အခန်း (၆၆) - ရှင်းယောင်၏ ကျားသစ်။

“လင်းရှု။ သတိထားနော်။ သူက အန္တရာယ်များတယ်။” လင်းရှု စင်ပေါ်သို့ လျှောက်သွားစဉ် ယန်ထျန်းက စင်ဘေးမှ လှမ်းပြောလိုက်သည်။

“အင်း။” လင်းရှုက ခေါင်းငြိမ့်ပြရင်း ‘ငွေရောင်မသေမျိုးလှံ’ ကို ကိုင်ကာ စင်ပေါ်သို့ တက်သွားခဲ့သည်။

လင်းရှုကို ခေါ်ပြီး မကြာမီမှာပင် ရဲ့ဂူလင်းလည်း လျှောက်လာခဲ့၏။

ရဲ့ဂူလင်းကို မြင်လိုက်ရသောအခါ လင်းရှု၏ မျက်နှာမှာ ထူးထူးခြားခြား သတိထားသွားပုံ ရသည်။

သူ၏ အာရုံခံစားမှုအရ ထိုလူမှာ အလွန်အန္တရာယ်ရှိကြောင်း သိနေသည်။

အချိန်ဆွဲမနေတော့ဘဲ သူသည် ‘ခွဲခြမ်းစိတ်ဖြာခြင်းမျက်လုံး’ ကို အသုံးပြုလိုက်၏။

ဇာတ်ကောင် - ရဲ့ဂူလင်း

အဆင့် ၂ စစ်သည်တော်

ခွန်အား - ၂၂၂

ခန္ဓာကိုယ်ကြံ့ခိုင်မှု - ၁၀၀

အလျင် - ၆၅

စုစုပေါင်း တိုက်ခိုက်ရေးစွမ်းအား - ၁၈၆၇

ထိုအချက်အလက်များကို မြင်လိုက်ရသောအခါ လင်းရှု၏ မျက်လုံးများ ပြူးကျယ်သွားရသည်။ အဆင့် ၂ စစ်သည်တော် ဖြစ်နေတာပဲ။ သူ၏ ခွန်အားမှာ အလွန်ကြောက်စရာကောင်းလှ၏။ အလျင်မှအပ ကျန်ရှိသော အချက်အလက်အားလုံးမှာ လင်းရှုထက် သာလွန်နေသည်။

ထိုအချိန်တွင် ကျောင်းသားအများအပြားမှာ လင်းရှုတို့၏ စင်မြင့်အနီးသို့ စုဝေးလာကြသည်။ အနီးနားရှိ စင်မြင့်များမှ ကျောင်းသားများပင် ရောက်လာကြခြင်း ဖြစ်၏။

အဘယ်ကြောင့်ဆိုသော် ဤတိုက်ပွဲမှာ အလွန်အရေးကြီးသောကြောင့် ဖြစ်သည်။ တစ်ဖက်တွင် ကျောင်းတွင် ခဲယဉ်းစွာ တွေ့ရတတ်ပြီး အဆင့် ၄ ချိတ်ထားသော၊ ‘ရှင်းယောင်၏ ကျားသစ်’ ဟု လူသိများသည့် ရဲ့ဂူလင်း ဖြစ်သည်။

အခြားတစ်ဖက်တွင်မူ တစ်ချိန်က ကျောင်း၏ ‘အမှိုက်’ ဟု အခေါ်ခံခဲ့ရသော်လည်း ယခုအခါ လူတိုင်းကို ထိတ်လန့်စေလောက်အောင် အောင်မြင်လာသည့် လင်းရှု ဖြစ်နေသည်။

“ဟားဟားဟား။ ရဲ့ဂူလင်းပဲ။ လင်းရှုက ရဲ့ဂူလင်းနဲ့ တိုးနေတာလား။ သူ သေဖို့သာ ပြင်ထားတော့။” ကျောင်းသားတစ်ယောက်က ထိုတွဲဆိုင်းကို မြင်သောအခါ ကျယ်လောင်စွာ ရယ်မောလိုက်သည်။

