အခန်း ၆၇ နင်က ဒီလောက်တောင် သန်မာနေတာလား

ခုနလေးတင် ဖြစ်ပျက်သွားတဲ့ အချိန်တိုအတွင်းမှာပဲ တာ့ကျိုးအင်ပါယာကြီး ပျက်သုဉ်းသွားပြီလား။

ကျင့်ကြံသူကြီးတွေ အားလုံး အသတ်ခံလိုက်ရသည်။ ရင်းမျိုးနွယ်ဝင် အင်ပါယာ မိသားစုဝင်တွေဟာ အသက်အရွယ်၊ ကျားမ၊ ကျင့်စဉ် အဆင့်အတန်း မခွဲခြားဘဲ အကုန်လုံး အသတ်ခံလိုက်ရသည်။

နန်းတွင်း အမှုထမ်းတွေနဲ့ အရာရှိကြီးငယ် အားလုံးလည်း တစ်ယောက်မကျန် အသတ်ခံလိုက်ရသည်။

အားလုံး အသတ်ခံလိုက်ရပြီ။

ဝန်ကြီးချုပ် ချူးကျွင်းတစ်ယောက် လုံးဝ ဆွံ့အသွားရသည်။ ဒါက စစ်တိုက်တာလား။ ဒါဟာ စစ်တိုက်ရုံတင် မကတော့ဘဲ တိုင်းပြည်တစ်ခုလုံးကို လူမျိုးတုံးအောင် သတ်ဖြတ်ပစ်လိုက်တာပင်။ တစ်ယောက်မှ အသက်မချန်ဘဲ အကုန်သတ်ပစ်တာပဲ။

ဒါဆိုရင် ခုနကစစ်ကြေညာချက်က တကယ်ရော လိုအပ်လို့လား ဖတ်တောင် မဖတ်ရသေးဘူးလေ။

ရဲ့ချန်းလျန်သည်လည်း ရှေ့ကမြင်ကွင်းကို ကြည့်ရင်း ငေးမှိုင်နေမိသည်။ တစ်နေ့မှာ သူမဟာ တာ့ကျိုးနန်းတော်ကိုလာပြီး ကမ္ဘာကြီးရဲ့ အရှင်သခင် မျိုးရိုးနာမည်ကို ပြောင်းလဲပစ်မယ်လို့ တွေးခဲ့ဖူးသည်။

ဒါပေမဲ့ ဒီလောက်အထိ မြန်မြန်ဆန်ဆန် ရောက်လာလိမ့်မယ်လို့ သူမ မထင်ခဲ့မိဘူး။ ပြီးတော့ သူမ ဘယ်လိုမှ စိတ်ကူးမယဉ်နိုင်တဲ့ နည်းလမ်းမျိုးနဲ့ ဖြစ်လာတာပါ။

တာ့ကျိုး ပျက်သုဉ်းသွားပြီ ဒါပေမဲ့ ဘာစီမံကိန်းမှမရှိသေးဘူး။ တာ့ကျိုးရဲ့ နယ်မြေတွေကို ဘယ်လိုအုပ်ချုပ်မလဲ။ အင်ပါယာ နှစ်ခုစာလောက် ဝေးကွာနေတဲ့ ဒီနေရာကို ဘယ်လို စီမံမှာလဲ။

နောက်ဆက်တွဲ ကိစ္စတွေကရော ဘယ်လိုလဲ အရာရှိတွေ အကုန်သေကုန်ပြီဆိုတော့ အောက်ခြေက စစ်တပ်တွေကရော ဘာလုပ်ကြမှာလဲ။

တာ့ကျိုးအင်ပါယာဟာ နောင်မှာ အစိတ်စိတ်အမြွှာမြွှာ ကွဲသွားပြီး တခြားနိုင်ငံတွေရဲ့ ဝါးမျိုမှုကို ခံရတော့မှာ သေချာသည်။ 

