အခန်း ၁၁၇ : ချင်းကျောက်ကို သွားတွေ့မယ်၊ စိတ်ဒဏ်ရာရနေသည့် ချန်ချန်ရွှယ်၏ သက်တော်စောင့် အဘွားအို
"ချင်းကျောက်..."
ချန်ချန်ရွှယ်ဟာ ဤအမည်ကို မြင်လိုက်ရသောအခါ သူမ၏ ပထမဆုံး တုံ့ပြန်မှုမှာ ရင်းနှီးသလို ခံစားလိုက်ရခြင်း ဖြစ်ပြီး ယခင်က မြင်ဖူးသကဲ့သို့ ခံစားလိုက်ရသည်။
သို့သော် ခဏတာမျှ သူမ ဤအမည်ကို မည်သည့်အချိန်က မြင်ဖူးသည်ကို မမှတ်မိနိုင်ပေ။
သူမ မသေမျိုးကျင့်ကြံခြင်း သရုပ်ဖော် စနစ်ထဲတွင် မြင်ဖူးခဲ့ခြင်းလော သို့မဟုတ် လက်တွေ့ကမ္ဘာထဲတွင် မြင်ဖူးခဲ့ခြင်းလော......
'ချင်းကျောက်......'
'ချင်း....
ချင်း......'
ချန်ချန်ရွှယ် ချက်ချင်း တုံ့ပြန်လိုက်မိပြီး တစ်စုံတစ်ရာကို သတိရသွားသည်။
လက်တွေ့ကမ္ဘာတွင် သူမဟာ ဂိုဏ်းပြိုင်ပွဲတစ်ခုတွင် ပါဝင်ခဲ့ဖူးလေသည်။
ဤသည်မှာ ဝိညာဉ်ဓားဂိုဏ်းအတွင်းမှ ပြိုင်ပွဲတစ်ခု မဟုတ်ပေ။ ၎င်းက မျိုးဆက်သစ် လူငယ်များ၏ ထူးချွန်သူများ ပါဝင်သည့် အခြား ဂိုဏ်းများနှင့် ယှဉ်ပြိုင်သည့် ပြိုင်ပွဲတစ်ခု ဖြစ်၏။
တကယ်တော့ ချန်ချန်ရွှယ်ဟာ ဤကဲ့သို့သော အဓိပ္ပာယ်မရှိသည့် ပြိုင်ပွဲမျိုးတွင် ပါဝင်ရန် သိပ်ဆန္ဒမရှိလှပေ။
ပထမ သို့မဟုတ် ဒုတိယ ရဖို့ တိုက်ခိုက်နေတာက... ဘာအသုံးဝင်မည်နည်း
ကျင့်ကြံခြင်းအပေါ် အာရုံစိုက်ထားတာက ပိုကောင်းပေသည်။
......
သို့သော် ထိုအချိန်တုန်းက သူမ၏ ဆရာလည်း ဖြစ်သည့် ဝိညာဉ်ဓားဂိုဏ်း၏ ဂိုဏ်းချုပ်က သူမ ပါဝင်ယှဉ်ပြိုင်ရန် အတင်းအကျပ် တိုက်တွန်းခဲ့သည်။
ထို့ကြောင့် အခြား ရွေးချယ်စရာ နည်းလမ်း မရှိတော့ပေ။
ချန်ချန်ရွှယ်ဟာ ထိုအချိန်က ဂိုဏ်းပေါင်းစုံ ပြိုင်ပွဲကြီးတွင် ပါဝင်ယှဉ်ပြိုင်ခဲ့ရပြီး ထို့နောက် သူမ၏ အရှိန်အဟုန်ကို မည်သူမျှ တားဆီး၍ မရနိုင်ခဲ့ပေ။
ထိုကဲ့သို့ပင် သူမဟာ သူမ၏ မျိုးဆက်တွင် နံပါတ်တစ် ဖြစ်လာခဲ့သည်။
ထိုအချိန်က အခြား ဂိုဏ်းများမှ ကောင်းကင်ဘုံ၏ ဂုဏ်ယူစရာများကြားတွင် သူမထက် (၂) နှစ် ငယ်သည့် မိန်းကလေးငယ် တစ်ဦး ပါဝင်ကြောင်း ချန်ချန်ရွှယ် မှတ်မိနေခဲ့သည်။ တစ်ဖက်လူမှာ ကျင်းရှင်း နန်းတော်သခင်၏ သမီးအငယ်ဆုံး ဖြစ်သည်။
တစ်ဖက်လူတွင် ထူးကဲသည့် ပါရမီနှင့် ခွန်အား ရှိကြောင်း သူမ ကြားသိခဲ့ရသည်။ ကျင်းရှင်း နန်းတော်၌ သူမနှင့် ရွယ်တူ ပြိုင်ဘက် မရှိပေ။
