အခန်း ၁၅ - တစ္ဆေစျေးကွက်ရဲ့ သခင်လေး

ထိုလူစုကို ဦးဆောင်လာသူမှာ တည်ကြည်ခန့်ညားသော မျက်နှာထားရှိသည့် လူငယ်တစ်ဦး ဖြစ်သည်။ သူက ဝတ်ရုံခေါင်းမြှီးခြုံကို ဖယ်ရှားလိုက်သည့်အခါ ငွေဖြူရောင် ဆံနွယ်များက ဝဲဖြာကျလာခဲ့သည်။ သူ၏ မျက်ခုံးအစုံမှ ထက်မြက်ပြီး လွှမ်းမိုးချုပ်ကိုင်လိုသော အရှိန်အဝါများ ထွက်ပေါ်နေကာ မျက်ဝန်းများမှာလည်း အေးစက်သော ကြယ်ပွင့်များပမာ စူးရှလွန်းလှသည်။

သူ၏ အကြည့်က အောက်ခြေရှိ မြင်ကွင်းပေါ်သို့ ဝဲကျသွားပြီးနောက် မျက်နှာတွင် အနည်းငယ် ထူးဆန်းသော အမူအရာတစ်ခု ပေါ်လာခဲ့သည်။

"သခင်လေး... ဒီမိန်းမကို သားရဲတွေ အချင်းချင်း သတ်ဖြတ်ကြအောင် ဆွဲဆောင်တဲ့ သားကောင်အဖြစ် အသုံးချထားတာပဲ။ ဒီလိုနည်းလမ်းကို တွေးမိတဲ့လူက တကယ့်ကို ယုတ်မာရက်စက်တာပဲ"

သူ့နောက်တွင်ရှိသော နှာခေါင်းကွေးကွေးနှင့် အဖိုးအိုတစ်ဦးက လေးနက်သော အသံဖြင့် ပြောလိုက်သည်။

သူတို့ 'သခင်လေး' ဟု ခေါ်ဆိုနေသော ထိုလူငယ်၏ အမည်မှာ ရဲကူဟန် ဖြစ်သည်။

သူသည် မဟာဝေပြည်နယ်၏ မျိုးဆက်သစ်လူငယ်များထဲမှ ထိပ်တန်းပါရမီရှင် တစ်ဦးဖြစ်ပြီး ရှားပါးလှသော 'သတ်ဖြတ်ခြင်း ခန္ဓာကိုယ်' ကို ပိုင်ဆိုင်ထားသူ ဖြစ်သည်။ သူသည် သတ်ဖြတ်ရန်အတွက်သာ မွေးဖွားလာသူဖြစ်ပြီး တိုက်ပွဲများပြားလေလေ ပိုမိုအစွမ်းထက်လာလေလေ ဖြစ်သဖြင့် တူညီသောအဆင့်တွင် သူသည် ပြိုင်ဘက်ကင်းနီးပါး ဖြစ်ပေသည်။

သူ၏ ထူးချွန်လှသော ပါရမီနှင့် အကန့်အသတ်မဲ့သော အလားအလာတို့ကြောင့် သူသည် တစ္ဆေဧကရာဇ်၏ မျက်နှာသာပေးမှုကို ရရှိခဲ့ပြီး မွေးစားသားအဖြစ် အသိအမှတ်ပြုခြင်း ခံခဲ့ရရာ... လူတစ်ယောက်မှလွဲ၍ ကျန်လူအားလုံး၏ အထက်တွင် ရှိနေခဲ့သည်။

ထို့ကြောင့် သူသည် တစ္ဆေစျေးကွက်တွင် 'သခင်လေး' ဟူသော ဘွဲ့အမည်ကို ပိုင်ဆိုင်ထားပြီး တစ္ဆေဧကရာဇ်၏ ရာထူးကို ဆက်ခံမည့်သူအဖြစ် သတ်မှတ်ခြင်း ခံထားရသဖြင့် သူ၏ အဆင့်အတန်းမှာ အလွန်တရာ မြင့်မားလှသည်။

ရဲကူဟန်က ခပ်ဖွဖွ ရယ်မောလိုက်ရင်း—

"ဒါက အဓိကအချက်လို့ မင်းထင်လို့လား။ အဓိကအချက်က ဒီမိန်းမဆီက ထွက်နေတဲ့ ထူးခြားတဲ့ အနံ့အသက်ပဲ ဖြစ်ရမယ်။ ဒီသားရဲတွေ သူမကို အရူးအမူး ဖြစ်နေကြတာ မဆန်းပါဘူး။"

"သခင်လေး ပြောတာ မှန်ပါတယ်။ အဲဒီလူက သူမကို ဘာဆေးကျွေးလိုက်လဲဆိုတာ ကျွန်တော်လည်း တကယ်ကို သိချင်မိတယ်၊ အာနိသင်က တကယ့်ကို ထူးဆန်းလွန်းတယ်" ဟု အဖိုးအို ချူက စူးစမ်းလိုသော မျက်ဝန်းများဖြင့် မေးလိုက်သည်။

