အခန်း (၄၉) ရှင်က တကယ်ကြီး ပညာရှင်ဖြစ်နေတာလား

မင်းတက်ယန်းဆောင်အတွင်း၌...

ဒီနေ့တော့ အစီရင်ခံစာ သိပ်မများသဖြင့် ရဲ့ချန်းလျန်သည် ချူနင့်ကို လာခိုင်းခြင်း မရှိပေ။

သူမ၏ အလုပ်များကို အဆုံးသတ်ပြီးနောက် တာ့ကျိုးအင်ပါယာနှင့် မဟာမိတ်ဖွဲ့မည့် ကိစ္စကို ရင်ဆိုင်ဖြေရှင်းရတော့မည်။

တာ့ကျိုးအင်ပါယာသည် အလွန်တရာ တောင့်တင်းခိုင်မာသော နိုင်ငံတော် အင်အားကို ပိုင်ဆိုင်ထားသည်။

သူတို့၏ သံမဏိမြင်းတပ် အင်အားတစ်သန်းမှာ နတ်ဘုရားမှော်လက်နက်များဖြင့် အပြည့်အစုံ တပ်ဆင်ထားပြီး ကျန်နိုင်ငံလေးခုကို အလွယ်တကူ သိမ်းပိုက်နိုင်စွမ်း ရှိသည်မှာ နောက်ပြောင်နေခြင်း မဟုတ်ပေ။

သူတော်စင်အဆင့် ပညာရှင် ၁၀ ဦးကျော် ရှိသလို သူတို့၏ဧကရာဇ်မှာလည်း ယခုအခါ သက်တမ်း ၆၀၀ ကျော်နေပြီဖြစ်သည်။

သူသည် နေ့စဉ် မိမိကိုယ်ကိုယ် သုံးကြိမ်တိုင်တိုင် ပြန်လည်ဆန်းစစ်လေ့ရှိပြီး နက်နဲသိမ်မွေ့ခြင်းအဆင့်ရှိသော အထိန်းတော်ကြီး တစ်ဦး၏ ကြီးကြပ်မှုကို ခံယူသည်။

အကယ်၍ သူ အမှားလုပ်မိပါက ဘိုးဘေးနတ်ကွန်းတွင် ကြိမ်ဒဏ်ပေးရန် တိုက်ရိုက်တောင်းဆိုလေ့ရှိသည့် တကယ့် အရူးတစ်ယောက်ပင် ဖြစ်သည်။

ထို့အပြင် ထိုအထိန်းတော်ကြီး တစ်ဦးတည်းသာမက အရင်ဧကရာဇ်ဟောင်းများစွာမှာလည်း ကျင့်စဉ်ကိုသာ အာရုံစိုက်ရန်အတွက် အာဏာစွန့်ခဲ့ကြသူများ ဖြစ်ကြသည်။

၎င်းအပြင် သူတို့သည် အဓိက နတ်ဘုရားနယ်မြေ သုံးခုထဲမှ တစ်ခုဖြစ်သော နေမင်းနတ်ဘုရားနယ်မြေနှင့်လည်း ဆက်နွှယ်မှု ရှိနေသည်။

မည်သည့်ဘက်ကကြည့်ကြည့် တာ့ကျိုးအင်ပါယာအနေဖြင့် တာ့ချန်းနှင့် မဟာမိတ်ဖွဲ့ရန် မလိုအပ်ပေ။ သူမကို မဟာမိတ်အဖြစ် ထားရှိခြင်း မထားရှိခြင်းမှာ သူတို့အတွက် ဘာမှ ထူးခြားပုံမရပေ။

သူတို့မှာ တစ်ခုခု ကြံစည်နေတာများလား

ကြံစည်နေစရာ မလိုပါဘူး။ တကယ်သာ ကြံစည်ချင်ရင် နက်နဲသိမ်မွေ့ခြင်းအဆင့် ကျင့်ကြံသူတစ်ဦးကို လွှတ်ပြီး သူမကို လုပ်ကြံခိုင်းလိုက်ရုံပဲလေ။

