အခန်း ၁၀၂ : ဒီကိစ္စနဲ့ ပက်သက်တဲ့ အချက်အလက်တွေ ယူလာခဲ့
"ရှင်တို့ ဆက်သွယ်ရေး အဆောင်နဲ့ ပို့ခဲ့တဲ့ အရေးပေါ် သတင်းအရ ခင်ဗျားတို့ မြင့်မြတ်သောနှလုံးသား နန်းတော်က မိစ္ဆာကျင့်ကြံသူ တချို့နဲ့ တိုက်ခိုက်ပြီးသွားပြီ မဟုတ်လား.... အသုံးဝင်တဲ့ အချက်အလက် တချို့လည်း မှတ်သားထားမှာပဲ အကုန်လုံး ထုတ်ပေးပါ"
ဒီအချိန်မှာ ကြည်လင်ပြတ်သားပြီး သာယာနာပျော်ဖွယ် ကောင်းသည့် အသံတစ်သံ ထွက်ပေါ်လာပြီး ရှိနေသူ အားလုံးရဲ့ အာရုံစိုက်မှုကို ဆွဲဆောင်လိုက်သည်။
ဒီအချိန်ကျမှ ချင်းဟယ် မြို့ပိုင်မင်း သတိထားမိလိုက်သည်။ နေပြည်တော်နှင့် ပြည်နယ်မြို့တော်မှ အရေးကြီး ပုဂ္ဂိုလ်များကြားတွင် ငယ်ရွယ်ပြီး လှပသော အမျိုးသမီး တစ်ဦး ရှိနေခဲ့လေသည်။
မြို့ပိုင်မင်း၏ မျက်လုံးထဲတွင် ဒီအမျိုးသမီးက မိန်းကလေး (၁၀၀) ပေါင်းစပ်ထားတာထက်တောင် ပိုလှနေခဲ့သည်။
အထူးသဖြင့် ဒီအမျိုးသမီးဆီ၌ မှိန်ဖျဖျ အရှိန်ဝါတစ်ခု ရှိနေခဲ့ရာ ၎င်းက သူ့ကို တော်တော်လေး တုန်လှုပ်သွားစေခဲ့သည်။
မြို့ပိုင်မင်းဟာ ဖူရွှမ်နီကို တစ်ချက် လှမ်းကြည့်လိုက်ပြီး သူမကို ဆက်မကြည့်ရဲတော့ပေ။
သို့သော် ဘာလို့ သူ ဆက်မကြည့်ရဲတာလဲဆိုတာကတော့ သူကိုယ်တိုင်တောင် မသိပေ။
သူ့ရင်ထဲမှာ ကြောက်ရွံ့မှု တစ်ခု ရှိနေသလိုပင်။
ဖူရွှမ်နီ၏ ကိုယ်ပိုင်အမှတ်အသား အစစ်အမှန်ကို သူ မသိသဖြင့် အခြား အရာရှိ (၂) ဦးကိုသာ အသနားခံသော အကြည့်ဖြင့် ကြည့်လိုက်၏။
သူတို့ထဲမှ အရာရှိ တစ်ဦးက ချက်ချင်း ပြောလိုက်သည်။ "သတင်းအချက်အလက် အားလုံး ထုတ်ပေးပါ"
သူတို့ ဖူရွှမ်နီ၏ ကိုယ်ပိုင်အမှတ်အသားကို သီးသန့် မိတ်ဆက်ပေးခြင်း မရှိပေ။
......
ဒါက ဖူရွှမ်နီ သူတို့ကို ကြိုတင် မှာကြားထားခြင်း ဖြစ်၏။
မဟုတ်ပါက မဟာယန်မင်းဆက်ရဲ့ မင်းသမီးတစ်ပါးက ချင်းဟယ်ခရိုင်ကို ရောက်လာတဲ့ သတင်းက တစ်ရက်မပြည့်ခင် ခရိုင်တစ်ခုလုံး ပျံ့နှံ့သွားမှာဖြစ်ပြီး လူတိုင်း သိကုန်ကြပေလိမ့်မည်။
အဲဒီလိုသာ ဖြစ်ခဲ့ရင် မလိုအပ်တဲ့ ပြဿနာတွေ အများကြီး ရှိလာပေလိမ့်မည်။
ဒါကို ကြားတော့ မြို့ပိုင်မင်း ဘယ်လောက်ပဲ ဉာဏ်ထိုင်းပါစေ သိလိုက်သည်။ ဒီအရေးကြီး ပုဂ္ဂိုလ်တွေ အားလုံးကြားမှာ ဒီအမျိုးသမီးရဲ့ ရာထူး အဆင့်အတန်းက ထိပ်ဆုံးမှာ ရှိနေတယ် ဆိုတာကိုပင်။
ပြည်နယ်မြို့တော်မှ အရာရှိ (၂) ဦးစလုံးက ဒီလောက် ငယ်ရွယ်တဲ့ အမျိုးသမီး တစ်ယောက်ကို ဒီလောက် လေးစားနေကြတာ....
