အခန်း ၃၃ ကန်မင်းမျိုးနွယ်စု၏ အစွန့်ပစ်ခံ သားကြီး

လျူဇီရှန်းသည် ထိုနာမည်ကို ကြားလိုက်ရသည့်အခါ လက်လှုပ်ရှားမှုများ ခဏမျှ တုံ့ဆိုင်းသွားပြီး ထိုနာမည်ကို ကောင်းစွာ မှတ်မိနေဟန်ဖြင့် ဖြည်းဖြည်းချင်း ပြန်လည် ဖြေကြားလိုက်သည်။

"သခင်လေးစု ပြောတဲ့သူကို ကျွန်မ ကောင်းကောင်း သိတာပေါ့ရှင်"

"သူက လတ်တလော ကောင်းကင်အရှင် သတ်ကွင်းမှာ တကယ့်ကို ရေပန်းစားနေတဲ့သူပဲ..."

ထိုသို့ပြောရင်း လျူဇီရှန်းသည် ဘေးနားတွင် အမူအရာကင်းမဲ့စွာ မတ်တပ်ရပ်နေသော ကန်မင်းနင်ကို လှမ်းကြည့်ကာ ရယ်မောလိုက်သည်။

"တကယ့်ကို ဆန်းကြယ်လှပါတယ် ဒီလူက ကန်မင်းမျိုးနွယ်စုက ဖြစ်တာ ထင်ရှားပါလျက်နဲ့ ကျွန်မတို့လို နေရာလေးဆီ လာပြီး ဝင်ရောက်ခွင့် ကျောက်စိမ်းပြားကို ရဖို့ အသည်းအသန် လာပြိုင်နေရတယ်လို့"

"သူက အခုဆိုရင် ၉၅ ပွဲ ဆက်တိုက် နိုင်ထားတာပါ အနိုင်ပွဲ ၁၀၀ ပြည့်ဖို့ ငါးပွဲပဲ လိုပါတော့တယ်"

ထိုစကားကို ကြားလိုက်ရသည့်အခါ ဘေးနားရှိ ကန်မင်းနင်က မကျေမနပ်ဖြစ်ကာ နှာခေါင်းရှုံ့လျက် နှာခေါင်းတစ်ချက် မှုတ်လိုက်သည်။

"ဟွန်း..."

"ငါတို့ရဲ့ သိက္ခာကြီးမားလှတဲ့ အခြေချနေထိုင်တဲ့ ရှေးဟောင်းမျိုးနွယ်စုရဲ့ ကန်မင်းမျိုးနွယ်စုက လူတစ်ယောက်က ဒီလို လူစုံလှတဲ့ နေရာမျိုးမှာ လူတွေရဲ့ ဖျော်ဖြေရေးအတွက် အသုံးချခံနေရတယ်တဲ့လား"

"သူက ငါတို့ ကန်မင်းမျိုးနွယ်စုရဲ့ သိက္ခာကို တကယ့်ကို ဖျက်ဆီးနေတာပဲ"

လျူဇီရှန်းက ဘာမှမတတ်နိုင်သကဲ့သို့ ပုခုံးတွန့်ပြလိုက်ရင်း ဆိုသည်။

"ကျွန်မတို့ သတ်ကွင်းမှာတော့ ဘယ်သူ့ကိုမှ အဓမ္မ ဝင်ပြိုင်ခိုင်းတာမျိုး မရှိပါဘူးရှင်"

"ကျွန်မတို့က ကန်မင်းမျိုးနွယ်စုလို အင်အားကြီးကို မပြစ်မှားဝံ့ပါဘူး"

"အနိုင်ပွဲတစ်ရာ သေမျိုးတိုက်ပွဲဆိုတာ ကန်မင်းအာ့ထျန် သခင်လေး ကိုယ်တိုင် ရွေးချယ်ခဲ့တာပါ သတ်ကွင်းနဲ့ ဘာမှမဆိုင်ပါဘူးရှင်"

