အခန်း (၁၀၅) ဖူရွှမ်နီ၏ ရွေးချယ်စရာ ပါရမီ (၁၀)ခု
[၁။ လျှပ်တစ်ပြက် လွတ်မြောက်မှု (ဘာဖြစ်သွားမှန်းတောင် မသိလိုက်ရအောင် မြန်ဆန်လွန်းသော လှုပ်ရှားမှု)]
[၂။ သဘာဝမီးဖို (ကျင့်ကြံသူ တစ်ဦး၏ စွမ်းအားကို သူတစ်ပါးက စုပ်ယူရန် မွေးဖွားလာသူ)]
[၃။ လူသား မဟုတ်သော အရာ (ဘာပဲဖြစ်ဖြစ် သင် လူသားအဖြစ် ပြန်လည်ဝင်စားမှာ မဟုတ်ပါ - တိရစ္ဆာန် သို့မဟုတ် မိစ္ဆာ ဖြစ်သွားမည်)]
[၄။ ခြေထောက် အသုံးပြုခြင်း ပါရမီ (သင်က ခြေထောက် အသုံးပြုရတာကို စွဲလမ်းသူ ဖြစ်နေဆဲပါ)]
[၅။ စက်ရုပ်ခန္ဓာဖြင့် တက်လှမ်းခြင်း (အသားနဲ့ သွေးက အားနည်းတယ်၊ စက်ပစ္စည်း ခန္ဓာကိုယ်ဖြင့်သာ မသေမျိုး အဖြစ် တက်လှမ်းခြင်း)]
[၆။ မိစ္ဆာ အမြုတေ (ရွှေအမြုတေ အဆင့် မိစ္ဆာသားရဲ တစ်ကောင်ရဲ့ အတွင်းအမြုတေ ပါရှိလာမည်)]
[၇။ ပေါက်ကွဲထွက်သော ကန်ချက်များ (ကန်လိုက်တိုင်း ပြင်းထန်သော်လည်း သင့်ရုပ်ရည်က ကြည့်ရဆိုးကောင်း ဆိုးနိုင်သည်)]
[၈။ တိုက်ခိုက်မှု ပြန်ကန်ထွက်ခြင်း (သင့်မှာ ရန်သူရဲ့ တိုက်ခိုက်မှုကို တွန်းလှန်နိုင်ခြေ ၅၀ ရာခိုင်နှုန်း ရှိသည်၊ သင့်ရဲ့ နောက်ထပ် တိုက်ခိုက်မှုက ရန်သူကို ၁၀၀ ရာခိုင်နှုန်း ထိမှန်လိမ့်မည်)]
[၉။ ထိပ်ပြောင်ခြင်း (ဆံပင် အစားထိုးကုသမှု ခံယူဖို့ အကြံပြုလိုသည်)]
[၁၀။ ရေဘဝဲလက်တံများ (ဖြစ်နိုင်တာက သင် လူတချို့ရဲ့ ထူးဆန်းတဲ့ စိတ်အာရုံကို လှုံ့ဆော်ပေးနိုင်မလား)]
[ကျေးဇူးပြု၍ အထက်ပါ မွေးရာပါ ပါရမီ ၁၀ ခု အနက် ၃ ခုကို ရွေးချယ်ပါ။]
[ကျေးဇူးပြု၍ ရွေးချယ်ပါ]
စာကြောင်းများ ဖူရွှမ်နီ၏ မျက်စိရှေ့တွင် ပေါ်လာပြီး သူမကို မျက်စိကျိန်းသွားစေခဲ့သည်။
......
စောစောက ပေါ်လာသည့် စာသားများနှင့် ပေါင်းစပ်လိုက်သောအခါ သူမကို ဒုက္ခပေးရန် ကြံစည်နေသည့် လူက သူမကို ဘာလုပ်စေချင်လဲ ဆိုတာ ဖူရွှမ်နီ အကြမ်းဖျင်း နားလည်လိုက်၏။
'တစ်ဖက်လူက သူမကို ရွေးချယ်မှု ပြုလုပ်စေချင်တာလား...'
သူမရှေ့တွင် ပေါ်လာသော ရွေးချယ်စရာ ၁၀ ခုထဲက ၃ ခုအား သူမ ရွေးချယ်ရပေမည်။
'ဒါပေမဲ့...အကယ်၍ သူမ တကယ် ရွေးချယ်လိုက်ရင် ဘာဖြစ်လာမလဲ...'