ချန်ချန်ရွှယ်ဟာ ကျင်းရှင်း နန်းတော်ကို ကောင်းကောင်း သိလေသည်။
၎င်းက တပည့်များ၏ အရည်အသွေးတွင် ထူးချွန်ပြောင်မြောက်ရန် ကြိုးပမ်းသည့် မသေမျိုးကျင့်ကြံခြင်း ဂိုဏ်းတစ်ခု ဖြစ်၏။
ကျင်းရှင်း နန်းတော်တွင် ရွယ်တူ ပြိုင်ဘက် မရှိသည့် အဆင့်သို့ ရောက်ရှိနိုင်ခြင်းက သူမအား အမှန်တကယ် လျှော့တွက်၍ မရနိုင်သော ပြိုင်ဘက် တစ်ဦး ဖြစ်ကြောင်း ဆိုလိုနေပေသည်။
ထို့နောက်... ချန်ချန်ရွှယ်ဟာ သူမကို (၁၀) ကွက်အတွင်း အနိုင်ယူနိုင်ခဲ့သည်။
ထိုအချိန်တုန်းက သူမဟာ ကိုယ့်ကိုယ်ကိုယ် မထိန်းချုပ်နိုင်လိုက်ဘဲ မတော်တဆ သူမ၏ ဓားဖြင့် ပြိုင်ဘက်၏ ဆံပင်ကို တစ်ဝက်တိတိ ဖြတ်လိုက်မိသည်။
ချန်ချန်ရွှယ် မှတ်မိနေသေးလေသည်... သူမ၏ ပြိုင်ဘက်က ငိုလုနီးပါး ဖြစ်သွားခဲ့ရသည်။
ထိုလူကိုလည်း ချင်းကျောက် ဟု ခေါ်ဆိုလေသည်။
သူမတို့ နှစ်ဦးကြားတွင် မည်သည့် ဆက်နွယ်မှုမှ မရှိသင့်ကြောင်း ချန်ချန်ရွှယ်၏ မသိစိတ်က သူမကို ပြောပြနေခဲ့သည်။
သူတို့၏ အမည်များ အတိအကျ တူညီနေသော်လည်း ဤသည်မှာ မသေမျိုးကျင့်ကြံခြင်း သရုပ်ဖော် စနစ် ဖြစ်သည် မဟုတ်ပါလော။
ဤသာရုပ်ဖော် စနစ်ထဲသို့ သူမ တစ်ဦးတည်းသာ ဝင်ရောက်နိုင်လေသည်။
'နေပါဦး..'
ဤသရုပ်ဖော် စနစ်ထဲသို့ သူမ တစ်ဦးတည်းသာ ဝင်ရောက်နိုင်ကြောင်း ဖော်ပြထားသည့် မည်သည့် စည်းမျဉ်းစည်းကမ်းမျှ မရှိကြောင်း ချန်ချန်ရွှယ် ရုတ်တရက် သဘောပေါက်သွားခဲ့သည်။
ဤအတွေး ပေါ်လာသောအခါ နွေဦးရာသီမှ ပေါင်းပင်များကဲ့သို့ သူမ မည်မျှပင် ကြိုးစားပြီး ဖယ်ရှားပစ်ပါစေ ဖယ်ရှား၍ မရနိုင်ပေ။
သူတို့က အမြဲတမ်း ပြန်လည် ပေါ်ပေါက်လာနေပေလိမ့်မည်။
'ငါ သူမကို သွားတွေ့သင့်လား။'
အခြား အတွေးတစ်ခု ပေါ်လာပြီး ချန်ချန်ရွှယ် နက်ရှိုင်းစွာ စဉ်းစားခန်း ဝင်သွားခဲ့သည်။
မကြာမီ သူမဟာ ပို၍ပင် ပြတ်သားလာပြီး သူမစိတ်ထဲမှ အတွေးမှာ - 'သူမကို သွားတွေ့ကြတာပေါ့'
ဒါပေါ့ တစ်ဖက်လူက လူကောင်း မဟုတ်နိုင်သည့် ဖြစ်နိုင်ချေ အချို့တော့ ရှိနေလေသည်။
ဘာပဲဖြစ်ဖြစ် အကယ်၍ သူမသာ စာရင်းသွင်း မှတ်တမ်းတင်ခံရပါက သေချာပေါက် သံသယဖြစ်ဖွယ် အချက်အလက်အချို့ ရှိနေပေလိမ့်မည်။
