အခန်း ၁၁၈ - ရွှေအဆင့်စွမ်းရည် - ‘ခြေရာဖျောက်ခြင်း’၊၊
အဲဒီအချိန်မှာပဲ လင်းရှူက ငါးကြီးရဲ့ ဦးခေါင်းကို တည့်တည့်ကြီး ထိုးနှက်လိုက်ပါတယ်၊၊
ကုန်းပေါ်မှာဆိုတော့ ရေရဲ့ခုခံမှု မရှိတာကြောင့် လင်းရှူဟာ သူ့ရဲ့ ‘ပေါက်ကွဲလက်သီး’ စွမ်းအားကို အပြည့်အဝ ထုတ်သုံးနိုင်ခဲ့တာပါ၊၊
ဒါ့အပြင် ‘ဒေါသ’ စွမ်းရည်ရဲ့ အရှိန်အဟုန်ကြောင့် ဒီအားအင်က အဆပေါင်းများစွာ ပိုမိုပြင်းထန်သွားပြီး အဆင့် ၄ သားရဲကြီးရဲ့ ဦးခေါင်းခွံဟာ လင်းရှူရဲ့ လက်သီးချက်ကြောင့် ချိုင့်ဝင်သွားကာ သွေးစိမ်းတွေ ချက်ချင်း ပန်းထွက်လာပါတော့တယ်၊၊
“တင်း၊၊”
“အဆင့် ၄ သားရဲကို သတ်ဖြတ်နိုင်ခဲ့တဲ့အတွက် ဂုဏ်ယူပါတယ်အရှင်၊၊ အတွေ့အကြုံရမှတ် ၃၅၀၀၀၀ ရရှိပါတယ်၊၊”
“ဟူး၊၊” လင်းရှူက ဧရာမလိပ်ဖြူငါးကြီးရဲ့ ဘေးမှာ ထိုင်ချလိုက်ရင်း သက်ပြင်းချလိုက်မိတယ်၊၊
ခုနက ဖြစ်ပျက်ခဲ့တာတွေကို ပြန်တွေးကြည့်ရင် တကယ့်ကို အန္တရာယ်ကြီးလှပါတယ်၊၊
တကယ်လို့ ဒီငါးဖြူကြီးကို ကုန်းပေါ်ကို အမျှော်အမြင်ရှိရှိ ဆွဲမတင်ခဲ့ရင် သူ့ကို နှိမ်နင်းဖို့ လုံးဝ ဖြစ်နိုင်မှာ မဟုတ်ဘူးလေ၊၊
“လင်းရှူ…၊၊” ထျန်းကျိက တစ်ခုခု ပြောဖို့ ပြင်လိုက်ပေမဲ့ လင်းရှူက ရေထဲကို နောက်တစ်ကြိမ် ခုန်ဆင်းသွားပြန်ပါပြီ၊၊
သူက ဆက်ပြီး ကူးခတ်သွားတဲ့အခါ ခုနက သူမြင်ခဲ့တဲ့ ဆားကျောက်ဆောင်ပွင့် ရှိတဲ့နေရာကို မကြာခင်မှာပဲ ရောက်သွားပါတယ်၊၊
ကြာပန်းဖြူကြီးတစ်ပွင့်နဲ့ တူနေတဲ့ ဆားကျောက်ဆောင်ပွင့်ဟာ အောက်ခြေမှာ ငြိမ်သက်စွာ ရှိနေတုန်းပါပဲ၊၊
လင်းရှူက ပတ်ဝန်းကျင်ကို ဝေ့ကြည့်လိုက်ပြီး ဘာအန္တရာယ်မှ မရှိတော့တာ သေချာမှ သူ့ရဲ့လက်ကို ဆားကျောက်ဆောင်ပွင့်ဆီကို ဖြည်းဖြည်းချင်း တိုးသွားလိုက်တယ်၊၊
ဒီအရာက ထူးခြားတဲ့ အဖြူရောင် အမှုန်လေးတွေနဲ့ စုဖွဲ့ထားတာ ဖြစ်ပေမဲ့ တကယ့်ကို မာကျောလှပါတယ်၊၊
သစ်ပင်ပေါ်မှာ ပေါက်နေတဲ့ မှိုတစ်ပွင့်ကို ခူးသလိုပဲ လင်းရှူက အားနည်းနည်း စိုက်လိုက်တဲ့အခါ ကျောက်ခဲအမည်းကြီးပေါ်ကနေ အဲဒါကို အလွယ်တကူ ခွာယူနိုင်ခဲ့တယ်၊၊
အဲဒီနောက်မှာတော့ လင်းရှူဟာ အပေါ်ကို ပြန်ပြီး ကူးတက်လာပါတော့တယ်၊၊
“မင်း အဆင်ပြေရဲ့လား၊၊” လင်းရှူ ရေထဲက ပြန်တက်လာတာကို မြင်တော့ ထျန်းကျိက စိုးရိမ်တကြီး မေးလိုက်တယ်၊၊
