(အခန်းပို )သိုင်းပညာရှင်အဆင့်အတန်းနှင့် နန်းတွင်းအင်အား၏ ကန့်သတ်ချက်

ဒဏ္ဍာရီလာ ပုဂ္ဂိုလ်အချို့ကို ချန်လှပ်ထားပြီး၊ ဘတ်စကက်ဘော 2K ဂိမ်းစီးရီးရှိ ကစားသမားစွမ်းရည်တန်ဖိုးများအတိုင်း အဆင့်သတ်မှတ်ပါက (မှတ်ချက်- တူညီသော အဆင့်ရှိသူများကြားတွင် အဆင့်အတန်းခွဲခြားမှု မရှိပါ)

အဆင့် (၁၀၀) - ထိပ်တန်းအဆင့် (Overall Rating 100)

တူဂူချိုးပိုက် (Dugu Qiubai)

ကျန်းဆန်းဖုန်း (Zhang Sanfeng)

အမည်မသိဘုန်းတော်ကြီး (Nameless Monk)

အဆင့် (၉၅) - ဒုတိယထိပ်တန်းအဆင့် (Overall Rating 95)

နေကြာဘိုးဘေး (Sunflower Old Ancestor)

ဒေါင်ဖန်းပုပိုင် (Dongfang Bubai)

ဝမ်ချုံးယန် (Wang Chongyang)

ရှီးဖော်ထျန် (Shi Potian) စသည်တို့

အဆင့် (၉၀-၉၅) ကြား - တတိယထိပ်တန်းအဆင့် (Overall Rating 90-95)

ဖုန်းချင်းယန် (Feng Qingyang)

ကျူးမိုကျိ (Jiumozhi)

ဘာစီဘာ (Basiba)

ရှောင်ဖုန်း (Xiao Feng)

အန်းရန် (Anran )

ရန်ကော်(Yang Guo)

ကော်ကျင့် (Guo Jing)

ရွှမ်ချန်း (Xuancheng)

ကျန်းဝူကျိ (Zhang Wuji)

ပါရှားတောင်ပေါ်မှ အဘိုးအို (Persian Old Man in the Mountain)

လင်ချောင်ယင် (Lin Chaoying)

ကျိုးပေါ်ထုံး (Zhou Botong)

ဟူပေါ် (Hu Bo)

လုံနွီ (Long Nu) စသည်တို့

အဆင့် (၈၅) - စတုတ္ထအလယ်အလတ်အဆင့် (Overall Rating 85)

ဗဟိုလွင်ပြင်မှ ထိပ်သီးငါးဦး (Central Plains Five Uniques)

လုံမူကျွန်းသခင် (Longmu Island Lord)

ရှောင်ယောင် သိုင်းအဘိုးအိုသုံးဦး (Xiaoyao Three Elders)

ရှောင်ယွမ်ရှန်း (Xiao Yuanshan)

မုရုံပေါ် (Murong Bo)

ယွမ်ချန်းကျီ (Yuan Chengzhi)

ရွှေဘီးဘုရင် (Golden Wheel Monk) စသည်တို့

(စုန့်ချင်းရှု (Song Qingshu) သည် လက်ရှိတွင် ဤအဆင့်၌ ရှိနေပြီးအတက်အကျရှိနိုင်ပါသည်။)

အဆင့် (၈၀-၈၅) ကြား - ပဉ္စမအလယ်အလတ်အဆင့် (Overall Rating 80-85)

ရွှမ်စစ် (Xuan Ci)

ဖန်းကျန်းဆရာတော် (Fang Zheng Master)

ရန်ဝူရှင်း (Ren Woxing)

ဆန်းတု (Sandu)

ခုံးကျန့် (Kong Jian)

ရွှမ်မင် အဘိုးအိုနှစ်ဦး (Xuanming Elders)

လင်းဟူချုံး (Linghu Chong)

တင်းကျန့် (Ding Dian) စသည်တို့

အဆင့် (၇၅-၈၀) ကြား - ဆဋ္ဌမအလယ်အလတ်အဆင့် (Overall Rating 75-80)

ကျိုးလန်ချန်း (Zuo Lengchan)

ဟုန်အန်းထုံ (Hong Antong)

သွေးဓားအဘိုးအို (Blood Blade Old Ancestor)

ဆန်းကျိ (Sang Jie)

အားကျူး (A Jiu)

မြောင်ရန်ဖုန်း (Miao Renfeng)

ဟူရီတောင် (Hu Yidao)

တင်းချွမ်းချူ (Ding Chunqiu)

မုရုံဖု (Murong Fu)

သွမ့်ယန်ချင်း (Duan Yanqing)

ချန်ကျားလော့ (Chen Jialuo)

ယုကျန်းဇီ (Yu Zhenzi)

ကျန်းကျောက်ချုံး (Zhang Zhaozhong) စသည်တို့

အဆင့် (၇၅) - သတ္တမ အနိမ့်ပိုင်းထိပ်သီးအဆင့် (Overall Rating 75)

ကျိုးကျစ်လော့ (Zhou Zhiruo)

လီမော်ချိုး (Li Mochou)

မေချောင်ဖုန်း (Mei Chaofeng) စသည်တို့

ဤအရာများကို ကိုးကား၍ လူတိုင်း၏ တိုက်ခိုက်ရေးစွမ်းရည်ကို ခန့်မှန်းနိုင်သည်‌။ ဤစာရင်းတွင် ပါဝင်သူများ သို့မဟုတ် ၎င်းတို့နှင့် အဆင့်တူသူများသည် သိုင်းလောက၏ ထိပ်တန်း သိုင်းပညာရှင်များဟု ခေါ်ဆိုနိုင်သည်။

ဇာတ်လမ်းဇာတ်ကွက် လိုအပ်ချက်အရ သမင်နဲ့အိုး(ဉာဏ်ကြီးရှင်ဝေရှောင်ပေါင်ဇာတ်လမ်း)၊ နှင်းတောင်သူရဲကောင်းဇာတ်လမ်း၊ ဓားတစ်ဆုပ်ကျမ်းတစ်အုပ်ဇာတ်လမ်းများမှာ  သိုင်းပညာနိမ့်ကျသည့်သိုင်းလောက ဇာတ်ကောင်အချို့ကို သင့်လျော်စွာ မြှင့်တင်ထားသည်‌။

