အခန်း (၁၁၁) လောင်းကစားပွဲနောက်က လျှို့ဝှက်ချက်

“ဟမ့်” ဒေါင်ဖန်းပုပိုင် စွမ်းအင်ကို ရုပ်သိမ်းကာ လက်နောက်ပစ်ရပ်လိုက်ပြီး အဝေးမှ နေထွက်လာသည်ကို တည်ငြိမ်စွာ ကြည့်ရင်း ပြောလိုက်သည်၊ "ငါ ယောကျ်ားလား မိန်းမလားဆိုတာ စုန့်သခင်နဲ့ ဘာဆိုင်လို့လဲ?"

စုန့်ချင်းရှုသည် ဒေါင်ဖန်းပုပိုင်ကို ရူးကြောင်ကြောင် လိင်ပြောင်းလူသားတစ်ဦးဟု အမြဲ ထင်ခဲ့ဖူးသည်။ ဤသို့သော ယောကျ်ားမပီ၊ မိန်းမမပီသော လူတစ်ယောက် သေဆုံးသွားလျှင် ပတ်ဝန်းကျင်အတွက် သန့်ရှင်းပေးရာ ရောက်သည်ဟု ထင်ခဲ့သည်။ ထို့ကြောင့် ဟွာရှန်းတောင်ပေါ်တွင် သူသည် ဒေါင်ဖန်းပုပိုင်၏ သိုင်းပညာနှင့် တိုက်ခိုက်မှုပုံစံများကို ဖုန်းချင်းယန်အား အသေးစိတ် ရှင်းပြခဲ့သည်။

ဤပြောဆိုမှုကို အထင်မသေးပါနှင့်။ ဤအဆင့်ရှိ သိုင်းပညာရှင်များအတွက် ဖုန်းချင်းယန်သည် စုန့်ချင်းရှု၏ စကားများမှ လုံလောက်သော သတင်းအချက်အလက်များကို ရရှိခဲ့ပြီး ကိုယ့်ရန်သူအကြောင်း ကောင်းကောင်းသိနိုင်ခဲ့သည်။ ဆန့်ကျင်ဘက်အားဖြင့် ဒေါင်ဖန်းပုပိုင်သည် ဖုန်းချင်းယန်၏ သိုင်းပညာအကြောင်း ဘာမှ မသိဘဲ သိုင်းလောကမှ ကောလာဟလအချို့ကိုသာ အခြေခံ၍ ခန့်မှန်းခဲ့သည်။ တကယ်တိုက်ခိုက်ရသောအခါ အကြီးအကျယ် ရှုံးနိမ့်ဖွယ်ရှိသည်။

ဒေါင်ဖန်းပုပိုင်သည် အမျိုးသမီးတစ်ဦး ဖြစ်နိုင်ကြောင်း သိရှိရသောအခါ စုန့်ချင်းရှု၏ ရပ်တည်ချက် ချက်ချင်း ယိမ်းယိုင်သွားသည်။ ဘာကြောင့်မှန်းမသိ၊ သူသည် အမျိုးသမီးဒေါင်ဖန်းပုပိုင်အား မည်သည့် ကံဆိုးမှုမှ မဖြစ်စေလိုခဲ့ပေ။ ယခင်ဘဝက ရုပ်ရှင်နှင့် ရုပ်သံဇာတ်လမ်းတွဲများ၏ လွှမ်းမိုးမှုကြောင့် ဖြစ်နိုင်သည်၊ သို့မဟုတ် သူ၏ အလှအပကို မြတ်နိုးတတ်သော မွေးရာပါ အကျင့်ဆိုး ပြန်ပေါ်လာခြင်း ဖြစ်နိုင်သည်၊ သို့မဟုတ် ထိုညက လက်ထဲတွင် နူးညံ့သော ခံစားမှုက သူ့ကို စွဲလမ်းစေခြင်း ဖြစ်နိုင်သည်...

