အခန်း ၁ - ကောင်းကင်ကျွန်းကမ္ဘာ၊ သန်းရာချီ တန်အရောင်းအဝယ်
ကျိုးတုတစ်ယောက် မျက်လုံးများကို မနည်းဖွင့်လိုက်ရင်း နိုးလာခဲ့သည်။ ယနေ့ လေက ထူးထူးခြားခြား အလွန်ပြင်းထန်နေသလို ခံစားလိုက်ရသည်။
လေပြင်းတစ်ချက် သူ့ကို ဖြတ်တိုက်သွားသည်နှင့် ကိုယ်ခန္ဓာတစ်ခုလုံး တုန်ခါသွားပြီး ချက်ချင်းနိုးကြားလာခဲ့သည်။
ထို့နောက်မှသာ တစ်စုံတစ်ရာ မှားယွင်းနေကြောင်း သူသတိပြုမိလိုက်သည်။
သူ့မျက်စိရှေ့တွင် မြင်နေရသည်က ပြာလဲ့လဲ့ကောင်းကင်နှင့် ဖြူဖွေးနေသော တိမ်တိုက်များသာ ဖြစ်သည်။ အဖြူရောင်တိမ်တိုက်များက နေရာအနှံ့ ပြန့်နှံ့နေပြီး အဝေးကိုပင် ရှင်းရှင်းလင်းလင်း မမြင်ရပေ။
“ဘာကြီးလဲကွာ… ဒီနေရာက ဘယ်နေရာလဲ?”
“ငါ အိပ်ရာပေါ်မှာ ရှိနေတာ မဟုတ်ဘူးလား?”
ကျိုးတု အလန့်တကြား ထလိုက်ပြီး လှည့်ပတ်ကြည့်လိုက်သည်။
သူရပ်နေသည့်နေရာသည် အချင်း ဆယ်မီတာခန့်သာရှိသော ကျွန်းငယ်တစ်ခု ဖြစ်နေသည်။ ကျွန်း၏ အစွန်းဘက်များတွင် ဘာတစ်ခုမှ မရှိပေ။
ကောင်းကင်ကျွန်း၏ အစွန်းထိ လျှောက်သွားပြီး အောက်ဘက်တွင် ဘာတစ်ခုမှမရှိဘဲ ကြည်လင်ဖြူဖွေးနေသော တိမ်တိုက်များကို ငုံ့ကြည့်လိုက်သောအခါ သူ့ခေါင်းပင် မူးဝေလာသည်။
“ဒါ…ဒါ..…ကောင်းကင်ကျွန်းကြီးပဲ!”
“နောက်နေတာလားဟ?”
“ငါ အိပ်မက်မက်နေတာပဲ ဖြစ်ရမယ်!”
ကျိုးတုက မျက်စိရှေ့ရှိ အရာအားလုံးကို လုံးဝမယုံနိုင်သေးပေ။ ထို့ကြောင့် မိမိလက်ကို အားကုန်ဆွဲလိမ်လိုက်သည်။
“အင့်… မနိုးသေးဘူး။ နာတယ်ဟ!”
“အိပ်မက် မဟုတ်ဘူး!”
“ဒါက တကယ့် ကောင်းကင်ကျွန်းကမ္ဘာကြီးပဲ!”
“ဒါပေမဲ့ ဒီကျွန်းပေါ်မှာ ဘာတစ်ခုမှ မရှိဘူးလေ။ ငါက ဘာစားရမလဲ? ဘာသောက်ရမလဲ?”
“နေစရာတောင် မရှိဘူး။ ညရောက်ရင် ဘယ်လိုရှင်သန်ရမလဲ?”
