အခန်း (၄၂) - အပိုင်း (၃) - စုံထောက်ရဲတပ်ဖွဲ့၏ ပထမဆုံးအမှု

ဘေးပတ်ပတ်လည်တွင် ဝိုင်းကြည့်နေကြသော စုံထောက်အဖွဲ့ဝင်များမှာမူ တစ်ယောက်မကျန် ဆွံ့အမှင်သက်ကုန်ကြသည်။ စောစောက အခြေအနေအရ ဆရာကြီးဝူတစ်ယောက် သိသိသာသာကြီး အရေးနိမ့်သွားသည်မှာ အထင်အရှားပင်။

ဤသို့ ဖြစ်နိုင်ခြေ ရှိပါ့မလား။ ဆရာကြီးဝူသည် စုံထောက်အဖွဲ့၏ ကပ်ပတိန်ဟောင်း ဖြစ်ခဲ့သလို စစ်တပ်တစ်ခုလုံး၏ ထိပ်တန်း တိုက်ခိုက်ရေးချန်ပီယံလည်း ဖြစ်ခဲ့ဖူးသည်။ ယခုအခါ သူသည် အသက်ကြီးသွားသဖြင့် အရင်လို အထွတ်အထိပ် ရောက်မနေတော့ဟု ဆိုဦးတော့၊ လော်ဖေးမှာ ရဲစခန်းမှ မကြာသေးမီကမှ ပြောင်းရွှေ့လာသော အတွေ့အကြုံမရှိသေးသည့် လူသစ်လေးသာ ရှိသေးသည်။

"ရန်... ရန်မေ၊ ဆရာကြီးဝူက လော်ဖေးကို တကယ်ပဲ ရှုံးသွားတာလား။ အန်ကယ်ကျောက်က အမြဲတမ်း ဆရာကြီးဝူ ဘယ်လောက်တောင် တော်ကြောင်း ပြောနေကျမဟုတ်ဘူးလား။ အသက်ကြီးသွားလို့ အဲဒီလောက် ဖြစ်သွားရတာလား"

ဝူရှောင်ယန့်မှာ မယုံနိုင်လောက်အောင် ဖြစ်နေသည့် မျက်နှာပေးမျိုး ရှိနေသည်။ သူမအတွက်မူ ဆရာကြီးဝူသည် ထိပ်တန်းပညာရှင်ကြီးတစ်ဦးအဖြစ် စိတ်ထဲ စွဲထင်နေခဲ့သော်လည်း ယခုမူ ဂျူနီယာရဲလေး လော်ဖေးကို တကယ်ပဲ ရှုံးနိမ့်သွားခဲ့လေပြီ။ ဤသည်မှာ သူမအတွက် စိတ်ကူးယဉ်ရန်ပင် ခက်ခဲလှသည်။

"ငါလည်း ဆရာကြီးဝူက လော်ဖေးကို ရှုံးလိမ့်မယ်လို့ မထင်ထားဘူး။ လွန်ခဲ့တဲ့ ရက်ပိုင်းတင် အန်ကယ်က ဆရာကြီးဝူကို သူ မနိုင်ဘူးလို့ ပြောနေသေးတာ"

ရန်မေလည်း ထပ်တူထပ်မျှ အံ့အားသင့်နေရသည်။

ရန်စုကိုယ်တိုင်လည်း ဘာမှ မပြောနိုင်တော့ပေ။ အခြားလူများအနေဖြင့် ဆရာကြီးဝူ၏ အစွမ်းအစအပေါ် သံသယရှိနိုင်သေးသည်။ ငယ်စဉ်က မည်မျှပင် ထူးချွန်ပြောင်မြောက်ခဲ့ပါစေ၊ ယခုကဲ့သို့ အသက်အရွယ်မျိုးတွင် မည်မျှအထိ အရည်အချင်း ကျန်ရှိပါဦးမည်နည်းဟု သံသယဝင်စရာ ရှိသည်။ သို့သော်လည်း ရန်စုကိုယ်တိုင်ကမူ လွန်ခဲ့သော ရက်ပိုင်းကတင် ဆရာကြီးဝူနှင့် လက်ရည်စမ်းခဲ့ပြီး သူ၏ စွမ်းရည်ကို ကိုယ်တိုင်ကိုယ်ကျ မြင်တွေ့ခဲ့ရသည်။ ဆယ်ချီပင် မပြည့်သေးသည့် အချိန်အတွင်း ရန်စုမှာ ဆရာကြီးဝူ၏ ဖမ်းချုပ်ခြင်းကို ခံခဲ့ရသဖြင့် ဝူ၏ ကြောက်မက်ဖွယ်ကောင်းသော စွမ်းရည်ကို သက်သေပြနေသည်။