အဝေးဆုံးမှာ ရှိနေတဲ့ တာ့ချန်းအင်ပါယာကတော့ တကယ်တမ်း ဘာမှခံစားခွင့် ရမှာ မဟုတ်ဘူး။

ဒါပေမဲ့ အဲဒါကသာမန်လူတွေရဲ့ အမြင်ပါ။ ဒီမှာရှိတဲ့ အရာရှိ အများစုဟာ ကျင့်ကြံသူတွေ ဖြစ်ကြသည်။ သူမကိုယ်တိုင်ကလည်း သူတော်စင်အဆင့်နောက်ဆုံးအဆင့် ကျင့်ကြံသူ ဖြစ်သလို ချူနင်ရဲ့ ကျင့်စဉ်ကတော့ ကောင်းကင်ကိုတောင် ထိနေပြီလေ။

ပထမဆုံး အင်ပါယာကြီး ပျက်စီးသွားပြီဆိုတော့ ကျန်တဲ့နိုင်ငံတွေကရော ဝေးဦးမှာလား။

ရုတ်တရက် သူမ ရည်မှန်းချက်တွေ ပျောက်ဆုံးသွားသလို ခံစားလိုက်ရသည်။

ထိုအချိန်တွင် ချူနင်က လှည့်လာပြီး ရဲ့ချန်းလျန်ရဲ့ ဘေးကို လျှောက်လာသည်။ သူမ နှုတ်ခမ်းကို တင်းတင်းစေ့ပြီး ချူနင့်ကို တစ်ခုခု ပြောဖို့ ပြင်လိုက်သော်လည်း ချူနင်က အရင် စကားစလိုက်သည်။

"သွားကြမလား"

"ဘယ်ကိုလဲ"

"မြက်ပင်ကို ရှင်းရင် အမြစ်ပါ တူးရမယ်လေ နောင်မှာ ပြဿနာမတက်အောင်လို့"

သူမ ဦးနှောက်ထဲမှာ ဝုန်းခနဲ ဖြစ်သွားသည်။ 

"ငါတို့ အကုန် သတ်လိုက်ပြီ မဟုတ်ဘူးလား"

နေဝန်းနီ နတ်ဘုရားနယ်မြေလေ ခုနက နန်းတော်ကို ဖျက်ဆီးခဲ့တဲ့ အဘိုးကြီးရဲ့ အသိုက်ပေါ့ သူကိုယ်တိုင်ပဲ မြက်ပင်ရှင်းရင် အမြစ်ပါတူးရမယ်လို့ ပြောခဲ့တာ မဟုတ်လား။

ရဲ့ချန်းလျန် ထပ်ပြီး မှင်တက်သွားပြန်သည်။ နေဝန်းနီနတ်ဘုရားနယ်မြေဆိုတာ နတ်ဘုရားနယ်မြေကြီး သုံးခုထဲက တစ်ခုလေ။ အမြစ်ပါတူးမယ်ဆိုတာက သူတို့ကိုပါ ဖျက်ဆီးပစ်မယ်လို့ ပြောတာလား။

သူမ စိတ်ထဲကနေ ဒါကို မဖြစ်နိုင်ဘူးလို့ ငြင်းဆန်မိသော်လည်း ချူနင်ရဲ့ ကျင့်စဉ်ကို တွေးမိတဲ့အခါ ပြီးတော့ အမြစ်ပါမတူးရင် နောင်မှာ ပြဿနာတွေ အပြီးတိုင် ရှိနေဦးမှာကို တွေးမိတဲ့အခါ သူမ တုန်တုန်ရင်ရင်နဲ့ပဲ သူ့လက်ကို လှမ်းကိုင်လိုက်သည်။ ဒီကိစ္စက သူမအတွက်တော့ တကယ့်ကို ရိုက်ခတ်မှု ကြီးမားလွန်းလှသည်။