အကျပ်အတည်းနှင့် အန္တရာယ်အာရုံတစ်ခုက ကျိုးတု၏ စိတ်ထဲတွင် တဖြည်းဖြည်း လွှမ်းမိုးလာသည်။
ကောင်းကင်ကျွန်းကို အသေးစိတ် စူးစမ်းကြည့်ပြီးနောက် ကျိုးတုသည် ကျွန်းအလယ်တွင် ဖြူဖွေးနေသော ကျောက်သလင်းတစ်လုံးကို တွေ့လိုက်သည်။
သူ ထိုနေရာသို့သွားကာ စိန်ပုံသဏ္ဍာန်ရှိသည့် ဖြူဖွေးနေသော ကျောက်သလင်းကို ကောက်ယူလိုက်သည်။ ထိုကျောက်သလင်း၏ ထိတွေ့မှုက ကျောက်စိမ်းကဲ့သို့ ချောမွေ့ပြီး အေးစက်နေသည်။
တစ်ချိန်တည်းမှာပင် ထိုကျောက်သလင်းထံမှ သုံးဖက်မြင်အချက်အလက်ပြားတစ်ခု ထွက်ပေါ်လာပြီး သူ့မျက်စိရှေ့တွင် ပေါ်လာသည်။
【ကောင်းကင်ကျွန်း ရှင်သန်ရေးကမ္ဘာမှ ကြိုဆိုပါသည်။】
【ကျွန်းသခင်နှလုံးသား နှင့် ချိတ်ဆက်နိုင်ခဲ့သည့်အတွက် ဂုဏ်ယူပါသည်။ ယခု သင်သည် ကျွန်းသခင်တစ်ဦး ဖြစ်လာပါပြီ။ သင့်ကိုယ်ပိုင် ကောင်းကင်ကျွန်းပေါ်ရှိ သားရဲအားလုံးကို သင် ထိန်းချုပ်နိုင်ပါသည်။ သင့်ကောင်းကင်ကျွန်း၏ အမှတ်မှာ ၁၀၀၈၆ ဖြစ်ပါသည်။】
“ငါ တကယ်ပဲ ကောင်းကင်ကျွန်းကမ္ဘာထဲ ရောက်လာတာပဲ…”
ကျိုးတုက လက်ထဲရှိ စိန်ပုံသဏ္ဍာန် ဖြူဖွေးနေသော ကျောက်သလင်းကို လှည့်ပတ်ကြည့်ရင်း စိတ်ညစ်သွားသည်။
သူက လတ်တလောမှ ထီပေါက်ပြီး ငွေယွမ် ၂၀၀,၀၀၀ ရထားတာပဲ ရှိသေးသည်။ ဆုငွေကိုပင် ထုတ်ယူခွင့် မရသေးခင် ဒီလိုနေရာမျိုးသို့ ရောက်လာခဲ့ရသည်။
ဆုငွေ ထုတ်ယူခွင့်လေးပဲ ရခဲ့ရင် ကောင်းမှာပဲ!
ဒီလို အဓိပ္ပာယ်မရှိလောက်အောင် ထူးဆန်းတဲ့အရာတစ်ခုတောင် ဖြစ်နိုင်နေရင် ဒီအရာအားလုံးက အလွန်အဆင့်မြင့်တဲ့ ယဉ်ကျေးမှုတစ်ခု၏ စမ်းသပ်မှုများဖြစ်နေမလား?
ထိုအချိန်တွင် အချက်အလက်ပြားပေါ်၌ စာများ ဆက်လက်ပေါ်လာသည်။
【ကမ္ဘာတစ်ဝန်းရှိ အသက် ၁၈ နှစ်အထက် လူသားအားလုံး ဤနေရာသို့ ကူးပြောင်းရောက်ရှိလာကြပါသည်။ ရှင်သန်ခြင်းသည် သင်တို့အားလုံး၏ တစ်ခုတည်းသော ရည်မှန်းချက် ဖြစ်ပါသည်။ အသက်ရှင်ချင်ပါက အောက်ပါအချက်များကို သေချာမှတ်သားထားပါ။】
【၁။ ကောင်းကင်ကျွန်းသည် သင်၏ ရှင်သန်နေထိုင်ရာနေရာဖြစ်ပြီး အကန့်အသတ်မရှိသော အလားအလာများ ရှိပါသည်။ အိမ်ဆောက်ခြင်း၊ မြေလွတ်တွေကို ဖော်ထုတ်ခြင်း၊ ရေကန်များ တူးဖော်ခြင်း… ထို့အပြင် ကောင်းကင်ကျွန်းကို အဆင့်မြှင့်တင်ခြင်းနှင့် ချဲ့ထွင်ခြင်းတို့ကိုပင် ပြုလုပ်နိုင်ပါသည်။ ဤအရာများကို သင်လုပ်ဆောင်နိုင်ပါက ကောင်းကင် ကျွန်းသည် သုခဘုံတစ်ခုအဖြစ်သို့ပင် ပြောင်းလဲသွားနိုင်ပါသည်။】
