အခန်း ၁၉၆ - အလှလေးက သူရဲကောင်းကို ကယ်တင်ခြင်း!?

လင်းရှုသည် ထိုတိုက်ကွက်ကို မြင်လိုက်ရသည့်အခါ မျက်ဝန်းအိမ်များ ပြူးကျယ်သွားရသည်၊၊

ထိုစွမ်းရည်၏ အရှိန်အဟုန်မှာ အလွန်တရာ ကြောက်မက်ဖွယ်ကောင်းလှပြီး မြေပြင်တစ်ခုလုံးကိုပင် တုန်ခါသွားစေသည်၊၊

ပြင်းထန်လှသော ဓားအရှိန်အဝါမှာ သူ၏ထံသို့ တိုက်ရိုက် ဦးတည်ပြေးဝင်လာနေပြီ ဖြစ်သည်၊၊

၎င်းကို ခုခံရန် နည်းလမ်းမရှိချေ၊၊ အကယ်၍သာ သူ ထိပ်တိုက်ရင်ဆိုင်လိုက်ပါက သေဆုံးသွားနိုင်သည်၊၊

သူ ရှောင်တိမ်းရုံမှတစ်ပါး အခြားမရှိတော့ချေ၊၊

ထိုအခိုက်အတန့်မှာပင် အဖြူရောင် အရိပ်တစ်ခုသည် တရှိန်ထိုး ဆင်းသက်လာပြီး လင်းရှုကို ဆွဲယူကာ ဝေးရာသို့ ခေါ်ဆောင်သွားလေသည်၊၊

ဝုန်း...

ဟိန်းဟောက်သံနှင့်အတူ ပြင်းထန်လှသော ပေါက်ကွဲသံကြီးမှာ လင်းရှု ခုနက ရပ်နေခဲ့သည့် နေရာသို့ ကျရောက်သွားပြီး အဆုံးမရှိ နက်ရှိုင်းလှသော ချောက်ကြီးတစ်ခုကို ဖြစ်ပေါ်စေခဲ့သည်၊၊

အကယ်၍ လင်းရှုသာ ထိုနေရာတွင် ကျန်ရစ်ခဲ့ပါက ဧကန်မုချ ထက်ပိုင်းပြတ်သွားပေလိမ့်မည်၊၊

သို့သော် ယခုအခါ လင်းရှုမှာ ပျောက်ကွယ်သွားပြီ ဖြစ်သည်၊၊

"ဒါက အလှလေးက သူရဲကောင်းကို ကယ်တင်လိုက်တဲ့ ပုံစံမျိုး ဖြစ်နေတာလား..." လင်းရှုသည် အလှလေးတစ်ဦး၏ ပွေ့ချီခြင်းကို ခံထားရသဖြင့် ရယ်ရခက် ငိုရခက် ဖြစ်နေမိသည်၊၊

'သူရဲကောင်းက အလှလေးကို ကယ်တင်ရမည့်အစား အလှလေးက သူရဲကောင်းကို ပြန်ကယ်တင်လိုက်သည့် အခြေအနေသို့ ပြောင်းပြန် ဖြစ်သွားပုံရသည်၊၊'

သို့သော် လျိုယွဲ့ ပေါ်လာခြင်းအတွက် လင်းရှု အလွန်ဝမ်းသာသွားသည်၊၊ သူသည် သူမကို လိုက်ရှာနေခဲ့ခြင်း ဖြစ်သော်လည်း ဤလူမိုက်များနှင့်သာ အရင် တိုးခဲ့ခြင်း ဖြစ်သည်၊၊

"မင်းက သူရဲကောင်း မဟုတ်ပါဘူး၊၊" လျိုယွဲ့က သူ့ကို တစ်ချက်ကြည့်ကာ တည်ငြိမ်စွာ တုံ့ပြန်လိုက်သည်၊၊