သူမသည် ဤသတ်ကွင်းကို နှစ်ပေါင်းရာချီ၍ ဖွင့်လှစ်လာခဲ့ခြင်း ဖြစ်ပြီး အဓိက ရည်ရွယ်ချက်မှာ အလွန်တရာ ပါရမီထူးခြားလှသော လူငယ်တစ်ဦးကို ရှာဖွေပြီး ၎င်းအပေါ် လောင်းကြေးထပ်ကာ မိမိအား ခရမ်းရောင်မြွေနတ်ဘုရားမ မျိုးနွယ်စုဆီ ပြန်လည် ခေါ်ဆောင်သွားနိုင်ရန် ဖြစ်သည်။

နောက်ဆုံးတွင် သူမသည် နောက်ခံရော ပါရမီပါ ထူးခြားလှသော ကန်မင်းအာ့ထျန်ကို ရှာဖွေတွေ့ရှိခဲ့သည်။ သူမသည် မူလက ထိုသူ့အပေါ် လောင်းကြေးထပ်ရန် ရည်ရွယ်ထားသော်လည်း ယနေ့တွင် ဤဧကရာဇ်မျိုးနွယ်စု၏ သခင်လေးနှင့် ဆုံတွေ့လိုက်ရသည့်အခါ သူမ၏ အတွေးများ ချက်ချင်းပင် ပြောင်းလဲသွားတော့သည်။

[ဒေါင်... ကံကြမ္မာဇာတ်ဆောင်မလေး လျူဇီရှန်းသည် ကန်မင်းအာ့ထျန်အပေါ် လောင်းကြေးထပ်ရန် စိတ်ကူးကို စွန့်လွှတ်လိုက်ပြီ ဖြစ်သည်။ ကန်မင်းအာ့ထျန်၏ ကံတရားတန်ဖိုး ၁၀၀၀ လျော့ကျသွားပါသည်]

[ဂူဏ်ယူပါတယ် သခင်... သင်သည် ဗီလိန်အမှတ် ၁၀၀၀ ရရှိပါသည်]

ဒါဆိုရင် သူတို့က သူတို့ရဲ့ အာရုံစိုက်မှုကို ပြောင်းလဲလိုက်ပြီပေါ့...

သူမက တကယ့်ကို သွေးအေးပြီး လက်တွေ့ကျတဲ့ မိန်းမတစ်ယောက်ပဲ။

စုချန်ရှောင်းက ထိုအရာကို အလွန်အမင်း အာရုံမစိုက်ဘဲ အောက်ဘက်ရှိ သတ်ကွင်းကြီးဆီသို့ လှမ်းကြည့်လိုက်သည်။

ကောင်းကင်အရှင် သတ်ကွင်းတွင် နယ်မြေ ၁၂ ခု ရှိပြီး နေ့စဉ် လောင်းကစားနှင့် ဖျော်ဖြေရေးအတွက် တိုက်ပွဲပေါင်း ရာချီ၍ တည်ရှိသည်။ အောက်ဘက်ရှိ နယ်မြေတစ်ခုလုံးတွင် လူများ ပြည့်နှက်နေပြီး ထိုင်ခုံတိုင်းတွင် လူများ ပြည့်ကျပ်နေပေသည်။

ပွဲကြည့်စင်ပေါ်ရှိ ကျင့်ကြံသူများသည် စိတ်လှုပ်ရှားမှုကြောင့် မျက်နှာများ နီမြန်းနေကြသည်။ အချို့က သတ်ကွင်းထဲသို့ စိတ်ရူးသွပ်စွာ ငုံ့ကြည့်ရင်း လက်သီးများကို ကျစ်ကျစ်ပါအောင် ဆုပ်ကာ အော်ဟစ်နေကြပြီး အချို့ကမူ လောင်းကြေးရှုံးသဖြင့် ရင်ဘတ်ကို တစိမ့်စိမ့်တုတ်ကာ နောင်တရနေကြသည်။

"ထိုးစမ်း... သတ်စမ်း"

"ငါ မင်းအပေါ်မှာ ဝိညာဉ်ကျောက်တုံး တစ်သောင်း လောင်းထားတာကွ"