【၂။ ကောင်းကင် ကျွန်းသည် အရှေ့၊ အနောက်၊ တောင်၊ မြောက်၊ အပေါ်နှင့် အောက် ဟူသော လမ်းကြောင်းခြောက်ခုအတိုင်း ရွေ့လျားနိုင်ပြီး အခြားကျွန်းများနှင့် တွေ့ဆုံနိုင်ပါသည်။ ရွေ့လျားမှုတစ်ကြိမ်ပြုလုပ်တိုင်း ကျွန်းသခင်နှလုံးသား ထဲရှိ စွမ်းအင် တစ်ယူနစ်ကို အသုံးပြုရပါသည်။ လက်ရှိ ကျွန်းသခင်နှလုံးသားမှာ အဆင့် ၁ ဖြစ်ပြီး စွမ်းအင် (၁၀/၁၀) ရှိပါသည်။ နေ့စဉ် စွမ်းအင် ၁၀ ယူနစ် ပြန်လည်ရရှိပါမည်။】
【၃။ ထူးဆန်းသောကျွန်းများတွင် အခွင့်အရေးများနှင့် အန္တရာယ်များ နှစ်မျိုးလုံး ရှိပါသည်။ သင့်ကောင်းကင် ကျွန်းကို တည်ဆောက်ရန် လိုအပ်သော အရင်းအမြစ်များကို ရှာဖွေရန် ထိုကျွန်းများသို့ သွားရောက်နိုင်ပါသည်။ ထူးဆန်းသောကောင်းကင် ကျွန်းတစ်ခု၌ နေထိုင်ခွင့်ရချိန်မှာ တစ်နာရီ ဖြစ်ပါသည်။ သတ်မှတ်ထားသောအချိန်အတွင်း မိမိ၏ ကောင်းကင်ကျွန်းသို့ ပြန်မလာနိုင်ပါက ထိုထူးဆန်းသောကျွန်းပေါ်တွင် ပျောက်ဆုံးသွားမည် ဖြစ်ပါသည်။】
【၄။ ဤနေရာသည် ဂိမ်းကစားေ ခြင်း မဟုတ်ပါ။ ဤနေရာတွင် သေဆုံးခြင်းသည် တကယ့်သေဆုံးခြင်း ဖြစ်ပါသည်။ မိမိအသက်ကို နောက်ပြောင်မကစားပါနှင့်။】
【၅။ ကောင်းကင် ကျွန်းကမ္ဘာကို နေ့နှင့်ညဟူ၍ ခွဲခြားထားပါသည်။ ညအချိန်တွင် အန္တရာယ်များ ပိုမိုပြင်းထန်လာမည် ဖြစ်ပါသည်။ ရှင်သန်နိုင်ရန်အတွက် နေ့အချိန်၌ လုံလောက်သော အရင်းအမြစ်များကို ရှာဖွေထားပါ။】
【၆။ အခြားလူသားများနှင့် တွေ့ဆုံပါက ၎င်းတို့နှင့် အရောင်းအဝယ်ပြုလုပ်ရန်၊ မဟာမိတ်ဖွဲ့ရန် သို့မဟုတ် ၎င်းတို့၏ကျွန်းပေါ်ရှိ အရင်းအမြစ်များကို လုယူရန် ရွေးချယ်နိုင်ပါသည်။】
【၇။ လက်ရှိဒေသ — လေဘေးဒဏ်သင့်ဒေသ။ ကောင်းကင်လေဘေးဒဏ်ကို ခံနိုင်ရည်ရှိရန် အဆောက်အဦးတခု ကို အမြန်ဆုံး ဆောက်လုပ်ပါ။】
【၈။ စိတ်ကို အာရုံပြု၍ ကျွန်းသခင်နှလုံးသား နှင့် ဆက်သွယ်ပြီး အချက်အလက်ပြားကို ဖွင့်နိုင်ပါသည်။ ထပ်မံလုပ်ဆောင်နိုင်သည့် လုပ်ဆောင်ချက်များစွာကို သင်ကိုယ်တိုင် ဆက်လက်ရှာဖွေနိုင်ပါသည်။ ထို့အပြင် အစပြုသူလက်ဆောင်အထုပ်လည်း အသင့်ရှိနေပါသည်။ သင်၏ ကောင်းကင် ကျွန်းခရီးစဉ်ကို စတင်လိုက်ပါ။】
ကျိုးတုသည် မှတ်သားရန် အချက်လက်များအားလုံးကို ဖတ်ပြီးနောက် မျက်နှာအမူရာလေးနက်သွားသည်။
ဒီနေရာမှာ သေသွားရင် တကယ့်ကို သေသွားမှာပဲ။
ထို့အပြင် သူရောက်ရှိနေသည့် ကောင်းကင် ကျွန်းဒေသတွင်ပင် သဘာဝဘေးအန္တရာယ် ရှိနေသည်။
ကျိုးတုက မိမိ၏ ကောင်းကင် ကျွန်းကို တစ်ချက်ပြန်ကြည့်လိုက်သည်။
ခြံစည်းရိုးပင် မရှိဘဲ ပြောင်ရှင်းနေသည်။
လေက ဒီထက်ပိုပြင်းလာရင် သူတောင် ကျွန်းပေါ်ကနေ လွင့်ထွက်သွားနိုင်မှာ မဟုတ်လား?