စုန့်ချင်းရှုက ဒေါင်ဖန်းပုပိုင်ကို ဒါတွေ ပြောရဲမှာ မဟုတ်ပါဘူး။ သူက ပြန်ဖြေလိုက်သည်၊ "ဂိုဏ်းချုပ်က ယောက်ျားဆိုရင် စုန့်က လှည့်ထွက်သွားပါမယ်။ ခေါင်းဆောင်ရဲ့ လေ့ကျင့်မှုကို ဆက်ပြီး အနှောင့်အယှက် မပေးရဲပါဘူး။ ဂိုဏ်းချုပ်က အမျိုးသမီးဆိုရင် စုန့် ပြောစရာ စကားတစ်ခွန်း ရှိပါတယ်။ လပြည့်ညတိုက်ပွဲရဲ့ အောင်မြင်မှုနဲ့ ကျရှုံးမှုနဲ့ ပတ်သက်ပါတယ်”"

စုန့်ချင်းရှုသည် အကယ်၍ ထိုသူသည် ယောက်ျား သို့မဟုတ် လိင်ပြောင်းလူသားတစ်ဦးဆိုလျှင် ကမ္ဘာကြီးကို မထီမဲ့မြင် ကြည့်တဲ့ သူ့၏ စိတ်နေစိတ်ထားအရ မိမိ၏စကားတစ်ခွန်းကို နားထောင်ဖို့ လိမ်ညာမှာ မဟုတ်ဘူးလို့ သေချာ သိနေသည်။

"မင်း ပြောပြပါဦး" ဒေါင်ဖန်းပုပိုင်သည် ဝန်ခံခြင်းလည်း မရှိ၊ ငြင်းဆိုခြင်းလည်း မရှိဘဲ ယောကျ်ားလား မိန်းမလား ခွဲခြားရခက်သော သူမ၏လှပသောမျက်နှာတွင် မည်သည့် စိတ်ခံစားမှုမျှ မပြဘဲ ပြောလိုက်သည်။

စုန့်ချင်းရှု စိတ်ထဲတွင် အလွန် ဝမ်းသာနေသည်။ ဒေါင်ဖန်းပုပိုင်သည်လည်း လပြည့်ညတိုက်ပွဲအတွက် ယုံကြည်မှု အပြည့်အဝ မရှိပုံရသည်။ မဟုတ်ပါက သူ့လိင်ကို အခုလိုလွယ်လွယ်လှည့်စားပြီးမေး၍ မရနိုင်ပေ။

စိတ်ကို ပြန်လည် စုစည်းပြီး စုန့်ချင်းရှုက " ဖုန်းချင်းယန် ရဲ့ နာမည်ကျော် သိုင်းပညာက တုကူးဓားကိုးကွက် ဖြစ်ပေမဲ့ အခု သူ့ရဲ့ တိုက်ခိုက်မှုတွေမှာ တုကူးဓားကိုးကွက် ရဲ့ လှုပ်ရှားမှု တစ်ခုမှ မရှိတော့ဘူး... ဒေါင်ဖန်းမိန်းကလေး၊ စုန့် ပြောစရာရှိတာ ပြောပြီးပါပြီ၊ ခွင့်ပြုပါဦး"

စုန့်ချင်းရှု ထွက်ခွာသွားသည်ကို ကြည့်ရင်း ဒေါင်ဖန်းပုပိုင်၏ မျက်နှာသည် ရာသီဥတုကဲ့သို့ ပြောင်းလဲနေပြီး ကောင်းကင်ကို မော့ကြည့်ကာ အတွေးများဖြင့် "သိုင်းကွက်မရှိခြင်းက သိုင်းကွက်ရှိခြင်းကို ကျော်လွန်သွားတာလား" ဟု ညည်းတွားလိုက်သည်။

စုန့်ချင်းရှုသည် သူ၏လုပ်ရပ်က ဖုန်းချင်းယန်ကို ထိခိုက်စေသည်ဟု မထင်ပေ။ ဤအဆင့်ရှိ သိုင်းပညာရှင်များအတွက် တရားမျှတစွာ တိုက်ခိုက်သင့်သည်။ သူသည် လူနှစ်ဦးကို အစမှတ်သို့ ပြန်ရောက်စေခဲ့ခြင်းသာ ဖြစ်သည်။