ယခုအခါ ရန်စုသည် လော်ဖေးကို ပို၍ပင် စိတ်လှုပ်ရှားတက်ကြွစွာ ကြည့်နေမိသည်။ ဤတစ်ကြိမ်တွင်မူ သူတို့ တကယ့်ရတနာတစ်ပါးကို တူးဖော်တွေ့ရှိခဲ့လေပြီ။ အမှုလိုက်ရာတွင် တော်ရုံတင်မကဘဲ သူ၏ တိုက်ခိုက်ရေးစွမ်းရည်ကလည်း အံ့မခန်း သန်မာလှသည်။ တကယ့်ကို အဖိုးတန် လူငယ်လေးပင် ဖြစ်သည်။

စုံထောက်အဖွဲ့ ကပ်ပတိန် ကျောက်တုန်းလိုင်၏ ရုံးခန်းထဲတွင်...

ဆရာကြီးဝူနှင့် ရန်စုတို့သည် လော်ဖေးကို လေ့ကျင့်ရေးကွင်းတွင် ထားရစ်ခဲ့ကာ ကျောက်တုန်းလိုင်ကို လာရှာကြသည်။

"ကျောက်ကောင်လေး... မင်း တော်တော် လည်တာပဲနော်! ငါ့ကို တမင် သက်သက် အရှက်ကွဲအောင် စီစဉ်ထားတာမလား။ ငါ့အသက် အရွယ်အထိ ဒီလောက် ရှက်ဖို့ကောင်းတာမျိုး တစ်ခါမှ မကြုံဖူးဘူး"

ဆရာကြီးဝူက ဆိုဖာပေါ်တွင် ထိုင်ကာ ကျောက်တုန်းလိုင်ကို မျက်လုံးပြူးကြည့်ရင်း သူ၏ မကျေနပ်မှုကို ထုတ်ဖော်လိုက်သည်။

"ဆရာကြီးဝူ... ဘာတွေ ပြောနေတာလဲခင်ဗျာ။ ကျွန်တော် ဘာလုပ်လို့လဲ"

ကျောက်တုန်းလိုင်သည် ဝူကုန်း ရုတ်တရက် ဒေါသတကြီး ရောက်လာသည်ကို မြင်ရသဖြင့် ဝေခွဲမရ ဇဝေဇဝါ ဖြစ်သွားသည်။

ရန်စုက လေ့ကျင့်ရေးကွင်းတွင် ဖြစ်ပျက်ခဲ့သမျှကို ကျောက်တုန်းလိုင်အား အမြန်ပင် ပြန်ပြောပြလိုက်သည်။ ထိုအကြောင်းကို ကြားလိုက်ရချိန်တွင် ကျောက်တုန်းလိုင်လည်း အံ့အားသင့် တုန်လှုပ်သွားရသည်— ဆရာကြီးဝူက လော်ဖေးကို တကယ်ပဲ ရှုံးသွားခဲ့သည်တဲ့လား။

"ဆရာကြီးဝူ... အထင်လွဲတာပါ၊ အထင်လွဲတာ။ လော်ဖေးက ရဲစခန်းကနေ ခုမှ ပြောင်းလာတာဆိုတာ ဆရာကြီးလည်း သိတာပဲ။ သူ့မှာ ဒီလောက်အစွမ်းရှိမှန်း ကျွန်တော် သိရင် ဆရာကြီးဆီ လေ့ကျင့်ခိုင်းပါ့မလား။ ကျွန်တော် တကယ်ကို မသိခဲ့လို့ပါ"

ကျောက်တုန်းလိုင်က ဝူကုန်းကို အလောတကြီး ရှင်းပြလိုက်သည်။

အမှန်တော့ ဝူကုန်းသည် တကယ် ဒေါသထွက်နေခြင်း မဟုတ်ပေ။ လတ်တလော ကြုံတွေ့ခဲ့ရသည့် ရှုံးနိမ့်မှုကြောင့် စိတ်အနည်းငယ် ညစ်သွားသဖြင့် ဒေါသပုံချချင်နေရုံသာ ဖြစ်သည်။

"ဒါပေမဲ့ ဆရာကြီးဝူ... လော်ဖေးရဲ့ စွမ်းရည်က တကယ်ပဲ အဲဒီလောက်အထိ ထူးခြားနေတာလား။ ဆရာကြီး ညှာပေးထားတာများ ရှိလား"

