အခန်း (၇) - ခွဲခြမ်းစိတ်ဖြာ၍မရသော ဗီဇပြောင်း မြွေဟောက်ကြီး

“ဂရား..” ဇွန်ဘီက ဟိန်းဟောက်လိုက်ပြီး သူ့ရဲ့လက်ချောင်းတွေကလည်း အလွန်တရာ ထက်မြက်လာပါတယ်။ အဲဒီနောက်မှာတော့ လင်းရှုဆီကို ခုန်အုပ်လိုက်ပါတော့တယ်။

လင်းရှုက ခုနလေးတင် ဇွန်ဘီတွေကို တရစပ် သတ်ဖြတ်ထားတာကြောင့် သူ့ရဲ့တစ်ကိုယ်လုံးမှာ သွေးတွေ စိုရွှဲနေပါတယ်။

ကြည့်ရတာ တကယ့်ကို ထိတ်လန့်စရာကောင်းနေတာပေါ့!

လင်းရှုက အမြန်ရှောင်ဖို့ ကြိုးစားပေမဲ့ ဇွန်ဘီဘော့စ်က အရမ်းမြန်လွန်းပါတယ်။ 'ဗုန်း' ခနဲအသံနဲ့အတူ ဇွန်ဘီက လင်းရှုပေါ်ကို ခုန်အုပ်လိုက်တာကြောင့် သူ မြေပြင်ပေါ်ကို လဲကျသွားပါတယ်။ အဲဒီနောက်မှာတော့ ဇွန်ဘီက သူ့ရဲ့သွေးတွေပေနေတဲ့ ပါးစပ်ကြီးကိုဟပြီး လင်းရှုရဲ့ လည်ပင်းကို ကိုက်ဖို့ ကြိုးစားပါတော့တယ်။

တောက်!

လင်းရှုက သူ့ရဲ့ခြေထောက်နှစ်ဖက်ကို အမြန်ရုပ်ပြီး ဇွန်ဘီရဲ့ ဗိုက်ကို ကန်ထားလိုက်ပါတယ်။ တစ်ဖက်ကလည်း ဇွန်ဘီရဲ့ လက်ကောက်ဝတ်တွေကို ကျစ်ကျစ်ပါအောင် ဆုပ်ကိုင်ထားပြီး သူ့ကို ကိုက်လို့မရအောင် အတင်းတွန်းထားရပါတယ်။

“မင်းရဲ့ ခံတွင်းနံ့က ဘယ်လောက်နံလဲဆိုတာ မင်းသိလား?” လင်းရှုက သွားကြိတ်ပြီး အော်ဟစ်လိုက်ပါတယ်။

ရန်ထျန်းကတော့ တရစပ် တိုးလာနေတဲ့ ဇွန်ဘီတွေကို သတ်နေရတုန်းမို့ လင်းရှုဘက်ကို လှည့်ကြည့်ဖို့တောင် အချိန်မရပါဘူး။

အော်... ဒါနဲ့ ခုနက ငါ ဇွန်ဘီတွေအများကြီး သတ်လိုက်တာ၊ အဆင့် ဘယ်နှစ်ဆင့်တောင် တက်သွားပြီလဲ!?

လင်းရှုက ဇွန်ဘီသတ်တာနဲ့ အလုပ်ရှုပ်နေလို့ ဒါကို မေ့လုနီးပါး ဖြစ်သွားရာကနေ ရုတ်တရက် သတိရသွားပါတယ်။

သူ စိတ်ထဲကနေ အမြန်ကြည့်လိုက်တဲ့အခါမှာတော့ သူက အဆင့် (၅) ကို တောင် ရောက်နေပြီဆိုတာ တွေ့လိုက်ရပါတယ်။

ဒါ့အပြင် သူ့မှာ အပိုမှတ် ၁၂ မှတ် တောင် ရှိနေတာပဲ!

“အားလုံးကို ခွန်အား ထဲမှာပဲ ထည့်လိုက်!” လင်းရှုက အော်လိုက်ပါတယ်။ အဲဒီအချိန်မှာပဲ သူ့ရဲ့ခွန်အားက ၃၈ ကနေ ၅၀ အထိ ချက်ချင်း တိုးသွားပါတော့တယ်!

