"အဲဒီ ခေါင်းဆောင် နှစ်၊ သုံး၊ လေး၊ ငါးတွေ တိုက်ခိုက်နေကြတာ ဘယ်သူ နိုင်သွားလဲ?" ဒီအချိန်မှာ နောက်ကနေ အသံတစ်ခု ထွက်လာပြီး မေးလိုက်သည်။
"သူတို့က တိုက်ခိုက်နေကြတုန်းပဲရှိသေးတာ။ ငါ ဘယ်လို သိမှာလဲ" လို့ ခေါင်းဆောင်က စိတ်မရှည်စွာ ပြန်ဖြေလိုက်တယ်။ ရုတ်တရက် သရဲမြင်လိုက်သလို ဖြစ်သွားပြီး ခေါင်းကို ဝုန်းခနဲ လှည့်လိုက်တယ်။
ခုနက မြေကြီးပေါ် လဲကျနေတဲ့ စုန့်ချင်းရှုက အဲဒီကျောက်တုံးကြီးပေါ်မှာ ပြုံးရွှင်စွာနဲ့ ထိုင်နေတာကို တွေ့လိုက်ရပြီး မြင်းစီးဓားပြတွေရော လီခဲရှို့ဖခင်နဲ့ သမီးပါ အံ့အားသင့်ပြီး ကြက်သေ သေသွားကြသည်။
"မင်း မသေသေးဘူးလား?" လို့ ခေါင်းဆောင်က တုန်လှုပ်စွာ မေးလိုက်သည်
“ငါက သိုင်းပညာရှင်ကြီးပဲ၊ ဒီလောက် လွယ်လွယ်ကူကူ ဘယ်သေပါ့မလဲ” စုန့်ချင်းရှုက ယောကျာ်းလေးအယောင်ဆောင်ထားတဲ့ မိန်းကလေးကို ပြုံးပြလိုက်သည် “ကောင်မလေး၊ နားကို ပိတ်ထား၊ ပါးစပ်ပဲ လှုပ်ရုံနဲ့ သူတို့ကို ဘယ်လို ရှင်းပစ်လဲဆိုတာ ငါ မင်းကို ပြမယ်”
"ခွေးကောင်!" ဓားပြတွေမှာလည်း ဂုဏ်သိက္ခာ ရှိတာပဲ။ ဒီလို လူအများရှေ့မှာ စော်ကားခံလိုက်ရတော့ မြင်းစီးဓားပြအုပ်စုက ဒေါသတကြီး ဖြစ်သွားပြီး ဓားတွေဆွဲပြီး ထခုတ်ကြသည်။
စုန့်ချင်းရှု မျက်နှာတည်သွားပြီး လေကို ပြင်းပြင်းရှူသွင်းလိုက်သည်။ ပါးစပ်ဟကာ ကျယ်လောင်စွာ အော်လိုက်ရာ မိုးကြိုးပစ်သံကဲ့သို့ အသံသည် မိုင်ပေါင်းများစွာအထိ ပဲ့တင်ထပ်သွားသည်။ မြင်းစီးဓားပြတွေ အားလုံး အသည်းအသန် ကြောက်လန့်ပြီး ခေါင်းများ ပေါက်ကွဲမတတ် နာကျင်သွားကြသည်။
ခဏလေးအတွင်းမှာ စောစောကပဲ စိတ်အားထက်သန်နေတဲ့ ဓားပြအုပ်စုကလူတွေ ခေါင်းကို ကိုင်ပြီး မြေကြီးပေါ်မှာ နာကျင်စွာ ညည်းညူနေကြသည်။
"ခြင်္သေ့ဟိန်းသံ!" လို့ လီခဲရှို့က စုန့်ချင်းရှုကို အံ့အားသင့်စွာ ကြည့်လိုက်သည်။ သူ ဒီလောက် ငယ်ရွယ်တဲ့ အရွယ်မှာ ယခုလို မြင့်မားသော အတွင်းအား ရှိလိမ့်မယ်လို့ မထင်ထားခဲ့ဘူး။
မြင်းစီးဓားပြခေါင်းဆောင်က မြေပြင်ပေါ်မှာ ဒူးထောက်ရင်း မျက်နှာထား တင်းမာစွာဖြင့် စုန့်ချင်းရှုကို ကြည့်ကာ အံကြိတ်လိုက်ပြီး “သိုင်းပညာရှင်ကြီးရဲ့ သိုင်းပညာက ဒီလောက် မြင့်မားနေတာ၊ ဘာလို့ ကျွန်တော်တို့ကို အခုလို စနောက်နေရတာလဲ?”