သူမ၏ တိုက်ရိုက်ကျလှသော စကားကြောင့် သူ သွေးအန်မတတ် ဖြစ်သွားရသည်၊၊

"ဟက်... သူ့ရဲ့ အဖော် ရောက်လာတာပဲ၊၊" ချန်ဖန်းက ရှေ့သို့ ကြည့်လိုက်ရာ သူ၏ မျက်ဝန်းများမှာ ရွှေရောင် တောက်ပသွားသည်၊၊

သူသည် ပြင်းထန်လှသော စွမ်းရည်တစ်ခုကို ထုတ်ဖော်ခဲ့ရသဖြင့် သူ၏ ခန္ဓာကိုယ်အတွင်း၌ ခွန်အား အမြောက်အမြား ကျန်ရှိမနေတော့ပေ၊၊

ပို၍ အရေးကြီးသည်မှာ လင်းရှုကို မသတ်နိုင်ခဲ့ခြင်းက သူ့ကို အထိခိုက်ဆုံး ဖြစ်စေသည်၊၊

"ဘယ်နှစ်ယောက်ပဲလာလာ ငါတို့ အကုန်သတ်ပစ်မယ်၊၊" သူ၏ အဖော်များဖြစ်ကြသော ကျန်ရှိသည့် အဆင့် (၅) တိုက်ခိုက်ရေးသမား သုံးဦးစလုံးက လင်းရှုတို့ဘက်သို့ အေးစက်စွာ စိုက်ကြည့်နေကြသည်၊၊

သူတို့သည် G17 ပျက်စီးခြင်းနယ်မြေ၏ ခေါင်းဆောင်များ ဖြစ်ကြသည်၊၊

သန့်စင်သောနယ်မြေအကယ်ဒမီမှ လူသစ်များသည် မည်မျှပင် အစွမ်းထက်စေကာမူ အဆင့် (၅) တိုက်ခိုက်ရေးသမားများကို ယှဉ်နိုင်မည် မဟုတ်ဟု သူတို့ ယူဆထားကြသည်၊၊

လင်းရှုက ထိပ်ပြောင်နှင့်လူကို သတ်နိုင်ခဲ့ခြင်းမှာ ကံကောင်းမှုတစ်ခုသာ ဖြစ်သည်ဟု သူတို့ ယုံကြည်နေကြဆဲပင်၊၊

"ငါတို့ တစ်ယောက်ကို နှစ်ယောက်စီ ယူရအောင်၊၊" လျိုယွဲ့က သူမဘေးတွင် ရပ်နေသော လင်းရှုကို ကြည့်ကာ ပြောလိုက်သည်၊၊

"အင်း..." လင်းရှု ခေါင်းညိတ်လိုက်သည်၊၊ သူ၏ 'ဒေါသမာန်' စွမ်းရည်မှာ ခုနစ်မိနစ်၊ ရှစ်မိနစ်ခန့် ကျန်ရှိနေသေးရာ ၎င်းမှာ လုံလောက်လှသည်၊၊

သူ့အနေနှင့် အစွမ်းကုန် ကြိုးစားမည်ဆိုပါက အဆင့် (၅) တိုက်ခိုက်ရေးသမား နှစ်ဦးကို သတ်ရန် ထိုအချိန်မှာ လုံလောက်သည်ထက်ပင် ပိုပါသေးသည်၊၊ ၎င်းမှာ ပြဿနာ မဟုတ်ပေ၊၊

သူတို့နှစ်ဦး စကားပြောဆိုပြီးသည်နှင့် တပြိုင်နက် နားလည်မှု အပြည့်ဖြင့် အဆောက်အဦးရှိရာသို့ တရှိန်ထိုး ပြေးဝင်သွားကြတော့သည်၊၊

သူတို့သည် အမည်းရောင်နှင့် အဖြူရောင် အရိပ်နှစ်ခုအလား အလွန်တရာ မြန်ဆန်လှသည်၊၊

"လာနေပြီ...!!!" မြူနှင်းများ ထူထပ်နေဆဲ ဖြစ်သော်လည်း ၎င်းက သူတို့၏ မြင်ကွင်းကို အဟန့်အတား မဖြစ်စေပေ၊၊

တောင်... တောင်... တောင်...

