အခန်း ၈၉ ကိုယ့်ကို အထင်သေးတာလား

ချန်းလျန် မင်းက အခု ကိုယ်ဝန်နဲ့လေ ပြင်းပြင်းထန်ထန် လှုပ်ရှားဖို့ မသင့်တော်ဘူး။ ဒါကိုမေ့လိုက်ရင် မကောင်းဘူးလား။

ဘာကိုမေ့ရမှာလဲ နင်ပဲ ငါ့ကိုအဲဒီဆေးလုံး ပေးထားတာ မဟုတ်ဘူးလား။ အဆင်ပြေသွားလိမ့်မယ်လို့လည်း နင်ပဲ ပြောခဲ့တာလေ။

"အဲဒါက"

ပြီးတော့ နင့်ရဲ့ကျင့်စဉ်က ဒီလောက် မြင့်နေတာကို ငါနဲ့ အတူတူ ဒါမျိုးလုပ်လို့ ဒဏ်ရာရမှာ ကြောက်နေတာလား။ နင်မလုပ်နိုင်ဘူးလို့ ပြောချင်တာလား။

"မင်းကို ထိခိုက်မိမှာ စိုးလို့ပါ"

ချန်းချင်းနန်းဆောင်ရှေ့တွင် သူတို့၏ စကားဝိုင်းကို နားထောင်နေသော ရှောင်ပင်းမှာ နဖူးတွင် ချွေးစေးများ ပြန်လာတော့သည်။

ဟို... အရှင်မ အရှင်... အကယ်၍ ဓားဆန္ဒလေ့ကျင့်မယ်ဆိုရင် အဲဒီလို စကားလုံးမျိုးတွေ မသုံးတာ ပိုကောင်းမယ် ထင်ပါတယ်။

လူတွေ နားလည်မှု လွဲကုန်ကြလိမ့်မယ်လို့ ကျွန်မ ခံစားနေရလို့ပါ။

သူတို့နှစ်ဦးစလုံး ရှောင်ပင်းကို ဇဝေဇဝါ ကြည့်လိုက်ကြသည်။ နန်းတွင်းလက်နက်ကို ကိုင်ထားသော ရဲ့ချန်းလျန်က ရှောင်ပင်းကို နားမလည်နိုင်သလို ကြည့်ကာ "ဒါက ဘာနားလည်မှု လွဲစရာ ရှိလို့လဲ။ ဓားဆန္ဒ လေ့ကျင့်တာက ဓားဆန္ဒလေ့ကျင့်တာပဲလေ"

ချူနင် မတတ်သာသလို သက်ပြင်းချလိုက်သည်။

"ကမ်းခြေကို ရောက်တာနဲ့ ပထမဆုံး လုပ်ရမယ့် ဓားဆန္ဒက ကိုယ်ချစ်တဲ့သူကို သတ်ရမှာ မဟုတ်လား။ ဒါပေမဲ့ ကိုယ်တို့က ကမ်းခြေတောင် မရောက်သေးဘူးလေ"

"နန်းတွင်းမှာ ဘာကိစ္စမှလည်း မရှိဘူး အားလုံးက ငါ့မင်္ဂလာပွဲအတွက် ပြင်နေကြတာ။ တိုင်းရေးပြည်ရာတွေလည်း မရှိဘူး ပုံမှန်ဆိုရင်တောင် ငါကိုင်တွယ်စရာ ဘာမှ သိပ်မရှိပါဘူး။ ဒီဧကရီလုပ်ရတာ တကယ် ပျင်းစရာ ကောင်းတယ်"

ရဲ့ချန်းလျန်က တိုးတိုးလေး ရေရွတ်သည်"ဒါဆို နင် အားနေတုန်း ငါနဲ့ အတူတူ ဓားဆန္ဒ လေ့ကျင့်ပေးတာ ဘာဖြစ်လို့လဲ"