စုန့်ချင်းရှု ရက်အနည်းငယ်ကြာအောင် သစ်ပင်ပေါ်တွင် လေဒဏ်၊ နေဒဏ် ခံပြီးနောက် နောက်ဆုံးတော့ လပြည့်ညသို့ ရောက်လာသည်။ နန်းတွင်းကိုယ်ရံတော်အဖြစ် အသွင်ပြောင်းထားသော မိန်းကလေးနှစ်ဦးကို ကြည့်ရင်း မှာကြားလိုက်သည်၊ "မင်းတို့က အရမ်းချောမောပြီး ထင်ရှားနေတယ်။ ငါ့နောက်ကနေ လိုက်ပြီး စကားမပြောမိအောင် ကြိုးစားပါ။ မဟုတ်ရင် တခြားလူတွေက မင်းတို့ရဲ့ အသံကို ကြားရင် သံသယဝင်ဖို့ လွယ်တယ်။"

ရှချင်းချင်း စိတ်ထဲတွင် စိုးရိမ်ပူပန်မှုများ ပြည့်နှက်နေသဖြင့် ပေါ့ပေါ့ပါးပါး ခေါင်းညိတ်လိုက်သည်။ လီယွမ်ကျစ်ကတော့ စိတ်လှုပ်ရှားမှုကို အတင်းအကျပ် ထိန်းချုပ်ကာ ခေါင်းကို တဆတ်ဆတ် ညိတ်လိုက်သည်။

လီယွမ်ကျစ်၏ မျက်လုံးများတွင် ပျော်ရွှင်မှုများ ပေါ်နေသည်ကို သတိပြုမိပြီး ရှချင်းချင်း၏ စိုးရိမ်ပူပန်နေသော ပုံစံနှင့် နှိုင်းယှဉ်လိုက်သောအခါ စုန့်ချင်းရှု စိတ်ထဲတွင် ညည်းတွားလိုက်သည်၊ "တကယ်ကို ပူပင်ရကောင်းမှန်းမသိတဲ့ မိန်းကလေးပဲ..."

ဤရက်အနည်းငယ်အတွင်း ဒိုလုံနှင့် စုန့်ချင်းရှုတို့ အလွန်အလုပ်များခဲ့ကြသည်။ ယနေ့သည် တိုက်ပွဲနေ့ဖြစ်သဖြင့် နှစ်ဦးသားသည် နန်းတော်တံခါးအသီးသီးတွင် စစ်သည်အင်အား အများအပြား ချထားပြီး ပုံမှန်ထက် အကြိမ်များစွာ ပို၍ လှည့်ကင်းလှည့်စေခဲ့သည်။

"စုန့်ညီလေး!" အဝေးမှ ဒိုလုံသည် စုန့်ချင်းရှုကို မြင်လိုက်သောအခါ မျက်လုံးများ တောက်ပသွားပြီး ချက်ချင်း သူ့ကို ဘေးသို့ ဆွဲခေါ်ကာ ပတ်ဝန်းကျင်ကို လျှို့ဝှက်စွာ ကြည့်လိုက်ပြီး အသံကို နှိမ့်ကာ မေးလိုက်သည်၊ "မင်း ဒီည တိုက်ပွဲမှာ ဘယ်သူ အနိုင်ရနိုင်ခြေ ပိုများမယ်လို့ ထင်လဲ?"

စုန့်ချင်းရှု အံ့အားသင့်စွာ သူ့ကို ကြည့်လိုက်သည်၊ "နှစ်ဦးစလုံးက ထိပ်တန်းသိုင်းပညာရှင်တွေပဲ။ မတိုက်ခိုက်ခင် ဘယ်သူမှ ခန့်မှန်းနိုင်မှာ မဟုတ်ဘူး”

ဒိုလုံ ရယ်ကာ ပြောလိုက်သည်၊ "စုန့်ညီလေး၊ ကိုယ့်လူတွေ အချင်းချင်းမို့ မင်းကို ချမ်းသာမယ့် နည်းလမ်းတစ်ခု ပြောပြမယ်။"

