အခန်း ၁၀၆ : လမင်းကျီးကန်း မိစ္ဆာသားရဲအဖြစ် ဝင်စားသွားသည့် ဖူရွှမ်နီ
'သူမရဲ့ အခြေတည်အဆင့် ကျင့်ကြံမှု ဘယ်ရောက်သွားလဲ...'
'အားလုံး ပျောက်ကုန်ပြီလား...ဘာဖြစ်သွားတာလဲ..'
ဖူရွှမ်နီ နည်းနည်း လှုပ်ရှားဖို့ ကြိုးစားကြည့်လိုက်ရာ သူမ ခေါင်းက ကွေးညွှတ်နေသည့် နံရံတစ်ခုနှင့် တူသော အရာကို ဝင်တိုက်မိသွားကြောင်း တွေ့ရှိလိုက်ရသည်။
ဒါ့အပြင် သူမခန္ဓာကိုယ်က စေးကပ်နေသလို ခံစားရပြီး သူမဟာ ကျဉ်းမြောင်းတဲ့ လျှို့ဝှက်အခန်းတစ်ခုထဲ ရောက်နေသလိုပင်။ ထို့အပြင် အဲဒီ လျှို့ဝှက်အခန်းထဲမှာလည်း ကော်တွေနဲ့ ပြည့်နေသလိုရှိနေခဲ့သည်။
'မဟုတ်ဘူး... ငါဒီနေရာမှာ ဆက်မနေနိုင်ဘူး.... ဒီနေရာက ငါ့ကို မလုံခြုံသလို ခံစားရစေတယ်....'
'ဖြစ်နိုင်တာက သူမ ဒီထူးဆန်းတဲ့ နေရာမှာ ရောက်နေလို့ သူမဆီမှာ ခွန်အား သိပ်မရှိတာ ဖြစ်မယ်...'
'ဒါကြောင့် ငါ့ခန္ဓာကိုယ်ထဲမှာ ဘာဝိညာဉ်စွမ်းအင်မှ မခံစားရတာ ဖြစ်မယ်...'
'ဒီနေရာက ထွက်သွားရမယ်..'
ဒီလို အတွေးမျိုး သူမ စိတ်ထဲ ဖြတ်ပြေးသွားခဲ့သည်။
ဖူရွှမ်နီ ကွေးညွှတ်နေသော အတားအဆီးကို ဖြိုခွင်းဖို့ အတတ်နိုင်ဆုံး ကြိုးစားလိုက်ပြီး မင်းသမီး တစ်ပါးရဲ့ ဂုဏ်သိက္ခာကိုပင် ဂရုမစိုက်တော့ပေ။
သူမ ဘေးဘက်ကို ဝင်တိုက်လိုက်၏။
သူမ၏လက်နှင့် ခြေထောက်တွေကို အသုံးပြုလိုက်သည်။
......
သူမ နံရံကို ထုဖို့ သူမရဲ့ ခေါင်းကို အသုံးပြုလိုက်၏။
"ခွပ်.."
တိုးညှင်းတဲ့ အသံ ရုတ်တရက် ထွက်ပေါ်လာရာ ဖူရွှမ်နီ ဝမ်းသာသွားခဲ့သည်။ သူမဟာ မောပန်းနွမ်းနယ်မှုကို ဂရုမစိုက်တော့ဘဲ အတားအဆီးကို ဖြိုခွင်းဖို့ အတတ်နိုင်ဆုံး ကြိုးစားလိုက်လေသည်။
အသံတွေက ပိုကျယ်လာခဲ့ပြီး သူမရှေ့၌ အလင်းတန်း တစ်ခု ပေါ်လာတာကိုတောင် မြင်တွေ့လိုက်ရသည်။
ဒါက သူမကို လွတ်မြောက်ဖို့ မျှော်လင့်ချက် ပေးလိုက်သဖြင့် သူမဟာ ချက်ချင်း အားပိုစိုက်လိုက်သည်။
ခွပ်....
ခွပ်.....
ခွပ်....
