အခန်း ၁၁၃ - ကြောက်မက်ဖွယ်ရာ မျှော့ကြီး၊၊

“တောက်၊၊”

ဒီမြင်ကွင်းကို မြင်လိုက်ရတဲ့အခါ လင်းရှူဟာ တော်တော်လေးကို ရွံရှာသွားပြီး သူ့ရဲ့စွမ်းအားတွေကို စုစည်းကာ လျင်မြန်စွာ ရှောင်တိမ်းလိုက်ပါတယ်၊၊

အဲဒီ တိုက်ရန်နိုဆောရပ်စ် မျှော့ကြီးရဲ့ ကိုယ်ထည်ဟာ သူရပ်နေခဲ့တဲ့ နောက်က သစ်ပင်ကြီးရဲ့ သစ်ကိုင်းကို အရှိန်နဲ့ သွားဆောင့်မိတယ်၊၊

မျှော့ကြီးရဲ့ ကိုယ်ပေါ်မှာရှိတဲ့ ထက်မြက်တဲ့ ဆူးတွေဟာ သစ်ကိုင်းအထူကြီးထဲကို စိုက်ဝင်သွားပြီး တရှဲရှဲ အသံတွေ ထွက်လာပါတယ်၊၊

သစ်ကိုင်းကြီးဆီကနေ အငွေ့ဖြူတွေ ထွက်လာပြီး ခဏချင်းမှာတင် တိုက်စားခံလိုက်ရတယ်၊၊

ဘုန်း -

သစ်ပင်အမြင့်ကြီးဟာ မြေပြင်ပေါ်ကို ဒီအတိုင်းပဲ လဲကျသွားပါတော့တယ်၊၊

ရှူး -

အဲဒီအချိန်မှာပဲ လင်းရှူက စိတ်ကို ပြန်ထိန်းလိုက်တယ်၊၊ သူက သေတ္တာပေါ်က ခလုတ်ကို နှိပ်လိုက်တဲ့အခါ လှံမည်းကြီးက ထွက်လာပါတယ်၊၊ လင်းရှူက လှံကို ချက်ချင်းဖမ်းကိုင်ပြီး ဝေ့ယမ်းလိုက်တဲ့အခါ မီးတောက်တွေ ချက်ချင်း ထွက်ပေါ်လာတယ်၊၊

မီးငှက် အကောင်တစ်ဆယ်ကျော်ဟာ အဲဒီ မျှော့ကြီးဆီကို တရှိန်ထိုး ပြေးဝင်သွားပါတယ်၊၊

အဲဒီနောက် မျှော့ကြီးရဲ့ ကိုယ်ကို မီးတောက်တွေက ဖုံးလွှမ်းသွားပြီး မီးလေပွေကြီးတစ်ခုလို အရှိန်အဟုန်နဲ့ လှည့်ပတ်နေပါတော့တယ်၊၊

ရှဲ ရှဲ ရှဲ -

တိုက်ရန်နိုဆောရပ်စ် မျှော့ကြီးဟာ နာကျင်နေတဲ့အတိုင်း ထူးဆန်းတဲ့ အသံတွေ ပေးနေတယ်၊၊

ပြီးသွားပြီလား၊၊

ယုတ္တိဗေဒအရ ပြောရရင် မျှော့တွေက ရေဓာတ်ခန်းခြောက်တာကို ကြောက်ကြတယ်၊၊ ဒါကြောင့် လင်းရှူ ထုတ်လိုက်တဲ့ မီးတောက်တွေက သူ့ကို လောင်ကျွမ်းစေနိုင်မှာပါ၊၊

ဒါပေမဲ့ နောက်တစ်စက္ကန့်မှာတင် အဲဒီမျှော့ကြီးက မြေကြီးထဲကို တိုးဝင်သွားပြီး မီးတောက်တွေလည်း ငြိမ်းသွားပါတယ်၊၊

“သူ ပျောက်သွားပြီလား၊၊” ဒီအချိန်မှာ ထျန်းကျိက လမ်းလျှောက်လာပြီး ပတ်ဝန်းကျင်ကို သတိနဲ့ ကြည့်နေတယ်၊၊

အဲဒီမျှော့ကြီးရဲ့ ပုံစံက အရမ်းရွံစရာကောင်းလွန်းလို့ သူကတော့ အခုထိ တုန်ရင်နေတုန်းပါပဲ၊၊

