အခန်း ၂၅ ရှေးဟောင်းနတ်ဘုရားခန္ဓာကိုယ်၏ အဆီအနှစ်ကို စုပ်ယူခြင်း

ဆုလာဘ်များ ရရှိခဲ့ပြီလား။
ထိပ်သီးနတ်ဘုရားလက်နက် - ဝရဇိန်ဖိုကြီး။
 [အလွန်တရာ ကြီးမားသော စွမ်းအားများနှင့် မပျက်စီးနိုင်သော ခံနိုင်ရည်ရှိမှုကို ပိုင်ဆိုင်ထားပြီး ကမ္ဘာမြေကိုပင် ဖိနှိပ်ထားနိုင်သည် ၎င်းကို အသုံးပြုရန်အတွက် အသုံးပြုသူ၏ ခန္ဓာကိုယ်အင်အား အလွန်တရာ မြင့်မားရန် လိုအပ်သည်]
 
စုချန်ရှောင်း၏ မျက်ဝန်းများ တောက်ပသွားခဲ့သည်။
အခြားတစ်ဖက်တွင်မူ မင်စုယွမ်သည် ယဲ့ရှောင်က ထိုကဲ့သို့ စကားများကို ပြောလိမ့်မည်ဟု လုံးဝ မယုံကြည်နိုင်ဘဲ ဖြစ်နေခဲ့ရသည်။
သူမက မျက်နှာ ဖြူလျော်စွာဖြင့် ပြောလိုက်သည်။
"ကိုကိုယဲ့... ကိုကို ဘာဖြစ်သွားတာလဲ"
"ငါ ကိုကို့ကို မသိဘူးလို့ ဘာလို့ ပြောရတာလဲ"
ယဲ့ရှောင်၏ စကားများသည် ဘေးတွင် ရပ်နေသော အဘွားချန်ကို အစွမ်းကုန် ဒေါသထွက်သွားစေခဲ့သည်။
"ယဲ့ရှောင် မင်းလို ကျေးဇူးကန်းတဲ့ တိရစ္ဆာန်"
"မင်း အခုရရှိထားတဲ့ အရာအားလုံးက မင်းရဲ့ ရှေးဟောင်းနတ်ဆိုးနတ်ဘုရားခန္ဓာကိုယ်ကြောင့်ပဲလို့ တကယ် ထင်နေတာလား"
"မင်းမှာ ထူးခြားတဲ့ ခန္ဓာကိုယ်ရှိတာ မှန်ပေမဲ့ ကမ္ဘာပေါင်းစုံမှာ ဒီလိုခန္ဓာကိုယ်တွေက အများကြီး ရှိတယ်"
"အဲဒီလူတွေ ဘာဖြစ်သွားလဲဆိုတာ မင်း သိလား"
အဘွားချန်၏ အိုမင်းလှသော မျက်ဝန်းများထဲတွင် ဒေါသတရားများ ပြည့်နှက်နေခဲ့သည်။ သူမတစ်ဦးတည်းသာ သခင်မလေးသည် ဤကောင်အတွက် မည်မျှအထိ ပေးဆပ်ခဲ့ရသည်ကို သိရှိထားသည်။
"သူတို့ရဲ့ သွေးချင်းတွေကို စုပ်ယူပြီး နတ်ဆေးလုံးတွေအဖြစ် ဖော်စပ်ပစ်ကြတာပဲ ဒါတင်မကဘူး အစွမ်းထက်တဲ့ မိသားစုတွေက အဲဒီခန္ဓာကိုယ်တွေကို စုပ်ယူနိုင်တဲ့ နည်းလမ်းတွေကိုလည်း ပိုင်ဆိုင်ထားကြတယ်"
"သခင်မလေးသာ ကွယ်ရာကနေ မကူညီခဲ့ရင် မင်း အောက်ဘုံမှာ ရှိနေစဉ်ကတည်းက ကောင်းကင်နိုးထခြင်းဂိုဏ်းရဲ့ လက်ထဲမှာ သွေးတွေ အကုန်စုပ်ယူခံရပြီး သွေးကျွန်တစ်ယောက် ဖြစ်နေလောက်ပြီ"
"အခု အထက်ဘုံကို ရောက်တဲ့အထိ သခင်မလေးက မင်းအတွက် အမြဲစိုးရိမ်ပေးခဲ့ပြီး ငါ့ကို နတ်ဘုရားနက်နဲဂိုဏ်းချုပ်ဆီ စေလွှတ်ကာ မင်းကို စောင့်ရှောက်ခိုင်းခဲ့တာ ဖြစ်တယ် မဟုတ်ရင် မင်းရဲ့ ပြဿနာရှာတတ်တဲ့ စရိုက်နဲ့ဆိုရင် အကြိမ်တစ်ရာမက သေဆုံးသွားခဲ့လောက်ပြီ"
"ဒါပေမဲ့ အခုတော့ မင်းက အရာအားလုံးကို ကိုယ့်ရဲ့ ကြိုးစားမှုကြောင့်ပါလို့ ပြောပြီး သခင်မလေးရဲ့ ကူညီမှုတွေကို စကားတစ်လုံးတည်းနဲ့ ငြင်းပယ်ချင်နေတယ် မင်းက တကယ်ပဲ ကျေးဇူးကန်းတဲ့ကောင်ပဲ"
“ဘာ...............”
