အခန်း ၁၁၃ : ပိုင်ယီဆီမှ သတင်းအချက်အလက်၊ ကောင်းကင်အကျဥ်းထောင်သို့ ဒုတိယအကြိမ်
အဘယ်ကြောင့်ဆိုသော်...
ပိရွှီပြောခဲ့သည့် ကျင့်ကြံသူ ပိုင်မှာ ဆံပင်ဖြူနှင့်လေလွှင့်ကျင့်ကြံသူအဘိုးအို တစ်ဦး မဟုတ်ဘဲ...
လူငယ်လေး တစ်ဦး ဖြစ်နေသောကြောင့် ဖြစ်၏။
သူက သူမနှင့် ရွယ်တူခန့် ရှိမည့်ပုံ ပေါက်နေပေသည်။
ထို့အပြင်...ဖူရွှမ်နီဟာ ပိုင်ယီ၏ ကျင့်ကြံမှုကို ထိုးဖောက်မမြင်နိုင်ကြောင်းသိလိုက်ရသောအခါ သူမ၏ နှလုံးက အနည်းငယ် တုန်လှုပ်သွားလေသည်။
ကြည့်ရသည်မှာ သူမဟာ မည်သူ့ကိုမျှ လျှော့မတွက်သင့်ပုံပင်။
ချင်းဟယ် ခရိုင်ကဲ့သို့သော နေရာမျိုးတွင်ပင် ဤမျှ ကျင့်ကြံမှုမျိုး ရှိသည့် မသေမျိုးကျင့်ကြံသူများ ရှိနေသည် မဟုတ်ပါလော။
တကယ့်ကို တုန်လှုပ်ဖွယ်ရာပင်။
တိုတောင်းသော တစ်ခဏအတွင်း အတွေးပေါင်း ထောင်သောင်းချီ၍ သူမ၏ စိတ်ထဲတွင် ဖြတ်သန်းသွားခဲ့သည်။
ဖူရွှမ်နီသည် ဦးညွှတ်လိုက်ပြီး ပြောလေသည်။"အနှောင့်အယှက် ပေးမိတဲ့အတွက် တောင်းပန်ပါတယ် ကျင့်ကြံသူ ပိုင်...ကျွန်မက မဟာယန် မင်းဆက်ရဲ့ မြို့တော်က လာတာပါ ပြီးတော့ နန်းတော်က အရာရှိ တစ်ယောက်ပါ... ချင်းဟယ် ခရိုင်မှာ မိစ္ဆာကျင့်ကြံသူတွေ ရှိနေတယ်လို့ ကြားသိရတဲ့အတွက် ဒီကိစ္စကို စုံစမ်းစစ်ဆေးဖို့ ရောက်လာတာပါ"
"ချင်းဟယ် ခရိုင်ထဲမှာ ပုန်းအောင်းနေတဲ့ မိစ္ဆာကျင့်ကြံသူတွေကို နှိမ်နင်းခဲ့တာ ကျင့်ကြံသူပိုင်လို့ ခရိုင်ရုံးကနေ တဆင့် ကြားသိရပါတယ်... ကျွန်မ သိချင်တာက... အဲဒီ မိစ္ဆာကျင့်ကြံသူတွေနဲ့ ပတ်သက်ပြီး ကျင့်ကြံသူ ပိုင် ဘယ်လောက်အထိ သိထားပါသလဲ"
ဖူရွှမ်နီဟာ မြင့်မြတ်သောနှလုံးသား နန်းတော်မှ မိစ္ဆာကျင့်ကြံသူများအကြောင်း သတင်းအချက်အလက် ပိုမို ကြားသိလိုသောကြောင့် ပိုင်ယီကို လာရောက် တွေ့ဆုံခြင်း ဖြစ်၏။
......
