အခန်း ၂၆ - ဝေါလ်နတ်တောင်က နောက်ထပ်လူသတ်မှုတစ်ခု

""သူ့အကြောင်း မပြောကြရအောင်ပါဦး။" ဝူကျစ်ဝေက ဝူယန့်အပေါ် စိတ်ပျက်လက်ပျက်ဖြစ်နေသည့် ပုံစံဖြင့် ခေါင်းခါပြပြီးနောက် လော်ဖေးကို ကြည့်ကာ မေးလိုက်သည်။ "ရှောင်ဖေး... အလုပ်ဝင်ကတည်းက အလုပ်အခြေအနေ ဘယ်လိုလဲ။ မင်းအမေပြောတာတော့ မကြာသေးခင်ကမှ အောင်မြင်မှုတစ်ခုရလို့ အတည်ပြုခန့်အပ်တာ စောသွားတယ်ဆို?"

"အဆင်ပြေပါတယ်ဦးလေး။ ကျွန်တော်လည်း ရဲဝန်ထမ်းအလုပ်ကို သဘောကျပါတယ်။ ပြီးတော့ ပြီးခဲ့တဲ့ရက်ပိုင်းက ကံကောင်းလို့ တစ်ခုခုလုပ်ပေးနိုင်ခဲ့တာပါ၊ အလုပ်ဌာနက လူကြီးကလည်း ကျွန်တော် ဇွဲရှိရှိနဲ့ တာဝန်ကျေတာကို သဘောကျလို့ အတည်ပြုခန့်အပ်တာကို စောပေးလိုက်တာ။" လော်ဖေးက အထူးသဖြင့် လူကြီးမိဘများရှေ့တွင် နှိမ့်ချစွာ ပြန်ပြောလိုက်သည်။

ဦးလေးဖြစ်သူ ဝူကျစ်ဝေက လော်ဖေးကို ကြည့်ပြီး ကျေနပ်ပီတိဖြစ်နေကာ "ရှောင်ဖေးက တကယ်ပဲ လူလားမြောက်ပြီး သိတတ်လိမ္မာကာ အရည်အချင်းရှိလာပြီပဲ။ မင်းအမေကို ကောင်းကောင်းစောင့်ရှောက်ရမယ်နော်။ ဒီနှစ်တွေတစ်လျှောက်လုံး မင်းတို့မောင်နှမတွေကို တစ်ယောက်တည်း ရုန်းကန်ပြီး စောင့်ရှောက်လာရတာ မင်းအမေခမျာ တကယ်မလွယ်ကူခဲ့ရှာဘူး။"

ထိုအခါ ဒုတိယဒေါ်လေးကလည်း ဝင်ပြောသည်။ "အခုတော့ အားလုံးအဆင်ပြေသွားပါပြီ။ ရှောင်ဖေးက မိသားစုကို တာဝန်ယူနိုင်နေပြီဆိုတော့ ငါ့အစ်မလည်း အများကြီး သက်သာရာရသွားတာပေါ့။"

...

ညပိုင်းတွင် ဒုတိယဒေါ်လေးနှင့် ဦးလေးတို့သည် လော်ဖေးအိမ်တွင် ညစာစားကြသည်။ လော်ဖေးနှင့် ဦးလေးဖြစ်သူသည် မော်တော်ဆိုင်ကယ်စီးကာ ဈေးသို့သွားပြီး ဟင်းချက်စရာများစွာ ဝယ်ခဲ့ကြသည်။ မူလက လော်ဖေးတစ်ယောက်တည်း သွားချင်သော်လည်း ဆိုင်ကယ်လိုင်စင် မရှိသေးပေ။ ရဲဝန်ထမ်းတစ်ယောက်အနေဖြင့် ဥပဒေမဖောက်ဖျက်နိုင်သဖြင့် ဦးလေး ဝူကျစ်ဝေကိုသာ ဆိုင်ကယ်မောင်းခိုင်းပြီး ဟင်းချက်စရာများ လိုက်ဝယ်ခိုင်းခဲ့ရသည်။

