အခန်း ၁ အထက်ကမ္ဘာ နတ်ဘုရားမျိုးနွယ်စု၏ အငယ်ဆုံးသားတော် အောက်ကမ္ဘာတွင် ဘေးဒုက္ခနှင့် ကြုံတွေ့ရခြင်း
ထိုက်ယန်နယ်မြေ။
ခန့်ညားထည်ဝါပြီး ခိုးကိုယ်းဝေဖြာနေသော နန်းဆောင်ကြီးအတွင်း၌ မြူခိုးမြူငွေ့များ ရစ်သိုင်းနေသည်။
နန်းတွင်းဝတ်စုံကို ဝတ်ဆင်ထားပြီး ကျက်သရေရှိလှသော လှပတင့်တယ်သည့် အမျိုးသမီးတစ်ဦးမှာ စိုးရိမ်ပူပန်နေသော မျက်နှာပေးဖြင့် သူမ၏ရှေ့တွင်ရှိသော အမျိုးသားကို လှမ်း၍ ပြောလိုက်သည်။
"အချိန်တွက်ကြည့်ရအောင်"
"ရှောင်းအာကို အောက်ကမ္ဘာကနေ ပြန်ခေါ်ရမယ့်အချိန် ရောက်ပြီမလား"
"ဒီရက်ပိုင်းအတွင်း ကျွန်မ ဘာလို့မှန်းမသိ ရင်ထဲ မအေးမချမ်း ဖြစ်နေတယ်..."
"ရှောင်းအာ အောက်ကမ္ဘာမှာ ဘေးအန္တရာယ်တစ်ခုခုနဲ့ ကြုံတွေ့နေရတာများလား"
သူမ၏ဘေးတွင်ရှိသော အမျိုးသားမှာ နက်မှောင်သော ဆံပင်ရှည်များရှိပြီး ရွှေချည်ထိုးထားသည့် ဝတ်ရုံနက်ကို ဝတ်ဆင်ထားသည်။
သူသည် ကြံ့ခိုင်ချောမောပြီး အရပ်အမောင်း မြင့်မားလှသည်။
သူ၏ သွေးလေလည်ပတ်မှုမှာ အရှိန်ပြင်းလှသော သမုဒ္ဒရာကြီးတစ်ခုကဲ့သို့ ဟုန်းဟုန်းတောက် အော်ဟစ်နေသည်။
သူ့ထံမှ ထွက်ပေါ်နေသော အရှိန်အဝါမှာ အာဏာရှိသူတို့၌သာ ရှိတတ်သည့် စိုးမိုးအုပ်ချုပ်လိုသော ဖိအားများကို ထုတ်လွှတ်နေသည်။
"မိန်းမ..."
"မင်း စိုးရိမ်လွန်နေပြန်ပြီ"
စုဝူသောက်သည် သူလုပ်လက်စ အလုပ်ကို မတတ်သာဘဲ ဘေးသို့ ချထားလိုက်သည်။
ထို့နောက် သူသည် မတ်တတ်ရပ်ကာ ဇနီးဖြစ်သူ၏ ပုခုံးနှစ်ဖက်ကို သာသာယာယာ ဆုပ်ကိုင်လိုက်သည်။
ညင်သာပျော့ပျောင်းသော ထိုအသံကြောင့် ချန်ဝမ်ယွဲ့မှာ စိတ်သက်သာရာ ရသွားသည်။
"စိတ်မပူပါနဲ့ မိန်းမ"
"အောက်ကမ္ဘာမှာ သွားရောက်ကျင့်ကြံတာက ငါတို့ စုမျိုးနွယ်စုရဲ့ မျိုးရိုးစဉ်ဆက် စည်းမျဉ်းပဲလေ"
"သူ့ရဲ့ အစ်ကိုနဲ့ အစ်မတွေလည်း ဒီလိုပဲ ဖြတ်သန်းခဲ့ရတာပဲ"
