အခန်း (၅၅) - စွမ်းအားကြီးမားသော စက်ရုပ်
လင်းရှုက ပစ္စည်းအဟောင်းပုံကြီးကို ပြင်ဆင်နေတာကို ရှုဝမ်နဲ့ တခြားသူတွေ ပြန်ရောက်လာတဲ့အခါမှာ မြင်တွေ့လိုက်ရပါတယ်။
"သူ့ကို သွားမနှောင့်ယှက်နဲ့" လင်းရှု ဘာလုပ်နေတာလဲလို့ လီယီက ဝင်မေးဖို့ လုပ်တဲ့အခါမှာ ရွှီဝမ်က သူ့ကို ဆွဲတားလိုက်ပါတယ်။
လီယီက ခေါင်းငြိမ့်ပြလိုက်ပေမဲ့ သူ့ရဲ့ အကြည့်တွေကတော့ လင်းရှုဆီမှာပဲ ရှိနေပါတယ်။
လင်းရှုကတော့ ပစ္စည်းတွေကို တပ်ဆင်တဲ့နေရာမှာပဲ အာရုံအပြည့်ရောက်နေပြီး တခြားဘာကိုမှ ဂရုမစိုက်နိုင်တော့ပါဘူး။
အချိန်တွေက အမြန်ကုန်ဆုံးသွားပြီးတဲ့နောက်မှာတော့ စက်ရုပ်ပုံစံတစ်ခု ထွက်ပေါ်လာပါတယ်။
"ဒါက... စက်ရုပ်စစ်သည်တော်လား?" လီယီက မျက်လုံးအပြူးသားနဲ့ မေးလိုက်ပါတယ်။
သူ့ရဲ့ မျက်နှာမှာ အံ့သြတုန်လှုပ်မှုတွေ အပြည့်ဖြစ်နေပါတယ်။
"မဟုတ်ဘူး၊ အဲ့ဒါ မဟုတ်လောက်ဘူးထင်တယ်" ရွှီဝမ်က ခေါင်းခါပြပါတယ်။ စက်ရုပ်စစ်သည်တော်နဲ့ ဆင်တူတယ်လို့ ခံစားရပေမဲ့ ဒါက လူပုံတူစက်ရုပ်တစ်ခုလို့ပဲ သူ ထင်ပါတယ်။
အဲ့ဒီစက်ရုပ်ပေါ်က စက်သွားတွေက တကယ့်ကို ဟောင်းနွမ်းနေတဲ့ ပုံစံမျိုး ခံစားရစေပါတယ်။
တစ်နာရီလောက် ကြာပြီးတဲ့နောက်မှာတော့ လင်းရှုက သူ့နဖူးပေါ်က ချွေးတွေကို သုတ်လိုက်ပါတယ်။ သူက အတော်လေး ပင်ပန်းနွမ်းနယ်နေတဲ့ အသံနဲ့ "နောက်ဆုံးတော့ အကုန် တပ်ဆင်လို့ ပြီးသွားပြီ..." လို့ သူ့ဘာသာသူ ရေရွတ်လိုက်ပါတယ်။
"တကယ့်ကို လန်းတာပဲ..." လူတစ်ယောက်ထက် ပိုမြင့်တဲ့ စက်ရုပ်ကြီးကို မြင်လိုက်ရတဲ့အခါ စစ်သားတစ်ယောက်က အံ့သြတကြီးနဲ့ ရေရွတ်လိုက်ပါတယ်။
လင်းရှုက ဘာလို့ အစိတ်အပိုင်းအဟောင်းတွေနဲ့ ထူးဆန်းတဲ့ သံစက်သွားတွေကို ခဏခဏ သယ်လာနေတာလဲဆိုတာကို သူတို့ အခုမှ သိလိုက်ရတာပါ။ ဒါတွေက စက်ရုပ်တစ်ရုပ်ရဲ့ အစိတ်အပိုင်းတွေ ဖြစ်နေလိမ့်မယ်လို့ သူတို့ လုံးဝ မထင်ထားခဲ့ပါဘူး။