ဘာလို့ ဒါမျိုးတွေ လုပ်နေရမှာလဲ ဒါက အကျိုးအမြတ်အတွက်လား ဒါမှမဟုတ် တခြားတစ်ခုခုကြောင့်လား။

ဒါပေမဲ့ မဟာမိတ်ဖွဲ့ဖို့အတွက် တာ့ကျိုးက သူတို့ရဲ့ နိုင်ငံတော် ဘဏ္ဍာတိုက် တစ်ဝက်ကို စေတနာအဖြစ် ကမ်းလှမ်းထားသလို သူတို့ဧကရာဇ်ကိုယ်တိုင် ရေးထားတဲ့ လျှို့ဝှက်စာလည်း ပါသေးသည်။

ဒါဆိုရင် သူမ ဒါကို လက်ခံသင့်သလားလက်မခံသင့်ဘူးလား။

ရဲ့ချန်းလျန်သည် နှုတ်ခမ်းကို ဖိထားလိုက်သည်။ သူမ တစ်စုံတစ်ယောက်နှင့် ဆွေးနွေးချင်ဆုံး အချိန်တွင် ထိုလူကရှိမနေပေ။ သို့သော် ချူနင့်ကို အပြင်မှာ လမ်းလျှောက်ဖို့ ဒါမှမဟုတ် အနားယူဖို့ ပြောလိုက်သူမှာ သူမကိုယ်တိုင်ပင် ဖြစ်သည်။

ဒီလူ ငါ့အိပ်ရာပေါ်ကိုများ ပြေးတက်သွားပြီလား မသိဘူး တကယ်သာ တက်သွားရင်တော့ ဒီနေ့ သူသေပြီသာမှတ် ဒါပေမဲ့ တကယ်တော့လည်း ချူနင်က ဒီရက်ပိုင်း အစီရင်ခံစာတွေ ကိုင်တွယ်ပေးနေရတာ တော်တော်တော့ ပင်ပန်းနေရှာမှာပါ။

ထားလိုက်ပါတော့ သူ ဒီမှာရှိနေရင်လည်း ဒီမဟာမိတ်ကိစ္စကို သဘောတူမှာပါပဲ။ သူမရဲ့ အင်ပါယာနဲ့ ကမ္ဘာကြီးအတွက် ဒီလုပ်ရပ်က အပြစ်မရှိဘဲ အကျိုးပဲ ရှိမှာပါ။

ပြည်တွင်းမှာဆိုရင် ကျင့်စဉ်အရင်းအမြစ်တွေ ရရှိလာမှာဖြစ်လို့ အင်ပါယာအတွင်းက ကျင့်ကြံသူအားလုံးရဲ့ ခွန်အားကို မြှင့်တင်ပေးနိုင်မယ်။ ပြည်ပမှာဆိုရင်တော့ တာ့ချန်းကို အမြဲ မျက်စိကျနေတဲ့ မိုးကျကြယ်အင်ပါယာကို ဟန့်တားနိုင်မှာဖြစ်လို့ သူတို့ နောက်ထပ် မဖွယ်မရာ မကြံစည်ရဲတော့ဘူးပေါ့။

ရဲ့ချန်းလျန် ချက်ချင်း ဆုံးဖြတ်ချက် ချလိုက်သည်။ မဟာမိတ်ဖွဲ့မှာဆိုမှတော့ မင်္ဂလာပွဲ မတိုင်ခင်မှာပဲ လုပ်လိုက်တာပေါ့ မင်္ဂလာနှစ်ထပ်ကွမ်းဆိုတော့ ပိုမကောင်းဘူးလား။

......

ချန်ရှင်းနန်းဆောင်အတွင်း၌...