"ဒါ့အပြင် ရှောင်းအာဆီမှာ အသက်ဘေးက ကာကွယ်ပေးတဲ့ မှော်ရတနာ ရှိသလို သူ့ရဲ့ ဝိညာဉ်ကျောက်ပြားကိုလည်း မျိုးနွယ်စု စခန်းထဲမှာ ထိန်းသိမ်းထားတာပဲ"
"အကယ်၍ တစ်ခုခုဖြစ်ခဲ့ရင် ဂိုဏ်းချုပ်ကြီးက ချက်ချင်း သိမှာပါ"
"ဒီအောက်ကမ္ဘာမှာ ရှောင်းအာကို ရန်ပြုနိုင်တဲ့သူ ဘယ်သူမှ မရှိဘူး"
"မင်း စိတ်အေးအေးထားပါ"
စုဝူသောက်က အထပ်ထပ် အာမခံနေသည်ကို ကြားရသောအခါမှ ချန်ဝမ်ယွဲ့လည်း တဖြည်းဖြည်း စိတ်သက်သာရာ ရသွားသည်။
သူမ၏ ရင်ထဲတွင် သားဖြစ်သူကို လွမ်းဆွတ်တမ်းတစိတ်များ ပြင်းပြနေဆဲဖြစ်သော်လည်း ခင်ပွန်းဖြစ်သူ၏ စေတနာကို နားလည်ပေးနိုင်ပါသည်။
"ကောင်းပါပြီ"
ဇနီးဖြစ်သူ စိတ်အေးသွားသည်ကို မြင်သောအခါ စုဝူသောက်က အသာအယာ ရယ်မောလိုက်သည်။
သူ၏ မျက်ဝန်းများတွင် နူးညံ့မှုများ ပြည့်နှက်နေပြီး သားဖြစ်သူအပေါ် လွမ်းဆွတ်တမ်းတစိတ်များလည်း ခိုအောင်းနေသည်။
"ရှောင်းအာက ငယ်ငယ်ကတည်းက မင်းရဲ့ အလိုလိုက်မှုကို ခံခဲ့ရတာ"
"အခုလို အတွေ့အကြုံ သွားယူတာက သူ့အတွက် ကောင်းပါတယ်"
"ဘာပဲဖြစ်ဖြစ် ဒီလိုမျိုးနွယ်စု စည်းမျဉ်းတွေ နှစ်ပေါင်းများစွာ တည်တံ့နေတာဟာ အကြောင်းရင်း ရှိလို့ပေါ့"
"ဒီကောင်လေး အခုတစ်လော ဘာတွေလုပ်နေလဲ မသိဘူး..."
ဝူမျိုးနွယ်စုဝင်ဖြစ်ပြီး အသက်တစ်ဆယ့်နှစ်နှစ်နှင့် အထက်ရှိသူ မှန်သမျှသည် မှတ်ဉာဏ်များကို ချိတ်ပိတ်ကာ အောက်ကမ္ဘာသို့ ဆင်းသက်ပြီး ကျင့်ကြံရေး အတွေ့အကြုံ ယူရသည့် စည်းမျဉ်း ရှိသည်။
မကြာမီ မိမိ၏ အဖိုးတန် သားလေး ပြန်ရောက်လာတော့မည်ဟု တွေးမိကာ သူမ၏ ရင်ထဲတွင် ပျော်ရွှင်မှုများ ပြည့်လျှံသွားသည်။
စုဝူသောက်လည်း ပြုံးမပြဘဲ မနေနိုင်တော့ပေ။
သူ သံယောဇဉ် တရွှင်ရွှင် ဖြစ်နေစဉ်မှာပင်...
ရုတ်တရက်...
ပြင်ပမှ အလွန် ပျာယာခတ်နေသော အသံတစ်သံ ထွက်ပေါ်လာသည်။
"မျိုးနွယ်စုခေါင်းဆောင်ကြီး... မျိုးနွယ်စုခေါင်းဆောင်ကြီး..."