ဤအဆင့်သတ်မှတ်ချက်သည် အကြမ်းဖျင်းသာဖြစ်ပြီး ချို့ယွင်းချက်များ ရှိနိုင်ပါသည်။ နောက်ပိုင်းတွင် ဇာတ်လမ်းဇာတ်ကွက်အလိုက် ထပ်မံဖြည့်စွက်သွားမည် ဖြစ်သည်‌။ သိုင်းပညာများလည်း အနည်းငယ် ကွာခြားမှုများ ရှိနိုင်သည်။

ကျွန်တော်သည် ကျင်းယုံ၏ ဝတ္ထုများတွင် သိုင်းပညာအဆင့်တူသောသူများအချင်းချင်း နှစ်ရက်သုံးရက်ကြာအောင် တိုက်ခိုက်နေပြီး အနိုင်အရှုံးမပေါ်ခြင်းကို သဘောမတူပါ။ ကျွန်တော့်အမြင်တွင် အစီအစဉ်ကောင်းကောင်း ဆွဲထားပါက အဆင့်မြင့်ကျွမ်းကျင်သူတစ်ဦးသည် တူညီသောအဆင့်ရှိသူ အများအပြားကိုပင် သတ်ပစ်နိုင်သည်မှာ ကျိုးကြောင်းဆီလျော်ပါသည်။

ဥပမာ - သွေးဓားအဘိုးအို (Blood Blade Old Ancestor) နှင့် လော့ဟွာလျိုရွှေ (စီးသောရေ ကြွေသောပန်း)တိုက်ပွဲ၊ joy of life (Qing Yu Nian) ဝတ္ထုထဲက ဒုန်းရှန်း(Dongshen) တိုက်ပွဲကဲ့သို့ပင် ဖြစ်သည်‌။

တစ်ဦးချင်း တိုက်ပွဲတွင်ပင် ရာနှင့်ချီသော  သိုင်းကွက်များသို့မဟုတ် သိုင်းကွက်အနည်းငယ်မျှဖြင့်ပင် အနိုင်အရှုံးပေါ်သင့်ပါသည်။ (ပေါင်းစပ်စွမ်းရည် overall rating 95 အထက် အဆင့်မြင့်ကျွမ်းကျင်သူများတွင် ချက်ချင်းသေဆုံးခြင်းမှ ကာကွယ်နိုင်သည့် စွမ်းရည် ရှိပါသည်။

နောက်ဆုံးအနေဖြင့် သိုင်းပညာရှင်များနှင့် နန်းတွင်းအင်အားကြားရှိ ကန့်သတ်ချက် ဆက်နွှယ်မှုကို ပြောပြလိုပါသည်။

သိုင်းဝတ္ထုများတွင် သိုင်းလောက ရှုထောင့်မှ ပိုမိုဖော်ပြထားသောကြောင့် သိုင်းလောကအကြောင်းကို ပိုမိုတွေ့ရပြီး နန်းတွင်းရှိ သိုင်းပညာရှင်များကိုမူ နည်းပါးစွာ ဖော်ပြလေ့ရှိသည်‌။

သို့သော်လည်း နန်းတွင်း၌ ထိပ်တန်းသိုင်းပညာရှင်များ မရှိဟု မဆိုလိုပါ‌။

ခေတ်အများစုတွင် နန်းတွင်းသည် နိုင်ငံ၏ ထိပ်တန်း အရည်အချင်းရှိသူများကို ပိုင်ဆိုင်ထားခြင်းသည် ကျိုးကြောင်းဆီလျော်ပါသည်။  "မိမိ၏ အရည်အချင်းများကို ဧကရာဇ်ထံတွင် အသုံးချခြင်း(ရောင်းချခြင်း)" သည် အဓိကအတွေးအခေါ်ဖြစ်သင့်သည်‌။

မူရင်းဝတ္ထုတွင် ကွေ့ရှင်းရှု သည် “မြွေဓားရှင်ဇာတ်လမ်း” နှင့် သမင်နှင့်အိုး ဝတ္ထုများတွင် ထိပ်တန်းသိုင်းပညာရှင်ဖြစ်ရန် စွမ်းရည်ရှိသော်လည်း မိသားစုသုံးယောက်လုံး နန်းတော်ထဲတွင် နန်းတွင်းအစောင့်အရှောက် ဆယ်ဂဏန်းကိုသာ သတ်ပြီး သေဆုံးခဲ့ရသည်။ ကျွန်တော့်အမြင်တွင် ဤသည်ကသာ ယုတ္တိရှိပါသည်။

မဟုတ်ပါက သိုင်းပညာရှင်တစ်ဦးချင်းစီသည် နန်းတော်ထဲသို့ အလွယ်တကူ ဝင်ထွက်နိုင်မည်ဆိုပါက ဧကရာဇ်သည် အလွန်အမင်း စိုးရိမ်ပူပန်နေရမည် ဖြစ်သည်‌။ ကျွန်တော့်ဝတ္ထုတွင် ဇာတ်လမ်းလိုအပ်ချက်အရ ချင်မင်းဆက် နန်းတွင်းကိုယ်ရံတော်များ၏ စွမ်းရည်ကို လျှော့ချထားသောကြောင့် ၎င်းတို့သည် အားနည်းပုံရသော်လည်း သွေးစက် နှင့် ချန်းဖိုင်ချူ တို့ ပေါင်းစည်းပြီးနောက် နန်းတွင်းကိုယ်ရံတော်များ၏ တိုက်ခိုက်ရေးစွမ်းရည်သည် အံမခန်း တိုးတက်လာမည် ဖြစ်သည်‌။

သိုင်းပညာရှင်များသည် အစောင့်အရှောက် သို့မဟုတ် စစ်သားအနည်းငယ်ကို ချက်ချင်း သတ်နိုင်သော်လည်း ကိုယ်ရံတော်များစွာ သို့မဟုတ် စစ်တပ်နှင့် ရင်ဆိုင်ရသောအခါ သိုင်းပညာရှင်များသည် ဆုတ်ခွာရန်သာ လမ်းရှိသည်‌။ သိုင်းဝတ္ထုများသည် ဝိညာဉ်စွမ်းအင်ကျင့်ကြံခြင်း သို့မဟုတ် စိတ်ကူးယဉ်ဆန်သော ဝတ္ထုများ မဟုတ်သောကြောင့် ဖြစ်သည်‌။

ကျွန်တော့်၏ တန်ဖိုးစနစ်တွင် စွမ်းရည်တန်ဖိုး 95 နှင့်အထက်ရှိသော သိုင်းပညာရှင်များ သို့မဟုတ် ထိပ်တန်းကိုယ်ပျောက်သိုင်းပညာရှင်များ မှလွဲ၍ ကျန်သိုင်းပညာရှင်များအားလုံးသည် နန်းတွင်းအစောင့်အရှောက်များ သို့မဟုတ် စစ်တပ်၏ ဝိုင်းရံခြင်းခံရပါက သေဆုံးမည်မှာ သေချာသည်‌။