လင်းရှူ ခေါင်းညိတ်ပြလိုက်ပြီး သူ့ရဲ့ မျက်မှန်ကို ချွတ်ကာ ညာလက်ကို ဆန့်ထုတ်လိုက်ပါတယ် “ဒါ ဆားကျောက်ဆောင်ပွင့် မဟုတ်လား၊၊”
ထျန်းကျိက လင်းရှူရဲ့ လက်ထဲက ဧရာမ ဆားကျောက်ဆောင်ပွင့်ကြီးကို မြင်လိုက်ရတဲ့အခါ အံ့သြလွန်းလို့ အသက်ရှူတောင် ရပ်သွားမတတ်ပါပဲ၊၊
ဒီအရာက ဘယ်လိုလုပ် ဒီလောက်တောင် ကြီးနေရတာလဲ၊၊
ပြီးတော့ ပုံစံကလည်း အရမ်းကို လှပလွန်းပါတယ်၊၊
“ဟုတ်တယ်၊ ဒါပဲ၊ ဒါပေမဲ့ ဒီအရွယ်အစားမျိုးကတော့ နှစ်ပေါင်းတစ်ရာမှာ တစ်ခါတောင် တွေ့ဖို့ မလွယ်ဘူး…၊၊” ထျန်းကျိက မျက်လုံးအပြူးသားနဲ့ တိုးတိုးလေး ရေရွတ်နေမိတယ်၊၊
“ခင်ဗျား ဘယ်လောက် လိုချင်တာလဲ၊၊” လင်းရှူက ထျန်းကျိကို မေးလိုက်တယ်၊၊
“နည်းနည်းပဲ၊ အောက်ခြေကနေ အမှုန်လေးတွေ နည်းနည်းလောက် ခြစ်ယူပေးရင် ရပါပြီ၊၊” ထျန်းကျိက အရမ်းကို စိတ်လှုပ်ရှားစွာ ပြောပြီး သူ့ကျောပိုးအိတ်ထဲကနေ ထူးခြားတဲ့ သေတ္တာလေးတစ်လုံးကို ထုတ်လိုက်တယ်၊၊
လင်းရှူ ခေါင်းညိတ်လိုက်ပြီး ဆားကျောက်ဆောင်ပွင့်ရဲ့ အောက်ခြေကို ဖြည်းဖြည်းချင်း ပွတ်တိုက်လိုက်တဲ့အခါ အဖြူရောင် အမှုန်လေးတွေက ထျန်းကျိရဲ့ သေတ္တာထဲကို တဖြည်းဖြည်း ကျဆင်းသွားပါတယ်၊၊
ကြည့်ရတာတော့ သာမန်ဆားဖြူတွေနဲ့ ဘာမှမထူးခြားပါဘူး၊၊
ဒါပေမဲ့ လင်းရှူ သိတာကတော့ သူတို့ရဲ့ ပုံစံက တူချင်တူမယ်၊ ပါဝင်တဲ့ ဒြပ်စင်တွေကတော့ အများကြီး ကွာခြားမှာပါ၊၊
“ရပြီ၊ ရပါပြီ၊ ကျေးဇူးအများကြီး တင်ပါတယ်၊၊” သူ့သေတ္တာထဲက ဆားလို အမှုန်လေးတွေကို ကြည့်ပြီး ထျန်းကျိဟာ အရမ်းကို ဝမ်းသာနေပါတယ်၊၊
ဒီအရာရှိရင် သူ့သမီးလေးရဲ့ ရောဂါက သေချာပေါက် ပျောက်ကင်းတော့မှာလေ၊၊
“ကျေးဇူးတင်ပါတယ်၊ ကျေးဇူးတင်ပါတယ်၊၊” သူက လင်းရှူကို အလေးအနက် ပြောနေပြန်တယ်၊၊
“ရပါတယ်၊၊” လင်းရှူက ခေါင်းခါပြလိုက်တယ်၊၊ သူလည်း ကိုယ်တိုင် ရှာဖွေဖို့ ဆင်းတာဖြစ်လို့ ဒါကို အပိုအလုပ်လို့ သူ မယူဆပါဘူး၊၊
သူက အမှုန်အနည်းငယ် ခြစ်ပေးလိုက်ပေမဲ့ ဆားကျောက်ဆောင်ပွင့်ကြီးကတော့ ကြာပန်းဖြူ ပုံစံအတိုင်းပဲ လှပနေတုန်းပါပဲ၊၊
“ဒါကြီးက ဒီလောက်ကြီးနေတာ၊ ဘယ်လောက်တောင် ရောင်းရမလဲ မသိဘူး…၊၊”
