အခန်း (၆၂) - ရေတံခွန်အလား ပြင်းထန်သော စီးဆင်းမှု
ဒီအချိန်မှာတော့ လူတိုင်းက စင်မြင့်ဆီကို စုပြုံကြည့်ရှုနေကြပါပြီ။
"ဟိုမှာကြည့်စမ်း! အဲ့ဒါ လင်းရှုပဲ!" ကျောင်းသားအနည်းငယ်က စိတ်လှုပ်ရှားတကြီး အော်ဟစ်လိုက်ကြပါတယ်။
အဆင့်သတ်မှတ်ချက် အောက်ခြေမှာရှိတဲ့ ကျောင်းသားတွေအတွက်တော့ လင်းရှုဟာ သူရဲကောင်းတစ်ဦးပါပဲ။
ဘာလို့လဲဆိုတော့ သူကိုယ်တိုင်ကလည်း အောက်ဆုံးအဆင့်မှာ ရှိခဲ့သူဖြစ်ပေမဲ့ အဆင့် ၁၀၀ အတွင်းက ထန်းထျန်းကို အနိုင်ယူပြခဲ့လို့ပါပဲ။
"ကောင်းပြီလေ... မင်း မသေဘဲ ပြန်လာနိုင်တာ ဝမ်းသာပါတယ်။ ငါ့လက်နဲ့ကိုယ်တိုင် မင်းကို သတ်ပစ်ရတာပေါ့" ထနထျန်းက လင်းရှုကို စိုက်ကြည့်ရင်း လက်သီးကို တင်းတင်းဆုပ်ထားပါတယ်။
လော့လီကတော့ လင်းရှု အချိန်မီ ပြန်ရောက်လာတာကို မြင်လိုက်ရတဲ့အတွက် စိတ်အေးသွားရပါတယ်။ ဒါ့အပြင် လင်းရှုရဲ့ အရှိန်အဝါဟာ အရင်ကနဲ့ မတူတော့တာကိုလည်း သူ ရှင်းရှင်းလင်းလင်း ခံစားမိနေပါတယ်။
သူဟာ အတန်းပိုင်ဆရာတစ်ယောက် ဖြစ်ပေမဲ့လည်း လင်းရှုဆီကနေ အန္တရာယ်ရှိတဲ့ အငွေ့အသက်တွေကို ခံစားနေရတာပါ။
"မင်းက လင်းရှုလား?" ချန်ရှောင်က သူ့ရဲ့ ရွှေရောင်ဓားကြီးနဲ့ လင်းရှုကို ညွှန်ပြပြီး မေးလိုက်ပါတယ်။
လင်းရှုရဲ့ အရှိန်အဝါက တစ်မျိုးဖြစ်နေတာကို သူ သတိထားမိပေမဲ့လည်း အလျှော့မပေးချင်တာကြောင့် ဓားဦးနဲ့ ဆက်ပြီး ချိန်ရွယ်ထားပါတယ်။
"အင်း..." လင်းရှုက ခေါင်းညိတ်ပြလိုက်ပါတယ်။ သူဟာ အဆင့် ၂ စစ်သည်တော် အဆင့်ကို ရောက်ခါနီးနေပြီ ဖြစ်ပါတယ်။
ချန်ရှောင်ကတော့ အဆင့် ရာဂဏန်းလောက်မှာပဲ ရှိတာကြောင့် သူ့အပေါ်မှာ 'ခွဲခြမ်းစိတ်ဖြာခြင်း မျက်လုံး' (Analytic Eye) ကိုတောင် အသုံးမပြုတော့ပါဘူး။
"လင်းရှုက ပိုပြီး သန်မာလာပုံရတယ်..." ယန်ထျန်းက လင်းရှုကို ကြည့်ရင်း တိုးတိုးလေး ရေရွတ်လိုက်ပါတယ်။
ကျန်းယီကတော့ လက်သီးကို ကျစ်ကျစ်ပါအောင် ဆုပ်ထားပြီး လင်းရှုရှိရာဘက်ကို စိုက်ကြည့်နေပါတယ်။
"နှစ်ဖက်လုံး အဆင်သင့်ပြင်!" ဒိုင်လူကြီးက လင်းရှုနဲ့ ချန်ရှောင်ကို တစ်လှည့်စီ ကြည့်ပြီး ပြောလိုက်ပါတယ်။
"စတင်!!!"