မနေ့ညကကျတော့ ငါ့ကို ဖက်ပြီး နယ်ဖတ်နေတာကျတော့ရော အလကား နယ်ဖတ်တာလား။

သူမက တကယ်ပင် ပျင်းနေသဖြင့် အဖော်လိုက်ပေးမည့်သူကို ရှာနေခြင်းဖြစ်သည်။ ချူနင်က အကောင်းဆုံး ရွေးချယ်မှု မဟုတ်ပါလား။

သူက ကျင့်စဉ် မြင့်သဖြင့် ဒဏ်ရာရမှာလည်း ကြောက်စရာ မလိုဘူး။ မနက်ဖြန်ကျရင် သူက သူမရဲ့ ခင်ပွန်းဖြစ်လာတော့မှာဆိုတော့ သူ့ကို ထိခိုက်မိမှာလည်း သူမ မစိုးရိမ်တော့ပါဘူး။ အစွမ်းကုန် တိုက်ခိုက်လို့ရတဲ့ အကောင်းဆုံးသဲအိတ်ကြီးပေါ့။

ယခုအချိန်တွင် ရဲ့ချန်းလျန်သည် ဝတ်စုံနက်ကို လဲလှယ်ထားပြီး ဆံပင်ကို မြင်းမြီးပုံစံ နောက်မှာ စည်းထားသည်။ သူမ၏ ဝတ်စားဆင်ယင်မှုက ရိုးရှင်းပြီး သပ်ရပ်လှကာ လက်ထဲတွင် ခုနစ်ရောင်ခြယ် ဓားရှည်ကို ကိုင်ထားပြီး စမ်းသပ်ကြည့်ရန် စိတ်အားထက်သန်နေသည်။

တကယ်ကို ပျင်းစရာ ကောင်းလှသဖြင့် စိတ်ဝင်စားစရာ တစ်ခုခု ရှာလုပ်ရမည်။ တစ်နေကုန် အခန်းထဲမှာပဲ အောင်းနေပြီး ပစ္စည်းတွေကို လိုက်ထိနေလို့ကတော့ ဘယ်သူမဆို ပျင်းသွားမှာပဲလေ။

ဘာပဲဖြစ်ဖြစ် နင်ကဒဏ်ရာရမှာ မကြောက်ဘူးပဲ။ ငါနဲ့ လေ့ကျင့်ပေးစမ်းပါ ရှောင်ပင်းရဲ့ ကျင့်စဉ်က အရမ်း နိမ့်လွန်းတော့ သိပ်စိတ်မပါဘူး။

မိမိရှေ့ရှိ ရဲ့ချန်းလျန်ကို ကြည့်ပြီး ချူနင်သည် လက်ကို နောက်ပစ်ကာ ဆရာကြီး တစ်ယောက်လို ဟန်ဆောင်လိုက်သည်။

"ကိုယ် မင်းနဲ့ ကစားပေးလို့ ရပါတယ် ဒါပေမဲ့ မင်း အစွမ်းကုန် တိုက်ရမယ်နော်။ အကယ်၍ မင်းက ကိုယ့်ကို နောက်ကိုခြေတစ်လှမ်း ဆုတ်အောင် လုပ်နိုင်ရင် မင်းနိုင်ပြီ ဘယ်လိုလဲ"

ထိုစကားကို ကြားသော် ရဲ့ချန်းလျန် နှုတ်ခမ်းတွန့်သွားသည်။

သူက ငါ့ကို အထင်သေးနေတာလား။

"ချူနင် နင့်နောက်ကို ကြည့်လိုက်ဦး အဲဒါ နင်အရင်က သတ်လိုက်တဲ့ လူမဟုတ်လား"

"ရှောင်ပင်း မြန်မြန် သွားကြစမ်း"

ရဲ့ချန်းလျန်၏ မျက်နှာအမူအရာ ချက်ချင်း ပြောင်းလဲသွားသည်။ သူမသည် ရှောင်ပင်းကို ဆွဲကာ ထွက်သွားရန် ဟန်ပြင်လိုက်သည်။ ထိုသည်ကို မြင်သော် ချူနင် ဇဝေဇဝါ ဖြစ်သွားရသည်။