အင်အားကြီးမားတဲ့ စွမ်းအင်တွေက လင်းရှုရဲ့ ခန္ဓာကိုယ်ထဲကို တမဟုတ်ချင်း စီးဝင်လာပါတယ်။

သူဟာ အခုဆိုရင် အဆင့်နိမ့် စစ်သည်တော်တစ်ယောက်ရဲ့ အင်အားကို ပိုင်ဆိုင်သွားပြီ ဖြစ်ပါတယ်။

“ဘာဖြစ်တာလဲ!?” လင်းရှုရဲ့ အော်သံကို ကြားတော့ ရန်ထျန်းက ဗီဇအတိုင်း လင်းရှုဘက်ကို လှည့်ကြည့်လိုက်ပါတယ်။

သူ မြင်လိုက်ရတာကတော့ လင်းရှုက “ထွက်သွားစမ်း!” လို့ အော်ဟစ်ရင်းနဲ့ ခြေထောက်နဲ့ အားကုန်ကန်ထုတ်လိုက်တာကြောင့် ဇွန်ဘီဘော့စ်ကြီး လွင့်ထွက်သွားတာကိုပါပဲ။

တကယ်တော့ လင်းရှုရဲ့ လက်ရှိအင်အားနဲ့ဆိုရင် ဒီဇွန်ဘီဘော့စ်ကို အလွယ်တကူ သတ်နိုင်ဖို့ မလွယ်သေးပါဘူး။ ဒါပေမဲ့ ဒီဇွန်ဘီက ကျန်းယီ လက်မောင်းကို ပိုင်းလိုက်တုန်းက ဒဏ်ရာကြောင့် သူ့ရဲ့ ခန္ဓာကိုယ်ကြံ့ခိုင်မှုက အားနည်းနေတာလည်း ပါတာပေါ့။

လင်းရှုက အခွင့်အရေးကို လက်မလွတ်ဘဲ မြေပြင်ပေါ်က တိုက်ခိုက်ရေးဓားကို ကောက်ကိုင်ပြီး ရှေ့ကို ပြေးထွက်သွားပါတော့တယ်။

“သေပေတော့!”

ဇွန်ဘီဘော့စ်က လင်းရှုက ဒီလောက်အထိ အရှိန်နဲ့ ပြေးလာပြီး သူ့ရင်ဘတ်ကို တန်းထိုးလိမ့်မယ်လို့ မထင်ထားပုံရပါတယ်။

ဇွန်ဘီက အကျယ်ကြီး အော်ဟစ်လိုက်ပြီး လင်းရှုကို သူ့လက်တွေနဲ့ လှမ်းဖမ်းဖို့ ကြိုးစားပါသေးတယ်။

လင်းရှုကတော့ နောက်ကို တစ်ချက်ဆုတ်ပြီး အေးအေးဆေးဆေးပဲ ရှောင်လိုက်နိုင်ပါတယ်။

ဒါက ဇွန်ဘီဘော့စ်ဆိုတော့လည်း တော်တော်နဲ့ မသေဘဲ မြေပြင်ပေါ်မှာ လူးလိမ့်နေတုန်းပါပဲ။

လင်းရှုရဲ့ နဖူးမှာတော့ ချွေးအေးတွေ ပျံနေပါတယ်။ ခုနက ဇွန်ဘီရဲ့ ထက်မြက်တဲ့ လက်သည်းတွေက သူ့လည်ပင်းကို ကုတ်မိတော့မလို့လေ။

တကယ်လို့သာ ကုတ်မိသွားရင်တော့ ပိုးကူးစက်ခံရမဲ့ အန္တရာယ်ရှိပါတယ်။

လင်းရှုက ဇွန်ဘီရဲ့ ခြေထောက်ကို အားကုန်ကန်လိုက်ပြီး မြေပြင်ပေါ် လဲကျသွားအောင် လုပ်လိုက်ပါတယ်။ အဲဒီနောက်မှာတော့ သူ့ရဲ့ ညာဘက်ခြေထောက်နဲ့ ဇွန်ဘီရဲ့ ရင်ဘတ်ကို နင်းထားပြီး ခေါင်းကို ဓားနဲ့ ပိုင်းချကာ တိုက်ပွဲကို အဆုံးသတ်လိုက်ပါတော့တယ်။