"အကြီးအကဲချူ ... တို့တွေ ဒီတစ်ခေါက် ကိုင်တွယ်ရမယ့် ပစ်မှတ်က မလွယ်ကူဘူး။ ဒီမိန်းမကို သုံးပြီး မမျှော်လင့်ထားတဲ့ ရလဒ်တစ်ခုခု ဖန်တီးနိုင်ရင် ကောင်းမယ်" ဟု ရဲကူဟန်က သူ၏ မျက်ဝန်းထဲတွင် ယုတ်မာသော အလင်းတန်းတစ်ခု ဖြတ်ပြေးလျက် အဓိပ္ပာယ်ပါပါ ပြောလိုက်သည်။

အကြီးအကဲချူသည် ခဏမျှ ကြောင်အသွားပြီးနောက် တစ်စုံတစ်ခုကို သဘောပေါက်သွားပုံရကာ ပျာပျာသလဲ ဖားလိုက်တော့သည်— "သခင်လေးက တကယ့်ကို ဉာဏ်ပညာ ကြီးမားလှပါတယ်!"

သူတို့၏ လက်ရှိရည်ရွယ်ချက်မှာ တောင်တန်း၏ ဗဟိုချက်အနက်ဆုံးပိုင်းသို့ သွားရောက်ကာ အလွန်ရှားပါးလှသော ဗီဇပြောင်းမျိုးစိတ်တစ်ခုဖြစ်သည့် 'တစ္ဆေမျက်နှာ နဂါးပျံဘုရင်' ကို ကိုင်တွယ်ရန် ဖြစ်သည်။

တစ္ဆေမျက်နှာ နဂါးပျံဘုရင်သည် သာမန်လူသားတစ်ဦး ထိတွေ့မိရုံမျှဖြင့် ချက်ချင်းသေဆုံးစေနိုင်သော ပြင်းထန်သည့် အဆိပ်အတောက်များကို သယ်ဆောင်ထားသော်လည်း၊ ရဲကူဟန်သည် ၎င်း၏ခန္ဓာကိုယ်မှ သန့်စင်သော အဆိပ်စွမ်းအင်ကို ထုတ်ယူကာ ထိပ်တန်းအဆိပ်ပြင်း မိစ္ဆာကျင့်စဉ်တစ်ခုကို ကျင့်ကြံရန် ဇွတ်အတင်း ဆုံးဖြတ်ခဲ့ခြင်း ဖြစ်သည်။

အကယ်၍ ဤကျင့်စဉ်ကို အောင်မြင်စွာ ကျင့်ကြံနိုင်ခဲ့ပါက ရဲကူဟန်သည် လက်တစ်ချက် မြှောက်ရုံမျှဖြင့် ကြောက်မက်ဖွယ်ကောင်းသော အဆိပ်ငွေ့ များကို ထုတ်လွှတ်နိုင်မည်ဖြစ်ရာ ကာကွယ်ရန် လုံးဝမဖြစ်နိုင်ပေ။ ၎င်း၏ စွမ်းအားမှာ အလွန်ကြီးမားလွန်းသဖြင့် ကပ်ရောဂါတစ်ခုကဲ့သို့ မိုင်ပေါင်းသောင်းချီ ပျံ့နှံ့သွားနိုင်ပြီး မရေတွက်နိုင်သော သက်ရှိသတ္တဝါများကို ဘေးဒုက္ခပေးနိုင်သည်။

ထိုအချိန်ကျရောက်လာပါက ဒါက မည်သည့်အင်အားစုကိုမဆို ပြင်းထန်စွာ ခြိမ်းခြောက်နိုင်မည့် သူ၏ ဝှက်ဖဲတစ်ခု ဖြစ်လာပေလိမ့်မည်။

ထို့ကြောင့် တစ္ဆေဧကရာဇ်သည် ဤစစ်ဆင်ရေးတွင် ရဲကူဟန်ကို ကူညီရန်အတွက် အကြီးအကဲချူကဲ့သို့သော 'ဂိုဏ်းချုပ်အဆင့်' ရှိ ကျွမ်းကျင်ပညာရှင်တစ်ဦးကို အထူးစေလွှတ်ခဲ့ခြင်း ဖြစ်သည်။

တစ္ဆေစျေးကွက်တွင် တင်းကျပ်လှသော အဆင့်အတန်း ခွဲခြားမှုနှင့် စည်းမျဉ်းစည်းကမ်းများ ရှိသည်ကို သိထားရမည်။