"သူ့ကို အပိုင်းပိုင်းပြတ်အောင် လုပ်ပစ်စမ်း"

အောက်ဘက်ရှိ စည်ကားသိုက်မြိုက်လှသော မြင်ကွင်းကို ကြည့်ရင်း စုချန်ရှောင်းပင်လျှင် မချီးမွမ်းဘဲ မနေနိုင်တော့ချေ။

"ဒီနေရာက တကယ့်ကို စည်ကားတာပဲ"

"ကန်မင်းအာ့ထျန်ရဲ့ သေမျိုးတိုက်ပွဲက ဘယ်အချိန်မှာ စမှာလဲ" စုချန်ရှောင်းက မေးလိုက်သည်။

လျူဇီရှန်းက ခပ်ဖွဖွ ပြုံးလိုက်ပြီး ဆိုသည်။

"ဒါကြောင့် သခင်လေးစု ဒီနေ့ ဒီကို ကြွလာတာကိုး"

"ကန်မင်းအာ့ထျန်ရဲ့ နောက်ဆုံး ငါးပွဲကိုတော့ ဒီနေ့ မွန်းလွဲပိုင်းမှာ စဖို့ စီစဉ်ထားတာပါ"

"ဒါပေမယ့် သခင်လေးစု ကြည့်ချင်တယ်ဆိုရင်တော့ အခုချက်ချင်း စခိုင်းဖို့ မဖြစ်နိုင်တာ မဟုတ်ပါဘူးရှင်"

စုချန်ရှောင်းက ဘေးနားရှိ ကန်မင်းနင်ကို သဘောကျစွာ လှမ်းကြည့်လိုက်ပြီး ခေါင်းညိတ်ပြကာ ဆိုသည်။

"ဒါဆိုရင်လည်း အခုပဲ စခိုင်းလိုက်တော့"

"တိုက်တိုက်ဆိုင်ဆိုင်ပဲ ဒီသခင်လေးကလည်း ကန်မင်းမျိုးနွယ်စုရဲ့ အစွန့်ပစ်ခံ သားကြီး ကန်မင်းအာ့ထျန်ကို တွေ့ချင်နေတာနဲ့ အတော်ပဲ"

"ကောင်းပါပြီ သခင်လေးစု~"

ကောင်းကင်အရှင် သတ်ကွင်း၊ မြေအောက် တတိယထပ်၌...

မှောင်မိုက်ပြီး စိုစွတ်လှသော မြေအောက်လှောင်အိမ်အတွင်း၌ မိစ္ဆာသားရဲများ၏ ထိတ်လန့်စရာ အော်ဟစ်သံများနှင့် စိတ်ရူးသွပ်စွာ အော်ဟစ်ညည်းတွားသံများက အဆုံးမရှိ ထွက်ပေါ်နေသည်။

ဝူး...

"ငါ့ကို လွှတ်ပေးကြ... ငါ့ကို လွှတ်ပေး"

ဒီနေရာတွင် ဖမ်းဆီးထားသော အကျဉ်းသားများသည် သေဒဏ်ကျခံနေရသူများနှင့် သတ်ကွင်းအတွင်း တိုက်ခိုက်ရန်အတွက် ရောင်းချခြင်း ခံထားရသော သို့မဟုတ် သတ်ကွင်းက ဝယ်ယူထားသော မိစ္ဆာသားရဲများ ဖြစ်ကြသည်။

ကျဉ်းမြောင်းပြီး ပွင့်လင်းလှသော အခန်းငယ်တစ်ခုအတွင်း၌...

