အခန်း (၁) - အသန်မာဆုံး ချောက်နက်နဂါး သွေးဆက်ကို ရွေးချယ်ခြင်း

ကျန်းမုက ခန်းမကြီးတစ်ခုရဲ့ အလယ်ဗဟိုမှာ ပေါ်လာခဲ့တယ်။

【နတ်ဆိုးဘုရင် ကစားပွဲမှ ကြိုဆိုပါတယ်】

【ဒီအချီမှာ ပါဝင်မယ့် စုစုပေါင်း ကစားသမားအရေအတွက်- ၁၀ ဘီလီယံ】

【ကစားသမားတွေကို "သူရဲကောင်းအုပ်စု" နဲ့ "နတ်ဆိုးဘုရင်အုပ်စု" ဆိုပြီး ခွဲခြားသွားပါမယ်】

【သင့်ကို "နတ်ဆိုးဘုရင်" အဖြစ် ရွေးချယ်သတ်မှတ်လိုက်ပါပြီ။ အောက်ပါအချက်များကို သေချာမှတ်သားထားပါ】

【၁။ သေဆုံးသွားပါက ကစားပွဲထဲမှ ထုတ်ပယ်ခံရပါမည်】

【၂။ အောင်မြင်မှု သတ်မှတ်ချက်- အင်ပါယာအဆင့်ရှိ နိုင်ငံတော် အင်အားစုတစ်ခုကို အပြီးတိုင် အုပ်စိုးနိုင်ရမည် (သို့မဟုတ်) ဖျက်ဆီးပစ်နိုင်ရမည်】

【၃။ ဒီအချီကို အောင်မြင်စွာကျော်ဖြတ်ပြီးပါက၊ အောက်ပါရွေးချယ်မှုများကို ပြုလုပ်နိုင်ပါသည်- လက်တွေ့ကမ္ဘာသို့ ပြန်သွားခြင်း၊ ဒီကမ္ဘာမှာ ဆက်နေခြင်း သို့မဟုတ် ပိုမိုအဆင့်မြင့်သော ကမ္ဘာတစ်ခုကို စိန်ခေါ်ခြင်း】

【၄။ ကစားပွဲမှာ သုံးရက်တာ အကာအကွယ်ပေးမယ့် ကာလတစ်ခု ရှိပါတယ်။ သုံးရက်တာ အကာအကွယ်ကာလ ကုန်ဆုံးသွားပြီးနောက်မှာတော့၊ သူရဲကောင်းကစားသမားတွေက သတ်မှတ်ထားတဲ့ အကွာအဝေးအတွင်းမှာရှိနေတဲ့ နတ်ဆိုးဘုရင်ကစားသမားတွေကို အာရုံခံသိရှိနိုင်ပါလိမ့်မယ်】

【၅။ နတ်ဆိုးဘုရင်တစ်ပါးအနေနဲ့ သင်ဟာ သူရဲကောင်းတွေ၊ စွန့်စားရှာဖွေသူတွေ၊ စစ်တပ်တွေရဲ့ တိုက်ခိုက်နှိမ်နင်းမှုတွေ ဒါမှမဟုတ် တခြား နတ်ဆိုးဘုရင်အင်အားစုတွေရဲ့ ခြိမ်းခြောက်မှုတွေကို အမြဲတမ်း ရင်ဆိုင်နေရပါလိမ့်မယ်။ အကယ်၍ သင့်မှာ လုံလောက်တဲ့ ခွန်အားမရှိသေးဘူးဆိုရင်တော့ သိုသိုသိပ်သိပ်နဲ့ပဲ ကိုယ့်ကိုယ်ကိုယ် တိုးတက်အောင် လုပ်ဆောင်ဖို့ သေချာဂရုစိုက်ပါ】

【…】

【သင် ပေါင်းစည်းလိုတဲ့ နတ်ဆိုးဘုရင် သွေးဆက်ကို ၁၀ မိနစ်အတွင်း ရွေးချယ်ပါ】

ဒီအချက်အလက်တွေကို ကျန်းမု နားလည်သွားပြီးနောက်မှာတော့

သူ မယုံနိုင်သလို ခံစားလိုက်ရတယ်။

"ငါ ကမ္ဘာကူးလာခဲ့တာပဲ"

"ငါတစ်ယောက်တည်းမှ မဟုတ်တာ"

"လူတွေ သန်းရာချီ၊ မကဘူး... အဲ့ဒီထက်တောင် ပိုများတဲ့လူတွေပါ ကမ္ဘာကူးလာခဲ့ကြတာ"

"ငါတို့တွေ နတ်ဆိုးဘုရင်တွေနဲ့ သူရဲကောင်းတွေရဲ့ ကစားပွဲတစ်ခုထဲမှာ မရည်ရွယ်ဘဲ ပါဝင်သွားခဲ့ရတယ်။ ငါက နတ်ဆိုးဘုရင်အုပ်စုထဲ ရောက်သွားတယ်၊ ပြီးတော့ အခု ငါ့ကိုယ်ပိုင် နတ်ဆိုးဘုရင် သွေးဆက်ကို ရွေးချယ်ရတော့မယ်..."

