အခန်း ၁၀ : သူတော်စင်မ၏ ဒုတိယအကြိမ် သရုပ်ဖော်ခြင်းဘဝ
နောက်တစ်နေ့ မွန်းတည့်ချိန်တွင်...
မသေမျိုးကျင့်ကြံခြင်း သရုပ်ဖော် စနစ်၏ အချိန်စောင့်ဆိုင်းရမှုဟာ နောက်ဆုံးတွင် ပြီးဆုံးသွားပြီ ဖြစ်၏။ ပိုင်ယီဟာ ချန်ချန်ရွှယ် သရုပ်ဖော် စနစ်ထဲ ဆက်လက် ဝင်ရောက်လာမည့် အချိန်ကို တိတ်ဆိတ်စွာ စောင့်ဆိုင်းနေခဲ့လေသည်။ သူဟာ သူမ သေချာပေါက် ပြန်ဝင်လာမည်ကို သိနေခဲ့ပေသည်။
ဒီတစ်ခါတော့ ချန်ချန်ရွှယ်ကို စနစ်ထဲ ဝင်လာအောင် ဆွဲဆောင်ဖို့အတွက် ဘာလှည့်ကွက်မှတောင် သုံးစရာ မလိုတော့ပေ။
သူမ ကိုယ်တိုင် စိတ်လိုလက်ရ ဒုတိယအကြိမ် သရုပ်ဖော် ဘဝကို အသက်သွင်းပေလိမ့်မည်။
အဘယ်ကြောင့်ဆိုသော် ချန်ချန်ရွှယ်ဟာ သရုပ်ဖော် ဘဝရဲ့ အကျိုးကျေးဇူးကို မြည်းစမ်းပြီး ဖြစ်တာကြောင့်ပင်။။
မျှော်လင့်ထားသည့်အတိုင်းပင် ချန်အိမ်တော်မှာ ရှိနေသည့် ချန်ချန်ရွှယ်ဟာ မသေမျိုးကျင့်ကြံခြင်း သရုပ်ဖော် စနစ်အား သူမ စိတ်ထဲကနေ လှမ်းခေါ်နေကြောင်း ပိုင်ယီ အလျင်အမြန် အာရုံခံမိလိုက်၏။ သူမ အနေနဲ့ စနစ်ထဲကို ဝင်ရောက်ပြီး မသေမျိုးကျင့်ကြံခြင်း သရုပ်ဖော် ဘဝအသစ်တစ်ခုအား စတင်လို့ ရတာကို ခံစားမိနေပုံ ရလေသည်။
ဒါပေမဲ့ လုပ်ပိုင်ခွင့် အာဏာရှိသူ ဖြစ်တဲ့ ပိုင်ယီက ခွင့်ပြုမှသာ စနစ်ထဲ ဝင်လို့ရမယ် ဆိုတာကိုတော့ သူမ မသိရှာပေ။
သူခွင့်ပြုမှသာ သရုပ်ဖော် ဘဝအသစ် စတင်လို့ ရပေမည်။
"အချိန်စောင့်ဆိုင်းရမှု ပြီးတာ မိနစ်ပိုင်းပဲ ရှိသေးတယ်... စနစ်ထဲ ဝင်ချင်နေပြီလား"
ပိုင်ယီဟာ ပြုံးလိုက်၏။
ကြည့်ရတာ... ဝိညာဉ်ဓားဂိုဏ်း သူတော်စင်မက ငါးစာကို အပြည့်အဝ ဟပ်မိသွားပေပြီ။
"သူမ ဒုတိယဘဝကို ဘယ်လို ဖြတ်သန်းမလဲ ဆိုတာတော့ မသိသေးဘူး... ဘာပဲဖြစ်ဖြစ် ပြီးခဲ့တဲ့ သရုပ်ဖော် ဘဝတုန်းက ကျားတစ်ကောင် လက်ချက်နဲ့ သေဆုံးခဲ့ရတာကိုး"
"ဒီလို အန္တရာယ်မျိုး ထပ်မကြုံရအောင် နောက်ဆုတ်ပြီး သရုပ်ဖော် ဘဝအသစ်တစ်ခုကို စတင်ဖို့ ရွေးချယ်မလား"
"ဒါမှမဟုတ် လက်စားချေဖို့ နည်းလမ်းရှာရင်း အရင်ဘဝကိုပဲ ဆက်လက် ဖြတ်သန်းမလားပဲ.... ပြီးတော့ သူမက ကိုယ့်ကိုယ်ကိုယ် ပြန်သက်သေပြချင်နေတာ.."
