အခန်း ၂၀ ကံကြမ္မာအရှင်သခင် ယဲ့ရှောင်နှင့် ရှေးဟောင်းနတ်ဆိုးနတ်ဘုရားခန္ဓာကိုယ်

သူသည် ဂိုဏ်းတစ်ခုလုံး၏ ဂိုဏ်းချုပ်တစ်ဦး ဖြစ်သည်နှင့်အညီ ခဏမျှ အံ့ဩသွားပြီးနောက် အလျင်အမြန်ပင် သတိပြန်ဝင်လာခဲ့ပြီး သိုလှောင်မှုလက်စွပ်ကို လက်နှစ်ဖက်ဖြင့် လေးစားစွာ ပေးအပ်လိုက်သည်။
"နတ်ဘုရားနက်နဲဂိုဏ်းချုပ် ယွမ်ဖုန်းရှောင်းက သခင်လေးစုကို နှုတ်ခွန်းဆက်သပါတယ်"
"ဒီထဲမှာ ကျွန်တော်တို့ နတ်ဘုရားနက်နဲဂိုဏ်းရဲ့ သယံဇာတ ကိုးပုံတစ်ပုံ ရှိနေပါတယ် သခင်လေး သဘောကျနှစ်သက်စွာ လက်ခံပေးပါဦး"
စုချန်ရှောင်းက သူ့ကို အနည်းငယ် အံ့အားသင့်စွာဖြင့် လှမ်းကြည့်လိုက်သည်။
ဒီလူက တကယ်ကို အခြေအနေကို နားလည်တတ်တဲ့သူပဲ။
သူသည် သိုလှောင်မှုလက်စွပ်ကို အသာအယာ လှမ်းယူလိုက်ပြီး စိတ်အာရုံဖြင့် ခဏမျှ စစ်ဆေးလိုက်သည်။
၎င်းအတွင်း၌ အလတ်တန်းစား ဝိညာဉ်ကျောက်တုံး ဆယ်သန်းခန့်နှင့်အတူ အဆင့်မြင့် ဆေးလုံးများနှင့် ဆန်းကြယ်လှသော ကျင့်စဉ်များစွာ ရှိနေခဲ့သည်။
စုစုပေါင်း တန်ဖိုးအရဆိုလျှင် အထက်တန်းစား ဝိညာဉ်ကျောက်တုံး သိန်းဂဏန်းမျှသာ ရှိသည်။
သို့သော်လည်း နတ်ဘုရားနက်နဲဂိုဏ်းသည် အထက်ဘုံတွင် သာမန်ဂိုဏ်းငယ်တစ်ခုမျှသာ ဖြစ်သဖြင့် ယခုကဲ့သို့ သယံဇာတပစ္စည်းများ ရှိနေခြင်းမှာပင် အတော်လေး အဆင်ပြေလှပေသည်။
စုချန်ရှောင်းက ထိုအရာများကို ဂရုမစိုက်ဘဲ ခေါင်းကို ဖြည်းညှင်းစွာ ညိတ်ပြလိုက်သည်။
သခင်လေးစုက သိုလှောင်မှုလက်စွပ်ကို လက်ခံလိုက်သည်ကို မြင်တွေ့ရသောအခါ ဂိုဏ်းချုပ် ယွမ်ဖုန်းရှောင်းသည် နောက်ဆုံးတွင် စိတ်သက်သာရာရသွားပြီး အလျင်အမြန် ပြောလိုက်သည်။
"သခင်လေး ကျွန်တော်တို့နဲ့အတူ လိုက်ပါခဲ့ပါဦး ကျွန်တော် တပည့်တွေကို အခု သိုင်းကွင်းထဲမှာ စောင့်ဆိုင်းနေဖို့ အမိန့်ပေးထားပါတယ်"
ဒါက ပိုပြီး ကောင်းတာပေါ့။ ဒါဆိုရင် ငါ ကံကြမ္မာအရှင်သခင်ကို အလွယ်တကူ ရှာဖွေနိုင်လိမ့်မယ်။
စုချန်ရှောင်းက ခပ်ဖွဖွ ပြုံးလိုက်ရင်း ပြောလိုက်သည်။
"ဒါဆိုရင်လည်း သွားကြတာပေါ့"
...