ဒါက တကယ်ကို မယုံနိုင်စရာကောင်းပေမဲ့၊ ကမ္ဘာကူးတာကို တစ်ခါ ကြုံဖူးထားပြီးသား ကမ္ဘာကူးသူ တစ်ယောက်ဖြစ်တဲ့ သူ့အတွက်တော့ လုံးဝလက်မခံနိုင်စရာကြီးတော့ မဟုတ်ခဲ့ပါဘူး

ကျန်းမု တစ်ချက် လှမ်းကြည့်လိုက်တယ်။

မျက်စိရှေ့မှာ မရေမတွက်နိုင်တဲ့ ဥကြီးတွေ လွင့်မျောနေတယ်။

အဲဒီ ဥခွံကြီးတွေထဲမှာ နတ်ဆိုးဘုရင်ရဲ့ သွေးဆက် ပါဝင်နေတာပဲ ဖြစ်တယ်။

ကစားသမားတွေက ပေါင်းစည်းဖို့အတွက် တစ်ခုကို ရွေးချယ်ရမယ်။

ဒါက အရမ်းကို အရေးကြီးတဲ့ ရွေးချယ်မှုပဲ

အစောပိုင်းနဲ့ အလယ်အလတ်ကာလတွေမှာ တိုးတက်ဖို့အတွက် အဓိကကျတဲ့အရာလေ

ဒါပေမဲ့ ဥခွံကြီးတွေက အကုန်လုံး ပုံစံတူနေတယ်။

အပြင်ပန်းကြည့်ရင် ဘာကွာခြားချက်မှ မရှိဘူး

ရွေးချယ်ရမယ့်အချိန်ကလည်း ကန့်သတ်ထားသေးတယ်။

ထီနှိုက်ရတာနဲ့ အတူတူပဲ

အဲဒီလို စိတ်ဓာတ်ကျစရာ ဖြစ်နေချိန်မှာပဲ

ကျန်းမုရဲ့ အမြင်အာရုံက ထူးဆန်းစွာ ပြောင်းလဲသွားခဲ့တယ်။

ဥခွံကြီးရဲ့ဘေးမှာ မှေးမှိန်တဲ့ ရွှေရောင် စာသားဘောက်စ်တစ်ခု ပေါ်လာတယ်။

[စလိုင်း နတ်ဆိုးဘုရင်] - အဆင့်နိမ့် နတ်ဆိုးဘုရင် မျိုးစိတ်၊ ပေါင်းစည်းပြီးနောက် စလိုင်း နတ်ဆိုးဘုရင်အဖြစ် ဝင်စားနိုင်ပြီး ရေစွမ်းအင်စနစ်ရဲ့ ပါရမီကို အသက်သွင်းနိုင်တယ်... အစောပိုင်းအဆင့်မှာ အရမ်းအားနည်းတဲ့အတွက် ရွေးချယ်ဖို့ အကြံမပြုပါဘူး

[ကိုဘော့ နတ်ဆိုးဘုရင် မျိုးနွယ်စု] - အဆင့်နိမ့် နတ်ဆိုးဘုရင် မျိုးစိတ်၊ ပေါင်းစည်းပြီးနောက် ကိုဘော့ နတ်ဆိုးဘုရင်အဖြစ် ဝင်စားနိုင်ပြီး ကင်းထောက်ပါရမီကို အသက်သွင်းနိုင်တယ်... အစောပိုင်းအဆင့်မှာ အားနည်းတဲ့အတွက် ရွေးချယ်ဖို့ အကြံမပြုပါဘူး

"ဘာတွေဖြစ်နေတာလဲ ငါက လျှို့ဝှက်သတင်းအချက်အလက်တွေကို မြင်နိုင်နေတာလား"

ကျန်းမု ဝမ်းသာလုံးဆို့သွားခဲ့တယ်။

အများကြီး တွေးမနေနိုင်တော့ဘူး

ဥခွံကြီးတွေရဲ့ ဂုဏ်သတ္တိတွေက တစ်ချက်ကြည့်လိုက်တာနဲ့တင် ရှင်းရှင်းလင်းလင်း သိနေရပြီလေ

ကျန်းမုက မှန်ကန်တဲ့ သွေးဆက်ကို အမိအရ ရှာဖွေတော့တယ်။

[ဂေါ်ဘလင် နတ်ဆိုးဘုရင်] - အဆင့်နိမ့် နတ်ဆိုးဘုရင်...