ဝတ်စုံနက်ကို ဆင်မြန်းထားပြီး အေးစက်လှသော မျက်နှာရှိသည့် လူငယ်တစ်ဦးသည် မာကျောလှသော ကျောက်ကုတင်ထက်တွင် တင်ပလ္လင်ခွေ ထိုင်နေသည်။

သူ့ထံမှ တာအိုစွမ်းအင်များ စီးဆင်းနေပြီး အလွန်တရာ မှောင်မိုက်လှသော တာအိုစွမ်းအားများက သူ့ကို ဝန်းရံထားရာ ပတ်ဝန်းကျင်ရှိ မည်သည့်အရာကမျှ သူ့ကို သက်ရောက်မှု မရှိပုံရချေ။

ထိုလူငယ်တွင် လွင့်မျောနေသော ဆံနွယ်နက်ရှိုင်းရှည်များ ရှိပြီး ခန့်ညားထည်ဝါကာ ထက်မြက်လှသော မျက်နှာသွင်ပြင်ကို ပိုင်ဆိုင်ထားပြီး သူ၏ ရုပ်ရည်က မျိုးနွယ်စုခေါင်းဆောင် ကန်မင်းယုံနှင့် အတော်ပင် ဆင်တူလှပေသည်။

ဒေါက် ဒေါက် ဒေါက်...

ထိုစဉ် အလျင်အမြန် လျှောက်လှမ်းလာသော ခြေသံအချို့ ထွက်ပေါ်လာသည်။ တံခါး ပွင့်သွားသည့်အခါ မျက်လုံးကလယ်ကလယ်နှင့် ဝမ်းဗိုက်ရွှဲရွှဲရှိသော လူတစ်ဦး ဝင်ရောက်လာခဲ့သည်။

သူက အလွန်တရာ ရိုသေကိုင်းညွတ်စွာဖြင့် ဆိုလိုက်သည်။

"အဲ... အာ့ထျန်သခင်လေး ကျင့်ကြံနေတုန်းပဲလား"

ထိုလူသည် ကောင်းကင်အရှင် သတ်ကွင်း၏ သာမန်တာဝန်ခံတစ်ဦး ဖြစ်သည်။ မိမိတို့ရှေ့မှောက်ရှိ လူငယ်သည် နာမည်အရ သတ်ကွင်း၏ တိုက်ခိုက်ရေးသမားတစ်ဦး ဖြစ်သော်လည်း သူသည် ကန်မင်းမျိုးနွယ်စု၏ သားကြီးဖြစ်ကြောင်းကို လူတိုင်း သိကြသည်။

သူသည် ကန်မင်းမျိုးနွယ်စုနှင့် အဆက်အသွယ် ဖြတ်ထားခြင်းကြောင့်သာ ဝင်ရောက်ခွင့် ကျောက်စိမ်းပြားကို ရရှိရန် မိမိတို့ ကောင်းကင်အရှင် သတ်ကွင်းသို့ လာရောက်ခြင်း ဖြစ်သည်။

ကျောက်ကုတင်ထက်တွင် တင်ပလ္လင်ခွေ ထိုင်နေသော ကန်မင်းအာ့ထျန်သည် ဖြည်းည်းချင်း မျက်လုံးများကို ဖွင့်လိုက်သည်။ သူ၏ မျက်ဝန်းထဲမှ ထက်မြက်လှသော အလင်းတန်းများ ထွက်ပေါ်လာရာ ကောင်းကင်ကြီးတစ်ခုလုံးကို ဝါးမြိုနိုင်လောက်သည့် အရှိန်အဝါမျိုး ရှိပေသည်။

ဝုန်း...

ပတ်ဝန်းကျင်ရှိ ကျောက်နံရံများတွင် ချက်ချင်းပင် အက်ကွဲကြောင်းများ ထွက်ပေါ်လာပြီး သူ၏ ခန္ဓာကိုယ်မှ ပြင်းထန်လှသော စွမ်းအင်လှိုင်းများ ဖြတ်ပြဲထွက်ပေါ်လာသည်။

မဟာယာနအဆင့် ဒုတိယအဆင့်။

ဝတုတ်တုတ် တာဝန်ခံသည် ထိုရုတ်တရက် ထွက်ပေါ်လာသော စွမ်းအင်ကြောင့် လန့်ဖျန့်သွားရသည်။ သူ၏ ခန္ဓာကိုယ်တစ်ခုလုံး တုန်ရီသွားပြီး အနည်းငယ် ကြောက်လန့်တကြားဖြင့် ဆိုလိုက်သည်။

"အာ့ထျန်သခင်လေး..."