မိသားစုများ ဆုံဆုံစည်းစည်းနှင့် စားသောက်ကြသည်မှာ ကြာပြီဖြစ်သဖြင့် လော်ဖေးတို့တစ်စု ညကိုးနာရီခွဲခန့်အထိ စကားလက်ဆုံကျနေခဲ့ကြသည်။ ထို့နောက်မှ ဝူကျစ်ဝေနှင့် ဝူရှောင်ယန့်တို့ ပြန်သွားကြသည်။

ဝူကျစ်ဝေနှင့် ဝူရှောင်ယန့်တို့ ပြန်သွားပြီးနောက် လော်ဖေးက ဝူယန့်ကို ကူညီပြီး ဧည့်ခန်းရှင်းပေးချင်သော်လည်း ဝူယန့်က မနက်ဖြန် အလုပ်သွားရမည်ဖြစ်၍ စောစောအိပ်ရန် ပြောသဖြင့် လော်ဖေးလည်း သူ့အခန်းထဲသို့ ပြန်ဝင်ခဲ့သည်။

ဒီနေ့တွင်မှ ‌‌‌‌‌‌‌‌‌‌ဂေါ်ရီလာ ၏ မှတ်ဉာဏ်ဗီဇကို မျိုးဗီဇပေါင်းစပ်ခြင်း ပြုလုပ်ထားသဖြင့် လော်ဖေးမှာ တကယ်ပဲ စိတ်လှုပ်ရှားနေပြီး အိပ်ချင်စိတ်မရှိပေ။ ထို့ကြောင့် လွန်ခဲ့သည့်ရက်ပိုင်းက စာကြည့်တိုက်မှ ဝယ်လာသည့် "မှုခင်းဖြစ်ပွားရာနေရာ စုံစမ်းစစ်ဆေးခြင်း" စာအုပ်ကို ထုတ်ပြီး ဖတ်ရှုတော့သည်။

ယခင်ကဆိုလျှင် လော်ဖေးအနေဖြင့် ဖတ်ရန်လိုအပ်သည်ဟု ကိုယ့်ကိုယ်ကိုယ်သိ၍သာ အတင်းဖတ်ခဲ့ခြင်းဖြစ်ပြီး ယင်းမှာ စာဖတ်ရန် ဖိအားပေးခြင်းခံရသည့် အပြင်ပန်းတွန်းအားသာ ဖြစ်သည်။ သို့သော် တောလူဝံ၏ မှတ်ဉာဏ်ဗီဇကို ပေါင်းစပ်ပြီးနောက်တွင်မူ လော်ဖေးသည် စာလေ့လာရခြင်းကို တကယ့်ကို ပျော်စရာကောင်းကြောင်း ရုတ်တရက် သဘောပေါက်သွားခဲ့သည်။ စာအုပ်တစ်အုပ်ကို နှစ်ခေါက်၊ သုံးခေါက်ဖတ်ရုံဖြင့် အလွတ်မှတ်မိသွားခြင်းက သူ့ကို များစွာစိတ်ကျေနပ်မှု ရစေပြီး ဤခံစားချက်ကို သူ တကယ်သဘောကျမိသည်။

ယခုအခါ လော်ဖေး၏ စာလေ့လာလိုစိတ်မှာ အဖိုးတန်ပြီး ပျော်စရာကောင်းကြောင်း ကိုယ်တိုင်ခံစားမိသွားသဖြင့် အတွင်းစိတ်မှ အလိုလိုပေါ်ပေါက်လာခြင်းဖြစ်သည်။ ပိုမိုထက်မြက်လာသည့် မှတ်ဉာဏ်စွမ်းရည်နှင့် ပြောင်းလဲသွားသည့် စာဖတ်စိတ်ထားတို့ ပေါင်းစပ်သွားသည့်အခါ လော်ဖေး၏ လေ့လာမှုသည် အလွန်ပင် ထိရောက်မြန်ဆန်လာခဲ့သည်။

