အခန်း (၄၈) ငါ့ရဲ့ ပညာရှင်ဆိုတဲ့ ဂုဏ်ပုဒ်ကို နင်သံသယရှိနေတာလား

"ဟင်း... ရှောင်ပင်း နင်ပဲပြောကြည့်ပါဦး။ ဒီလောကမှာ လင်မယားတွေဖြစ်ပြီးတော့ အတူမအိပ်ရဘဲ အခန်းခွဲအိပ်ရတယ်ဆိုတာ ရှိသေးလို့လား"

"ငါက သူ့ကို စောင်လေးပဲ ခြုံပေးတာကို သူကစိတ်ဆိုးပြီး ငါ့ကိုအပြင်ကန်ထုတ်လိုက်တယ် ဒီလောကမှာ မိန်းမတွေအားလုံးသာ အဲဒီလိုဆိုရင် ယောက်ျားတွေ ဘယ်လို အသက်ရှင်ကြမလဲ"

ရှောင်ပင်းက သူမ၏ မျက်လုံးထဲတွင် အားကိုးရာမဲ့နေသော အရိပ်အယောင်များဖြင့် ပြောလိုက်သည်။

သခင်လေးချူ ဧကရီက သခင်လေးကို ချန်ရှင်းနန်းဆောင်ထဲ ပြောင်းလာခွင့်ပြုတာကိုက တကယ့်ကို အကြီးအကျယ် လျှော့ပေးလိုက်တာပါ။

ပြီးတော့ တခြားလူသာဆိုရင် အခုလောက်ဆို လူပြန်ဝင်စားဖို့ ပြင်နေရလောက်ပြီ သခင်လေး ပျော်သင့်ပါတယ်။

ရှောင်ပင်းသည် သူတို့နှစ်ဦး၏ ဆက်ဆံရေး တိုးတက်မှုကို အကောင်းမြင်သော်လည်း ဒါက မြန်လွန်းနေသည်ဟု သူမ ထင်မိသည်။ ဧကရီရဲ့ စရိုက်နဲ့ဆို ဒါကို လက်ခံဖို့ ခက်နေဦးမည်။

"ဒါပေမဲ့ သခင်းလေးချူ ဒီညကျရင် တိတ်တဆိတ် ခိုးဝင်သွားလို့ ရနိုင်မလားမသိဘူး"

ချူနင်က ရှောင်ပင်းကို ကြည့်လိုက်ရာ သူ၏ မျက်လုံးများ တောက်ပသွားသည်။

"အခွင့်အရေး ရှိလား"

ရှောင်ပင်းက ပတ်ဝန်းကျင်ကို ဝေ့ကြည့်ကာ တိုးတိုးလေး ပြောလိုက်သည်။

စမ်းကြည့်ပေါ့ ဧကရီက သခင်လေးကို သတ်မှာ မဟုတ်ပါဘူး ပြီးတော့ လက်ပါမိရင် သခင်လေးထိခိုက်မှာကိုတောင် သူမက ကြောက်နေတာ။

မဟုတ်ရင် ခုနကသခင်လေးကို အပြင်ကန်ထုတ်တာ ရှောင်ပင်း ဖြစ်မှာ မဟုတ်ဘူးလေ။

"နင်က ငါ့ကို အသက်နဲ့ရင်းပြီး ချန်းလျန်ရဲ့ အကန့်အသတ်ကို စမ်းသပ်ခိုင်းနေတာပေါ့ ဟုတ်လား နင်ကိုယ်တိုင် ဘာလို့မသွားတာလဲ"

"ရှောင်ပင်းက အစေခံပဲလေ သခင်လေးကတော့ ဧကရာဇ်ပဲဟာ ဧကရီက သခင်လေးကိုတော့ ဓားနဲ့ ခုတ်မှာ မဟုတ်ပါဘူး။

သူတို့နှစ်ဦး စကားတပြောပြောဖြင့် ဘေးခန်းက ပစ္စည်းအချို့ကို ချန်ရှင်းနန်းဆောင်ထဲသို့ ရွှေ့လိုက်ကြသည်။

ပစ္စည်းက သိပ်မရှိပါ အဝတ်အစား အနည်းငယ်နှင့် စာအုပ်အချို့သာ ဖြစ်သည်။

ရှောင်ပင်းက အားလုံးကို ကိုင်တွယ်ပေးပြီး ချူနင်အတွက် အခန်းကို သေသေချာချာ ပြင်ဆင်ပေးလိုက်သည်။

"ချန်ရှင်းနန်းဆောင်ထဲမှာ သခင်လေးတစ်ခုခု လိုအပ်တာရှိရင် ရှောင်ပင်းကို ခေါ်လိုက်ပါ"