"သူမရဲ့ စရိုက်အရ ဆိုရင်တော့ ဒုတိယတစ်နည်း ဖြစ်ဖို့ ပိုများတယ်"
"ဘာပဲဖြစ်ဖြစ် သူက သူတော်စင်မလေ... အနည်းဆုံးတော့ မာနလေးတော့ ရှိဦးမှာပေါ့"
သူဟာ စနစ်ထဲ ဝင်ရောက်ခွင့်ကို ဖွင့်ပေးလိုက်၏။
ထို့နောက် သူမအား စနစ်ထဲ ဖိတ်ခေါ်လိုက်လေသည်။
...
တစ်ချိန်တည်းမှာပင် ချန်အိမ်တော်၌.....
[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ ဒုတိယအကြိမ် မသေမျိုးကျင့်ကြံခြင်း သရုပ်ဖော်မှုကို အသက်သွင်းမည်မှာ သေချာပါသလား]
'ပေါ်လာပြီ..'
ရင်းနှီးနေသော သတိပေးချက်ပါပင်။
ချန်ချန်ရွှယ်ဟာ စိတ်သက်သာရာရစွာ သက်ပြင်းချလိုက်မိသည်။ သူမဟာ စိတ်ထဲကနေ သရုပ်ဖော် စနစ်ကို အကြိမ်ကြိမ် ခေါ်နေခဲ့ပေသည်။ ဒါပေမဲ့ စနစ်က ဘာမှ ပြန်မတုံ့ပြန်ခဲ့တာကြောင့် တစ်ခုခု မှားယွင်းသွားပြီလားလို့ စိတ်ပူနေခဲ့ရလေသည်။
အခုတော့ စနစ်က ဘာမှ မမှားယွင်းကြောင်း သိလိုက်ရပြီး သူမအား ပြန်တုံ့ပြန်လာခဲ့လေသာ်။။
"သေချာတယ်.."
[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ သင်ဟာ ဒုတိယအကြိမ် မသေမျိုးကျင့်ကြံခြင်း သရုပ်ဖော်မှုကို အသက်သွင်းရန် အတည်ပြုလိုက်ပြီ ဖြစ်ပါသည်]
[လက်ရှိတွင် သင့်၌ ရွေးချယ်စရာ နှစ်ခု ရှိပါသည် - ]
[ရွေးချယ်စရာ ၁ - ပြီးခဲ့သည့် မသေမျိုးကျင့်ကြံခြင်းဘဝ သရုပ်ဖော်မှုကို ဆက်လက်လုပ်ဆောင်မည်။ သို့သော် အစမှ အကုန်ပြန်စရမည် ဖြစ်ပြီး မွေးရာပါ ပါရမီအသစ်ကို ချက်ချင်း ပြန်လည်ရွေးချယ်၍ မရနိုင်ပါ။ ပါရမီအသစ် ပြန်လည်ရရှိရန်အတွက် သရုပ်ဖော်မှုထဲတွင် အနှစ် ၂၀ ကြာအောင် အသက်ရှင်နေထိုင်ရန် လိုအပ်ပါသည်။]
[ရွေးချယ်စရာ ၂ - မသေမျိုးကျင့်ကြံခြင်းဘဝ သရုပ်ဖော်မှု အသစ်တစ်ခုကို ရွေးချယ်မည်။ မွေးရာပါ ပါရမီအသစ်ကို ချက်ချင်း ပြန်လည်ရွေးချယ်နိုင်ပါသည်။]
ချန်ချန်ရွှယ်ဟာ ကြောင်အသွားခဲ့သည်။
'ရွေးချယ်စရာ နှစ်ခု...'