တစ္ဆေဧကရာဇ်၏ အောက်တွင် ကြီးမြတ်သော အကာအကွယ်ပေးသူ နှစ်ဦး၊ ကြီးမြတ်သော ကြယ်တာရာတမန်တော် ခြောက်ဦးနှင့် ကြီးမြတ်သော ဂိုဏ်းချုပ် ဆယ်ဦးတို့ ရှိကြပြီး၊ သူတို့သည် တစ္ဆေစျေးကွက်တွင် အစွမ်းအထက်ဆုံး လူအုပ်စုကို ကိုယ်စားပြုကြသည်။

အကြီးအကဲချူမှာ ထိုဂိုဏ်းချုပ်ဆယ်ဦးထဲမှ တစ်ဦးဖြစ်ပြီး ကြီးမားသောအာဏာကို ပိုင်ဆိုင်ထားသည့် ဝါရင့် အဋ္ဌမမြောက်အဆင့် ကျွမ်းကျင်ပညာရှင်တစ်ဦး ဖြစ်သည်။

ဤကဲ့သို့သော ပုဂ္ဂိုလ်ကြီးတစ်ဦးကို ရဲကူဟန်အား ကူညီရန် စေလွှတ်ခဲ့ခြင်းက တစ္ဆေဧကရာဇ်သည် သူ့ကို မည်မျှအထိ တန်ဖိုးထားကြောင်း ပြသနေပေသည်။

တစ္ဆေမျက်နှာ နဂါးပျံဘုရင်သည်လည်း အဋ္ဌမမြောက်အဆင့် ကျင့်ကြံခြင်းကို ပိုင်ဆိုင်ထားသည်ဟု သတင်းကြီးပြီး ၎င်း၏ ကြောက်မက်ဖွယ်ကောင်းသော အဆိပ်စွမ်းရည်နှင့် ပေါင်းစပ်လိုက်သည့်အခါ ဤစစ်ဆင်ရေးက မလွယ်ကူလှပေ။ အကယ်၍ သူတို့အနေဖြင့် ၎င်းကို လှည့်စားနိုင်မည်ဆိုပါက စောစောစီးစီးပင် အသာစီးရရှိနိုင်မည်ဖြစ်ပြီး ဖမ်းဆီးရန် ပိုမိုလွယ်ကူသွားမည် ဖြစ်သည်။

ထန်ချောင်ချောင်တွင် သားရဲများကို ဆွဲဆောင်နိုင်သည့် အာနိသင်ရှိနေသည်ကို မြင်လိုက်ရသဖြင့် ရဲကူဟန်သည် တစ္ဆေမျက်နှာ နဂါးပျံဘုရင်ကို ချောင်းမြောင်းတိုက်ခိုက်ကာ သေစေလောက်သော ရလဒ်တစ်ခု ရရှိစေမည့် အလွန်ရက်စက်သော အစီအစဉ်တစ်ခုကို ကြံစည်လိုက်တော့သည်။

"သွား... အဲဒီမိန်းမကို ငါ့ဆီ ခေါ်လာခဲ့။" ရဲကူဟန်က အမိန့်ပေးလိုက်သည်။

"ဟုတ်ကဲ့... သခင်လေး"

ချက်ချင်းဆိုသလိုပင် လက်အောက်ငယ်သားများ လှုပ်ရှားသွားကြပြီး ပဉ္စမမြောက်အဆင့်ရှိ သားရဲအနည်းငယ်ကို မြန်ဆန်စွာ သတ်ဖြတ်လိုက်ကာ ထန်ချောင်ချောင်ကို ရဲကူဟန်၏ ရှေ့မှောက်သို့ ခေါ်ဆောင်လာခဲ့ကြသည်။

ထန်ချောင်ချောင်သည် မူလက မိမိကိုယ်ကိုယ် ကယ်တင်ခြင်းခံလိုက်ရပြီဟု ထင်မှတ်ထားခဲ့သော်လည်း ဤလူများ၏ ဝတ်စုံပေါ်ရှိ သင်္ကေတများကို သတိပြုမိလိုက်သည့်အခါ ဖြစ်နိုင်ခြေတစ်ခုကို တွေးမိသွားပြီး နှလုံးသားတစ်ခုလုံး အောက်ခြေသို့ ပြုတ်ကျသွားခဲ့ရသည်။

ဒီလူတွေက... တစ္ဆေစျေးကွက်က ကျွမ်းကျင်ပညာရှင်တွေပဲ!

ဒါဆို... သူမက ဝံပုလွေတွင်းကနေ လွတ်မြောက်ပြီး သစ်ကျားတွင်းထဲကို ပြန်ကျသွားတာပေါ့လေ။

ထန်ချောင်ချောင်က အော်ဟစ်လိုက်သည်—

"သခင်တို့... ကျေးဇူးပြုပြီး ကျွန်မကို မသတ်ပါနဲ့! ကျွန်မက ချန်ယွမ် သန့်စင်မြေ ရဲ့ အတွင်းစည်းတပည့် တစ်ယောက်ပါ။ ကျေးဇူးပြုပြီး ကျွန်မကို ပြန်လွှတ်ပေးပါ!"