ချန်ဖန်းသည် သူ၏ စကားကို အဆုံးသတ်လိုက်သည်နှင့် ရှေ့တွင် အမည်းရောင် အရိပ်တစ်ခုကို တွေ့ရှိလိုက်ရသည်၊၊

လင်းရှုသည် သူ၏ အနက်ရောင်အစွန်း လှံရှည်နှင့်အတူ ရောက်ရှိလာခြင်းပင်၊၊

သူ၏ လှံမှာ အမည်းရောင် နဂါးတစ်ကောင်အလား ချန်ဖန်းထံသို့ တရှိန်ထိုး ထိုးနှက်လိုက်သည်၊၊

ချန်ဖန်းမှာ ပြန်လည် မတိုက်ခိုက်နိုင်ဘဲ ခုခံရန်သာ အားထုတ်လိုက်ရသည်၊၊

'တော်တော် အားကောင်းတာပဲ...!'

'ဒါက ဘယ်လိုလုပ် ဖြစ်နိုင်မှာလဲ...?! အရင်က သူ့ရဲ့ ခွန်အားက အဆင့် (၄) ပဲ ရှိတာလေ၊၊'

သို့သော် ယခုအခါ လင်းရှုမှာ သိသိသာသာ ကွဲပြားလှသော ခွန်အားများကို ထုတ်ဖော်နေသည်၊၊

'သူ တားမြစ်ထားတဲ့ ဆေးဝါးတစ်ခုခုကို သုံးလိုက်တာလား...?'

သူ မှင်တက်နေစဉ်မှာပင် မြူနှင်းများကြား၌ ကြယ်စင်များ ပေါ်ထွက်လာသည်ကို သတိထားမိလိုက်သည်၊၊ ကောင်းကင်ယံကြီး ပြိုကျလာသည့်အလားပင်၊၊

တပြိုင်နက်တည်းမှာပင် လင်းရှု ဝေ့ယမ်းလိုက်သော အမည်းရောင်လှံမှ အဖြူရောင် အလင်းတန်းများ ထွက်ပေါ်လာသည်၊၊

ရွှေအဆင့်စွမ်းရည် - ကိုးကောင်းကင်ဂလက်ဆီကျဆင်းခြင်း။

ပြင်းထန်လှသော ခွန်အားကြောင့် ချန်ဖန်း၏ မျက်နှာအမူအရာမှာ ပျက်ယွင်းသွားသည်၊၊

သူ၏ ခန္ဓာကိုယ်က ဗီဇအရ ရှောင်တိမ်းရန် ပြင်လိုက်စဉ်မှာပင် လင်းရှု၏ တိုက်ခိုက်မှုမှာ သူ့ထံသို့ ဦးတည်ထားခြင်း မဟုတ်ကြောင်း သိလိုက်ရသည်၊၊

"သတိထား...!" ထိုအခိုက်တွင် အခြား အဆင့် (၅) တိုက်ခိုက်ရေးသမားတစ်ဦးမှာ လှည့်ကြည့်လိုက်ရာ သူ၏ အမူအရာမှာ ရုတ်ချည်း ပြောင်းလဲသွားသည်၊၊

လင်းရှုသည် ထိုအစွမ်းထက်သော စွမ်းရည်ကို ချန်ဖန်းထံသို့ အသုံးပြုနေသည်ဟု သူ ထင်မှတ်ခဲ့ပြီး လင်းရှု၏ အနောက်ဘက်မှနေ၍ အသေအလဲ တိုက်ခိုက်ရန် ပြင်ဆင်နေခဲ့ခြင်း ဖြစ်သည်၊၊

လင်းရှုက စွမ်းရည်ကို ထုတ်ဖော်နေစဉ်မှာပင် ရုတ်တရက် လှည့်ကာ သူ့ထံသို့ အသုံးပြုလိုက်လိမ့်မည်ဟု မည်သူက ထင်ထားမည်နည်း၊၊

သူသည် မိမိ၏ လက်နက်ဖြင့် ခုခံရန် ကြိုးစားသော်လည်း စွမ်းရည်မှ ထွက်ပေါ်လာသော အလင်းတန်းများ၏ ဝါးမြိုခြင်းကို တခဏချင်း ခံလိုက်ရတော့သည်၊၊

ဒုန်း...