သူမ သေချာ ဖတ်ကြည့်လိုက်တော့ ရွေးချယ်စရာ တစ်ခုစီမှာ အားသာချက် ကိုယ်စီ ရှိသလို အားနည်းချက် ကိုယ်စီလည်း ရှိနေကြောင်း တွေ့လိုက်ရ၏။
ရွေးချယ်စရာ ၁ ကို ရွေးရင် လွန်ခဲ့တဲ့ (၅) နှစ်တာ ဗဟုသုတနဲ့ အတွေ့အကြုံတွေကို ဆက်လက် သယ်ဆောင်သွားနိုင်ပေမည်။
ဒါပေမဲ့ အဲဒီ ညံ့ဖျင်းတဲ့ ပါရမီတွေကိုပဲ ဆက်လက် ဆက်ခံရမည် ဖြစ်သည်။
ဖြစ်နိုင်တာကတော့... သူမကို သတ်ခဲ့ဖူးတဲ့ အဲဒီကျားနဲ့ ပြန်တွေ့ရဦးမည်ပင်။
ရွေးချယ်စရာ ၂ ကို ရွေးရင် မွေးရာပါ ပါရမီတွေက ပိုကောင်းလာနိုင်တဲ့ ဖြစ်နိုင်ခြေ ရှိလေသည်။
သူမရဲ့ မိသားစု နောက်ခံကအစ ပိုကောင်းလာနိုင်ပေသည်။
ဒါပေမဲ့ ဖြစ်နိုင်ခြေဆိုတဲ့ စကားလုံးကြောင့် သူမ ဆုံးရှုံးသွားနိုင်လေသည်။
အကြောင်းမှာ ကံတရား အပေါ် မူတည်နေခြင်းကြောင့်ပင်။
"ရွေးချယ်စရာ ၁.."
နှစ်ခုလုံးရဲ့ အားသာချက်၊ အားနည်းချက်တွေကို သိပြီးနောက်မှာ ပိုင်ယီ ခန့်မှန်းခဲ့သလိုပါပဲ ချန်ချန်ရွှယ်ဟာ ပထမ ရွေးချယ်စရာကို ချက်ချင်း ရွေးချယ်လိုက်၏။ ဝိညာဉ်ဓားဂိုဏ်း သူတော်စင်မ အနေနဲ့ ချန်ချန်ရွှယ်မှာ ငယ်စဉ်ကတည်းက မာနတစ်ခု ရှိခဲ့လေသည်။ ထို့ကြောင့် သူမဟာ ကိုယ့်ကိုယ်ကိုယ် ပြန်သက်သေပြချင်ခဲ့သည်။
ပထမအကြိမ်တုန်းက သူမ ပေါ့ဆခဲ့လို့ ကျားရဲ့ တိုက်ခိုက်မှုကို မရှောင်နိုင်ခဲ့ပေ။
အခု ဒုတိယအခွင့်အရေး ရလာတော့ သူမ အနေနဲ့ အရင်လမ်းဟောင်းအတိုင်း ပြန်လျှောက်တော့မှာ မဟုတ်တာ သေချာပေသည်။
[သင် ရွေးချယ်စရာ ၁ ကို ရွေးချယ်လိုက်ပြီ ဖြစ်ပါသည်။ ပထမအကြိမ် သရုပ်ဖော်မှုမှ ရရှိခဲ့သော မွေးရာပါ ပါရမီ (၃) ခုနှင့် ဂုဏ်သတ္တိများကို ဆက်လက် ရယူပါမည်။]
[အမည် - ချန်ချန်ရွှယ်]
[ခန္ဓာကိုယ်ဖွဲ့စည်းပုံ - ၃]
[စိတ်စွမ်းအား - ၃]
[မိသားစု နောက်ခံ - ၁]
[ကံတရား - ၃]
[ဂုဏ်သတင်း - ၁]
[ပါရမီ - ဉာဏ်အလင်းပွင့်သော ဆရာသခင်၏ လက်ဆောင်၊ ဘိုးဘေးပိုင် ကျောက်စိမ်းဆွဲပြား၊ ဓား]
ရင်းနှီးနေသော ဂုဏ်သတ္တိ ဇယားကွက်နှင့် မွေးရာပါ ပါရမီ (၃) ခု။
ချန်ချန်ရွှယ်ဟာ စိတ်ငြိမ်အောင် အစွမ်းကုန် ကြိုးစားလိုက်၏။ ဒီတစ်ခါ ပထမအကြိမ်ထက် ပိုအသက်ရှင်နိုင်မယ်လို့ သူမ ယုံကြည်လေသည်။
အခိုင်အမာကို ယုံကြည်ပေသည်။
[သင့်၏ သရုပ်ဖော် မသေမျိုးကျင့်ကြံခြင်းဘဝ တရားဝင် စတင်ပါတော့မည် - ]
[ရေတွက်ခြင်း - ၁၀၊ ၉... ၀]
[သာရုပ်ဖော်မှု စတင်ပြီ]
...