အကယ်၍ တစ်ဖက်လူက လက်တွေ့ကမ္ဘာမှ ချင်းကျောက်နှင့် မည်သို့မျှ မသက်ဆိုင်ဘဲ နောက်ကွယ်က ကြိုးကိုင်သူ၏ နယ်ရုပ်တစ်ခု ဖြစ်နေပါက ပိုအန္တရာယ် များပေလိမ့်မည်။
ကံကောင်းစွာဖြင့် မဟာဝေ ဧကရာဇ်မင်းမြတ် ချန်ဖုန်းယင်ဟာ သူမ အမှန်အတိုင်း ပြောပြလိုက်သောအခါ သူမအတွက် နောက်ထပ် အစောင့်အနည်းငယ်ကို အထူး စီစဉ်ပေးခဲ့သည်။
ယခင်က အဘွားအိုသည်လည်း သူတို့အထဲတွင် ပါဝင်လေသည်။
"စီနီယာတို့..." ချန်ချန်ရွှယ်သည် တစ်ကိုယ်တည်း ရှိနေသကဲ့သို့ ပြောလိုက်သည်။"ကျွန်မ ဒီလူကို သွားတွေ့ဖို့ နန်းတော်ထဲကနေ ခရီးတစ်ခေါက် ထွက်ချင်ပါတယ်...ရှင်တို့ ကျွန်မနောက် လိုက်ခဲ့လို့ ရပါတယ်"
ရုတ်တရက် သရဲတစ္ဆေကဲ့သို့ ပုံရိပ်တစ်ခု အရိပ်ထဲမှ ထွက်ပေါ်လာခဲ့သည်။
ဤလူက ချန်ချန်ရွှယ်နှင့်အတူ ကောင်းကင်အကျဉ်းထောင်သို့ မကြာခဏ သွားရောက်လေ့ရှိသည့် အဘွားအိုပင်။
မဟာဝေ ဧကရာဇ်မင်းမြတ် အဘွားအိုအား ပေးထားသည့် တာဝန်မှာ မင်းသမီး၏ လုံခြုံရေးကို ကာကွယ်ပေးခြင်း အပြင် မင်းသမီး၏ အလုပ်များကို ကူညီဆောင်ရွက်ပေးရန် ဖြစ်၏။
၎င်းက ချန်ချန်ရွှယ်အတွက် ရွှေအမြုတေ အဆင့် ဒုတိယ တာဝန်ခံတစ်ဦး စီစဉ်ပေးလိုက်ခြင်းနှင့် အတူတူပင် ဖြစ်လေသည်။
ဤသည်မှာ ကျောထောက်နောက်ခံ ရှိခြင်း၏ အကျိုးကျေးဇူးပင် ဖြစ်ပေသည်။
ရွှေအမြုတေ အဆင့် ကိုယ်ရံတော်နှင့် ဒုတိယ တာဝန်ခံ တစ်ဦးကို ပေါ့ပေါ့ပါးပါး စီစဉ်ပေးနိုင်လေသည်။
ရွှေအမြုတေ အဆင့် ကျင့်ကြံသူ တစ်ဦးက သေးငယ်သည့် ကျင့်ကြံခြင်း ဂိုဏ်းများ၏ ဂိုဏ်းချုပ်များ ဖြစ်လာရန် လုံလောက်သည့် အခွင့်အာဏာ ရှိပေသည်။
ထို့အပြင် အဘွားအိုက အပေါ်ယံတွင်သာ အကာအကွယ်ပေးသူ ဖြစ်ပြီး အမှောင်ထဲတွင် ချန်ချန်ရွှယ်ကို ကာကွယ်ပေးနေသည့် လူအနည်းငယ် ရှိနေသေး၏။
ချန်ချန်ရွှယ်ကို ကာကွယ်ပေးနေသည့် လူများက မဟာဝေ မင်းဆက်၏ အခြားမင်းသား၊မင်းသမီးများ အားလုံးအနက် အမှန်တကယ် ချဲ့ကားလွန်းသည်ဟု ဆိုနိုင်ပေသည်။
ဘာပဲဖြစ်ဖြစ် ချန်ဖုန်းယင်၏ နှလုံးသားထဲတွင် သူမ၏ နေရာက အခြားမင်းသား၊မင်းသမီးတွေနှင့် လုံးဝ ကွဲပြားသည် မဟုတ်ပါလော။
ချန်ဖုန်းယင်ဟာ သူ့ရှေ့တွင် ချန်ချန်ရွှယ် ပြောသမျှ အရာအားလုံးကို အလေးအနက် ထားခဲ့သည်။
ဤအချိန်တွင် အဘွားအိုက စာရင်းပေါ်ရှိ အမည်ကို ကြည့်ပြီး စူးစမ်းချင်စိတ်ဖြင့် မေးလိုက်၏။ "မင်းသမီး ဒီလူက ပစ်မှတ်လား"