တစ်ဖက်တွင်လည်း ချူနင်က ဝန်ကြီးချုပ် ချူးကျွင်းကို ကြည့်လိုက်သည်။

"ဝန်ကြီးချုပ်ချူး တာ့ချန်းကို အရင် ပြန်နှင့်လိုက်ပါဪ ပြီးတော့ ဒီမှာရှိတဲ့ အရင်းအမြစ်တွေကိုလည်း တစ်ခါတည်း ယူသွားလိုက်ဦး မိဖုရားခေါင်ကြီးနဲ့ ငါကတော့ နောက်မှ ပြန်လာခဲ့မယ်"

ဝန်ကြီးချုပ် ချူးကျွင်းက အလောတကြီး ခေါင်းညိတ်ပြလိုက်သည်။ သူ ဘယ်လို ငြင်းရဲမှာလဲ။

အရှင်မင်းကြီး အရှင်မင်းကြီးရဲ့ ကျင့်စဉ်က အမြင့်ဆုံးပဲ အရှင်မင်းကြီး ပြောသမျှ အကုန် ဟုတ်ပါတယ်။

နောက်တစ်ခဏတွင် မြို့တော်တစ်ခုလုံးရှိ အရင်းအမြစ်များကို စုဆောင်းလိုက်ပြီး အရာရှိ အယောက်တစ်ရာကျော်ကိုလည်း ထိုအရင်းအမြစ်များနှင့်အတူ ပြန်ပို့လိုက်သည်။ 

ချူနင်ကတော့ ရဲ့ချန်းလျန်ရဲ့ လက်ကို ဆွဲပြီး ကောင်းကင်ပေါ်သို့ ပျံတက်သွားတော့သည်။

ခဏအကြာတွင် ကမ္ဘာကြီးက ပြောင်းလဲသွားပြီး ခန့်ညားလှသော နတ်ဘုရားနယ်မြေတစ်ခု သူတို့ရှေ့မှာ ပေါ်လာသည်။

ကြီးမားလှတဲ့ နေမင်းကြီးက ကမ္ဘာကို ပြုတ်နေသလိုပင် နီရဲတဲ့ ချော်ရည်တွေ စီးဆင်းနေပြီး ပြင်းထန်လှတဲ့ အပူရှိန်က သူတို့ကို ရိုက်ခတ်နေသည်။

"အောက်ကလူတွေ အားလုံးနားထောင်ကြ မင်းတို့လူတွေက ငါ့ကိုလာစော်ကားခဲ့တယ်"

နတ်ဘုရားနယ်မြေအလယ်က ဘိုးဘေးအချို့ကတော့ ဒီစကားကို ကြားပြီး နားမလည် ဖြစ်နေကြသည်။

နောက်တစ်ခဏတွင် ကမ္ဘာကြီးမှာ အက်ကွဲသွားတော့သည်။ လက်ဝါးကြီးတစ်ဖက်က ကောင်းကင်နဲ့ မြေကြီးကို ဖုံးလွှမ်းသွားပြီး နတ်ဘုရားနယ်မြေတစ်ခုလုံးကို ချက်ချင်း ဖိနှိပ်ပစ်လိုက်သည်။

"ဒါကြောင့် နောက်ဘဝကျရင်တော့ သတိထားကြပေါ့ သူများအတွက်နဲ့ ကိုယ့်လည်ပင်းကို လာမထိုးပေးကြနဲ့"

တိုက်ကွက် တစ်ကွက်တည်းပါပဲ။ ခုနက ချန်ရွှမ်ထျန်းကို သတ်တုန်းကထက်တောင် ပိုပြီး ပြင်းထန်ပြီး ရက်စက်လှသည်။ ကျင့်ကြံသူ အားလုံးဟာ သူတို့ရဲ့ ကျင့်စဉ် အဆင့်အတန်း မည်သို့ပင်ရှိစေကာမူ အကုန်လုံး အသတ်ခံလိုက်ရသည်။ ဒါဟာ တကယ့်ကို မြက်ပင်ရှင်း အမြစ်တူးတာပါပဲ။