'သူမ သေသွားမလား ဒါမှမဟုတ် မသေဘူးလား....'
&ဒါက နောက်ပြောင်မှု သက်သက်လား...'
အသက်ရှူချိန် အနည်းငယ်ကြာ တိတ်ဆိတ်နေပြီးနောက်မှာတောင် ဒီစာလုံးတွေ ပျောက်ကွယ်မသွားခဲ့သေးပေ။
ဖူရွှမ်နီ နားလည်လိုက်၏။
အကယ်၍ သူမ ရွေးချယ်မှု မပြုလုပ်ပါက ဒီစာလုံးတွေ ဘယ်တော့မှ ပျောက်ကွယ်သွားမှာ မဟုတ်သလို သူမ ဘယ်တော့မှ လှုပ်ရှားနိုင်မှာ မဟုတ်ပေ။
'ဟူး..'သူမ၏ အတွေးများကို တည်ငြိမ်အောင် လုပ်ရန် သူမစိတ်ထဲတွင် အသက်ပြင်းပြင်း တစ်ချက် ရှူသွင်းလိုက်သည်။
ထို့နောက် သူမဟာ ရွေးချယ်စရာ တစ်ခုချင်းစီကို လေးလေးနက်နက် စတင် ကြည့်ရှုလိုက်သည်။
'ဒီအရာတွေက ဘာတွေလဲ..'
ရွေးချယ်စရာများကို မြင်လိုက်ရသောအခါ သူမ၏ ပထမဆုံး တုံ့ပြန်မှု ဖြစ်၏။ ၎င်းက ချန်ချန်ရွှယ်နှင့် ချင်းကျောက်တို့၏ တုံ့ပြန်မှုနှင့် အတူတူပင်။
မသေမျိုးကျင့်ကြံခြင်း သရုပ်ဖော် စနစ်ထဲတွင် စာရင်းပြုစုထားသည့် ပါရမီ အသစ်များကို ဖူရွှမ်နီ နားမလည်နိုင်ပေ။
သူမ ထူးဆန်းသည်ဟု ခံစားလိုက်ရသည်။
ပါရမီ ၁ ဖြစ်သည့် လျှပ်တစ်ပြက် လွတ်မြောက်မှုကို ဖူရွှမ်နီ လုံးဝ နားမလည်ပေ။ ထို့ကြောင့် ဘေးကင်းစေရန် အတွက် သူမ မရွေးချယ်ခဲ့ပေ။
ပါရမီ ၂ ဖြစ်သည့် သဘာဝ မီးဖိုကို ဖတ်လိုက်ရချိန်တွင် သူမ၏ မျက်နှာထားက အနည်းငယ် ထူးဆန်းသွားခဲ့သည်။ အဘယ်ကြောင့်ဆိုသော် သူမဟာ ဒီပါရမီကို နားလည်သော်လည်း သူမ အလွန် ငြင်းဆန်လိုစိတ် ဖြစ်မိသောကြောင့် ဖြစ်၏။
သဘာဝမီးဖိုဆိုတာ အမျိုးသမီး ကျင့်ကြံသူကို လိင်ပိုင်းဆိုင်ရာ အမြတ်ထုတ်ပြီး စွမ်းအား ရယူခြင်း ဖြစ်မှန်း... သူမ မသိဘဲ နေစရာ အကြောင်း မရှိပေ။
ပါရမီ ၃... လူသားမဟုတ်သောအရာ.... ဖူရွှမ်နီ ဒီအကြောင်း သိပ်များများစားစား မသိရင်တောင် ကွင်းစကွင်းပိတ်ထဲက ရှင်းပြချက်က သူမကို လုံးဝ နားလည်သွားစေခဲ့သည်။
'ပြန်လည်ဝင်စားတာ..'
ဒီအခေါ်အဝေါ်ကို သူမ ပထမဆုံးအကြိမ် ကြားဖူးတာ မဟုတ်ပေမယ့် ၎င်းက သူမကို စိတ်မသက်မသာ ဖြစ်စေခဲ့သည်။
'ပြန်လည်ဝင်စားတာ ဆိုတာ သူမ အစကနေ ပြန်စရမယ်လို့ ဆိုလိုတာ မဟုတ်ဘူးလား....'