ချန်ချန်ရွှယ် ခေါင်းခါလိုက်သည်။ "လောလောဆယ် ကျွန်မလည်း သိပ်မသေချာဘူး... သွားကြည့်ချင်ရုံ သက်သက်ပါ"
"ဒါက..." အဘွားအိုက ဤအရာမှာ အလွန် အန္တရာယ်များသည်ဟု ခံစားလိုက်ရ၏။
အရှင်မင်းမြတ်က မင်းသမီး ချန်နင်း၏ လုံခြုံရေးကို သေချာစေရန်နှင့် မင်းသမီးအား မည်သည့် အန္တရာယ်ရှိသော အခြေအနေမျိုးနှင့်မျှ မပတ်သက်စေရန် သူမအား မှာကြားထားခဲ့သည်။
ယခု မင်းသမီးက စာရင်းပေါ်တွင် မှတ်တမ်းတင်ထားသော လူတစ်ဦးနှင့် တွေ့ဆုံရန် နန်းတော်မှ ထွက်ခွာလိုနေခဲ့သည်။
ထို့အပြင် ထိုလူက မည်သည့် ကိုယ်ပိုင်အမှတ်အသားကို ဖုံးကွယ်ထားသည်ကို သူမ မသိပေ။ ထိုလူ၏ ကျင့်ကြံမှု အစစ်အမှန်က ဘာလဲ ဆိုတာလည်း သူမ မသိပေ။
ဤသည်မှာ မလုံခြုံပေ။
အကယ်၍ တစ်ဖက်လူက ယုတ်မာသောလူတစ်ဦး ဖြစ်နေပါက မင်းသမီးကို အန္တရာယ် ဖြစ်စေနိုင်သည် မဟုတ်ပါလော။
သို့သော် ချန်ချန်ရွှယ် ပြတ်သားစွာ ပြောလိုက်သည်။ "ကျွန်မ သူမကို သွားတွေ့ပြီး အရာတချို့ကို အတည်ပြုဖို့ လိုတယ်"
"... ကောင်းပါပြီ" အဘွားအို နောက်ဆုံးတွင် ခေါင်းငြိမ့်လိုက်သည်။
သူမ လုပ်နိုင်သည့် အရာ မရှိသလို မင်းသမီးကို ပြန်လည် ငြင်းဆန်ရဲခြင်းလည်း မရှိပေ။
သူတို့၏ ကျင့်ကြံမှု အဆင့်များ အလွန် ကွာခြားပြီး အသက်အရွယ် ကွာခြားချက်မှာလည်း ရယ်စရာကောင်းလောက်အောင် ကြီးမားသော်လည်း ချန်ချန်ရွှယ်၏ အတိတ်က လုပ်ရပ်များက အဘွားအို၏ နှလုံးသားထဲတွင် စိတ်ပိုင်းဆိုင်ရာ အမာရွတ်တစ်ခုအား ကြာမြင့်စွာကတည်းက ချန်ထားခဲ့ပြီး ဖြစ်လေသည်။
ကောင်းကင်အကျဉ်းထောင်ထဲမှ ထိုမိစ္ဆာများ မသေဆုံးမီ မည်သို့သော သနားစရာ အခြေအနေမျိုး ဖြစ်ခဲ့သည်ကို အဘွားအို အလွန် ရှင်းလင်းစွာ မှတ်မိနေခဲ့သည်။
သူမ ပြန်တွေးမိတိုင်း... တုန်လှုပ်နေရတုန်းပင်.....
ကောင်းကင်အကျဉ်းထောင်ထဲတွင် မင်းသမီး ချန်နင်းဟာ မိစ္ဆာအားလုံး၏ အိမ်မက်ဆိုး အဖြစ်သို့ ပြောင်းလဲသွားခဲ့ပေပြီ။ မင်းသမီး ချန်နင်း ကောင်းကင်အကျဉ်းထောင်သို့ လာရောက်သည်နှင့် ထိုနေ့တွင် မသိရသော နည်းလမ်းပေါင်းစုံဖြင့် သေဆုံးရမည့် မိစ္ဆာ (၁၀) ကောင်ကျော် သေချာပေါက် ရှိနေမည် ဖြစ်ကြောင်း ကောင်းကင်အကျဉ်းထောင်ထဲမှ မိစ္ဆာတိုင်း သိရှိထားကြလေသည်။