ကျိုးတုသည် ရင်ထဲက အရေးတကြီးခံစားချက်ကို ဖိနှိပ်လိုက်ပြီး အဖြစ်မှန်ကို ရင်ဆိုင်လိုက်သည်။
ဘာပဲဖြစ်ဖြစ် ထိတ်လန့်နေရုံနဲ့ ပြဿနာတွေကို ဖြေရှင်းနိုင်မှာ မဟုတ်ပေ။
ထိုအချိန်တွင် ကျွန်းအလယ်၌ ပေါ်လာသော သစ်သားသေတ္တာလေးကို သူတွေ့လိုက်သည်။
ဒါက ကျွန်းသခင်နှလုံးသား က ပြောခဲ့တဲ့ အစပြုသူလက်ဆောင်အထုပ် ဖြစ်ရမယ်။
ကျိုးတု ထိုနေရာသို့သွားကာ သစ်သားသေတ္တာလေးကို ဖွင့်လိုက်သည်။
အထဲတွင် ပုဆိန်တစ်လက်၊ ဂေါ်ပြားတစ်လက်နှင့် ကျောပိုးအိတ်တစ်လုံး ပါရှိသည်။
【နေရာလွတ်ကျောပိုးအိတ် — အကန့် ၂၀ ဆံ့သည်။ ပစ္စည်းအမျိုးအစားတစ်မျိုးလျှင် ယူနစ် ၁၀၀ အထိ ထည့်သိမ်းနိုင်သည်။】
ဖော်ပြချက်ကိုကြည့်ပြီး ကျိုးတု ပြောချင်သည့်စကားတစ်ခွန်းသာ ရှိသည်။
မိုက်တယ်!
“ဒီကျောပိုးအိတ်က တခြားကောင်းကင် ကျွန်းတွေဆီက အရင်းအမြစ်တွေကို ယူဖို့အတွက် အထူးပြင်ဆင်ပေးထားတာပဲ!”
“သစ်ပင်ခုတ်ဖို့ ပုဆိန်၊ မြေတူးဖို့ ဂေါ်ပြား… ဒါတွေက ဒီကျွန်းပေါ်မှာ ငါရှင်သန်ဖို့ လိုအပ်တဲ့ ပစ္စည်းတွေပဲ!”
ကျိုးတုက ပုဆိန်ကို ကောက်ယူပြီး တစ်ချက်လွှဲကြည့်လိုက်သည်။ လက်ထဲမှာ အလွန်အဆင်ပြေသည်။
သူ မနေနိုင်ဘဲ သက်ပြင်းချလိုက်သည်။
“သာမန်ဘဝကနေ ရုတ်တရက် ကောင်းကင်ကျွန်းပေါ်မှာ ရှင်သန်ရတဲ့ဘဝ ဖြစ်သွားတာပဲ။ ဘဝအဆင့်အတန်းကတော့ အောက်ဆုံးအထိ ကျသွားပြီ!”