ချူနင်သည် လက်နှစ်ဖက်ကို နောက်ပစ်ကာ ပညာရှင်တစ်ဦး၏ အမူအရာဖြင့် ရပ်နေသည်။ မလှမ်းမကမ်းတွင် ရှောင်ပင်းက ကျင့်စဉ်စာအုပ်ကို ကိုင်ကာ တောင့်တောင့်ကြီး ရပ်နေသည်။

"ရှောင်ပင်း နင်ငါ့အပေါ် ထင်မြင်ချက် လွဲနေတယ်လို့ ငါ ခံစားရတယ်။ ငါက အရမ်း အစွမ်းထက်နေလို့ နင်တို့ကို လန့်သွားမှာစိုးလို့ ငါ့ရဲ့ ကျင့်စဉ်ကို ဖုံးကွယ်ထားတာ ဒါပေမဲ့ အဲဒါကြောင့်နဲ့ ငါ့ကို အားနည်းတယ်လို့တော့ မထင်နဲ့လေ"

"ရှောင်ပင်း အဲဒီလို မထင်ပါဘူး အရှင်မင်းကြီး ရှောင်ပင်းက အရှင်မင်းကြီးကို ပညာရှင်တစ်ယောက်လို့ အမြဲ ခံစားရပါတယ်"

"ကောင်းပြီ နင့်ရဲ့စိတ်ရင်းက အဲဒီလောက် ဖြူစင်နေမှတော့ ငါကိုယ်တိုင်ပဲ ဒီကျင့်စဉ်ကို သင်ပေးတော့မယ်"

တာယန် ကောင်းကင်ဘုံကျမ်းဆိုတာ ကျင့်ကြံသူတွေအနေနဲ့ ကောင်းကင်ဘုံ စွမ်းအားနဲ့ တသားတည်းဖြစ်အောင် ပေါင်းစပ်သွားအောင် လုပ်ဆောင်ပေးပြီး မိမိနဲ့ အသင့်တော်ဆုံး ကျင့်စဉ်ကို ဖော်ထုတ်ပေးနိုင်တဲ့ နည်းလမ်းပဲ။

အရာရာမှာ ကိုယ်နဲ့ အကိုက်ညီဆုံးက အကောင်းဆုံးပဲလေ။ နင် ဒါကိုကျင့်ပြီးရင် နင်နဲ့သာ ကိုက်ညီတဲ့ ထူးခြားတဲ့ ကျင့်စဉ်လမ်းကို ရှာတွေ့လိမ့်မယ်"

ရှောင်ပင်း ရင်ထဲမှာတော့ စိတ်မကောင်း ဖြစ်နေမိသည် သူမသာ ကျင့်နေပါတယ် အကုန်နားလည်ပါတယ်လို့ပဲ ပြောလိုက်ရမှာ။ အခုတော့ အရှင်မင်းကြီးက တကယ်ကြီး လုပ်တော့မည်။

သူမက ချူနင့်ကို တကယ်ပဲ အထင်မသေးပါဘူး။ သူမကိုယ်တိုင်ကလည်း ရဲ့ချန်းလျန်ဘေးက အစေခံတစ်ယောက်ပဲလေ ဘယ်သူ့ကို အထင်သေးရမှာလဲ သူ ကျင့်စဉ် မကျင့်ရင်တောင် သူကအရှင်မင်းကြီးပဲ ပြီးတော့ ထမင်းလည်း အရမ်းကောင်းအောင် ချက်တတ်သေးတာ။ သူမအတွက်တော့ ချူနင်က တကယ့်ကို ခင်ဖို့ကောင်းတဲ့လူပါ။

ဒါပေမဲ့ ကျင့်စဉ်ကိစ္စကျတော့ သခင်လေးရယ် ရှင့်ရဲ့ကျင့်စဉ်က သိပ်မမြင့်တာမို့ ကျွန်မကို မသင်ပေးပါနဲ့တော့။ ရှင်က ပညာရှင်ကြီးပါလို့ ကျွန်မ ဝန်ခံပေးပါ့မယ် ဟုတ်ပြီလား။