"ဟားဟား... ငါတို့ တစ္ဆေစျေးကွက်က ချန်ယွမ်သန့်စင်မြေကို ကြောက်တယ်လို့ မင်းထင်နေတာလား။ ဒါ့အပြင် မင်းက အတွင်းစည်းတပည့် တစ်ယောက်မျှသာပဲ။ မင်းက ဘာအဆင့်မို့လို့လဲ" ဟု လက်အောက်ငယ်သားတစ်ဦးက သရော်လိုက်သည်။

"မင်းမှာ စကားပြောပိုင်ခွင့် ရှိလို့လား။"

အကြီးအကဲချူက ထိုလက်အောက်ငယ်သားကို အေးစက်စွာ လှမ်းကြည့်လိုက်ရာ သူသည် ချက်ချင်း ခေါင်းငုံ့သွားပြီး လုံးဝ တိတ်ဆိတ်သွားတော့သည်။

"သခင်လေး... ဒီမိန်းမကို ခေါ်လာပါပြီ။ တို့တွေ အခုပဲ ထွက်ခွာကြမလား" ဟု အကြီးအကဲချူက တည်ကြည်ခန့်ညားသော ငွေဖြူရောင်ဆံနွယ်နှင့် လူငယ်လေးကို ရိုသေစွာ မေးမြန်းလိုက်သည်။

"နင်-နင်က ရဲကူဟန်လား"

ထန်ချောင်ချောင်သည်လည်း တစ္ဆေစျေးကွက် သခင်လေး၏ ကျော်ကြားလှသော နာမည်ကို ကြားဖူးထားသဖြင့် သူမ၏ မျက်နှာတွင် ချက်ချင်း ထိတ်လန့်အံ့သြမှုများဖြင့် ပြည့်နှက်သွားခဲ့သည်။

"ရဲတင်းလှချည်လား! သခင်လေးရဲ့ နာမည်ကို တိုက်ရိုက်ခေါ်ရဲတယ်လား" အကြီးအကဲချူက ဒေါသတကြီး ဟောက်လိုက်ပြီး သူမကို ရိုက်နှက်ရန် လက်မြှောက်လိုက်သည်။

"ထားလိုက်ပါ။ ငါတို့ လုပ်စရာ အရေးကြီးတဲ့ ကိစ္စရှိသေးတယ်" ဟု ရဲကူဟန်က ဂရုမစိုက်ဟန်ဖြင့် ပြောလိုက်သည်။

"ဟုတ်ကဲ့..."

"နေဦး"

ထန်ချောင်ချောင်သည် တစ်စုံတစ်ခုကို သတိရသွားပုံရပြီး အသည်းအသန် အော်ဟစ်လိုက်သည်— "မိစ္ဆာနှိမ်နင်းရေး မင်းသားနန်းတော်ရဲ့ အမွေခံက အနီးအနားမှာ ပုန်းနေတယ်.

ကျွန်မကို ဒီလိုအခြေအနေ ရောက်အောင်လုပ်တာ သူပဲ။ သူက အခု တစ်ယောက်တည်း ရှိနေတာ— နင်တို့ သူ့ကို မဖမ်းချင်ဘူးလား"

ထိုစကားလုံးများ ထွက်ပေါ်လာသည်နှင့်တစ်ပြိုင်နက်...

လူတိုင်း၏ အမူအရာ လုံးဝ ပြောင်းလဲသွားတော့သည်။

အထူးသဖြင့် ရဲကူဟန် ဖြစ်သည်။ သူ၏ မျက်ဝန်းများထဲမှ ထက်မြက်လှသော အလင်းတန်းများ ပန်းထွက်လာခဲ့ပြီး ဟင်းလင်းပြင်ကြီးတစ်ခုလုံးကို ခဲသွားစေတော့မည့်အလား ကြောက်မက်ဖွယ်ကောင်းသော အရှိန်အဝါတစ်ခု သူ၏ ခန္ဓာကိုယ်မှ မသိစိတ်ဖြင့် လျှံထွက်လာခဲ့သည်။

"အဲဒါ တကယ်ပဲလား.."