ဟုတ်ပါတယ်၊ များသောအားဖြင့် သိုင်းပညာရှင်တွေက သူတို့ကိုယ်သူတို့ အလွယ်တကူ သေဖို့လမ်းရှာမှာမဟုတ်ပါဘူး။

ဒါပေမဲ့ သူတို့က တစ်ဦးတည်း စစ်တပ်မှူးကို လုပ်ကြံဖို့ ဒါမှမဟုတ် နန်းတော်ထဲကို အတင်းဝင်ရောက်ဖို့ ကြိုးစားရင်၊

ဖော်ထုတ်ခံရတာနဲ့ သေခြင်းတရားသာ ဖြစ်သည်‌။

အခန်း (၁၀၆) လျှို့ဝှက်ဌာန နှစ်ခု

“ချင်းချင်း?” ချင်းချင်းဆိုတဲ့ စကားလုံးနှစ်လုံးကို ကြားလိုက်ရတော့ ဒီကဗျာရဲ့ အဓိပ္ပာယ်ကို ဆက်စပ်ပြီး ပုလွေမှုတ်သူက ဘယ်သူလဲဆိုတာကို စုန့်ချင်းရှု ချက်ချင်း သိလိုက်သည်။ လမ်းကြောင်းပြောင်းပြီး ရေကန်နားကို လျှောက်သွားလိုက်သည်။

မကြာမီပင် စုန့်ချင်းရှုသည် သစ်ပင်ကြီးတစ်ပင်အောက်တွင် မှီထားသော အဖြူရောင် ဝတ်စုံဖြင့် ရှချင်းချင်းကို တွေ့လိုက်ရသည်။ ဂါဝန်ရှည်က မြေပြင်ပေါ်မှာ ခပ်ပြေပြေ ကျနေပြီး ခါးပတ်က လေမှာ လွင့်နေကာ နားထက်တွင် ပန်းပွင့်အဖြူလေးတစ်ပွင့် ပန်ထားပြီး မျက်ခုံးကြားတွင် အဆုံးမရှိသော ဝမ်းနည်းခြင်းများ စုစည်းနေသည်။

(ဘာသာပြန်သူမှကူးယူးဖော်ပြသည်-တရုတ်ရိုးရာမှာ အသုဘအခမ်းအနားသို့ တက်ရောက်မည့် ဧည့်သည်များဟာ အနက်ရောင်ဝတ်စုံကို ဝတ်ဆင်ကြရပါမယ်။ တောက်ပတဲ့ အရောင်များ၊ အရောင်စုံပါသော အဝတ်များနှင့် အထူးသဖြင့် အနီရောင်ဟာ ပျော်ရွှင်ခြင်းကို ကိုယ်စားပြုတာကြောင့် မဝတ်ဆင်သင့်ပါ။ ကျန်ရစ်သူမိသားစုဝင်များ အားလုံး အဖြုရောင်ဝတ်စုံကိုသာ ဝတ်ဆင်ကြရပါမယ်။ တစ်ချိူ့ ပြည်နယ်များမှာတော့ အနက်ရောင်ဝတ်စုံ၊ အဖြူရောင်ဝတ်စုံတွင် အနက်ရောင်လက်ပတ်စည်းလေ့ရှိပါတယ်။ ကွယ်လွန်သူသည် အသက် ၈၀ နှင့်အထက် ရှိပါက ပန်းနုရောင် (သို့မဟုတ်) အနီရောင်ကို ဝတ်ဆင်လို့ရပါတယ်။ အကြောင်းကတော့ ကွယ်လွန်သူ၏ အသက်ရှည်ခြင်းကို ဂုဏ်ပြုသည်ဟု အဓိပ္ပါယ်သက်ရောက်သောကြောင့် ဖြစ်ပါတယ်။ source-https://www.facebook.com/share/p/1ApfstokpR/ )

“အမျိုးသမီးတွေ လှချင်ရင် အဖြူရောင်ဝတ်စုံ(ဝမ်းနည်းခြင်းဝတ်စုံ) ဝတ်ရတယ်” ဆိုတဲ့စကားအတိုင်း နှင်းလိုဖြူဖွေးတဲ့ ရှချင်းချင်းက ဖုန်မှုန့်တွေ ကင်းစင်တဲ့ နတ်သမီးတစ်ပါးကဲ့သို့ပင်။ မနက်ခင်းနေရောင်ခြည်ကြောင့်လား၊ သူမ မျက်နှာလေး နီရဲနေတာကြောင့်လား မသိသော်လည်း  မျက်နှာတစ်ခြမ်းမှာ နွေဦးပန်းလေးကဲ့သို့ တကယ်ပင် လှပနေသည်။

“ယွမ်သခင်မ” တခြားသူတွေ ရှိနေလို့ စုန့်ချင်းရှုက သူမရဲ့ ဂုဏ်သိက္ခာကို မထိခိုက်စေရန်အတွက် မဆင်မခြင် မလုပ်ရဲပေ၊ အဝေးကနေ လှမ်းအော်လိုက်သည်။

သူ့အသံကို ကြားတော့ ရှချင်းချင်းက အံ့အားသင့်စွာ လှည့်ကြည့်လိုက်သည်။ စုန့်ချင်းရှုနောက်က လှပတဲ့ မိန်းကလေးကို မြင်တော့ မျက်နှာအနည်းငယ် ပြောင်းလဲသွားပေမဲ့ မကြာခင်မှာပဲ ဖုံးကွယ်လိုက်ပြီး “နောက်ဆုံးတော့ ရှင် ရောက်လာပြီ” ဟု ပြောလိုက်သည်။

လီယွမ်ကျစ်က သူမရှေ့က လှပသော အမျိုးသမီးကို ကြည့်လိုက်ပြီး စုန့်ချင်းရှုကို လှည့်ကြည့်လိုက်ရာ မျက်နှာပေါ်မှာ ထူးဆန်းတဲ့ အမူအရာ ပေါ်လာပြီး စိတ်ထဲမှာ တွေးလိုက်သည် “ဒီအမျိုးသမီးက အဖြူရောင် ဝတ်စုံ(ဝမ်းနည်းခြင်းဝတ်စုံ) ဝတ်ထားတယ်၊ ခုနက ပုလွေသီချင်းရဲ့ အဓိပ္ပာယ်ကို နားထောင်ကြည့်ရတာ၊ သူမက မကြာသေးခင်ကမှ ဆုံးပါးသွားတဲ့ ခင်ပွန်းကို လွမ်းဆွတ်နေတာ ဖြစ်ရမယ်။ ဒါပေမဲ့ နှစ်ယောက်သားရဲ့ အမူအရာနဲ့ လေသံကို ကြည့်ရတာ ရှင်းရှင်းလင်းလင်းပဲ… ရှင်းရှင်းလင်းလင်းကို တခြားဆက်ဆံရေးတစ်ခု ရှိနေတာပဲ”