“ခုနက မင်းတို့ အင်အားချင်းမျှနေတုန်း ငါ ဝင်ကူညီလိုက်ရင် သူတို့ ငါ့ကို ကျေးဇူးတင်တာက မင်းတို့လက်ထဲ ကျရောက်ပြီး မျှော်လင့်ချက်မဲတဲ့အခြေအနေရောက်မှ ငါ ကယ်ထုတ်လိုက်တဲ့ ကျေးဇူးတင်ခြင်းနဲ့ ဘယ်တူနိုင်ပါ့မလဲ” စုန့်ချင်းရှုက မဆိုင်းမတွ ပြောလိုက်သည်။
လီခဲရှို့ ဖခင်နဲ့ သမီးကတော့ ခေါင်းတွေ မဲမှောင်သွားတယ်။ မြင်းစီးဓားပြခေါင်းဆောင်က သွေးတစ်ပွက်အန်သွားပြီး ဒေါသကြောင့် အသက်ထွက်လုနီးပါးဖြစ်သွားသည်
"အရင် အန်တာ ရပ်လိုက်ပါဦး။ အရေးကြီးတဲ့ ကိစ္စ ပြောရအောင်။ မင်းရဲ့ စကားပြောဟန်နဲ့ စိတ်နေစိတ်ထားကို ကြည့်ရတာ သာမန် မြင်းစီးဓားပြခေါင်းဆောင်တစ်ယောက်နဲ့ မတူဘူး။ မင်း ဘယ်သူလဲ?" လို့ စုန့်ချင်းရှုက သူ့ကို ကြည့်၍ ပြောလိုက်သည်
" လုံအော့ထျန်း!” မြင်းစီးဓားပြခေါင်းဆောင် ခဏတွေဝေပြီးနောက် ချက်ချင်း ပြောလိုက်သည်။
စုန့်ချင်းရှု တုန်လှုပ်သွားပြီး အံအားသင့်စွာ အပေါ်အောက် အကဲခတ်လိုက်သည်။ နှုတ်ခမ်းထောင့်တွင် အပြုံးတစ်ခု ပေါ်လာပြီး “ငါ့မှာ မင်းတို့နဲ့ ပတ်သက်မှု နည်းနည်းရှိတဲ့ မိတ်ဆွေတစ်ယောက် ရှိတယ်၊ အရင်ကတည်းက မင်းတို့ကို လွှတ်ပေးဖို့ပဲ စဉ်းစားထားတာ။ အခု မင်းနာမည်ကို ကြားရတော့ မင်းတို့ကို ပိုပြီး ဒုက္ခမပေးတော့ဘူး။ မင်း လက်အောက်ခံတွေကို ခေါ်ပြီး သွားတော့၊ သူတို့က ငါ့ရဲ့ အသံလှိုင်းကြောင့် ခေါင်းနည်းနည်း မူးသွားရုံပဲ၊ ရက်အနည်းငယ် နားလိုက်ရင် ကောင်းသွားလိမ့်မယ်။ ဒါပေမဲ့ ခုနက ငါ့ကို တုတ်နဲ့ ရိုက်တဲ့ သူရဲကောင်းကတော့ ရက်အနည်းငယ် ပိုပြီး လဲနေရလိမ့်မယ် ထင်တယ်”
လုံအော့ထျန်းက သူ့လက်အောက်ခံအုပ်စုကို တွဲပြီး တောနက်ထဲသို့ တုန်တုန်ယင်ယင် လျှောက်သွားသည်။ မပျောက်ကွယ်မီ စုန့်ချင်းရှုကို နက်နက်ရှိုင်းရှိုင်း တစ်ချက်ကြည့်လိုက်ရာ သူ့ပုံပန်းသဏ္ဍာန်ကို စိတ်ထဲမှာ မှတ်သားထားပုံရသည်။