သူက ပြန်ရှင်လာတာလား သူ့ဝိညာဉ်ကို ငါကိုယ်တိုင် ဆွဲဖြတ်ပစ်ခဲ့တာပဲ။ သူ ဘယ်လို ပြန်လာနိုင်မှာလဲ။ အထက်ဘုံမှာ တစ်ခုခု ဆက်နွယ်နေတာမျိုး ရှိနေသေးလို့လား။

သူ ခေါင်းလှည့်လိုက်သည်နှင့် တစ်ပြိုင်နက် နောက်ကျောမှ အတွန်းခံလိုက်ရသည်။ ချူနင်၏ ပါးစပ် တွန့်သွားရတော့သည်။

"မဟုတ်ဘူး ချန်းလျန် မင်းက"

"ငါ နိုင်ပြီ"

ကောင်းပါပြီ... ကောင်းပါပြီ ဒီလိုကစားချင်တာပေါ့လေ။

ချူနင်၏လက်ထဲတွင် ဓားရှည်တစ်လက် ရုတ်တရက် ပေါ်လာသည်။ သူ ခြေဖျားဖြင့် မြေကြီးကို အသာအယာ တောက်လိုက်သော် ဆန်းသစ်ပြီး ကျယ်ပြောလှသော ကောင်းကင်နှင့် တိမ်ပင်လယ် ကမ္ဘာကြီးတစ်ခု ရုတ်တရက် ပေါ်ထွက်လာတော့သည်။

စိတ်ကူးတစ်ခုက ကမ္ဘာတစ်ခု စိတ်ကူးတစ်ခုက စကြာဝဠာတစ်ခုပင်။

ရဲ့ချန်းလျန် ကြောင်နေတုန်းမှာပင် ဓားဆန္ဒတစ်ခုက သူမ၏ မျက်နှာဆီသို့ ရုတ်တရက် တိုးဝင်လာသည် သီသီလေး ရှောင်လိုက်ရသော ရဲ့ချန်းလျန် မှင်တက်သွားရသည်။

မဟုတ်ဘူး ငါ နင့်ကိုတစ်ခါပဲ လှည့်စားတာကို နင်က အတည်ကြီး လုပ်နေတာလား။

ဘာမှတောင် မပြောဘဲနဲ့ နင်တကယ်ပဲ လူကို ခုတ်တော့မှာလား။

နင် ငါ့ကိုလှည့်စားတုန်းက ငါတောင် နင့်ကို မခုတ်ဘူး။

သို့သော်လည်း ချူနင်သာ တကယ် တိုက်ခိုက်လိုက်လျှင် သူမအခုလောက်ဆို လောကကြီးထဲမှာ ရှိတော့မှာ မဟုတ်ဘူးဆိုတာကို သူမ ရုတ်တရက် သဘောပေါက်သွားသည်။

သတိပြန်ဝင်လာသည့်အခါ ခုနက သူမ ချူနင့်ကို လှည့်စားခဲ့တာကလည်း ဒီအတိုင်းပဲဆိုတာ သိလိုက်ရသည်။

ကဲလေ ငါ့အရှုံးကို လက်ခံပါတယ်။

သူက သူမနှင့်အတူ ဓားဆန္ဒ လေ့ကျင့်ပေးချင်နေမှတော့ ရဲ့ချန်းလျန် ဝန်လေးနေမှာ မဟုတ်ပါဘူး။ ယခုအချိန်တွင် သူမ အနည်းငယ် စိတ်လှုပ်ရှားနေမိသည်။

သူတို့နှစ်ဦး စကားသိပ်မပြောဖြစ်ကြဘဲ ရဲ့ချန်းလျန်သည် နန်းတွင်းလက်နက်ကို အစွမ်းကုန် အသုံးချကာ သတ်ဖြတ်ခြင်း နည်းဗျူဟာကို ထုတ်ဖော်လိုက်တော့သည်။