အမိန့်ပေးသံအဆုံးမှာတော့ ချန်ရှောင်ဟာ သူ့ရဲ့ ရွှေရောင်ဓားကြီးကို ကိုင်ပြီး ရှေ့ကို ပြေးတက်သွားပါတယ်။
လင်းရှုနား ရောက်တာနဲ့ သူက ရုတ်တရက် အပေါ်ကို ခုန်တက်လိုက်ပြီး အရှိန်နဲ့ အောက်ကို ခုတ်ချလိုက်ပါတယ်။
"ချန်ရှောင်ရဲ့ ရွှေဓားက ဂမ်မာကြယ်က ရွှေရောင်သတ္တုတွေနဲ့ လုပ်ထားတာဆိုတော့ တော်တော်ထက်တာ။ လင်းရှုသာ အဲ့ဒီတိုက်ကွက်ကို မရှောင်နိုင်ရင်တော့ အန္တရာယ်ရှိပြီ"
စင်အောက်က ကျောင်းသားတစ်ယောက်က အကျယ်ကြီး ပြောလိုက်ပါတယ်။
"လင်းရှုက ထန်းထျန်းကို အနိုင်ယူခဲ့ဖူးတယ်ဆိုပေမဲ့ ထန်းထျန်းက ပြိုင်ဘက်ကို အထင်သေးသွားလို့ပါကွာ။ ချန်ရှောင်ရဲ့ ဓားသိုင်းက အရမ်းကြမ်းတာ၊ လင်းရှု ရှုံးမှာ သေချာတယ်!" နောက်ထပ် ကျောင်းသားတစ်ယောက်က နှာခေါင်းရှုံ့ရင်း ပြောပါတယ်။
သူတို့က အတန်းဖော်တွေ ဖြစ်တာကြောင့် ချန်ရှောင်ဘက်က အားပေးနေကြတာပါ။
ဂလွမ်!
ဒီအချိန်မှာပဲ ချန်ရှောင်ရဲ့ ရွှေဓားက လင်းရှုရဲ့ ကိုယ်ပေါ်ကို ကျရောက်တော့မယ့်ဆဲဆဲမှာ လင်းရှုက လှုပ်ရှားလိုက်ပါတယ်။
သူက လက်နှစ်ဖက်လုံးကို သုံးပြီး ဓားသွားကို ဖမ်းချုပ်လိုက်ရာ သတ္တုချင်း ထိခိုက်မိတဲ့ အလွန်ကျယ်လောင်တဲ့ အသံကြီး ထွက်ပေါ်လာပါတယ်။
"ဘာ?!"