ဘာပဲဖြစ်ဖြစ် သူမဟာ မိစ္ဆာကျင့်ကြံသူများ၏ ပူးပေါင်းကြံစည်မှုကို စုံစမ်းစစ်ဆေးရန် ဤနေရာသို့ ရောက်လာခြင်း ဖြစ်သည် မဟုတ်ပါလော။
အထူးသဖြင့် ချင်းဟယ် ခရိုင်သို့ ရောက်ရှိလာပြီးနောက် မိစ္ဆာကျင့်ကြံသူများက ခရိုင်ရုံးကို ထိန်းချုပ်လိုကြောင်း သူမ တွေ့ရှိခဲ့ရသည်။
မြင့်မြတ်သောနှလုံးသား နန်းတော်မှ မိစ္ဆာကျင့်ကြံသူများ၏ ရည်ရွယ်ချက်မှာ အလွန် မသန့်ရှင်းကြောင်း ဖူရွှမ်နီ ခံစားလိုက်ရသည်။ သူတို့က သေချာပေါက် ကြီးမားသည့် အရာတစ်ခုခုကို ကြံစည်နေကြခြင်း ဖြစ်ပေမည်။
ပိုင်ယီဘက်တွင်မူ ဖူရွှမ်နီ၏ မေးခွန်းကို ကြားသောအခါ သူ အနည်းငယ် စိတ်လှုပ်ရှားသွားလေသည်။
ဖူရွှမ်နီ သူ့ကို လာရောက် ရှာဖွေလိမ့်မည်ဟု သူ မျှော်လင့်ထားပြီးသား ဖြစ်သော်လည်း ဤမျှ မြန်ဆန်လိမ့်မည်ဟု မျှော်လင့်မထားခဲ့ပေ။
သို့သော် အပေါ်ယံတွင်မူ ပိုင်ယီဟာ မည်သည့် ခံစားချက်ကိုမျှ ထုတ်ဖော်မပြခဲ့ပေ။
သူ ပြန်ဖြေလိုက်၏။ "အဲဒီ မိစ္ဆာကျင့်ကြံသူတွေ အကြောင်း ကျွန်တော် နက်နက်ရှိုင်းရှိုင်း နားမလည်ပါဘူး။ ဒါပေမဲ့..."
သူ့လေသံ ပြောင်းလဲသွားပြီး ဆက်ပြောလေသည် ။"နောက်ဆုံး အခြေတည်အဆင့် မိစ္ဆာကျင့်ကြံသူ နောက်ကို ကျွန်တော် လိုက်ဖမ်းတုန်းက မီတာ ရာပေါင်းများစွာ အကွာမှာ ရှိနေပေမယ့် သူ ကိုယ့်ကိုယ်ကိုယ် ရေရွတ်နေတာကို ကျွန်တော် ကြားခဲ့ရပါတယ်. သူ သေရင်တောင် အကြီးအကဲ စီတူပေးထားတဲ့ တာဝန်ကို ပြီးမြောက်အောင် လုပ်ရမယ်တဲ့"
"အဲဒီ မိစ္ဆာကျင့်ကြံသူက ဒီလောက် တိုးညှင်းတဲ့ အသံနဲ့ ကိုယ့်ကိုယ်ကိုယ် ရေရွတ်နေတာကို ကျွန်တော် မကြားနိုင်ဘူးလို့ ထင်ကောင်း ထင်ခဲ့မှာပါ... ဒါပေမဲ့ တကယ်တော့ ကျွန်တော့်ရဲ့ အကြားအာရုံက သာမန်ကျင့်ကြံသူတွေနဲ့ နည်းနည်း ကွဲပြားပါတယ်"
"အဲဒါကလွဲရင် တခြား ဘာမှ မရှိတော့ပါဘူး"
တစ်နည်းအားဖြင့် ပိုင်ယီ၏ အာရုံခံစားမှု (၅) မျိုးက အဆင့်တူ ကျင့်ကြံသူများထက် ပိုမို စွမ်းအားကြီးမားနေခြင်း ဖြစ်လေသည်။
သူဟာ သရုပ်ဖော် စနစ်ထံမှ ဤမျှ များပြားသော ဆုလာဘ်များကို အလကား ရရှိခဲ့ခြင်း မဟုတ်ပေ။
သူ ဤစကားကို ပြောလိုက်သောအခါ လူတိုင်း၏ မျက်လုံးများ ပြူးကျယ်သွားခဲ့ကြသည်။
ဖူရွှမ်နီ အပါအဝင် ဖြစ်ပြီး သူမလည်း တုန်လှုပ်သွားခဲ့လေသည်။
သူတို့အတွက်မူ… အကယ်၍ ပိုင်ယီ ပြောသည့် စကားသာ မှန်ကန်ပါက ၎င်းက သေချာပေါက် ကြီးမားသော သတင်းအချက်အလက် တစ်ခုပင် ဖြစ်၏။
အကြီးအကဲ စီတူ...
တာဝန်....