ကျောက်တုန်းလိုင်က မဝံ့မရဲဖြင့် မေးလိုက်သည်။

"ပေါက်ကရတွေ... ငါက ညှာပေးမယ့် လူပုံစံမျိုး ပေါက်နေလို့လား"

ကျောက်တုန်းလိုင်က သူ လက်ညှာပေးထားသည်ဟု သွယ်ဝိုက်ပြောဆိုလိုက်သဖြင့် ဆရာကြီးဝူက ချက်ချင်းပင် ဒေါသထွက်သွားပြန်သည်။

"ဟုတ်ကဲ့ပါ... ဟုတ်ကဲ့ပါ ဆရာကြီးဝူ။ ကျွန်တော် အံ့သြလွန်းလို့ မေးမိသွားတာပါ"

ကျောက်တုန်းလိုင်က အမြန် တောင်းပန်လိုက်သည်။

ထိုအခါမှ ဆရာကြီးဝူက ကျောက်တုန်းလိုင်ကို ဆက်ပြီး အပြစ်မတင်တော့ဘဲ ပြောလိုက်သည်။

"တကယ်လို့ ညှာပေးတဲ့လူ ရှိတယ်ဆိုရင် အဲဒါ အဲဒီကောင်လေးပဲ ဖြစ်လိမ့်မယ်။ သူ့ရဲ့ လက်ရုံးရည်က အလွန် သန်မာလွန်းတယ်။ ငါ ငယ်ငယ်တုန်းကဆိုရင်တောင် သူ့ကို ယှဉ်နိုင်ဖို့ မလွယ်ဘူး"

ထိုစကားကို ကြားလိုက်ရချိန်တွင် ကျောက်တုန်းလိုင်နှင့် ရန်စုတို့နှစ်ဦးလုံး ပို၍ပင် အံ့အားသင့်သွားကြတော့သည်။

လေ့ကျင့်ရေးကွင်းတွင် ဖြစ်ပျက်ခဲ့သော အကြောင်းအရာများ ပြီးဆုံးသွားခဲ့သည်မှာ အတန်ကြာခဲ့ပြီ ဖြစ်သည်။

ထိုကာလအတွင်း လော်ဖေးသည် ဆရာကြီးဝူထံမှ သေနတ်ပစ်နည်းကို အဓိကထား လေ့ကျင့်ခဲ့သလို ရန်သူကို လျင်မြန်စွာ နှိမ်နင်းနိုင်မည့် တိုက်ခိုက်ရေး နည်းစနစ်များကိုလည်း အပြင်းအထန် လေ့ကျင့်ခဲ့သည်။ တိုက်ခိုက်ရေးတွင် ဆရာကြီးဝူသည် လော်ဖေးကို လုံးဝ မယှဉ်နိုင်ဘဲ အသည်းအသန် ဖြစ်ခဲ့ရသော်လည်း သေနတ်ပစ်လေ့ကျင့်ခန်းတွင်မူ သူ ယုံကြည်မှု ပြန်လည်ရရှိခဲ့သည်။ အဘယ်ကြောင့်ဆိုသော် လော်ဖေးသည် ကိုယ်ခန္ဓာပိုင်းဆိုင်ရာတွင် ထူးချွန်သော်လည်း သေနတ်ပစ်ရာတွင်မူ လုံးဝ အတွေ့အကြုံ မရှိသေးသောကြောင့် ဖြစ်သည်။

ပထမဆုံး နှစ်ရက်ခန့်တွင် လော်ဖေးသည် ဆရာကြီးဝူ၏ ပြင်းပြင်းထန်ထန် ဝေဖန်အပြစ်တင်ခြင်းကို ခံခဲ့ရသည်။ သို့သော်လည်း နောက်ရက်များတွင်မူ လော်ဖေး၏ ကြောက်မက်ဖွယ်ကောင်းသော သင်ယူနိုင်စွမ်းကြောင့် ဆရာကြီးဝူ တစ်ဖန် ပြန်လည် အံ့အားသင့်ခဲ့ရပြန်သည်။ လက်နက်ကိုင် လေ့ကျင့်မှုကို ယခုမှ စတင်ခဲ့သော်လည်း လော်ဖေး၏ သေနတ်ပစ်စွမ်းရည်မှာ စုံထောက်အဖွဲ့ဝင် အများစု၏ အဆင့်အတန်းသို့ ရောက်ရှိနေပြီ ဖြစ်သည်။