သူမသည် ဤနန်းတွင်းလက်နက်၏ တကယ့်အစွမ်းကို သိချင်နေခြင်း ဖြစ်သည်။ အကယ်၍ ချူနင် ဘေးမှာ မရှိတဲ့အချိန်မှာ ဒီလက်နက် ရှိနေပေမဲ့ ဘယ်လိုသုံးရမှန်း မသိဖြစ်မှာကို သူမ စိုးရိမ်နေခြင်းပင်။

ဓားဆန္ဒတစ်ခုက လေထုကို ခွဲထွက်သွားပြီး ကမ္ဘာမြေ၏ တိမ်တိုက်နှင့် ပင်လယ်ကို မွှေနှောက်လိုက်သည်။ ထည်ဝါလှသော အရှိန်အဝါများ စုစည်းမှုအောက်တွင် ကောင်းကင်ဖြစ်စဉ်ကိုပင် ဖိနှိပ်နိုင်သည့် စွမ်းအားများ ရှိနေသည်။ 

ဓားစွမ်းအင်တစ်ခုက ပေါက်ကွဲထွက်လာပြီး မြေကြီးကိုပင် အက်ကွဲစေကာ ချူနင်၏ မျက်နှာဆီသို့ တိုက်ရိုက် ဦးတည်သွားတော့သည်။

ရှောင်ပင်းကတော့ ဘာခံစားချက်မှ မရှိဘဲ ထိုနေရာမှာတင် အသာအယာ ထိုင်ကြည့်နေသည်။ ရှောင်ပင်းက အရာအားလုံးကို သေချာ မြင်နေရတာကိုး။ 

ယခုအချိန်တွင် ရဲ့ချန်းလျန်၏ ဓားကွက်များကို လေ့လာသင်ယူခြင်းက ပို၍ ကောင်းပါသည်။

နန်းတွင်းလက်နက်၏ အစွမ်းမှာ မဟာဧကရာဇ်တစ်ပါးနှင့် ညီမျှပြီး ဤလောကတွင် သွန်းလုပ်နိုင်သော အစွမ်းအထက်ဆုံး လက်နက် ဖြစ်သည်။ 

သူတော်စင်အဆင့်ကျင့်ကြံသူတစ်ဦးက အဆင့်များစွာ ကွာခြားနေသော တာအိုအဆင့်ကျင့်ကြံသူကို သတ်ဖြတ်ရန်မှာလည်း ခဲယဉ်းလှသည် မဟုတ်ပါချေ။

ချူနင်သည် လက်တစ်ဖက်ဖြင့် ဓားကို ကိုင်ထားပြီး ထိုဓားဆန္ဒကို တိုက်ရိုက်ထိုးဖောက်လိုက်သည်။ ထို့နောက် ဓားဆန္ဒပေါင်း သန်းချီသော တိုက်ခိုက်မှုများက ရဲ့ချန်းလျန်ဆီသို့ အုံနှင့်ကျင်းနှင့် တိုးဝင်သွားတော့သည်။

၎င်းမှာ ဇနီးသည်ကို လက်နက်သစ်နှင့် ရင်းနှီးအောင် ကူညီပေးနေခြင်းသာ ဖြစ်သည်။ အရင်က ပြောခဲ့သလို သူမ သူ့ကို ထိခိုက်အောင် လုပ်နိုင်မလားဆိုတာကတော့ ဖြစ်နိုင်ခြေ မရှိပါဘူး။ သူ့ကို ထိခိုက်အောင် လုပ်နိုင်တာဆိုလို့ သူ့ရဲ့နှလုံးသားပဲ ရှိမှာပါ။ ခုနက လှည့်စားခံလိုက်ရတုန်းကတော့ သူ တကယ်လို့ ထင်သွားခဲ့တာလေ။