[ဂေါ်ဘလင် နတ်ဆိုးသခင်] - အဆင့်နိမ့် နတ်ဆိုးဘုရင် မျိုးစိတ်...

[ပင့်ကူလူသား နတ်ဆိုးမျိုးနွယ်စု] - အဆင့်နိမ့် နတ်ဆိုး မျိုးစိတ်...

တောက်... ဒီခန်းမထဲမှာ နတ်ဆိုးဘုရင် သွေးဆက်ပေါင်း ထောင်ချီရှိနေပြီး အများစုက ကွဲပြားကြတယ်ဆိုပေမဲ့၊ နီးပါးအားလုံးက အဆင့်နိမ့် နတ်ဆိုးဘုရင်တွေပဲ ဖြစ်နေတယ်။

သွေးဆက်ဆိုတာ အစပြုရာ နေရာပဲ

ခိုင်မာအားကောင်းတဲ့ သွေးဆက်မရှိဘဲနဲ့ ဘယ်လိုလုပ်ပြီး စွမ်းအားကြီးတဲ့ နတ်ဆိုးဘုရင်တစ်ပါး ဖြစ်လာနိုင်မှာလဲ

[သွေးအော့က်စ်] - အလယ်အလတ် နတ်ဆိုးဘုရင်...

[အမှောင်နတ်သူငယ်] - အလယ်အလတ် နတ်ဆိုးဘုရင်...

[နတ်ဆိုးဝိညာဉ်] - အလယ်အလတ် နတ်ဆိုးဘုရင်...

အလယ်အလတ်အဆင့် နတ်ဆိုးဘုရင်ရဲ့ သွေးဆက်က တော်တော်လေး ကောင်းမွန်ပုံရပြီး၊ အဆင့်နိမ့် နတ်ဆိုးဘုရင်ထက် သိသိသာသာ ပိုသန်မာတာ သေချာတယ်။

လောစရာမလိုသေးပါဘူး

အချိန် ရပါသေးတယ်။

ထပ်ရှာကြည့်ဦးမယ်။

နောက်ထပ် ဥကြီးပေါင်း ထောင်ချီကို သူ စစ်ထုတ်ရှာဖွေလိုက်တယ်။

[သွေးဘီလူးကြီး] - အဆင့်မြင့် နတ်ဆိုးဘုရင်... ရွေးချယ်ရန် အကြံပြုပါသည်။

[မျက်လုံးရှစ်လုံး ပင့်ကူနတ်ဆိုး] - အဆင့်မြင့် နတ်ဆိုးဘုရင်... ရွေးချယ်ရန် အကြံပြုပါသည်။

အဆင့်မြင့် နတ်ဆိုးဘုရင် သွေးဆက်

ပိုမိုအားကောင်းတဲ့ အလားအလာနဲ့ ကြီးထွားဖွံ့ဖြိုးဖို့ အခွင့်အလမ်း ပိုများတယ်

ဒါက အစမှတ်မှာတင် ၉၉.၉ ရာခိုင်နှုန်းသော နတ်ဆိုးကစားသမားတွေကို အပြတ်အသတ် အနိုင်ယူနိုင်စွမ်းရှိတယ်။

ဘယ်တစ်ခုကို ရွေးရမလဲ

နေဦး... ငါ အခုချက်ချင်း မရွေးနိုင်သေးဘူး

အချိန်က တစ်မိနစ်ကျော် ကျန်သေးတယ်။ တခြား အလားအလာရှိတဲ့ ရွေးချယ်စရာတွေကို ငါ လက်လွှတ်ခံလို့ မဖြစ်ဘူး၊ ပိုကောင်းတဲ့ ရွေးချယ်စရာတွေ ရှိနေနိုင်သေးတယ်လေ

ကျန်းမု အချိန်လုပြီး၊

အချက်ပြ လမ်းညွှန်မှုတွေကို ဆက်လက် ရှာဖွေစုဆောင်းနေခဲ့တယ်။

စက္ကန့်သုံးဆယ်၊ စက္ကန့်နှစ်ဆယ်၊ ဆယ်စက္ကန့်...