ဖြစ်နိုင်တာက…
မြို့ပိုင်မင်း ရုတ်တရက် သဘောပေါက်သွားသော်လည်း အပေါ်ယံတွင်မူ အုတ်အော်သောင်းတင်း မဖြစ်ရဲပေ။ သူ အလျင်စလို ခေါင်းငြိမ့်ပြီး ပြောလိုက်၏။"ကျွန်တော် အခုပဲ သွားယူပါ့မယ်.."
ထို့နောက် သူဟာ သူ့ဘေးနားက ရဲမက်ကို ပြောလိုက်သည်။ "ဧည့်သည်တော် ဝန်ကြီးပိနဲ့ တခြားသူတွေကို မြန်မြန် သွားခေါ်လိုက်..."
"ပြီးတော့ ဟို ပိုင်... အဲ....နေဦး"
ကျင့်ကြံသူ ပိုင်ဆိုတာ သူ ရန်စလို့ မတတ်နိုင်သည့် စွမ်းအားကြီးတဲ့ တည်ရှိမှု တစ်ခု ဆိုတာ မြို့ပိုင်မင်း သတိရလိုက်သည်။
အကယ်၍ တစ်ဖက်လူက နန်းတော်နဲ့ မပတ်သက်ချင်တာကို သူက တစ်ဖက်လူကို သွားခေါ်လိုက်ရင် ကျင့်ကြံသူ ပိုင်ကို ရန်စသလို ဖြစ်သွားပေမည်။
ထို့အပြင် ကျင့်ကြံသူ ပိုင်က ချင်းဟယ် ခရိုင်မှာ နေတာဖြစ်ပြီး ချင်းဟယ် ခရိုင်ထဲမှာ ကျင့်ကြံသူ ပိုင်ကို ရန်စလိုက်တာက ရိုးရိုးရှင်းရှင်း သေလမ်းရှာတာပင်။
သူ ချက်ချင်း စကား ပြောင်းပြောလိုက်သည်။ "ကျင့်ကြံသူ ပိုင်ကို ခဏ စောင့်လို့ ရပါတယ်... ဧည့်သည်တော်ဝန်ကြီးပိကို အရင် သွားခေါ်လိုက်..."
ပြောပြီးနောက် မြို့ပိုင်မင်းဟာ မြင့်မြတ်သော နှလုံးသား နန်းတော်ရှိ မိစ္ဆာကျင့်ကြံသူများနှင့် သက်ဆိုင်သော ဖိုင်အချို့ သွားယူရန် ပြေးထွက်သွားခဲ့သည်။ ဒီဖိုင်များကို လွန်ခဲ့သော ရက်အနည်းငယ် အတွင်း စီစဉ်ထားခြင်း ဖြစ်သဖြင့် ရှာတွေ့ရန် အလွန် လွယ်ကူပေသည်။
အလွန် လျင်မြန်စွာဖြင်ပ သူဟာ ကြိုးဖြင့် ချည်နှောင်ထားသည့် စာအုပ် တစ်အုပ်ကို သယ်ဆောင်ပြီး အလျင်စလို ပြေးပြန်လာခဲ့သည်။
ထို့နောက် သူ့နဖူးပေါ်က ချွေးတွေကို အင်္ကျီလက်စဖြင့် သုတ်လိုက်ပြီး ဖူရွှမ်နီကို အမြန် ပေးလိုက်၏။
"သခင်မ... ဒါက ချင်းဟယ် ခရိုင်ရုံး လွန်ခဲ့တဲ့ ရက်အနည်းငယ် အတွင်း စုစည်းထားတဲ့ သတင်းအချက်အလက် ဖိုင်ပါ"
သူ့လေသံက အလွန်လေးစားမှုတို့ဖြင့် ပြည့်နက်နေခဲ့သည်။"ကျေးဇူးပြုပြီး ကြည့်ရှုပေးပါ သခင်မ..."