"ရှင် ဘာလို့ သူတို့ကို လွှတ်ပေးလိုက်တာလဲ?" လို့ ယောက်ျားလေးပုံစံ ဝတ်ထားတဲ့ မိန်းကလေးက သူမကိုယ်ပေါ်က ကြိုးတွေကို ဖြည်ရင်း နှုတ်ခမ်းဆူပြီး မကျေမနပ် ပြောလိုက်သည်။
"ကျစ်အာ၊ မရိုင်းစိုင်းနဲ့! ကျေးဇူးရှင်၊ ဒါက ကျွန်တော့်သမီး လီယွမ်ကျစ်ပါ... ကျေးဇူးရှင်ရဲ့ အသက်ကယ်ပေးတဲ့ ကျေးဇူးအတွက် မြန်မြန် ကျေးဇူးတင်လိုက်ပါဦး။" လို့ လီခဲရှို့က သမီးကို ချက်ချင်း မျက်လုံးပြူးပြီး မျက်နှာရိပ် မျက်နှာကဲပြလိုက်သည်။
"ရပါတယ် ရပါတယ်" လို့ စုန့်ချင်းရှုက ရှက်ရွံစွာပြုံး၍ ပြောလိုက်သည်၊ "ကျွန်တော် ကူညီတဲ့ ရည်ရွယ်ချက်က မူလကတည်းက...မဖြူစင်ပါဘူး"
လီခဲရှို့ အံ့အားသင့်သွားပြီး တစ်ဖက်လူက သူ့သမီးကို စိတ်ဝင်းစားနေတဲ့ သဘောကို မနားလည်နိုင်ခဲ့ပေ။ထို့ကြောင့် စိတ်အားထက်သန်စွာဖြင့် “သခင်လေးရဲ့ နာမည်က ဘယ်လိုခေါ်ရမလဲ?” ဟု မေးလိုက်သည်။
တစ်ဖက်လူကလည်း အစိုးရအရာရှိပဲ ဖြစ်တာကြောင့် စုန့်ချင်းရှု ခဏတွေဝေပြီးမှ နောက်ဆုံး အမှန်အတိုင်း ပြောလိုက်သည် “လီ အရာရှိ ဒီလောက် ယဉ်ကျေးစရာ မလိုပါဘူး၊ ကျွန်တော်က စုန့်ချင်းရှုပါ၊ ပြောရရင် ကျွန်တော်တို့က လုပ်ဖော်ကိုင်ဖက်တွေပဲ”
“ရှင်က ပထမအဆင့် နန်းတွင်းအစောင့်အရှောက် စုန့်ချင်းရှုလား?” မိန်းကလေးက အံအားသင့်စွာဖြင့် သူ့ကို ကြည့်လိုက်သည်။
“ငါ ဒီလောက် နာမည်ကြီးနေလိမ့်မယ်လို့ မထင်ထားဘူး?” စုန့်ချင်းရှု နည်းနည်း ရှက်သွားသည်။
“ထိုင်ရှန်းမှာ နာမည်ကျော်ကြားခဲ့တဲ့ စုန့်သခင်လေးပဲ” လီခဲရှို့ သဘောပေါက်သွားပြီး သူ့ကို ချက်ချင်း ရင်းနှီးအောင် လုပ်လိုက်သည်။
ခဏအကြာတွင် စုန့်ချင်းရှု မျက်နှာပေါ်တွင် အခက်တွေ့သော အမူအရာဖြင့် “လီအရာရှိကို လိုက်ပို့ပေးသင့်ပေမဲ့ ဘုရင့်အမိန့်ကို ထမ်းဆောင်နေရတာမို့ စုန့်က ယန်ကျင်းမြို့တော်ကို အမြန်ပြန်ပြီး သတင်းပို့ရဦးမယ်…”