ထောင့်တစ်နေရာရဲ့ အလယ်လောက်မှာရှိနေတဲ့ သိပ်ပြီး မျက်စိကျစရာမကောင်းတဲ့ ဥအကြီးကြီးတစ်ခုက သူ့အာရုံကို ဖမ်းစားသွားခဲ့တယ်။

[ချောက်နက်နဂါးဘုရင်ကြီး နတ်ဆိုးဘုရင် မျိုးနွယ်စု] - ရှားပါး နတ်ဆိုးဘုရင် အမျိုးအစားဖြစ်ပြီး ပေါင်းစည်းပြီးနောက် ချောက်နက်နဂါးဘုရင်အဖြစ် ဝင်စားနိုင်တယ်။ ဒါဟာ အလွန်တရာ အစွမ်းထက်ပြီး ရှားပါးတဲ့ နတ်ဆိုးဘုရင် အမျိုးအစားတစ်ခု ဖြစ်တယ်။ သူ့မှာ နဂါးလူသားပုံစံနဲ့ နတ်ဆိုးနဂါးပုံစံဆိုပြီး ပုံစံနှစ်မျိုးရှိကာ၊ မှော်စွမ်းအင်ခံနိုင်ရည်၊ လျှပ်စီး၊ မီး နဲ့ တခြားသော ပါရမီတွေကို အသက်သွင်းနိုင်တယ်... အထူးကို အကြံပြုပါတယ်

"မင်းကိုပဲ ရွေးလိုက်ပြီကွာ"

နည်းနည်းလေးတောင် တုံ့ဆိုင်းမနေခဲ့ဘူး

ကျန်းမု ရွေးချယ်လိုက်ပြီးတဲ့နောက်

ဥကြီးဆီကနေ ပြင်းထန်တဲ့ အလင်းရောင်တစ်ခု ထွက်ပေါ်လာခဲ့တယ်။

ကျန်းမုဟာ အလင်းတန်းတစ်ခုရဲ့ လွှမ်းခြုံမှုကို ခံလိုက်ရပြီး သူ့ခန္ဓာကိုယ်က အလျင်အမြန် ပြောင်းလဲသွားကာ အလျား ၁၀ မီတာလောက်ရှိတဲ့ နဂါးကြီးတစ်ကောင်အဖြစ် ပြောင်းလဲသွားခဲ့တယ်။

ဒီနဂါးကြီးရဲ့ အကြေးခွံတိုင်းက ရွှေရောင်ရင့်ရင့်ရှိပြီး၊ မွေးရာပါ သံချပ်ကာဝတ်စုံတစ်ခုလိုမျိုး ခံနိုင်ရည်အပြည့်ရှိတယ်လို့ လူတွေကို ခံစားရစေတယ်။

"ဒါက နတ်ဆိုးအသွင်ပြောင်းတာလား"

ကျန်းမုက သူ့ရဲ့ ထက်မြက်တဲ့ ခြေသည်းတွေနဲ့ ကြီးမားတဲ့ အတောင်ပံကြီးတွေကို ကြည့်လိုက်တယ်။

ဘာနေရခက်မှုမှ မရှိတဲ့အပြင်၊ ခန္ဓာကိုယ်ထဲက ဆဲလ်တိုင်းမှာ ကြောက်မက်ဖွယ်ကောင်းတဲ့ စွမ်းအင်တွေ ဖြည့်သွင်းခံလိုက်ရသလို သူ ခံစားနေရတယ်။

ဒီအချိန်မှာတင်

ကျန်းမုဆီမှာ ယုံကြည်မှုတစ်ခု ဖြစ်တည်လာခဲ့တယ်။

စကြဝဠာကို ဖြတ်သန်းပျံသန်းပြီး ကမ္ဘာကြီးကို ဖျက်ဆီးပစ်နိုင်လောက်တဲ့အထိ စွမ်းဆောင်နိုင်တယ်လို့ သူ ခံစားလိုက်ရတယ်။

သေချာတာကတော့၊ ဒီလိုယုံကြည်မှုမျိုးဟာ စွမ်းအားတွေ ရုတ်တရက် ထိုးတက်သွားမှုကြောင့် ဖြစ်ပေါ်လာတဲ့ စိတ်ကူးယဉ်မှုတစ်ခုသက်သက်သာ ဖြစ်ပေမဲ့၊ လက်ရှိခွန်အားက ဘယ်လောက်အထိ အစွမ်းထက်သလဲဆိုတာကိုလည်း ပြသနေတယ်လေ... ဒီခံစားချက်က တကယ်ကို ယစ်မူးစရာပဲ၊ ကစားပွဲက သိပ်တော့ ဆိုးမနေပါဘူး

【ကစားသမား နတ်ဆိုးအသွင်ပြောင်းခြင်း ပြီးဆုံးသွားပါပြီ၊ ကစားပွဲထဲသို့ တရားဝင် ဝင်ရောက်ပါ】

နောက်တစ်စက္ကန့်မှာတင်။

သူ့ရှေ့မှာ အလင်းတံခါး ရှစ်ပေါက် ပေါ်လာခဲ့တယ်။

ကွဲပြားခြားနားတဲ့ ဒေသရှစ်ခုဆီကို ဦးတည်သွားမယ့် တံခါးရှစ်ပေါက်။

ဒါဟာ ကစားသမားတွေ ရွေးချယ်ရမယ့် နောက်ထပ် အခွင့်အရေးတစ်ခုပါပဲ။