ယခုအချိန်တွင် နတ်ဘုရားနက်နဲဂိုဏ်း၏ ကျယ်ပြောလှသော သိုင်းကွင်းကြီးအတွင်း၌...
လူအုပ်ကြီး စုဝေးရောက်ရှိနေကြပြီး နတ်ဘုရားနက်နဲဂိုဏ်းမှ အဖွဲ့ဝင် သုံးထောင်ကျော်လုံး ရှိနေခဲ့ကြသည်။
ဝေးလံသော အရပ်ဆီမှ ဂိုဏ်းချုပ်နှင့် အကြီးအကဲများ ခြံရံလျက် စုချန်ရှောင်းသည် မရေမတွက်နိုင်သော ကြယ်ပွင့်များအကြားမှ လမင်းကြီးအလား ဖြည်းညှင်းစွာ လျှောက်လှမ်းလာခဲ့သည်။
မရေမတွက်နိုင်သော အကြည့်များသည် သူတို့ရှိရာသို့ ရောက်ရှိလာခဲ့ကြသည်။
"ဟိုမှာ... ဂိုဏ်းချုပ်နဲ့ အကြီးအကဲတွေပဲ"
"ဒါက... အဘိုးအိုကြီး ပိုင်ယုလား... အဘိုးအိုကြီးတောင် ရောက်နေတာပဲ"
"နေပါဦး... ဟိုလူငယ်လေးက ဒဏ္ဍာရီလာ ဧကရာဇ်မျိုးနွယ်စုက သခင်လေးလား"
"သူက တကယ်ကို ချောမောလှပတဲ့ သခင်လေးပဲ..."
နတ်ဘုရားနက်နဲဂိုဏ်းမှ အမျိုးသမီးတပည့်အများစုသည် စုချန်ရှောင်း၏ အတုမရှိသော ရုပ်ရည်ကို မြင်တွေ့လိုက်ရသဖြင့် ရင်ထဲတွင် လှုပ်ရှားသွားခဲ့ကြရသည်။
တောက်ပလှသော နေမင်းကြီးနှင့် ပိုးစုန်းကြူးလေးများ၏ ခြားနားချက်ကဲ့သို့ပင် ဖြစ်သည်။ အခြားသော အမျိုးသားတပည့်များသည်လည်း စုချန်ရှောင်း၏ ရှေ့တွင် မိမိကိုယ်ကို အားငယ်စိတ်များ ဝင်ရောက်လာခဲ့ကြသည်။
ထိုအချိန်တွင် မကျေနပ်သော အသံတစ်သံ ထွက်ပေါ်လာခဲ့သည်။
ဝတ်ရုံကို ဝတ်ဆင်ထားပြီး ချောမောလှပသော လူငယ်တစ်ဦးက လက်ပိုက်လျက် အေးစက်စွာ နှာခေါင်းရှုံ့လိုက်သည်။
"ဟွန့် ရုပ်ရည်ကောင်းပြီး နောက်ခံအင်အား ရှိနေရုံနဲ့ ဘာဖြစ်လဲ ဘာကများ ဒီလောက်အထိ အထူးအဆန်း ဖြစ်နေလို့လဲ"
ထိုစကားကို ကြားလိုက်ရသဖြင့် ဘေးပတ်ဝန်းကျင်မှ အမျိုးသမီးတပည့်များသည် သူ့ကို မကျေနပ်သော အကြည့်များဖြင့် လှမ်းကြည့်လိုက်ကြသည်။
"ဟား ယဲ့ရှောင် မင်းကတော့ တကယ်ပဲ ရူးသွပ်နေပြီထင်တယ်"
နှာခေါင်းကောက်ကောက်နှင့် မဟုတ်မဟတ်ဟန်ရှိသော လူငယ်တစ်ဦးက လှောင်ပြောင်လိုက်သည်။
