အခန်း ၁၁၁ : ဖူရွှမ်နီ၏ ဆုလာဘ်တွက်ချက်မှု
ဖူရွှမ်နီသည် သူမ၏ ပေါ့ဆမှုအတွက် ဆင်ခြေရှာနေမည် မဟုတ်ပေ။
ဤသည်မှာ သူမ၏ ပေါ့ဆမှုနှင့် သတိမမူမိမှုတို့ကြောင့် ထိုရွှေအမြုတေ မိစ္ဆာသားရဲ၏ လှည့်စားမှုကို ခံလိုက်ရခြင်း ဖြစ်၏။
တစ်ချိန်တည်းမှာပင် သူမဟာ မိစ္ဆာသားရဲများအကြောင်း များများစားစား မသိရှိခဲ့ပေ။ အကယ်၍ သူမသာ မိစ္ဆာသားရဲများအကြောင်း အထူးပြု လေ့လာခဲ့ပါက တစ်ခုခုကို သတိပြုမိလောက်ပေသည်။
နောက်ဆုံးတော့ သူမဟာ မသေမျိုးကျင့်ကြံခြင်း သရုပ်ဖော် စနစ်ထဲတွင် အလွန် စောစီးစွာ သေဆုံးသွားခဲ့ရသည်...
ဤအရာအားလုံးသည် သူမကြောင့်ပင် ဖြစ်ပြီး ပြင်ပ အကြောင်းတရားများနှင့် မည်သို့မျှ မသက်ဆိုင်ပေ။
…
တစ်ချိန်တည်းမှာပင် ပိုင်ယီဘက်တွင်...
[သင် ဖိတ်ခေါ်ခဲ့သည့် ဖူရွှမ်နီဟာ သူမ၏ ပထမဆုံး မသေမျိုးကျင့်ကြံခြင်း သရုပ်ဖော် ဘဝတွင် (၁၃) နှစ်၊ (၆) လ၊ (၁) ရက် နေထိုင်ခဲ့ပါသည်။ သူမဟာ မိစ္ဆာသားရဲ ခန္ဓာအောင်မြင်မှုကို အသက်သွင်းနိုင်ခဲ့ပြီး ထပ်ဆောင်း ဆုလာဘ် တစ်ခု ရရှိခဲ့ပါသည်]
[သင်သည် အောက်ပါ ဆုလာဘ်ကို ရရှိခဲ့သည် ]
[ဆုလာဘ် ၁ - လမင်းကျီးကန်း အမွေးအတောင် (ဖူရွှမ်နီ လမင်းကျီးကန်း ဖြစ်ခဲ့စဉ်က သူမတစ်ကိုယ်လုံးရှိ အမွေးအတောင်များက အနက်ရောင် သံကဲ့သို့ မာကျောပြီး ကိရိယာတန်ဆာပလာ သန့်စင်ရန် အတွက် အလွန် ကောင်းမွန်သော ပစ္စည်း ဖြစ်သည်)]
[ဆုလာဘ် ၂ - နွားမိစ္ဆာ အလောင်းကောင် (ဖူရွှမ်နီ နောက်ဆုံးတွင် သတ်ဖြတ်ခဲ့သည့် နွားမိစ္ဆာ၏ အလောင်းကောင်)]
[ဆုလာဘ် ၃ - ပြန်ကန်ထွက်ခြင်း (ဖူရွှမ်နီ၏ မွေးရာပါ ပါရမီ)]
......
[ထပ်ဆောင်း ဆုလာဘ် - ထူးကဲကောင်းမွန်သော အမြင်အာရုံ (လမင်းကျီးကန်း မိစ္ဆာသားရဲ၏ အံ့သြဖွယ် အမြင်အာရုံ ပါရမီ)]
[ကျေးဇူးပြု၍ ရွေးချယ်ပါ]
ပိုင်ယီဟာ ဆုလာဘ် ၁ နှင့် ၂ ကို စိတ်မဝင်စားပေ။
သူက လက်နက် သွန်းလုပ်သူ မဟုတ်ရာ ဖူရွှမ်နီ၏ ခန္ဓာကိုယ်ပေါ်က အမွေးအတောင်များက သူ့အတွက် အသုံးမဝင်ပေ။
နွားမိစ္ဆာ အလောင်းကောင် အတွက်မူကား...