လော်ဖေးအနေဖြင့် သေနတ်ပစ်နည်းစနစ်များကို လျင်မြန်စွာ ရင်းနှီးကျွမ်းဝင်ပြီး တတ်မြောက်သွားရခြင်းမှာ သူ၏ ထူးကဲသော မှတ်ဉာဏ်၊ လျင်မြန်သော တုံ့ပြန်မှုနှင့် ထူးခြားလှသော ကိုယ်ခန္ဓာ ကြံ့ခိုင်မှုတို့ကြောင့် ဖြစ်သည်။ ဤအရည်အချင်း သုံးရပ်ကြောင့် လော်ဖေးသည် အခြားသူများထက် မည်သည့်အရာကိုမဆို ပိုမို လျင်မြန်စွာ သင်ယူနိုင်သည်။

ဆရာကြီးဝူနှင့် ဆယ့်ငါးရက်ကြာ လေ့ကျင့်ပြီးနောက် ဆရာကြီးဝူက လော်ဖေးအား သင်ကြားပေးစရာ ဘာမျှမကျန်တော့ကြောင်း ပွင့်ပွင့်လင်းလင်း ပြောကာ မိမိဘာသာ ပိုမိုလေ့ကျင့်ရန် တိုက်တွန်းခဲ့သည်။ ထို့နောက် ဆရာကြီးဝူ ထွက်ခွာသွားခဲ့ပြီး လော်ဖေး၏ မူလသတ်မှတ်ထားသော သုံးလတာ လေ့ကျင့်ရေးကာလမှာ စောစီးစွာ ပြီးဆုံးသွားခဲ့သည်။ လော်ဖေးသည် အဖွဲ့ခွဲ (၁) သို့ တရားဝင် ပြန်လည်ပူးပေါင်းခဲ့သည်။

လော်ဖေး လေ့ကျင့်ရေး ပြီးဆုံးသည့်နေ့တွင် ရန်စုက ဒကာခံကာ အဖွဲ့ခွဲ (၁) မှ အဖွဲ့ဝင်အချို့ စုပြုံ၍ အတူတကွ သောင်းသောင်းဖျဖျ စားသောက်ခဲ့ကြသည်။

လေ့ကျင့်ရေးပြီးဆုံးသည့် ပထမဆုံးနေ့တွင် လော်ဖေးသည် သေနတ်ကိုင်ဆောင်ခွင့်လိုင်စင်နှင့် ကိုယ်ပိုင် သေနတ်ကို ရရှိခဲ့သည်။ စုံထောက်အဖွဲ့ဝင် အများစုတွင် ထုတ်ပေးထားသော သေနတ်များ ရှိကြသော်လည်း ပုံမှန်အားဖြင့် ၎င်းတို့ကို ရဲစခန်း၏ သေနတ်ဗီဒိုထဲတွင်သာ သိမ်းဆည်းထားလေ့ရှိပြီး အရေးပေါ် မစ်ရှင်များရှိမှသာ ထုတ်ယူကြသည်။ သေနတ်ကိုင်ဆောင်ထားခြင်းသည် ပြင်ပလူများအတွက် ဂုဏ်ယူစရာဟု ထင်ရသော်လည်း စုံထောက်များအတွက်မူ ကြီးမားလှသော စိတ်ပိုင်းဆိုင်ရာ ဖိအားကို ခံနိုင်ရည်ရှိရန် လိုအပ်သည်။

စုံထောက်အဖွဲ့တွင် သေနတ်ကြောင့် မတော်တဆမှုများ ဖြစ်ပွားခဲ့ဖူးပြီး ရာထူးမှ ထုတ်ပယ်ခံရသည်အထိ ကြုံတွေ့ခဲ့ရဖူးသည်။ အဆိုးရွားဆုံး ဖြစ်ရပ်မှာ စုံထောက်တစ်ဦး၏ သားငယ်ဖြစ်သူက အိမ်မှ သေနတ်ကို ယူဆော့ကစားရာမှ အခြားကလေးတစ်ဦးကို မတော်တဆ ပစ်သတ်မိသွားခြင်း ဖြစ်သည်။ ထို့ကြောင့် အဖွဲ့ဝင်များသည် သေနတ်ကို ကိုယ်တိုင်ကိုယ်ကျ သယ်ဆောင်ရန် မလိုလားကြခြင်း ဖြစ်သည်။

လေ့ကျင့်ရေးပြီးဆုံးပြီး သုံးရက်မြောက်နေ့တွင် လော်ဖေးသည် ထုံးစံအတိုင်း အလုပ်ဆင်းခဲ့ပြီး ရုံးခန်းသို့ ရန်စုက အရင်ဆုံး ရောက်ရှိနေသည်။