မနက်အစောပိုင်း သုံးနာရီခန့်ရောက်သောအခါ လော်ဖေးသည် "မှုခင်းဖြစ်ပွားရာနေရာ စုံစမ်းစစ်ဆေးခြင်း" စာအုပ်တစ်အုပ်လုံးကို အကုန်အစင် ဖတ်ရှုပြီးစီးသွားခဲ့ပြီဖြစ်သည်။

အကျဉ်းချုပ်ပြောရလျှင် မှုခင်းဖြစ်ပွားရာနေရာကို စုံစမ်းစစ်ဆေးခြင်း တာဝန်သည် ပြစ်မှုနှင့်သက်ဆိုင်သည့် အထောက်အထားများနှင့် ခြေရာလက်ရာများကို ရှာဖွေခြင်း၊ ထိန်းသိမ်းခြင်း၊ ကောက်ယူခြင်းများ ပြုလုပ်ရန်ဖြစ်ပြီး၊ ထိုမှတစ်ဆင့် အခင်းဖြစ်ပွားရာနေရာ၏ အချက်အလက်များကို သိမ်းဆည်းရန်၊ အမှု၏ သဘာဝကို ဆုံးဖြတ်ရန်၊ အမှု၏ အသေးစိတ်အချက်အလက်များကို ခွဲခြမ်းစိတ်ဖြာရန်၊ စုံစမ်းစစ်ဆေးရမည့် လမ်းကြောင်းနှင့် နယ်ပယ်ကို သတ်မှတ်ရန်ဖြစ်ပြီး အမှုကိုဖော်ထုတ်နိုင်ရန် သဲလွန်စများနှင့် သက်သေအထောက်အထားများ ပံ့ပိုးပေးရန်ဖြစ်သည်။

"မှုခင်းဖြစ်ပွားရာနေရာ စုံစမ်းစစ်ဆေးခြင်း" ကို ဖတ်ပြီးသွားသော်လည်း လော်ဖေး၏ စာဖတ်လိုစိတ်မှာ လျော့ပါးမသွားပေ။ "ခြေရာလက်ရာလေ့လာခြင်း" စာအုပ်ကို ဆက်ဖတ်ချင်သေးသော်လည်း အချိန်ကို ကြည့်လိုက်သည့်အခါ တကယ်ကို မိုးချုပ်နေပြီဖြစ်သည်။ ထို့ကြောင့် စာဖတ်လိုစိတ်နှင့် ကိုယ့်ကိုယ်ကိုယ် ဖြည့်ဆည်းလိုစိတ်တို့ကို အသာအယာထိန်းချုပ်ရင်း အတင်းအကျပ် အိပ်စက်လိုက်ရတော့သည်။

သောကြာနေ့... မိုးအုံ့မှိုင်းနေပြီး အကြောင်းပြချက်မရှိဘဲ လူကို စိတ်ရှုပ်ထွေး စိတ်တိုလွယ်စေသည့် ရာသီဥတုမျိုး ဖြစ်နေသည်။

လော်ဖေး ရုံးခန်းသို့ ရောက်ရောက်ချင်း ပထမဆုံးလုပ်သည့်အလုပ်မှာ ရေနွေးအိုးတည်ခြင်းပင်။ လော်ဖေး သတိထားမိသည်မှာ ရုံးခန်းထဲရှိ ကျန်းဟိုင်ယန်၊ လျိုဟိုင်ချွမ်နှင့် အခြားစီနီယာ ဝါရင့်ရဲတပ်ဖွဲ့ဝင်များသည် တစ်နေ့တာကို လက်ဖက်ရည်ကြမ်း ပြင်းပြင်းတစ်ခွက်ဖြင့် စတင်လေ့ရှိကြခြင်းပင်။ ထို့ကြောင့် လော်ဖေးသည် အခြားသူများ ရောက်လာလျှင် စောင့်စရာမလိုဘဲ ချက်ချင်း လက်ဖက်ရည်ကြမ်း ဖျော်သောက်နိုင်ရန် ရေနွေးအိုးတည်ပေးခြင်းဖြင့် သူ၏အလုပ်ကို စတင်လေ့ရှိသည်။