ကိုးကောင်းကင်ဂလက်ဆီကျဆင်းခြင်း စွမ်းရည်က ထိုလူကို လွှမ်းမိုးသွားသည့်အခါ သူ၏ လက်နက်မှာ တခဏချင်း ပျက်စီးသွားပြီး သူ၏ ခန္ဓာကိုယ်မှာလည်း အပိုင်းပိုင်းအပြတ်ပြတ် ကွဲအက်သွားတော့သည်၊၊

"တိ..."

"ဂုဏ်ယူပါသည် အရှင်၊၊ အဆင့် (၅) တိုက်ခိုက်ရေးသမားကို သတ်ဖြတ်နိုင်ခဲ့သဖြင့် အတွေ့အကြုံ (၁၀) သန်း ရရှိပါသည်၊၊"

'နောက်ထပ် သန်း ၁၀...!'

ဤအရာအားလုံး ဖြစ်ပျက်နေစဉ်မှာပင် လျိုယွဲ့သည်လည်း ကျန်ရှိသော အဆင့် (၅) တိုက်ခိုက်ရေးသမား နှစ်ဦးကို ရင်ဆိုင်နေသည်၊၊

လျိုယွဲ့၏ လက်ထဲရှိ ပါးလွှာသော ဓားမြှောင်မှာ အဆက်မပြတ် တိုက်ခိုက်မှုများကို ထုတ်ဖော်နေသည်၊၊ သူမ၏ ဓားပညာမှာ ထက်မြက်ပြီး တိကျလှရာ ထိုလူနှစ်ဦးမှာ ပြင်းထန်သော ဖိအားကို ခံစားနေရသည်၊၊

သူမသည် သူမ၏ ဓားကို အလွန်အမင်း အေးစက်သော အရှိန်အဝါဖြင့် လွှမ်းခြုံထားသည့် မည်သည့် ထူးဆန်းသော စွမ်းရည်ကို အသုံးပြုနေသည်ကို သူတို့ မသိရှိကြပေ၊၊

သူမ၏ ဓားမှာ သူတို့၏ လက်နက်များနှင့် ထိတွေ့မိတိုင်း သူတို့၏ လက်နက်များပေါ်တွင် နှင်းခဲအလွှာတစ်ခု ဖြစ်ပေါ်လာစေသည်၊၊

ထိုနှင်းခဲများက သူတို့၏ လက်များကို အလွန်အမင်း အေးစက်စေကာ လက်နက်များကို ဆုပ်ကိုင်ထားရသည်မှာ ပို၍ပင် နာကျင်လာစေသည်၊၊

"ငါတို့ သူမကို သတ်ရမယ်၊ မဟုတ်ရင် ငါတို့ သေလိမ့်မယ်...!" ထိုလူနှစ်ဦးမှာ တစ်ဦးကိုတစ်ဦး ကြည့်ကာ အော်ဟစ်လိုက်ကြသည်၊၊

အကယ်၍ ဤအတိုင်းသာ ဆက်သွားနေပါက သူတို့ သေဆုံးရမည်မှာ အမှန်ပင်၊၊

သူတို့မှာ မည်သည့်အရာကိုမျှ ချန်မထားတော့ဘဲ သူတို့၏ အကောင်းဆုံးသော စွမ်းရည်များကို အသုံးပြုကာ လျိုယွဲ့ကို တိုက်ခိုက်ကြတော့သည်၊၊

