အခန်း ၁၂၈ - နွယ်ပင်သားရဲကို လူတစ်ရာ ဝိုင်းတိုက်ခြင်း၊၊

"အောက်မှာ တစ်ခုခု ရှိနေတယ်၊၊"

လင်းရှုသည် ချောက်နက်ကြီးနှင့် တူသော မှောင်မိုက်နေသည့် နေရာကို ကြည့်ကာ ခေတ္တ တွန့်ဆုတ်ပြီးမှ ပြောလိုက်သည်၊၊

"မှန်တယ်၊ အောက်မှာ တစ်ခုခု ရှိနေတာ၊၊" ချင်းလီက လင်းရှုကို ကြည့်ကာ ချီးကျူးသည့်လေသံဖြင့် ထောက်ခံလိုက်သည်၊၊

ရောက်ရောက်ချင်းမှာပင် အောက်၌ တစ်ခုခုရှိနေသည်ကို သတိပြုမိခြင်းမှာ သူ၏ အကဲခတ်နိုင်စွမ်းမှာ မဆိုးလှပေ၊၊

"အရာတစ်ခု ဟုတ်လား၊ ဘာအရာလဲ၊၊" ကျန်းရင်နှင့် အခြားသူများက မသိစိတ်ဖြင့် လွှတ်ခနဲ မေးလိုက်ကြသည်၊၊

"ကြည့်လိုက်လေ၊၊" ချင်းလီသည် သာမန် အဆင့် ၁ ပုံဆောင်ခဲတစ်ခုကို ထုတ်ယူကာ လမ်းမကြီး၏ အလယ်သို့ ပစ်ချလိုက်သည်၊၊

ပုံဆောင်ခဲ လိမ့်ဆင်းသွားသံနှင့်အတူ ဂျိမ်းဂျိမ်းမြည်သံကို ကြားလိုက်ရသည်၊၊ နောက်တစ်စက္ကန့်တွင် နွယ်ပင်နှင့်တူသော အရာအချို့မှာ ရှေ့သို့ ထွက်ပေါ်လာပြီး ပုံဆောင်ခဲကို ရစ်ပတ်ကာ ချောက်နက်ထဲသို့ ဆွဲချသွားတော့သည်၊၊

"ဒါက..." ကျန်းရင်နှင့် အခြားသူများမှာ ထိုမြင်ကွင်းကို ကြည့်ကာ ထိတ်လန့်တကြား ငေးကြည့်နေမိကြသည်၊၊

လင်းရှုမှာမူ ထိုနွယ်ပင်လို အရာများမှာ ဆင့်ကဲပြောင်းလဲထားသော သားရဲတစ်ကောင်၏ အာရုံခံလက်တံများ ဖြစ်နိုင်ကြောင်း သေချာသွားသည်၊၊

အရင်ကကဲ့သို့ပင် ဖြစ်သည်၊၊

သေသေချာချာ ခန့်မှန်းကြည့်ပြီးနောက် ထိုသတ္တဝါမှာ အလွန်ကြီးမားရမည်ဖြစ်ပြီး အာရုံခံလက်တံများမှာ အက်ကွဲကြောင်းများမှတစ်ဆင့် နေရာအနှံ့ ပျံ့နှံ့နေခြင်း ဖြစ်ရမည်ဟု သူ ယူဆလိုက်သည်၊၊

"ဆင့်ကဲပြောင်းလဲထားတဲ့ သားရဲပဲ၊ အောက်မှာ အလွန် ကြောက်စရာကောင်းတဲ့ သားရဲတစ်ကောင် ရှိနေတယ်၊၊" ချင်းလီက တည်ငြိမ်စွာ ပြောလိုက်သည်၊၊

"အဲဒီအကောင်ကို ဘယ်လို အနိုင်တိုက်မလဲဆိုတာ ငါတို့အားလုံး ဝိုင်းပြီး ညှိနှိုင်းသင့်တယ်လို့ ငါယုံကြည်တယ်၊၊" ထိုအချိန်တွင် ဓားကြီးတစ်လက်ကို ကိုင်ဆောင်ထားသော သန်မာသည့် လူတစ်ဦးက လူတိုင်းကို ကျယ်လောင်စွာ ကြေညာလိုက်သည်၊၊