လီယွမ်ကျစ်က သူတို့နှစ်ယောက်ကို ဖောက်ပြန်နေတဲ့ သူတွေအဖြစ် သတ်မှတ်ထားပြီဆိုတာကို မသိဘဲ ရှချင်းချင်းကို ကြည့်ပြီး “ယွမ်သခင်မ၊ ကွေ့ရှင်းရှု ဇနီးမောင်နှံကို တားဆီးနိုင်ခဲ့လား?” ဟု မေးလိုက်သည်။

ရှချင်းချင်း ခေါင်းခါလိုက်သည်။ “ကျွန်မ နေ့မနား ညမနား ခရီးနှင်ပြီး သူတို့ မလှုပ်ရှားသေးခင် အချိန်မှီရောက်ခဲ့ပြီး ရက်အနည်းငယ်ကြာအောင် အချိန်ဆွဲထားနိုင်ခဲ့တယ်။ ဒါပေမဲ့ မနေ့က ဘာဖြစ်မှန်းမသိဘူး၊ သူတို့က ခန်းရှီကို လုပ်ကြံဖို့ နန်းတော်ထဲ ဝင်ဖို့ ရုတ်တရက် ဆုံးဖြတ်လိုက်တယ်။ ကျွန်မ သိုင်းပညာက သူတို့လောက် မမြင့်တော့ တားလို့မရခဲ့ဘူး။ ရှင် ဒီရက်ပိုင်း ရောက်တော့မယ်လို့ တွေးမိတာနဲ့ ဒီမှာပဲ ရှင့်ကို စောင့်နေဖို့ ဆုံးဖြတ်လိုက်တယ်။ ရှင် သူတို့ကို ကယ်နိုင်မလားလို့ပေါ့။"

စုန့်ချင်းရှုသည် မူရင်းဇာတ်လမ်းထဲက ကွေ့ရှင်းရှု လင်မယားကို အတော်လေး မုန်းတီးသည်။ သူတို့က စိတ်ဓာတ်ကျဉ်းမြောင်းပြီး ဘက်လိုက်တတ်ကြသည်။ နောက်ပိုင်း "သမင်နှင့်အိုး(ဉာဏ်ကြီးရှင်ဝေရှောင်ပေါင်)ဇာတ်လမ်း" ထဲမှာ ဝူလျို့ချီကိုလည်း သတ်ပစ်ခဲ့ကြသေးသည်။ ဒီလိုလူနှစ်ယောက်ကို ကယ်တင်ဖို့ စုန့်ချင်းရှု တကယ်ကို ဝန်လေးသည်။ သို့သော် ရှချင်းချင်းက နူးညံ့စွာ တောင်းဆိုနေတာကြောင့် စုန့်ချင်းရှု စိတ်ပျော့သွားပြီး "သူတို့ မနေ့က ဘယ်အချိန် နန်းတော်ထဲ ဝင်သွားတာလဲ" ဟု မေးလိုက်သည်‌။

“မနေ့ည ဇီအချိန် (ည ၁၁ နာရီမှ ၁ နာရီ) မှာပါ။ သူတို့က ရှင့်ရဲ့ သူငယ်ချင်းကို ပြန်ပေးဆွဲပြီး နန်းတော်ထဲ ခေါ်သွားခိုင်းပုံရတယ်" ဟု ရှချင်းချင်းက ပြန်ဖြေသည်။ "ဝေရှောင်ပေါင်က ကျွန်မမျက်နှာကို မှတ်မိသွားမှာ စိုးတာကြောင့် နောက်ပိုင်းမှာ ရှင့်ကို အန္တာရာယ်ဖြစ်မှာ စိုးလို့ အမှောင်ထဲမှာပဲ ပုန်းနေခဲ့တယ်" ဟု ဆက်ပြောသည်။

"ဝေရှောင်ပေါင်က ပါးနပ်တယ်‌။ သူတို့တွေကို နန်းတော်ထဲမှာ လှည့်ပတ်ခေါ်သွားမှာ သေချာတယ်‌။ အခုဆိုရင် အချိန်မီသေးတယ်၊ ငါတို့ အတူတူ နန်းတော်ထဲ ဝင်ပြီး သူတို့ကို ကြိုတင် တားဆီးနိုင်မလား ကြည့်ရအောင်” စုန့်ချင်းရှု စိတ်ထဲမှာ တွေးလိုက်သည်။ မူရင်းဝတ္ထုထဲက ဇာတ်လမ်းအရဆိုရင် ကွေ့ရှင်းရှု မိသားစုသုံးယောက်လုံး ဝေရှောင်ပေါင်က ရောင်းစားတာတောင် သူ့အတွက် ပိုက်ဆံတွေ ရေပေးနေရဦးမှာပဲ။

သို့သော် ရှချင်းချင်းက တွေဝေ မျက်နှာထားဖြင့် "ကျွန်မကို နန်းတော်ထဲ ခေါ်သွားရင် ဒေါင်ဖန်းပုပိုင်နဲ့တွေ့မှာ မကြောက်ဘူးလား" ဟု မေးလိုက်သည်။

စုန့်ချင်းရှုက ပေါ့ပေါ့ပါးပါး ပြုံးလိုက်သည်။ “စိတ်မပူပါနဲ့၊ ကြီးမားတဲ့ တိုက်ပွဲက နီးလာပြီဆိုတော့ ဒေါင်ဖန်းပုပိုင်က အတွင်းအားကို ပြန်ဖြည့်နေမှာ သေချာတယ်။ လပြည့်ညမတိုင်ခင် သူ့ရဲ့ အခြေအနေကို အကောင်းဆုံးဖြစ်အောင် ချိန်ညှိနေလိမ့်မယ်‌။ ဒီလို အသေးအမွှာကိစ္စတွေမှာ ဂရုမစိုက်နိုင်ဘူး" ဟု ပြန်ဖြေသည်။