သူ၏ အမြင်တွင် လင်းရှု မည်မျှပင် အားကောင်းလာပါစေ ရဲ့ဂူလင်းကို အနိုင်ယူရန်မှာ မဖြစ်နိုင်ဟု ထင်နေခြင်း ဖြစ်သည်။

“ဒါက ပြောရခက်ပါတယ်ဟ။” ယန်ထျန်းက ထိုစကားကို ကြားသောအခါ မကျေမနပ် ဖြစ်သွားပြီး ထိုကျောင်းသားကို ဒေါသတကြီး စိုက်ကြည့်လိုက်သည်။

“တကယ်လို့ လင်းရှုသာ နိုင်သွားရင် ဒီစင်မြင့်တစ်ခုလုံးကို ငါ စားပစ်မယ်။” ထိုကျောင်းသားက ယန်ထျန်း၏ စကားကို ပြန်လည် တုံ့ပြန်လိုက်၏။

“ကောင်းပြီလေ။ မင်း စင်မြင့်ကို စားမှာကို ငါ စောင့်ကြည့်နေမယ်။” ယန်ထျန်းက ခနဲ့လိုက်သည်။

ကြည့်ရှုသည့် နေရာတွင် မစ္စတာရီသည် လင်းရှု၏ ပုံရိပ်ကို ကြည့်ကာ ထူးဆန်းသော အပြုံးတစ်ခု ပြုံးနေခဲ့သည်။

“မစ္စတာရီ။ ဟိုမှာ ကြည့်လိုက်ပါ။ သူက ရဲ့ဂူလင်းပါ။ ကျွန်တော်တို့ ကျောင်းရဲ့ အဆင့် ၄ ချိတ်ထားသူပေါ့။”

“သူက ငယ်ငယ်ရွယ်ရွယ်နဲ့ အဆင့် ၂ စစ်သည်တော် ဖြစ်နေပြီဗျ။”

မစ္စတာရီကို လိုက်လံ ရှင်းပြနေသည့် ဆရာက ပြောလိုက်ခြင်း ဖြစ်၏။

“ကျွန်တော်ကတော့ လင်းရှုကလည်း တော်တယ်လို့ ထင်တာပဲ။” မစ္စတာရီက ပြန်ဖြေလိုက်သည်။

“လင်းရှု ဟုတ်လား။” ဘေးပတ်ဝန်းကျင်ရှိ လူများမှာ အံ့အားသင့်သွားကြသည်။ မစ္စတာရီက လင်းရှုဆီမှာ ဘာကို မြင်နေရသလဲဆိုတာ သူတို့ နားမလည်ကြပေ။

လင်းရှုနှင့် ထန်းထျန်းတို့၏ တိုက်ပွဲအကြောင်း လူတိုင်း သိကြသော်လည်း သူသည် ထန်းထျန်းကိုသာ အနိုင်ယူနိုင်ခဲ့ခြင်း ဖြစ်သည်။ ရဲ့ဂူလင်းကိုမူ အနိုင်ယူနိုင်လိမ့်မည် မဟုတ်ဟု ထင်နေကြ၏။

အဘယ်ကြောင့်ဆိုသော် ရဲ့ဂူလင်းမှာ အဆင့် ၂ စစ်သည်တော် ဖြစ်သောကြောင့် ဖြစ်သည်။ အသက် ၁၈ နှစ်အရွယ်နှင့် အဆင့် ၂ သို့ ရောက်ရှိသူ မည်မျှရှိလိမ့်မည်နည်း။

“မင်းက လင်းရှုလား။” စင်ပေါ်တွင် ရဲ့ဂူလင်းက သူ့ကို ကြည့်ကာ မေးလိုက်သည်။

သူ၏ အကြည့်များမှာ အေးစက်ပြီး လူသတ်လိုသည့် အရိပ်အယောင်များဖြင့် ပြည့်နှက်နေသည်။ သူသည် လင်းရှုကို သေလူတစ်ယောက်ကဲ့သို့ ကြည့်နေခြင်း ဖြစ်၏။