စင်အောက်က ကျောင်းသားအားလုံး မှင်တက်သွားကြပါတယ်။ လင်းရှုက အဲ့ဒီတိုက်ကွက်ကို ရှောင်လိမ့်မယ်လို့ပဲ သူတို့ ထင်ထားခဲ့တာပါ၊ လက်ဗလာနဲ့ ဓားကို ဖမ်းလိမ့်မယ်လို့ ဘယ်သူမှ မမျှော်လင့်ထားပါဘူး။ တစ်ချိန်တည်းမှာပဲ ချန်ရှောင်ကတော့ ခက်ခဲတဲ့ အခြေအနေကို ရောက်သွားပုံရပါတယ်။
"တောက်!!!" ချန်ရှောင်က အကျယ်ကြီး ဟိန်းဟောက်လိုက်ပြီး ဓားကို ပြန်ဆွဲထုတ်ကာ နောက်ပြန်လှည့်ခုတ်ဖို့ အားစိုက်လိုက်ပါတယ်။
လင်းရှု မျက်မှောင်ကြုတ်သွားပါတယ်။ ဓားက တော်တော်လေး ထက်တာကြောင့် သူ့လက်ဖဝါးတွေ နည်းနည်းတော့ နာကျင်သွားရပါတယ်။
ဓားကို ပြန်ဆွဲထုတ်တဲ့ အရှိန်နဲ့ အားကြောင့် လင်းရှုလည်း ဓားကို လွှတ်ပေးလိုက်ရပါတယ်။
ချန်ရှောင်က နှာခေါင်းရှုံ့ရင်း အနောက်ကို အနည်းငယ် ဆုတ်ခွာလိုက်ပေမဲ့ သူ့မျက်နှာကတော့ အတော်လေး ပျက်ယွင်းနေပါပြီ။
သူက လင်းရှုကို အထင်သေးသလို ဟန်ဆောင်နေပေမဲ့ ခုနက ထိတွေ့မှုတစ်ခုတည်းနဲ့တင် လင်းရှုရဲ့ ကြောက်စရာကောင်းမှုကို သူ ကောင်းကောင်း သိသွားပါပြီ။
ပြီးတော့ လင်းရှုရဲ့ ကျောပေါ်က အနက်ရောင် သေတ္တာကြီးကလည်း ရှိနေပါသေးတယ်။ အဲ့ဒီထဲမှာ ဘာတွေ ဝှက်ထားလဲဆိုတာ ဘယ်သူမှ မသိကြပါဘူး။
"အားးးး!!!" သူက အော်ဟစ်လိုက်ပြီး ရွှေဓားကြီးနဲ့ ရှေ့ကို တစ်ကျော့ပြန် ပြေးဝင်လာပါတယ်။
ကြေးအဆင့် စွမ်းရည် - ပန်းကိုးပွင့်ကျဆင်းခြင်း!
ဒီစွမ်းရည်ရဲ့ အကြီးမားဆုံး ဝိသေသကတော့ တိုက်ခိုက်မှုတိုင်းဟာ နောက်ပိုင်းမှာ ပိုပိုပြီး မြန်လာ၊ ပြင်းလာတာပါပဲ။
လင်းရှု မျက်မှောင်ကြုတ်ပြီး ဘေးကို ရှောင်လိုက်ရာ ဓားသွားက သူ့ပါးနားကနေ သီသီလေး ဖြတ်သွားပါတယ်။
ချန်ရှောင်ကတော့ အရမ်းကို ကြမ်းတမ်းခက်ထန်နေပြီး ရှေ့ကို ဆက်တိုက် ခုတ်ပိုင်းနေပါတယ်။ ဓားချက်တွေက တစ်ခုထက်တစ်ခု ပိုမြန်လာပေမဲ့ လင်းရှုကိုတော့ တစ်ချက်မှ မထိပါဘူး။
တိုက်ကွက်တိုင်းဟာ ထိလုနီးပါးပဲ ဖြစ်နေပေမဲ့ လင်းရှုကတော့ သီသီလေးတွေပဲ ရှောင်ထွက်နေနိုင်ပါတယ်။
"လင်းရှုကတော့ တကယ်ကို ကံကောင်းလွန်းတာပဲ။" လင်းရှု သီသီလေး ရှောင်ထွက်သွားတာကို မြင်တော့ ကျောင်းသားအချို့က မနေနိုင်ဘဲ အံ့သြတကြီး ပြောလိုက်ကြပါတယ်။
ဒါပေမဲ့ အစွမ်းထက်တဲ့သူတွေကတော့ လင်းရှုရဲ့ လှုပ်ရှားမှုတွေကို ကြည့်ပြီး တုန်လှုပ်နေကြပါပြီ။
"အခု ငါ့အလှည့်လား?" ကိုးကြိမ်မြောက် တိုက်ခိုက်မှုအပြီးမှာတော့ လင်းရှုရဲ့ နှုတ်ခမ်းအစုံက ကွေးညွတ်သွားပြီး လက်သီးနဲ့ ရှေ့ကို ထိုးနှက်လိုက်ပါတော့တယ်!