ခေါင်းပြတ်သွားပြီးနောက်မှာတော့ ဇွန်ဘီက ငြိမ်ကျသွားပါပြီ။

“ဒင်~~”

“ဂုဏ်ယူပါတယ် ပိုင်ရှင်၊ ဇွန်ဘီဘော့စ်ကို သတ်ဖြတ်နိုင်ခဲ့ပါတယ်။ အဆင့် (၆) သို့ တက်သွားပြီဖြစ်ပြီး မျိုးဗီဇသော့ခတ်စနစ် ကို ဖွင့်လှစ်နိုင်ခဲ့ပါပြီ။”

“ဂုဏ်ယူပါတယ် ပိုင်ရှင်၊ အပိုမှတ် ၆ မှတ် ရရှိပါတယ်။”

လင်းရှုက မြေပြင်ပေါ်မှာ အမောတကော အသက်ရှူရင်း သူ့စိတ်ထဲက Status တွေကို ကြည့်လိုက်ပါတယ်။

ပိုင်ရှင်: လင်းရှု

အဆင့်: ၆

အတွေ့အကြုံ: ၀ (နောက်တစ်ဆင့်တက်ရန် ၁၀၀ လိုအပ်သည်)

ခွန်အား: ၅၀

ခန္ဓာကိုယ်ကြံ့ခိုင်မှု: ၃၅

မြန်နှုန်း: ၃၂

(မှတ်ချက် - သာမန်လူတစ်ယောက်အတွက် အနည်းဆုံး ၃၈ မှတ်စီ ရှိရမည်)

စွမ်းရည်: ခွဲခြမ်းစိတ်ဖြာနိုင်သော မျက်လုံး

ဒေါသတန်ဖိုး: ၀/၁၀၀

စုစုပေါင်း တိုက်ခိုက်ရေးစွမ်းရည်: ၃၈၀

‘တိုက်ခိုက်ရေးစွမ်းရည်က ၃၈၀ တောင် ဖြစ်သွားပြီလား?’ လင်းရှုက ဝမ်းသာသွားပေမဲ့ ဒီစနစ်က သူ့ကို တစ်ဖက်လှည့်နဲ့ နှိမ်နေသလားလို့ ခံစားလိုက်ရပါတယ်။ အရင်တုန်းကလည်း ၂၅၀ (အသုံးမကျတဲ့ကောင်) ဖြစ်နေသလို၊ အခု ၃၈၀ ဆိုတာကလည်း (စကားများတဲ့ကောင်)သူ့ကို လှောင်နေသလိုပါပဲ!

လင်းရှု သေသေချာချာ စဉ်းစားကြည့်လိုက်ပါတယ်။ သူက ခွန်အားတစ်ခုတည်းကိုပဲ ဆက်တိုက်တိုးနေလို့ မဖြစ်ဘူးလေ။ မြန်နှုန်းနဲ့ ခန္ဓာကိုယ်ကြံ့ခိုင်မှုကိုသာ မြှင့်တင်မထားရင် သူ့ရဲ့ တိုက်ခိုက်ရေးစွမ်းရည်ကို အများကြီး ထိခိုက်စေမှာပါ။

ခုနလေးတင် ခဏလောက် တိုက်ခိုက်လိုက်ရတာတောင် သူ တော်တော်လေး အမောဆို့နေပြီ မဟုတ်လား။

ခဏလောက် စဉ်းစားပြီးတဲ့နောက်မှာတော့ သူက အပိုမှတ် ၃ မှတ်ကို ခန္ဓာကိုယ်ကြံ့ခိုင်မှုထဲ ထည့်လိုက်တာကြောင့် သာမန်လူတစ်ယောက်ရဲ့ အဆင့်ကို ရောက်သွားပါတယ်။

ပြီးတော့ ကျန်တဲ့ ၃ မှတ်ကို မြန်နှုန်းထဲ ထည့်လိုက်ရာမှာတော့ မြန်နှုန်းက ၃၅ မှတ် ဖြစ်သွားပါတယ်။

အဲဒီအချိန်မှာပဲ လင်းရှုက စနစ်ရဲ့ အောက်ခြေဘောင်ကို ငုံ့ကြည့်လိုက်တဲ့အခါ သံကြိုးတွေနဲ့ ခတ်ပိတ်ထားတဲ့ ပုံစံတူ အိုင်ကွန် (Icon) လေးတွေ အများကြီးကို တွေ့လိုက်ရပါတယ်။

“မျိုးရိုးဗီဇသော့ခတ်စနစ် (Gene lock)!?”