သို့သော်လည်း လျိုယွဲ့မှာမူ တည်ငြိမ်အေးဆေးနေဆဲ ဖြစ်ပြီး သူတို့၏ စွမ်းရည်များကို အလွယ်တကူပင် ခုခံနေနိုင်သည်၊၊

"မင်းဆီမှာ ငါ အလိမ်ခံလိုက်ရလိမ့်မယ်လို့ ဘယ်သူက ထင်မှာလဲ၊၊" ချန်ဖန်းက လင်းရှုကို အေးစက်စွာ စိုက်ကြည့်ကာ ပြောလိုက်သည်၊၊

စွမ်းရည်ကို ထုတ်ဖော်နေစဉ်မှာပင် ပစ်မှတ်ကို အခြားတစ်ဦးထံသို့ ရုတ်တရက် ပြောင်းလဲလိမ့်မည်ဟု သူ လုံးဝ မျှော်လင့်မထားခဲ့ပေ၊၊

၎င်းကပင် သူ၏ အသင်းသားကို သေဆုံးစေခဲ့ခြင်း ဖြစ်သည်၊၊

"အခု မင်းရဲ့ အလှည့်ပဲ၊၊" လင်းရှုက သူ၏ စကားကို လျစ်လျူရှုလိုက်ပြီး လှံကို မြဲမြံစွာ ဆုပ်ကိုင်ကာ ချန်ဖန်းထံသို့ ထိုးနှက်လိုက်သည်၊၊

"စကားတွေ အများကြီး မပြောနဲ့ဦး၊ မင်းရဲ့ ခွန်အားကို မြှင့်တင်ဖို့ တားမြစ်ဆေး တစ်ခုခု သုံးထားတာ မဟုတ်လား၊၊ အဲဒီဆေးအရှိန် ကုန်သွားတာနဲ့ မင်း သေပြီသာ မှတ်လိုက်တော့...!"

လင်းရှုသည် တားမြစ်ဆေး တစ်ခုခုကို သောက်သုံးထားသည်ဟု ချန်ဖန်းက ယုံကြည်နေသည်၊၊ ထို့ကြောင့် သူသည် လင်းရှုကို ထိပ်တိုက် မရင်ဆိုင်ဘဲ လင်းရှု အားနည်းသွားသည်အထိ အချိန်ဆွဲရန်သာ ဆုံးဖြတ်လိုက်သည်၊၊

လင်းရှု၏ မျက်ဝန်းများမှာ အမူအရာ ပြောင်းလဲသွားသည်၊၊ သူသည် မည်သည့်အရာကိုမျှ သောက်သုံးထားခြင်း မရှိသော်လည်း 'ဒေါသမာန်' စွမ်းရည်၏ နောက်ဆက်တွဲ အကျိုးသက်ရောက်မှုမှာ တားမြစ်ဆေး သုံးစွဲခြင်းနှင့် ဆင်တူလှသည်၊၊

သူ့တွင် လေးမိနစ်ခန့်သာ ကျန်တော့သဖြင့် ထိုအချိန်အတွင်း သူ့ကို အပြတ်ရှင်းရမည် ဖြစ်သည်၊၊

တွေဝေမနေတော့ဘဲ လင်းရှုသည် မြှားတစ်စင်းအလား ရှေ့သို့ တရှိန်ထိုး ပြေးဝင်သွားတော့သည်၊၊

မျှော်လင့်ထားသည့်အတိုင်းပင်...!

လင်းရှု၏ အနည်းငယ် စိုးရိမ်နေသော အခြေအနေကို မြင်လိုက်ရသည့်အခါ ချန်ဖန်းသည် သူ၏ ခန့်မှန်းချက် မှန်ကန်သည်ဟု ယုံကြည်သွားသည်၊၊ သူသည် လင်းရှုကိုသာ ခုခံထားပြီး ဆေးအရှိန် ကုန်သွားချိန်မှ လင်းရှုကို သတ်ပစ်ရန်သာ စဉ်းစားနေတော့သည်၊၊