ချန်ရှောင်က အမြန်တုံ့ပြန်ပြီး ကာကွယ်နိုင်ခဲ့ပေမဲ့ ပြင်းထန်လွန်းတဲ့ အားကြောင့် ဓားပြားက သူ့ရင်ဘတ်ကို ပြန်ရိုက်မိပြီး အနောက်ကို လွင့်ထွက်သွားပါတယ်။
ကွင်းပြင်တစ်ခုလုံး ဆူညံပွက်လောရိုက်သွားပါတယ်။
'ဖူး'
ချန်ရှောင်ဟာ သွေးတစ်လုတ် အန်ထုတ်လိုက်ရပြီး လင်းရှုကို စိုက်ကြည့်ရင်း ခက်ခဲစွာ ပြန်ထရပ်လိုက်ပါတယ်။
'တခြားနည်းလမ်း မရှိတော့ဘူး!'
သူ အသက်ပြင်းပြင်းတစ်ချက် ရှူလိုက်ပြီး သူ့ရဲ့ အားအင်အားလုံးကို လက်မောင်းနဲ့ ခြေထောက်တွေဆီ စုစည်းလိုက်ပါတယ်။
ငြိမ်ငြိမ်လေး ရပ်နေတဲ့ လင်းရှုကို ကြည့်ပြီး သူက အကျယ်ကြီး ဟိန်းဟောက်လိုက်ပါတယ်။ "ရေတံခွန်အလား ပြင်းထန်သော စီးဆင်းမှု!"
စကားအဆုံးမှာပဲ သူ့ခြေထောက်တွေက အရှိန်နဲ့ ကန်ထွက်လိုက်ပြီး လင်းရှုရှေ့ ရောက်တာနဲ့ ရုတ်တရက် လေထဲ ခုန်တက်ကာ ဒေါင်လိုက် အားကုန် ခုတ်ချလိုက်ပါတော့တယ်!
"လာပြီ! ဒါ ချန်ရှောင်ရဲ့ အထူးစွမ်းရည် - ရေတံခွန်အလား ပြင်းထန်သော စီးဆင်းမှုပဲ!!!" ချန်ရှောင်နဲ့ တိုက်ခိုက်ဖူးတဲ့ ကျောင်းသားအချို့က စိတ်လှုပ်ရှားတကြီး အော်ဟစ်လိုက်ကြပါတယ်။
ဒါဟာ တစ်ကျောင်းလုံးမှာ ချန်ရှောင်တစ်ယောက်ပဲ တတ်မြောက်ထားတဲ့ ထူးခြားတဲ့ စွမ်းရည်တစ်ခုပါ။
ဒါကို သူ့ရဲ့ အမှတ်အသား တိုက်ကွက်လို့တောင် ခေါ်လို့ရပါတယ်။
"ပထမဆုံးအချီမှာတင် ချန်ရှောင်က ဒီလောက် အားကုန်ရတဲ့ စွမ်းရည်မျိုး သုံးရလိမ့်မယ်လို့ ဘယ်သူထင်မှာလဲ? လင်းရှုက တကယ်ပဲ ရင်ဆိုင်ရခက်နေတာလား?" ကျောင်းသားအချို့က ဇဝေဇဝါ ဖြစ်နေကြပါတယ်။
ဘာလို့လဲဆိုတော့ ပထမနေ့ တိုက်ပွဲတွေမှာ အားအင်ကို မချွေတာနိုင်ရင် နောက်ပိုင်းအချီတွေမှာ ပိုပြီး ခက်ခဲသွားမှာ ဖြစ်လို့ပါ။