စုန့်ချင်းရှု စိတ်ထဲတွင် တစ်ချက် လှုပ်ရှားသွားပြီး ချက်ချင်း မေးလိုက်သည်"ဒိုအစ်ကိုကြီး ညွှန်ပြပေးပါဦး။"

ဒိုလုံ ပတ်ဝန်းကျင်ကို ထပ်မံ ကြည့်လိုက်ပြီး ဘယ်သူမှ ခိုးနားထောင်နေခြင်း မရှိကြောင်း သေချာမှ ပြောလိုက်သည်၊ "ဒေါင်ဖန်းဂိုဏ်းချုပ်ကို ချင်မင်းဆက်ရဲ့ ထိပ်တန်းသိုင်းပညာရှင်အဖြစ် အသိအမှတ်ပြုထားပေမယ့် ကျွန်တော်တို့ ချင်မင်းဆက်နိုင်ငံထဲမှာ သိုင်းပညာက တော်တော်လေး ဆုတ်ယုတ်နေတယ်။ တခြားနိုင်ငံတွေက သိုင်းလောကသားတွေက ဒေါင်ဖန်းဂိုဏ်းချုပ်က နာမည်နဲ့ မလိုက်ဖက်ဘူးလို့ အထင်သေးနေလိမ့်မယ်။"

"ဖုန်းချင်းယန်ကတော့ မတူဘူး။ သူက အရင်ကတည်းက နာမည်ကြီးခဲ့တာ။ ဆယ်စုနှစ်များစွာကတည်းက သိုင်းပညာ ထွန်းကားခဲ့တဲ့ ကျုံးယွမ်(အလယ်ပိုင်းဒေသ)ဒေသမှာ သူက ဒဏ္ဍာရီတစ်ပုဒ်ဖြစ်ခဲ့တယ်။ ဒါကြောင့် သိုင်းလောကမှာ လူအများအပြားက ဖုန်းချင်းယန် အနိုင်ရမယ်လို့ ထင်ကြတယ်။"

"မြို့တော်က လောင်းကစားဒိုင်တွေက အခွင့်အရေးကို စောစောစီးစီး သိမြင်ပြီး နှစ်ဦးအတွက် လောင်းကစားပွဲ ဖွင့်ထားပြီးပြီ။ ဖုန်းချင်းယန် အနိုင်ရရင် တစ်ဆ နှစ်ဆ၊ ဒေါင်ဖန်းဂိုဏ်းချုပ် အနိုင်ရရင် တစ်ဆ သုံးဆ။ မနက်မိုးမလင်းခင် အနိုင်အရှုံးမပေါ်ရင် သရေကျတယ်လို့ သတ်မှတ်ပြီး သရေကျဖို့လောင်းတဲ့သူကိုလည်း တစ်ဆ သုံးဆ ပေးမယ်။"

"အိုး?" စုန့်ချင်းရှု မျက်ခုံးတစ်ချက် လှုပ်သွားသည်။ ရှေးခေတ်က လောင်းကစားလုပ်ငန်းက ဒီလောက် တိုးတက်နေလိမ့်မယ်လို့ မထင်ခဲ့ပေ။ ချက်ချင်း မေးလိုက်သည်၊ "ဒါဆို ဒိုအစ်ကိုကြီး ဘယ်ဘက်ကို လောင်းထားလဲ?"

"ဟဲဟဲ" ဒိုလုံ ထူးဆန်းစွာ ပြုံးလိုက်သည်၊ "စုန့်ညီလေး၊ ဒါက ငါပြောချင်တဲ့ ချမ်းသာမယ့် အခွင့်အရေးပဲ။"