နာရီလက်တံသည် ရှစ်နာရီသို့ တဖြည်းဖြည်း ညွှန်ပြလာသည်နှင့်အမျှ ရုံးခန်းထဲသို့ လုပ်ဖော်ကိုင်ဖက်များ တစ်ယောက်ပြီးတစ်ယောက် ရောက်ရှိလာကြသည်။ သောကြာနေ့ဖြစ်ပြီး ပိတ်ရက်နီးလာပြီဖြစ်၍လားမသိ၊ အားလုံး၏ စိတ်အခြေအနေမှာ ကောင်းမွန်နေကြပြီး အချင်းချင်းအပေါ် ပိုမိုသည်းခံနိုင်ကာ လောကကြီးမှာ ငြိမ်းချမ်းသာယာနေသကဲ့သို့ ခံစားရစေသည်။

ယေဘုယျအားဖြင့် သောကြာနေ့များတွင် ရဲစခန်း၌ အလုပ်သိပ်မရှုပ်တတ်ကြပေ။ အရေးပေါ်အခြေအနေ မရှိပါက လူတိုင်း နံနက်စာစားရင်း သို့မဟုတ် စကားစမြည်ပြောရင်း အချိန်ကုန်လွန်တတ်ကြသည်။ စကားဝိုင်းများမှာမူ အဓိကအားဖြင့် မနေ့က ဖမ်းမိခဲ့သည့် မူးယစ်ဆေးဝါး သယ်ဆောင်လာသူ၏ အမှုအကြောင်းသာ ဖြစ်သည်။

ဆေးလိပ်သောက်ခန်းထဲတွင်မူ ကျန်းဟိုင်ယန်၊ လျိုဟိုင်ချွမ်နှင့် ကျန်းတာတို့သည် အလုပ်မစတင်မီ ဆေးလိပ်တစ်လိပ်စီ သောက်နေကြသည်။

"မနေ့က လော်ဖေး ဖမ်းမိခဲ့တဲ့ မူးယစ်ဆေးသယ်ဆောင်လာသူ အမျိုးသမီးနှစ်ယောက်ဆီကနေတစ်ဆင့် မူးယစ်ဆေးဝါး တိုက်ဖျက်ရေးအဖွဲ့က ဒီဆေးဝါးဖြန့်ဖြူးတဲ့ကွင်းဆက်ကို ဖော်ထုတ်နိုင်မလား မသိဘူး။ တကယ်လို့ ဖော်ထုတ်နိုင်ရင်တော့ လော်ဖေးရဲ့ စွမ်းဆောင်ရည်က တကယ့်ကို အကြီးအကျယ်ပဲ" ဟု လျိုဟိုင်ချွမ်က ဘေးတွင် စကားပြောနေသည့် ကျန်းဟိုင်ယန်နှင့် ကျန်းတာတို့ကို လှည့်ပြောလိုက်သည်။

ကျန်းဟိုင်ယန်က ခေါင်းခါလိုက်ပြီး "မလွယ်ဘူး။ အဲ့ဒီမူးယစ်ဆေးသယ်တဲ့ အမျိုးသမီးနှစ်ယောက်က ဘာမှမသိဘူး၊ ဆေးကုန်သည်တွေရဲ့ အသုံးချခံ ကိရိယာသက်သက်ပဲ။ သူတို့ဆီကနေတစ်ဆင့် အရင်းအမြစ်ကို ရှာဖို့ဆိုတာ တော်တော်လေး မဖြစ်နိုင်သလောက်ပဲ။"

"ငါလည်း သဘောတူတယ်၊ ဖြစ်နိုင်ခြေ တော်တော်နည်းတယ်။ အခုခေတ် မူးယစ်ဆေးကုန်သည်တွေက တကယ့်ကို လည်လွန်းတယ်။ ဘယ်သူမှ ကိုယ်တိုင်မိုက်မိုက်ကန်းကန်း လာမပတ်သက်ကြတော့ဘူး။ သူတို့ကို ဖမ်းမိဖို့က တကယ်မလွယ်ဘူး" ဟု ကျန်းတာက ထပ်လောင်းပြောသည်။

