အခန်း ၁၈၂ - အာကာသအက်ကြောင်းများ

အဆင့် (၅) ဆန်းကြယ်ပုံဆောင်ခဲ သုံးခု၊၊

"ဟိုလူတွေဆီက ရလာတာ..." လျိုယွဲ့က ဆိုသည်၊၊

"အင်း... ငါလည်း အဆင့် (၅) ပုံဆောင်ခဲ နှစ်ခု ရခဲ့တယ်၊၊" လင်းရှု ခေါင်းညိတ်ပြလိုက်သည်၊၊ အခြားပုံဆောင်ခဲ သုံးခုနှင့် ပေါင်းလိုက်လျှင် သူတို့အဖွဲ့သည် ပထမဆုံးနေ့မှာတင် အဆင့် (၅) ဆန်းကြယ်ပုံဆောင်ခဲ ရှစ်ခုအထိ ရရှိထားပြီ ဖြစ်သည်၊၊

ကြည့်ရသည်မှာ ပထမဆု ရရှိရန် အခွင့်အရေးက တော်တော်လေး မြင့်မားနေဆဲပင်၊၊

"လင်းရှု..." လင်းရှုနှင့် လျိုယွဲ့တို့ ပြန်လာသည်ကို မြင်သောအခါ ကျန်းရင်နှင့် အခြားလူများက ဝမ်းသာအားရ လက်လှမ်းပြကြသည်၊၊

လင်းရှု ခေါင်းညိတ်ပြလိုက်သော်လည်း သူတို့ကို ကြည့်လိုက်သည့်အခါ ကျန်းရင်တို့အဖွဲ့နှင့်အတူ မရင်းနှီးသော သူစိမ်းငါးဦးကိုပါ တွေ့လိုက်ရသည်၊၊

"မြောက်ဘက်နယ်မြေ အတန်း (၁၀) ကလား..." သူတို့ဝတ်စုံပေါ်က အမှတ်တံဆိပ်ကို မြင်သောအခါ လင်းရှုမှာ ရယ်ရခက် ငိုရခက် ဖြစ်သွားရသည်၊၊

'တိုက်ဆိုင်လိုက်တာ... သူတို့အားလုံးကလည်း အတန်း (၁၀) ကပဲကိုး...'

ဖုန်တောတောနှင့် ပေရေနေသော သူတို့၏ မျက်နှာများကို ကြည့်ရုံနှင့် ယနေ့နံနက်ပိုင်းတွင် ဤနေရာ၌ အန္တရာယ်များစွာနှင့် ရင်ဆိုင်ခဲ့ရကြောင်း သိသာလှသည်၊၊

"နေကောင်းကြလား..." ထိုလူများသည် လင်းရှုနှင့် လျိုယွဲ့ကို ကြည့်ကာ အနည်းငယ် ရှိန်နေသော အမူအရာဖြင့် ပြုံးပြကြသည်၊၊

ပြိုင်ပွဲမျှော်စင်ရှိ လူသစ်စာရင်းတွင် လင်းရှုနှင့် လျိုယွဲ့တို့၏ အမည်များကို ဓာတ်ပုံများနှင့်တကွ သူတို့ တွေ့ဖူးထားကြသည်၊၊ ဤလူနှစ်ဦးမှာလည်း အတန်း (၁၀) မှ ဖြစ်နေကြောင်း မြင်လိုက်ရသည့်အခါ သူတို့၏ မျက်ဝန်းများမှာ အံ့အားသင့်မှုများဖြင့် ပြည့်နှက်သွားရသည်၊၊

လင်းရှုက ခေါင်းညိတ် နှုတ်ဆက်လိုက်ပြီးနောက် ကျန်းရင်တို့ဘက်သို့ လှည့်ကာ ပြောလိုက်သည်၊၊

"အပေါ်ကလူတွေကို ငါတို့ ရှင်းပစ်လိုက်ပြီ၊ အဆင့် (၅) ဆန်းကြယ်ပုံဆောင်ခဲ အချို့လည်း ရခဲ့တယ်..."