"ဘာကိုဆိုလိုတာလဲ?" စုန့်ချင်းရှု သူ့ကို သံသယဖြင့် ကြည့်လိုက်သည်။

"တခြားနိုင်ငံကလူတွေကတော့ ဖုန်းချင်းယန်ကို နိုင်မယ်ပိုပြီး ယုံကြည်ကြတာ သဘာဝပဲ။ လူအများစုက သံသယရှိရင်တောင် သရေကျမယ်လို့ပဲကြိုတင်ခန့်မှန်းထားကြလိမ့်မယ်။ ဒေါင်ဖန်းဂိုဏ်းချုပ်ကိုတော့ လူအများစုက သိပ်မယုံကြဘူး။ ငါတို့ကသာ ဒေါင်ဖန်းဂိုဏ်းချုပ်နိုင်မယ်လို့ ပိုက်ဆံအများကြီး လောင်းလိုက်ရင် အကြီးအကျယ် မချမ်းသာနိုင်ဘူးလား?" ဒိုလုံ ပြောလေလေ စိတ်လှုပ်ရှားလာလေဖြစ်ပြီး အသက်ရှုသံများပင် မြန်ဆန်လာသည်။

စုန့်ချင်းရှု နားထောင်ရင်း မျက်မှောင်ကြုတ်လိုက်သည်၊ "အစ်ကိုကြီးက ဒေါင်ဖန်းဂိုဏ်းချုပ် အနိုင်ရမယ်လို့ ဒီလောက်တောင် သေချာနေတာလား?"

"ဒါက အဓိက အချက်ပဲ!" ဒိုလုံ စိတ်လှုပ်ရှားစွာ ပြောလိုက်သည် “အရှင်မင်းကြီးက ဒီနေ့ ငါကို အထူး အမိန့်ပေးစေလွှတ်လိုက်တဲ့တာဝန်က မင်းက ဒေါင်ဖန်းဂိုဏ်းချုပ်ကိုလျှို့ဝှက်ကူညီဖို့အတွက်ပဲ”

စုန့်ချင်းရှု ခဏတာ အံ့အားသင့်သွားပြီးမှ သတိဝင်လာသည်.....

ဒေါင်ဖန်းပုပိုင်သည် ယခု ခန်းရှီ၏ လက်အောက်ခံ ထိပ်တန်းသိုင်းပညာရှင်ဖြစ်သည်။ ခန်းရှီသည် သူ့ကို ဘာမှ ထိခိုက်စေလိုမည်မဟုတ်သောကြောင့် ဒေါင်ဖန်းပုပိုင် အနိုင်ရဖို့အတွက် မည်သည့်နည်းလမ်းကိုမဆို သုံး၍ ကူညီခြင်းသည် ပုံမှန်ပင်။

သို့သော် စုန့်ချင်းရှုအနေဖြင့် ဒီကိစ္စတွင် ပါဝင်ပတ်သက်လိုခြင်းမရှိပေ။ အဝေးမှ ရှချင်းချင်းကို ကြည့်လိုက်ပြီး စုန့်ချင်းရှုသည် ဒိုလုံကို ခါးသက်စွာ ပြုံးပြလိုက်သည် " ဖုန်းချင်းယန် နဲ့ ဒေါင်ဖန်းဂိုဏ်းချုပ် ရဲ့ သိုင်းပညာနဲ့ဆို ကျွန်တော် ဘယ်ကနေ ဝင်ပါနိုင်မှာလဲ‌။ ဒါ့အပြင် ကျွန်တော် ဝင်ပါရင်တောင် နန်းတော်အပြင်ဘက်က သိုင်းလောကသား အများကြီးက အမြင့်က ကြည့်နေကြတာ၊ အဲဒီ လောင်းကစားပွဲက ဘယ်လိုလုပ် အကျုံးဝင်မှာလဲ"

ဒိုလုံ ခဏတာ တွေဝေပြီး စုန့်ချင်းရှုကို ကြည့်ကာ ပြောလိုက်သည် "စုန့်ညီလေး၊ မင်းက ကိုယ့်လူမို့လို့ ပြောတာ။ အရှင်မင်းကြီးရဲ့ နှုတ်မိန့်ကျပြီးသား။ မင်းက အမိန့်ကို မနာခံဘဲ နောက်ဆုံးမှာ ပြိုင်ပွဲရလဒ်က အရှင်မင်းကြီး မြင်ချင်တဲ့အတိုင်း မဟုတ်ရင် မင်းကြီး ဒေါသထွက်တဲ့အခါ ဝေသခင်ကြီးတောင် မင်းကို ကယ်နိုင်မှာ မဟုတ်ဘူး။"