လူသားတွေဟာ အရှုပ်ထွေးဆုံး သတ္တဝါတွေပါ။

လူသားတွေရဲ့ မျိုးရိုးဗီဇထဲမှာ အသုံးမပြုရသေးတဲ့ အစိတ်အပိုင်း အများကြီးရှိပြီး အလားအလာတွေလည်း အများကြီး ရှိပါတယ်။ ဒါပေမဲ့ လူသားတွေက အဲဒါကို မလှုံ့ဆော်နိုင်ခဲ့ကြဘူးလေ။ မျိုးဗီဇသော့ခတ်စနစ် ဆိုတာကတော့ လူသားခန္ဓာကိုယ်ထဲက အခြေခံအကျဆုံး အလားအလာတွေကို ပြောတာဖြစ်ပြီး ဒီမျိုးဗီဇသော့တွေကို အဆုံးစွန်ထိ ဖွင့်နိုင်သွားရင် နတ်ဘုရားတစ်ပါးလို ဖြစ်သွားနိုင်တယ်လို့ ဆိုကြပါတယ်။

လင်းရှုက အသက်ကို ခပ်ပြင်းပြင်းရှူပြီး ပထမဆုံး မျိုးဗီဇသော့ အိုင်ကွန်လေးကို စိတ်နဲ့ နှိပ်ကြည့်လိုက်ပါတယ်။

“သတိပေးချက် - အဆင့် ၁၅ သို့ မရောက်သေးသဖြင့် သော့ဖွင့်၍မရပါ။”

‘တောက်!’ လင်းရှု စိတ်ထဲကနေ ကျိန်ဆဲလိုက်ပေမဲ့ ဒီဇွန်ဘီတွေကိုသာ ဆက်သတ်နေရင် အဆင့် ၁၅ ကို ရောက်ဖို့က သိပ်မကြာလောက်ပါဘူး။ ဒီလိုတွေးလိုက်တော့ လင်းရှုတစ်ယောက် စိတ်ဓာတ်တွေ ပြန်တက်ကြွလာပါတယ်။

“လင်းရှု... မင်း အဆင်ပြေရဲ့လား?” အဲဒီအချိန်မှာ ဇွန်ဘီတွေကို ရှင်းလင်းပြီးသွားတဲ့ ရန်ထျန်းက လင်းရှုဆီကို လျှောက်လာပါတယ်။

“ငါ အဆင်ပြေပါတယ်” လင်းရှုက ခေါင်းခါပြပြီး ထရပ်လိုက်ပါတယ်။

သူ့ကိုယ်ပေါ်က သွေးနံ့တွေကတော့ တကယ့်ကို ရွံစရာကောင်းလှပါတယ်။

ရန်ထျန်းကတော့ လင်းရှုက ဒီဇွန်ဘီဘော့စ်ကို အခက်အခဲမရှိ သတ်ပစ်လိုက်တာကိုကြည့်ပြီး အံ့သြနေပါတယ်။

ဒါ့အပြင် လင်းရှုရဲ့ ခန္ဓာကိုယ်မှာ တစ်ခုခု ပြောင်းလဲသွားတယ်လို့လည်း သူ ခံစားနေရပါတယ်။ ရုတ်တရက်ကြီး ပိုပြီး သန်မာလာသလိုမျိုးပေါ့။

“သွားရအောင်၊ ငါတို့ အထဲကို ဆက်ကြည့်ကြမယ်” လို့ လင်းရှုက ပြောလိုက်ပါတယ်။

အခုဆိုရင် သူ့ရဲ့ ခွန်အားက အဆင့်နိမ့် စစ်သည်တော်တစ်ယောက်ရဲ့ အဆင့်လောက် ဖြစ်နေပြီဆိုတော့ အထဲကို ဆက်ဝင်ရင် ဇွန်ဘီတွေကို ကိုင်တွယ်ရတာ ပိုလွယ်သွားမှာပါ။