ဒီအချိန်မှာတော့ ဘယ်သူမှ စကားမပြောကြတော့ဘဲ အားလုံးရဲ့ အကြည့်တွေက စင်မြင့်ပေါ်မှာပဲ မြဲမြံနေပါတယ်။
ချန်ရှောင်ရဲ့ ဓားခုတ်ချက်ကနေ ထက်မြက်တဲ့ လေဓားလှိုင်း အမြောက်အမြား ထွက်ပေါ်လာပါတယ်။
ထူးခြားတဲ့ ပစ္စည်းတွေနဲ့ လုပ်ထားတဲ့ စင်မြင့်ထက်မှာတောင် နက်ရှိုင်းတဲ့ ဓားရာတွေ အများကြီး ထင်ကျန်သွားပါတယ်။
"ရှောင်လိုက်!!!" ယန်ထျန်းက အကျယ်ကြီး အော်လိုက်ပါတယ်။
ဒါပေမဲ့ လင်းရှုကတော့ မလှုပ်မယှက် ရှိနေတုန်းပါပဲ။
'သေချင်နေတာပဲ!!!' လင်းရှုကို ကြည့်ပြီး ချန်ရှောင်ရဲ့ မျက်စိသူငယ်အိမ်တွေ ကျုံ့သွားပါတယ်။
ဒီစွမ်းရည်ရဲ့ အစွမ်းဟာ သာမန်လူတစ်ယောက်ကို အပိုင်းပိုင်း ပြတ်သွားစေနိုင်သလို စစ်သည်တော်တစ်ယောက်ဆိုရင်တောင် ပြင်းပြင်းထန်ထန် ဒဏ်ရာရစေနိုင်တာပါ။
ဖတ် ဖတ် ဖတ်-
လင်းရှုရဲ့ ဝတ်စုံပေါ်မှာ ဓားရာအချို့ ထင်သွားသလို သူ့ကျောပေါ်က သေတ္တာကြီးကလည်း အပိုင်းပိုင်းကွဲအက်ပြီး မြေပြင်ပေါ်ကို ပြုတ်ကျသွားပါတယ်။
ဒီအချိန်မှာပဲ အေးစက်တဲ့ အလင်းရောင် ထွက်ပေါ်နေတဲ့ အရာတစ်ခုကို လူတိုင်း မြင်လိုက်ကြရပါတယ်။
အဲ့ဒီသေတ္တာထဲမှာ ဘာရှိနေတာလဲ?!
အားလုံး မှင်တက်နေတုန်းမှာပဲ လင်းရှုက စတင်လှုပ်ရှားလိုက်ပါတယ်။
သူ့ရဲ့ ညာလက်က သေတ္တာထဲက အရာဝတ္ထုကို ဆွဲကိုင်လိုက်ပြီး ချန်ရှောင်ဆီကို အရှိန်နဲ့ ပြေးဝင်သွားပါတယ်။
မြန်လိုက်တာ... လူတိုင်းဟာ ရိပ်ခနဲဖြစ်သွားတဲ့ ပုံရိပ်ကိုပဲ မြင်လိုက်ရတဲ့အထိ မြန်ဆန်လွန်းလှပါတယ်။
ချန်ရှောင်ရဲ့ မျက်လုံးတွေ ပြူးကျယ်သွားပါတယ်။ သူ့ဓားနဲ့ ခုတ်ချတော့မယ့် အချိန်မှာပဲ အေးစက်တဲ့ အလင်းတန်းတစ်ခု ဖြတ်သွားပြီး 'ဒေါင်' ဆိုတဲ့ အသံနဲ့အတူ သူ့လက်ထဲက ဓားဟာ လွင့်ထွက်သွားပါတော့တယ်။
"မင်း ရှုံးသွားပြီ။”