“သူ ဒီမှာရှိသေးတယ်၊၊” လင်းရှူက ကိုယ်ကို တင်းထားပြီး ဓားမည်းကြီးကို ကျစ်ကျစ်ပါအောင် ဆုပ်ကိုင်လိုက်တယ်၊၊

လှံမည်းကြီးက အရမ်းလေးလွန်းတာကြောင့် လင်းရှူလည်း အခုအချိန်မှာ နည်းနည်းတော့ မောလာပြီလေ၊၊

“ဟေးဟေး၊၊ ဒီမှာ လူသစ်တွေ ရောက်နေပြန်ပြီပဲ၊၊” အဲဒီအချိန်မှာပဲ တခြားတစ်ဖက်ကနေ အသံတစ်သံ ထွက်လာပါတယ်၊၊

မျက်နှာမှာ အမာရွတ်တွေနဲ့ ထိပ်ပြောင်နေတဲ့ စစ်သည်တော်တစ်ယောက်ဟာ သားရဲအရေခွံနဲ့ လုပ်ထားတဲ့ အဝတ်အစားတွေကို ဝတ်ပြီး လမ်းလျှောက်လာတာကို သူတို့ မြင်လိုက်ရတယ်၊၊

သူ့လက်ထဲမှာ ဓားရှည်နှစ်လက်ကို ကိုင်ထားပြီး အဲဒီဓားတွေပေါ်ကနေ သွေးစိမ်းတွေ စီးကျနေတာကြောင့် သူဟာ လူတစ်ယောက် ဒါမှမဟုတ် သားရဲတစ်ကောင်ကို အခုလေးတင် သတ်လာတာ သေချာပါတယ်၊၊

“သူက အသားစားသတ္တဝါပဲ၊၊” ထျန်းကျိက အဲဒီလူကို သတိကြီးစွာ ကြည့်လိုက်တယ်၊၊

ပြာလဲ့လဲ့တောအုပ်ထဲမှာ သားရဲတွေနဲ့ စစ်သည်တော်တွေကို ချောင်းမြောင်းတိုက်ခိုက်ဖို့ပဲ အချိန်ဖြုန်းနေတဲ့ ဒီလိုလူမျိုးတွေ အများကြီး ရှိပါတယ်၊၊

သူတို့မှာ ကိုယ်ကျင့်တရား မရှိဘဲ သတ်ဖြတ်ဖို့နဲ့ လုယက်ဖို့ပဲ သိကြတယ်၊၊

ဒါကြောင့် သူတို့ကို ‘အသားစားသတ္တဝါ’ တွေလို့ လူသိများကြတာပါ၊၊

“ဘာလိုချင်တာလဲ၊၊” ထျန်းကျိက အဲဒီလူကို စိုက်ကြည့်ရင်း မေးလိုက်တယ်၊၊

ဒီလူရဲ့ အရှိန်အဝါကို ကြည့်ရတာ သူဟာ အဆင့် ၃ စစ်သည်တော် ဒါမှမဟုတ် အဲဒီထက် မြင့်တဲ့သူ ဖြစ်နိုင်တာကြောင့် သူတို့ ရန်မစရဲပါဘူး၊၊

“ဘာလိုချင်တာလဲ ဟုတ်လား၊၊” ထိပ်ပြောင်တဲ့လူက ရယ်မောလိုက်ပြီး သူ့လက်ထဲက ဓားရှည်ကို လျှာနဲ့ယက်ကာ သွေးတွေကို ပါးစပ်ထဲ ထည့်လိုက်တယ်၊၊

သူက ရူးသွပ်နေတဲ့ ပုံစံမျိုး ပြလိုက်ပါတယ်၊၊

“မင်းတို့ရဲ့ ခေါင်းတွေကို လိုချင်တာကွ၊၊” နောက်တစ်စက္ကန့်မှာပဲ အဲဒီလူက ရူးသွပ်စွာ အော်ဟစ်ရင်း လင်းရှူဆီကို ပြေးဝင်လာပါတော့တယ်၊၊