ရဲ့ချန်းလျန် မှင်တက်သွားပြီး ထိုနေရာမှာတင် တောင့်တောင့်ကြီး ဖြစ်နေရသည်။

ဓားဆန္ဒ လေ့ကျင့်မယ်လို့ သဘောတူထားတာ မဟုတ်လား။ ဘာလို့ အခုတိုက်ခိုက်နေတာလဲ

ဒီဓားဆန္ဒပေါင်း သန်းချီကို ငါခံနိုင်ရည် ရှိမယ်လို့ နင် တကယ် ထင်နေတာလား။ ဒါ ကလဲ့စားချေတာလား။

ထားလိုက်ပါတော့ သူမဘာသာ တောင်းဆိုခဲ့တာပဲ။ ဒဏ်ရာရရင်လည်း သူမရဲ့ အမှားပဲပေါ့ သူမသည် သူမ၏ကျင့်စဉ်ကို အစွမ်းကုန် အသုံးချကာ အထူးသဖြင့် မွှေးရနံ့ဓားကို ထုတ်ဖော်ပြီး ထိုဓားဆန္ဒများကို ဖယ်ရှားလိုက်သည်။

ရဲ့ချန်းလျန်၏ မျက်နှာတွင် အံ့သြတုန်လှုပ်မှုများ ပေါ်ပေါက်လာတော့သည်။

မဟုတ်ဘူး ဒီနန်းတွင်းလက်နက်က ဒီလောက်တောင် အစွမ်းထက်တာလား။

ထိုဓားဆန္ဒမှာ 'ကောင်းကင်ဖြစ်စဉ်အဆင့်မှာတောင် ဒီလောက် ခမ်းခမ်းနားနား မထုတ်ဖော်နိုင်တာကို ဓားတစ်ချက်တည်းနဲ့ ဖယ်ရှားနိုင်ခဲ့တာလား။

ထို့နောက် စိတ်လှုပ်ရှားမှုများက နောက်မှ ထပ်ကြပ်မကွာ လိုက်ပါလာသည် အလွန် အစွမ်းထက်လှသည် သူမ တစ်ယောက်တည်းနဲ့တောင် ထျန်းရွှမ်တိုက်ကြီးကို သိမ်းပိုက်နိုင်တော့မှာပဲ ပြီးတော့ ချူနင်က နေရာတိုင်းမှာ လျှော့ပေးနေတာလေ။ ဒါဆိုရင် သူမလည်း လျှော့ပေးမှာ မဟုတ်တော့ပါဘူး။ သူမ၏ အစွမ်းက ဘယ်လောက်အထိ ရှိသလဲဆိုတာကို သူမ သိချင်နေသည်။

ပုံရိပ်တစ်ခုကနေ မရေမတွက်နိုင်သော ပုံရိပ်များအဖြစ် ပြောင်းလဲသွားပြီး ဓားကွက်များကို တစ်ပြိုင်နက် ထုတ်ဖော်လိုက်ကြသည်။

ကိုယ်ဝန်ရကတည်းက ဒီလို ပြည့်စုံတဲ့ တိုက်ပွဲမျိုး မကြုံဖူးသဖြင့် ယနေ့ သူမအထူးပင် စိတ်လှုပ်ရှားနေသည်။

ကျင့်စဉ်မြင့်တဲ့သူနဲ့ လေ့ကျင့်ရတာ ဓားဆန္ဒကို သွေးဖို့ တကယ်ကောင်းတာပဲ အကောင်းဆုံးပဲ။

တစ်နေ့တာမှာ ထိုသို့ပင် ကုန်ဆုံးသွားပြီး မင်္ဂလာပွဲကျင်းပရန် တစ်ရက်သာ လိုတော့သည်။ နောက်တစ်နေ့ မနက်တွင် စိတ်လှုပ်ရှားနေသော ရဲ့ချန်းလျန်သည် ချူနင့်ကို ဓားဆန္ဒ လေ့ကျင့်ရန် ထပ်မံ ခေါ်ဆောင်ချင်နေပြန်သည်။