သူ့စကားအဆုံးတွင် လူ ၁၀၀ ၏ မျက်လုံးများမှာ သူ့ထံသို့ ရောက်ရှိလာကြသည်၊၊

"ငါက လျိုချန်း၊ အဆင့် ၅ စစ်သည်တစ်ဦးပဲ၊၊ အောက်က အကောင်က အဆင့် ၆ အစိမ်းရောင် နွယ်ပင်သားရဲ ဖြစ်မယ်လို့ ငါထင်တယ်၊၊" သူသည် လူတိုင်းကို တစ်ချက် ဝေ့ကြည့်လိုက်သည်၊၊

အစိမ်းရောင် နွယ်ပင်သားရဲ ဟုတ်လား၊၊

လင်းရှု သူ၏ ဖုန်းကို ထုတ်ကာ ဆင့်ကဲပြောင်းလဲထားသော သားရဲများအကြောင်း ရုပ်ပြလက်စွဲစာအုပ်ကို ဖွင့်လိုက်သည်၊၊

လင်းရှုသည် အရင်ကတည်းက အကြောင်းအရာအားလုံးကို ဖတ်ရှုကာ ဒေါင်းလုဒ်လုပ်ထားခြင်းဖြစ်သဖြင့် လိုင်းမရှိလျှင်ပင် ရှာဖွေရာ၌ အခက်အခဲ မရှိပေ၊၊

ရှာဖွေကြည့်လိုက်သည့်အခါ ထိုသတ္တဝါနှင့် ပတ်သက်သော အချက်အလက်များ အမှန်တကယ် ရှိနေသည်ကို တွေ့လိုက်ရသည်၊၊

"အဆင့် ၆ အစိမ်းရောင် နွယ်ပင်သားရဲ၊ ပင်လယ်မှော်ကောင်နှင့် တူသော်လည်း အလျား ၁၀ မီတာကျော် ရှည်လျားသော ကြီးမားသည့် သတ္တဝါ၊၊ ခန္ဓာကိုယ်ပေါ်ရှိ အာရုံခံလက်တံများမှာ အလွန်ရှည်လျားပြီး နွယ်ပင်များကဲ့သို့ အစိမ်းရောင် ရှိသည်၊၊ သံမဏိကိုပင် ချိုးဖျက်နိုင်ပြီး ရေထဲတွင်သာမက ကုန်းပေါ်တွင်လည်း ရှင်သန်နိုင်သော အစွမ်းထက် မိစ္ဆာကောင် ဖြစ်သည်၊၊"

လင်းရှု ခုနက သူတွေ့ခဲ့သော အာရုံခံလက်တံများမှာ ဤသတ္တဝါ၏ အစိတ်အပိုင်းများ ဖြစ်နေသည်ကို သိလိုက်ရသည့်အခါ ကြက်သီးမွေးညင်းများပင် ထသွားသည်၊၊

အဆင့် ၆ သားရဲကြီးပဲ၊၊

ဤကဲ့သို့ ကြီးမားသော သားရဲမျိုးမှာ ကိုင်တွယ်ရ အခက်ခဲဆုံး ဖြစ်သည်၊၊

"ဒါက အဆင့် ၆ သားရဲကြီးမှန်း သိရဲ့သားနဲ့ ငါတို့ကို သေတွင်းထဲ သွားခိုင်းနေတာလား၊၊" စစ်သည်တစ်ဦးက ထရပ်ကာ လျိုချန်းကို ဒေါသတကြီး စိုက်ကြည့်လိုက်သည်၊၊

"ငါတို့ဆီမှာ စစ်သည် တစ်ရာကျော် ရှိနေတာပဲ၊ သူ့ကို ဒီကို ဆွဲခေါ်နိုင်ရင် ငါတို့ သေချာပေါက် သတ်နိုင်မှာပါ၊၊ ပြီးတော့ အဆင့် ၆ သားရဲရဲ့ ပုံဆောင်ခဲကလည်း အလွန် တန်ဖိုးကြီးတာ မင်းတို့ သိသားပဲ၊၊" လျိုချန်းက လူအုပ်ကို ပြောလိုက်သည်၊၊

အခြားသူများမှာလည်း ထိုစကားကို ကြားသောအခါ စိတ်လှုပ်ရှားသွားကြသည်၊၊ သို့သော် ပုံဆောင်ခဲက တန်ဖိုးကြီးသော်လည်း အသက်ရှိမှ ရမည် မဟုတ်ပါလား၊၊ သေသွားလျှင် ဘာမှ ရမည်မဟုတ်သဖြင့် သူတို့ တွန့်ဆုတ်နေကြသည်၊၊