ရှချင်းချင်း ခေါင်းညိတ်လိုက်ပြီး ရုတ်တရက် လီယွမ်ကျစ်ကို လှည့်ကြည့်ကာ "သူမကို ဘယ်လိုလုပ်မလဲ" ဟု မေးလိုက်သည်။ သူတို့နှစ်ဦးက ဧကရာဇ်ကို လုပ်ကြံတဲ့ကိစ္စလို အရေးကြီးတဲ့ လျှို့ဝှက်ချက်ပြောနေတာကို လီယွမ်ကျစ် ဘေးကနေ နားထောင်ပြီး ကြောက်ရွံ့တုန်လှုပ်နေသည်။ သူမက စုန့်ချင်းရှုကို နန်းတွင်းကိုယ်ရံတော်လို့ ထင်ခဲ့ပေမယ့် အခုလိုပုန်ကန်သူတွေနဲ့ ပေါင်းနေတာကို သိလိုက်ရသည်။ နှစ်ယောက်လုံး သူမအား လှည့်ကြည့်နေတာကို မြင်တော့ လီယွမ်ကျစ်က “ရှင်တို့ လုပ်စရာရှိတာလုပ်ပါ၊ ကျွန်မကို ဂရုစိုက်စရာ မလိုပါဘူး” ဟု ပြောလိုက်သည်။ ဒီဥာဏ်များတဲ့ မိန်းကလေးက ကြောက်လန့်နေတာကို မြင်တော့ စုန့်ချင်းရှုက စနောက်၍ “ဒါက ဘယ်ဖြစ်နိုင်မလဲ၊ ငါတို့ရဲ့ လျှို့ဝှက်ကြံစည်မှုကို မင်း ကြားလိုက်တာ၊ မင်းကလည်း အစိုးရအရာရှိသမီးလေးပဲ၊ မင်းကို ငါ ဘယ်လို လွှတ်ပေးရဲမလဲ…”

လီယွမ်ကျစ်က နောက်ဆုတ်သွားရင်း စိုးရိမ်တကြီး ရှင်းပြသည်‌။ "စုန့်အစ်ကိုကြီး၊ ကျွန်မတို့အားလုံးက အကုန်ရင်းနှီးပြီးသားတွေပဲ‌။ စနောက်မနေပါနဲ့ ။ ကျွန်မ ဒီကိစ္စကို လျှို့ဝှက်ထားမယ်လို့ ကတိပေးပါတယ်‌။ ...မလာနဲ့ဦး‌။ ရှင်တို့က မိုးမြေအဖွဲ့လား၊ပန်းနီအဖွဲ့ (ရွှမ်းဖန်)အဖွဲ့လား‌။ ကျွန်မက ရွှမ်းဖန်အဖွဲ့က ခေါင်းဆောင်အချို့နဲ့ ရင်းနှီးပါတယ်‌။ မိုးမြေအဖွဲ့က လူတွေကိုလည်း သိပါတယ်‌။ အဟင့် အဟင့်၊ ကျွန်မကို မသတ်ပါနဲ့‌။"

စုန့်ချင်းရှုက "မင်းက အစိုးရအရာရှိရဲ့ သမီးပဲ‌။ တော်လှန်ရေး လုပ်နေတဲ့ အဖွဲ့အစည်းတွေနဲ့ ပတ်သက်နေတာကို ငါက ဖော်ထုတ်လိုက်မှာ မကြောက်ဘူးလား" ဟု မေးလိုက်သည်‌။

"ရှင်လည်း မဟုတ်ဘူးလား..." လီယွမ်ကျစ်က တီးတိုးပြောလိုက်သည်။

"စိတ်ချပါ‌။ မင်းကို မသတ်ပါဘူး‌။ ငါတို့နဲ့အတူ နန်းတော်ထဲ ဝင်ဖို့ပဲ လိုတာ‌။ မင်းအဖေကို မင်းကို မြို့တော်ကို ခေါ်သွားပေးမယ်လို့ ငါ ကတိပေးထားတာ‌။ မင်းကို မြို့တော်မှာ တစ်ယောက်တည်း မထားခဲ့ရဲဘူး‌။ မဟုတ်ရင် ကတုံး ကောင်လေး တစ်ယောက်က(ဝေရှောင်ပေါင်ကိုပြောခြင်းဖြစ်သည်)မင်းကို မြင်ပြီး သူ့အိမ်ကို ခေါ်သွားပြီး မယားငယ်လုပ်ခိုင်းရင် မင်းအဖေက ငါ့ကို သတ်ဖို့ ကြိုးစားလိမ့်မယ်‌။" ဟု စုန့်ချင်းရှုက ပြောသည်။

လီယွမ်ကျစ် စိတ်ထဲမှာ တိတ်တိတ်လေး ဝမ်းသာနေသည်‌။ 'ဟွန့်၊ ယောက်ျားတွေက တကယ် လှည့်စားရလွယ်တာပဲ‌။ ငါ နည်းနည်းလေး သနားစရာဟန်ဆောင်လိုက်တာနဲ့ အဆင်ပြေသွားပြီ...'

"ယွမ်သခင်မ၊ ကိုယ်ရံတော်(နန်းတွင်းအစောင့်အရှောက်)အဝတ်အစားတွေ အဆင်သင့်ဖြစ်ပြီလား" ဟု စုန့်ချင်းရှုက မေးလိုက်သည်‌။

"အဆင်သင့်ဖြစ်ပါပြီ" ဟု ရှချင်းချင်းက ပြန်ဖြေပြီး လီယွမ်ကျစ်၏ လက်ကို ဆွဲကိုင်ကာ "ဒီကညီမလေး၊ ကျွန်မနဲ့အတူ အခန်းထဲဝင်ပြီး နန်းတွင်းကိုယ်ရံတော်အဝတ်အစားတွေ လဲရအောင်" ဟု ပြောသည်‌။

ခဏအကြာတွင် မိန်းကလေးနှစ်ယောက် ထွက်လာရာ စုန့်ချင်းရှု၏ မျက်လုံးများ လက်ခနဲ ဖြစ်သွားပြီး "သေးသွယ်လှပတဲ့ ကိုယ်လုံးကိုယ်ပေါက်၊ နူးညံ့တဲ့ အသားအရေနဲ့‌။ မင်းတို့ကို စစ်တပ်ထဲ ပို့လိုက်ရင် အခုလိုချောမောလှပတဲ့ စစ်သားငယ်လေးတွေ ဘာမှ မကျန်အောင် အကုန် ဝါးမျိုခံရလိမ့်မယ်" ဟု ချီးကျူးလိုက်သည်‌။