ဖူရွှမ်နီ ယူလိုက်ပြီး စာမျက်နှာ အနည်းငယ် လှန်လှောကြည့်ရှုလိုက်သည်။ အထဲက အရာအားလုံးကို သူမ အလွတ်ကျက်မှတ်နေသကဲ့သို့ပင်။
သူမ ဖြည်းညှင်းစွာ မျက်မှောင်ကြုတ်လိုက်၏။
သူမ အလွန် စူးရှသော အကြည့်ဖြင့် ချင်းဟယ် မြို့ပိုင်မင်းကို တစ်ချက် ကြည့်လိုက်ပြီး အေးစက်သည့် အသံဖြင့် မေးလိုက်သည်။ "မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေကို ခရိုင်ရုံးထဲ စိမ့်ဝင်ခွင့် ပြုလိုက်တာလား... ပြီးတော့ တစ်ယောက်တည်းလည်း မဟုတ်ဘူး.... ဒီမိစ္ဆာကျင့်ကြံသူတွေက ခရိုင်ရုံးထဲက လူတွေကို သတ်ပြီး သူတို့ရဲ့ ကိုယ်ပိုင်အမှတ်အသား နေရာမှာ အစားထိုးဖို့ ရုပ်ဖျက်ထားကြတာကို ရှင်တို့က ဒီလောက် နောက်ကျမှ ရှာတွေ့တာလား"
ထို့စကားတို့ကြောင့် မြို့ပိုင်မင်း ချွေးစေးများ ပြန်လာခဲ့သည်။
ဒီကိစ္စကို သူ ဘယ်လိုမှ ကျော်လွှားလို့ မရနိုင်ကြောင်း သိပြီး ဘာပဲဖြစ်ဖြစ် ဒါက တကယ်ကို ခရိုင်ရုံးရဲ့ အမှားပင်။
အထူးသဖြင့် ခရိုင်ရုံးထဲမှာ မိစ္ဆာကျင့်ကြံသူတွေရဲ့ သတ်ဖြတ်ခြင်း ခံလိုက်ရတဲ့ အရာရှိတွေနဲ့ သူတို့ထဲက တစ်ယောက်က ဒုတိယ မြို့ပိုင်မင်း
တောင် ဖြစ်နေခဲ့သည်။
ဒါက ချင်းဟယ် ခရိုင်ရဲ့ ဒုတိယ အကြီးအကဲဖြစ်သလို နန်းတော်ရဲ့ အရာရှိ တစ်ယောက်လည်း ဖြစ်ပေသည်။
ဒီလိုလူမျိုး မိစ္ဆာကျင့်ကြံသူ တစ်ယောက်ရဲ့ လက်ချက်နဲ့ သေဆုံးသွားတာ သေချာပေါက် ကိစ္စကြီး တစ်ခု ဖြစ်နေပေပြီ။
မြို့ပိုင်မင်း အလျင်စလို ပြောလိုက်၏ "သခင်မ...ဒီကိစ္စက..."
သူ ပြန်ဖြေပြီး ကိုယ့်ကိုယ်ကိုယ် ကာကွယ်ပြောဆိုဖို့ ပြင်လိုက်ချိန်မှာပင် လူတစ်ယောက် အလျင်စလို ဝင်ရောက်လာခဲ့ပြီး မြို့ပိုင်မင်း၏ စကားကို ဖြတ်ပြောလိုက်သည်။
"ချင်းဟယ် ခရိုင်ရဲ့ ဧည့်သည်တော် ဝန်ကြီး ပိရွှီ ပါ..."
"အရှင်တို့ကို နှုတ်ခွန်းဆက်သပါတယ်..."
ဝင်လာသူမှာ ပိရွှီ ဖြစ်ကြောင်း မြို့ပိုင်မင်း မြင်လိုက်ရသောအခါ သူဟာ စိတ်လှုပ်ရှားလွန်းလို့ မျက်ရည်တောင် ကျလုနီးပါး ဖြစ်သွားခဲ့ရသည်။ အဘယ်ကြောင့်ဆိုသော် သူလို သာမန်လူ တစ်ယောက် အနေနဲ့ ဒီပုဂ္ဂိုလ်ကြီးတွေကို လှည့်စားနိုင်မှာ မဟုတ်ဘူးလို့ ခံစားရလို့ပင်။
အကယ်၍ အပြစ်တို့ကို သူ ကျောပေါ် ထမ်းရရင် သူ့ဘဝမှာ ရာထူးတိုးဖို့ မဖြစ်နိုင်တော့သလို အဆိုးဆုံး အခြေအနေမှာ အိမ်ပြန်ပြီး အငြိမ်းစားယူလိုက်ရနိုင်လေသည်။
ပိရွှီဟာ ဒီနေရာသို့မဝင်ခင်မှာ ခရိုင်ရုံးထဲမှာ ပြောဆိုနေကြတာတွေကို ဝါးတားတား ကြားခဲ့ရတာကြောင့် မြို့ပိုင်မင်း ကိုယ်စား ဒီမေးခွန်းကို ဖြေကြားပေးလိုက်သသည်။"သခင်မ ခရိုင်ရုံးက တကယ် ပေါ့ဆခဲ့ပြီး မိစ္ဆာကျင့်ကြံသူတွေကို ဟာကွက်ကနေ အခွင့်ကောင်းယူခွင့် ပေးလိုက်မိပါတယ်...ရလဒ်အနေနဲ့ ချင်းဟယ် ခရိုင်ရဲ့ ဒုတိယ မြို့ပိုင်မင်းနဲ့ အရာရှိ အများအပြား မိစ္ဆာကျင့်ကြံသူတွေရဲ့ လက်ချက်နဲ့ သေဆုံးခဲ့ရပါတယ်"
"ဒါပေမဲ့ ကျင့်ကြံသူ ပိုင် ရဲ့ အကူအညီနဲ့ ကျွန်တော်တို့ မိစ္ဆာကျင့်ကြံသူတွေရဲ့ ပူးပေါင်းကြံစည်မှုကို လျင်မြန်စွာ ဖော်ထုတ်နိုင်ခဲ့ပြီး ခရိုင်ရုံးထဲမှာ ပုန်းအောင်းနေတဲ့ မိစ္ဆာကျင့်ကြံသူ အားလုံးကို ရှာဖွေတွေ့ရှိခဲ့ပါတယ်..."