“အင်း” ရန်ထျန်းက ခေါင်းငြိမ့်လိုက်ပါတယ်။

သူတို့နှစ်ယောက်လုံး အထဲကို ဆက်ပြီး တိုးဝင်သွားတဲ့အခါမှာတော့ ရှေ့မှာ ဆိုင်းဘုတ်တစ်ခုကို တွေ့လိုက်ရပါတယ်။ အဲဒီမှာ “အဆင့်နိမ့် စစ်သည်တော်များ ဝင်ရောက်ရန် တားမြစ်သည်” လို့ ရေးထားပါတယ်။

“ဒါ ဆရာလော့လီ ပြောခဲ့တဲ့ တားမြစ်နယ်မြေ ထင်တယ်”

“ငါတို့ မဝင်ဘဲ နေကြမလား...”

လင်းရှု မျက်မှောင်ကြုတ်လိုက်ပါတယ်။ လမ်းတစ်လျှောက်မှာ ဇွန်ဘီတစ်ကောင်မှ မတွေ့တော့တာကြောင့် အတွေ့အကြုံမှတ် ရဖို့က မလွယ်တော့ဘူးလေ။

အထဲကို ဝင်ကြည့်ရင် ကောင်းမလား?

“လင်း... လင်းရှု...” လင်းရှု စဉ်းစားခန်း ဝင်နေတုန်းမှာပဲ ရန်ထျန်းက တစ်ခုခုကို မြင်သွားပုံရပါတယ်။ သူက လင်းရှုရဲ့ လက်မောင်းကို ဆွဲပြီး တုန်တုန်ရင်ရင်နဲ့ ပြောလိုက်ပါတယ်။

“ဘာဖြစ်လို့လဲ?” လင်းရှု ကြောင်သွားပါတယ်။ အဲဒီနောက် ရန်ထျန်း ကြည့်နေတဲ့ဘက်ကို သူ လိုက်ကြည့်လိုက်တဲ့အခါမှာတော့ မျက်လုံးတွေ ပြူးသွားပါတော့တယ်။

ဟိုဘက်က သစ်ပင်ပေါ်မှာ မြွေကြီးတစ်ကောင် ရှိနေတာပဲ၊ အလွန်ကြီးမားတဲ့ မြွေဟောက်ကြီးတစ်ကောင်!!!

ဒီမြွေကြီးက မျက်လုံးတွေက နီရဲနေပြီး သူ့ရဲ့ ခန္ဓာကိုယ်က စည်ပိုင်းလောက်ကို တုတ်ပါတယ်။ ဒါ့အပြင် သူက ပတ်ဝန်းကျင်နဲ့အညီ သူ့ရဲ့အရောင်ကို ပြောင်းနိုင်ပုံရပါတယ်။

ဒါကြောင့် ခုနက သူတို့ မသတိထားမိခဲ့တာပေါ့။

‘ဒါ ဗီဇပြောင်းသတ္တဝါဆိုတာလား?’

"ခွဲခြမ်းစိတ်ဖြာနိုင်သော မျက်လုံး!"

အဆင့် (၃) အရောင်ပြောင်း မြွေဟောက်ကြီး

လက္ခဏာရပ်များ: ???

ခွန်အား: ???

ခွဲခြမ်းစိတ်ဖြာလို့ မရဘူးလား? ဘာကြီးလဲဟ!

လင်းရှု တကယ့်ကို ထိတ်လန့်သွားပါတယ်။ ခွဲခြမ်းစိတ်ဖြာလို့ မရတဲ့အရာနဲ့ သူ ပထမဆုံးအကြိမ် တွေ့ဖူးတာပါ။

“ပြေး! မြန်မြန်ပြေး!” လင်းရှု ချွေးအေးတွေ ပျံလာပြီး အော်ဟစ်ကာ ချက်ချင်းပဲ ထွက်ပြေးပါတော့တယ်။