ဤသော့ချက် စကားလုံးနှစ်ခုကို လစ်လျူရှုရန် ခက်ခဲလှပေသည်။
ပြဿနာမှာ ပို၍ပင် လေးနက်ကြောင်း ဖူရွှမ်နီ သိရှိလိုက်ရပြီး သူမ၏ ခန့်မှန်းချက် မှန်ကန်ကြောင်းလည်း သိလိုက်ရသည်။
မြင့်မြတ်သောနှလုံးသား နန်းတော်က ချင်းဟယ် ခရိုင်ရုံးထဲသို့ စိမ့်ဝင်လိုနေကြပြီး ၎င်းနောက်ကွယ်၌ ပိုကြီးမားသည့် ပူးပေါင်းကြံစည်မှု တစ်ခု ရှိနေလေသည်။
ချင်းဟယ် ခရိုင်တွင် ကြီးမားသည့် ပူးပေါင်းကြံစည်မှု တစ်ခု ရှိနေပြီး ၎င်းက အလွန် အရေးကြီးသော အခန်းကဏ္ဍမှ ပါဝင်နေခဲ့သည်။
နန်းတော်၏ တိုက်ခိုက်မှုအောက်တွင် မြင့်မြတ်သောနှလုံးသား နန်းတော်၌ မိစ္ဆာကျင့်ကြံသူ အနည်းငယ်သာ ကျန်ရှိတော့သည် မဟုတ်ပါလော။
တစ်ဖက်လူက မိစ္ဆာကျင့်ကြံသူ အများအပြားကို ချင်းဟယ် ခရိုင်သို့ စေလွှတ်ခဲ့ပြီး သူတို့ထဲမှ တစ်ဦးက အခြေတည်အဆင့်တွင်ပင် ရှိနေခဲ့သည်။
ဆိုလိုသည်မှာ ချင်းဟယ် ခရိုင်က သူတို့၏ အစီအစဉ်အတွက် အရေးကြီးသည့် အစိတ်အပိုင်း တစ်ခု ဖြစ်နေခြင်းပင်။
ဖူရွှမ်နီဟာ သူမ၏ စိတ်ထဲတွင် လျင်မြန်စွာ ခွဲခြမ်းစိတ်ဖြာလိုက်၏။
သို့သော် ပူးပေါင်းကြံစည်မှု အတိအကျက ဘာလဲဆိုတာကို ခွဲခြမ်းစိတ်ဖြာရန် အလွန် ခက်ခဲလှသည်။
ဖူရွှမ်နီ အသက်ပြင်းပြင်း တစ်ချက် ရှူလိုက်၏။
သူမ ကျေးဇူးတင်စွာ ပြောလိုက်သည်။ "ကျေးဇူးတင်ပါတယ် ကျင့်ကြံသူ ပိုင်... အကယ်၍ ကျင့်ကြံသူ ပိုင် အနေနဲ့ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ အကြောင်း နောက်ထပ် သတင်းအချက်အလက်တွေ ရှာတွေ့ခဲ့ရင် ကျေးဇူးပြုပြီး ကျွန်မတို့ကို ချက်ချင်း အကြောင်းကြားပေးပါ... ရှင့်ကို ရက်ရက်ရောရော ဆုချပါ့မယ်"
'ရက်ရက်ရောရော ဆုချမယ်...'
ပိုင်ယီ၏ ခံစားချက်များ အနည်းငယ် ထူးဆန်းသွားခဲ့သည်။ မဟာယန် မင်းဆက်၏ မင်းသမီးက ငွေပြတ်နေပြီဖြစ်ကြောင်း သူ ကောင်းကောင်း သိလေသည်။
ဖူရွှမ်နီ၏ သိုလှောင်အိတ်များက လူသားရုပ်သေး၏ လက်ထဲတွင် ရောက်ရှိနေပြီဖြစ်ပြီး ပိုင်ယီဟာ လူသားရုပ်သေးကို စေခိုင်းပြီး သိုလှောင်အိတ် အားလုံးကို မနေ့ညက သူ့ထံ ပို့ခိုင်းလိုက်ပြီ ဖြစ်၏။
'ဝါး.. ဒီကောင်မလေးက ငါ့ကို အမြတ်ထုတ်ဖို့ ကြိုးစားနေတာလား...'