"ဒါက စက်ရုပ်ခေတ်က တိုက်ခိုက်ရေးစက်ရုပ်တစ်ရုပ်ပဲ၊ သူက အဆင့် ၁ စစ်သည်တော်တစ်ယောက်ရဲ့ ခွန်အားမျိုး ရှိတယ်လို့ ပြောကြတယ်" လင်းရှုက ရှင်းပြလိုက်ပါတယ်။
သူကိုယ်တိုင် ပြင်ဆင်လိုက်တဲ့ စက်ရုပ်ကြီးကို ကြည့်ရင်း လင်းရှုဟာ ဖော်ပြလို့မရတဲ့ ကျေနပ်မှုကို ခံစားနေရပါတယ်။
စက်ရုပ်ပေါ်မှာ သံချေးတက်ပြီး ဟောင်းနွမ်းနေတဲ့ စက်သွားတွေ အများကြီး ရှိနေတာကြောင့် ဒါတွေက တကယ် အလုပ်လုပ်ပါ့မလားဆိုတာ သူလည်း မသေချာပါဘူး။
ဒါပေမဲ့ စမ်းသပ်ကြည့်မှပဲ သိမှာပါ။
စက်ရုပ်ရဲ့ ခန္ဓာကိုယ် အလယ်ဗဟိုမှာ စက်ဝိုင်းပုံစံ အပေါက်လေးတစ်ခု ရှိပါတယ်။ သူက အဲ့ဒါကို ဖွင့်လိုက်ပြီး အထဲကို ထူးဆန်းပုံဆောင်ခဲတစ်ခု ထည့်လိုက်ပါတယ်။
ပြီးနောက် လင်းရှုက စက်ရုပ်ပေါ်က ခလုတ်အချို့ကို နှိပ်လိုက်ပါတယ်။
အဲ့ဒီအချိန်မှာပဲ စက်ရုပ်ဆီကနေ 'ဂျောက် ဂျောက် ဂျောက်' ဆိုတဲ့ အသံတွေ ထွက်ပေါ်လာပါတယ်။
စက်သွားတွေက တဖြည်းဖြည်း လည်ပတ်လာပြီး သတ္တုချင်း ထိခိုက်သံတွေနဲ့အတူ စက်ရုပ်ကြီးက စတင် လှုပ်ရှားလာပါတယ်။
"ဒါက တကယ် အလုပ်လုပ်တာလား?" အရပ်ရှည်ရှည် စက်ရုပ်ကြီးကို ကြည့်ပြီး လီယီက မေးလိုက်ပါတယ်။
"ပြဿနာ မရှိနိုင်ပါဘူး" လင်းရှုက ခေါင်းငြိမ့်ပြပါတယ်။ မကြာခင်မှာပဲ စက်ရုပ်ရဲ့ ခန္ဓာကိုယ်ကနေ အလင်းတန်းတွေ ထွက်ပေါ်လာပါတယ်။
စက်ရုပ်ကို အောင်မြင်စွာ နှိုးနိုင်လိုက်တာကို မြင်တော့ လင်းရှုရဲ့ မျက်လုံးတွေ တောက်ပသွားပါတယ်။ စက်ရုပ်ထဲက စက်သွားတွေပေါ်မှာ သံချေးတက်နေတာတွေက တကယ်တော့ အပေါ်ယံတင်ပါ။ စက်ရုပ်က စတင်လည်ပတ်လာတာနဲ့အမျှ အဲ့ဒီ သံချေးတွေက မြေပြင်ပေါ်ကို အကုန် ကြွေကျသွားပါတယ်။
"ဒါက အဆင့် ၁ စစ်သည်တော်ရဲ့ ခွန်အား ရှိတယ် ဟုတ်လား? မဖြစ်နိုင်တာ" နှေးကွေးလွန်းတဲ့ စက်ရုပ်ကြီးကို ကြည့်ပြီး စစ်သားတစ်ယောက်က ရယ်မောလိုက်ပါတယ်။