ထင်ထားတဲ့အတိုင်းပင်။
သူမှန်အောင် ခန့်မှန်းနိုင်ခဲ့မှန်း ပိုင်ယီ သိလိုက်သည်။ သူတော်စင်မ ဆိုတဲ့ မာနကြောင့် ချန်ချန်ရွှယ် အနေနဲ့ ထွက်ပြေးဖို့ ဆိုတဲ့ အချက်ကို လက်မခံနိုင်ခဲ့ချေ။
ဒါ့အပြင် သာရုပ်ဖော် စနစ်ထဲမှာ သေဆုံးသွားရင် ပြန်စလို့ ရပေသည်။
သရုပ်ဖော် စနစ်ထဲက အချိန်စီးဆင်းမှုက လက်တွေ့ကမ္ဘာထက် အများကြီး ပိုမြန်ပြီး ပိုင်ယီ လက်ဖက်ရည် တစ်ခွက် ငှဲ့သောက်လိုက်ရုံပဲ ရှိသေးပေမဲ့ ချန်ချန်ရွှယ်ကတော့ သရုပ်ဖော် စနစ်ထဲမှာ အမေဗိုက်ထဲကနေ မွေးဖွားလာခဲ့ပေသည်။
စနစ်ထဲမှာ သူမြင်ရတဲ့ စာသားတွေက ချန်ချန်ရွှယ် မြင်ရတာတွေနဲ့ မတူချေ။
[အသက် ၀ နှစ် - ချန်ချန်ရွှယ်ဟာ မသေမျိုးကျင့်ကြံခြင်း ကမ္ဘာတစ်ခုသို့ ဝင်စားခဲ့ပြီး ဆင်းရဲသော မိသားစုတစ်ခုတွင် မွေးဖွားခဲ့ပါသည်။ သူမ၏ မိခင်ဟာ ဘိုးဘေးပိုင် ကျောက်စိမ်းဆွဲပြားကို ပေးခဲ့သည်။]
[ကံတရား +၁]
[မွေးဖွားခါစ ချန်ချန်ရွှယ်ဟာ အသက်ရှူနည်းစနစ်ကို စတင် လေ့ကျင့်ခဲ့ပြီး မမျှော်လင့်ဘဲ အလွန် ချောမွေ့နေခဲ့သည်။]
[အသက် ၁ နှစ်ခွဲ - ချန်ချန်ရွှယ်ဟာ သူမ၏ မိခင်အဖြစ် ဟန်ဆောင်ပြီး ဖခင်ဖြစ်သူထံ စာရေးခဲ့သည်။ သမီးလေး မွေးဖွားလာကြောင်း သိလိုက်ရသောအခါ ဖခင်ဖြစ်သူဟာ အိမ်သို့ အမြန်ပြန်လာခဲ့ပြီး သေဘေးမှ လွတ်မြောက်ခဲ့သည်။]
[မိသားစု နောက်ခံ +၁]
[အသက် ၁ နှစ် - ချန်ချန်ရွှယ်ဟာ ကြိုးကြိုးစားစား ကျင့်ကြံခဲ့သည်။]
[အသက် ၂ နှစ် - ဆက်လက်၍ ကြိုးကြိုးစားစား ကျင့်ကြံခဲ့သည်။]
[အသက် ၃ နှစ် - ရက်စက်သော ဝံပုလွေ တစ်ကောင်ဟာ အစာရှာရန် တောင်အောက် ဆင်းလာခဲ့သည်။ ချန်ချန်ရွှယ်ဟာ ၎င်းကို သေအောင် ရိုက်သတ်ခဲ့သည်။ ရွာတစ်ရွာလုံး အံ့သြတုန်လှုပ်သွားခဲ့ကြသည်]
[အသက် ၄ နှစ် - ကြိုးကြိုးစားစား ကျင့်ကြံခဲ့သည်။]
[အသက် ၅ နှစ် - ချန်ချန်ရွှယ်ဟာ (၅) နှစ်တာ အတွင်းအားကို စုဆောင်းမိခဲ့ပြီ ဖြစ်သည်။ သူမအတွက် ဓားတိုတစ်ချောင်း ဝယ်ပေးရန် ဖခင်ဖြစ်သူကို တောင်းဆိုခဲ့သည်။ ဖခင်ဖြစ်သူက သဘောတူခဲ့သော်လည်း သမီးဖြစ်သူ ဘာလုပ်ချင်မှန်း မသိရှာပေ။]
[ခန္ဓာကိုယ်ဖွဲ့စည်းပုံ +၅]
[ဂုဏ်သတင်း +၁]
[ချန်ချန်ရွှယ်ဟာ အရောင်စုံ ကျားကြီးကို ရှာဖွေရန် တောင်ပေါ်သို့ ကိုယ်တိုင် တက်ရောက်ခဲ့သည်။ နေ့ဝက်လောက် ရှာဖွေပြီးနောက် နောက်ဆုံးတွင် တွေ့ရှိခဲ့သည်။ နှစ်ဖက်လုံး ပြင်းထန်သော တိုက်ခိုက်မှုတို့ ဖြစ်ပွားခဲ့ပြီး လျင်မြန်စွာပင် သေရေးရှင်ရေး တိုက်ပွဲ ဖြစ်လာခဲ့သည်။]
[ချန်ချန်ရွှယ်ဟာ အားအင် အများအပြား အသုံးပြုပြီးနောက် အရောင်စုံ ကျားကြီးကို အနိုင်ယူနိုင်ခဲ့ကာ အောင်မြင်စွာ လက်စားချေနိုင်ခဲ့သည်]
[စိတ်စွမ်းအား +၂]
[...]