မဟုတ်သေးခေိ။
သူမ ငွေပြတ်နေပြီဟု ပြောခြင်းက အနည်းငယ် လွန်လွန်းရာ ကျပေလိမ့်မည်။ ဖူရွှမ်နီထံတွင် ကောင်းမွန်သော အရာအချို့ ရှိနေသေးပေသည်။
အဲဒါကတော့… သူမ ရရှိခဲ့သည့် လမင်းကျီးကန်း အမွေးအတောင်များပင် ဖြစ်၏။
သို့သော် ပိုင်ယီက သူမကို ဖော်ထုတ်ခြင်း မပြုခဲ့ပဲ ထိုအစား ပြုံး၍ ခေါင်းငြိမ့်လိုက်သည်။"ပြဿနာ မရှိပါဘူး"
ဖူရွှမ်နီဟာတော့ အလျင်စလို ရောက်လာခဲ့ပြီး အလျင်စလိုပင် ပြန်လည် ထွက်ခွာသွားခဲ့သည်။
ဖြစ်နိုင်သည်မှာ သူမဟာ ပိုင်ယီ ပေးလိုက်သည့် အရေးကြီးသည့် သတင်းအချက်အလက် တစ်ခုအပေါ် အခြေခံပြီး မြင့်မြတ်သောနှလုံးသားနန်းတော်မှ မိစ္ဆာကျင့်ကြံသူ၏ ပူးပေါင်းကြံစည်မှုကို ဆက်လက် စုံစမ်းစစ်ဆေးလိုခြင်း ဖြစ်ပေလိမ့်မည်။
…
နေ့လည်ခင်း အချိန်သို့ ရောက်သောအခါ...
ရွေးချယ်ခံအမှတ် (၁) နှင့် (၂) အတွက် အချိန်စောင့်ဆိုင်းရခြင်းက ပြီးဆုံးသွားခဲ့သည်။
ချန်ချန်ရွှယ်ဖြစ်စေ၊ ချင်းကျောက်ဖြစ်စေ၊ သူတို့နှစ်ဦးစလုံးဟာ သူတို့တွင် နောက်ထပ် လုပ်ဖော်ကိုင်ဖက် တစ်ဦး ရှိနေကြောင်း မသိရှိကြသေးပေ။
ဤအချိန်တွင်...
ဝိညာဉ်ဓားဂိုဏ်းနှင့် နီးကပ်သော မြို့တစ်မြို့တွင် ချန်ချန်ရွှယ်ဟာ အချိန်စောင့်ဆိုင်းရခြင်း ပြီးဆုံးသွားသည်ကို မြင်လိုက်ရပြီး တွန့်ဆုတ်ခြင်း မရှိဘဲ မသေမျိုးကျင့်ကြံခြင်း သရုပ်ဖော် စနစ်ထဲသို့ ဝင်ရောက်လိုက်သည်။ သူမဟာ ကောင်းကင်အကျဉ်းထောင်မှ မိစ္ဆာများကို အရေးတကြီး လိုအပ်နေပေသည်။
ချန်ချန်ရွှယ်၏ ရည်မှန်းချက်မှာလည်း အလွန် ရိုးရှင်းပေသည်။ ၎င်းမှာ မပြည့်စုံသည့် ကောင်းကင်ဝါးမျိုးခြင်း မိစ္ဆာ နည်းစနစ်၏ အပိုင်းအစများကို စုဆောင်းရန်ပင် ဖြစ်သည်။
ထိုမှတဆင့် သူမဟာ မပြည့်စုံသော ကောင်းကင်ဝါးမျိုးခြင်း မိစ္ဆာ နည်းစနစ် အစစ်အမှန်ကို ရရှိပေလိမ့်မည်။
[အသက် ၁၂ နှစ် - သင် မသေမျိုးကျင့်ကြံခြင်း ကမ္ဘာထဲ ပြန်လည်ဝင်စားခဲ့ပြီး သင့်ဝိညာဉ်က မဟာဝေ မင်းဆက်၏ မင်းသမီး ချန်နင်း၏ ခန္ဓာကိုယ်ထဲသို့ ကူးပြောင်းရောက်ရှိသွားခဲ့သည်။ ဖြစ်နိုင်သည်မှာ သင့်ဝိညာဉ် ကူးပြောင်းရောက်ရှိလာမှုကြောင့် မင်းသမီး ချန်နင်း၏ ခန္ဓာကိုယ်ပေါ်မှ ထူးဆန်းသော ရောဂါ ပျောက်ကင်းသွားခဲ့သည်။ မဟာဝေ ဧကရာဇ်မင်းမြတ် အလွန် ပျော်ရွှင်သွားပြီး နန်းတွင်းသမားတော်တစ်စုကို ရက်ရက်ရောရော ဆုချခဲ့သည်။]