နောက်တစ်ခဏတွင် ပြင်းထန်လှတဲ့ကောင်းကင်ဘုံလမ်းစဉ်စွမ်းအားတွေ ထွက်ပေါ်လာပြီး ထိုနေရာကို အပြီးတိုင် ချေမှုန်းပစ်လိုက်ရာ နတ်ဘုရားနယ်မြေတစ်ခုလုံး မြေပုံပေါ်ကနေ ပျောက်ကွယ်သွားတော့သည်။

ရဲ့ချန်းလျန်သည် ချူနင်ရဲ့ လက်ကို တင်းတင်းဆုပ်ကိုင်ထားမိသည်။ အရမ်းအရမ်းကို သန်မာလွန်းတယ်။ သူ တကယ်ပဲ ဘယ်နယ်ပယ်ကို ရောက်နေတာလဲ။

တကယ်ကြီး မသေမျိုးဧကရာဇ်လား ဘယ်လို နယ်ပယ်မျိုးမို့လို့ ဒီလောက်အထိ စွမ်းအားကြီးနေရတာလဲ။

နေဝန်းနီ နတ်ဘုရားနယ်မြေက အနန္တအဆင့်ကျင့်ကြံသူ တစ်ယောက်ယောက်သာ လာရင် တာ့ချန်းအင်ပါယာကို ဖျက်ဆီးနိုင်မှာ သေချာပေမဲ့ အခုတော့ လက်တစ်ဖက်တည်းနဲ့ အနှိမ်နင်း ခံလိုက်ရပြီ။ ကောင်းကင်ဘုံလမ်းစဉ်ရဲ့ အောက်မှာ သက်ရှိအားလုံးဟာ ပုရွက်ဆိတ်လိုပါပဲ။

သူမအတွက်တော့ ကျင့်ကြံခြင်းလောကဆိုတာ အသက်လုတိုက်ပွဲဖြစ်ပြီး အစွမ်းရှိရင် အကြောင်းပြချက် မရှိဘဲ သတ်လို့ရတာ သဘာဝပါပဲ။ ဒါ့အပြင် ဘုရင်မတစ်ယောက်ဖြစ်တဲ့အတွက် သက်ရှိအားလုံးဟာ ပုရွက်ဆိတ်ပဲဆိုတဲ့ စိတ်ဓာတ်ကလည်း ရှိနေပြီးသားပါ။ ဒါပေမဲ့လည်း ချူနင်ကတော့ အရမ်းကို သန်မာလွန်းနေတယ်လို့ သူမ ခံစားရသည်။

ဒါဟာ သူမ သတ်မှတ်ထားတဲ့ အစွမ်းထက်သူဆိုတဲ့ အဓိပ္ပာယ်နဲ့ တကယ့်ကို ကိုက်ညီလှသည်။ ရှေ့နောက် ကွာခြားချက်က အရမ်းကြီးလွန်းနေတာလား။

ဒီနေ့ မနက် လွန်ခဲ့တဲ့ နာရီဝက်လောက်တင် ချူနင်က မီးဖိုရှေ့မှာ ဟင်းချက်နေတုန်း မဟုတ်ဘူးလား။

အခုကျတော့ လက်တစ်ဖက် မြှောက်ရုံနဲ့ နတ်ဘုရားနယ်မြေတစ်ခုလုံးကို ဖျက်ဆီးပစ်လိုက်ပြီ ပြတ်သားလွန်း ရက်စက်လွန်းလှတာကြောင့် ရဲ့ချန်းလျန်တောင် ထိတ်လန့်သွားရသည်။

"အင်း ပျက်စီးသွားပြီ အမြစ်ပါ တူးလိုက်ပြီ"

ချန်းလျန်စိတ်ချပါ ကိုယ် ဒီလူတွေရဲ့ဝိညာဉ်တွေကိုပါ ဖျက်ဆီးပစ်လိုက်ပြီ။ သူတို့မှာ နောက်ဘဝ ကူးဖို့တောင် အခွင့်အရေး မရှိတော့ဘူး။