"ဒါပေမဲ့ ကျွန်တော်တို့ အလျင်စလို အရေးယူဆောင်ရွက်ခြင်း မလုပ်ခဲ့ပါဘူး... ဒါအစား ပိုက်ကွန်ထဲ နောက်ထပ် ငါးတွေ ကူးခပ်ဝင်လာဖို့ စောင့်ဆိုင်းဖို့ ပြင်ဆင်ခဲ့ပြီး နောက်ဆုံးတော့ သူတို့အားလုံးကို တစ်ခါတည်း ဖမ်းဆီးနိုင်ဖို့ ရည်ရွယ်ခဲ့ပါတယ်..."
"ဒီနည်းနဲ့ လူတချို့ သေချာပေါက် စတေးခံလိုက်ရပေမယ့်... မိစ္ဆာကျင့်ကြံသူ အားလုံးကို တစ်ခါတည်း ဖမ်းဆီးနိုင်ခဲ့ပါတယ်..."
ပိရွှီက ဒါတွေ အားလုံးကို အောင်မြင်မှု တစ်ခု အနေနဲ့ တိုက်ရိုက် ကြေညာခြင်းမပြုခဲ့ပေ။ ထိုအစား မိစ္ဆာကျင့်ကြံသူ အားလုံးကို တစ်ခါတည်း ဖမ်းဆီးဖို့ ထောင်ချောက်ဆင်နိုင်ရန် အတွက် ခရိုင် အရာရှိ အနည်းငယ်ကို စတေးခဲ့ရကြောင်း ပြောလိုက်၏။
ဒါက သူ့စကားတွေကို ပိုယုံကြည်နိုင်လောက်အောင် ဖြစ်သွားစေပြီး သူ ကြွားဝါနေတယ်လို့ လူတွေကို မြင်ရခက်စေပေသည်။
တစ်ချိန်တည်းမှာပင်… ပိုင်ယီ ခရိုင်ရုံးကို ကူညီခဲ့ကြောင်း သူ ဖုံးကွယ်မထားခဲ့ပေ။ ဒီလိုကိစ္စမျိုးက ဖုံးကွယ်လို့ မရရာ တိုက်ရိုက် ပြောလိုက်တာ ပိုကောင်းလေသည်။
ပြည်နယ် အစိုးရ အရာရှိ (၂) ဦး တစ်ယောက်ကို တစ်ယောက် ကြည့်လိုက်ကြပြီး သူတို့ထဲမှ တစ်ဦး ဒေါသတကြီး မပြောဘဲ မနေနိုင်တော့ပေ။ "မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေကို ရှင်းလင်းဖို့ အတွက် မင်းရဲ့ လုပ်ဖော်ကိုင်ဖက်တွေကို ငါးစာအဖြစ် အသုံးပြုခဲ့တာလား... ဒါကို ကစားပွဲ လို့ ထင်နေတာလားကွ... တကယ်လို့ မင်း အဲဒီ မိစ္ဆာကျင့်ကြံသူတွေကို အပြတ် မရှင်းနိုင်ခဲ့ရင် မင်းရဲ့ လုပ်ဖော်ကိုင်ဖက်တွေ အလကားသက်သက် အသတ်ခံရသလို ဖြစ်မသွားဘူးလား.... ခရိုင်ရုံးကလည်း မိစ္ဆာ အသိုက်အမြုံအဖြစ် ပြောင်းလဲသွားမှာ မဟုတ်ဘူးလား..."
...