ဘုန်း -

ဒါပေမဲ့ သူပြေးဝင်လာတဲ့ အချိန်မှာပဲ မြေပြင်ပေါ်က တစ်ခုခုကို နင်းမိသွားသလို အသံတစ်ခု ထွက်လာပါတယ်၊၊ တိုက်ရန်နိုဆောရပ်စ် မျှော့ကြီးက မြေကြီးထဲကနေ ထွက်လာပြီး သူ့ခြေထောက်ကို ပတ်လိုက်ပါပြီ၊၊

“ဒါ ဘာကြီးလဲ၊၊”

အဲဒီလူက ထိတ်လန့်သွားပြီး သူ့ခြေထောက်မှာ ပြင်းထန်တဲ့ နာကျင်မှုကို ခံစားလိုက်ရတယ်၊၊ သူ လှုပ်လို့ မရတော့ပါဘူး၊၊

ပိုဆိုးတာက သူ့ရဲ့ ဘောင်းဘီတွေက အငွေ့တွေ ထွက်လာပြီး အက်ဆစ်နဲ့ ထိထားသလိုမျိုး တိုက်စားခံနေရတာပါပဲ၊၊

“တောက်၊၊ မင်းအမေပဲ…၊၊” အဲဒီလူက နာကျင်စွာ အော်ဟစ်ရင်း သူ့ခြေထောက်က မျှော့ကြီးကို ဓားနဲ့ အတင်းခုတ်ပါတော့တယ်၊၊

သူ ခုတ်ချလိုက်တဲ့အခါ မျှော့ကြီးရဲ့ ကိုယ်ထည်က နှစ်ပိုင်း ပြတ်သွားတယ်၊၊

ဒီလောက်ပဲလား၊၊

ဒါကို မြင်လိုက်ရတဲ့ လင်းရှူကတော့ အံ့သြသွားတယ် - ဒါက ဒီလောက် မလွယ်ကူသင့်ဘူးလေ၊၊

အဲဒီလူက မျှော့ကြီးကို နှစ်ပိုင်းပိုင်းလိုက်တဲ့အခါ အပြာနုရောင် အရည်ပျစ်ပျစ်တွေ အများကြီး သူ့ခြေထောက်ပေါ်ကို စီးကျလာပါတယ်၊၊

ရှဲ ရှဲ ရှဲ -

ပိုပြီး ကျယ်လောင်တဲ့ အသံကြီး ထွက်လာပြီး သူ့ရဲ့ ခြေထောက်တစ်ဖက်လုံး လုံးဝ တိုက်စားခံလိုက်ရပါပြီ၊၊

“အား…၊၊” ပြင်းထန်တဲ့ နာကျင်မှုကြောင့် အဲဒီလူက အော်ဟစ်ငိုယိုနေပါတော့တယ်၊၊

လင်းရှူက သူ့ကို ဂရုမစိုက်ဘဲ နှစ်ပိုင်းပြတ်သွားတဲ့ မျှော့ကြီးကိုပဲ အာရုံစိုက်နေတယ်၊၊ ဒီအချိန်မှာ မျှော့ကြီးရဲ့ ကိုယ်ထဲကနေ အရာတွေ အများကြီး ထွက်လာနေတယ်၊၊ အလင်းပေါက် ပိုးကောင်လေးတွေလိုပဲ…၊၊

ခွဲခြားစိစစ်နိုင်တဲ့ မျက်လုံးကို သုံးကြည့်လိုက်တဲ့အခါ -

အဆင့် ၃ - တိုက်ရန်နိုဆောရပ်စ် မျှော့ (သားလောင်း)

ဝိသေသလက္ခဏာများ - တိုက်ရန်နိုဆောရပ်စ် မျှော့သားလောင်း၊ လျင်မြန်စွာ လှုပ်ရှားနိုင်ပြီး ခေါင်းမှာ စုပ်ခွက်ပါရှိကာ လူတွေကို ကပ်တွယ်ပြီး သွေးစုပ်နိုင်တယ်၊၊