လီခဲရှို့က ရာထူးနေရာတွေမှာ အချိန်အတော်ကြာ ထမ်းဆောင်လာသူပီပီ ချက်ချင်း ကြားဖြတ်ပြောလိုက်သည် “စုန့်သခင်လေး စိတ်ပူစရာ မလိုပါဘူး၊ ကျွန်တော်တို့ကို လာကြိုဖို့ အတွက် သူတွေ မကြာခင် ရောက်တော့မှာပါ၊ ဘုရင့်အမိန့်က ပိုအရေးကြီးပါတယ်၊ စုန့်သခင်လေး အရင်သွားနှင့်ပါ”
လီယွမ်ကျစ် မျက်နှာပေါ်တွင် လိမ္မာပါးနပ်သော အသွင်အပြင် ပေါ်လာပြီး စုန့်ချင်းရှုနားကို ရောက်လာကာ “သခင်လေး၊ ကျွန်မကို တပည့်အဖြစ် လက်ခံပေးပါ” ဟု ဦးညွှတ်ရန် ပြင်လိုက်သည်။
စုန့်ချင်းရှု အံ့အားသင့်သွားပြီး သူ့လက်မောင်းသေးသေးလေးကို ဆွဲကိုင်ကာ ထူပေးလိုက်သည်။ လီယွမ်ကျစ်သည် တောင်ပိုင်းတွင် မွေးဖွားသော်လည်း ငယ်စဉ်ကတည်းက မြောက်ပိုင်းတွင် ကြီးပြင်းလာသူဖြစ်၍ ရဲရင့်ပြီး အခြားမိန်းကလေးများကဲ့သို့ ယောကျာ်းနှင့် မိန်းမကြား ထိတွေ့ဆက်ဆံမှု့ကို ဂရုမစိုက်ပါ။ စုန့်ချင်းရှုကတော့ ‘အခွင့်အရေးရတာကို မယူရင် မင်းကလူမိုက်ပဲ’ ဆိုတဲ့ စည်းမျဉ်းကို ကိုင်စွဲထားတော့ ပိုပြီးဂရုမစိုက်ဘူး။
“လီသခင်မလေး ဘာလုပ်နေတာလဲ?” စုန့်ချင်းရှု စိတ်ထဲမှာ မိုးကြိုးပစ်ခံလိုက်ရသလို ခံစားလိုက်ရသည်။ မူလက သူရဲကောင်းတစ်ယောက်လို အလှလေးကို ကယ်တင်ချင်ခဲ့တာ၊ အလှလေးက သူ့ကိုယ်သူ မပေးအပ်ရင်တောင် ရတယ်။ သူ့တပည့် ဖြစ်သွားရင်တော့ နောက်ပိုင်းမှာ ကိုယ်ကျင့်တရားဆိုင်ရာ ကျင့်ဝတ်စည်းကမ်းတွေကို ဖောက်ဖျက်ပြီး ဘာမှ မလုပ်ချင်တော့ဘူး၊ ဘာ့ကြောင့် သူမကို တပည့်အဖြစ်လက်ခံရမှာလဲ “ရှင့်ကို ဆရာတင်တာလေ၊ ရှင့်ရဲ့ သိုင်းပညာက ဒီလောက် မြင့်တာ၊ ကျမရှင့်ရဲ့ တစ်ဝက်လောက်၊ အိုး၊ မဟုတ်ဘူး၊ တစ်စိတ် တစ်ပိုင်းလောက်ပဲ သင်ယူနိုင်ရင်တောင် အခုထက် အများကြီး ပိုတော်လာမှာပေါ့” လီယွမ်ကျစ်က မျက်လုံးအဝိုင်းသားဖြင့် အပြစ်ကင်းစင်စွာ ပြောလိုက်သည်။