သူ၏ အကြည့်က စူးရှလွန်းလှပြီး သူမကို စစ်ဆေးမေးမြန်းလိုက်သည်။

ထန်ချောင်ချောင်သည် သူမ၏ ရင်တွင်းမှ ကြောက်ရွံ့မှုကို အောင့်အီးထားကာ ပျာပျာသလဲ ပြောလိုက်သည်—

"တကယ့်အမှန်တရားပါ! သူ အနီးအနားမှာ ရှိနေတယ်။ နင်တို့ ရှာကြည့်ရင် သေချာပေါက် တွေ့လိမ့်မယ် သူ့ကို အလွတ်မပေးပါနဲ့"

"ဟားဟား... မိစ္ဆာနှိမ်နင်းရေး မင်းသားနန်းတော်ရဲ့ အမွေခံနဲ့ ဒီမှာ ဆုံလိမ့်မယ်လို့ ငါ မထင်ထားခဲ့ဘူး။ သွား... သူ့ကို ချက်ချင်း ရှာဖွေပြီး ငါ့ဆီ ခေါ်လာခဲ့။ ငါ သူနဲ့ ကောင်းကောင်းကြီး စကားပြောချင်တယ်" ဟု ရဲကူဟန်က သရော်လိုက်သည်။

သူသည် နင်ညီအစ်ကို နှစ်ယောက်စလုံးကို ပြိုင်ဘက်များအဖြစ် အမြဲတမ်း သတ်မှတ်ထားခဲ့သည်။ မူလက အစ်ကိုဖြစ်သူ နင်ပေ ဖြစ်ပြီး၊ နောက်ပိုင်းတွင် ညီဖြစ်သူ နင်ဝူချွဲ ဖြစ်သည်။

ကျဆုံးသွားခဲ့သော နင်ပေနှင့် နှိုင်းယှဉ်ပါက နင်ဝူချွဲကသာ သူ့အတွက် အကြီးမားဆုံး ခြိမ်းခြောက်မှု ဖြစ်ပေသည်။

ထို့ကြောင့် သူသည် နင်ဝူချွဲကို ကိုင်တွယ်ရန် ရရှိနိုင်သမျှ အင်အားအားလုံးကို အသုံးချလိုပြီး၊ နင်ပေမှာမူ သေချာပေါက် အကောင်းဆုံး ရွေးချယ်စရာ ဖြစ်ပေသည်။

နင်ပေက မလိုက်လျောချင်လျှင်ပင် ကိစ္စမရှိပါချေ။ ရဲကူဟန်တွင် သူ့ကို သဘောတူလာအောင် အတင်းအကျပ် လုပ်နိုင်မည့် နည်းလမ်းပေါင်း သောင်းခြောက်ထောင် ရှိနေသည်။

"မင်းတို့အားလုံး... ငါ့အတွက် သေချာ ရှာဖွေစမ်း.. အဲဒီကောင်ကို သေချာပေါက် ရှာတွေ့ရမယ်"

အကြီးအကဲချူက ချက်ချင်း အမိန့်ပေးလိုက်သည်။

သူ၏ အဆင့်အတန်းအရ သူ၏ အာရုံခံစားနိုင်စွမ်းမှာ မှင်တက်လောက်စရာ ဖြစ်ပြီး ခြုံပုတ်ထဲတွင် နှံကောင်ဘယ်နှကောင် ခုန်နေသည်ကိုပင် သူ ကောင်းကောင်း သိနိုင်သည်။

"ဟုတ်ကဲ့"

လက်အောက်ငယ်သားများသည် တောအုပ်၏ ထောင့်စုံနေရာများသို့ လျင်မြန်စွာ ခွဲထွက်ကာ ရှာဖွေကြတော့သည်။

ရွှတ်... ရွှတ်... ရွှတ်

လူရိပ်များသည် သစ်ပင်များကြားတွင် ယှက်သန်းသွားကြပြီး လေပြင်းများ တိုက်ခတ်လာခဲ့သည်။

အမှောင်ထဲတွင် ပုန်းကွယ်နေသော နင်ပေသည် ရင်ထဲ၌ ထိတ်ခန့်သွားခဲ့ရသည်။

ဒီ ထန်ချောင်ချောင်က သူ့ကိုပါ ရေနစ်သူ လက်လှမ်းပြသလို ဆွဲချချင်နေတာပဲ

သူသည် မိစ္ဆာနတ်ဘုရား သွေးမျိုးဆက်ကို အားကိုးပြီး သူ၏ အရှိန်အဝါကို အပြည့်အဝ ဖုံးကွယ်ထားနိုင်သော်လည်း ဤကဲ့သို့ ဇကာတင် ရှာဖွေမှုကိုမူ ကြာရှည်မခံနိုင်ပေ။ စောစောနှင့် နောက်ကျရုံသာ ကွာပြီး သေချာပေါက် အရှာခံရမည် ဖြစ်သည်။

အဓိကအချက်မှာ ဆဋ္ဌမမြောက်အဆင့်အထက်ရှိ ကျွမ်းကျင်ပညာရှင် အုပ်စုတစ်စုနှင့် ရင်ဆိုင်ရပါက သူ၏ လက်ရှိအင်အားဖြင့် ခုခံရန် မဖြစ်နိုင်ခြင်းပင်။

ထိုအချိန်ကျပါက သူသည် စဉ့်နှီတုံးပေါ်က ငါးတစ်ကောင်ကဲ့သို့ အခြားသူများ၏ အစီအမံအတိုင်း အသတ်ခံရရုံသာ ရှိတော့မည်။

"အခြေအနေက ဒီလိုဖြစ်လာမှတော့... ငါလည်း အကွက်ပြောင်းပြီး အသစ်ပွင့်လာတဲ့ အဲဒီစွမ်းရည်ကို စမ်းသုံးကြည့်ရတော့မှာပေါ့..."