"မင်း စမ်းကြည့်ချင်လား?" လင်းရှုက သူ့ကို ကြည့်ပြီး ထူးဆန်းတဲ့ အပြုံးနဲ့ မေးလိုက်ပါတယ်။
"ရတာပေါ့၊ ငါ စမ်းကြည့်မယ်!" အဲ့ဒီစစ်သားက မထေမဲ့မြင်နဲ့ ပြန်ပြောလိုက်ပါတယ်။ အခုမှ ပြင်ထားတဲ့၊ ရှေးဟောင်းပစ္စည်းလို့တောင် ပြောလို့ရတဲ့ စက်ရုပ်ကို သူ ရှုံးလိမ့်မယ်လို့ လုံးဝ မထင်ပါဘူး။
"တိုက်ခိုက်တော့" လင်းရှုက စက်ရုပ်ကို အမိန့်ပေးလိုက်ပါတယ်။
စက်ရုပ်ကို စတင်နှိုးစဉ်ကတည်းက လင်းရှုဟာ သူ့ရဲ့အသံကို စက်ရုပ်ထဲမှာ မှတ်တမ်းတင်ထားခဲ့တာပါ။ ဘာမှ အလွဲအချော်မရှိရင် စက်ရုပ်က သူ့အသံကို ခွဲခြားနိုင်ပါလိမ့်မယ်။
မျှော်လင့်ထားတဲ့အတိုင်းပါပဲ၊ လင်းရှုရဲ့ အမိန့်ကို ကြားပြီးနောက်မှာ စက်ရုပ်ရဲ့ ခန္ဓာကိုယ်က စတင်လှုပ်ရှားလာပါတယ်။
သတ္တုသံ တကျိကျိတွေ ထွက်ပေါ်လာပါတယ်။
"ဒီစက်ရုပ်ကို ငါ့ရှေ့မှာ ဒူးထောက်သွားအောင် လုပ်ပြမယ် ကြည့်နေ!" အဲ့ဒီစစ်သားက ရယ်မောလိုက်ပြီး လက်သီးကို ကျစ်ကျစ်ပါအောင် ဆုပ်ကာ ထိုးနှက်လိုက်ပါတယ်။
အဲ့ဒီအချိန်မှာပဲ... မူလက နှေးကွေးနေပုံရတဲ့ စက်ရုပ်ရဲ့ စက်သွားတွေက အရှိန်အဟုန်နဲ့ စတင်လည်ပတ်လာပြီး အလွန်ကို မြန်ဆန်တဲ့ အရှိန်နဲ့ လှုပ်ရှားလိုက်ပါတော့တယ်။
ရှုဝမ်နဲ့ တခြားသူတွေဟာ အံ့အားသင့်ပြီး ငြိမ်သက်သွားကြပါတယ်။
အဲ့ဒီအချိန်မှာပဲ ခုနက ရယ်မောနေတဲ့ စစ်သားရဲ့ မျက်နှာအမူအရာဟာ ချက်ချင်း ပြောင်းလဲသွားပါတယ်။
ကျယ်လောင်တဲ့ အသံကြီးနဲ့အတူ သူ့ရဲ့လက်သီးဟာ စက်ရုပ်ကို ထိမှန်သွားပေမဲ့ တုန်ခါသံအနည်းငယ်ပဲ ထွက်လာပြီး စက်ရုပ်ကိုတော့ ဘာမှ မထိခိုက်စေခဲ့ပါဘူး။
တစ်ချိန်တည်းမှာပဲ စက်ရုပ်ရဲ့ ကြီးမားတဲ့လက်သီးဟာ သူ့ရဲ့ခန္ဓာကိုယ်ပေါ်ကို ကျရောက်လာပြီး သူ့ကို မြေပြင်ပေါ် လဲကျသွားအောင် တွန်းထုတ်လိုက်ပါတယ်။