“ဟုတ်တယ်။” လင်းရှု၏ တစ်ကိုယ်လုံးမှာ တင်းမာသွားခဲ့ရသည်။

ဤလူ၏ အချက်အလက်များမှာ အလွန်မြင့်မားပြီး သူသည် လက်တွေ့တိုက်ပွဲများကို ခဏခဏ ဆင်နွှဲနေသူ ဖြစ်သည်။ သေရေးရှင်ရေး တိုက်ပွဲများမှ ရရှိလာသည့် တိုက်ပွဲဝင် ဗီဇမှာ ရဲတိုက်ထဲတွင် အလိုလိုက်ခံထားရသော ကျောင်းသားများနှင့် နှိုင်းယှဉ်၍ မရနိုင်ပေ။

“ကောင်းပြီလေ။ ငါ မင်းကို သတ်ပစ်မယ်။” ရဲ့ဂူလင်းက နွေးထွေးသယောင်ရှိသော အပြုံးတစ်ခု ပြုံးပြလိုက်သော်လည်း ထိုအပြုံးက အခြားသူများကို ကျောချမ်းစေခဲ့သည်။

ထို့နောက်တွင် ရဲ့ဂူလင်း၏ လက်နက်မှာ ဓားလည်း မဟုတ်၊ လှံလည်း မဟုတ်သည်ကို လင်းရှု သတိပြုမိသွားသည်။ ၎င်းမှာ တူတစ်လက် ဖြစ်နေ၏။

အလွန်ပင် ကြီးမားလှသော တူကြီး တစ်လက် ဖြစ်သည်။

“နှစ်ဖက်စလုံး ပြင်ဆင်ပါ…” ဒိုင်လူကြီးက သူ၏ နာရီကို ကြည့်ကာ ဆက်ပြောလိုက်သည်။

“တိုက်ပွဲ စတင်မယ်!!!”

သူ၏ စကားကြောင့် ကြည့်ရှုသူများမှာ ငြိမ်သက်သွားကြပြီး မျက်လုံးအားလုံးမှာ စင်မြင့်ပေါ်သို့သာ စိုက်ကြည့်နေကြတော့သည်။

လင်းရှု အနိုင်ရနိုင်ပါ့မလား။ ဒါမှမဟုတ် ရဲ့ဂူလင်းကပဲ အနိုင်ယူသွားမလား။

ဒါက လူတိုင်း သိချင်နေကြတဲ့ မေးခွန်းတစ်ခု ဖြစ်သည်။

“ငါ မင်းရဲ့ ဦးနှောက်ကို ရိုက်ခွဲပစ်မယ်။” ရဲ့ဂူလင်းက ပြောပြောဆိုဆိုဖြင့် လှောင်အိမ်ထဲမှ ထွက်လာသည့် ကျားတစ်ကောင်ကဲ့သို့ ရှေ့သို့ ပြေးထွက်လာခဲ့သည်။

လင်းရှုက ရဲ့ဂူလင်းသည် အလွန်လေးလံသော တူကြီးကို ကိုင်ထားသဖြင့် နှေးကွေးလိမ့်မည်ဟု ထင်ထားခဲ့သည်။ သို့သော် သူ၏ အလျင်မှာ အံ့သြစရာကောင်းလောက်အောင် မြန်ဆန်နေခဲ့၏။