'ဒါက သူမကို သေခိုင်းနေတာလား..'
'ဒါပေမဲ့...၁၀၀ ရာခိုင်နှုန်း လူသားအဖြစ် ပြန်လည်ဝင်စားမှာ မဟုတ်ပါဆိုတဲ့ စကားစုက သူမ လူသား မဟုတ်တဲ့ တိရစ္ဆာန် တစ်ကောင် ဖြစ်လာမယ်လို့ ဆိုလိုတာလား...'
သူမ အရူးလုပ်ခံလိုက်ရတာကို တွေးမိတော့ ဖူရွှမ်နီ စဉ်းစားလိုက်သည်။ ကြည့်ရတာ သူမ ရွေးချယ်လိုက်ရင် သေဆုံးသွားနိုင်ပေမယ့် အကယ်၍ ဒါက သူမ အသက်ရှင်နိုင်မယ့် တစ်ခုတည်းသော နည်းလမ်း ဖြစ်နေရင်ကော.....
'ဖြစ်နိုင်ချေ မြင့်မားတယ်...'
ပါရမီ ၄ နှင့် ပါရမီ ၅ အတွက်မူ ဒီမွေးရာပါ ပါရမီ ၂ ခုက ဖူရွှမ်နီ၏ မသိနားမလည်သော အကွက်ကို ထပ်မံ ထိတွေ့လိုက်ပြန်၏။
သူမ အချိန်အကြာကြီး စဉ်းစားသော်လည်း နားမလည်နိုင်သေးပေ။ 'လစ်လျူရှုလိုက်တာပဲ ကောင်းမယ်...'
'ရွှေအမြုတေ မိစ္ဆာသားရဲရဲ့ မိစ္ဆာ အမြုတေ..'
ပါရမီ ၆ က ဖူရွှမ်နီ၏ နှလုံးကို တုန်လှုပ်သွားစေခဲ့သည်။ သူမ နားလည်နိုင်သည့် နောက်ထပ် ရွေးချယ်စရာ တစ်ခု ရှိနေခဲ့သည်။
'အကယ်၍ သူမ ဒီရွေးချယ်စရာကို ရွေးလိုက်ရင် သူမကို လျှို့ဝှက်စွာ ဒုက္ခပေးနေတဲ့ လူက...
ဖြစ်နိုင်တာက သူမကို မိစ္ဆာ အမြုတေ တစ်လုံး ပေးမှာလား...'
'ဒါက... ဖြစ်နိုင်ချေ မြင့်မားလား..'
ပါရမီ ၇... ပေါက်ကွဲထွက်သော ကန်ချက်များ ဆိုသည့် ကွင်းစကွင်းပိတ်ထဲက ရှင်းပြချက် (ရုပ်ရည် ကြည့်ရဆိုးနိုင်သည်) ကို ဖူရွှမ်နီ မရွေးချယ်နိုင်ကြောင်း သိသည်။
အန္တရာယ် ရှိသဖြင့် သူမ လစ်လျူရှုရန် ရွေးချယ်လိုက်သည်။
ပါရမီ ၈... တိုက်ခိုက်မှု ပြန်ကန်ထွက်ခြင်း ဒီစကားလုံး နှစ်လုံးကို နားမလည်နိုင်သော်လည်း ကွင်းစကွင်းပိတ်ထဲက ရှင်းပြချက်က သူမကို တုန်လှုပ်သွားစေခဲ့သည်။
ရန်သူရဲ့ တိုက်ခိုက်မှုကို တွန်းလှန်နိုင်ခြေ ၅၀ ရာခိုင်နှုန်း ရှိပြီး သူမရဲ့ နောက်ထပ် တိုက်ခိုက်မှုက ရန်သူကို ၁၀၀ ရာခိုင်နှုန်း ထိမှန်ပေလိမ့်မည်။
'ဒါက... ဒါက ဟာသလား..'