"ဒီမှာ ထိုင်ပြီး အသေခံမလား၊ ဒါမှမဟုတ် သူ့ကို သတ်မလား၊ အဆင့် ၆ သားရဲပဲလေ၊၊" လျိုချန်းက ဆက်လက် မြှောက်ပင့်ပြောဆိုနေသည်၊၊

"မင်းတို့ အားလုံး ဒီအတိုင်း ထိုင်စောင့်နေကြရင်တော့ ရှေ့က ထွက်ပေါက်ကလွဲလို့ တခြား သွားစရာ နေရာမရှိဘူး၊၊ နောက်ဆုံးမှာ မင်းတို့ အားလုံး အားအင်ကုန်ခမ်းပြီး ငတ်သေသွားကြလိမ့်မယ်၊၊"

"ကောင်းပြီလေ၊ တစ်ချက်လောက် စမ်းကြည့်တာပေါ့၊၊"

ထိုအချိန်တွင် အဖွဲ့ငယ်တစ်ခုမှာ လျိုချန်းထံသို့ လျှောက်သွားသည်၊၊ သူတို့သည် ဒီအတိုင်း အသေခံမည့်အစား တစ်ကြိမ်လောက် ကံစမ်းကြည့်ရန် ဆုံးဖြတ်လိုက်ကြခြင်း ဖြစ်သည်၊၊

အဖွဲ့တစ်ခု စတင်လိုက်သည်နှင့် အခြားသူများလည်း ဝိုင်းအုံလာကြတော့သည်၊၊

"သွားကြရအောင်၊၊" လင်းရှုက ပြောလိုက်သည်၊၊

လျိုချန်းမှာ အဆင့် ၅ စစ်သည်ဖြစ်ပြီး ဤအုပ်စုတွင် အသန်မာဆုံး ဖြစ်သည်၊၊ သူသည် အဆင့် ၆ ပုံဆောင်ခဲကို လိုချင်နေမှန်း လင်းရှု သိသော်လည်း ဂရုမစိုက်ပေ၊၊ အဓိက ပန်းတိုင်မှာ ထိုသတ္တဝါကို သတ်ပြီး ဤနေရာမှ ထွက်ခွာရန်သာ ဖြစ်သည်၊၊

စစ်သည်များ အားလုံး စုရုံးပြီးနောက် လူတစ်ယောက်က လျိုချန်းကို မေးလိုက်သည်၊၊ "မင်း သူ့ကို ဘယ်လို သတ်ဖို့ စီစဉ်ထားလဲ၊၊"

"ငါ စူးရှတဲ့ အလင်းရောင်နဲ့ အောက်ဘက်ကို ကြည့်လိုက်တော့ အောက်မှာ ရေတွေပဲ ရှိနေတာ၊၊ သူက အောက်မှာပဲ ရှိနေရင် ငါတို့ တိုက်ခိုက်ရတာ ခက်လိမ့်မယ်၊ ဒါပေမဲ့ ငါတို့ ဒါကို သုံးလို့ရတယ်..."

လျိုချန်း ပြုံးလိုက်ပြီး ပင်‌ပေါင်ဘောလုံး အရွယ်အစားရှိသော အလုံးလေးတစ်ခုကို ထုတ်ပြသည်၊၊

"L2 အမျိုးအစား ဗုံးပဲ၊ ဒီအလုံးလေးရဲ့ စွမ်းအားက အလွန် ပြင်းထန်တယ်၊၊" လျိုချန်းက ပြုံးလျက် ပြောသည်၊၊

"ဒါက ငါတို့ကိုပါ သတ်ပစ်မှာ မဟုတ်ဘူးလား၊၊" လူတစ်ယောက်က ထိုဗုံးကို ကြည့်ကာ ထိတ်လန့်တကြား မေးလိုက်သည်၊၊

ထိုဗုံး၏ စွမ်းအားကို သူတို့ ကြားဖူးကြသည်၊၊ ၎င်းမှာ ထိန်းချုပ်ထားသော ကုန်ပစ္စည်းဖြစ်ပြီး အလွယ်တကူ ဝယ်ယူ၍ မရနိုင်ပေ၊၊