[အသက် ၁၅ နှစ် - သင်ဟာ သင့်ကို အဆိပ်ခတ်လိုသူများကို ထောင်ထဲသို့ တစ်ယောက်ပြီး တစ်ယောက် ပို့ဆောင်ရန် နည်းလမ်းများကို အသုံးပြုခဲ့သည်။ သူတို့၏ ခေါင်းများ မြေကြီးပေါ်သို့ တစ်လုံးပြီး တစ်လုံး ပြုတ်ကျသွားသည်ကို သင် မြင်လိုက်ရသောအခါ ပျော်ရွှင်ခြင်း မရှိခဲ့ပေ။ အဘယ်ကြောင့်ဆိုသော် သင် ဤအရာများနှင့် ယဉ်ပါးနေပြီ ဖြစ်သောကြောင့် ဖြစ်၏။]
[အသက် ၁၇ နှစ် - ချင်းမိသားစုဝင် တစ်ထောင်ကျော် တစ်ညတည်းနှင့် ပျောက်ဆုံးသွားသော သတင်းကို သင် ရရှိခဲ့ပြန်သည်။]
[အသက် ၂၀ နှစ် - နည်းလမ်း အများအပြားကို အသုံးပြုပြီး သင်ဟာ သင့်မောင်တော်နှင့် ညီမတော်တို့ကို မသိမသာ ကယ်တင်ခဲ့သည်။]
[အသက် ၂၁ နှစ် - သင်ဟာ မြင့်မြတ်သော သခင်မ ၏ အေးစက်သော သိက္ခာကို ဘေးဖယ်ထားလိုက်ပြီး သင့်အား ကောင်းကင်အကျဉ်းထောင်ထဲသို့ ဝင်ရောက်ခွင့်ပြုရန် မဟာဝေ ဧကရာဇ်မင်းမြတ်အား ချွဲနွဲ့ခဲ့သည်။]
[မဟာဝေ ဧကရာဇ်မင်းမြတ်ဟာလည်း သင့်ကို မလွန်ဆန်နိုင်သဖြင့် သဘောတူလိုက်ရသည်။]
[သူက သင့်ကို ကာကွယ်ရန် အဘွားအို တစ်ဦးကိုလည်း စေလွှတ်ပေးခဲ့သည်။]
မဟာဝေ အင်ပါယာ...
နန်းတော်...
ကောင်းကင်အကျဉ်းထောင် အပြင်ဘက်....
ခံတပ်ကြီးတစ်ခုကဲ့သို့ ဖြစ်နေသည့် သူမရှေ့မှ ကြီးမားသည့် အဆောက်အဦးကို ကြည့်လိုက်ရာ အတွင်းဘက်ရှိ သိပ်သည်းသော သတ်ဖြတ်ခြင်း ရည်ရွယ်ချက်ကို သူမ ခံစားလိုက်ရသည်။
ချန်ချန်ရွှယ်ဟာ အပြုံးတစ်ခု ထုတ်ဖော်လိုက်ပြီး အနည်းငယ်မျှ စိုးရိမ်စိတ် မရှိပေ။
"မိစ္ဆာတွေ... ငါ နောက်တစ်ကြိမ် ရောက်လာပြီး"
ဤအချိန်တွင် ချန်ချန်ရွှယ်၏ နောက်တွင် မဟာဝေ ဧကရာဇ်မင်းမြတ် စေလွှတ်လိုက်သော အဘွားအိုက သူမကို ပြောလိုက်သည်။ "မင်းသမီး ကောင်းကင်အကျဉ်းထောင်ထဲမှာ ထောင်ချောက်တွေနဲ့ သတ်ဖြတ်ခြင်း ဖွဲ့စည်းပုံတွေ အများကြီး ရှိပါတယ်.... ထောင်ချောက်တွေနဲ့ သတ်ဖြတ်ခြင်း ဖွဲ့စည်းပုံတွေ အသက်မဝင်စေဖို့ ကျွန်မဘေးကနေ ထပ်ကြပ်မကွာ လိုက်ခဲ့ပေးပါ"
"ကောင်းပါပြီ"
ချန်ချန်ရွှယ် ခေါင်းငြိမ့်ပြီး ပြုံးလိုက်၏။"ကျေးဇူးတင်ပါတယ်... စီနီယာ"
"..."
...