စုန့်ချင်းရှု မျက်နှာမကောင်းသည်ကို မြင်သောအခါ ဒိုလုံက ဆက်ပြောသည် "ပြီးတော့ အခုဆိုရင် မင်းညီမင်းသားနဲ့ မှူးမတ်အတော်များများက ဒီသတင်းကို သိနေကြပြီ။ ပိုက်ဆံအများကြီး လောင်းထားကြတယ်။ နောက်ဆုံး ဒေါင်ဖန်းဂိုဏ်းချုပ် ရှုံးသွားပြီး သူတို့ ရင်းနှီးထားတာတွေ အကုန်ရှုံးရင်... အရှင်မင်းကြီးက သဘောထားကြီးလို့ စုန့်ညီလေးကို အပြစ်မတင်ဘူးဆိုရင်တောင် မင်းက နန်းတွင်းမှာ ဆက်ရပ်တည်နိုင်တော့မှာ မဟုတ်ဘူး... လူတွေကိုလှည့်စားဖို့ ကိစ္စကတော့ စုန့်ညီလေးလို သိုင်းပညာမြင့်တဲ့သူအတွက် မခက်ခဲလောက်ပါဘူး။"

"ကောင်းပြီ၊ စုန့် အစွမ်းကုန် ကြိုးစားပါ့မယ်။" စုန့်ချင်းရှု မျက်နှာတည်တည်ဖြင့် လှည့်ထွက်သွားသည်။

"စုန့်ညီလေး စိတ်ချပါ။ ဒေါင်ဖန်းဂိုဏ်းချုပ် အနိုင်ရတာနဲ့ ငါတို့အားလုံး မင်းအတွက် ကျေးဇူးတင်လက်ဆောင်တွေ လာပေးမှာ" နောက်မှ ပြောလိုက်သည့် အသံကို ကြားသောအခါ စုန့်ချင်းရှု ခါးသက်စွာ ပြုံးလိုက်ပြီး သိပြီဖြစ်ကြောင်း လက်တစ်ချက် ဝှေ့ယမ်းပြလိုက်သည်။

"ဒိုလုံက ဘာပြောတာလဲ?" သူ ပြန်လာသည်ကို မြင်သောအခါ ရှချင်းချင်း သံသယဖြင့် မေးလိုက်သည်။

"ဘာမှမဟုတ်ပါဘူး။ ဒီည တားမြစ်နန်းတော် လုံခြုံရေးကိစ္စတွေပါပဲ" စုန့်ချင်းရှုက သူမကို အမှန်အတိုင်း ပြောရဲမည်မဟုတ်ပေ။ ပါးစပ်ကိုဖြဲ၍ ငိုတာထက် ဆိုးတဲ့ အပြုံးတစ်ခုဖြင့် ပြန်ပြုံးပြလိုက်သည်၊ "ငါတို့ တခြားနေရာတွေကို အရင် လှည့်ကင်းလှည့်ကြတာပေါ့။"

"ဒီနေ့ နာမည်ကြီး သိုင်းပညာရှင်ကြီးနှစ်ဦးရဲ့ ထိပ်တိုက်ရင်ဆိုင်မှုကို နီးနီးကပ်ကပ် ကြည့်ရမယ်လို့ မထင်ထားဘူး။ ဆရာ့ဆီ ပြန်ပြောပြရင် ဆရာ ရူးသွားမလားပဲ" လူသုံးဦးထဲမှာ လီယွမ်ကျစ်ကတော့ ဒီညရဲ့ တိုက်ပွဲကို အလွန် စိတ်လှုပ်ရှားစွာ ကြည့်ရှုမည့် ပရိသတ်တစ်ဦးလိုပင်။

"စုန့်အစ်ကို၊ မင်း သူတို့နှစ်ယောက်နဲ့ တိုက်ခိုက်ဖူးတယ်။ ဆရာဘိုးလေးဖုန်း ဒီည အနိုင်ရနိုင်လား?" ရှချင်းချင်း စိတ်ပူပန်သော မျက်နှာဖြင့် စုန့်ချင်းရှုကို ဆွဲကာ တိတ်တိတ်လေး မေးလိုက်သည်။