ရဲ့ချန်းလျန် သတိပြန်ဝင်လာပြီး ခေါင်းညိတ်ပြလိုက်သည်။

"အင်း... ကောင်းပြီ"

ထို့နောက် သူတို့နှစ်ဦးစလုံး တိတ်ဆိတ်သွားကြသည်။

"ဘာဖြစ်လို့လဲ"

ရဲ့ချန်းလျန်က တွန့်ဆုတ်နေပြီး ရှုပ်ထွေးတဲ့ မျက်နှာပေးနဲ့ ပြောလိုက်သည်။

"နင်..နင့်ရဲ့ ကျင့်စဉ်က ဒီလောက် မြင့်နေတာကို ဘာလို့ငါ့ကို ကြိုမပြောခဲ့တာလဲ"

ချူနင်က လက်ကာပြလိုက်ပြီး "ကိုယ်ပြောခဲ့သားပဲ ဒါပေမဲ့ မင်းက မယုံခဲ့ဘူး မဟုတ်လား"

"ဒါဆိုရင် နင့်ရဲ့ကျင့်စဉ်ကို ထုတ်ပြခဲ့ရင် ငါ ယုံမှာပေါ့"

"အတွင်းရေး ပြဿနာရော အပြင်က ရန်သူရော မရှိတဲ့အချိန်မှာ ကိုယ်က ဘာလို့ ထုတ်ပြနေရမှာလဲ"

"ဒါဆိုရင် အခုကရော"

"လွန်ခဲ့တဲ့ ရက်ပိုင်းက ဝတ်ရုံနီမိန်းမစိုးတစ်ယောက် ညဘက်နန်းတော်ထဲ ဝင်လာတယ်။ ကိုယ် သူ့ကိုသတ်လိုက်ပြီး သူက တာ့ကျိုးကဆိုတာ သိတာနဲ့ သူ့ခေါင်းကို ပြန်ပို့ပေးလိုက်တယ်"

"ပြီးတော့ ဟိုဧကရာဇ်ကို နည်းနည်း ခြိမ်းခြောက်လိုက်သေးတယ်။ မင်းက ဒီလိုနည်းနဲ့ ကမ္ဘာကြီးကို သိမ်းပိုက်ရတာကို မကြိုက်မှာစိုးလို့ ကိုယ် သူတို့ကို အခွင့်အရေး ပေးခဲ့တာ"

"ဒါပေမဲ့ အခုတော့ သူတို့က အဲဒီအခွင့်အရေးကို အသုံးချပစ်လိုက်ပြီလေ ဒါကြောင့် သူတို့ကို ဘာလို့ ဆက်ထားနေတော့မှာလဲ"

ရဲ့ချန်းလျန် ကြောင်အသွားပြီးမှ ခါးသီးစွာ ပြုံးလိုက်သည်။

"နင် ပြောချင်တာက ငါတစ်သက်လုံး ကြိုးစားခဲ့တဲ့ ကမ္ဘာကြီးကို ပေါင်းစည်းပြီး အထွတ်အထိပ် အင်ပါယာ တည်ထောင်မယ်ဆိုတဲ့ လမ်းစဉ်ကို နင်က အစကတည်းက လုပ်ပေးနိုင်ခဲ့တာပေါ့။ ဒါပေမဲ့ နင်က ဘာမှ မပြောခဲ့ဘူး"

ချူနင်က သူမကို နားမလည်သလို ကြည့်လိုက်သည်။

"ဒါပေမဲ့ မင်းရဲ့စရိုက်အရ ကိုယ် ကူညီပေးတာကို ကြိုက်မှာ မဟုတ်ဘူးလို့ ကိုယ် ထင်ခဲ့တာလေ"

"ဘာလို့ ငါ့ကိုအရင်မပြောခဲ့တာလဲ"

"ကိုယ် ပြောရင်ရော မင်းကလက်ခံမှာလား"