"တကယ်လား"

မိန်းကလေးက အလေးအနက် ခေါင်းငြိမ့်ပြသည်။ "ကျွန်မက ဧကရီကို ခစားရသလို သခင်လေးကိုလည်း ခစားရမှာပေါ့ တကယ် ပြောတာပါ"

"ဒါဆိုရင် ဒီည ချန်းလျန်ကို ငါ့ဆီရောက်အောင် ခိုးခေါ်လာခဲ့ မလုပ်နိုင်ရင်တော့ မနက်ဖြန် စားစရာမရှိဘူးလို့ မှတ်လိုက်တော့"

"သခင်လေးရယ်... ဘာလို့ အမြဲတမ်း ခက်ခဲတဲ့အရာတွေကိုပဲ ခိုင်းနေရတာလဲ ကျွန်မသာ လုပ်နိုင်ရင် လုပ်ပေးပြီးသားပေါ့"

"ရှောင်ပင်းက ငါ့ဘက်တော်သားဆိုတာ ငါသိပါတယ် ကျင့်စဉ်ကို ကြိုးစားကျင့်နော် တစ်နေ့ကျရင် ချန်းလျန်ထက် သာသွားတဲ့အခါ သူ့ကို ငါ့အိပ်ရာပေါ် ပွေ့တင်လာခဲ့ပေး"

ရဲ့ချန်းလျန်က နန်းတွင်းထဲတွင် ချူနင်ကို ဧကရာဇ်အဖြစ် တရားဝင် အသိအမှတ်ပြုထားသဖြင့် သူ ဘာလုပ်လုပ်ကန့်သတ်ချက် မရှိတော့ပေ။

ဇနီးဖြစ်သူက တာ့ကျိုးအင်ပါယာရဲ့ ကိစ္စတွေကို စဉ်းစားနေသဖြင့် သူ ဝင်မရှုပ်တော့ပါ။ ရဲ့ချန်းလျန်ကိုယ်တိုင်ပဲ အဖြေရှာနိုင်လိမ့်မည်ဟု သူယုံကြည်သည်။

ထို့ကြောင့် ရှောင်ပင်းက ချူနင့်ကို သူတို့ မင်္ဂလာဆောင်တွင် ဝတ်ဆင်မည့် ဝတ်စုံတွေကို သွားကြည့်ဖို့ အကြံပေးလိုက်သည်။

လမ်းတစ်လျှောက်တွင် ရှောင်ပင်းက ချူနင့်ကို သိသင့်သိထိုက်သည်များကို ပြောပြနေသည်။

ရဲ့ချန်းလျန်ကို နှစ်ပေါင်းများစွာ ခစားလာသဖြင့် ရှောင်ပင်းက ဧကရီ၏ အလေ့အကျင့်၊ စရိုက်နှင့် သူမကို ဘယ်လို စကားမျိုးနဲ့ ချော့ရမလဲဆိုတာတွေကို ကောင်းကောင်း သိနေသည်။

"ရှောင်ပင်း... တခြားဟာတွေတော့ ငါ နားလည်ပါတယ် ဒါပေမဲ့ မြှောက်ပင့်ပြောတာတော့ မလိုပါဘူး သူက ဧကရီပဲဖြစ်ဖြစ် ငါ့မိန်းမပဲလေ နားလည်လား"

"ဒါပေမဲ့ ဧကရီကအဲဒီလို စကားမျိုးတွေကို ပိုကြားချင်မှာ မဟုတ်ဘူးလား"

"ဒါဆိုရင်တော့ ပြောင်းပြန်ဖြစ်သွားလိမ့်မယ်။ ငါက အဲဒီလို ပြောလိုက်ရင် သူကငါ့ကို ခင်ပွန်းလို မဟုတ်ဘဲ လက်အောက်ငယ်သားလို ဆက်ဆံလိမ့်မယ် နားလည်လား"

ရှောင်ပင်းက သဘောပေါက်သွားပြီး အလေးအနက် ခေါင်းငြိမ့်သည်။

"သခင်လေးနဲ့ ဧကရီတို့ ဆက်ဆံရေး ဘာလို့ ဒီလောက်မြန်မြန် တိုးတက်လာလဲဆိုတာ အခုမှပဲ သိတော့တယ်။

 သခင်လေးမှာ ကိုယ်ပိုင် နည်းလမ်းကောင်းတွေ ရှိတာကိုး ဒါဆိုရင် ရှောင်ပင်းက အကြံမပေးတော့ပါဘူး တခြားအကြောင်းအရာတွေကိုပဲ ပြောပြပါတော့မယ်။