“ခင်ဗျား အခုပဲ ပြန်တော့မှာလား၊၊” ထျန်းကျိက အထုတ်အပိုးတွေ ပြင်နေတာကို မြင်တော့ လင်းရှူက မေးလိုက်တာပါ၊၊
“ဟုတ်တယ်၊ ကျွန်တော် ဆေးရုံကို အမြန်ပြန်ပြီး ဒါကို ဆရာဝန်ဆီ ပေးရမယ်၊ ဒါမှ ဆေးဖော်လို့ ရမှာ၊၊” ထျန်းကျိက ခေါင်းညိတ်ပြီး ပြန်ဖြေတယ်၊၊
“ကျေးဇူးအများကြီး တင်ပါတယ်၊၊”
“ရပါတယ်၊ ဒါနဲ့ ကျွန်တော် ဒီကနေ ရှေ့ကို ဆက်သွားမယ်ဆိုရင် ဘယ်ကို ရောက်မှာလဲ၊၊” လင်းရှူက ထျန်းကျိကို မေးလိုက်တယ်၊၊
စစ်သည်တော်သမဂ္ဂရဲ့ ဝဘ်ဆိုက်မှာ သေမင်းလမ်းစဉ်နဲ့ ပတ်သက်တဲ့ အချက်အလက်တွေ အများကြီး ရှိပေမဲ့ အဲဒါတွေကို ပိုက်ဆံနဲ့ ဝယ်ရတာ များပါတယ်၊၊ တချို့ အချက်အလက်တွေက ပိုက်ဆံအပြင် အဆင့်သတ်မှတ်ချက်ပါ လိုသေးတယ်၊၊ ဥပမာ သေမင်းလမ်းစဉ်ရဲ့ လမ်းကြောင်း အချက်အလက်တွေကို ကြည့်ချင်ရင် အနည်းဆုံး အဆင့် ၂ အဖွဲ့ဝင် ဖြစ်ဖို့ လိုတာမျိုးပေါ့၊၊
“ဒီကနေ ရှေ့ကို မီတာ ၅၀၀၀၀ လောက် သွားရင်တော့ အပြာရောင်တောအုပ်ရဲ့ ဇုန်တစ်ခုကို ရောက်လိမ့်မယ်၊ ဒါပေမဲ့ အဲဒီထက် ကျော်ရင်တော့ ကျွန်တော်လည်း မသေချာဘူး၊ ဘာလို့လဲဆိုတော့ တခြားလူတွေ ပြောတာပဲ ကြားဖူးပြီး ကျွန်တော် ကိုယ်တိုင်ကတော့ မရောက်ဖူးလို့ပါ၊၊” လို့ ထျန်းကျိက စိတ်မကောင်းစွာနဲ့ ပြောတယ်၊၊
သူက အရင်တစ်ခါ ဒီနေရာအထိပဲ ရောက်ဖူးပြီး သားရဲတွေရဲ့ တိုက်ခိုက်မှုကို ခံရတာကြောင့် အတင်း ထွက်ပြေးခဲ့ရတာကိုး၊၊
“အင်း၊ အဆင်ပြေပါတယ်၊၊”
“ဒါနဲ့ ဒါက မင်းအတွက်ပါ၊၊” ထျန်းကျိက အထုတ်အပိုးတွေ သိမ်းပြီးတဲ့အခါ လက်ဖဝါးအရွယ် သစ်သားသေတ္တာလေး တစ်လုံးကို ထုတ်ပြီး လင်းရှူကို ပေးလိုက်တယ်၊၊
“ဒါ ဘာလဲ၊၊” လင်းရှူ အံ့သြသွားတယ်၊၊
“ဒါက ကျွန်တော့်ရဲ့ ဘိုးဘွားစစ်သည်တော်တွေဆီကနေ လက်ဆင့်ကမ်းလာတဲ့ ကိုယ်ခံစွမ်းရည် တစ်ခုပါ၊ ကျွန်တော်ကတော့ ဒါကို မသင်ယူနိုင်ဘူး၊ ဒါကြောင့် မင်းကိုပဲ ပေးလိုက်ပါ့မယ်၊၊” ထျန်းကျိက ပြုံးပြီး ပြောတယ်၊၊
“ကိုယ်ခံစွမ်းရည် ဟုတ်လား၊၊”
လင်းရှူက အခုဆိုရင် အဆင့် ၃ စစ်သည်တော် ဖြစ်နေပြီမို့လို့ ‘နဝမကောင်းကင် ဂလက်ဆီကျဆင်းခြင်း’ လိုမျိုး ရွှေအဆင့် စွမ်းရည်တွေကို သင်ယူနိုင်ပြီလေ၊၊
“ဒါဆို ကျွန်တော် သွားတော့မယ်နော်၊၊” ထျန်းကျိက လင်းရှူကို ပြုံးပြပြီး သူတို့ လာခဲ့တဲ့ လမ်းအတိုင်း ပြန်ထွက်သွားပါတော့တယ်၊၊