လင်းရှုက ဘေးသို့ တိမ်းလိုက်ကာ တူကို ရှောင်လိုက်သည်။

ဘုန်း-

တူသည် ကြမ်းပြင်ပေါ်သို့ ကျရောက်သွားပြီး တစ်ပြင်လုံးကို တုန်ခါသွားစေခဲ့သည်။

အောက်မှ ကျောင်းသားများပင် မြေကြီး အနည်းငယ် တုန်ခါသွားသည်ကို ခံစားလိုက်ရ၏။

“အယ်။ မင်း ရှောင်နိုင်သားပဲ။” ရဲ့ဂူလင်းက အံ့သြသွားပုံရသော်လည်း ကြီးမားလှသော တူကြီးဖြင့် လင်းရှုကို ဆက်လက် တိုက်ခိုက်ခဲ့သည်။

ယန်ထျန်းသည် တိုက်ပွဲကို ကြည့်ရင်း စိတ်ထဲတွင် ထိတ်လန့်နေမိသည်။ အကယ်၍ ထိုတူကြီးဖြင့်သာ အပုတ်ခံရလျှင် အရိုးတွေ အကုန်ကြေမွသွားမှာ မဟုတ်ပါလား။

လင်းရှုသည် တိုက်ခိုက်မှုအချို့ကို ရှောင်တိမ်းလိုက်ပြီး သူ၏ ရင်းမြစ်စွမ်းအင်များကို လှံထဲသို့ စီးဆင်းစေလိုက်သည်။

သူသည် အခွင့်အရေးကို အရယူကာ ရဲ့ဂူလင်းထံသို့ လှံဖြင့် ထိုးနှက်လိုက်၏။

ရဲ့ဂူလင်း၏ တူမှာ ကြီးမားပြီး လေးလံပုံရသော်လည်း သူ၏လက်ထဲတွင်မူ အလွန်ပေါ့ပါးနေကာ တိုက်ခိုက်မှုကို လွယ်ကူစွာ ကာကွယ်နိုင်ခဲ့သည်။

“ဒီလောက် အားလေးနဲ့လား။” ရဲ့ဂူလင်းက နှာခေါင်းရှုံ့လိုက်ပြီး တူကို အားဖြင့် ဝှေ့ယမ်းလိုက်ရာ လင်းရှုမှာ နောက်သို့ ခြေလှမ်းအနည်းငယ် ဆုတ်သွားခဲ့ရသည်။

လင်းရှုသည် သူ၏ လက်မနှင့် လက်ညှိုးကြားတွင် ထုံကျဉ်သွားသည်ကို ခံစားလိုက်ရ၏။ ရဲ့ဂူလင်းသည် သူ၏ တူကြီးနှင့်အတူ အလွန်အင်အားကြီးမားလှသည်။ သူသည် မြန်ဆန်ပြီး ချောမွေ့ရုံသာမက ထူးထူးခြားခြားကို ဖျတ်လတ်နေခြင်း ဖြစ်သည်။

‘ဒါပေမဲ့ ငါ ‘ဒေါသအမျက်’ ကို သုံးလို့မရသေးဘူး။ အဲဒီစွမ်းရည်က သုံးရက်ကြာမှ ပြန်သုံးလို့ရတာ။ အခု သုံးလိုက်ရင် နောက်ပိုင်းမှာ သုံးလို့ရမှာ မဟုတ်တော့ဘူး။’

‘ငါ ဘာလုပ်ရမလဲ။’

ရဲ့ဂူလင်းသည် လင်းရှုကို စဉ်းစားရန် အချိန်မပေးဘဲ သူ၏ တူဖြင့် ဆက်တိုက် တိုက်ခိုက်နေခဲ့သည်။

လင်းရှုသည် ထပ်မံ ရှောင်တိမ်းခြင်း မပြုတော့ဘဲ ယခုတစ်ကြိမ်တွင်မူ ပြန်လည် တိုက်စစ်ဆင်လိုက်သည်။

တိုက်စစ်ဆင်ခြင်းသည် အကောင်းဆုံး ခံစစ်ဖြစ်သည်ဟု ဆိုကြသည် မဟုတ်ပါလား။ အထူးသဖြင့် လေးလံသော လက်နက်များနှင့် ယှဉ်ပြိုင်ရသောအခါ ခံစစ်အနေအထားဖြင့် ရှိနေခြင်းက ပို၍ အားနည်းချက် ဖြစ်စေနိုင်သောကြောင့် ဖြစ်သည်။