"မကောင်းတော့ဘူး... ကြီးမားတဲ့ ဘေးဒုက္ခ ဆိုက်ရောက်နေပြီ"
တံခါးမှာ ဝုန်းခနဲ ပွင့်သွားပြီး အသက်ခုနစ်ဆယ်ကျော် အရွယ်ရှိ ဆံပင်ဖြူ အဘိုးအိုတစ်ဦးမှာ အိမ်ထဲသို့ သုတ်သီးသုတ်ပျာ ဝင်ရောက်လာသည်။
ထိုအဘိုးအိုမှာ အလွန် ပျာယာခတ်နေသည့် ပုံစံရှိသည်။
သူသည် တံခါးဝသို့ ရောက်သည်နှင့် တစ်ပြိုင်နက် ဘေးဒုက္ခကြီး ဆိုက်ရောက်နေပြီဟု အော်ဟစ်တော့သည်။
ထိုသူကို မြင်သောအခါ စိတ်ကြည်လင်နေသော စုဝူသောက်က ခပ်ဖွဖွ ပြုံးလိုက်ရင်း ပြောလိုက်သည်။
"ဟားဟား... ပဉ္စမအကြီးအကဲ... ဒီတစ်ခါ ဘာဖြစ်ပြန်တာလဲ"
"စုမျိုးနွယ်စုရဲ့ မျက်စိထဲမှာ ဘယ်လောက်ပဲ ကြီးမားတဲ့ ကိစ္စဖြစ်ဖြစ် ဘာမှ အရေးမကြီးဘူးလို့ ငါ ပြောထားဖူးတယ်မလား"
"မလောပါနဲ့... အရင်ထိုင်ပြီး ရေနွေးကြမ်းလေး သောက်ဦးမှ ပြောပါ"
သို့သော် အကြီးအကဲ၏ မျက်နှာအမူအရာမှာ တစ်မျိုးကြီး ဖြစ်နေသည်။
သူသည် ခေါင်းကို သွက်သွက်ခါ ယမ်းကာ ပျာယာခတ်လျက် ပြောလိုက်သည်။
"မဟုတ်ဘူး... မျိုးနွယ်စုခေါင်းဆောင်ကြီး... ဂိုဏ်းချုပ်ကြီးဆီက အခုတင် သတင်းစကား ပို့လိုက်တာ"
"သခင်လေး ရှောင်းအာရဲ့ ဝိညာဉ်ကျောက်ပြား အက်ကွဲသွားပြီ"
"သူ့ရဲ့ ဝိညာဉ်ချီက အားနည်းနေပြီး အစိတ်စိတ်အမွှာမွှာ ကွဲအံ့ဆဲဆဲ ဖြစ်နေပြီ..."
"သူ သေလုနီးပါး ဖြစ်နေပြီ"
ဝုန်း...
ထိုစကားများ ထွက်ပေါ်လာချိန်တွင်...
မိုးကြိုးအချက်ပေါင်းများစွာ ပစ်ချခံလိုက်ရသကဲ့သို့ပင်။
စုဝူသောက်၏ မျက်နှာပေါ်မှ အပြုံးများမှာ ရုတ်ချည်း တောင့်တင်းသွားသည်။
နောက်တစ်စက္ကန့်တွင်...
ဧကရာဇ်တစ်ပိုင်းအဆင့်၏ ဖိနှိပ်မှု အရှိန်အဝါနှင့်အတူ လွှမ်းမိုးချုပ်ကိုင်လိုသော သတ်ဖြတ်လိုစိတ်များမှာ ဒေါသတကြီး စီးဆင်းလာသည့် ရေလွှမ်းမိုးဘေးပမာ ဝုန်းခနဲ ပေါက်ကွဲထွက်ပေါ်လာသည်။
ထိုဧကရာဇ်ချီမှာ ကောင်းကင်ယံအထိ ပျံတက်သွားသည်။
ဒီထိုက်ယန်နယ်မြေ၏ ကောင်းကင်ယံကြီးပင်လျှင်...
ပြိုကျပျက်စီးတော့မည့်ပုံစံ ဖြစ်နေသည်။
ယခုအချိန်တွင် စုဝူသောက်မှာ ဒေါသထွက်နေသော ခြင်္သေ့တစ်ကောင်နှင့် တူနေသည်။
သူသည် ဒေါသတကြီး အော်ဟစ်လိုက်သည်။
"ခွေးမသားတွေ"
"ငါးပါးမှောက်သွားမယ့် မျိုးနွယ်စု စည်းမျဉ်းတွေ"
"ငါ ဒီအောက်ကမ္ဘာမှာ ကျင့်ကြံရတဲ့ စည်းမျဉ်းကို မနှစ်မြို့တာ ကြာပြီ"
"ငါတို့ ဘိုးဘေးတွေက သူတို့ရဲ့ သားစဉ်မြေးဆက်တွေ ဒုက္ခခံဖို့အတွက် ပင်ပင်ပန်းပန်း ကြိုးစားခဲ့ကြတာလား"
"ငါ့သားကို ပြန်ခေါ်လာပြီးရင် ဒီစည်းမျဉ်းစုတ်ကို စောစောစီးစီး ဖျက်သိမ်းပစ်မယ်"
"မိန်းမ... သွားကြစို့... အခုချက်ချင်း ကျောက်ကမ္ဘာနယ်မြေကို သွားကြမယ်"
...