လော်ဖေး ထိုင်ခုံတွင် ထိုင်ပြီး မိနစ်အနည်းငယ်ပင် မကြာသေးမီ အဖွဲ့ခွဲ (၂) မှ လုပ်ဖော်ကိုင်ဖက်တစ်ဦး လောလောလောလောဖြင့် ပြေးလာကာ အရေးပေါ်အခြေအနေ ဖြစ်ပွားနေသဖြင့် အစည်းအဝေး တက်ရောက်ရန် အားလုံးကို လာရောက်နှိုးဆော်သည်။

လော်ဖေးနှင့် ရန်စုတို့သည် သတင်းကို ရရှိသည်နှင့် အစည်းအဝေးခန်းမဆီသို့ ချက်ချင်း ဦးတည်သွားကြသည်။ ရုံးတက်ချိန် မရောက်သေးသဖြင့် လူအများအပြား ရောက်မလာသေးဘဲ အစည်းအဝေးခန်းမထဲတွင် လူအနည်းငယ်သာ ရှိနေသည်။ အဖွဲ့ခွဲ (၁) မှ လော်ဖေးနှင့် ရန်စု၊ အဖွဲ့ခွဲ (၂) မှ အဖွဲ့ခေါင်းဆောင် ကျန်းဖန် တစ်ဦးတည်းသာ ရှိပြီး၊ အဖွဲ့ခွဲ (၃) မှ အဖွဲ့ခေါင်းဆောင် ဝမ်တုန်းနှင့် အဖွဲ့ဝင်တစ်ဦး၊ ထို့ပြင် နည်းပညာဌာနမှ ရန်မေတို့ ရှိနေကြသည်။

"ဒါက အရေးပေါ်ကိစ္စမလို့ တခြားလူတွေကို စောင့်မနေတော့ဘူး။ အမှုအကြောင်းကို အခုပဲ ရှင်းပြမယ်"

ကျောက်တုန်းလိုင်က တက်ရောက်လာသူများကို ဝေ့ကြည့်လိုက်ပြီးနောက် ချက်ချင်းပင် အဓိကအကြောင်းအရာသို့ ဝင်လိုက်သည်။

"စောစောကတင် ဝူရီမြို့နယ် ရဲစခန်းကနေ ဖုန်းဝင်လာတယ်။ ဝူရီမြို့နယ်ရဲ့ နောက်ဖေးတောင်ကုန်းမှာ တောင်ပေါ်တက် အလုပ်လုပ်နေတဲ့ လယ်သမားတစ်ယောက်က အလောင်းတစ်လောင်း တွေ့ရှိခဲ့တယ် တဲ့။ သေဆုံးသူက အသက် ငါးဆယ်ဝန်းကျင် အမျိုးသားတစ်ဦး ဖြစ်တယ်။ ရုပ်အလောင်းမှာ ဓားဒဏ်ရာတွေ တွေ့ရလို့ လူသတ်မှုလို့ သံသယရှိရတယ်"

"မင်းတို့မှာ ဆယ်မိနစ် အချိန်ရှိတယ်။ ဆယ်မိနစ်အတွင်း အရှေ့ဘက် ဂိတ်ပေါက်ဝမှာ လူစုပြီး ဝူရီမြို့နယ်ကို ထွက်ခွာမယ်။ အဖွဲ့ခေါင်းဆောင်တွေက ရုံးမရောက်သေးတဲ့ အဖွဲ့ဝင်တွေကို အကြောင်းကြားဖို့ တာဝန်ယူပါ"

လော်ဖေးနှင့် ရန်စုတို့သည် ပစ္စည်းများ သိမ်းဆည်းရန် ရုံးခန်းသို့ အလျင်အမြန် ပြန်လာကြရာ ဝမ်ဝေနှင့် ကျန့်ကျွင်းတို့လည်း ရောက်ရှိနေပြီ ဖြစ်သည်။ ရန်စုမှာ အခြေအနေကို ရှင်းပြရန် အချိန်မရှိသဖြင့် သူတို့ကို မစ်ရှင်အတွက် ပြင်ဆင်ရန်သာ အတင်း တိုက်တွန်းလိုက်တော့သည်။

ဤသည်မှာ လော်ဖေး စုံထောက်အဖွဲ့သို့ ဝင်ရောက်ပြီးနောက်ပိုင်း ပထမဦးဆုံးအကြိမ်အဖြစ် လိုက်ပါဆောင်ရွက်ရမည့် အခင်းဖြစ်ပွားရာနေရာ စုံစမ်းစစ်ဆေးရေး မစ်ရှင်ပင် ဖြစ်သည်။