ရှချင်းချင်းက စုန့်ချင်းရှု၏ စကားပြောဟန်ကို ကောင်းကောင်းသိနေပြီဖြစ်၍ မထူးဆန်းပေ။ လီယွမ်ကျစ်က ငယ်ငယ်ရွယ်ရွယ် မိန်းကလေးဖြစ်၍ ရှက်သွေးဖြာသွားသည်။ သူ၏ စကားများက အလွန်အမင်း ရဲရင့်ပြီး ပွင့်လင်းလွန်းသည်ဟု ခံစားရသည်။

နန်းတော်တံခါးဝသို့ ရောက်သောအခါ အစောင့်များအားလုံး၏ မျက်နှာများက တင်းမာနေသည်ကို မြင်ရ၍ စုန့်ချင်းရှုက ရှေ့တိုးကာ "နန်းတော်မှာ ဘာဖြစ်ခဲ့တာလဲ" ဟု မေးလိုက်သည်‌။

"စုန့်သခင်၊ နန်းတော်ထဲမှာ သိုင်းပညာ မြင့်မားတဲ့ လုပ်ကြံသူ သုံးယောက် ရောက်လာတယ်လို့ ကြားပါတယ်‌။ ခေါင်းဆောင်ဒိုလုံက အားလုံးကို ကိုယ့်နေရာမှာ တင်းတင်းကျပ်ကျပ် စောင့်ကြပ်ဖို့ အမိန့်ပေးထားပါတယ်" ဟု အစောင့်တစ်ယောက်က ခါးပတ်ပြားကို စစ်ဆေးပြီး တိုးတိုးလေး ပြောသည်‌။ ထို့နောက် ရုတ်တရက် စုန့်ချင်းရှုနောက်က လူနှစ်ယောက်ကို ကြည့်ရင်း "ဒီညီအစ်ကိုနှစ်ယောက်က မရင်းနှီးဘူး‌။ ဘယ်အလှည့်ကလဲ" ဟု ထူးဆန်းစွာ မေးသည်‌။

စုန့်ချင်းရှုက ပေါ့ပေါ့ပါးပါး ပြန်ဖြေသည်။ "သူတို့က ဧကရာဇ်အတွက် ဂိုဏ်းအသီးသီးကနေ ရှာဖွေထားတဲ့ ငယ်ရွယ်တဲ့ သိုင်းပညာရှင်တွေပါ‌။ ကိုယ်ရံတော်အဖွဲ့ကို အင်အားဖြည့်ဖို့အတွက်ပါ" ဟု ပြန်ဖြေသည်။ ဤခေတ်တွင် ဧကရာဇ်မင်း၏ အမိန့်တော်ကို မှားယွင်းစွာ ကြားဖြတ်ဖော်ပြရဲသူ မရှိပေ။ ဖော်ထုတ်မိပါက မိသားစုမျိုးနွယ်စုလိုက် သေဒဏ်ချမှတ်ခံရမည့် ကြီးလေးသော ပြစ်မှု ဖြစ်သည်။သို့သော် စုန့်ချင်းရှုက အချိန်ခရီးသွားသူဖြစ်ပြီး တစ်ယောက်တည်းဖြစ်၍ ဧကရာဇ်ရဲ့ အာဏာကို ကြောက်ရွံ့ခြင်းမရှိပေ။ တစ်ဘက်လူက ခန်းရှီနဲ့ သွား၍ တိုက်ဆိုင်စစ်ဆေးလို့ မရဘူးလို့ တွေးလိုက်တော့ ဘာမှ မစိုးရိမ်ဘဲ ပါးစပ်ထဲရှိတဲ့အတိုင်း ပြောချင်ရာ ပြောလိုက်သည်‌။

အစောင့်တွေက မျက်နှာထားတွေ တင်းမာသွားပြီး ထပ်မေးဝံ့ကြတော့ဘဲ လူသုံးယောက်လုံးကို နန်းတော်ထဲ ဝင်ခွင့်ပြုလိုက်သည်။

"စုန့်အစ်ကို၊ သူတို့ပြောတာ နားထောင်ရတာ ဆရာတူအစ်ကိုတို့တွေ အဖမ်းခံရပြီနဲ့ တူတယ်" ဟု ရှချင်းချင်းက ပြောသည်။ ရှချင်းချင်းက အချိုးမပြေသော ဆရာတူအစ်ကိုလင်မယားကို အမြဲတမ်း မကြိုက်ခဲ့ပေမယ့် သူတို့က သူမခင်ပွန်းအတွက် လက်စားချေဖို့ နန်းတော်ထဲ အတင်းဝင်ခဲ့တာကို တွေးလိုက်တော့ သူမစိတ်ထဲမှာ အတော်လေး စိုးရိမ်နေသည်။

နန်းတော်တစ်ခုလုံးက အရမ်းကျယ်ဝန်း၍ စုန့်ချင်းရှုက ဘယ်နေရာကို သွားကယ်ရမှန်း မသိဖြစ်နေသည်‌။ ခဏတာ တွေဝေပြီးနောက် လမ်းလျှောက်လာသည့် ကိုယ်ရံတော်တစ်ဦးကို ဆွဲခေါ်ကာ "လုပ်ကြံသူတွေ အခု ဘယ်ရောက်နေလဲ" ဟု မေးလိုက်သည်‌။

မေးသူမှာ နန်းတော်ထဲက နာမည်ကြီး သိုင်းပညာရှင် စုန့်ချင်းရှု ဖြစ်ကြောင်း သိလိုက်ရတော့ ချက်ချင်း အရိုအသေပြုပြီး "စုန့်သခင်၊ လုပ်ကြံသူတွေ အဖမ်းခံရပြီလို့ ကြားပါတယ်‌။ အုပ်ချုပ်ရေးမှူးဒိုလုံက သူတို့ကို ဧကရာဇ် ကိုယ်တိုင် စစ်ဆေးဖို့အတွက် ဘုရင့်စာကြည့်တိုက်ကို ခေါ်သွားနေပါတယ်" ဟု လျင်မြန်စွာ ပြန်ဖြေသည်‌။

စုန့်ချင်းရှုသည် မူရင်းဇာတ်လမ်းထဲက ကွေ့ရှင်းရှုလင်မယား နန်းတော်ထဲမှာ လမ်းပျောက်ပြီး ဧကရာဇ်ကို ရှာမတွေ့သဖြင့် ဖမ်းဆီးခံရဟန်ဆောင်၍ ဧကရာဇ်ရှေ့ကို ရောက်မှ ရုတ်တရက် ထပြီးတိုက်ခိုက်ခဲ့တာကို ပြန်အမှတ်ရမိသည်။