ကျောက်ကမ္ဘာနယ်မြေ။
ယဲ့မျိုးနွယ်စု၏ ကိုယ်ခံပညာ လေ့ကျင့်ရေးကွင်းပြင်တွင် ချင်းချန်မြို့၏ အဓိက မျိုးနွယ်စုကြီး သုံးခုလုံး စုရုံးရောက်ရှိနေကြသည်။
လူတိုင်းသည် စုချန်ရှောင်း၏ နောက်ဆုံး စီရင်ချက်ကို စောင့်ဆိုင်းနေကြသည်။
ပတ်ဝန်းကျင် လေထုမှာ တင်းမာနေပြီး လေးလံထိုင်းမှိုင်းသော ပျက်စီးခြင်း အငွေ့အသက်များက လေထုထဲတွင် ပျံ့လွင့်နေသည်။
ပလ္လင်ပေါ်တွင် ထိုင်နေသော ယဲ့ဟုန်းထျန်သည် အောက်တွင် ရှိနေသော လူငယ်လေးကို စိုက်ကြည့်လိုက်သည်။
ထိုလူငယ်လေးသည် ခေါင်းကို ငုံ့ထားသည်။
သူ့တစ်ကိုယ်လုံးတွင် သွေးများ စိုရွှဲနေပြီး အဝတ်အစားများမှာလည်း စုတ်ပြတ်သတ်နေသည်။
သံခြေကျင်း၊ လက်ထိပ်များဖြင့် သစ်သားတိုင်တွင် ချည်နှောင်ခံထားရပြီး သူ၏ အသက်စွမ်းအားမှာ ဆယ်ပုံတစ်ပုံခန့်သာ ကျန်ရှိတော့သည်။
သူသည် ယခင်ကကဲ့သို့ ပူပန်မှုကင်းမဲ့ပြီး ချောမောခန့်ညားသော သခင်လေး မဟုတ်တော့ပေ။
ယဲ့ဟုန်းထျန်၏ မျက်ဝန်းများမှာ ရေခဲကဲ့သို့ အေးစက်နေသည်။
သူသည် မေးခွန်းထုတ်လျက် အေးစက်စက် အကြည့်များဖြင့် အော်ဟစ်လိုက်သည်။
"စုချန်ရှောင်း"
"ကောင်းကင်တာအိုကျောင်းတော်ရဲ့ အကြီးအကဲ တပည့်ကို သတ်ပြီး လင်းမျိုးနွယ်စုကို မတရား စွပ်စွဲခဲ့တယ်..."
"သက်သေအထောက်အထားတွေက ခိုင်မာနေပြီ... မင်း မင်းရဲ့ အပြစ်ကို ဝန်ခံမလား"
ထိုအသံမှာ နားစည်များ ကွဲအက်မတတ် ကျယ်လောင်လှသည်။
ပွဲကြည့်စင်တွင် ရှိနေသော အခြားမျိုးနွယ်စုအသီးသီးမှ အကြီးအကဲများပင်လျှင် ယဲ့မျိုးနွယ်စု၏ ရက်စက်ကြမ်းကြုတ်သော နည်းလမ်းများကို မအံ့သြဘဲ မနေနိုင်ကြတော့ပေ။
ယခင်က ချင်းချန်မြို့၏ ပါရမီရှင်တစ်ဦး ဖြစ်ခဲ့သော်လည်း...
ကောင်းကင်တာအိုကျောင်းတော်၏ တပည့်တစ်ဦးကို သတ်မိရုံမျှဖြင့်...
ယခုအခါ ခန္ဓာကိုယ် တည်ဆောက်ပုံ ပျက်စီးသွားပြီး သူ၏ ကျင့်ကြံခြင်း အခြေခံအုတ်မြစ်လည်း လုံးဝ ပျက်စီးသွားခဲ့ရပြီ။
တခြားဘာမှ မဟုတ်ပေ။
ကောင်းကင်တာအိုကျောင်းတော်သည် ကျောက်ကမ္ဘာနယ်မြေ၏ အင်အားအကြီးဆုံး ဂိုဏ်းကြီးလေးခုထဲမှ တစ်ခု ဖြစ်နေသောကြောင့်ပင်။
စုချန်ရှောင်းမှာမူ မည်သည့် နောက်ခံအသိုင်းအဝိုင်းမှ မရှိဘဲ ပါရမီတစ်ခုတည်းသာ ရှိသည့် သာမန်လူတစ်ယောက် ဖြစ်သည်။
လူအများက သက်ပြင်းချနေကြစဉ်မှာပင်...