"မဟုတ်ပါဘူး၊ ငါတို့ အောက်မှာက ရေတွေပဲ ရှိတာလေ၊၊" လျိုချန်းက ခေါင်းခါပြသည်၊၊ သူသည် ချောက်နက်နားသို့ ချဉ်းကပ်သွားကာ ခလုတ်ကို နှိပ်လိုက်သည်၊၊ ထိုအချိန်တွင် အချိန်မှတ်နာရီ၌ ၃ စက္ကန့်ဟု ပေါ်လာသည်၊၊

လျိုချန်း တွန့်ဆုတ်မနေဘဲ အောက်သို့ ပစ်ချလိုက်သည်၊၊

အခြား စစ်သည်များမှာ သံနံရံများဘက်သို့ အမြန် ဆုတ်ခွာသွားကြပြီး နားကို လက်နှင့် ပိတ်ထားလိုက်ကြသည်၊၊

ဂျိမ်း၊၊

ကျယ်လောင်လှသော ပေါက်ကွဲသံနှင့်အတူ ချောက်နက်ထဲမှ မီးတောက်များ ရုတ်တရက် ထွက်ပေါ်လာသည်၊၊

ပေါက်ကွဲသံမှာ အလွန် ကျယ်လောင်လှသဖြင့် သူတို့၏ နားစည်များပင် ပေါက်ထွက်တော့မတတ် ခံစားလိုက်ရသည်၊၊

ပေါက်ကွဲမှုကြောင့် ဖြစ်ပေါ်လာသော လေလှိုင်းများကြောင့် စစ်သည်များ အားလုံး သံနံရံများဆီသို့ လွင့်စင်သွားကြသည်၊၊ အကယ်၍ သူတို့သာ နံရံနားတွင် ကြိုတင် မပြင်ဆင်ထားပါက အရိုးများပင် ကျိုးပဲ့သွားနိုင်သည်၊၊

သို့သော် နံရံများကို အလွန် ခိုင်ခံ့အောင် တည်ဆောက်ထားပုံရသည်၊၊ ပြင်းထန်သော ပေါက်ကွဲမှုကြောင့် နံရံရှိ မီးလုံးလေးများပင် ပျက်စီးခြင်း မရှိပေ၊၊

ထိုနေရာမှာ အတော်ကြာအောင် တုန်ခါနေပြီးမှ ပြန်လည် တည်ငြိမ်သွားသည်၊၊

ဂူး၊၊

ထူးဆန်းသော အသံတစ်ခု ထွက်ပေါ်လာပြီး အစိမ်းရောင် နွယ်ပင်နှင့်တူသော အာရုံခံလက်တံများမှာ အပေါ်သို့ စတင် တွားတက်လာသည်၊၊

၎င်းသည် မျက်နှာပြင်ပေါ်သို့ ရောက်ရှိလာသည်၊၊

ရေအောက်မှ ကြီးမားလှသော သတ္တဝါကြီးတစ်ကောင် တွားတက်လာသည်ကို မြင်လိုက်ရသည်၊၊

၎င်း ပေါ်လာသည့်အခါ ကြီးမားသော အနက်ရောင် အရိပ်ကြီးတစ်ခုက လူတိုင်းကို လွှမ်းမိုးထားသကဲ့သို့ပင်၊၊

အဆင့် ၆ အစိမ်းရောင် နွယ်ပင်သားရဲ၊၊

၎င်းသည် ဆလင်ဒါပုံသဏ္ဌာန် ရှိပြီး ခန္ဓာကိုယ် တစ်ခုလုံးတွင် အရွယ်အစား အမျိုးမျိုးရှိသော အာရုံခံလက်တံများစွာ ရှိနေသည်၊၊ ၎င်းသည် ခန္ဓာကိုယ် တစ်ခုလုံးကို အပေါ်သို့ မြှင့်တင်လိုက်သည့်အခါ အလွန် ကြောက်စရာ ကောင်းလှသည်၊၊

"သွားကြစို့၊ အဲဒီအကောင်ကို သတ်ကြစို့၊၊" လျိုချန်းက အော်ဟစ်လိုက်သည်၊၊

သူသည် သူ၏ ဓားကြီးကို မြှောက်ကာ ရှေ့သို့ ပြေးဝင်လိုက်သည်၊၊

အခြား စစ်သည်များမှာလည်း သတိဝင်လာကာ နေရာတစ်ခုလုံးကို လွှမ်းခြုံသွားစေမည့် စွမ်းရည်မျိုးစုံဖြင့် စတင် တိုက်ခိုက်ကြတော့သည်၊၊