“အရူးမလေး!” လီခဲရှို့လည်း ရယ်ရခက်၊ ငိုရခက် ဖြစ်သွားသည်။ ဒီသမီးလေးကို အချစ်ဆုံးပဲဆိုတော့၊ မဆူရက်ဘူး။
“ခုနက မင်း ရွှေကြာအပ် ကို သုံးခဲ့တာ၊ ဒါဆို မင်းကို သိုင်းသင်ပေးတဲ့သူက ဝူတန်ဂိုဏ်းက ဖြစ်မှာပဲ။ ငါနဲ့ ဝူတန်ဂိုဏ်းရဲ့ ဆက်ဆံရေးက............... ဟင်း~” စုန့်ချင်းရှု ခေါင်းခါရင်း ပြတ်သားစွာ ပြောလိုက်သည် “ဘာပဲဖြစ်ဖြစ် ငါ မင်းကို တပည့်အဖြစ် လက်ခံမှာ မဟုတ်ဘူး”
“ဒီလိုလား” လီယွမ်ကျစ် မျက်နှာပေါ်တွင် စိတ်ပျက်အားငယ်သော အသွင်အပြင် ပေါ်လာပြီး ပါးစပ်မှ တီးတိုးပြောလိုက်သည် “ဒါပေမဲ့ ကျွန်မ တကယ်ကို တားမြစ်နန်းတော်ထိပ်က တိုက်ပွဲကို သွားကြည့်ချင်တာ”
“ဘာပြောလိုက်တာလဲ?” စုန့်ချင်းရှု အံ့သြစွာ သူမကို ကြည့်လိုက်သည်။
သူမ ရည်ရွယ်ချက်အမှန်ကို မတော်တဆ ထုတ်ဖော်လိုက်မိတာကြောင့် လီယွမ်ကျစ် အရေထူသော်လည်း မျက်နှာက ရှက်ကိုးရှက်ကန်းဖြစ်သွားတယ်။ အံကြိတ်ပြီး ချက်ချင်း ပြောလိုက်သည် “ဒီရက်ပိုင်း သိုင်းလောကမှာ အများဆုံး ပြောနေတာက ဟွာရှန်းဂိုဏ်းရဲ့ ဓားသူတော်စင် ဖုန်းချင်းယန်နဲ့ နေလနတ်ဆိုးဂိုဏ်းရဲ့ ဂိုဏ်းချုပ် ဒေါင်ဖန်းပုပိုင်တို့ တားမြစ်နန်းတော်ထိပ်မှာ တိုက်မယ့်တိုက်ပွဲအကြောင်းပဲ။ ဘယ်သူနိုင်မယ်ဆိုတာကို အမျိုးမျိုး ပြောနေကြတာ။ အဆိုးဆုံးကတော့ တိုက်ပွဲနေရာက နန်းတော်ထဲမှာဆိုတော့ သိုင်းလောကသားတွေက ကြည့်ချင်ပေမယ့် ကြည့်လို့မရဘူး ဖြစ်နေတာ။"
"ရှင်က နန်းတွင်းကိုယ်ရံတော်ဆိုတော့ ကျွန်မကို နန်းတော်ထဲ ခေါ်သွားနိုင်မယ်ဆိုရင် ကျွန်မ ဒီရာစုနှစ်ရဲ့ ထူးခြားတဲ့ တိုက်ပွဲကို မြင်ရမှာပေါ့၊ အဲဒီအခါကျရင် ဆရာနဲ့ ဖေဖေကို ပြန်ပြောပြပြီး သူတို့ကို မနာလိုဖြစ်အောင် လုပ်လို့ရပြီ၊ ဟွန့်!” လီယွမ်ကျစ် စကားပြောနှုန်းက အံ့မခန်း မြန်ဆန်လှသော်လည်း စကားလုံးတိုင်းက ကြည်လင်ပြတ်သားပြီး နားဝင်ချိုလှသည်။