သူမ ကောင်းကင်နိယာမလို့ ခေါ်တဲ့ အရာတစ်ခုခုကို ထိတွေ့လိုက်မိသလို ဖူရွှမ်နီ ခံစားလိုက်ရသည်။
နောက်ဆုံး ရွေးချယ်စရာ နှစ်ခု ထိပ်ပြောင်ခြင်းနှင့်ရေဘဝဲလက်တံများအတွက်မူ... သူမ နားမလည်နိုင်ပေ။
ဖူရွှမ်နီ ပထမဆုံးအကြိမ် သူမ၏ မွေးရာပါ ပါရမီကို ရွေးချယ်သောအခါ ကုန်ဆုံးခဲ့သည့် အချိန်က ချန်ချန်ရွှယ်နှင့် ချင်းကျောက် နှစ်ယောက်ပေါင်း ကုန်ဆုံးခဲ့သော အချိန်ထက် ပိုများခဲ့သည်။
တခြားလူ တစ်ယောက်ယောက်ရဲ့ ထိန်းချုပ်မှုကို ခံရတဲ့ ခံစားချက်ကို သူမ မကြိုက်ပေ။ ထို့အပြင် ခွန်အားမဲ့နေတဲ့ အဲဒီ ခံစားချက်နဲ့ လောင်းကစားဆန်တဲ့ သဘာဝက သူမကို စိတ်မသက်မသာ ဖြစ်စေခဲ့သည်။
ဒါပေမဲ့... သူမမှာ ရွေးချယ်စရာ မရှိဘူး ဆိုတာ ဖူရွှမ်နီ သိပေသည်။
သူမဟာ တစ်ဖက်လူရဲ့ ညွှန်ကြားချက်ကို လိုက်နာပြီး ရွေးချယ်စရာတွေ ရွေးချယ်တဲ့အခါ လောင်းကစား လုပ်ရုံသာ တတ်နိုင်၏။
အကယ်၍ သူမ နိုင်ရင် အသက်ရှင်နိုင်မည်ဖြစ်ပြီး အကယ်၍ သူမ ရှုံးရင် ဒီကမ္ဘာကြီးကို နှုတ်ဆက်လိုက်ရတော့မည်ဟု ဖူရွှမ်နီ ခံစားလိုက်ရသည်။
နောက်ဆုံးတော့ သူမဟာ အံကြိတ်ပြီး သူမ၏ ရွေးချယ်မှုကို ပြုလုပ်လိုက်သည်။
၃...
၆....
၈....
လူသားမဟုတ်သော အရာ....
မိစ္ဆာ အမြုတေ......
တိုက်ခိုက်မှု ပြန်ကန်ထွက်ခြင်း......
[သင့် ကိုယ်ပိုင် ဂုဏ်သတ္တိများကို ကျပန်း သတ်မှတ်ပေးနေပါသည်...]
[ဖြန့်ဝေခြင်း အောင်မြင်ပါသည်]
[ရေတွက်ခြင်း - ၁၀၊ ၉...]
[... ၀]
[သရုပ်ဖော်ခြင်း စတင်ပါပြီ]
သူမရှေ့က စာလုံးများ ချက်ချင်း ပျောက်ကွယ်သွားခဲ့ပြီး သူမ၏ အမြင်အာရုံက အမှောင်ထုထဲ ကျရောက်သွားသလို ဖူရွှမ်နီ ခံစားလိုက်ရလေသည်။
'ဘာဖြစ်နေတာလဲ..'
သူမ ကြောင်အသွားခဲ့သည်။
'သူမ ရွေးချယ်မှု မှားယွင်းပြီး အသတ်ခံလိုက်ရတာလား.....'
'ဒါပေမဲ့... ဘာလို့ သူမ အသိစိတ် ရှိနေသေးတာလဲ..'
ဖူရွှမ်နီ သူမ လှုပ်ရှားနိုင်ပြီ ဖြစ်ကြောင်း တွေ့ရှိလိုက်သော်လည်း သူမခန္ဓာကိုယ်ထဲမှ ခွန်အားက သနားစရာကောင်းလောက်အောင် နည်းပါးနေခဲ့သည်။ သူမဟာ မွေးကင်းစ ကလေးငယ် တစ်ယောက်ထက်တောင် ပိုအားနည်းနေသဖြင့် ကြောင်အသွားခဲ့ရပေသည်။
'ဒါ့အပြင် သူမခန္ဓာကိုယ်ထဲက ဝိညာဉ်စွမ်းအင်တွေကော ဘယ်ရောက်သွားလဲ...'