လင်းရှု၏ စကားကို ကြားသောအခါ ကျန်းရင်နှင့် အခြားလူများက ရယ်မောလိုက်ကြသည်၊၊ "ဒီကောင်တွေက ငါတို့အတွက် ဆန်းကြယ်ပုံဆောင်ခဲတွေကို အလကား လာပေးသွားတာပဲ..."

"ရှေ့ကို ဆက်သွားကြစို့၊၊" လင်းရှုက ခဏမျှ စဉ်းစားပြီးနောက် ပြောလိုက်သည်၊၊

ဤလူများ၏ ခွန်အားမှာလည်း အဆင့် (၃) ဝန်းကျင်ခန့်သာ ရှိကြသည်၊၊

G17 ပျက်စီးခြင်းနယ်မြေ၏ အတွင်းပိုင်းသို့ ပိုမို နက်ရှိုင်းစွာ ဝင်ရောက်လေလေ ပို၍ အန္တရာယ်များလေလေ ဖြစ်မည်၊၊ အကယ်၍ ဤလူများပါ သူတို့နောက်သို့ လိုက်လာပါက ဝန်ထုပ်ဝန်ပိုး ဖြစ်သွားနိုင်သည်၊၊

"နေပါဦး..." လင်းရှု စကားပြောပြီးသည်နှင့် မြောက်ဘက်နယ်မြေ အတန်း (၁၀) အဖွဲ့ထဲမှ အရပ်ရှည်ရှည် လူတစ်ဦးက ထရပ်လိုက်သည်၊၊

"ဘာကိစ္စ ရှိလို့လဲ..."

"ငါတို့ အပေးအယူတစ်ခု လုပ်လို့ရမယ် ထင်တယ်၊၊" မြောက်ဘက်နယ်မြေ အတန်း (၁၀) မှ ထိုသန်မာထွားကြိုင်းသော လူက လင်းရှုကို ကြည့်ကာ ကျယ်လောင်စွာ ပြောလိုက်သည်၊၊

"ဘယ်လို အပေးအယူလဲ..." လင်းရှု မျက်ခုံး ပင့်လိုက်သည်၊၊

"ငါတို့ဆီမှာ ရှိတဲ့ သတင်းအချက်အလက်တစ်ခုနဲ့ မင်းတို့ဆီက ဆန်းကြယ်ပုံဆောင်ခဲတွေကို လဲချင်တာ၊၊" ထိုလူက ဆိုသည်၊၊

သူ၏ လေသံမှာ အလွန်တရာ ယုံကြည်မှု ရှိနေပြီး လင်းရှုအနေနှင့် ဤအပေးအယူကို သေချာပေါက် သဘောတူလိမ့်မည်ဟု ယူဆထားပုံရသည်၊၊

"မင်းတို့ဆီမှာ ဘာသတင်း ရှိလို့လဲ..." လင်းရှု မျက်မှောင်ကြုတ်ကာ မေးလိုက်သည်၊၊

"အာကာသအက်ကြောင်း... တစ်နေရာမှာ အာကာသအက်ကြောင်း ရှိနေတာကို ငါသိတယ်၊၊" ထိုလူက တိုးညှင်းသော်လည်း လေးနက်သော အသံဖြင့် ပြောလိုက်သည်၊၊

'အာကာသအက်ကြောင်း' ဆိုသည့် စကားလုံးကို ကြားလိုက်ရသည့်အခါ လင်းရှုနှင့် အခြားလူများ၏ အမူအရာမှာ ချက်ချင်း ပြောင်းလဲသွားရသည်၊၊