သူ့ရဲ့ ကျောပြင်ကို ကြည့်ရင်း လင်းရှူ ခေါင်းခါလိုက်မိတယ်၊၊ အဲဒီနောက် မြေပြင်ပေါ်မှာ ထိုင်ပြီး လက်ဖဝါးအရွယ် သစ်သားသေတ္တာလေးကို သေသေချာချာ ကြည့်လိုက်တယ်၊၊
ပြီးတော့ ဘာမှမဆိုင်းမတွဘဲ ဖွင့်လိုက်ပါတော့တယ်၊၊
“ရွှေအဆင့် ကိုယ်ခံစွမ်းရည်လား၊၊”
သေတ္တာထဲက စွမ်းရည်ကတ်ပြားကို မြင်လိုက်ရတဲ့အခါ လင်းရှူ တုန်လှုပ်သွားတယ်၊၊ ကိုယ်ခံစွမ်းရည်တွေက အရမ်းကို ဈေးကြီးပြီး သာမန်စွမ်းရည်ကတ်တွေထက် အများကြီး ပိုတန်ဖိုးရှိတာပါ၊၊ ပြီးတော့ တော်တော်လေးလည်း ရှားပါးတယ်လေ၊၊ ဒါပေမဲ့ ထျန်းကျိက သူ့ကို ရွှေအဆင့် စွမ်းရည်တစ်ခု ပေးလိမ့်မယ်လို့ သူ လုံးဝ မျှော်လင့်မထားခဲ့ပါဘူး၊၊
ဒီအချိန်မှာ လင်းရှူ တော်တော်လေးကို စိတ်လှုပ်ရှားသွားမိတယ်၊၊ အရာရာတိုင်းမှာ အကြောင်းနဲ့ အကျိုး ရှိတယ်ဆိုတာ ဒါကို ပြောတာပဲ ဖြစ်မှာပါ၊၊
တကယ်လို့ သူသာ အစပိုင်းမှာ ဟိုဦးလေးကြီးကို မကူညီခဲ့ရင် ကျိုင်းကောင်တွေရဲ့ ထောင်ချောက်ထဲမှာ သူ ဒုက္ခရောက်နေမှာ ဖြစ်သလို ထျန်းကျိကို မကူညီခဲ့ရင်လည်း ဒီကိုယ်ခံစွမ်းရည်ကို ရမှာ မဟုတ်ဘူးလေ၊၊
“ရွှေအဆင့် ကိုယ်ခံစွမ်းရည် - ‘ခြေရာဖျောက်ခြင်း’၊၊”
လင်းရှူ ဒီစွမ်းရည်ရဲ့ နာမည်ကို မြင်လိုက်ရတဲ့အခါ တကယ့်ကို မိုက်တယ်လို့ ခံစားလိုက်ရတယ်၊၊ အဲဒီနောက် ဘာမှမစဉ်းစားတော့ဘဲ တောက်ပနေတဲ့ ရွှေအဆင့် ကိုယ်ခံစွမ်းရည် ကတ်ပြားကို သူ့ရဲ့ နဖူးပေါ်မှာ ဖြည်းဖြည်းချင်း တင်လိုက်ပါတော့တယ်၊၊
အဲဒီကတ်ကို သုံးလိုက်တာနဲ့ လင်းရှူရဲ့ ခေါင်းထဲကို အချက်အလက်တွေ အများကြီး စီးဝင်လာတာကို ခံစားလိုက်ရတယ်၊၊
မကြာခင်မှာပဲ ရွှေရောင်တွေ တလက်လက် တောက်ပနေတဲ့ ကတ်ပြားကနေ လင်းရှူရဲ့ စိတ်ထဲကို အချက်အလက်တွေ အကုန်ပေးပြီးနောက်မှာတော့ ကတ်က အရောင်မှိန်သွားပါတော့တယ်၊၊
လင်းရှူ ပြန်ထလိုက်ပြီး သူ့ရဲ့ ကိုယ်ကို နည်းနည်း လှုပ်ရှားကြည့်လိုက်တယ်၊၊ သူ လေပေါ်မှာ လမ်းလျှောက်နေရသလို ခံစားလိုက်ရပြီး သူ့ရဲ့ အရှိန်ကလည်း တကယ့်ကို မြန်လှပါတယ်၊၊
သူ ‘ခြေရာဖျောက်ခြင်း’ စွမ်းရည်ကို တကယ် မသုံးရသေးခင်မှာတင် သူ့တစ်ကိုယ်လုံး ပေါ့ပါးနေပြီလို့ ခံစားနေရတာပါ၊၊
တကယ့်ကို အားကောင်းတဲ့ ကိုယ်ခံစွမ်းရည်ပဲ၊၊