အောက်ခြေတွင် စေ့စေ့စပ်စပ် ရှာဖွေနေကြသော တစ္ဆေစျေးကွက် ကျွမ်းကျင်ပညာရှင်များကို ကြည့်ရင်း ထန်ချောင်ချောင်သည် တဟားဟားနှင့် ဆက်တိုက် ရယ်မောနေခဲ့သည်။

နင်လို့ နာမည်ရတဲ့ကောင်... ငါ့လို မိန်းမတစ်ယောက် ဒုက္ခရောက်နေမှတော့ နင်လည်း သက်သာမယ် မကျန်နဲ့

မကြာမီမှာပင် အော်ဟစ်သံတစ်ခု ထွက်ပေါ်လာသည်—

"သူ ဒီမှာရှိတယ်"

လူတိုင်း လှမ်းကြည့်လိုက်ကြရာ ချောမောလှသော လူငယ်တစ်ဦးက သူ၏ မျက်နှာတွင် ခက်ထန်သော အမူအရာတစ်ခုဖြင့် မိမိသဘောအလျောက် လမ်းလျှောက်ထွက်လာသည်ကို တွေ့လိုက်ရသည်။

"နာမည်ကျော် အမှိုက်အမွေခံနဲ့ ဒီလိုနေရာမျိုးမှာ ဆုံရတာ တကယ်ကို တိုက်ဆိုင်တာပဲ" ဟု ရဲကူဟန်က လှောင်ပြောင်လိုက်သည်။

"သခင်လေးရဲ... သူ့ရဲ့ လှည့်ကွက်တွေကို မယုံပါနဲ့! သူ့ရဲ့ ကျင့်ကြံခြင်းအဆင့်က ပြန်ကောင်းနေပြီ။ သူ ခုတင်ကတင် ကျွန်မရဲ့ ဇီဝပလ္လင်အဆင့် ရှိတဲ့ စီနီယာအစ်ကို နှစ်ယောက်ကို သတ်ပစ်လိုက်တာ" ထန်ချောင်ချောင်က ပျာပျာသလဲ ပြောလိုက်ပြီး နင်ပေ၏ လျှို့ဝှက်ချက်ကို ချက်ချင်း ဖွင့်ချပစ်လိုက်သည်။

"ဘာ...."

လူတိုင်း၏ မျက်ဝန်းများ ပြောင်းလဲသွားကြသည်။

ထိုစဉ်က မိစ္ဆာနှိမ်နင်းရေး ဘုရင်၏ သားကြီးဖြစ်သူ နင်ပေသည် နတ်ဘုရားအရိုးနှင့် မွေးဖွားလာခဲ့သဖြင့် လောကတစ်ခုလုံးကို လှုပ်ခတ်စေခဲ့သည်။ သူသည် အသက်တစ်ဆယ့်နှစ်နှစ် အရွယ်တွင် ပဉ္စမမြောက်အဆင့်သို့ ရောက်ရှိခဲ့ပြီး အကန့်အသတ်မဲ့သော အလားအလာများနှင့်အတူ 'လူငယ်အထွတ်အထိပ်' အဖြစ် ချီးမွမ်းခြင်း ခံခဲ့ရသည်။ နောက်ပိုင်းတွင် မတော်တဆမှုတစ်ခုကြောင့် အမှိုက်တစ်ဦး ဖြစ်သွားခဲ့ရသည်မှာ မဟာဝေပြည်နယ်တစ်ခုလုံး သိရှိထားသော အချက်အလက် ဖြစ်သည်။

ယခု ခုနစ်နှစ်ကြာပြီးနောက်တွင် အခြေအနေက ပြောင်းလဲသွားခဲ့ပြီ ထိုအမှိုက်၏ ကျင့်ကြံခြင်းအဆင့်က အမှန်တကယ် ပြန်လည်ကောင်းမွန်လာခဲ့ပြီ တဲ့လား။

ဒါက ဘာကို ဆိုလိုတာလဲဆိုတာ ရှင်းလင်းလှပေသည်။

"ကောင်းကင်ကြီးက နင်မိသားစုကို တကယ်ပဲ စောင့်ရှောက်တာပဲ..."