"အဲဒီပုဂ္ဂိုလ်က မြင့်မြတ်လှတဲ့ နတ်ဘုရားမျိုးနွယ်စုကပဲ သူက လက်တစ်ချောင်းမျှ မလှုပ်ဘဲ စကားတစ်ခွန်း ပြောလိုက်ရုံနဲ့ ငါတို့ရဲ့ နတ်ဘုရားနက်နဲဂိုဏ်းတစ်ခုလုံးကို ဖျက်ဆီးပစ်နိုင်တယ်"
"မင်းက ဧကရာဇ်မျိုးနွယ်စုက သခင်လေးကို နောက်ကွယ်ကနေ စော်ကားဝံ့သေးတယ်ပေါ့"
ရန်ကျဲသည် တစ်စုံတစ်ခုကို သတိရသွားဟန်ဖြင့် ဆက်လက် လှောင်ပြောင်လိုက်သည်။
"အို ဟုတ်သားပဲ ငါ အခုမှ သတိရတယ်"
"မင်းက အောက်ဘုံက တက်လှမ်းလာတဲ့ ကျင့်ကြံသူတစ်ဦးပဲလေ သခင်လေးရဲ့ ရှေ့မှာ မင်းကိုယ်မင်း အားငယ်ပြီး သိမ်ငယ်စိတ်တွေ ဝင်နေတာ မဟုတ်လား"
ယဲ့ရှောင်သည် နတ်ဘုရားနက်နဲဂိုဏ်းသို့ ရောက်ရှိလာခဲ့ကတည်းက ရန်ကျဲသည် သူနှင့် အမြဲတမ်း ဆန့်ကျင်ဘက် ဖြစ်နေခဲ့သည်။ ထိုသူသည် မိမိ၏ အသည်းကျော် ဂျူနီယာညီမလေးကို လုယူခဲ့ရုံသာမက...
အဆိုးဆုံးမှာ အတွင်းစည်းတပည့်များအကြားတွင် ပထမနေရာကို လုယူသွားခဲ့ခြင်းပင် ဖြစ်သည်။
မိမိ၏ အားနည်းချက်ကို အပြောခံလိုက်ရသဖြင့် ယဲ့ရှောင်၏ မျက်ဝန်းများထဲတွင် ဒေါသတရားများ ဖြတ်ပြေးသွားခဲ့ပြီး အေးစက်စွာ ပြောလိုက်သည်။
"ရန်ကျဲ မင်း နောက်ထပ်တစ်ခွန်း ထပ်ပြောမယ်ဆိုရင် ငါတို့ အခုချင်း သေတိုက်ပွဲ ဆင်နွှဲကြမလား"
ရန်ကျဲသည် သူ၏ အေးစက်လှသော အကြည့်ကြောင့် ချက်ချင်းပင် ငြိမ်သက်သွားခဲ့ပြီး စကားမဆိုဝံ့တော့ပေ။
ယဲ့ရှောင်က ထိုအခြေအနေကို ကြည့်ရင်း လှောင်ပြောင်လိုက်သည်။
အထက်ဘုံက ပါရမီရှင်ဆိုရင်ရော ဘာဖြစ်လဲ။
ငါ ယဲ့ရှောင်ရဲ့ ရှေ့မှာတော့ သူတို့တွေလည်း ဘာမှမဟုတ်ပါဘူး။
ဒါပေမဲ့...
ယဲ့ရှောင်သည် အကြီးအကဲများ ရှိရာဘက်သို့ လှမ်းကြည့်လိုက်သော်လည်း အချိန်အတော်ကြာအောင် ရှာဖွေပြီးနောက် မိမိ၏ ဆရာဖြစ်သူကို ရှာမတွေ့ဘဲ ဖြစ်နေခဲ့သည်။
သူသည် ဇဝေဇဝါဖြစ်သွားပြီး စိတ်ထဲတွင် တွေးလိုက်မိသည်။
ငါ့ရဲ့ဆရာက ဘယ်ရောက်နေတာလဲ။
...
အခြားတစ်ဖက်တွင်...