လူတိုင်း၏ စီရင်ခြင်းကို ခံနေရသော စုချန်ရှောင်းသည် ခေါင်းကို ငုံ့ထားဆဲဖြစ်ပြီး နှုတ်ဆိတ်နေခဲ့သည်။
အား... အရမ်းနာတာပဲ။
ငါ ကမ္ဘာကူးပြောင်းလာတာလား။
ကျယ်ပြန့်လှသော မှတ်ဉာဏ်များမှာ ဒီရေပမာ ဦးနှောက်ထဲသို့ တိုးဝင်လာခဲ့သည်။
စုချန်ရှောင်းသည် လက်ရှိ အခြေအနေကို လျင်မြန်စွာ နားလည်သဘောပေါက်သွားခဲ့သည်။
ဒီကမ္ဘာက ကျင့်ကြံခြင်းကမ္ဘာတစ်ခု ဖြစ်သည်။
သူတို့၏ ကျင့်ကြံခြင်းအဆင့်အတန်းများမှာ အောက်ပါအတိုင်း ဖြစ်သည်။
ခန္ဓာကိုယ်သန့်စင်ခြင်းအဆင့်၊ ချီစုစည်းခြင်းအဆင့်၊ ရွှေအမြုတေ ဖြစ်တည်ခြင်းအဆင့်၊ နတ်ဝိညာဉ်သန္ဓေတည်ခြင်းအဆင့်၊ ဝိညာဉ်အသွင်ပြောင်းလဲခြင်းအဆင့်၊ ဟင်းလင်းပြင်သန့်စင်ခြင်းအဆင့်၊ စစ်မှန်သောနတ်ဘုရားအဆင့်၊မဟာယနအဆင့်(အထွတ်အထိပ်အဆင့်)၊ စစ်မှန်သောနတ်ဘုရားအဆင့်၊ သူတော်စင်အဆင့်၊ သူတော်စင်ဘုရင်အဆင့်၊ ဧကရာဇ်တစ်ပိုင်းအဆင့်၊ မဟာဧကရာဇ်အဆင့်၊ ရှေးဟောင်းဧကရာဇ်အဆင့်........။
ထိုအဆင့်များ၏ အထက်တွင်မူ မသေမျိုးနတ်ဧကရာဇ်အဆင့်ရှိသည်။
မူလခန္ဓာကိုယ်ပိုင်ရှင်သည် ထူးခြားထက်မြက်သည့် ပါရမီရှင်တစ်ဦးဖြစ်ပြီး နတ်ဘုရားနှင့် မိစ္ဆာခန္ဓာကိုယ်အပြင် ရှားပါးလှသော နတ်ဘုရားအရိုးကို ပိုင်ဆိုင်ထားသည်။
သူသည် ချင်းချန်မြို့၏ အငယ်ဆုံးသော ဝိညာဉ်အသွင်းပြောင်းလဲခြင်းအဆင့် ပါရမီရှင်လည်း ဖြစ်သည်။
သို့သော် ထိုကဲ့သို့ ထူးချွန်ထက်မြက်သော ပါရမီရှင်တစ်ဦး ဖြစ်သော်လည်း...
သူသည် လင်းမျိုးနွယ်စုမှ လင်းချင်းရန်ကို ချစ်မိသွားခဲ့သည်။
လင်းချင်းရန်သည် အင်အားကြီးမားသော ဂိုဏ်းကြီးလေးခုထဲမှ တစ်ခုသို့ ဝင်ရောက်ရန် အလွန် ဆန္ဒပြင်းပြနေခဲ့သည်။
သူမ၏ အလိုကို ဖြည့်ဆည်းပေးရန်အတွက်...