အကြီးအကဲချူ သက်ပြင်းချလိုက်မိသည်။ နင်ညီအစ်ကို နှစ်ယောက်စလုံး အပြည့်အဝ ရင့်ကျက်လာမည့်တစ်နေ့တွင် မိစ္ဆာနှိမ်နင်းရေး မင်းသားနန်းတော်က မည်မျှအထိ တောက်ပလာမည်ကို သူ စိတ်ကူးပင် မယဉ်နိုင်တော့ချေ။

ထိုအချိန်ကျပါက မဟာဝေပြည်နယ်တစ်ခုလုံးတွင် သူတို့ကို လှုပ်ခတ်နိုင်မည့်သူ ရှိတော့မည်မဟုတ်ပေ။

ရဲကူဟန်၏ အမူအရာမှာမူ ရေခဲကဲ့သို့ အေးစက်သွားခဲ့ပြီး သူ၏ အကြည့်က တုန်လှုပ်ဖွယ်ကောင်းလောက်အောင် မှောင်မိုက်သွားကာ ရင်ထဲတွင် ကြီးမားသော အန္တရာယ်ရိပ်တစ်ခု ဖြစ်ပေါ်လာခဲ့သည်။

ဒါက သူ လုံးဝ မြင်တွေ့ချင်သော မြင်ကွင်းမဟုတ်ပေ။

ယခုအချိန်တွင် သူ၏ အစီအစဉ်ကို ပြောင်းလဲရတော့မည်။

နင်ပေက ထန်ချောင်ချောင်ကို စိုက်ကြည့်ကာ အေးစက်စွာ ပြောလိုက်သည်။

"မင်းလို ကုန်းတိုက်တတ်တဲ့ မိန်းမယုတ်ကို ငါ စောစောကတည်းက သတ်ပစ်ခဲ့သင့်တာ!"

"ဟားဟား... နင် နောင်တရဖို့ နောက်ကျသွားပြီ! နင်လို ယုတ်မာတဲ့ကောင်... နင်လုပ်ခဲ့သမျှ အရာအားလုံးအတွက် ပြန်ပေးဆပ်ရစေရမယ်"

တစ်ဖက်လူ ဒုက္ခရောက်နေသည်ကို မြင်ရသဖြင့် ထန်ချောင်ချောင်သည် အလွန်တရာ ကျေနပ်အားရနေခဲ့သည်။

"နင်ပေ... မင်းရဲ့ ကျင့်ကြံခြင်းအဆင့်က ပြန်ကောင်းလာပြီဆိုတော့ ငါ မင်းကို အခု လွှတ်ပေးလို့ မရတော့ဘူး"

ဟု ရဲကူဟန်က အေးစက်စွာ ပြောလိုက်သည်။

"ဘာလဲ... မင်း ငါ့ကို သတ်ဖို့ ကြံနေတာလား။ ငါ့ရဲ့ အဆင့်အတန်းကို မမေ့နဲ့ဦး" နင်ပေက လုံးဝ ကြောက်ရွံ့ပုံမပေါ်ဘဲ တုံ့ပြန်လိုက်သည်။

"ဒီလို တောရိုင်းမြေရိုင်းထဲမှာ မင်းကို သတ်လိုက်လို့... လက္ခဏာတွေ အားလုံးကို စင်ကြယ်အောင် ရှင်းလင်းထားနိုင်ရင် မိစ္ဆာနှိမ်နင်းရေး မင်းသားနန်းတော်ကတောင် စုံစမ်းသိရှိနိုင်ပါ့မလား။

ဒါ့အပြင် မင်းက ငါ့အတွက် ပိုပြီး အသုံးဝင်တဲ့နေရာ ရှိသေးတယ်"

ရဲကူဟန် စကားပြောပြီးနောက် သူ၏ မျက်လုံးဖြင့် အချက်ပြလိုက်သည်။

အကြီးအကဲချူက ချက်ချင်း သဘောပေါက်သွားပြီး သူ၏ လက်ဝါးကို ဆန့်ထုတ်လိုက်သည်။

ရွှတ်၊ ကြောက်မက်ဖွယ်ကောင်းသော စွမ်းအင်လှိုင်းများကို ထုတ်လွှတ်နေသည့် အနီရင့်ရောင် လက်ဝါးကြီးတစ်ခု ကောင်းကင်ထက်တွင် စုစည်းလာခဲ့ပြီး အောက်ခြေရှိ နင်ပေဆီသို့ ရိုက်ချလိုက်တော့သည်။

"မင်း"

နင်ပေသည် ထိတ်လန့်တကြားဖြင့် ဒေါသထွက်သွားခဲ့သည်။ သူသည် ခုခံရန် ကြိုးစားခဲ့သော်လည်း ထိုလက်ဝါးကြီးက သူ့ကို မြေပြင်ပေါ်သို့ ပြင်းထန်စွာ ရိုက်ချပစ်လိုက်သဖြင့် သွေးများ အန်ထုတ်လိုက်ရတော့သည်။