"လိမ္မာတယ် ရှောင်ပင်း ဒီည နင့်ကို ဟင်းတစ်ခွက် ပိုကျွေးမယ်"

သူတို့နှစ်ဦး အထည်ချုပ်ဌာနသို့ ရောက်ရှိလာကြသည်။ အခုအချိန်မှာတော့ ထိုဌာနက အလုပ်အရှုပ်ဆုံး ဖြစ်နေသည်။

ကျန်းနန်နယ်က ပိုးထည်တွေက ရေကြီးမှုကြောင့် ပျက်စီးသွားသဖြင့် အိမ်နီးချင်း မိုးကျကြယ်အင်ပါယာဆီကနေ ဈေးကြီးပေး ဝယ်ယူခဲ့ရသည်။

နေ့တိုင်း အချိန်ပိုဆင်းနေကြရပြီး အမှားအယွင်း အနည်းငယ်မျှ ရှိလို့မဖြစ်ပေ မဟုတ်ရင်တော့ အရာရှိတွေအားလုံး ခေါင်းပြတ်ကုန်ကြမည်။

အချိန်ကလည်း နည်းလှသဖြင့် သူတို့ အသည်းအသန် အလုပ်လုပ်နေကြရသည်။

အထည်ချုပ်ဌာနမှ အမျိုးသမီး အရာရှိက သူတို့နှစ်ဦး လာသည်ကို မြင်သောအခါ ချူနင့်ကို မမှတ်မိသော်လည်း နန်းတွင်းဆောင်ထဲမှာ လွတ်လွတ်လပ်လပ် သွားလာနိုင်သည့် အမျိုးသားမှာ ဧကရာဇ်သာ ဖြစ်ရမည်ဟု သိလိုက်သည်။

"ကျွန်မမျိုးမက အရှင်မင်းကြီးနဲ့ နန်းတွင်းအရာရှိရဲ့ကို ဂါရဝပြုပါတယ်"

ချူနင်က အထဲက အရာအားလုံးကို စပ်စုကြည့်နေမိသည်။ လူပေါင်း ရာချီက မင်္ဂလာဝတ်စုံနှစ်စုံကိုသာမက မင်္ဂလာဦးခန်းဆောင်အတွက် လိုအပ်သည့် ပိုးစောင်များနှင့် အလှဆင်ပစ္စည်းများကိုပါ အသေးစိတ် ဖန်တီးနေကြသည်။

ရွှေရောင်နှင့် အနီရဲရောင်များက တော်ဝင်မျိုးနွယ်၏ ဂုဏ်ကျက်သရေနှင့် မင်္ဂလာရှိမှုကို ပေါ်လွင်စေသည်။

"အရှင်မင်းကြီးက မင်္ဂလာဝတ်စုံ

တွေကို လာကြည့်တာ ထင်ပါတယ် ဒီဘက်ကို ကြွပါ"

သူတို့သည် ပြီးစီးလုနီးပါး ဖြစ်နေသော ခမ်းနားထည်ဝါလှသည့် ဝတ်စုံကြီး ရှေ့သို့ ရောက်လာကြသည်။

ရွှေချည်မျှင်များကို အနုစိတ် ရက်လုပ်ထားပုံမှာ အလွန်ပင် တန်ဖိုးကြီးလှသဖြင့် ချူနင်ပင် ရင်ခုန်သွားရသည်။

"ဒါက ဧကရီအတွက်လား"

"ဧကရီအတွက်ကတော့ ပြီးသွားပါပြီ ဒါက အရှင်မင်းကြီးအတွက်ပါ"

"နှစ်စုံလုံးက နဂါးဝတ်ရုံတွေပဲလား"

နိုင်ငံတော်ရဲ့ ထုံးတမ်းစဉ်လာအရဆိုရင် မိန်းကလေးက ဧကရီ​ဖြစ်နေတော့ ဖီးနစ်ခေါင်းဆောင်းနဲ့ ဝတ်ရုံတွေကို ဝတ်ဆင်ရပါတယ်။

အမျိုးသားအတွက်ကတော့ ဒီအတိုင်း လိုက်လို့မရပါဘူး ဒါကြောင့် ဧကရီရဲ့ နဂါးဝတ်ရုံ စည်းမျဉ်းတွေအတိုင်းပဲ ချုပ်လုပ်ထားတာပါ ရင်ဘတ်က နဂါးရုပ်ပုံစံတွေမှာပဲ အနည်းငယ် ကွာခြားမှု ရှိပါလိမ့်မယ်။