မအိပ်နဲ့တော့ မြန်မြန်ထပြီး ဆက်လုပ်ကြရအောင် လူ့ဘဝမှာ အိပ်ချိန်တွေ အများကြီး မရှိသင့်ဘူး သေသွားရင် ထာဝရအိပ်ရမှာပဲလေ။ ထစမ်းပါ ငါနဲ့အတူ ဓားဆန္ဒ လေ့ကျင့်ပေးပါဦး ဟုတ်ပြီလား။

ချူနင် မတတ်သာဘဲ မျက်လုံးဖွင့်လိုက်သည့်အခါ အဝတ်အစားတွေ အဆင်သင့် ဝတ်ထားတဲ့ ရဲ့ချန်းလျန်ကို မြင်လိုက်ရသဖြင့် အနည်းငယ် နှမြောသွားရသည်။

ဘာလို့ အဝတ်တွေကို ဒီလောက် မြန်မြန် ဝတ်လိုက်ရတာလဲ ကိုယ် ဘာမှမမြင်ရတော့ဘူး။

နင်နဲ့ ဓားဆန္ဒ လေ့ကျင့်မယ်လို့ ပြောနေတာလေ။ အဝတ်မပါဘဲ ဘယ်လိုလုပ်မလဲ။

"မနေ့က လုပ်ခဲ့တာတွေ မဝသေးဘူးလား"

အဲဒီ နန်းတွင်းလက်နက်က တကယ် အသုံးဝင်တာ။ ငါ့ရဲ့ အစွမ်းက ဆယ်ရာခိုင်နှုန်းတောင် မထုတ်ရသေးဘူးလို့ ခံစားရတယ် ဒါကြောင့် သေချာပေါက် ဆက်သုံးရမှာပေါ့။

ချူနင် တစ်ဖက်သို့ လှည့်လိုက်သည်။

"ထားလိုက်ပါတော့"

မင်္ဂလာပွဲက မနက်ဖြန်ဆိုတာ ရှောင်ပင်း မနေ့က ပြောတယ်လေ ပြီးတော့ မင်္ဂလာဝတ်စုံတွေလည်း ဒီနေ့ လာပို့လိမ့်မယ်။

သူတို့က ကိုယ်တို့ကို ထုံးတမ်းစဉ်လာတွေနဲ့ လုပ်ထုံးလုပ်နည်းတွေလည်း လာသင်ပေးလိမ့်မယ်။ 

ယက်လုပ်ရေးဌာနက လူတွေ မရောက်ခင်အထိ ဆက်အိပ်နေဖို့ ကိုယ်အကြံပေးချင်တယ် ဒီနေ့ လုပ်စရာတွေ အများကြီး ရှိသေးတယ်လေ။

ထိုစကားကို ကြားသော် ရဲ့ချန်းလျန် ရုတ်တရက် မှင်တက်သွားပြီး မျက်နှာလေး ဖြူလျော့သွားသည်။

"ရှင်"

မင်္ဂလာဆောင်က မနက်ဖြန်လား။

နှစ်ရက်တောင် လိုသေးတာ မဟုတ်ဘူးလား အာ မနေ့က သူမ ချူနင်နဲ့ တစ်နေကုန် ဓားဆန္ဒ လေ့ကျင့်ရင်း သူမရဲ့ အစွမ်းကိုခံစားနေခဲ့တာလေ။ သူမအနေနဲ့ နန်းတွင်းလက်နက်ရဲ့သူတော်စင်အဆင့် စွမ်းအားကို သုံးပြီး ကောင်းကင်ဖြစ်စဉ်ကို သတ်နိုင်လောက်ပြီ။ 

တာအိုအဆင့်မှာတော့ နည်းဗျူဟာတွေ အများကြီး ရှိသေးတာဆိုတော့ ဓားဆန္ဒ တစ်ခုတည်းနဲ့ ဖျက်ဆီးဖို့ ခက်ဦးမယ် ဒါကြောင့် ထပ်ပြီး လေ့ကျင့်ဖို့ လိုသေးတာ။