"ဒီအချိန်မှာ ခန်းရှီကို သေခွင့်ပေးလို့ မဖြစ်ဘူး" ဟု စုန့်ချင်းရှု စိတ်ထဲမှာ စိုးရိမ်တကြီး တွေးလိုက်သည်။ သူ ဒီလောက်များတဲ့ နိုင်ငံရေးအကျိုးဆောင်မှု့တွေ လုပ်ခဲ့တာ အချည်းနှီး မဖြစ်စေချင်ဘူး။

စုန့်ချင်းရှုသည် ဘုရင့်စာကြည့်တိုက်သို့ ချက်ချင်း ပြေးသွားသည်။ အနည်းငယ်ပြေးပြီးနောက် မိန်းကလေးနှစ်ယောက်က မလှုပ်မယှက် ရပ်နေတာကို လှည့်ကြည့်မိတော့ ပြန်ပြေးလာပြီး မိန်းကလေးနှစ်ယောက်၏ ပခုံးကို ကိုင်ကာ ဘုရင့်စာကြည့်တိုက်သို့ မြန်မြန်ပြေးသွားသည်။

စုန့်ချင်းရှု၏ ခန္ဓာကိုယ်နဲ့ ဒီလောက်နီးကပ်စွာ ထိတွေ့နေရတာကို ရှချင်းချင်းက ကိစ္စမရှိပေမယ့် လီယွမ်ကျစ်ကတော့ အတော်လေး မသက်မသာ ခံစားနေရသည်။ သို့သော် အခုက အရေးပေါ် အခြေအနေဖြစ်ကြောင်း သူမ သိနေ၍ နှုတ်ခမ်းနီနီလေးကို ဖိကိုက်ပြီး သည်းခံနေလိုက်သည်။

အဝေးမှပင် ဘုရင့်စာကြည့်တိုက်အတွင်းမှ ဓားသံ၊ ဓားချင်းရိုက်ခတ်သံများကို ကြားရသည်။ စုန့်ချင်းရှု စိတ်ပူလာပြီး ခြေလှမ်းများကို မြန်လိုက်သည်။ သုံးဦးသား ဘုရင့်စာကြည့်တိုက်တံခါးဝသို့ ရောက်သည်နှင့် ကွေ့ရှင်းရှု မိသားစုသုံးဦးလုံးကို ဓားများဖြင့် ခုတ်သတ်ခံနေရသည်ကို တွေ့လိုက်ရသည်။

"အား!" ရှချင်းချင်း အော်ဟစ်လိုက်ပြီး လဲကျတော့မတတ် ဖြစ်သွားသည်။ ကံကောင်းစွာဖြင့် လီယွမ်ကျစ်က မျက်စိလျှင်မြန်စွာ ဖမ်းဆွဲလိုက်သဖြင့် အချိန်မှီ ထိန်းလိုက်နိုင်ခဲ့သည်။

အော်သံကို ကြားတော့ ခန်းရှီက ခေါင်းထောင်ကြည့်လိုက်ပြီး စုန့်ချင်းရှု ဖြစ်နေကြောင်း တွေ့လိုက်ရသောအခါ ကြောက်လန့်တကြားဖြင့် "စုန့်သိုင်းပညာရှင် ပြန်လာပြီပဲ‌။ မင်းသာ စောစော ရောက်လာရင် ဒီလုပ်ကြံသူ သုံးယောက် ဒီလောက်ထိမလုပ်နိုင်ဘူး" ဟု ဆိုသည်။

"ကျွန်တော် အရှင်မင်းကြီးကို ကယ်တင်ဖို့ နောက်ကျသွားလို့ ခွင့်လွှတ်တော်မူပါ" ဟု စုန့်ချင်းရှုက အံ့သြသွားပြီး ချက်ချင်း တောင်းပန်လိုက်သည်‌။

ဒိုလုံနှင့် အခြားသူများက မြေပြင်ပေါ်မှာ ဒူးထောက်ကာ ချွေးများ စီးကျနေသည်။ "ကျွန်တော်မျိုးတို့ ကာကွယ်ရေး အားနည်းခဲ့လို့ အရှင်မင်းကြီးကို ထိတ်လန့်စေခဲ့ပါတယ်" ဟု ဆိုသည်။

"ထားလိုက်ပါတော့၊ ထားလိုက်ပါတော့။ ဒီတစ်ခါ ရှောင်ပေါင်က သူတို့ဓားတွေကို ကိုယ်နဲ့ခံပြီး အချိန်ဆွဲကာကွယ်ပေးလို့ ကျေးဇူးတင်ပါတယ်။ သူတို့ကို ဆွဲထုတ်သွားကြပါ။ ရှောင်ပေါင်နဲ့ ချင်းရှု ကျန်ခဲ့ပြီး ကျန်တဲ့သူတွေ အပြင်ထွက်ကြ" ခန်းရှီ လက်ဝှေ့ယမ်းလိုက်သည်။

ကွေ့ရှင်းရှု မိသားစု၏ အလောင်းများကို ခွေးသေကောင်များကဲ့သို့ ဆွဲထုတ်သွားသည်ကို မြင်လိုက်ရသောအခါ ရှချင်းချင်း၏ နှုတ်ခမ်းများ တုန်ယင်လာပြီး မျက်လုံးများက ခန်းရှီကို မုန်းတီးမှုအပြည့်ဖြင့် ကြည့်လိုက်သည်။ စုန့်ချင်းရှုက သူမ၏လက်ကို အသာအယာပုတ်ကာ တိတ်တိတ်လေး "သူတို့ရဲ့ ရုပ်အလောင်းတွေကို ပြန်ရအောင်ယူပေးမယ်‌။ ငါ့ကို ယုံပါ‌။ မင်းတို့ အပြင်မှာ အရင်စောင့်နေပါ" ဟု ဆိုသည်။ ထို့နောက် သူမ၏ ကိုယ်ပေါ်ရှိ အမှတ်တစ်နေရာကို ထိလိုက်ရာ သူမ၏ အတွင်းအားအသုံးပြုခြင်းကို ပိတ်ထားလိုက်သည်။ သူမက ဒေါသတကြီး ကြည့်နေသည်ကို မြင်သောအခါ စုန့်ချင်းရှုက လျှို့ဝှက်စွာ "မင်း  မိုက်မဲတဲ့ အလုပ်တွေ လုပ်မှာ စိုးလို့ပါ။... လီသခင်မလေး၊ သူ့ကို ဂရုစိုက်ပေးပါဦး။"