ဒါပေမဲ့ ချူနင်ကတော့ အတည်ကြီးလုပ်ကာ သေသေချာချာ ရှင်းပြနေသည်။ ထားလိုက်ပါတော့ လိုက်လျောပေးလိုက်တာပေါ့။ မဟုတ်ရင် အရှင်မင်းကြီး စိတ်မကောင်း ဖြစ်သွားဦးမယ်။ သူတို့ ဆက်ဆံရေးကလည်း တော်တော် ကောင်းနေတာပဲကိုး။

"အစဦး စိတ်ပိုင်းဆိုင်ရာ ကျင့်စဉ်ရဲ့ ပထမစာမျက်နှာ ၃၀ က ကောင်းကင်ဘုံစွမ်းအားနဲ့ ပေါင်းစပ်ပြီး ကိုယ့်ရဲ့ လမ်းစဉ်ကို ရှာဖွေတဲ့ နည်းလမ်းပဲ"

"ဒါပေမဲ့ အရှင်မင်းကြီးမသိတာ တစ်ခုရှိတယ် ကျင့်ကြံသူတွေက သူတော်စင်အဆင့် ရောက်မှသာ ကောင်းကင်ဘုံ စွမ်းအားနဲ့ ပေါင်းစပ်နိုင်တာပါ ရှောင်ပင်းက အခု စတုတ္ထအဆင့်ပဲ ရှိပါသေးတယ်"

"အဲဒါက နင်က နည်းလမ်းမှန် မတွေ့သေးလို့ ဒါမှမဟုတ် ပိုကောင်းတဲ့ကျင့်စဉ် မရှိလို့ပါ။ သာမန်လူတွေကတော့ ဒါမျိုးမလုပ်နိုင်ဘူးပေါ့ ဒါပေမဲ့ ငါပေးထားတဲ့ ကျင့်စဉ်ကတော့ လုပ်နိုင်တယ်"

ရှောင်ပင်း ခေါင်းကို အားရပါးရ ငြိမ့်ပြလိုက်သည်။ "ဟုတ်ကဲ့ပါ သခင်လေး ဒါဆိုရင် ဒီလောက်ကောင်းတဲ့ ကျင့်စဉ်ကို ဧကရီကို ဘာလို့ မပြတာလဲ"

ချူနင်က ကောင်းကင်ကို မော့ကြည့်ကာ 

အေးအေးဆေးဆေး ပြုံးလိုက်သည်။

"ချန်းလျန်ကတော့ အခုလောလောဆယ် ကလေးကိုပဲ အာရုံစိုက်သင့်ပါတယ် ကလေးမွေးပြီးရင် ကျင့်စဉ်ကျင့်ဖို့ အခွင့်အရေးတွေ အများကြီး ရှိပါသေးတယ် အလျင်မလိုပါဘူး"

"ဒါ့အပြင် ငါက သူမနဲ့ ပိုကိုက်ညီတဲ့အရာတစ်ခုကို အခုဖော်ထုတ်နေတာ နင် နားလည်မှာ မဟုတ်ပါဘူး"

ရှောင်ပင်း နှာခေါင်းလေး ရှုံ့လိုက်သည်။

ဧကရီဆီမှာ အရှက်ကွဲမှာ ကြောက်လို့နေမှာပါ။ ရှောင်ပင်းက အနိုင်ကျင့်လို့ လွယ်တယ်ဆိုပြီး လာလိမ်နေတာပဲ။

"ဒါဆိုရင် ရှောင်ပင်း ဘယ်လို စရမလဲ"

"ပထမအဆင့် စာအုပ်ကို ဖွင့်ပါ"

"ဒုတိယအဆင့် ဖတ်ပါ"

"တတိယအဆင့် ကျင့်ပါ"

"အရှင်မင်းကြီးက နောက်နေတာလား"

"ဘာပေါက်ကရတွေ ပြောနေတာလဲ စာအုပ်မဖွင့်ဘဲ မဖတ်ဘဲနဲ့ ဘယ်လို စမှာလဲ အရင်ဆုံး အကုန်ဖတ်ကြည့်လိုက်"