ဒါပေမဲ့ မနေ့က သူမ စိတ်လှုပ်ရှားနေလို့ ဓားဆန္ဒ လေ့ကျင့်ခဲ့တာဖြစ်ပြီး ဒီနေ့ နိုးလာတဲ့အခါမှာတော့ ပိုပြီး စိတ်လှုပ်ရှား စိုးရိမ်လာရတော့သည်။

မင်္ဂလာဆောင်က မနက်ဖြန်လား။

ဘယ်လိုဖြစ်ပြီး ဒီလောက် မြန်မြန် ရောက်လာတာလဲ

မနက်ဖြန် မင်္ဂလာပွဲမှာ အဲဒီ မင်္ဂလာဝတ်စုံကြီး ဝတ်ရမယ်ဆိုတဲ့ အတွေးက ရဲ့ချန်းလျန်ကို ပိုပြီး ဂနာမငြိမ် ဖြစ်စေသည်။

"မနက်ဖြန် မင်္ဂလာဆောင်တော့မှာကို နင်ကတော့ အိပ်နေတုန်း အိပ်နေတုန်း အိပ်နေတုန်းပဲ နင်ကတော့ နည်းနည်းလေးမှ မပျော်ဘူး လုံးဝဂရုမစိုက်တဲ့ ပုံစံပဲ"

"ထစမ်း ဒီနေ့တော့ နင်ငါ့နားမှာပဲ နေရမယ် နင် တစ်ယောက်တည်း လှဲနေလို့မရဘူး။

ချူနင်က ရဲ့ချန်းလျန်၏ လက်ကိုဆုပ်ကိုင်ကာ ရယ်လည်းရယ်ချင် စိတ်လည်းပျက်ချင် ဖြစ်နေရသည် "သေချာပေါက် ကိုယ် မင်းနားမှာ ရှိနေမှာပါ ပြီးတော့ ဒီလိုကိစ္စမျိုးမှာ မင်းကပိုပြီး တည်ငြိမ်သင့်တယ် အထူးသဖြင့် သူစိမ်းတွေ ရှေ့မှာပေါ့။ ကိုယ်တို့ နှစ်ယောက်တည်း ရှိတဲ့အချိန်ကျမှ ဘယ်လောက်ပဲ စိတ်လှုပ်ရှား စိတ်လှုပ်ရှား ဘယ်လိုလဲ"

ငါက စိတ်လှုပ်ရှားနေတာ မဟုတ်ဘူး စိုးရိမ်တုန်လှုပ်နေတာ နားလည်လား။

ကောင်းပါပြီ ကောင်းပါပြီ မိုးတောင် မလင်းသေးဘူးလေ ခဏလောက် ထပ်အိပ်ရအောင်။ နေ့တိုင်း စိတ်ဖိစီးမှုတွေ အများကြီး မထားပါနဲ့။ ကိုယ် ရှိနေတာပဲလေ။

ထိုစကားကို ကြားသော် ရဲ့ချန်းလျန် သက်ပြင်းချလိုက်ပြီး ချူနင် ဆွဲခေါ်ရာ စောင်ထဲသို့ ပြန်ဝင်လိုက်သည်။ စောင်အောက်တွင်တော့ ရဲ့ချန်းလျန်၏ မျက်နှာအမူအရာမှာ တည်ငြိမ်မှု မရှိတော့တာ ထင်ရှားလှသည်။

မင်္ဂလာဆောင်။

ငါ မနက်ဖြန် လက်ထပ်တော့မှာလား။

ဒါက ဘယ်တုန်းက ဖြစ်သွားတာလဲ ငါ ဘာလို့ မသိရတာလဲ။

အချိန်တွေက ဘယ်လိုဖြစ်ပြီး ဒီလောက် မြန်မြန် ကုန်ဆုံးသွားတာလဲ။

အကယ်၍ လက်ထပ်လိုက်ရင် ဒါက တကယ်ပဲ ဇနီးမောင်နှံ ဖြစ်သွားတော့မှာ မဟုတ်လား။ ဒါဆိုရင် ငါ ချူနင့်ကို ခင်ပွန်းလို့ ခေါ်ရတော့မှာလား။