ဒါက စစ်မှန်သော စွမ်းအင် ဖြင့် ဖွဲ့စည်းထားသော လက်ဝါးကြီးဖြစ်ပြီး ဝိညာဉ်ရေးရာစွမ်းအား ထက် များစွာ ပိုမိုသာလွန်လှသည်။

အဋ္ဌမမြောက်အဆင့်ကို 'မူလပြန်လည်ရောက်ရှိခြင်းအဆင့်' ဟုလည်း ခေါ်ဆိုကြသည်။

ဤအဆင့်သို့ ရောက်ရှိလာသော ကျင့်ကြံသူများသည် ကျယ်ပြောလှသော စစ်မှန်သောစွမ်းအင်များကို စုစည်းနိုင်ကြပြီး ၎င်းတို့ကို တိုက်ခိုက်ရန် သို့မဟုတ် ကာကွယ်ရန် အသုံးပြုကြသည်။ စစ်မှန်သောစွမ်းအင် တစ်စက်တည်းကပင် သံမဏိကို ဖြတ်တောက်နိုင်ပြီး ကျောက်တုံးကို ဖောက်ထွက်နိုင်သည့် ကြီးမားသော စွမ်းအားကို ပိုင်ဆိုင်ထားသည်။

အကြီးအကဲချူသည် နင်ပေကို ဖိနှိပ်လိုက်ပြီးနောက် သူ၏လူများကို ရှေ့သို့တက်ကာ ဖမ်းဆီးတုတ်နှောင်ရန် အမိန့်ပေးလိုက်သည်။

တင်းကျပ်စွာ တုတ်နှောင်ခံထားရပြီး သနားစရာကောင်းလှသော နင်ပေကို ကြည့်ရင်း ထန်ချောင်ချောင်သည် စိတ်ထဲမှ အော်ဟစ်လိုက်မိသည်—

"ခံရမှာပဲ... တကယ့်ကို ခံရမှာပဲ!"

"မင်းတို့ အတိအကျ ဘာလုပ်ဖို့ ကြံစည်နေတာလဲ..." နင်ပေက သွားများကို တင်းတင်းကြိတ်ထားပြီး နှုတ်ခမ်းထောင့်တွင် သွေးစများ ပေကျံနေခဲ့သည်။

"မင်း နောက်ကျရင် သိလာမှာပါ"

ရဲကူဟန်၏ အပြုံးက နက်နဲလှသည်။

သူသည် နင်ပေ၏ နတ်ဘုရားအရိုးကို မက်မောနေခဲ့သည်မှာ ကြာပြီဖြစ်သော်လည်း လှုပ်ရှားရန် အခွင့်အရေး မရှိခဲ့ပေ။ ယခုအခါ သူသည် အစီအစဉ်အတိုင်း လုပ်ဆောင်ရန် ဆုံးဖြတ်လိုက်ပြီ ဖြစ်သည်။ နင်ပေကို ပြန်ခေါ်သွားပြီးနောက် ပထမဦးစွာ သူ၏ နတ်ဘုရားအရိုးကို ထုတ်ယူမည်၊ ထို့နောက် သူ့ကို လျှို့ဝှက်စွာ ဖျက်ဆီးပစ်ခြင်းဖြင့် အစွမ်းထက်သော ပြိုင်ဘက်တစ်ဦးကို ဖယ်ရှားပစ်မည် ဖြစ်သည်။

ချက်ချင်းဆိုသလိုပင် ထိုလူစုသည် တောင်တန်း၏ အနက်ဆုံးအပိုင်းသို့ ဦးတည်ထွက်ခွာသွားကြပြီး ဤစစ်ဆင်ရေး၏ အဓိကပစ်မှတ်ဖြစ်သော တစ္ဆေမျက်နှာ နဂါးပျံဘုရင်ကို ကိုင်တွယ်ရန် ပြင်ဆင်ကြတော့သည်။

အတန်ကြာပြီးနောက်...

စောစောက နေရာတွင်ပင် ချောမောလှသော လူငယ်တစ်ဦးသည် သစ်ပင်ကြီးတစ်ပင်၏ နောက်ကွယ်မှ ပြုံးစိစိဖြင့် လမ်းလျှောက်ထွက်လာခဲ့သည်။

အကယ်၍ ရဲကူဟန်နှင့် အခြားသူများသာ သူ့ကို မြင်တွေ့လိုက်ရပါက သူတို့ ဖမ်းဆီးခေါ်ဆောင်သွားခဲ့သော နင်ပေနှင့် တစ်ထပ်ထည်း တူညီနေခြင်းကြောင့် လုံးဝ မှင်တက်သွားကြမည်မှာ အမှန်ပင်....

◼️◼️◼️◼️◼️◼️◼️◼️◼️◼️