မကြာသေးမီ နှစ်များအတွင်း ကမ္ဘာ့နေရာအနှံ့အပြား၌ အာကာသ တုန်ခါမှုများ ရံဖန်ရံခါ ဖြစ်ပေါ်လေ့ရှိပြီး ထိုမှတစ်ဆင့် အာကာသအက်ကြောင်းများ ပေါ်ပေါက်လာတတ်သည်၊၊ အခြားကမ္ဘာမှ သတ္တဝါများ သို့မဟုတ် ရတနာများသည် ထိုအက်ကြောင်းများမှတစ်ဆင့် ထွက်ပေါ်လာတတ်ကြသည်၊၊

သို့သော် ဤကဲ့သို့သော အာကာသအက်ကြောင်းများသည် အချိန်အတိုင်းအတာတစ်ခု ကြာပြီးနောက် ပြန်လည် ပျောက်ကွယ်သွားတတ်သည်၊၊ ၎င်းမှာ အလွန်ပင် ဆန်းကြယ်လှပြီး ယနေ့ထက်တိုင် မည်သို့ ဖြစ်ပေါ်လာသည်ကို မည်သူမျှ တိတိကျကျ မသိရှိကြသေးပေ၊၊

သေချာသည်မှာ ထိုအာကာသအက်ကြောင်းများ၏ ပတ်ဝန်းကျင်တွင် အခြားကမ္ဘာမှ တစ်စုံတစ်ရာ ရှိနေနိုင်သည်ဟူသော အချက်ပင်၊၊ ရတနာများလည်း ရှိနေနိုင်ခြေ အလွန် မြင့်မားသည်၊၊

"မင်းပြောတာ မှန်တယ်ဆိုတာ ဘယ်လို သက်သေပြမလဲ..." လင်းရှုက တည်ငြိမ်စွာ မေးလိုက်သည်၊၊

အကယ်၍ သူ၏ သတင်းကသာ တိကျမှန်ကန်မည်ဆိုပါက သွားရောက်ကြည့်ရှုရန် အမှန်တကယ်ပင် ထိုက်တန်လှသည်၊၊

"သတင်းအချက်အလက်ကတ်... ငါတို့ရဲ့ သတင်းအချက်အလက်ကတ်တွေကို မင်းတို့ဆီမှာ ထားခဲ့လို့ရတယ်၊ မင်းတို့ ပြန်လာတဲ့အခါမှ ပြန်ပေးပေါ့၊၊" ထိုလူက ဆက်ပြောသည်၊၊

လင်းရှုက ခေါင်းခါလိုက်ရင်း "ဒီကတ်က ငါ့အတွက် ဘာမှ အသုံးမဝင်ဘူး၊၊"

"ငါတို့က နောက်ဆုံးအဆင့်နဲ့တော့ မပြန်ချင်ရုံတင်ပါ၊၊ မင်းတို့ဆီက အဆင့် (၅) ဆန်းကြယ်ပုံဆောင်ခဲ သုံးခုသာ ပေးမယ်ဆိုရင် ဒီအာကာသအက်ကြောင်း ရှိတဲ့နေရာကို ငါပြောပြမယ်၊၊" ထိုလူက ဆိုသည်၊၊

ဤအာကာသအက်ကြောင်းများထဲတွင် အခြားတစ်ဖက်မှ ကြောက်မက်ဖွယ် သတ္တဝါများ ရှိနေနိုင်သည်ဖြစ်ရာ ၎င်းမှာ အန္တရာယ်နှင့် အခွင့်အရေး ဒွန်တွဲနေသည့် ကိစ္စမျိုး ဖြစ်သည်၊၊

သို့သော် ဤနေရာမှာ အလွန်တရာ အန္တရာယ်များလှသည်၊၊ သူတို့မှာ နယ်စပ်ဒေသသို့ ရောက်ရုံသာ ရှိသေးသော်လည်း ရှေ့သို့ ဆက်တိုးရန်ပင် မစွမ်းသာကြတော့ချေ၊၊

"ကောင်းပြီလေ၊၊" လင်းရှု ခဏမျှ စဉ်းစားပြီးနောက် ကျောပိုးအိတ်ထဲမှ အဆင့် (၅) ဆန်းကြယ်ပုံဆောင်ခဲ သုံးခုကို တိုက်ရိုက် ထုတ်ယူကာ သူတို့ထံသို့ လှမ်းပစ်ပေးလိုက်သည်၊၊