သူမ ရုတ်တရက် ခေါင်းပြူထွက်လာသည်။

မျက်လုံးမှိတ်ခါစ ရှိသေးတဲ့ ချူနင်က မတတ်သာဘဲ မျက်လုံးပြန်ဖွင့်လိုက်သည့်အခါ ရဲ့ချန်းလျန်က သူ့ကို ဒေါသတကြီး စိုက်ကြည့်နေတာကို မြင်လိုက်ရသည်။

"ဘာဖြစ်လို့လဲ ထပ်ပြီး စိုးရိမ်နေပြန်ပြီလား"

ရဲ့ချန်းလျန် စိတ်တိုတိုနဲ့ လက်သီးကျစ်ကျစ် ဆုပ်လိုက်မိသည်"နင် အခု တော်တော် ကျေနပ်နေမှာပေါ့ ဟုတ်လား ဒီရက်ပိုင်းမှာ နင်ငါ့ကို တက်တက်ကြွကြွ မစနောက်တာက မနက်ဖြန် မင်္ဂလာဆောင်ပြီးရင် အရာအားလုံးက သဘာဝကျကျ ဖြစ်သွားလိမ့်မယ်ဆိုတာ သိနေလို့ မဟုတ်လား"

ဟဲဟဲ မင်း သိသွားတာပဲမင်္ဂလာဆောင်ပြီးရင် ကိုယ် မင်းကို ကြိုက်တဲ့အချိန် နမ်းလို့ရမယ် ကြိုက်တဲ့အချိန် ဖက်လို့ရမယ် ကိုယ် လုပ်ချင်တာတွေကို ကြိုက်တဲ့အချိန် လုပ်လို့ရတော့မှာလေ။

နင် အိပ်ခွင့်မရှိဘူး ငါကဒီလောက် စိုးရိမ်နေတာကို နင်က ဘာလို့ ဒီလောက် တည်ငြိမ်နေရတာလဲ။

ချူနင်က ချက်ချင်းပင် ထိုအမျိုးသမီးကို ဆွဲဖက်ကာ ရင်ခွင်ထဲတွင် တင်းတင်းကြပ်ကြပ် ထားလိုက်သည်။

"ကိုယ်လည်း အရမ်းစိတ်လှုပ်ရှားနေပါတယ် ဟုတ်ပြီလား မယုံရင် စမ်းကြည့်လိုက်"

"ဒါက စိတ်လှုပ်ရှားတာလား ဒါက ကာမရာဂပဲ အဲဒီ အရာကြီးနဲ့ ငါ့ကို မထိနဲ့"

ချူနင် ငါ နင့်ကိုထပ်ပြီး အနှောင့်အယှက် မပေးတော့ပါဘူး ဒီလိုကြီး မလုပ်ပါနဲ့ ငါဆက်အိပ်လို့ မရဘူး ဟုတ်ပြီလား။

မင်း အစောကြီးကတည်းက အဲဒီလိုပြောရင် ပြီးနေတာပဲ မဟုတ်လား။ ကိုယ့်ကို ပုန်းကွယ်နေတဲ့ လက်နက်တွေ သုံးအောင်အတင်း လုပ်နေတာကိုး။ မင်းရဲ့ ခင်ပွန်း စိတ်တိုသွားပြီး မင်းကို တိုက်ရိုက် သိမ်းပိုက်လိုက်ရင် ဘယ်လိုလုပ်မလဲ။

"ဟွန့် စကားတွေကတော့ လျှောက်ပြောနေတာပဲ"

ချူနင် ချက်ချင်းပင် ထထိုင်လိုက်တော့သည်။

အော် သူမက ကိုယ့်ကို အထင်သေးနေတာပဲ။