ပတ်ဝန်းကျင်ကို လှည့်ပတ်ကြည့်လိုက်သောအခါ ကျွန်းပေါ်တွင် မြက်များမှလွဲ၍ ဘာတစ်ခုမှ မရှိပေ။
“အိမ်ဆောက်၊ ရေကန်တူး… ဒီကျွန်းသခင်နှလုံးသား ကတော့ စိတ်ကူးယဉ်စရာတွေ အကြီးကြီး လုပ်ပြထားတာပဲ။”
ကျိုးတုက ညွှန်ကြားချက်အတိုင်း အချက်အလက်ပြားကို ဖွင့်လိုက်သည်။
သူ့ရှေ့တွင် လုပ်ဆောင်ချက်လေးခု ပေါ်လာသည်။
【ဆက်သွယ်ရေး ကောင်းကင်ချန်နယ်】
【အရောင်းအဝယ်】
【ဆောက်လုပ်ရေး】
【ပစ္စည်းကျောပိုးအိတ်】…
ကျိုးတု၏ အကြည့်က ဆက်သွယ်ရေး ကောင်းကင်ချန်နယ်ပေါ် ရောက်သွားသည်။
ထိုအထဲတွင် ချန်နယ်အသစ်နှစ်ခု ပေါ်လာသည်။
【ကမ္ဘာလုံးဆိုင်ရာ ကောင်းကင်ချန်နယ်】
【ဒေသဆိုင်ရာ ကောင်းကင်ချန်နယ်】
ကျိုးတုက ကမ္ဘာလုံးဆိုင်ရာ ကောင်းကင်ချန်နယ်ကို ဖွင့်ကြည့်လိုက်သည်။
လူအများအပြားက စာများ အဆက်မပြတ် ပို့နေကြသည်။
【ကယ်ကြပါဦး! ဒါ ဘာတွေလဲ? ဒီကောင်းကင် ကျွန်းကမ္ဘာက ဘာကြီးလဲ? ဒီမှာ မနေချင်ဘူး။ အိမ်ပြန်ချင်တယ်!】
【ဟားဟားဟား… ငါ့အသက် ၅၀ ကနေ အခု အသက် ၃၀ အရွယ်ခန္ဓာကိုယ် ဖြစ်သွားပြီ။ ကောင်းတယ်! ငါ့ဘဝအတွေ့အကြုံတွေနဲ့ ကမ္ဘာကြီးတစ်ခုလုံးကို လွှမ်းမိုးပစ်မယ်!】
【ကမ္ဘာပျက်ကပ် ရောက်လာပြီ။ အားလုံးသေရတော့မယ်!】
【ငါက အမှတ်၂၅၈ တပ်ဖွဲ့ကပါ။ “ဘုရားစေတီက မြစ်နတ်ဆိုးကို ဖိနှိပ်ခြင်း”…ကုဒ်ကို သိတဲ့သူရှိရင် ဆက်သွယ်ပါ။】
【အခုထိ ဘာမှမစားရသေးဘူး။ ဆာလွန်းလို့ သေတော့မယ်! တစ်ယောက်ယောက်က ငါ့ကို စားစရာနည်းနည်းလောက် အရောင်းအဝယ်လုပ်ပေးလို့ရမလား?】
【ငါ အိမ်ပြန်ချင်တယ်။ ဒီလို ဆိုးဝါးတဲ့ကမ္ဘာမှာ မနေချင်ဘူး!】
စာများက မျက်စိရှေ့တွင် အလွန်လျင်မြန်စွာ ဖြတ်သန်းသွားသဖြင့် ကျိုးတုသည် အကြမ်းဖျင်းအဓိပ္ပာယ်ကိုသာ ဖတ်နိုင်ခဲ့သည်။
အောက်ဘက်တွင် ( အော်လံ) ပုံစံသင်္ကေတလေးတစ်ခုကိုလည်း သူသတိထားမိသည်။
ဒေသဆိုင်ရာ ကောင်းကင်ချန်နယ်တွင်လည်း အလားတူပင် ဖြစ်ပြီး အနောက်တွင် “၁” ဟု ပြထားသည်။
ဒါက လူတိုင်းအနေဖြင့် စာတစ်ကြောင်းကို အခမဲ့ ပြောခွင့်ရှိသည်ဟု ဆိုလိုခြင်း ဖြစ်ရမည်။