နောက်ဆုံးတော့ ဖူရွှမ်နီဟာ ကြီးမားသည့် အက်ကွဲကြောင်း တစ်ခုထဲကနေ အတင်းအကြပ် ညှစ်ပြီး ထွက်လိုက်ရာ မျက်စိကျိန်းလောက်အောင် တောက်ပသော အလင်းရောင်က ထိုးဝင်လာသဖြင့် သူမ မျက်လုံးများကို အနည်းငယ် မသက်မသာ ဖြစ်သွားစေခဲ့သည်။
သို့သော် သူမဟာ ၎င်းအား ဂရုမစိုက်ပဲ ထိုအစား သူမ အပြင်ဘက်က လတ်ဆတ်တဲ့ လေကို လောဘတကြီး ရှူရှိုက်လိုက်ပြီး မျက်လုံးများကို ဖြည်းညှင်းစွာ ဖွင့်ကြည့်လိုက်ရာ ကြောင်အသွားခဲ့ရသည်။
"....."
သူမဟာ ခရိုင်ရုံးထဲမှာ မရှိတော့ကြောင်း ဖူရွှမ်နီ သိလိုက်ရပြီး ဒီနေရာက ရင်းနှီးသည့် ဧည့်သည်တော် အခန်း မဟုတ်ဘဲ လုံးဝ မရင်းနှီးသည့် ပတ်ဝန်းကျင် တစ်ခု ဖြစ်နေကာ ကြီးမားသော ပေါင်းပင်များနှင့် သစ်ပင်များ ဝန်းရံထားခဲ့သည်။
ဒါ့အပြင် သူမဟာ ငှက်သိုက်တစ်ခုနဲ့ တူတဲ့ အရာတစ်ခုထဲ ရောက်နေပြီး တစ်ချိန်တည်းမှာပင် ဘေးနားမှ အခွံလွတ်နေတဲ့ ဥခွံတစ်ခုကိုလည်း တွေ့လိုက်ရသည်။
ဥခွံ အတွင်းပိုင်းက လွတ်နေပေပြီ။
သူမ ကိုယ့်ကိုယ်ကိုယ် ပြန်ကြည့်လိုက်၏။
သူမဆီမှာ အဝတ်အစား မရှိချေ။
သူမဟာ နက်ရှိုင်းစွာ စဉ်းစားခန်း ဝင်သွားသည်။
[အသက် ၀ နှစ် - သင် မသေမျိုးကျင့်ကြံခြင်း ကမ္ဘာထဲ ပြန်လည်ဝင်စားခဲ့သည်။ သင် ရွေးချယ်ခဲ့သော လူသားမဟုတ်သောပါရမီက အသက်ဝင်လာခဲ့သည်။ သင်သည် မိစ္ဆာသားရဲတစ်ကောင်၏ သားပေါက်လေး ဖြစ်လာပြီး မိစ္ဆာသားရဲများအကြား သင့်မျိုးနွယ်စုမှာ လမင်းကျီးကန်းဖြစ်သည်။]
[သင် နက်ရှိုင်းစွာ စဉ်းစားခန်း ဝင်သွားခဲ့သည်...]
[...]
…
"တကယ်ကြီး လူသား မဟုတ်တော့ပါလား"
ချင်းဟယ် ခရိုင်.....
ပိုင်ယီဟာ အရာအားလုံးကို မြင်တွေ့လိုက်ရပြီး သူ့မျက်နှာက အနည်းငယ် ထူးဆန်းသွားခဲ့သည်။
ဖူရွှမ်နီ အဲဒီ မွေးရာပါ ပါရမီကို ရွေးချယ်လိမ့်မယ်လို့ သူ မျှော်လင့်မထားခဲ့ချေ။
သူမက လူသား တစ်ယောက် ဖြစ်ဖို့ စွန့်လွှတ်လိုက်လိမ့်မယ်လို့လည်း သူ မျှော်လင့်မထားခဲ့ပေ။
ရွေးချယ်ခံ(၃) ယောက်ထဲမှာ ဖူရွှမ်နီ တစ်ယောက်တည်းသာ လူသား မဟုတ်တော့ခြင်းပင်။
ဘာပဲဖြစ်ဖြစ် ကျန်တဲ့ (၂) ယောက်က လူသားတွေ ဖြစ်နေတုန်းဖြစ်ပေသည်။
"သူမက မိစ္ဆာသားရဲ ဖြစ်သွားတာပဲ.."