ရဲ့ချန်းလျန် ခေတ္တ တိတ်ဆိတ်သွားသည်။

ဘုရင်မတစ်ယောက်အနေနဲ့ ကမ္ဘာကို သိမ်းပိုက်ချင်တဲ့ စိတ်ရှိတယ် ဒါက စိန်ခေါ်မှုတစ်ခုဖြစ်ပြီး စမ်းသပ်မှုတစ်ခုလည်း ဖြစ်သည်။

ဒါပေမဲ့ ကိုယ်က ဘယ်လောက်ပဲ အားစိုက်ထုတ်ပြီး ကြိုးစားကြိုးစား ချူနင်ကို ငါ ဒီကမ္ဘာကိုလိုချင်တယ်လို့ ပြောလိုက်ရုံလောက် မမြန်ဆန်ဘူးဆိုတာကို သိလိုက်ရတဲ့အခါ တကယ်ကို စိတ်ဓာတ်ကျစရာပါပဲ။

"ဒါက... မသေချာပါဘူး"

သူ့မှာ ပြောစရာ စကားမရှိတော့သဖြင့် ခါးသီးစွာ ပြုံးလိုက်မိသည်။ သူမရဲ့ အမြင်အရဆိုရင်တော့ ဒီလိုနည်းလမ်းမျိုးကို သူမ လုပ်မှာ မဟုတ်ပါဘူး။

သူများပေးတဲ့အရာနဲ့ ကိုယ့်ဘာသာ ရယူတဲ့အရာက မတူဘူးလေ။ ဒါပေမဲ့ ဒီကမ္ဘာကြီးကို သူမရဲ့ခင်ပွန်းက သိမ်းပိုက်ပေးတာဆိုရင်တော့ အဲဒီလောက်လည်း မဆိုးပါဘူး။

ဒါပေမဲ့ ရုတ်တရက်ကြီး သူမ ဘာမှလုပ်စရာ မရှိတော့သလို သူမလုပ်နိုင်တဲ့ အရာတွေကလည်း လွယ်လွယ်လေး ရနိုင်တယ်လို့ ခံစားလိုက်ရတဲ့အခါ ဘုရင်မ လုပ်ရတာက တကယ်ပဲ အဓိပ္ပာယ် မရှိတော့သလိုပါပဲ။

ချူနင်က ခေါင်းညိတ်ပြပြီး ရှင်းပြလိုက်သည်။ မင်းသာ တာ့ကျိုးနဲ့ မဟာမိတ်ဖွဲ့ခဲ့ရင်လည်း မဆိုးပါဘူး။ တဖြည်းဖြည်းနဲ့ တခြားနိုင်ငံတွေကို ဝါးမျိုပြီး နောက်ဆုံး တာ့ကျိုးကို သိမ်းပိုက်ပေါ့ အဲဒီအချိန်ကျရင် မင်း အရမ်း ပျော်နေမှာ သေချာတယ်။ ကိုယ်ကလည်း အစက အဲဒီလိုပဲ စီစဉ်ထားတာ။

"ဒါပေမဲ့ မတတ်နိုင်ဘူးလေ တာ့ကျိုးက သူ့ဘာသာသူ သေလမ်းရှာခဲ့တာကိုး"

"သူတို့ ဘာလုပ်ခဲ့လို့လဲ မဟာမိတ်စာချုပ်ကို ဖျက်ဆီးတာအပြင် ဘာရှိသေးလဲ"

"သဘာဝကျကျပဲ သူတို့နန်းတော်ကို ဖျက်ဆီးခဲ့တာပေါ့။ မင်း မခံစားမိဘူးလား ငါတို့ အားလုံး တစ်ခါသေခဲ့ပြီးပြီလေ"