ထိုစကားကို ကြားလိုက်ရသောအခါ ယဲ့ရှောင်၏ မျက်ဝန်းအိမ်များ ပြင်းထန်စွာ တုန်လှုပ်သွားခဲ့သည်။ သူသည် ထိုအမှန်တရားကို လက်မခံနိုင်ဘဲ မင်စုယွမ်ကို မယုံကြည်နိုင်သော မျက်ဝန်းများဖြင့် မော့ကြည့်လိုက်သည်။
"ဂိုဏ်းထဲကို ရောက်ရောက်ချင်း အကြီးအကဲတစ်ယောက်က ငါ့ကို ဘာလို့ တပည့်ရင်းအဖြစ် လက်ခံခဲ့လဲဆိုတာ... ဒါတွေအားလုံးက မင်း လုပ်ခဲ့တာလား"
မင်စုယွမ်သည် ဘေးတွင် ရပ်နေရင်း မျက်ဝန်းများ နီမြန်းကာ စိတ်ပျက်အားလျော့စွာဖြင့် နှုတ်ခမ်းကို တင်းတင်းစေ့ထားလျက် ငြိမ်သက်နေခဲ့သည်။
ရက်စက်လှသော အမှန်တရားသည် မောက်မာလှသော ယဲ့ရှောင်အတွက် လက်ခံနိုင်စရာ မရှိပေ။
မိမိ ကြုံတွေ့ခဲ့ရသော အောင်မြင်မှုများအားလုံးက အခြားသူများ၏ ကြိုးကိုင်မှုအောက်တွင် ရှိနေခဲ့ခြင်းလား။
ယဲ့ရှောင်က ကိုယ့်ကိုယ်ကိုယ် သရော်လှောင်ပြောင်လျက် ရူးသွပ်သွားသည့်အလား အော်ဟစ်လိုက်သည်။
"ဒါ မဖြစ်နိုင်ဘူး ဒါ မဖြစ်နိုင်ဘူး ငါ ရရှိခဲ့တဲ့ အရာအားလုံးက ငါ့ရဲ့ ကြိုးစားမှုကြောင့်ပဲ..."