လူတွေ အကန့်အသတ်မရှိစကားပြောလို့ မရအောင် စည်းမျဉ်းက တားမြစ်ထားပုံရသည်။
နောက်ဆုံးတော့ လူတွေ စုပေါင်းပြီး နေထိုင်ကြမယ်ဆိုရင် ရှင်သန်ဖို့ ပိုလွယ်ကူသွားမှာပဲ။
ကျိုးတုက အရောင်းအဝယ်ကို ဖွင့်ကြည့်လိုက်သော်လည်း လောလောဆယ် အရောင်းအဝယ်ပြုလုပ်နေသူ မရှိသေးပေ။
ထို့နောက် သူသည် ဒေသဆိုင်ရာ ကောင်းကင်ချန်နယ်ထဲသို့ ပြန်ဝင်ကြည့်လိုက်သည်။
ဒေသဆိုင်ရာ ကောင်းကင်ချန်နယ်တွင် လူဦးရေ ၉၉၉၂/၁၀,၀၀၀ ဟု ပြထားသည်။
အမည်များမှာ လူတစ်ဦးချင်းစီ၏ အမည်နှင့် ကိုယ်ပိုင်ပုံတို့ ပေါင်းစပ်ဖော်ပြထားခြင်း ဖြစ်သည်။
ကျိုးတု၏ ကိုယ်ပိုင်ပုံမှာလည်း သူကိုယ်တိုင်လိုပင် ချောမောနေပြီး အနောက်တွင် ကျွန်းသခင်အမှတ် ၁၀၀၈၆ ဟု ပါရှိသည်။
ဒေသဆိုင်ရာ ကောင်းကင်ချန်နယ်ကို ဆက်လက်ကြည့်ရှုရင်း လူရှစ်ဦးက သေဆုံးပြီးပြီဆိုသည်ကို တွေ့လိုက်ရသည်။
ကျိုးတု၏ မျက်နှာထားမှာ အနည်းငယ် ထူးဆန်းသွားသည်။
ဒီလူရှစ်ယောက်က ဒီနေရာကို ရောက်ရောက်ချင်းတင် သေသွားကြတာနဲ့ မခြားဘူးပဲ။
ကျိုးတုက ချန်နယ်ကို ဒေသဆိုင်ရာ ကောင်းကင်ချန်နယ်သို့ ပြောင်းလိုက်သည်။
ထိုနေရာမှာလည်း စကားဝိုင်းက အတော်လေး သက်ဝင်လှုပ်ရှားနေသည်။
【ဒီဒေသထဲမှာရှိတဲ့သူတွေထဲက မဟာမိတ်ဖွဲ့ချင်တဲ့သူ ရှိလား? တစ်ဒေသတည်းမှာ ရှိနေကြတာဆိုတော့ တွေ့ဆုံနိုင်မယ့်အခွင့်အရေး ပိုများတယ်။ မဟာမိတ်ဖွဲ့ထားရင် လူများများနဲ့ အတူရှင်သန်ဖို့ ပိုလွယ်ကူမှာ!】
【အခမဲ့ ( အော်လံ) သုံးပြီးသွားရင် ကျောက်သလင်းစွမ်းအင်ကို အသုံးပြုပြီး ထပ်ပြောဖို့ ( အော်လံ) ဝယ်ရမယ်။ ကျွန်တော်ကတော့ ကောင်းကင်ကျွန်းကို ထိန်းချုပ်ပြီး တခြားကျွန်းတွေဆီ သွားရောက်ပီး အရင်းအမြစ်တွေ စုဆောင်းဖို့ အကြံပြုတယ်။ ဒီမှာ စကားတစ်ကြောင်း ထပ်ပြောရုံနဲ့ ကောင်းကင်ကျွန်းရဲ စွမ်းအင်တစ်ယူနစ် ကို ဖြုန်းတီးလိုက်တာနဲ့ တူတူပဲ!】
【တွေ့ရမယ့် ကောင်းကင် ကျွန်းတွေက အန္တရာယ်ရှိမရှိ ဘယ်သူသိမလဲ? အလျင်စလို သွားလိုက်ရင် သေမှာ မကြောက်ဘူးလား? အရင်ဆုံး သူတို့ရဲ့ အခြေအနေကို စောင့်ကြည့်ကြရအောင်။】