ရဲ့ချန်းလျန် ရုတ်တရက် မှင်တက်သွားပြီး ချူနင့်ကို စေ့စေ့စိုက်ကြည့်လိုက်သည်။

တကယ်ပဲ သူပဲ။

အဲဒါက အိပ်မက် မဟုတ်ဘူး အစစ်အမှန်ပဲ

ပြီးတော့ ချူနင်က ဒါတွေအားလုံးကို မူလအတိုင်း ပြန်ဖြစ်အောင် သေတဲ့သူတွေကို ပြန်ရှင်အောင် လုပ်ပေးနိုင်ခဲ့တာလား။ ဘယ်လို စွမ်းအားမျိုးမို့လို့ ဒီလောက်အထိ အံ့ဩစရာ ကောင်းနေရတာလဲ။

"ဒါဆိုရင် အခု နင့်ရဲ့အစီအစဉ်က ဘာလဲ။ ငါ့ကို တခြားနိုင်ငံတွေရဲ့ အင်ပါယာ မိသားစုတွေကိုပါ ဖျက်ဆီးပေးစေချင်သလား ဒါမှမဟုတ် တိုက်ရိုက်ပဲပေါင်းစည်းလိုက်မလား"

"ဟင့်အင်း"

ရဲ့ချန်းလျန်၏ မျက်နှာတွင် ခေါင်းမာတဲ့ အမူအရာ ပေါ်လာပြီး လက်သီးကို တင်းတင်းဆုပ်လိုက်သည်။

ငါ မနေ့က နင့်ဆီက ဓားကို ရတုန်းကတည်းက ရိပ်မိခဲ့ပါတယ်။

ချူနင်က သာမန်လူ မဟုတ်ဘူး သူ့မှာ နက်ရှိုင်းတဲ့ ကျင့်စဉ်နဲ့ ကြီးမားတဲ့ အစွမ်းတွေ ရှိတယ်ဆိုတာကို သူမရိပ်မိခဲ့သည်။ အခု အဲဒီခံစားချက်တွေက ထပ်တူကျသွားပြီ ဖြစ်ပေမဲ့ အချို့အရာတွေကို အလွယ်တကူ ရလိုက်ရင်တော့ တကယ်ပဲ အဓိပ္ပာယ် မရှိပါဘူး။

နင့်မှာ အဲဒီအစွမ်း ရှိတယ်ဆိုတာ ငါယုံကြည်ပါတယ် ဒါပေမဲ့ ဒါကိုငါ့ဘာသာငါ လုပ်ခွင့်ပေးမလား။

မဟုတ်ရင် သူမမှာ ကြိုးစားစရာ ရည်မှန်းချက်တွေ ရှိတော့မှာ မဟုတ်ဘူး။ 

ဘဝတစ်ဝက်လောက် ကြိုးစားပမ်းစား အုပ်ချုပ်ခဲ့ရတာတွေက သူမဘေးက ချူနင်ရဲ့ ကတိစကား တစ်ခွန်းလောက်တောင် မကောင်းဘူးဆိုရင် သူမကို ထပ်ပြီး စိတ်ဓာတ်မကျအောင် လုပ်ပါနဲ့တော့ သူမ အခုတောင် ဘဝကို သံသယ ဝင်နေရပါပြီ။

ထိုအချိန်တွင် ရဲ့ချန်းလျန်၏ မျက်နှာမှာ ရှက်သွေးဖြာနေပြီး အားနာစရာ ခံစားချက်တွေ ဖြစ်နေသည်။

ဒါဆိုရင် အရင်က သူမ ချူနင့်ကို တိုက်ခိုက်ခဲ့တုန်းက ချူနင်က ဘာလို့ပြန်တောင် မလုပ်ခဲ့တာလဲ။ သူမက သူမရဲ့ကျင့်စဉ်က အရမ်းမြင့်တယ်လို့ ထင်ခဲ့ပြီး ချူနင် ထိခိုက်မှာကိုတောင် စိုးရိမ်ခဲ့သေးတာ။ ချူနင်ရဲ့ အမြင်မှာတော့ သူမရဲ့ လုပ်ရပ်တွေက ကလေးကစားသလိုပဲ ဖြစ်နေမှာပေါ့။

တကယ်ကို ရှက်စရာ ကောင်းလိုက်တာ။