... မင်းရဲ့ ခွန်အားနဲ့ ဆိုရင် ဒီရှုပ်ထွေးမှုထဲ ဝင်ပါလိုက်တာနဲ့ မင်း ကိုယ့်ကိုယ်ကိုယ် သတ်သေလိုက်သလို ဖြစ်သွားလိမ့်မယ်"
"အကယ်၍ မင်းက အသတ်ခံရတော့မယ့် တော်ဝင် မျိုးဆက်တွေကို ကယ်တင်ချင်ရင် မင်းက အရင်ဆုံး သက်ဆိုင်ရာ သက်သေအထောက်အထားတွေကို ရှာဖွေရမယ်... မဟုတ်ရင် ဘယ်သူမှ မင်းကို ယုံမှာ မဟုတ်ဘူး.... ပြီးရင် မင်း အဲဒီ သက်သေအထောက်အထားကို အဲဒီလူတွေဆီ ပို့ပေးဖို့ နည်းလမ်း ရှာရမယ်"
"အဲဒီလူတွေ ဆိုတာက သေဆုံးတော့မယ့် တော်ဝင် မျိုးဆက်တွေ ဒါမှမဟုတ် မဟာဝေ မင်းဆက်ရဲ့ ဧကရာဇ်မင်းမြတ်ကို ရည်ညွှန်းတာပဲ"
"သူတို့ရဲ့ အာဏာနဲ့မှသာ မင်း နေပြည်တော်ထဲက မုန်တိုင်းကို ရပ်တန့်နိုင်မှာ"
ဒီအထိ ပြောပြီးတော့ အဓိပ္ပာယ်က သိပ်ရှင်းလင်းနေပေပြီ။
အကယ်၍ ချင်းကျောက်က ဒီလို ရှုပ်ထွေးတဲ့ အခြေအနေမျိုးမှာ ကြားဝင်စွက်ဖက်ချင်ရင် တစ်ခုတည်းသော နည်းလမ်းက ပိုသန်မာတဲ့ လူတစ်ယောက်ရဲ့ အာဏာကို ငှားရမ်းခြင်းပင်။
နောက်ဆုံးတော့ ဒီကျင့်ကြံခြင်း ကမ္ဘာမှာ ဘယ်သူ့ လက်သီးက အသန်မာဆုံးလဲ ဆိုတာပင်။
"ရှူး..."
ချင်းကျောက် ကြောင်တောင်တောင်နဲ့ ရေရွတ်လိုက်၏။ "သက်သေအထောက်အထား ရှာဖို့ ဆိုတာ ခက်ခဲလွန်းတယ် မဟုတ်လား"
"အကယ်၍ ကျွန်မတို့ သက်သေအထောက်အထား ရှာတွေ့ရင်တောင် ဧကရာဇ်မင်းမြတ်နဲ့ တစ်ကြိမ် တွေ့ဆုံဖို့ နည်းလမ်း ရှာရဦးမယ်... ဒါက ပိုတောင် ခက်ခဲသေးတယ်"
အဘွားအိုရဲ့ မှိန်ဖျဖျ အသံ ထွက်ပေါ်လာခဲ့သည်။"တကယ်တော့ ဧကရာဇ်မင်းမြတ်နဲ့ တွေ့ဆုံဖို့ နည်းလမ်း ရှာရတာ မခက်ခဲပါဘူး"
"ဟမ်...." ချင်းကျောက်ရဲ့ မျက်လုံးတွေ အရောင်တောက်လာခဲ့သည်။ "တကယ်လား"
အဘွားအို ပြောလိုက်သည်။"မင်းရဲ့ ရုပ်ရည်က အဲဒီ အလှပဂေးလေးတွေထက် မနိမ့်ကျပါဘူး... မင်းခန္ဓာကိုယ်ကို စွန့်လွှတ်လိုက်ရုံပါပဲ.....အဲဒီ ဧကရာဇ်တွေမှာ မယားငယ်တွေ အများကြီး ရှိတယ် ဆိုတော့ ဆိုလိုတာက သူတို့က ရာဂအပိုင်းမှာ..."
"... ရပ်လိုက်" ချင်းကျောက် ဆွံ့အသွားခဲ့ရသည်။
သာမန် အချိန်တွေမှာ လေးနက်တဲ့ အဘွားအိုချင်ဆီမှာ ဒီလို မိုက်မဲတဲ့ အကြံဉာဏ်မျိုး ရှိလိမ့်မယ်လို့ သူမ မျှော်လင့်မထားခဲ့ချေ။
ချင်းကျောက် ရေရွတ်လိုက်သည်။ "အသက်ရာပေါင်းများစွာ ရှင်သန်နေတဲ့ အဲဒီ အဘိုးကြီးတွေကို ကျွန်မ စိတ်မဝင်စားဘူး"
သူတို့ နှစ်ယောက် စကားပြောနေစဉ်မှာ သူတို့ဘေးနားမှာ လဲလျောင်းနေသည့် ဝှိုက်တီက ရုတ်တရက် ခေါင်းမော့လာခဲ့သည်။
၎င်းက သူ့ရဲ့ ခေါင်းကြီးကို အသုံးပြုပြီး ချင်းကျောက်ရဲ့ ခြေထောက်တွေကို တွန်းတိုက်ကာ သူမရဲ့ အာရုံစိုက်မှုကို ဆွဲဆောင်လိုက်သည်။။
ချင်းကျောက် ခေါင်းငုံ့ပြီး ဝှိုက်တီကို ကြည့်လိုက်ကာ အံ့သြစွာ မေးလိုက်၏။ "ဘာဖြစ်လို့လဲ...ဝှိုက်တီ"
ဒီအချိန်မှာ အဘွားအိုရဲ့ လေသံက ရုတ်တရက် လေးနက်သွားခဲ့သည်။ "ကောင်မလေး မဖိတ်ခေါ်ဘဲ ရောက်လာတဲ့ ဧည့်သည်တွေရှိတယ်..."
"ရွှေအမြုတေ အဆင့်ကျင့်ကြံသူ (၃) ယောက်နဲ့ အခြေတည်အဆင့်ကျင့်ကြံသူ (၁) ယောက်..."
"ပြီးတော့ သူတို့က ဒီနေရာကို ဖြတ်သွားတာ မဟုတ်ဘူး မင်းဆီ လာနေကြတာ"
ချင်းကျောက် မျက်လုံး ပြူးကျယ်သွားခဲ့သည်။
'ရွှေအမြုတေ အဆင့် ကျင့်ကြံသူ (၃) ယောက်...
အခြေတည်အဆင့် ကျင့်ကြံသူ (၁) ယောက်...'
'ဒါ မဖြစ်နိုင်ဘူး...'
သူမ နေပြည်တော်ထဲမှာ ဘာမှ မလုပ်ခဲ့ပေ။ ထို့အပြင် သူမရဲ့ သိုလှောင်အိတ်ထဲက ရတနာတွေကိုလည်း ထုတ်ဖော်မပြခဲ့သလို နေပြည်တော်ထဲက ဘယ်သူနဲ့မှလည်း မိတ်ဆွေ မဖွဲ့ခဲ့ချေ။ အခြေခံအားဖြင့် သူမ ရှောင်လွှဲလို့ ရသမျှ ပြဿနာ အားလုံးကို ရှောင်လွှဲခဲ့လေသည်။
ထို့ကြောင့် ဘယ်လိုလုပ် ကျင့်ကြံသူ အများကြီး သူမဆီ ရောက်လာနိုင်မည်နည်း။