စုချန်ရှောင်းသည် သူ၏ အကြီးမားဆုံးသော လျှို့ဝှက်ချက်ကို ထုတ်ဖော်ရန် ဝန်မလေးခဲ့ပေ။
သူသည် မိမိ၏ နတ်ဘုရားနှင့် မိစ္ဆာ အနှစ်သာရကို သုံး၍ သူမအား အရိုးနှင့် သွေးသန့်စင်ခြင်းအဆင့်သို့ ရောက်အောင် ကူညီပျိုးထောင်ပေးခဲ့သည်။
ထို့နောက်တွင်လည်း ကောင်းကင်နှင့် မြေကြီး၏ အဖိုးတန် ရတနာမျိုးစုံကို ရှာဖွေပေးရန်အတွက် သူ၏ စွမ်းအင်အားလုံးကို ပုံအောခဲ့သည်။
ထို့ကြောင့်သာ သာမန်ပါရမီသာရှိသော သူမသည် အခြေခံအုတ်မြစ်တည်ဆောက်ခြင်းသို့ ရောက်ရှိနိုင်ခဲ့ခြင်း ဖြစ်သည်။
အသက်တစ်ဆယ့်ခြောက်နှစ်အရွယ်တွင် ရွှေအမြုတေအဆင့်သို့ ရောက်ရှိနေခဲ့သည်။
ဂိုဏ်းကြီးလေးခုသို့ ဝင်ရောက်ရန်အတွက် လုံလောက်သည်ထက် ပိုနေခဲ့ပြီ။
သူသည် ထိုကဲ့သို့ ပြုမူခြင်းဖြင့် တစ်ဖက်လူက မိမိကို ချစ်လာလိမ့်မည်ဟု ထင်မှတ်ခဲ့သည်။
သို့သော် နောက်ဆုံးရလဒ်မှာမူ ထိုမိန်းမသည် ကောင်းကင်တာအိုကျောင်းတော်မှ ဖန့်ယွမ်ချိုင်နှင့် ပူးပေါင်းကာ သူ့ကို မတရား စွပ်စွဲခဲ့ကြခြင်းပင်။
ထိုနှစ်ယောက်လုံးတွင် ကိုယ်စီမရိုးသားသော ရည်ရွယ်ချက်များ ရှိကြပြီး ၎င်းက ယခုကဲ့သို့ အခြေအနေဆိုးကြီးသို့ ရောက်ရှိစေခဲ့သည်။
မိမိရှေ့တွင် ဖြစ်ပျက်ခဲ့သမျှကို သိရှိသွားပြီးနောက်...
စုချန်ရှောင်း၏ ကျောရိုးထဲအထိ အေးစက်သွားခဲ့သည်။
သူသည် စိတ်ထဲမှ တိုးတိုးလေး ဆဲရေးလိုက်သည်။
ငါးပါးတော့မှောက်ပြီ။
အချစ်အတွက် အသုံးချခံရတဲ့ ငတုံးကြီးပဲ။
ဒီဂိမ်းက ငရဲအဆင့် ခက်ခဲမှုနဲ့ စနေတာပဲ။
ဒါကို ငါ ဘယ်လို ဆက်ကစားရမှာလဲ။
သူသည် ခန္ဓာကိုယ်အတွင်းမှ ပြင်းထန်လှသော နာကျင်မှုကို အံကြိတ်ခံအောင့်လိုက်သည်။
စုချန်ရှောင်းသည် မလှမ်းမကမ်းတွင် ရှိနေသော လင်းမျိုးနွယ်စုဝင်များဘက်မှ ဖောက်ပြန်နေသော စုံတွဲကို လှမ်းကြည့်လိုက်သည်။
ထို့နောက် အေးစက်စက်နှင့် တမင်တကာ ဖိပြောလိုက်သည်။
"လင်းချင်းရန်... ငါ မင်းအပေါ်ကို တကယ့် စိတ်ရင်းမှန်နဲ့ ဆက်ဆံခဲ့တာ"
"ငါသာ မရှိခဲ့ရင် မင်း ဘယ်လိုလုပ် ရွှေအမြုတေအဆင့်ကို ရောက်နိုင်ပါ့မလဲ"
"မင်း သူတပါးရဲ့ ချီးမွမ်းသံတွေကို ခံယူနေရတဲ့အချိန်မှာ မင်း တကယ်ပဲ စိတ်အေးလက်အေး ရှိနေနိုင်ပါ့မလား"
ထိုနေရာတွင်...
အဖြူရောင် ဝတ်စုံကို ဝတ်ဆင်ထားပြီး လှပကာ အေးစက်သော မျက်နှာရှိသည့် အမျိုးသမီးတစ်ဦး ရှိနေသည်။
သူမသည် လောကီရေးရာများနှင့် ကင်းကွာနေသည့်အလား သူမ၏ ရှေ့မှ အရာအားလုံးကို အေးစက်စက် စောင့်ကြည့်နေခဲ့သည်။
ထိုအမျိုးသမီးသည် နို့နှစ်ရောင်ကဲ့သို့ ချောမွတ်သော အသားအရေရှိပြီး သွယ်လျသော ခါးနှင့် ပြည့်တင်းလှသော ရင်သားအစုံကို ပိုင်ဆိုင်ထားသည်။
သူမကား ချင်းချန်မြို့ လင်းမျိုးနွယ်စုမှ လင်းချင်းရန်ပင် ဖြစ်သည်။