ထို့နောက် ကျန်းတာက ဆက်လက်၍ "ဒါပေမဲ့ ဟိုင်ယန်... မင်းရဲ့တပည့်ကတော့ တကယ့်ကို ပါရမီရှိတာပဲ။ သူက ဒီလောက် အရည်အချင်းရှိပြီး ကြိုးစားတာဆိုတော့ ငါ့အထင် ငါတို့စခန်းမှာ သိပ်ကြာကြာနေမှာမဟုတ်ဘူး။ အတူတူ အလုပ်ဝင်တဲ့ ဝူဝေတို့နဲ့ ယှဉ်ကြည့်လိုက်လေ၊ ကွာခြားချက်က ကောင်းကင်နဲ့မြေကြီးလိုပဲ။"

"လော်ဖေးက တကယ်ပဲ တော်ပြီး ကြိုးစားတဲ့ကလေးပါ။ ဒါပေမဲ့ နောက်ခံအသိုင်းအဝိုင်းကလည်း အရေးကြီးတယ်လေ။ ငါမှတ်မိသလောက်ဆိုရင် လော်ဖေးရဲ့ မိသားစုအခြေအနေက ပုံမှန်အလယ်အလတ်ပဲ မဟုတ်လား" လျိုဟိုင်ချွမ်က ကျန်းဟိုင်ယန်ကို လှည့်ကြည့်ကာ ပြောသည်။

ကျန်းဟိုင်ယန်က ခေါင်းညိတ်ပြရုံသာ ပြုလုပ်ပြီး ဘာမှပြန်မပြောပေ။

လျိုဟိုင်ချွမ်က ဆက်ပြောသည်မှာ "မိသားစုနောက်ခံ အထောက်အပံ့မရှိရင်တော့ လော်ဖေးတစ်ယောက်တည်း ရုန်းကန်ရတာ တော်တော်ပင်ပန်းလိမ့်မယ်။"

ရုံးခန်းအတွင်းတွင် အပန်းဖြေစရာ လွတ်လပ်ပေါ့ပါးသည့် အငွေ့အသက်များ ရှိနေစဉ်မှာပင် ဖုန်းတစ်ကောလ်သည် ညွှန်ကြားရေးမှူး ကျိုးဝေမင်း ၏ ရုံးခန်းထဲသို့ တိုက်ရိုက်ဝင်လာခဲ့သည်။ မကြာမီတွင် ကျိုးဝေမင်းသည် မျက်မှောင်ကြုတ်လျက် ရုံးခန်းထဲသို့ ထွက်လာခဲ့သည်။

"အားလုံးပဲ လက်ရှိလုပ်နေတာတွေကို ချက်ချင်းရပ်လိုက်ကြပါ။ ဝေါလ်နတ်တောင်မှာ လူသတ်မှုတစ်ခု ဖြစ်ပွားကြောင်း သတင်းပို့ချက် ရထားတယ်။ တာဝန်ကျနေတဲ့ ကျိန်းဖျင်နဲ့ ကျန်းရှောင်ရှောင်ကလွဲလို့ ကျန်တဲ့သူတွေအားလုံး အခင်းဖြစ်ပွားရာနေရာကို ချက်ချင်း သွားကြမယ်။"

ကျိုးဝေမင်းက ဖြစ်ပျက်သွားသည့်အခြေအနေကို အကျဉ်းချုပ်ရှင်းပြပြီး အားလုံးကို အပြင်သို့ ထွက်ခွာရန် စေလွှတ်လိုက်သည်။

လူသတ်မှုဖြစ်ပွားကြောင်း ကြားလိုက်ရသဖြင့် လူတိုင်း လျင်မြန်စွာ ပြင်ဆင်ပြီး အပြင်သို့ ထွက်လာခဲ့ကြသည်။ ဝေါလ်နတ်တောင်သည် ခရိုင်မြို့လေး၏ အနောက်ဘက်တွင်ရှိပြီး သွားရန် တစ်နာရီခန့် ကြာမြင့်သည်။