"ငါ ယဲ့ရှောင်က မင်းဆီကနေ အကူအညီတစ်ခါမှ မတောင်းခဲ့ဖူးဘူး မင်းက ဘာလို့ ငါ့ဘဝထဲကို ဝင်ရောက်စွက်ဖက်နေရတာလဲ"
"ပြောစမ်း"
 [တင် ကံကြမ္မာအရှင်သခင် ယဲ့ရှောင်နှင့် ကံကြမ္မာသတ်မှတ်ထားသော အမျိုးသမီး မင်စုယွမ်တို့၏ ဆက်ဆံရေး ပျက်စီးသွားသဖြင့် ကံကြမ္မာတန်ဖိုး ၂၀,၀၀၀ ဆုံးရှုံးသွားပါသည်]
 [ဂုဏ်ယူပါတယ် အရှင် အရှင်သည် ဗီလိန်အမှတ် ၂၀,၀၀၀ ရရှိပါသည်]
 
အကြိမ်နှစ်ဆယ် ဆက်တိုက် ကံစမ်းမဲနှိုက်ခွင့်။
စုချန်ရှောင်း၏ မျက်ဝန်းများ တောက်ပသွားခဲ့သည်။
ဒီလျှို့ဝှက်ရှေးဟောင်းမျိုးနွယ်စု မင်မိသားစုက ယဲ့ရှောင်၏ ကံကြမ္မာတန်ဖိုးထဲတွင် ကြီးမားလှသော အစိတ်အပိုင်းတစ်ခုအဖြစ် ပါဝင်နေလိမ့်မည်ဟု မထင်ထားခဲ့ပေ။
ထို့ပြင် ဒီကောင်က ကံကြမ္မာသတ်မှတ်ထားတဲ့ အမျိုးသမီး ကွယ်ရာက ကူညီပေးခဲ့တာကို မကျေမနပ် ဖြစ်နေသေးသည်။
အကျိုးကျေးဇူးကိုတော့ ခံစားပြီး အခုကျမှ အပြစ်မဲ့ဟန်ဆောင်နေတာပဲ။
စုချန်ရှောင်းက ရယ်မောလိုက်ရင်း ထိုင်နေရာမှ ထကာ ယဲ့ရှောင်၏ ဘေးသို့ လာ၍ သရော်သော မျက်နှာထားဖြင့် ငုံ့ကြည့်လိုက်သည်။
"ယဲ့ရှောင် မင်း အခု နားလည်ပြီလား"
"မင်မိသားစုသာ မရှိခဲ့ရင် မင်း ယဲ့ရှောင်ဆိုတာ ဘာမှမဟုတ်ဘူး"
"ဒီလောကမှာ ပါရမီရှင်တွေ မရှားပါဘူး ဒါပေမဲ့ နောက်ခံအာဏာမရှိတဲ့ ပါရမီရှင်ကတော့ သာမန်လူတစ်ယောက်ထက် မပိုဘူး"
"ပြီးတော့ မင်းရဲ့ ရှေးဟောင်းနတ်ဆိုးနတ်ဘုရားခန္ဓာကိုယ်က ငါတို့ ရှေးဟောင်းမျိုးနွယ်စုတွေရဲ့ နှစ်ပေါင်းသန်းချီတဲ့ ကြိုးစားအားထုတ်မှုတွေကို ယှဉ်နိုင်လိမ့်မယ်လို့ ထင်နေတာလား"
"မင်းရဲ့ မစိုးစိမတန်တဲ့ မာနတွေက ငါ့မျက်စိထဲမှာတော့ လမ်းဘေးက ကျောက်ခဲတစ်လုံးထက်တောင် တန်ဖိုးမရှိဘူး"
"ကောင်စုတ် ပါးစပ်ပိတ်ထားစမ်း" ယဲ့ရှောင်၏ မျက်ဝန်းများ နီမြန်းနေခဲ့ပြီး ရှေ့ရှိ စုချန်ရှောင်းကို နာကျည်းစွာ စိုက်ကြည့်လိုက်သည်။
ဒါပေမဲ့ သူ ပြန်လည်မချေပနိုင်တာကိုတော့ သူကိုယ်တိုင်လည်း သိရှိထားသည်။
မိမိ ဂုဏ်ယူဝံ့ကြွားခဲ့သော ပါရမီများသည် တစ်ဖက်လူ၏ ရှေ့တွင် တန်ဖိုးမရှိလှပေ။
အဘွားချန်က ထိုမြင်ကွင်းကို အေးစက်စွာ စောင့်ကြည့်နေခဲ့သည်။
"ယဲ့ရှောင် မင်းက သခင်မလေးရဲ့ အကူအညီတွေကို အားကိုးပြီး အမြဲတမ်း ပြဿနာရှာခဲ့တာပဲ"
"ဒါပေမဲ့ သခင်လေးစုက ဧကရာဇ်မျိုးနွယ်စု စုမိသားစုရဲ့ သခင်လေး ဖြစ်တယ် ငါတို့ မင်မိသားစုတောင် မပြိုင်ဝံ့တဲ့ မြင့်မြတ်လှတဲ့သူပဲ"
"မင်း ဒီနေ့ ကြုံတွေ့ရတဲ့ ဘေးဒုက္ခက မင်းရဲ့ ကံကြမ္မာပဲ ဘယ်သူမှ မင်းကို မကယ်တင်နိုင်ဘူး"
သူမသည် သခင်မလေးနှင့်အတူ ယဲ့ရှောင်ထံမှ အချိန်မီ အဆက်အသွယ် ဖြတ်တောက်နိုင်ခဲ့ခြင်းကိုသာ ကျေးဇူးတင်နေမိသည်။
မဟုတ်ရင် မဆင်မခြင် ပြုမူမိပြီး ထိုဧကရာဇ်မျိုးနွယ်စု၏ သခင်လေးကို ရန်စမိပါက...