ရှောင်ပင်း ခေါင်းလေး ကုတ်ရင်း အိုးတိုးအောင့်တေးဖြင့် ဟုတ်ကဲ့ပါသခင်လေး။

"ဟင်း... နင်က ဉာဏ်သိပ်မကောင်းပေမဲ့ ကျင့်စဉ်အပေါ် ထားတဲ့ စိတ်ထားကတော့ ဖြူစင်ပါတယ် ပြီးတော့ နင်က ငါ့ဇနီးရဲ့ အနီးကပ်ဆုံးလူ တစ်ယောက်လည်း ဖြစ်နေတာပဲ ကောင်းတဲ့အရာတွေကို နင့်ကို မျှဝေပေးတာက ပြဿနာမရှိပါဘူး"

ရှောင်ပင်းက စာအုပ်ကို ဖွင့်ဖတ်ရင်း ပြန်ပြောသည်။

"ရှောင်ပင်းက ဧကရိရဲ့ အနီးကပ်ဆုံးလူ မဟုတ်ပါဘူး ကိုယ်ရံတော် အစေခံ တစ်ယောက်ပါပဲ"

အဲဒီလို မပြောရဘူးလေ အစေခံဆိုတာလည်း လူပဲ အဆင့်အတန်းကွာခြားတာပဲ ရှိတာပါ ပြီးတော့ နင်ဒီရာထူးကို ရထားတယ်ဆိုကတည်းက ဧကရီက နင့်ကို အသိအမှတ်ပြုထားလို့ပေါ့။

ကိုယ့်ကိုယ်ကိုယ် သိမ်ငယ်မနေပါနဲ့ ချန်းလျန်က နည်းနည်းတော့ မာနကြီးပေမဲ့ လူကို အထင်သေးတဲ့အထိတော့ စိတ်ပုပ်တဲ့လူ မဟုတ်ဘူး။

ရှောင်ပင်း ခဏမျှ ရပ်သွားပြီးမှ ပြုံးလျက် ခေါင်းငြိမ့်လိုက်သည်။ သူမ ရင်ထဲမှာ နည်းနည်းတော့ ပျော်သွားသည်။

"ဟုတ်ကဲ့ပါ သခင်လေး ရှောင်ပင်း နားလည်ပါပြီ"

"အင်း နားမလည်တာရှိရင် ငါ့ကို မေးလို့ရတယ်"

သခင်လေးက တကယ်ကို လူကောင်းတစ်ယောက်ပဲ။ သူက ရာထူးကြီးပေမဲ့ မာနမကြီးဘူး နန်းတော်ထဲ စဝင်လာတုန်းကအတိုင်းပဲ

ဒီလိုဆိုမှတော့ သူမလည်း သူ့ရဲ့ စေတနာကို အလကား မဖြစ်စေသင့်ပါဘူး။

ဒီကျင့်စဉ်က ကြည့်ရတာ ထူးထူးဆန်းဆန်း ဖြစ်နေပေမဲ့ လောလောဆယ်တော့ ပူးပေါင်းဆောင်ရွက်ပေးလိုက်ဦးမည်။

အချိန်တန်ရင်တော့ သူမ ဉာဏ်နည်းလို့ နားမလည်ဘူးဆိုတဲ့ အကြောင်းပြချက်နဲ့ ရပ်လိုက်ရင် ရတာပဲလေ။

ကောင်းကင်ဘုံဆိုသည်မှာ ပုံသဏ္ဌာန်မရှိ သို့သော် အရာအားလုံးတွင် ပုံသဏ္ဌာန်ရှိသည်။ ကောင်းကင်နှင့် မြေကြီး ပေါင်းစပ်ကာ အရာအားလုံးကို ပြောင်းလဲစေသည် ထိုအရာအားလုံးကလည်း ကောင်းကင်ဘုံသို့ ပြန်လည် ဦးတည်သည်။