လော်ဖေးနှင့် အခြားသူများ အခင်းဖြစ်ပွားရာနေရာသို့ ရောက်ရှိသွားသည့်အခါ အပေါက်ဖောက်အုတ်ခဲများဖြင့် ဆောက်လုပ်ထားသော အိမ်တစ်အိမ်၏ ရှေ့တွင် ပြစ်မှုစုံစမ်းစစ်ဆေးရေးအဖွဲ့၏ ရဲကား ရပ်ထားသည်ကို တွေ့လိုက်ရသည်။ ရဲစခန်း၏ ယာဉ်များ ဆိုက်ရောက်လာသည်နှင့်အမျှ လော်ဖေးနှင့် အခြားသူများ ကားပေါ်မှ ဆင်းခဲ့ကြသည်။

ပြစ်မှုစုံစမ်းစစ်ဆေးရေးအဖွဲ့ခေါင်းဆောင် ကျောက်တုန်းလိုင်သည် တီရှပ်အဖြူရောင် ဝတ်ဆင်ထားပြီး နဖူးပြောင်ပြောင်၊ အသားညိုညိုနှင့် လူလတ်ပိုင်းအမျိုးသားတစ်ဦးကို မေးမြန်းစုံစမ်းနေသည်။

ရဲစခန်းမှ ရဲဝန်ထမ်းများကို မြင်လိုက်ရသည့်အခါ ကျောက်တုန်းလိုင်က ကျိုးဝေမင်းကို လှမ်းပြောလိုက်သည်။ "ညွှန်ကြားရေးမှူးကျိုး... စခန်းက လူတွေကို ပတ်ဝန်းကျင်မှာ သံသယဖြစ်ဖွယ် တစ်ခုခုရှိမရှိ လိုက်ကြည့်ခိုင်းလိုက်ပါဦး။ ဒါပေမဲ့ အထဲဝင်တဲ့အခါ အခင်းဖြစ်ပွားရာနေရာကို မထိခိုက်မိစေဖို့တော့ သတိပေးလိုက်ပါဦး။"

"ကောင်းပါပြီ" ကျိုးဝေမင်းက ခေါင်းညိတ်လိုက်ပြီး သူ၏နောက်ကွယ်မှ လော်ဖေးနှင့် အခြားသူများကို ညွှန်ကြားလိုက်သည်။

ကျောက်တုန်းလိုင်သည် အရှေ့မှ လူလတ်ပိုင်းအမျိုးသားကို ဆက်လက်၍ မေးမြန်းနေသည်။ လော်ဖေးသည် ကျန်းဟိုင်ယန်၏ နောက်ကွယ်မှ အပေါက်ဖောက်အုတ်အိမ်သို့ တိုးကပ်သွားပြီး ရှေ့တံခါးဝသို့ ရောက်ရှိသွားသည်။ ပြစ်မှုစုံစမ်းစစ်ဆေးရေးအဖွဲ့သည် ဤနေရာ၌ အခင်းဖြစ်ပွားရာနေရာကို စစ်ဆေးနေကြပြီး ယင်းအထဲတွင် လော်ဖေးနှင့် အနည်းငယ် ရင်းနှီးကျွမ်းဝင်သည့် ယန်မေလည်း ပါဝင်သည်။ ယန်မေက လော်ဖေးကို ခေါင်းညိတ်ပြလိုက်ရာ ယင်းသည် နှုတ်ဆက်သည့် သဘောပင်ဖြစ်သည်။

လော်ဖေးသည် ဤကဲ့သို့သော အချိန်နှင့်နေရာမျိုးတွင် စကားစပ်ပြီး နှုတ်ဆက်ရန် အစီအစဉ်မရှိသဖြင့် ကျန်းဟိုင်ယန်၏ နောက်မှနေ၍ အိမ်ထဲသို့ တိုက်ရိုက် လိုက်ဝင်သွားခဲ့လေတော့သည်။