ပိုင်ယီ ပို၍ပင် စိတ်မဝင်စားပေ။ သူနှင့် နွားမိစ္ဆာက မွေးရာပါ ရန်ဘက်များ ဖြစ်ကြသည်....
'ငါ ဒီအလောင်းကောင်ကို ဘာလုပ်ဖို့ လိုချင်ရမှာလဲ.... ချက်စားဖို့လား...'
သူ ရွံရှာမိလေသည်....
သူ့တွင် ရှိတဲ့ တစ်ခုတည်းသော ရွေးချယ်စရာမှာ ဆုလာဘ် ၃ သာ ဖြစ်၏။ ဆုလာဘ် ၃ မှာ ဖူရွှမ်နီ၏ ပါရမီ အသစ် ဖြစ်ပြီး ၎င်းက အလွန် စွမ်းအားကြီးလွန်းသည့် ပါရမီ အသစ် တစ်ခု ဖြစ်ပေသည်။
ရန်သူ၏ တိုက်ခိုက်မှုကို တွန်းလှန်နိုင်ခြေ ၅၀ ရာခိုင်နှုန်း ရှိပြီး သူ့၏ နောက်ထပ် တိုက်ခိုက်မှုက ရန်သူကို သေချာပေါက် ထိမှန်ပေလိမ့်မည်။
ဖြစ်နိုင်ခြေပါဝင်သော ဤကဲ့သို့သော အရာမျိုးက သေချာပေါက် နတ်ဘုရားအစွမ်းအစတစ်ခုပင်ဖြစ်ရာ သူ မည်သို့ လက်လွတ်ခံနိုင်မည်နည်း။
"ဆုလာဘ် ၃"
ပိုင်ယီဟာ ပြန်ကန်ထွက်ခြင်းပါရမီ အသစ်နှင့် ကောင်းချီးပေးခံလိုက်ရသောအခါ ဘာမှ မဖြစ်သကဲ့သို့ မည်သည့် ထူးဆန်းမှုကိုမျှ မခံစားခဲ့ရပေ။
ထို့အပြင် ဤပါရမီ အသစ်ကို သူ အသုံးပြုနိုင်ခြင်း ရှိမရှိ စမ်းသပ်ကြည့်ရန်အတွက် သူ့အား ပူးပေါင်းဆောင်ရွက်ပေးမည့် အခြားလူ တစ်ဦး လိုအပ်ပေသည်။
သို့မဟုတ်ပါက...
သူ့ကိုယ်သူ လက်သီးဖြင့် (၂) ချက် ထိုးပြီး အောင်မြင်စွာ ပြန်ကန်ထွက်နိုင်မလား စောင့်ကြည့်၍ မရနိုင်ပေ၊ ပြီးနောက် နောက်ထပ် တိုက်ခိုက်မှုက သူ့ကိုယ်ပေါ် ပြန်ကျရောက်လာမည် မဟုတ်ပါလော။
၎င်းက ကိုယ့်ကိုယ်ကိုယ် (၃) ချက် ထိုးခြင်းနှင့် အတူတူပင် ဖြစ်နေပေလိမ့်မည်။
ပိုင်ယီဟာ ဤကဲ့သို့ ကိုယ့်ကိုယ်ကိုယ် နှိပ်စက်သည့် လုပ်ရပ်အကြောင်း တွေးမိပြီး လောလောဆယ်တွင် မလုပ်ဆောင်ရန် ဆုံးဖြတ်လိုက်၏။
သူ့တွင် ဤအပိုင်းနှင့် ပတ်သက်သည့် ထူးဆန်းသည့်စိတ်အာရုံ မရှိပေ။
ထူးကဲကောင်းမွန်သည့် အမြင်အာရုံဆိုသည့် ထပ်ဆောင်း ဆုလာဘ် အတွက်မူ ၎င်းကိုလည်း အလွန် ကောင်းမွန်သော ဆုလာဘ် တစ်ခုဟု ယူဆနိုင်ပေသည်။
၎င်းက ပိုင်ယီ၏ အမြင်အာရုံကို ထာဝရတိုးတက်စေနိုင်၏။
သူ ဤအရာကို မျှော်လင့်မထားခဲ့ပေ။
ဖူရွှမ်နီက မသေမျိုးကျင့်ကြံခြင်း သရုပ်ဖော် ဘဝတွင် (၁၃) နှစ်သာ နေထိုင်ခဲ့ရပေမဲ့ ရမှတ် တွက်ချက်ခြင်း ဆုလာဘ်ကတော့ ဤမျှ ရက်ရောနေပေသည်။
သူလုံးဝ မျှော်လင့်မထားခဲ့မိချေ။
...