တကယ်ပါပဲ ပါဝင်တဲ့ အကြောင်းအရာတွေက နာမည်အတိုင်း တကယ်ကြီးကို ထူးဆန်းလွန်းနေသည်။ အရေးအသားကလည်း အရမ်းကြီးကျယ်လွန်းနေသလားလို့။

ရှောင်ပင်း ခဏမျှ ရပ်သွားသည်။ ကောင်းကင်နဲ့ မြေကြီးပေါ်က အရာအားလုံးက ကောင်းကင်ဘုံစွမ်းအားကနေ ဆင်းသက်လာတာဆိုတော့ ဒီစကားကလည်း မှားတော့ မမှားပါဘူး။ သူမ ခဏမျှ တွေးကြည့်ပြီးနောက် ဒါကလည်း ကျိုးကြောင်းဆီလျော်တယ်လို့ ခံစားလိုက်ရသည် ထို့ကြောင့် သူမ ဆက်ဖတ်လိုက်သည်။

မိမိကိုယ်ကိုယ် စွဲလမ်းမှုကို ဖျက်ဆီးပါ လောဘတွေကို ဖြတ်တောက်ပါ စိတ်ကို တည်ငြိမ်အောင်ထားပြီး ထိုးထွင်းသိမြင်ပါထိုအခါ ဝိညာဉ်သည် ကောင်းကင်ဘုံနှင့် တသားတည်း ဖြစ်လာလိမ့်မည်။

ဒါက ကောင်းကင်ဘုံလိုမျိုး စိတ်ကို အေးအေးထားပြီး အရာရာကို ခံစားကြည့်ဖို့ ပြောတာလား တော်တော်လေးတော့ နက်နဲတယ် ဒါပေမဲ့ ဖြစ်နိုင်ခြေတော့ ရှိပုံရတယ်။

ထို့ကြောင့် ရှောင်ပင်းသည် ပထမပိုင်း စိတ်ပိုင်းဆိုင်ရာ ကျင့်စဉ်ကို အမြန်ဖတ်ပြီးနောက် ကြမ်းပြင်ပေါ်တွင် တင်ပလ္လင်ခွေထိုင်ကာ စတင် ကျင့်ကြံတော့သည်။

မလှမ်းမကမ်းတွင် ချူနင်ကတော့ မှီထိုင်ကုလားထိုင်တစ်လုံးကို ရွှေ့ကာ အေးအေးဆေးဆေး နေပူဆာလှုံရင်း အိပ်ပျော်နေပြီ ဖြစ်သည်။

ကမ္ဘာကြီးက တိတ်ဆိတ်နေသည်။ ရံဖန်ရံခါတွင် ပိုးကောင်လေးတွေ အော်သံကို ကြားရပြီး ရှောင်ပင်းဘေးတွင် ဝိညာဉ်စွမ်းအားများက သဘာဝအလျောက် လည်ပတ်လာတော့သည်။ ရှောင်ပင်းရဲ့ အရည်အချင်းက မဆိုးပါဘူး သူမလမ်းစကို အမြန်ရှာတွေ့သွားသည်။

ထိုဝိညာဉ်စွမ်းအားများမှာ စာအုပ်ထဲတွင် ဖော်ပြထားသည့် ကမ္ဘာလောက၏ နိယာမများအတိုင်း ခန့်ညားထည်ဝါလာပြီး သူမ၏ ဝိညာဉ်နှင့် ကမ္ဘာမြေ ပေါင်းစပ်သွားတော့သည်။

မိမိကိုယ်တိုင်က ကောင်းကင်ဘုံစွမ်းအားကနေ ပြောင်းလဲလာတာ အခု ကောင်းကင်ဘုံစွမ်းအားကို ပြန်ပြီး ဖော်ထုတ်နေတာ။

ထူးခြားဆန်းပြားသော စွမ်းအားတစ်ခုက ရှောင်ပင်းဘေးမှာ ပေါ်လာပြီး မူလ ဝိညာဉ်စွမ်းအားများနေရာတွင် အစားထိုးဝင်ရောက်လာသည်။ ရှောင်ပင်း၏ ဝိညာဉ်သည် ထိတ်လန့်သွားသည်။