"ရပ်လိုက်တော့။"
လင်းရှုက အမိန့်ပေးလိုက်တဲ့အခါမှာတော့ စက်ရုပ်ဟာ ချက်ချင်းပဲ တောင့်တင်းသွားပြီး မူလနေရာမှာ ပြန်လည်ရပ်တန့်သွားပါတယ်။
"တကယ့်ကို သန်မာတာပဲ!" လီယီဟာ ပါးစပ်အဟောင်းသားနဲ့ မှတ်ချက်ပေးလိုက်ပါတယ်။
"အဟွတ်... အဟွတ်... ဒီအကောင်က တကယ်ပဲ ပြီးခဲ့တဲ့ ရာစုနှစ်က ပစ္စည်းဆိုတာ ဟုတ်ရဲ့လား?" မြေပြင်ပေါ် လဲကျသွားတဲ့ စစ်သားဟာ အခုတော့ အတော်လေး အံ့သြသွားပါပြီ။ သူက ပြန်ထလာရင်း မယုံနိုင်သလို မေးလိုက်ပါတယ်။
"အင်း၊ ဒါက ပြီးခဲ့တဲ့ ရာစုနှစ်ရဲ့ အကောင်းဆုံး တီထွင်မှုတစ်ခုလို့ ပြောလို့ရတယ်၊ ဒါပေမဲ့ အားနည်းချက်တစ်ခုကတော့ ထူးဆန်းပုံဆောင်ခဲတွေအရမ်းကုန်တာပဲ" လို့ လင်းရှုက စိတ်ပျက်လက်ပျက်နဲ့ ပြန်ဖြေလိုက်ပါတယ်။
အဆင့် ၁ ရှိတဲ့ ကျောက်ဆောင်ပွင့်တစ်ပွင့်ဟာ တစ်နာရီတောင် မခံဘဲ ကုန်သွားနိုင်တာပါ။
"သွားကြစို့၊ ငါတို့ ကွမ်မင် ခံတပ်ကို ပြန်ရမယ်၊ နည်းပြတွေနဲ့ တခြားသူတွေ အဲ့ဒီမှာ ရှိနေလောက်ပြီ" ရှုဝမ်က တခြားသူတွေကို ကြည့်ပြီး ပြောလိုက်ပါတယ်။
ဒီစကားကို ကြားလိုက်ရတဲ့အခါ လူတိုင်းဟာ စိတ်လှုပ်ရှားသွားကြပါတယ်။
တစ်လ... သူတို့ တစ်လလုံးလုံး တိုက်ပွဲဝင်ခဲ့ကြတာပါ။
ဇွန်ဘီတွေရဲ့ ရက်စက်ကြမ်းကြုတ်မှုတွေ၊ ကြောက်စရာကောင်းတဲ့ အသွင်ပြောင်းသတ္တဝါတွေနဲ့ သူတို့ရဲ့ ရဲဘော်ရဲဘက်တွေ နာကျင်စွာ သေဆုံးခဲ့ရတာတွေကို သူတို့ မြင်တွေ့ခဲ့ရပါတယ်။
အားလုံးက အိပ်မက်တစ်ခုလိုပါပဲ။
အချို့စစ်သားတွေဆိုရင် မျက်ရည်တောင် ဝဲလာကြပါတယ်။
ဒီနေရာကနေ ထွက်ခွာရတာဟာ ငရဲတံခါးကနေ နောက်ဆုတ်လိုက်ရသလိုပါပဲ။
"နောက်နှစ်ဆိုရင်တော့ အဖွဲ့ချုပ်ရဲ့ စစ်သားအသစ်တွေ ဒီကို ထပ်ရောက်လာကြဦးမှာပဲ" လင်းရှုလည်း အပြင်ကို ထွက်လာရင်း စိတ်လှုပ်ရှားစွာနဲ့ ပြောလိုက်ပါတယ်။