ဂိုဏ်းချုပ် ယွမ်ဖုန်းရှောင်း၏ ဦးဆောင်မှုအောက်တွင်...
စုချန်ရှောင်းသည် သိုင်းကွင်း၏ အထက်ရှိ ခန်းမဆောင်ငယ်တစ်ခုသို့ လျင်မြန်စွာ ရောက်ရှိလာခဲ့သည်။
"သခင်လေး ကြွပါဦး"
ဂိုဏ်းချုပ် ယွမ်ဖုန်းရှောင်းသည် ဦးစားပေးနေရာကို လေးစားစွာ ဖယ်ပေးလိုက်ပြီး ရေနွေးကြမ်းများ ပြင်ဆင်ပေးရန် ဘေးတွင် ရပ်နေခဲ့သည်။
အဘိုးအိုကြီးနှင့် ဂိုဏ်းချုပ်ပင် ထိုင်နေခြင်း မရှိသောကြောင့် အခြားသော အကြီးအကဲများသည်လည်း မထိုင်ဝံ့ကြဘဲ ဘေးတွင် ရိုသေစွာ ရပ်နေကြရသည်။
စုချန်ရှောင်းက ပြုံးရင်း လက်ဝှေ့ယမ်းပြလိုက်ပြီး အောက်ရှိ လူများ၏ ကန့်သတ်ချက်ပြားများကို ကြည့်ကာ ပြောလိုက်သည်။
"ဂိုဏ်းချုပ်ယွမ် မင်း ဒီလောက်အထိ အားနာနေစရာ မလိုပါဘူး"
"ထိုင်ကြပါဦး"
"ပြီးတော့ မင်းတို့တွေလည်း ထိုင်ကြပါ"
ဂိုဏ်းချုပ် ယွမ်ဖုန်းရှောင်းသည် အလွန်တရာ ဝမ်းသာသွားခဲ့ရသည်။
သူ၏ စိတ်ခံစားချက်မှာ ရိုလာကိုစတာစီးနေရသည့်အလား ခံစားနေရသည်။
စုချန်ရှောင်း ရောက်ရှိလာစဉ်က သူသည် စုချန်ရှောင်း၏ ငယ်စဉ်က ကြောက်မက်ဖွယ်ကောင်းသော ကျော်ကြားမှုများကို ကြားသိခဲ့ရသည်။
ထို့ကြောင့် နတ်ဘုရားနက်နဲဂိုဏ်း ပျက်စီးတော့မည်ဟု သူ ထင်မှတ်ခဲ့သည်။
သို့သော် ယခု လူကိုယ်တိုင် မြင်တွေ့လိုက်ရသောအခါ သခင်လေးစုသည် ကောလာဟလများကဲ့သို့ မဆင်မခြင် ပြုမူတတ်သူ မဟုတ်ကြောင်း သိရှိလိုက်ရသည်။
ဆန့်ကျင်ဘက်အနေဖြင့် သူသည် အလွန်တရာ ယဉ်ကျေးသိမ်မွေ့ပြီး အပြောအဆို ညင်သာလှသည်။
ထိုအခြေအနေသည် သူ့ကို စိတ်သက်သာရာ ရရှိသွားစေခဲ့သည်။
သူသည် အလွန်တရာ ဝမ်းသာမိသကဲ့သို့ ဧကရာဇ်မျိုးနွယ်စုမှ သခင်လေးအပေါ် လေးစားချစ်ခင်စိတ်များ ပိုမို တိုးပွားလာခဲ့ပြီး လေးစားစွာ ဦးညွှတ်လိုက်သည်။