အခြားတစ်ဖက်တွင်...
ဖူရွှမ်နီဟာ ရမှတ် တွက်ချက်ခြင်း ဆုလာဘ်ကို တိတ်တဆိတ် စောင့်ဆိုင်းနေခဲ့သည်။ မသေမျိုးကျင့်ကြံခြင်း သရုပ်ဖော် စနစ်၏ ရမှတ် တွက်ချက်ခြင်း ဆုလာဘ် မထုတ်ပေးမီ သူမ ကြာကြာ စောင့်ဆိုင်းစရာ မလိုလိုက်ပေ။
သူမရှေ့တွင် ပေါ်လာသည့် စာကြောင်း အနည်းငယ်က သူမ၏ အာရုံစိုက်မှုကို နောက်တစ်ကြိမ် ဆွဲဆောင်လိုက်ပြန်သည်။
[သင်သည် မိစ္ဆာသားရဲ ခန္ဓာအောင်မြင်မှုကို အသက်သွင်းနိုင်ခဲ့ပြီး ထပ်ဆောင်း ဆုလာဘ် တစ်ခု ရရှိခဲ့ပါသည်။ သင်သည် အောက်ပါ ဆုလာဘ်ကို ရရှိခဲ့ပါသည် ]
[ဆုလာဘ် - အဆင့်နိမ့် ပြန်ကန်ထွက်ခြင်း (ရန်သူ့ တိုက်ခိုက်မှုများကို တွန်းလှန်နိုင်ခြေ ၁၀ ရာခိုင်နှုန်း ရှိပြီး နောက်ထပ် တိုက်ခိုက်မှုက ၁၀၀ ရာခိုင်နှုန်း ထိမှန်နိုင်သည်)]
[အပိုဆု (Bonus) - လမင်းကျီးကန်း အမွေးအတောင် (သင့် အမွေးအတောင်များ)]
[သင် နောက်တစ်ကြိမ် သရုပ်ဖော်ခြင်း ပြုလုပ်ရန် (၁၂) နာရီ စောင့်ဆိုင်းရပါမည်]
"ဒါက... ငါ ရွေးချယ်ခဲ့တဲ့ မွေးရာပါ ပါရမီလား..."
ဖူရွှမ်နီ ကြောင်အသွားခဲ့သည်။
"အဆင့်နိမ့် ပါရမီ "
သို့သော် သူမ ရရှိခဲ့သော ဆုလာဘ်က သူမ၏ ပါရမီနှင့် ကွဲပြားနေကြောင်း သူမ လျင်မြန်စွာ သဘောပေါက်လိုက်၏။
ဤ အဆင့်နိမ့် ပြန်ကန်ထွက်ခြင်းတွင် ရန်သူ့ တိုက်ခိုက်မှုကို တွန်းလှန်နိုင်ခြေ (၁၀) ရာခိုင်နှုန်းသာ ရှိလေသည်။
သို့သော် ဖူရွှမ်နီ အတွက်မူ ၎င်းက မယုံနိုင်စရာ ကောင်းသော ပါရမီ ကျွမ်းကျင်မှုတစ်ခု ဖြစ်နေဆဲပင် ဖြစ်သည်။
ဆိုလိုသည်မှာ တိုက်ခိုက်မှု တစ်ခုကို တွန်းလှန်နိုင်ခြေ (၁၀) ရာခိုင်နှုန်း ရှိနေခြင်း ဖြစ်သည်။
ရန်သူ့ တိုက်ခိုက်မှု မည်မျှပင် စွမ်းအားကြီးပါစေ....