"မင်း ငါ့ကို ယုံတာလား..." ထိုစဉ် ထိုလူမှာ မှင်တက်သွားရသည်၊၊

လင်းရှုက ဤမျှအထိ ပြတ်ပြတ်သားသား ဆုံးဖြတ်လိမ့်မည်ဟု သူ လုံးဝ မျှော်လင့်မထားခဲ့ပေ၊၊

"ဘယ်လိုပဲဖြစ်ဖြစ် ငါတို့က အကယ်ဒမီ တစ်ခုတည်းကပဲလေ၊ အကယ်၍ မင်း ငါ့ကို ညာတယ်ဆိုရင်လည်း မင်းကို ရှာရတာ ငါ့အတွက် မခက်ပါဘူး၊၊" လင်းရှုက ပြုံးရင်း ဆိုလိုက်သည်၊၊

လင်းရှု၏ စကားကို ကြားသောအခါ မြောက်ဘက်နယ်မြေ အတန်း (၁၀) မှ လူများမှာ ခါးသက်စွာ ပြုံးလိုက်ကြသည်၊၊ လင်းရှု ပြောသည်မှာ အမှန်တရားပင် ဖြစ်သည်၊၊

လင်းရှုထံမှ ပုံဆောင်ခဲများကို ရရှိပြီးနောက် ထိုလူသည် သူ၏ ဖုန်းကို ထုတ်ကာ လင်းရှု၏ ဖုန်းထံသို့ မြေပုံတစ်ခု ပေးပို့လိုက်သည်၊၊

"ဒီမြေပုံအတိုင်း လိုက်သွားမယ်ဆိုရင် အာကာသအက်ကြောင်းကို တွေ့ပါလိမ့်မယ်၊၊ စိတ်ချပါ... ငါတို့ မြောက်ဘက်နယ်မြေ အတန်း (၁၀) ရဲ့ ခွန်အားက မင်းတို့လောက် မကောင်းပေမဲ့ ငါတို့ ဘယ်တော့မှ မလိမ်ပါဘူး၊၊"

လင်းရှု ခေါင်းညိတ်ပြလိုက်သည်၊၊

ထိုလူများနှင့် လမ်းခွဲပြီးနောက် ကျန်းရင်က အနည်းငယ် တွေဝေစွာဖြင့် လင်းရှုအား မေးလိုက်သည်၊၊ "လင်းရှု... မင်းတကယ်ပဲ ဒါက အစစ်လို့ ထင်လား...?"

ကျန်းရင်၏ စကားအဆုံးတွင် ကျန်းလီနှင့် လီဖင်းတို့၏ မျက်လုံးများသည်လည်း လင်းရှုထံသို့ ရောက်ရှိလာကြသည်၊၊

"လူတစ်ယောက် လိမ်နေသလားဆိုတာကို သူတို့ရဲ့ မျက်နှာအမူအရာနဲ့ မျက်ဝန်းတွေကို ကြည့်ရင် သိနိုင်ပါတယ်၊၊ သူတို့ပြောတာ အမှန်ဆိုတာ သံသယဖြစ်စရာ မလိုပါဘူး၊၊" လင်းရှု၏ ဘေးတွင် ရပ်နေသော လျိုယွဲ့က တိုးညှင်းစွာ ပြောလိုက်သည်၊၊

"မှန်တယ်... ငါလည်း သူတို့လိမ်နေတယ်လို့ မထင်ဘူး၊ အဲဒီကို သွားပြီး တစ်ချက်ကြည့်ကြရအောင်၊၊" လင်းရှုသည် ညာဘက်လက်တွင် လှံရှည်ကို ကိုင်စွဲကာ ဘယ်ဘက်လက်တွင်မူ အနက်ရောင်အစွန်း လှံရှည်ကို ထိန်းကိုင်ရင်း မြေပုံပေါ်ရှိ သတ်မှတ်ထားသော နေရာသို့ ခရီးဆက်ခဲ့ကြသည်၊၊