【ငါတို့ ကူးပြောင်းလာတာ မဟုတ်ဘူးလား? ငါ့ရဲ့ အထူးစွမ်းအားက ဘယ်မှာလဲ? ငါက ပြာရောင်ဂြိုဟ်ပေါ်က လူတစ်ယောက်ဖြစ်တာတောင် ဘာအထူးစွမ်းအားမှ မရဘူးလား?】
【အပေါ်ကလူရေ၊ ခင်ဗျားကိုယ်ခင်ဗျား ဇာတ်လိုက်လို့ ထင်နေတာလား? တစ်ကမ္ဘာလုံးက လူတွေအားလုံး ဒီနေရာကို ကူးပြောင်းလာကြတာပဲလေ။ ကျွန်းသခင်နှလုံးသားကပဲ အထူးစွမ်းအား မဟုတ်ဘူးလား!】
ကျိုးတုသည် နှစ်မိနစ်ခန့် တိတ်တဆိတ် စောင့်ကြည့်ပြီးနောက် ချန်နယ်ထဲမှ ထွက်လိုက်သည်။
ဒီထဲမှာ ဉာဏ်ကောင်းတဲ့လူတွေ ရှိသေးသားပဲ။
အထူးသဖြင့် အကြံပြုချက်ပေးခဲ့သော လီကျန်းဖျင်ဆိုသည့်လူကို ကျိုးတုက စိတ်ထဲတွင် မှတ်ထားလိုက်သည်။
ဒီလိုပတ်ဝန်းကျင်မျိုးမှာ စိတ်ကို တည်ငြိမ်အောင် ထိန်းထားနိုင်တဲ့သူက အများကြီး မရှိပေ။
လူအများစုကတော့ စိတ်ခံစားချက်တွေရဲ့ လွှမ်းမိုးမှုအောက်မှာ ရှိနေကြပြီး တချို့က ကြောက်ရွံ့နေကြသလို တချို့ကလည်း တွန့်ဆုတ်နေကြသည်။
အခြေခံကျကျ စဉ်းစားနိုင်စွမ်းပင် ပျောက်ဆုံးနေကြသည်။
ကျိုးတုက ဒေသတွင်းရှိ လူတချို့သည် စာတစ်ကြောင်းထက်ပို၍ ပို့ထားကြသည်ကိုလည်း တွေ့ခဲ့သည်။
ကျွန်းသခင်နှလုံးသား ၏ စွမ်းအင်ကို အသုံးပြုပြီးသွားသည်နှင့် ထိုသူတို့သည် ကျွန်းပေါ်ရှိ မြက်များကိုသာ ဝါးစားရတော့မည်။
ထပ်မံပြောဆိုသည့် စာတစ်ကြောင်းတိုင်းအတွက် ကျောက်သလင်းထဲမှ စွမ်းအင် တစ်ယူနစ်ကို အသုံးပြုရသည်။
အစောပိုင်းအချိန်တွင် ထိုဆုံးရှုံးမှုမျိုးက လုံးဝ မခံနိုင်စရာပင် ဖြစ်သည်။
ထို့အပြင် အစောပိုင်းသတိပေးချက်အရ ကောင်းကင်ကျွန်းကမ္ဘာတွင် ညအချိန်ရှိပြီး လက်ရှိသူရောက်နေသည့်ဒေသမှာလည်း လေဘေးဒဏ်သင့်ဒေသ ဖြစ်နေသည်။
နေ့ဘက်မှာတောင် အနည်းငယ်အေးနေပြီဖြစ်သည်။
ညရောက်လာပြီး လေပြင်းတွေ တိုက်ခတ်လာရင် အအေးဒဏ်ကြောင့်ပင် လူသေသွားနိုင်သည်။
“ကြည့်ရတာ ညမရောက်ခင် အိမ်တစ်လုံးတော့ မဖြစ်မနေ ဆောက်ရတော့မယ်။ အချိန်က တော်တော်ကျပ်တယ်!”