မူလဝိညာဉ် အဆင့် ကျွမ်းကျင်သူ တစ်ဦးက သူမကို စွမ်းအားအပြည့်ဖြင့် တိုက်ခိုက်လာလျှင်ပင် ရန်သူ့ တိုက်ခိုက်မှုကို တွန်းလှန်နိုင်ရန် သူမတွင် (၁၀) ရာခိုင်နှုန်း အခွင့်အရေး ရှိနေဆဲ ဖြစ်၏။
၎င်းသည် အပိုအသက် တစ်ခုပိုင်ဆိုင်ထားခြင်းနှင့် အတူတူပင် ဖြစ်၏။
ဖူရွှမ်နီဟာ ဝမ်းသာအားရ အံ့သြသွားသော်လည်း သူမ၏ ခံစားချက်ကို လျင်မြန်စွာ ဖိနှိပ်လိုက်သည်။
'ငါ့အတွက်တော့ မသေမျိုးကျင့်ကြံခြင်း သရုပ်ဖော် စနစ်လို အံ့ဖွယ် တည်ရှိမှုမျိုးကို လူသိနည်းလေ ပိုကောင်းလေပဲ..'
'ဒါက ငါ့ရဲ့ လျှို့ဝှက်ချက်...ဒါက ငါ့ရဲ့ အခွင့်အရေးပဲ။'
မကြာမီ လမင်းကျီးကန်း အမွေးအတောင်များကလည်း ဖူရွှမ်နီ၏ လက်ထဲတွင် ရောက်ရှိလာခဲ့သည်။ ဤအမွေးအတောင်များက အလွန် ကြီးမားပုံ ရသည်။
ဘာပဲဖြစ်ဖြစ် ဖူရွှမ်နီ မသေမျိုးကျင့်ကြံခြင်း သရုပ်ဖော် စနစ်ထဲတွင် မသေဆုံးမီက သူမ၏ ခန္ဓာကိုယ်က တော်တော် ကြီးမားခဲ့သည် မဟုတ်ပါလော။
အနက်ရောင် အမွေးအတောင်များတွင် ထူးခြားသော သတ္တုရောင် တောက်ပမှု ရှိနေခဲ့ပြီး အမွေးအတောင်များ၏ အစွန်းများက အလွန် ထက်မြက်နေခဲ့သည်။
ဖူရွှမ်နီဟာ ဤအမွေးအတောင်များနှင့် အလွန် ရင်းနှီးကျွမ်းဝင်နေခဲ့သည်။ အဘယ်ကြောင့်ဆိုသော် ဤအမွေးအတောင်များက သူမနှင့်အတူ (၁၀) နှစ်ကျော် ရှိနေခဲ့ခြင်းကြောင့်ပင်။
ဖူရွှမ်နီ၏ ခံစားချက်များ အနည်းငယ် ရှုပ်ထွေးနေသည်။
'ငါ့ရဲ့ အမွေးအတောင်တွေက ဆုလာဘ် ဖြစ်လာတာလား..'
'ဒီအမွေးအတောင်တွေကို ငါ ဘာလုပ်လို့ ရမလဲ... ဝိညာဉ် လက်နက်တစ်ခု အဖြစ် သန့်စင်ဖို့ အခွင့်အရေး ရှာရမလား...'
ဆုလာဘ်များ တိုးလာခြင်းနှင့်အတူ ထိုစာကြောင်း (၂) ကြောင်းကို ဖူရွှမ်နီ သတိပြုမိလိုက်သည်။
သူမက မသေမျိုးကျင့်ကြံခြင်း သရုပ်ဖော် စနစ်ထဲသို့ အချိန်မရွေး နေရာမရွေး ဝင်ရောက်ပြီး မသေမျိုးကျင့်ကြံခြင်းကို သရုပ်ဖော်၍ မရနိုင်ကြောင်း သိလိုက်ရ၏။
အကယ်၍ သူမဟာ နောက်တစ်ကြိမ် မသေမျိုးကျင့်ကြံခြင်း သရုပ်ဖော်မှုကို ဆက်လုပ်လိုပါက သူမ (၁၂) နာရီ စောင့်ဆိုင်းရန် လိုအပ်ပေသည်။
'ထားလိုက်ပါတော့...စောင့်ရတာက ကိစ္စမရှိပါဘူး..'
ချင်းကျောက်၏ စိတ်မရှည်သည့် ကိုယ်ရည်ကိုယ်သွေးနှင့် မတူဘဲ ဖူရွှမ်နီနှင့် ချန်ချန်ရွှယ်တို့က ပို၍ သည်းခံနိုင်စွမ်း ရှိကြလေသည်။
ထို့အပြင် ၎င်းက သူမကို နှစ်အနည်းငယ် သို့မဟုတ် (၁၀) နှစ်ကျော်မျှ စောင့်ဆိုင်းခိုင်းနေခြင်း မဟုတ်ပေ။