ထိုအာကာသအက်ကြောင်းဟု ဆိုသည့်နေရာမှာ ဤမြို့တော်၏ ဗဟိုချက် တစ်နေရာတွင် ရှိနေပုံရသည်၊၊

လင်းရှုနှင့် အခြားလူများ ရှေ့သို့ ဆက်လက် လျှောက်လှမ်းလာကြစဉ် ပတ်ဝန်းကျင်ရှိ မြေပြင်ပေါ်၌ ရေညှိကဲ့သို့သော အရာများ ပိုမို များပြားလာပြီး အနည်းငယ် စိုစွတ်နေသည်၊၊

အဆောက်အဦးများ၏ မျက်နှာပြင်ပေါ်တွင်လည်း ထူးဆန်းသော နွယ်ပင်များစွာ ရစ်ပတ်နေသည်ကို တွေ့ရသည်၊၊

"သတိထားကြ၊၊ ငါ့စိတ်ထဲမှာ တစ်ခုခု ထူးဆန်းနေသလိုပဲ၊၊" လင်းရှု မျက်မှောင်ကြုတ်ရင်း ပတ်ဝန်းကျင်ကို အစဉ်မပြတ် စူးစမ်းကြည့်ရှုနေသည်၊၊

'တိတ်ဆိတ်လိုက်တာ... ဒီနေရာက တိတ်ဆိတ်လွန်းနေတယ်...'

**ကျိ... ကျိ... ကျိ...**

ရှေ့ရှိ ပျက်စီးနေသော လမ်းမပေါ်သို့ သူတို့ ခြေချလိုက်စဉ်မှာပင် ထူးဆန်းသော အသံတစ်ခု ထွက်ပေါ်လာရာ တုန်လှုပ်နေသော လီဖင်းမှာ အော်ဟစ်မိတော့သည်၊၊

"ကြွက်တစ်ကောင်ပါပဲ၊၊" ကျန်းရင်က ထိုအမည်းရောင် သတ္တဝါကို ရှင်းလင်းစွာ မြင်လိုက်ရသည့်အခါ သက်ပြင်းချလိုက်သည်၊၊

ဤကြွက်များသည် ယုန်တစ်ကောင်ခန့် အရွယ်အစားရှိပြီး အတော်လေး ကြီးမားကြသည်၊၊ သူတို့၏ ပါးစပ်များမှာလည်း လွှသွားကဲ့သို့သော သွားများဖြင့် ပြည့်နှက်နေရာ အလွန်ပင် ရွံရှာဖွယ် ကောင်းလှသည်၊၊

"အများကြီးပဲ... အရိုးစုတွေ အများကြီးပဲ..." သူတို့အဖွဲ့ ရှေ့သို့ ဆက်လက် ရွေ့လျားလာကြစဉ် နောက်ထပ် လမ်းထောင့်တစ်ခုသို့ ရောက်သောအခါ ကျန်းလီ၏ မျက်ဝန်းများမှာ ပြူးကျယ်သွားပြီး တုန်လှုပ်နေသော အသံဖြင့် ပြောလိုက်သည်၊၊

ရှေ့ရှိ လမ်းမပေါ်တွင် အရိုးစုများမှာ နေရာအနှံ့ ပျံ့ကျဲနေသည်၊၊ အချို့မှာ လူသားများ၏ အရိုးများ ဖြစ်ပုံရပြီး အချို့မှာမူ ဆင့်ကဲပြောင်းလဲထားသော သားရဲများ၏ အရိုးစုများ ဖြစ်ကြသည်၊၊

ထိုအရိုးစုများပေါ်တွင်မူ ကြွက်အမြောက်အမြားမှာ ရပ်တန့်နေကြသည်၊၊

"သတိထား... သူတို့ကို သွားမတိုက်ခိုက်နဲ့ဦး...!”