ကန်မင်းအာ့ထျန်သည် မိမိ၏ ကျင့်ကြံမှုကို ပြန်လည် ထိန်းချုပ်လိုက်ပြီး မိမိရှေ့မှောက်ရှိ ဝတုတ်တုတ် တာဝန်ခံကို အေးစက်စွာ လှမ်းကြည့်လိုက်သည်။

"ဘာကိစ္စလဲ"

ဝတုတ်တုတ် တာဝန်ခံက အလျင်အမြန်ပင် ရှင်းပြလိုက်သည်။

"အဲ... အာ့ထျန်သခင်လေး မင်းမှာ ငါးပွဲပဲ လိုတော့တာပါ"

"သတ်ကွင်းသခင်မက မင်းရဲ့ ဒီနေ့မွန်းလွဲပိုင်း တိုက်ပွဲကို အရှေ့သို့ တိုးမြှင့်လိုက်လို့ အခုချက်ချင်း စရပါတော့မယ်"

"အာ့ထျန်သခင်လေး... မင်းရဲ့ သဘောက ဘယ်လိုရှိပါသလဲ..."

အချိန်တိုးလိုက်တာ ဟုတ်လား...

ကန်မင်းအာ့ထျန်၏ မျက်နှာအမူအရာက တည်ငြိမ်နေပြီး ဝမ်းသာခြင်း သို့မဟုတ် အမျက်ထွက်ခြင်းမျိုး မပြချေ။

အချိန်စောတာလည်း ကောင်းတာပါပဲ၊ ဒီရက်ပိုင်းအတွင်း ပြင်းထန်လှတဲ့ တိုက်ပွဲတွေကြောင့် ငါ့ရဲ့ ကျင့်ကြံမှုက အများကြီး တိုးတက်လာခဲ့ပြီ။ ဒါတင်မကဘဲ အခုဆိုရင် မဟာယာနအဆင့် ဒုတိယအဆင့်ကိုပါ ဆင့်တက်ချိုးဖျက်နိုင်ခဲ့ပြီ။

အချိန်ကျရောက်လာပြီပဲ၊ ငါ့ရဲ့ ဝင်ရောက်ခွင့်ကို ရယူပြီး ဒီနေရာကနေ ထွက်ခွာရမည့်အချိန်ပဲ...။

ထိုသို့တွေးပြီးနောက် ကန်မင်းအာ့ထျန်က အလွန်တရာ အေးစက်လှသော လေသံဖြင့် ဆိုလိုက်သည်။

"ငါ သိပြီ... သွားပြီး ပြင်ဆင်လိုက်တော့"

"ဒီနေ့ ငါ ကန်မင်းအာ့ထျန် ဒီသေမျိုးတိုက်ပွဲရဲ့ အနိုင်ပွဲတစ်ရာမြောက်ကို သေချာပေါက် ရယူပြမယ်"

ထိုစကားကို ကြားရသည့်အခါ ဝတုတ်တုတ် တာဝန်ခံသည် စိတ်အေးသွားပြီး ခေါင်းညိတ်ကာ တိုက်ပွဲအတွက် စီစဉ်ရန် ချက်ချင်းပင် ထွက်ခွာသွားတော့သည်။

ဒီကျဉ်းမြောင်းပြီး ဖိအားများကာ မှောင်မိုက်လှသော အခန်းငယ်လေးအတွင်း၌... ကန်မင်းအာ့ထျန်သည် မိမိရှေ့မှောက်ရှိ အမှောင်ထုကို ကြည့်ရင်း လွန်ခဲ့သော နှစ်အနည်းငယ်ခန့်က အတိတ်ဆိုးများကို ပြန်လည် မြင်ယောင်လာမိသည်။

"မင်းလို သားမိုက်..."