သူတို့ မင်မိသားစုတစ်ခုလုံးပါ အစတုံး ဖျက်ဆီးခံရပေလိမ့်မည်။
ကမ္ဘာပေါင်းစုံတွင် လျှို့ဝှက်ရှေးဟောင်းမျိုးနွယ်စုများ ရာနှင့်ချီ၍ ရှိသော်လည်း ဧကရာဇ်မျိုးနွယ်စု စုမိသားစုကတော့...
တစ်စုတည်းသာ ရှိသည်။
ယဲ့ရှောင်၏ မျက်ဝန်းအိမ်များ ပြင်းထန်စွာ တုန်လှုပ်နေခဲ့ပြီး မြေပြင်ပေါ်တွင် ဒူးထောက်ထားဆဲဖြစ်ကာ စကားတစ်လုံးမျှ မပြောနိုင်တော့ပေ။
"ဘာလို့လဲ... ဘာလို့လဲ..."
"ဒါ မဖြစ်နိုင်ဘူး..."
စုချန်ရှောင်းက ပြုံးလိုက်ရင်း ယဲ့ရှောင်၏ ပခုံးပေါ်သို့ လက်ကို အသာအယာ တင်လိုက်ကာ ပြောလိုက်သည်။
"ယဲ့ရှောင် မင်း တစ်ခါက ပြောခဲ့တယ်မဟုတ်လား ဧကရာဇ်မျိုးနွယ်စုက ဖြစ်ရုံနဲ့တင် လိုချင်တာမှန်သမျှ လုပ်လို့ရသလားဆိုပြီး..."
"ဒီနေ့ ငါ မင်းကို ပြသရတာပေါ့ ဧကရာဇ်မျိုးနွယ်စု စုမိသားစုက တကယ်ပဲ လိုချင်တာမှန်သမျှ လုပ်လို့ရတယ်ဆိုတာကို"
"မင်း ဂုဏ်ယူလှပါတယ်ဆိုတဲ့ ရှေးဟောင်းနတ်ဆိုးနတ်ဘုရားခန္ဓာကိုယ်ကို အခု..."
"ငါ ယူလိုက်ပြီ"
သူ စကားပြောပြီးသည်နှင့် တစ်ပြိုင်နက် သူ၏ လက်ထဲမှ ထူးဆန်းလှသော ခရမ်းရောင်အလင်းတန်းများ ပေါက်ကွဲထွက်ပေါ်လာခဲ့သည်။
"ဝူး"
“ကမ္ဘာဦးဖရိုဖရဲကျမ်း”

ရှေးဟောင်းထိပ်သီးနတ်ဘုရားစွမ်းရည် ဆယ်ခုထဲမှ တစ်ခုဖြစ်ပြီး အရာအားလုံးကို တစ်ခုတည်းအဖြစ် ပေါင်းစပ်ပေးနိုင်သော စွမ်းအားရှိသည်။
ထိုအစွမ်းသည် ကမ္ဘာဦးဖရိုဖရဲနတ်ဘုရားကိုယ်နှင့် အကိုက်ညီဆုံးဖြစ်ပြီး အခြားသော အထူးခန္ဓာကိုယ်များ၏ အဆီအနှစ်များကို စုပ်ယူကာ မိမိ၏ စနစ်ထဲသို့ ပေါင်းစပ်ထည့်သွင်းနိုင်သည်။
အလွန်တရာ ကြောက်မက်ဖွယ်ကောင်းသော စွမ်းအားများ ထွက်ပေါ်လာခဲ့ပြီး ယဲ့ရှောင်၏ ရှေးဟောင်းနတ်ဆိုးနတ်ဘုရားခန္ဓာကိုယ်မှ အဆီအနှစ်များကို စတင်စုပ်ယူလိုက်သည်။
ယဲ့ရှောင်၏ သွေးချင်းစွမ်းအားများ တရဟော ပြောင်းပြန်စီးဆင်းသွားခဲ့သည်။
ရေဝဲကြီးတစ်ခုကဲ့သို့ သူ၏ ရင်ဘတ်အလယ်တွင် စုစည်းသွားခဲ့ပြီး ဝါကျင်ကျင် ရွှေရောင်အလင်းလုံးတစ်ခုအဖြစ် ပေါ်ထွက်လာခဲ့သည်။
"အား"