"သခင်လေးစု ကျွန်တော်တို့ ဂိုဏ်းရဲ့ တပည့်တွေအားလုံး ရောက်ရှိနေကြပါပြီ မဟာအကြီးအကဲ တပည့်တွေကို သခင်လေးစုကို နှုတ်ခွန်းဆက်သခိုင်းလိုက်စမ်း"
ဘေးနားရှိ အကြီးအကဲတစ်ဦးက နားလည်စွာ ခေါင်းညိတ်လိုက်ပြီး အောက်ရှိ တပည့်များဘက်သို့ လှည့်ကာ ကျယ်လောင်စွာ အော်ဟစ်လိုက်သည်။
"ဒီနေ့ ဧကရာဇ်မျိုးနွယ်စု စုမိသားစုရဲ့ သခင်လေးက ငါတို့ရဲ့ နတ်ဘုရားနက်နဲဂိုဏ်းဆီကို ကိုယ်တိုင် ကြွရောက်လာခဲ့တာဟာ ငါတို့ ဂိုဏ်းအတွက် အလွန်တရာ ဂုဏ်ယူစရာ ကောင်းလှတယ်"
"နတ်ဘုရားနက်နဲဂိုဏ်းက တပည့်တွေ မင်းတို့တွေ ဘာဖြစ်လို့ သခင်လေးစုကို ဒူးထောက်နှုတ်ခွန်းမဆက်သကြသေးတာလဲ"
ယခုအချိန်တွင် အားလုံး၏ အကြည့်များသည် အထက်တွင် ထိုင်နေသော စုချန်ရှောင်းထံသို့ ရောက်ရှိနေခဲ့ကြသည်။
၎င်းမှာ ရိုသေလေးစားမှု သို့မဟုတ် အားကျနှစ်သက်မှုများကြောင့် ဖြစ်နိုင်သည်။
ထိုပုဂ္ဂိုလ်သည် အဘိုးအိုကြီးကိုယ်တိုင်ပင်လျှင် ဘေးတွင် လေးစားစွာ ရပ်နေရသော အဆင့်အတန်းရှိသူ ဖြစ်သည်။
ထိုမျှ မြင့်မြတ်လှသော နောက်ခံအာဏာနှင့် ချောမောလှပသော ရုပ်ရည်ရှိသူကို မြင်တွေ့ရသောအခါ မည်သူမဆို ရိုသေလေးစားစိတ် ဖြစ်ပေါ်လာမည် ဖြစ်သည်။
မဟာအကြီးအကဲ၏ စကားကို ကြားလိုက်ရသဖြင့် နတ်ဘုရားနက်နဲဂိုဏ်းမှ တပည့်များသည် တစ်ဦးပြီးတစ်ဦး ဒူးထောက်လိုက်ကြသည်။
သူတို့သည် အထက်တွင် ထိုင်နေသော စုချန်ရှောင်းကို ကြည့်ရင်း တညီတညွတ်တည်း အော်ဟစ်လိုက်ကြသည်။
"နတ်ဘုရားနက်နဲဂိုဏ်းရဲ့ တပည့်တွေက သခင်လေးစုကို နှုတ်ခွန်းဆက်သပါတယ်"
"နတ်ဘုရားနက်နဲဂိုဏ်းရဲ့ တပည့်တွေက သခင်လေးစုကို နှုတ်ခွန်းဆက်သပါတယ်"
ထိုအသံများသည် တောင်တန်းကြီးများအနှံ့ ပဲ့တင်ထပ်သွားခဲ့ပြီး လှိုင်းလုံးကြီးများအလား ဆူညံသွားခဲ့သည်။
သို့သော်လည်း ထိုကဲ့သို့ ကြီးကျယ်ခမ်းနားလှသော အချိန်တွင်...