ကျိုးတုက ဆောက်လုပ်ရေးကို ဖွင့်လိုက်သည်။
【ကျွန်းသခင်နှလုံးသား ၊ အဆင့် ၁
(အဆင့်မြှင့်တင်ပါက ကျောက်သလင်းအရည်အသွေး တိုးမြှင့်နိုင်ခြင်း၊ ကောင်းကင် ကျွန်းဧရိယာ တိုးချဲ့နိုင်ခြင်း၊ ချန်နယ်တွင် စကားပြောခွင့် တိုးမြှင့်နိုင်ခြင်း စသည့် လုပ်ဆောင်ချက်များ ရရှိနိုင်ပါသည်။)
အဆင့်မြှင့်ရန် လိုအပ်ချက် — မြေ ၁၀၀၊ ကျောက် ၂၀】
ကျိုးတုက အဆင့်မြှင့်ရန် လိုအပ်ချက်များကို တစ်ချက်ကြည့်လိုက်သည်။
ကျွန်းသခင်နှလုံးသား ကို အဆင့်မြှင့်ဖို့ အခြေခံပစ္စည်းတွေချည်းပဲ လိုအပ်သည်။
သို့သော် လုပ်ဆောင်ချက်တွေကတော့ အများကြီးရှိနေသည်။
ဒါက ကျိုးတုကို အတော်လေး စိတ်ဝင်စားစေသည်။
ကောင်းကင် ကျွန်းက အလွန်သေးလွန်းသည်။
ပိုကြီးလာအောင် ချဲ့ထွင်နိုင်ခြင်းက အရာအားလုံးအတွက် အခြေခံဖြစ်သည်။
【ရိုးရှင်းသောအိမ် — သစ်သား- ၂၀ယူနစ်၊ မြေ- ၅ယူနစ်၊ မြက်- ၅ယူနစ်၊ ကြိုး- ၅ယူနစ်】
【ရိုးရှင်းသော အလုပ်စားပွဲ — သစ်သား- ၄ယူနစ်၊ ကျောက်- ၂ယူနစ်】
【ရိုးရှင်းသော သစ်သားကုတင် — သစ်သား- ၄ယူနစ်၊ ကြိုး- ၂ယူနစ်】
ကျွန်းသခင်နှလုံးသား ကို အဆင့်မြှင့်တင်ခြင်းဖြင့် ကောင်းကင် ကျွန်း၏ ဧရိယာကို တိုးချဲ့နိုင်သည်။
အစားအစာနှင့် နေစရာပြဿနာများကို ဖြေရှင်းပြီးသွားပါက ကျွန်းသခင်နှလုံးသား ကို အဆင့်မြှင့်တင်ခြင်းက အရေးအကြီးဆုံး ဖြစ်လာမည်။
အချင်း ၁၀ မီတာ သာရှိသော ကောင်းကင် ကျွန်းပေါ်တွင် နေရသည်မှာ ကျိုးတုအတွက် လုံခြုံမှုရှိသည်ဟု လုံးဝ မခံစားရပေ။
ကျိုးတု၏အကြည့်က ကျွန်းသခင်နှလုံးသား ပေါ်သို့ ကျရောက်သွားသည်။
ကျွန်းသခင်နှလုံးသား ကို အသုံးပြု၍ ကောင်းကင် ကျွန်း၏ ရွေ့လျားမှုကို ထိန်းချုပ်နိုင်သည်။
လက်ရှိတွင် ကောင်းကင် ကျွန်းသည် လမ်းကြောင်းခြောက်ခုအတိုင်း ရွေ့လျားနိုင်သည်။
ရှေ့၊ နောက်၊ ဘယ်၊ ညာ၊ အပေါ်၊ အောက်။
လမ်းကြောင်းခြောက်ခု။
ကျိုးတု ခေါင်းကိုက်လာသည်။
ဘယ်ဘက်ကို ရွေးရမလဲ?
ကျိုးတုက အဝေးတွင် မရေမရာ မြင်နေရသော ကောင်းကင် ကျွန်းတစ်ခုကို ကြည့်လိုက်သည်။
ရုတ်တရက် ထိုရှေ့ဘက်ရှိ ကောင်းကင် ကျွန်းနှင့် ပတ်သက်သည့် အချက်အလက်တစ်ခုက သူ့မျက်စိရှေ့တွင် ပေါ်လာသည်။
【ကောင်းကင် ကျွန်းကို ရှေ့ဘက်သို့ ရွေ့လျားပါ။ မိစ္ဆာမတစ်ဦးနှင့် တွေ့ဆုံရမည်ဖြစ်ပြီး သူမသည် သင့်အား သန်းရာချီတန် အရောင်းအဝယ်တစ်ခုကို ဆွေးနွေးမည် ဖြစ်သည်။】
ကျိုးတု — “???”