ရိုးသားစွာ ပြောရရင် ပိုင်ယီ မျှော်လင့်စောင့်စားနေမိပေသည်။ မဟာယန် မင်းဆက်ရဲ့ မင်းသမီး တစ်ပါးက မသေမျိုးကျင့်ကြံခြင်း သရုပ်ဖော် စနစ်ထဲမှာ မိစ္ဆာသားရဲ တစ်ကောင် ဖြစ်သွားခဲ့ရာ သူမ ကိုယ့်ကိုယ်ကိုယ် အရှုံးပေးလိုက်မလား ဒါမှမဟုတ် ရှင်သန်နိုင်အောင် ကြိုးစားမည်လော။
သိထားရမှာက ဟိုတုန်းက ရွေးချယ်ခံအမှတ် (၂) ချင်းကျောက်ကပါရမီ အမှား ရွေးမိတုန်းက အစကပြန်စခဲ့လေသည်။
…
ပိုင်ယီ တွေးနေသည့် တိုတောင်းသော တစ်မိနစ် အတွင်းမှာပင် မသေမျိုးကျင့်ကြံခြင်း သရုပ်ဖော် စနစ်ထဲတွင် တစ်နှစ် ကုန်ဆုံးသွားခဲ့ပေပြီ။
တစ်နှစ်တာ ကုန်ဆုံးပြီးနောက် ဖူရွှမ်နီဟာ ဒီလက်တွေ့ဘဝကို နောက်ဆုံးတော့ လက်ခံလိုက်ပေပြီ။
'သူမ တကယ် ပြန်လည်ဝင်စားခဲ့တာပဲ...'
လက်ရှိ သူမဟာ မဟာယန် မင်းဆက်၏ မင်းသမီး မဟုတ်တော့ရာ မည်သည့် မိစ္ဆာကျင့်ကြံသူကိုမှ စုံစမ်းစစ်ဆေးဖို့ မလိုအပ်တော့ပေ။
လက်ရှိတွင် သူမဟာ မိစ္ဆာသားရဲ တစ်ကောင် ဖြစ်သလို မိဘမဲ့ မိစ္ဆာသားရဲ တစ်ကောင် ဖြစ်လေသည်။
တိုတောင်းသော တစ်နှစ် အတွင်း မိဘမဲ့ မိစ္ဆာသားရဲ သားပေါက်လေး တစ်ကောင်ဟာ အသက်ရှင်ဖို့ ဘယ်လောက် ခက်ခဲလဲ ဆိုတာ ဖူရွှမ်နီ သိလိုက်ရသည်။
မိစ္ဆာသားရဲ သားပေါက်လေး အနေဖြင့် သူမက သာမန် တိရစ္ဆာန်တွေထက် သေချာပေါက် ပိုသန်မာခဲ့သည်။
အလားအလာအရ ဆိုရင်လည်း သူမက သာမန် တိရစ္ဆာန်တွေထက် အများကြီး သာနေခဲ့သည်။
သို့ပေမဲ့ သူမရဲ့ ကြီးထွားမှုနှုန်းက သာမန် တိရစ္ဆာန်တွေထက် အများကြီး ပိုနှေးကွေးခဲ့သည်။
သာမန် ကျီးကန်း တစ်ကောင်က ပျံသန်းဖို့ (၁၀) ရက်လောက်ပဲ လိုအပ်ပြီး ဖူရွှမ်နီကတော့ အသက်ရှင်လာတာ တစ်နှစ် ရှိနေပြီးပေမဲ့ သူမရဲ့ အမွေးအတောင်တွေက အပြည့်အဝ မပေါက်သေးချေ။ ဒီလို အခြေအနေမျိုးမှာ အကယ်၍ သူမ စွန့်စားပြီး ပျံသန်းဖို့ ကြိုးစားပါက ပြန်လည်ဝင်စားတာ တစ်နှစ်ပဲ ရှိသေးတဲ့ အချိန်မှာ ငရဲပြည်ကို အဖွားမုန့်ရဲ့ စွတ်ပြုတ်ရည် သောက်နေရပေမည်......