ခန္ဓာကိုယ်၏ အဆီအနှစ်ကို အဓမ္မစုပ်ယူခံရခြင်းကြောင့် ဖြစ်ပေါ်လာသော နာကျင်မှုသည် အသားကို ဓားအစင်းပေါင်း ထောင်ချီဖြင့် လှီးဖြတ်နေသကဲ့သို့ ပြင်းထန်လှသည်။
ယဲ့ရှောင်၏ မျက်လုံးများ ပြူးထွက်လာခဲ့ပြီး နဖူးမှ သွေးကြောများ ထောင်တက်လာကာ ခုခံရန် ကြိုးစားနေခဲ့သည်။
"ဘုန်း"
ထိုအချိန်တွင် အကြီးအကဲချင်းက ဝင်ရောက် ကူညီပေးလိုက်သည်။
သူ၏ ကြောက်မက်ဖွယ်ကောင်းသော စွမ်းအားများကြောင့် ယဲ့ရှောင်သည် လုံးဝ မလှုပ်ရှားနိုင်ဘဲ အသာတကြည် အဖိနှိပ်ခံလိုက်ရသည်။
အဘွားချန်၏ မျက်နှာတွင် ထိတ်လန့်သွားခဲ့ရပြီး သူမသာမက နတ်ဘုရားနက်နဲဂိုဏ်းသားများအားလုံး ထိုမြင်ကွင်းကို မယုံကြည်နိုင်စွာ စောင့်ကြည့်နေခဲ့ကြသည်။
"ဒါက... ခန္ဓာကိုယ်အစွမ်းကို လုယူတဲ့ နည်းလမ်းပဲ"
ထိုကဲ့သို့သော နတ်ဘုရားစွမ်းရည်များကို ရှေးဟောင်းကျမ်းစာများထဲမှာသာ ကြားဖူးခဲ့ခြင်း ဖြစ်သည်။ ဧကရာဇ်မျိုးနွယ်စု စုမိသားစုတွင် ထိုကဲ့သို့သော စွမ်းရည်ရှိနေလိမ့်မည်ဟု လုံးဝ ထင်မထားခဲ့ပေ။
"ကိုကိုယဲ့"
မင်စုယွမ်၏ မျက်နှာ ဖြူလျော်သွားခဲ့သည်။ သူမသည် လှမ်း၍ တားဆီးရန် ပြင်လိုက်သော်လည်း အဘွားချန်က လက်တစ်ဖက်ဖြင့် ရက်စက်စွာ တားဆီးလိုက်သည်။
"သခင်မလေး... ကျွန်တော်မျိုးမတို့ သူ့ကို ကူညီခဲ့တာ လုံလောက်ပါပြီ အခု ယဲ့ရှောင်က ဧကရာဇ်မျိုးနွယ်စုရဲ့ သခင်လေးကို စော်ကားမိလို့ အခုလို ဝဋ်လည်နေရတာ ဖြစ်တယ်"
"သခင်မလေးသာ ထပ်ပြီး လှုပ်ရှားရင် ကျွန်တော်မျိုးမလည်း ရက်စက်ရလိမ့်မယ်"
မင်စုယွမ်သည် ဘေးက အဘွားချန်ကို လှည့်ကြည့်လိုက်သည်။
အမြဲတမ်း မိမိအလိုကျ ဖြည့်ဆည်းပေးခဲ့သော အဘွားချန်၏ မျက်ဝန်းများထဲတွင် အေးစက်လှသော အကြည့်များ ရှိနေခဲ့သည်။
အဘွားချန်က စိတ်ချင်းဆက်သွယ်ကာ လေးနက်စွာ ပြောလိုက်သည်။
"သခင်မလေး... သခင်မလေးက မြင့်မြတ်တဲ့သူပါ ကျွန်တော်မျိုးမတို့ အောက်ဘုံကလူအတွက် ကူညီပေးခဲ့တာ လုံလောက်ပါပြီ"
"သခင်မလေးလည်း ဧကရာဇ်မျိုးနွယ်စု စုမိသားစုရဲ့ စွမ်းအားကို သိပါတယ် ငါတို့ မင်မိသားစုက သူတို့ကို မဆန့်ကျင်ဝံ့ဘူး ဒီကောင်တစ်ယောက်တည်းအတွက်နဲ့ ငါတို့မျိုးနွယ်စုဝင်တွေကို အသေမခံပါနဲ့"
မျိုးနွယ်စုဝင်တွေ...