အာဟာရဓာတ် မြင့်မားပြီး အစိမ်းလိုက်စားရင် ကြွပ်ရွနေတတ်တယ်၊၊

“တောက်၊၊” အချက်အလက်တွေကို မြင်ပြီးနောက် လင်းရှူဟာ ရွံလွန်းလို့ တုန်သွားမိတယ်၊၊

ကြွပ်ရွနေမယ် ဟုတ်လား၊၊ ဒီစနစ်က တော်တော်လေးကို ရွံစရာကောင်းတာပဲ၊၊

အဲဒီ မျှော့သားလောင်းလေးတွေက ထိပ်ပြောင်တဲ့လူရဲ့ ကိုယ်ပေါ်ကို တက်သွားပြီး သူတို့ရဲ့ စုပ်ခွက်တွေနဲ့ သွေးတွေကို အငန်းမရ စုပ်ယူပါတော့တယ်၊၊

“ဖယ်ကြစမ်း၊၊ ဖယ်ကြစမ်း၊၊” အဲဒီလူက ရူးသွပ်သလို အော်ဟစ်နေပြီး ဓားနှစ်လက်လုံး မြေပြင်ပေါ်မှာ ကျနေပါပြီ၊၊ သူက အဲဒီသားလောင်းတွေကို အတင်းဖျစ်ညှစ် သတ်ဖို့ ကြိုးစားပေမဲ့ အရေအတွက်က အရမ်းများလွန်းလို့ အကုန်သတ်ဖို့ မဖြစ်နိုင်ပါဘူး၊၊

စက္ကန့်အနည်းငယ်အတွင်းမှာတင် သူ့ရဲ့ ကိုယ်ခန္ဓာက မြေပြင်ပေါ် လဲကျသွားပြီး မျက်လုံးအပြူးသားနဲ့ အသက်မဲ့သွားပါတော့တယ်၊၊

“ထိုက်တာပဲ၊၊” ဒါကို မြင်လိုက်ရတဲ့ ထျန်းကျိကလည်း ကြောက်လန့်နေပေမဲ့ ခပ်တိုးတိုး ကျိန်ဆဲလိုက်တယ်၊၊

နောက်ပြီး နှစ်ပိုင်းပြတ်သွားတဲ့ မျှော့ကြီးကလည်း ပြန်ပြီး လှုပ်ရှားလာပြန်တယ်၊၊

မသေသေးဘူးလား၊၊

လင်းရှူ အံ့သြသွားတယ် - ဒီသတ္တဝါက တော်တော်လေးကို ကြောက်စရာကောင်းတာပဲ၊၊

“လင်းရှူ၊ အခုပဲ သွားကြရအောင်၊၊” ထျန်းကျိက အော်ပြောတယ်၊၊

အဲဒီလူရဲ့ ကိုယ်ခန္ဓာက သွေးတွေ အစုပ်ခံရလို့ ခြောက်ကပ်သွားပြီ ဖြစ်သလို မျှော့သားလောင်းလေးတွေကလည်း အရွယ်အစား ကြီးလာပြီး လင်းရှူရှိတဲ့ဘက်ကို တွန့်လိမ်ပြီး လာနေကြပါပြီ၊၊

“သွားစို့၊၊” ထျန်းကျိက ဒီအန္တရာယ်ရှိတဲ့ မြင်ကွင်းကို မြင်ပြီး အော်လိုက်တယ်၊၊ တစ်ကိုယ်လုံးမှာလည်း ကြက်သီးတွေ ထနေပြီး ဒါတွေက အရမ်းကို ရွံစရာကောင်းလွန်းတယ်လေ၊၊

ဒါပေမဲ့ လင်းရှူကတော့ အခုအချိန်မှာ မကြောက်တော့ပါဘူး၊၊ အဲဒီအစား သူက အရမ်းကို စိတ်လှုပ်ရှားနေတယ်၊၊

ဒီသားလောင်း တစ်ကောင်ချင်းစီက အဆင့် ၃ သတ္တဝါတွေပဲလေ၊၊

အတွေ့အကြုံတွေ၊၊ အတွေ့အကြုံတွေ အများကြီး ရတော့မှာပဲ၊၊

“မြန်မြန်လုပ်ပါဦး၊၊” လင်းရှူ ကြောက်နေတယ်လို့ ထျန်းကျိက ထင်ပြီး သူ့ကို ဆွဲခေါ်ဖို့ ကြိုးစားတဲ့အချိန်မှာပဲ လင်းရှူက ဓားမည်းကြီးကို ကိုင်ပြီး ရှေ့ကို ပြေးထွက်သွားပါတော့တယ်၊၊

“နှင်းဆီမုန်တိုင်းတိုက်ခိုက်မှု၊၊”