လီယွမ်ကျစ် ခေါင်းညိတ်လိုက်ပြီး ရှချင်းချင်းကို တွဲကာ ထွက်သွားသည်။

"ငါလီးထဲမှပဲ၊ လာချင်တိုင်းလာပြီး သွားချင်တိုင်း သွားရအောင် ငါ့နန်းတော်က အများသုံးအိမ်သာများမှတ်နေလား၊ " လူအားလုံး ထွက်သွားသည်ကို မြင်သောအခါ ခန်းရှီ အော်ဟစ်ဆဲဆိုတော့သည်။

"အရှင်မင်းကြီး၊ ဆဲဆိုလိုက်ရင် စိတ်ထဲမှာ ပေါ့ပါးသွားပါလိမ့်မယ်" ဝေရှောင်ပေါင်က ခန်းရှီ၏ ကျောပြင်ကို ပုတ်ပေးရင်း

သူ့ရှေ့တွင် လက်ဖက်ရည်တစ်ခွက်ကို ကမ်းပေးလိုက်သည်။

"မသောက်ဘူး!" ခန်းရှီက သူ့ရှေ့က လက်ဖက်ရည်ခွက်ကို တွန်းဖယ်လိုက်ပြီး စုန့်ချင်းရှုကို လှည့်ကြည့်ကာ "မင်း ဂိုဏ်းအသီးသီးကို သွားခဲ့တာ ဘယ်လိုလဲ" ဟု မေးလိုက်သည်‌။

စုန့်ချင်းရှုသည် ခန်းရှီက သူ့ရှေ့မှာ ဆဲဆိုသည်ကို မြင်သောအခါ မကြောက်ရွံ့ဘဲ ဝမ်းသာမိသည်။ သူ့ကို ကိုယ့်လူလို သဘောထားနေပြီဟု ထင်ရသည်။ ထို့ကြောင့် သူက ချက်ချင်း ပြန်ဖြေသည်။ "ဂိုဏ်းခေါင်းဆောင်တွေက သူတို့ရဲ့ တပည့်တွေ နန်းတွင်းကိုယ်ရံတော် ဖြစ်ခွင့်ရတာကို ကြားတော့ မဆန့်ကျင်ရုံသာမက ဝမ်းသာအံ့သြပြီး ရာထူးနေရာ ခွင့်ပြုချက် ပိုရချင်စိတ်တောင် ရှိနေပါတယ်" ဟု ပြောသည်။

ခန်းရှီ၏ မျက်နှာထား ပြန်ကောင်းလာပြီး "နန်းတော်ထဲက ကိုယ်ရံတော်တွေ အများစုက မန်ချူးရှစ် တော်ဝင်မျိုးနွယ်တွေဖြစ်ပြီး သူတို့ရဲ့ သိုင်းပညာက တကယ်ကို နိမ့်ပါးလွန်းတယ်‌။ အရင်တုန်းက ငါ ရှောင်ပေါင်ကို ကာကွယ်ဖို့ သူတို့ကို လွှတ်ခဲ့တာရယ်၊ ဒီလုပ်ကြံမှု ဖြစ်စဉ်ရယ်ကြောင့် တကယ့်သိုင်းပညာရှင်တွေရှေ့မှာ သူတို့ ဘယ်လိုမှ မခုခံနိုင်ဘူးဆိုတာ ငါ နားလည်သွားပြီ"

စုန့်ချင်းရှု ပြန်ဖြေသည်။ "ကိုယ်ရံတော်အများစုက မန်ချူးလူမျိုးတွေဖြစ်ပြီး သူတို့ရဲ့ သိုင်းပညာက စစ်မြေပြင်တိုက်ခိုက်ရေးအတွက် ပိုသင့်တော်ပါတယ်‌။ သိုင်းသမားတွေနဲ့ ယှဉ်ရင်တော့ အမှန်တကယ်ပဲ အားနည်းပါတယ်"

"မှန်တယ်" ခန်းရှီ ထရပ်လိုက်ပြီး "ဒါကြောင့် ငါ ဒိုလုံကို နန်းတွင်းကိုယ်ရံတော်တွေထဲက သိုင်းပညာထူးချွန်တဲ့လူတွေကို ရွေးချယ်ပြီး 'သွေးစက်' လို့ခေါ်တဲ့ လျှို့ဝှက်ဌာနတစ်ခု ဖွဲ့စည်းစေဖို့ ဆုံးဖြတ်ထားတယ်‌။ အဲ့ဒီဌာနက သိုင်းလောက,ကလူဆိုး လူမိုက်တွေအတွက် သီးသန့် ကိုင်တွယ်ဖြေရှင်းမှာပါ"

"သွေးစက်?" စုန့်ချင်းရှု ချက်ချင်း တုန်လှုပ်သွားသည်။

"ချင်းရှုရဲ့ သိုင်းပညာက အရမ်းကောင်းတယ်‌။ ဒီအတိုင်း အလဟဿ ထားတာက အလွန် နှမြောစရာပဲ‌။ ငါက မင်းကို ဂိုဏ်းအသီးသီးကနေ ခေါ်လာတဲ့ တပည့်တွေကို လေ့ကျင့်ပေးပြီး နောက်ထပ် လျှို့ဝှက်ဌာနတစ်ခု ဖွဲ့စည်းစေချင်တယ်‌။ နာမည်ကတော့..." ခန်းရှီ ခဏတာ စဉ်းစားပြီးနောက် "ချန်ဖိုင်ချူ(ပိုးမွှားဖမ်းခြင်း)လို့ ခေါ်ရအောင်‌။ အပေါ်ယံအားဖြင့် နန်းတော်ထဲမှာ ဥယာဉ်သန့်ရှင်းရေးတာဝန်ယူရမှာဖြစ်ပြီး အဓိက,ကတော့ ငါ့အတွက် သိုင်းလောကရဲ့ လှုပ်ရှားမှုတွေကို စောင့်ကြည့်ပေးရမယ်"

(ဘာသာပြန်သူ-၁၈ ရာစု ချင်မင်းဆက် (ချင် ဧကရာဇ်) လက်ထက်က လျှို့ဝှက်အဖွဲ့ တစ်ခုဖြစ်ပြီး၊ အပေါ်ယံအားဖြင့် ဥယျာဉ်ထိန်းသိမ်းရေး (ပိုးမွှား၊ ငှက်ဖမ်းခြင်း) လုပ်ငန်းလုပ်ဆောင်ပေမယ့်၊ တကယ်တော့ ဧကရာဇ်အတွက် ထောက်လှမ်းရေးနဲ့ နိုင်ငံရေးရန်သူများကို ဖယ်ရှားပေးတဲ့ အဖွဲ့ ဖြစ်ပါတယ်။)