မင်စုယွမ်၏ ခန္ဓာကိုယ်လေး တုန်လှုပ်သွားခဲ့ပြီး တစ်စုံတစ်ခုကို ဆုံးဖြတ်လိုက်သည့်အလား မျက်ဝန်းများထဲတွင် နာကျင်မှုများနှင့်အတူ လက်သီးကို တင်းတင်းဆုပ်ထားခဲ့သည်။
ကိုကိုယဲ့... တောင်းပန်ပါတယ်...
ငါ့ရဲ့ မိဘတွေနဲ့ မင်မိသားစုဝင်တွေကို အသေမခံနိုင်ဘူး...
ကြောက်မက်ဖွယ်ကောင်းသော ဧကရာဇ်မျိုးနွယ်စု စုမိသားစု၏ ရှေ့တွင် သူမသည် နောက်ဆုံး၌ ဘေးမှသာ ငြိမ်သက်စွာ စောင့်ကြည့်နေရန် ရွေးချယ်လိုက်တော့သည်။
 [တင် ကံကြမ္မာအရှင်သခင် ယဲ့ရှောင်၏ ရှေးဟောင်းနတ်ဆိုးနတ်ဘုရားခန္ဓာကိုယ် အလုခံရသဖြင့် ကံကြမ္မာတန်ဖိုး ၃၀,၀၀၀ ဆုံးရှုံးသွားပါသည်]
 [ဂုဏ်ယူပါတယ် အရှင် အရှင်သည် ဗီလိန်အမှတ် ၃၀,၀၀၀ ရရှိပါသည်]
 
ယဲ့ရှောင်၏ နာကျင်စွာ အော်ဟစ်သံများသည် ကောင်းကင်ထက်၌ ကြာမြင့်စွာ ပဲ့တင်ထပ်နေခဲ့သည်။
တောက်ပလှသော ခန္ဓာကိုယ်အဆီအနှစ် အလင်းလုံးသည် ဖြည်းည်းချင်း စုပ်ယူခံလိုက်ရသည်။
သူ၏ ကျင့်ကြံမှုအဆင့်သည်လည်း လျင်မြန်စွာ ကျဆင်းသွားခဲ့သည်။
မဟာယနနယ်ပယ် နဝမအဆင့်၊ အဋ္ဌမအဆင့်၊ သတ္တမအဆင့်...
ဆန့်ကျင်ဘက်အားဖြင့် ရှေ့ရှိ စုချန်ရှောင်းသည် ကမ္ဘာဦးဖရိုဖရဲကိုယ်နှင့် ထိုအဆီအနှစ်များကို ပေါင်းစပ်လိုက်သည်။
တစ်ခဏအတွင်းမှာပင် ကြောက်မက်ဖွယ်ကောင်းသော ရှေးဟောင်းစွမ်းအားများ သူ၏ ကိုယ်ပေါ်မှ ထွက်ပေါ်လာခဲ့သည်။
"ဝုန်း"
ရှေးဟောင်းနတ်ဘုရားတစ်ပါးကဲ့သို့ သန်မာလှသော ခန္ဓာကိုယ်အစွမ်း။
စုချန်ရှောင်း၏ တစ်ကိုယ်လုံးသည် ကျောက်စိမ်းကဲ့သို့ ဖြူစင်တောက်ပလာခဲ့ပြီး ရှေးဟောင်းစွမ်းအားများ တရဟော ပေါက်ကွဲထွက်ပေါ်လာခဲ့သည်။
ထိုအချိန်တွင် သူတော်စင်တစ်ပိုင်း ပထမအဆင့်ရှိသော သူ၏ ကျင့်ကြံမှုအဆင့်သည်လည်း တရဟော တိုးတက်လာခဲ့သည်။
သူတော်စင်တစ်ပိုင်း ဒုတိယအဆင့်၊ တတိယအဆင့်...
သူတော်စင်တစ်ပိုင်း နဝမအဆင့်သို့ ရောက်ရှိမှသာ ရပ်တန့်သွားခဲ့တော့သည်။
နဝမအဆင့်သို့ တိုက်ရိုက် တက်လှမ်းနိုင်ခဲ့ပြီဖြစ်သည်။