သူတို့က မိစ္ဆာတွေကို ရှင်းလင်းခဲ့ပေမဲ့ နောက်တစ်နှစ်ကြာရင်တော့ မိစ္ဆာအသစ်တွေနဲ့ ဇွန်ဘီတွေဟာ ဒီနေရာကို ထပ်ပြီး ရောက်လာကြမှာပါ။
ဒါက အဆုံးမရှိတဲ့ သံသရာတစ်ခုလိုပါပဲ။
သူတို့တွေ စက်ရုပ်မြို့လေးကို ဖြတ်လာတဲ့အချိန်မှာတော့ 'ရင်းနှီးနေတဲ့' လူတချို့နဲ့ ထပ်ပြီး ဆုံတွေ့ကြပါတယ်။
"ဟဲဟဲ... မင်းတို့တွေပါလား" လူတစ်ယောက်က မင်းသားဆိုးတစ်ယောက်လို ရယ်မောလိုက်ပါတယ်။
ရှုဝမ်က ရှေ့ကို ကြည့်လိုက်ပြီး မျက်မှောင်ကြုတ်လိုက်ပါတယ်။ ပြီးခဲ့တဲ့တစ်ခေါက် သူတို့နဲ့ ဆုံတုန်းက လင်းရှုရဲ့ စက်မှုဓားကို သူတို့ လုယူသွားခဲ့တာပါ။
"မင်းတို့ရဲ့ တာဝန်ကို ကောင်းကောင်း ထမ်းဆောင်ခဲ့ပုံရတယ်၊ မင်းတို့အိတ်ထဲမှာ ရှိနေတာတွေက ထူးဆန်းပုံဆောင်ခဲတွေ မဟုတ်လား?" နောက်ထပ် လူတစ်ယောက်က လင်းရှုရဲ့ ခါးမှာ ချိတ်ထားတဲ့ အိတ်တွေကို မြင်ပြီး မေးလိုက်ပါတယ်။ အဲ့ဒီအိတ်တွေထဲမှာ အသွင်ပြောင်းသတ္တဝါတွေဆီက ရလာတဲ့ ထူးဆန်းပုံဆောင်ခဲတွေ ရှိနေမယ်ဆိုတာ သူ သိနေတာပါ။
အဖွဲ့ချုပ်စစ်သားတွေဟာ ဒီနေရာကို တစ်လကြာ ရှင်းလင်းရေးလုပ်ဖို့ ရောက်လာကြတာဖြစ်ပြီး တစ်လပြည့်ရင် ပြန်ကြမယ်ဆိုတာကို သူတို့ စုံစမ်းထားပြီးသားပါ။ သူတို့နဲ့ အခုလို ထပ်ဆုံလိမ့်မယ်လို့ ဘယ်သူက ထင်ထားမှာလဲ?
သူတို့ရဲ့ မျက်လုံးတွေထဲမှာတော့ လင်းရှုဘေးက အိတ်တွေနဲ့ စက်ရုပ်ကြီးကို ကြည့်ပြီး လောဘတွေ ပြည့်နေပါတယ်။
ဒီပစ္စည်းတွေကိုသာ ရောင်းလိုက်ရရင် ပိုက်ဆံတွေ အများကြီး ရမှာလေ!
"အဖွဲ့ချုပ်စစ်သားတွေကို ခြိမ်းခြောက်ငွေတောင်းတာရဲ့ နောက်ဆက်တွဲက ဘာဖြစ်မလဲဆိုတာ မင်းတို့ သိလား?" ရွှီဝမ်က သူတို့ကို အေးစက်စက် ကြည့်ပြီး မေးလိုက်ပါတယ်။
ဒါပေမဲ့ သူတို့က မကြောက်တဲ့အပြင် အကျယ်ကြီးတောင် ရယ်မောလိုက်ကြပါတယ်။
"ငါက မင်းတို့ဆီကနေ အတင်းအဓမ္မ လုယူချင်တာကွ!”