မရေမတွက်နိုင်သော တပည့်များအကြားတွင် ထူးခြားဆန်းပြားစွာ ရပ်နေသော လူတစ်ဦး ရှိနေခဲ့သည်။
ကြက်အုပ်ထဲမှ ဟင်္သာမင်းကဲ့သို့ပင် သူသည် ဒူးထောက်နေကြသော တပည့်များအကြားတွင် သူ၏ ကျောပြင်ကို ဖြောင့်မတ်စွာ ထားရှိရင်း မာနတထောင်ဖြင့် မတ်တတ်ရပ်နေခဲ့သည်။
ထိုမြင်ကွင်းကို အထက်ရှိ အကြီးအကဲများအားလုံး သတိပြုမိလိုက်ကြသည်။
မဟာအကြီးအကဲ၏ မျက်ခုံးများမှာ ချက်ချင်းပင် တွန့်ကွေးသွားခဲ့သည်။ သူသည် တစ်ဆယ့်ခုနစ်ယောက်မြောက် အကြီးအကဲ၏ တပည့်ဖြစ်သော ထိုလူငယ်ကို ကောင်းစွာ သိရှိထားသည်။
သူက နတ်ဘုရားနက်နဲဂိုဏ်း၏ အတော်ဆုံး ပါရမီရှင်တပည့် ဖြစ်သော ယဲ့ရှောင်ပင် ဖြစ်သည်။
ဒါပေမဲ့ အခုက ဘယ်လိုအချိန်လဲ။
အထက်တွင် ထိုင်နေသူမှာ ကောင်းကင်ဘုံတစ်ခုလုံးကို စိုးမိုးထားနိုင်သည့် ဧကရာဇ်မျိုးနွယ်စု စုမိသားစု၏ သခင်လေး ဖြစ်သည်။
သူ၏ အဖေသည် ဧကရာဇ်မျိုးနွယ်စု၏ ခေါင်းဆောင် ဖြစ်ပြီး အစ်မဖြစ်သူနှင့် အစ်ကိုဖြစ်သူတို့မှာလည်း အတုမရှိသော ပါရမီရှင်များ ဖြစ်ကြသည်။ ထို့အပြင် သူတို့၏ နောက်ကွယ်တွင် စုမိသားစုနှင့် ချန်မိသားစုတို့မှ ဧကရာဇ်များစွာ ရှိနေကြသည်။
မင်းက ဒီလိုအချိန်မှာ မင်းရဲ့ မာနတွေကို ပြသနေရမယ့် အချိန်လား။
မဟာအကြီးအကဲသည် ဒေါသတကြီးဖြင့် အော်ဟစ်လိုက်သည်။
"ယဲ့ရှောင် မင်း ဘာလုပ်နေတာလဲ"
"ဒူးထောက်စမ်း"
ထိုအော်ဟစ်သံသည် စုချန်ရှောင်းနှင့် ရေနွေးကြမ်း ပြင်ဆင်ပေးနေသော ဂိုဏ်းချုပ် ယွမ်ဖုန်းရှောင်းတို့ကို သတိပြုမိသွားစေခဲ့သည်။
စုချန်ရှောင်းသည် လှမ်းကြည့်လိုက်သည်။
မောက်မာပြီး အလျှော့မပေးတတ်သော လူငယ်ကို မြင်တွေ့လိုက်ရသောအခါ သူ၏ မျက်နှာပေးမှာ တောက်ပသွားခဲ့ရသည်။
[အမည် - ယဲ့ရှောင်]
[ဘွဲ့အမည် - ကောင်းကင်ဘုံကို ဆန့်ကျင်သော စစ်နတ်ဘုရား၊ ကံကြမ္မာအရှင်သခင်]
[အဆင့်အတန်း - နတ်ဘုရားနက်နဲဂိုဏ်း အကြီးအကဲ၏ တပည့်၊ အတွင်းစည်းတပည့်]
[အသက် - ၂၇ နှစ်၊ စရိုက် - မောက်မာခြင်း၊ အေးစက်ခြင်း၊ အညံ့မခံခြင်း]
[ကျင့်စဉ်အဆင့် - မဟာယနအဆင့် တစ်ဆင့်]
[ခန္ဓာကိုယ်ဖွဲ့စည်းပုံ - ရှေးဟောင်းနတ်ဆိုးနတ်ဘုရားခန္ဓာကိုယ်]
[ကျင့်စဉ်သိုင်းသီအိုရီ - နတ်ဘုရားနက်နဲကျင့်စဉ်၊ သွေးစွမ်းအင်ကျင့်စဉ်...]
[ရတနာ - တောင်မဟာတံဆိပ်တော်...]
[ကံကြမ္မာတန်ဖိုး - ၁၀၀,၀၀၀]