"မင်း နောက်ထပ် စကားတစ်ခွန်း ထပ်ပြောရင် ငါ ကန်မင်းယုံ မင်းလို သားမျိုး မရှိဘူးလို့ သတ်မှတ်လိုက်မယ်"

"မင်းက သားသမီးကို မွေးရုံပဲ မွေးပြီး မကျွေးမွေးခဲ့ဘဲနဲ့... အဖေတစ်ယောက်ရဲ့ တာဝန်နဲ့ ဝတ္တရားတွေကို ဘယ်လိုများ ထမ်းဆောင်ခဲ့ဖူးလို့လဲ"

"ကောင်းပြီလေ... မင်းက ငါ့ကို မင်းရဲ့ သားအဖြစ် မသတ်မှတ်ဘဲ ဒီလောက်တောင် မုန်းတီးနေမှတော့ ဒီနေ့ကစပြီး ငါ ကန်မင်းအာ့ထျန်ဟာ မင်းတို့ရဲ့ အခြေချနေထိုင်တဲ့ ရှေးဟောင်းမျိုးနွယ်စု ကန်မင်းမျိုးနွယ်စုနဲ့ အဆက်အသွယ် အကုန်ဖြတ်တယ်"

"ကန်မင်းမျိုးနွယ်စုရဲ့ ခေါင်းဆောင်... မင်းမှာ ငါ့လို သားမရှိဘူးလို့ပဲ မှတ်လိုက်တော့ ငါ့မှာလည်း မင်းလို အဖေမျိုး ဘယ်တုန်းကမှ မရှိခဲ့ဘူး"

သူသည် ငယ်စဉ်ကတည်းက အဖေဖြစ်သူ၏ အခြားသော နယ်မြေများသို့ ပြည်နှင်ဒဏ်ပေးခြင်းကို ခံခဲ့ရပြီး အမေဖြစ်သူ၏ နောက်ဆုံးအချိန်ကိုပင် တွေ့မြင်ခွင့် မရခဲ့ချေ။

သူတို့တွင် တစ်စုံတရားသော အခက်အခဲ ရှိလိမ့်မည်ဟု ထင်မှတ်ခဲ့သော်လည်း အဖေဖြစ်သူ မိမိကို မျိုးနွယ်စုဆီ ပြန်ခေါ်လာသည့်အခါတွင်မူ မိမိ၌ ညီတစ်ယောက် ရှိနေသည်ကို အကြောင်းပြချက်မရှိဘဲ သိလိုက်ရခြင်း ဖြစ်သည်။

ယင်နှင့်ယန် နတ်ဘုရားခန္ဓာကိုယ်ကို ပိုင်ဆိုင်ထားပြီး အသက် ၂၀ မျှသာ ရှိသေးသော်လည်း မဟာယာနအဆင့် နဝမအဆင့်သို့ ရောက်ရှိနေသည့် ညီဖြစ်သူတဲ့လား။

လက်ရှိ အခြေအနေသို့ ပြန်လည် ရောက်ရှိလာသည့်အခါ ကန်မင်းအာ့ထျန်၏ မျက်ဝန်းများသည် အလွန်တရာ အေးစက်ပြီး ပြတ်သားလှပေသည်။

"တော်လောက်ပြီ..."

"ငါ ကန်မင်းအာ့ထျန်ဟာ ငယ်စဉ်ကတည်းက ကြီးပြင်းလာတဲ့အထိ ဘယ်သူ့ရဲ့ အထောက်အပံ့ကိုမှ အမှီမပြုခဲ့ဘူး"

သူသည် ထိုမျက်နှာလိုက်တတ်သော အဖေကို အမှန်တရားကို သိစေချင်သည်။ မိသားစု၏ အထောက်အပံ့ကို အမှီမပြုဘဲနှင့်လည်း ကြယ်ကြွေရာ ရှေးဟောင်းသချိုင်းမြေဆီ ဝင်ရောက်ခွင့် ကျောက်စိမ်းပြားကို ကိုယ်တိုင် ရယူနိုင်ကြောင်း သက်သေပြလိမ့်မည်။