"သူတော်စင်ဖုန်းရဲ့ သိုင်းပညာအဆင့်က ပိုမြင့်တယ်၊ ဒေါင်ဖန်းပုပိုင်က ပိုမြန်တယ်၊ နှစ်ယောက်စလုံးမှာ အားသာချက်၊ အားနည်းချက်တွေ ကိုယ်စီရှိပြီး မတိမ်းမယိမ်းပဲ။ မျှမျှတတ တိုက်ခိုက်မယ်ဆိုရင် သူတို့နိုင်နိုင်ခြေက ငါးဆယ်-ငါးဆယ်ပဲ။ ဒါပေမဲ့ ငါတို့  ဟွာရှန်းကို သွားတုန်းက ဖုန်းအဘိုးကြီးက ငါ့ဆီကနေ ဒေါင်ဖန်းပုပိုင်ရဲ့ အချက်အလက်အချို့ကို သိထားပြီးသားဆိုတော့ သူ့ရဲ့ နိုင်နိုင်ခြေက ပိုများတယ်လို့ ပြောရမှာပေါ့..."

စုန့်ချင်းရှုက သူမကို လိမ်ညာလိုက်သည်။ စိတ်ထဲတွင်တော့ သူကိုယ်တိုင် ဒေါင်ဖန်းပုပိုင်ကို လျှို့ဝှက်သတင်းပေးခဲ့တာ ထားလိုက်ပါတော့၊ ဒီည ဘယ်လိုမှ ဒေါင်ဖန်းပုပိုင်ကို ထပ်ပြီး ကူညီလို့မရဘူး။ မဟုတ်ရင် ချင်းချင်းက သူ့ကို ဘယ်လို ခွင့်လွှတ်နိုင်မှာလဲဟု တွေးနေသည်။

ဒါပေမဲ့ တိုက်ရိုက် အမိန့်မနာခံလို့လည်း မရဘူး။ တကယ် ခေါင်းကိုက်တယ်။ စုန့်ချင်းရှု စိတ်ရှုပ်စွာ ခေါင်းခါလိုက်သည်။

လူသုံးဦး အမှတ်မထင် ချန်ဖိုင်ချူ လေ့ကျင့်ရာနေရာသို့ ရောက်လာသည်။ ဂိုဏ်းများမှ ဓားစာခံတပည့်များသည် စုန့်ချင်းရှု လာသည်ကို မြင်သောအခါ သိုင်းပညာ လေ့ကျင့်နေခြင်းကို ရပ်တန့်ကာ ရှေ့သို့ တိုးလာပြီး အရိုအသေပြုကြသည်။

စုန့်ချင်းရှု လက်ဝှေ့ယမ်းပြလိုက်ပြီး ပြောလိုက်သည်၊ "မင်းတို့ ဒီည တိုက်ပွဲအကြောင်း သိပြီးသား ဖြစ်မယ်လို့ ထင်တယ်။ နန်းတော်လုံခြုံရေးကို အာမခံဖို့အတွက် ဒီည နန်းတော်ရဲ့ လုံခြုံရေးက အထူးတင်းကျပ်လိမ့်မယ်။ မင်းတို့က တရားဝင် ကိုယ်ရံတော်တွေ မဟုတ်သေးတဲ့အတွက် ဒီည ဒီခြံဝန်းကနေ ထွက်ခွင့်မရှိဘူး... တိုက်ပွဲလေးတစ်ခုမကြည့်ရတာကို မင်းတို့ မျက်နှာတွေက အဆိပ်စားထားသလို ဘာလို့ ဖြစ်နေကြတာလဲ?"

ကွင်းထဲမှ လူတစ်ဦး၏ ရုပ်ရည်ကို သေသေချာချာ မြင်လိုက်သောအခါ စုန့်ချင်းရှုနောက်တွင် ရပ်နေသော လီယွမ်ကျစ်၏ မျက်နှာသည် ဖြူဖျော့သွားသည်။