ပွင့်ပွင့်လင်းလင်း ပြောရရင် သူမက လမ်းလျှောက်နေတဲ့ ကြက်ကလေးတစ်ကောင် အဖြစ် ရှိနေတုန်းပင်။
"ဘာလို့ အဲဒီလူသားမဟုတ်သောပါရမီ တစ်ခုတည်း အလုပ်လုပ်တာလဲ"
"မိစ္ဆာ အမြုတေက ဘယ်မှာလဲ.... ပြန်ကန်ထွက်ခြင်းကကော ဘယ်မှာလဲ"
ဖူရွှမ်နီဟာ မူလက ဒီစကားလုံး နှစ်လုံးကို ပြောချင်ပေမယ့် ငှက်အော်သံအဖြစ် ပြောင်းလဲသွားခဲ့သည်.....
ဒါက သူမရဲ့ မျက်ခွံကို လှုပ်သွားစေခဲ့ပြီး ဆွံ့အသွားစေခဲ့သည်။
ကံကောင်းစွာနဲ့ လမင်းကျီးကန်း ဆိုတာ ကျီးကန်း အမျိုးအစား တစ်မျိုးပဲဖြစ်ရာ ကျီးကန်းတွေ စကားပြောနိုင်ရာ သူမ အနာဂတ်၌ တစ်ဖြေးဖြေး လေ့ကျင်နိုင်ပေသည်။
သို့ပေမဲ့ မဟာယန် မင်းဆက်ရဲ့ မင်းသမီး တစ်ပါးက စကားတစ်ခွန်း ပြောဖို့တောင် ရုန်းကန်နေရမယ်လို့ ဘယ်သူ ထင်မည်နည်း။
ထို့ကြောင့် သူမဟာ အလွန် ရှက်ရွံ့နေပြီး ပုန်းစရာ တွင်းတစ်တွင်း ရှာချင်စိတ် ပေါက်နေခဲ့ပေသည်။
[အသက် ၁ နှစ် - သင့်အတောင်ပံများက အပြည့်အဝ မပေါက်သေးဘဲ အသက်ရှင်ရပ်တည်ရန် တောထဲမှ တောရိုင်းအသီးအနှံများကို မှီခိုနေရသည်။ ဖြစ်နိုင်တာက စတင်သူရဲ့ ကံကောင်းမှုကြောင့် ဒီတစ်နှစ် အတွင်း သင်ဟာ ဘာအန္တရာယ်မှ မကြုံတွေ့ခဲ့ရပေ။ သင့်မိစ္ဆာသားရဲ မိဘတွေ ဘယ်ရောက်သွားလဲ ဆိုတာလည်း သင် မသိပေ။]
သူမရှေ့က စာသားကို ကြည့်ပြီး ဖူရွှမ်နီ သူမရဲ့ မျက်လုံးဝိုင်းကြီးတွေကို ပုတ်ခတ်ပြီး သက်ပြင်းချလိုက်၏။
တစ်နှစ်ကြာပြီးနောက် သူမကို ဒီလိုအခြေအနေ ရောက်အောင် လုပ်ခဲ့တဲ့သူက လျှို့ဝှက်ဆန်းကြယ်တဲ့ လူတစ်ယောက် မဟုတ်မှန်း သူမ နောက်ဆုံးတော့ သိလိုက်ရသည်။
၎င်း တရားခံက ကိုယ့်ကိုယ်ကိုယ် မသေမျိုးကျင့်ကြံခြင်း သရုပ်ဖော် စနစ် လို့ ခေါ်တဲ့ ဒီအရာပင်။
သူမ ဘယ်လို ပြောရမလဲဆိုရင် မသေမျိုးကျင့်ကြံခြင်း သရုပ်ဖော် စနစ်က လျှို့ဝှက်နယ်မြေ ရှေးဟောင်းအမွေအနှစ်တစ်ခုနဲ့ ပိုတူတယ်လို့ ဖူရွှမ်နီ ခံစားရသည်။
ဖြစ်နိုင်တာက သူမ မသိလိုက်ဘဲ အဲဒီထဲကို ကျူးကျော်ဝင်ရောက်မိသွားတာ ဖြစ်ပေမည်။
"အသက်ရှင်ဖို့ ကြိုးစားရမယ်...."
သူမမှာ တခြား ရွေးချယ်စရာ မရှိဘူး ဆိုတာ ဖူရွှမ်နီ သိပေသည်။ ထို့အပြင် လမင်းကျီးကန်း မိစ္ဆာသားရဲ တစ်ကောင် ဖြစ်လာတာက သေတာထက်တော့ ပိုကောင်းလေသည်......