လီခဲရှို့ စိတ်ထဲမှာ နွေးထွေးသွားခဲ့တယ်။ သူ အရင်က ခေတ်ပြိုင်ထိပ်သီး သိုင်းပညာရှင်နှစ်ယောက်ရဲ့ တိုက်ပွဲကို မကြည့်ရတာ နည်းနည်း နောင်တရတယ်လို့ ထုတ်ပြောမိခဲ့ဖူးသည်။ သမီးဖြစ်သူက အမြဲတမ်း စိတ်ထဲမှာ မှတ်ထားပြီး သူ့အတွက် အမြဲတမ်း တွေးပေးနေလိမ့်မယ်လို့ မထင်ထားခဲ့ဘူး။
“ခွင့်ပြုချက်မရှိဘဲ နန်းတော်ထဲ လူခေါ်သွားရင် သေဒဏ်ကျနိုင်တယ်” စုန့်ချင်းရှုက စိတ်ထဲမှ တွေးလိုက်သည်။ အကယ်၍ တကယ်တမ်း စစ်ဆေးမယ်ဆိုရင် သူ ဘယ်နှကြိမ်တောင်သေပြီးဖြစ်မည် မသိပေ။ ဒါပေမဲ့ ချင်မင်းဆက်က နယ်မြေအုပ်ချုပ်သူ အကြီးအကဲတစ်ယောက်ရဲ့ မျက်နှာရှေ့မှာတော့ ပုံမှန်အတိုင်း ဟန်လုပ်ပြရမှာပဲ။
လီခဲရှို့ဆိုတဲ့ မြေခွေးအိုကြီးက အစောကြီးကတည်းက ဘေးကို ရောက်သွားပြီး သူ့မိသားစုဝင်တွေကို နှစ်သိမ့်နေပြီး ဘာမှ မကြားသလို ဟန်ဆောင်နေလိမ့်မယ် လို့ဘယ်သူသိမလဲ။
လီခဲရှို့လည်း သူ့ကိုယ်ပိုင် ရည်ရွယ်ချက်တွေ ရှိခဲ့သည်။ သူက ဟန်လူမျိုးတစ်ယောက်ဖြစ်တာကြောင့်၊ စစ်ရေးအရ ဆင့်ဆင့်ရာထူးတက်လာကာ ယခုရာထူးအထိ ရောက်ရှိဖို့အတွက် မန်ချူးလူမျိုးများထက် အများကြီး ပို၍ ကြိုးစားခဲ့ရသည်။
စိတ်ထဲမှလည်း သမီးဖြစ်သူ နန်းတော်ထဲ ဝင်သွားပြီး မတော်တဆ ဧကရာဇ်က မြင်သွားခဲ့ရင်၊ အဲဒီ မြင်ကွင်းက ဘယ်လောက်တောင် လှလိုက်မလဲ… ဒီလောက် ကံမကောင်းရင်တောင် မြို့တော်မှာ ရာထူးကြီး ပိုက်ဆံရှိတဲ့ လူတွေ အများကြီးပဲ၊ မင်းသားတစ်ပါး ဒါမှမဟုတ် အကြီးအကဲဝန်ကြီးတစ်ယောက်ယောက်နဲ့ ပေါင်းလိုက်ရင်လည်း မဆိုးဘူး၊ ဟုတ်သားပဲ၊ မကြာသေးခင်က ဝေအမတ်ကြီးက ဧကရာဇ်ရဲ့ အချစ်ဆုံးလူယုံလို့ ကြားတယ်…