တုံ့ပြန်မှု ရှိနေတာလား။

အဲဒါ ဘာစွမ်းအားလဲ

သူမ ကျင့်စဉ်ကို ဆက်လက် လည်ပတ်စေသည်။ ထိုအချိန်တွင် သူမ၏ ခန္ဓာကိုယ်အတွင်းရှိ သက်ရှည်မျှော်စင်မှာ ထိုအရောင်မရှိ အနံ့မရှိသော စွမ်းအားများဖြင့် လွှမ်းခြုံသွားပြီး တစ်ကိုယ်လုံးမှာ အံ့ဖွယ် ပြောင်းလဲမှုများကို ခံစားလိုက်ရသည်။

သူမ၏ ဝိညာဉ်သည်လည်း တောင်တန်းများ၊ မြစ်ချောင်းများနှင့် အိုင်များကို ကျော်ဖြတ်ကာ ကမ္ဘာလောကအတွင်းသို့ ပျံသန်းဝင်ရောက်သွားသလိုပင်။

သူမ၏ ခန္ဓာကိုယ်အတွင်းမှာ စုဆောင်းထားခဲ့သော စွမ်းအားများမှာ အခုအချိန်တွင် အဆင့်တက်ဖို့ လမ်းစကို ရှာတွေ့သွားပြီ ဖြစ်သည်။ 

သူမ၏ ဝိညာဉ်နယ်မြေအတွင်းမှာ ကျယ်ပြောလှသော သမုဒ္ဒရာကြီးတစ်ခု ရုတ်တရက် ပေါ်လာပြီး ခွန်အားများမှာ အဆမတန် မြင့်တက်လာတော့သည်။ အားကောင်းလှသော အရှိန်အဝါတစ်ခု ဟိန်းထွက်လာတော့သည်။

ရှောင်ပင်း ချက်ချင်း သတိပြန်ဝင်လာပြီး သူမလက်ထဲက ကျင့်စဉ်စာအုပ်ကို အံ့ဩတုန်လှုပ်စွာ ကြည့်နေမိသည်။

သူမ... အဆင့်တက်သွားပြီ။

သူမသည် ချူနင့်ကို လှမ်းကြည့်လိုက်ရာ သူကတော့ အိပ်ပျော်နေဆဲပင် မဖြစ်နိုင်တာ အရှင်မင်းကြီးက နောက်နေတာ မဟုတ်ဘူးပဲ။

ဒီကျင့်စဉ်က တကယ်ကြီးပါလား ပြီးတော့ ကောင်းကင်ဘုံစွမ်းအားနဲ့ တကယ်ကြီး ပေါင်းစပ်လို့ ရတာပါလား။

ဒါပေမဲ့ ဒါက သူ​ေတာ်စင်အဆင့်ရောက်မှ သုံးလို့ရတဲ့ နည်းလမ်းလေ။

နှစ်ပတ်အတွင်းမှာ သူမက တတိယအဆင့် အထွတ်အထိပ်ကနေ ပဉ္စမအဆင့်ကို ရောက်သွားခဲ့ပြီ ဒီကျင့်စဉ်တိုးတက်မှုနှုန်းက တကယ်ကို မယုံနိုင်စရာကောင်းလောက်အောင် မြန်လွန်းနေပြီ။

"အရှင်မင်းကြီး"

သူမသည် အံ့ဩစိတ်လှုပ်ရှားစွာဖြင့် ချူနင့်လက်မောင်းကို လှုပ်နိုးလိုက်သည်။ သူမ ဘာပြောရမှန်းမသိအောင်ကို စိတ်လှုပ်ရှားနေမိသည်။

"ရှင်က တကယ်ကြီးပညာရှင်ဖြစ်နေတာလား ဒီကျင့်စဉ်က တကယ်ကြီး အလုပ်လုပ်တယ်"