တိုက်ပွဲမှာ ဆက်လက် ဖြစ်ပွားနေပြီး လက်နက်နှစ်ခု ထိတွေ့မိသည့်အခါတိုင်း မီးပွားများ လွင့်စင်ထွက်ပေါ်လာသည်။

လင်းရှု၏ မျက်လုံးများမှာ အေးစက်နေပြီး သူ၏ လှံမှာ အခွင့်အရေးရတိုင်း ရှေ့သို့ ထိုးဖောက်ဝင်ရောက်နေသည့် နဂါးတစ်ကောင်ပမာ ဖြစ်နေ၏။

သို့သော် ရဲ့ဂူလင်း၏ ခံစစ်မှာလည်း အလွန်အားကောင်းပြီး လင်းရှု၏ တိုက်ခိုက်မှုအားလုံးကို ကာကွယ်နိုင်ခဲ့သည်။

“မင်းက ဒီလောက်ပဲလား။” ရဲ့ဂူလင်းက ရယ်မောလိုက်၏။

ဟာကွက်ပဲ။

လင်းရှုသည် သူ၏ စကားများကို လျစ်လျူရှုလိုက်ပြီး မျက်လုံးများမှာ ကျဉ်းမြောင်းသွားသည်။ သူသည် လက်နက်ကို ပြန်ရုပ်လိုက်သည့်အချိန်တွင် ရရှိလာသည့် အခွင့်အရေးကို အားကုန် အသုံးချလိုက်၏။

စွမ်းရည် - ‘နှင်းဆီမုန်တိုင်း’။

ဂလောင် ဂလောင် ဂလောင်။

ရဲ့ဂူလင်း၏ ပေါ့ပါးနေသော မျက်နှာမှာ ချက်ချင်းပင် ပြောင်းလဲသွားခဲ့ရသည်။ သူ၏ ခန္ဓာကိုယ်မှာ အန္တရာယ်ကို ဗီဇအရ ခံစားလိုက်ရသောကြောင့် သူသည် တူကို အသုံးပြု၍ သတိမမူဘဲ ကာကွယ်လိုက်၏။

သို့သော် သူ နောက်ကျသွားခဲ့ပြီ ဖြစ်သည်။ လင်းရှုသည် တစ်စက္ကန့်အတွင်း ငါးကြိမ်တိုင်တိုင် ထိုးနှက်နိုင်သော စွမ်းရည်ကို သုံးလိမ့်မည်ဟု သူ မထင်ထားခဲ့မိပေ။ ထိုးနှက်ချက်တိုင်းမှာ သူ၏ ခန္ဓာကိုယ် အစိတ်အပိုင်း အသီးသီးသို့ ကျရောက်ခဲ့သည်။

ကြည့်ရှုသူ အားလုံးမှာ ထိုမြင်ကွင်းကို မြင်လိုက်ရသောအခါ အသက်ပင် မရှူနိုင်တော့ပေ။

လင်းရှု၏ ရုတ်တရက် မြန်ဆန်သွားသော အလျင်နှင့် အလွန်အေးစက်လှသော အလင်းတန်းများ ထွက်ပေါ်နေသည့် လှံ၏ ပုံရိပ်ယောင်များကို သူတို့ တွေ့မြင်လိုက်ရသည်။

နောက်တစ်စက္ကန့်တွင်မူ ရဲ့ဂူလင်းသည် နောက်သို့ ခြေလှမ်းအနည်းငယ် ဆုတ်သွားခဲ့ပြီး သူ၏ ညာဘက်ပုခုံးမှ သွေးများ လွင့်စင်ထွက်လာခဲ့တော့သည်။

“ရဲ့ဂူလင်းက… လင်းရှုကြောင့် ဒဏ်ရာရသွားတာလား။”