သရုပ်ဖော် စနစ်ထဲမှာ (၅) နှစ်ဖြစ်ပေမဲ့ လက်တွေ့မှာ (၅) မိနစ်လောက်သာ ရှိသေးပေသည်။
(၅) မိနစ်လေး အတွင်းမှာပဲ ချန်ချန်ရွှယ်ရဲ့ သရုပ်ဖော် စနစ်ထဲက (၅) နှစ်တာ ကာလကို အကျဉ်းချုပ် ပြသလိုက်၏။ တစ်ချိန်တည်းမှာပဲ ပိုင်ယီဟာ စိတ်သက်သာရာရစွာ သက်ပြင်းချလိုက်လေသည်။ ကြည့်ရတာ သူတော်စင်မက တော်တော် အားကိုးရလေသည်။
ပထမအကြိမ် သရုပ်ဖော်တုန်းက သူမရဲ့ မာနကြောင့် အရောင်စုံ ကျားကြီးကို လျှော့တွက်ခဲ့ပြီး ရှုံးနိမ့်ခဲ့ရသည်။ သို့သော် ဒုတိယအကြိမ် စတင်တဲ့အခါ ချန်ချန်ရွှယ်ဟာ မာနမကြီးတော့ဘဲ ကောင်းကောင်း ပြင်ဆင်ထားခဲ့လေသည်။
ထို့ကြောင့် နောက်ဆုံးတော့ သူမဟာ အရောင်စုံ ကျားကြီးအား အောင်မြင်စွာ အနိုင်ယူနိုင်ခဲ့ပြီး လက်စားချေနိုင်ခဲ့ပေသည်။
ထို့ကြောင့် အနာဂတ်မှာ ဒါက သေချာပေါက် ဆုလာဘ် အပိုဆု အနေနဲ့ ထည့်တွက်ပေးလိမ့်မည်။
နောက်တစ်ဆင့်ကတော့...
"ချန်ချန်ရွှယ် မသေမျိုးကျင့်ကြံသူ ဖြစ်လာမလား မဖြစ်လာဘူးလား ဆိုတာအပေါ် မူတည်နေပြီ"
ပိုင်ယီ ပြောလိုက်စဉ်မှာပင် မသေမျိုးကျင့်ကြံခြင်း သရုပ်ဖော် စနစ်၏ သတိပေးချက် စာသား ထပ်မံ ပေါ်လာခဲ့သည်။
[မွေးရာပါ ပါရမီ - ဉာဏ်အလင်းပွင့်သော ဆရာသခင်၏ လက်ဆောင် အသက်ဝင်လာခဲ့သည်။ ချန်ချန်ရွှယ်ဟာ အရောင်စုံ ကျားကြီးကို ခွဲစိတ်ကြည့်ရှုရာတွင် ၎င်း၏ ဗိုက်ထဲ၌ ဆွေးမြေ့နေသော သစ်သားသေတ္တာ တစ်ခုကို တွေ့ရှိခဲ့သည်။ သစ်သားသေတ္တာထဲတွင် ဓားကျင့်စဉ် (မပြည့်စုံ) ဟူသော မသေမျိုးကျင့်စဉ် မှတ်တမ်းတင်ထားသည့် ကျောက်စိမ်းပြား တစ်ခု ရှိနေခဲ့သည်]
[ချန်ချန်ရွှယ်ဟာ အလွန် ဝမ်းသာသွားခဲ့သည်]
[စိတ်စွမ်းအား +၃]
...