ဧကရီရဲ့ဝတ်ရုံက ရွှေရောင်နဂါးရုပ်တွေ ဖြစ်ပြီး အရှင်မင်းကြီးရဲ့ ဝတ်ရုံကတော့ ကွဲပြားသွားအောင် ရွှေညိုရောင်နဂါးရုပ်တွေနဲ့ အလှဆင်ထားပါတယ်။

ချူနင်ကတော့ ဘာမှထူးခြားတယ်လို့ မခံစားရပါဘူး။ နိုင်ငံတော်ရဲ့ စည်းမျဉ်းတွေက ကောင်းသလို ထုံးတမ်းစဉ်လာတွေကလည်း ဂုဏ်သိက္ခာ ရှိလှသည်။

ပြီးတော့ သူက နဂါးရုပ် အရောင်ကို ဂရုမစိုက်ပါဘူး ရဲ့ချန်းလျန် ဒီဝတ်စုံကို ဝတ်လိုက်ရင် ဘယ်လောက် လှမလဲဆိုတာကိုပဲ သူ စိတ်ဝင်စားနေတာပါ။

ချန်းလျန် မင်းရဲ့ နဂါးဝတ်ရုံကို မချွတ်လိုက်ပါနဲ့ဦး ကိုယ်က အဲဒီလိုပုံစံလေးကိုမှ သဘောကျနေတာ။

ဖြစ်နိုင်မလား ဘာလို့ မဖြစ်နိုင်ရမှာလဲ။

နောက်ကျရင် ပြန်ဝတ်ခိုင်းပြီး စမ်းကြည့်ရမယ်။

ဘေးနားက လူတွေကတော့ ချူနင်ရဲ့ စိတ်ကူးတွေက ကောင်းကင်ဘုံ ကိုးထပ်ကျော်အထိ ရောက်နေပြီဆိုတာ မသိကြပါဘူး။

သူတို့ကတော့ ချူနင်က ဝတ်စုံတွေကို သဘောကျနေတယ်လို့ပဲ ထင်နေကြသည်။

အမျိုးသမီး အရာရှိက ပြုံးလျက် ပြောသည်။ "မကြာခင်ကပဲ နန်းတွင်းအရာရှိရဲ့က အရှင်မင်းကြီးအတွက် နေ့စဉ်ဝတ် ဝတ်စုံတွေ ချုပ်ပေးဖို့ ပြောထားပါသေးတယ်။ ဒါပေမဲ့ မင်္ဂလာပွဲကြီးနဲ့ တိုက်ဆိုင်နေတော့ ခဏ ဆိုင်းငံ့ထားရတာပါ။

အခု အရှင်မင်းကြီးနဲ့ တွေ့တုန်းမှာ ဘယ်လို အရောင်နဲ့ ပုံစံမျိုးကို သဘောကျလဲဆိုတာ မေးပါရစေ"

ချူနင် သတိပြန်ဝင်လာပြီး မေးလိုက်သည်။ "ရွှေညိုရောင်အပြင် တခြား ဘာအရောင်တွေ ရှိသေးလဲ"

"အဖြူရောင်၊ အမည်းရောင်၊ အနီရောင်... အရှင်မင်းကြီး စဉ်းစားလို့ရသမျှ အကုန်ဖြစ်နိုင်ပါတယ်"

"ဒါဆို အမည်းရောင်ပဲ လုပ်ပေးပါ။ ဒါက လူမသိအောင် နေလို့ကောင်းတယ် ငါလို ပညာရှင် တစ်ယောက်ကတော့ အမည်းရောင်နဲ့မှ ခန့်ညားမှာ"

အမျိုးသမီးက ဘာပြန်ပြောရမှန်း မသိသဖြင့် အိုးတိုးအောင့်တေး ပြုံးလျက် ခေါင်းငြိမ့်လိုက်သည်။

"မင်္ဂလာပွဲအတွက် အကုန်ပြီးသွားရင် အရှင်မင်းကြီးအတွက် ဝတ်စုံနမူနာတွေ ပို့ပေးပါ့မယ် အရှင်မင်းကြီး စိတ်ကြိုက် ရွေးချယ်နိုင်ပါတယ်"

"ကောင်းပြီ"

ရှောင်ပင်းက ပြုံးလျက် ပြောသည်။ "အရှင်မင်းကြီးက တကယ်ပဲ လူစွမ်းကောင်း ပညာရှင်ဖြစ်ချင်တယ်ဆိုရင် ကျင့်စဉ်ကို အရင် ကျင့်သင့်တာပေါ့ လက်ရှိ တာ့ချန်းအင်ပါယာမှာဆိုရင် အနည်းဆုံး ကောင်းကင်ဖြစ်စဥ် အဆင့်လောက် ရောက်မှ ပညာရှင်လို့ ခေါ်လို့ရမှာလေ"

"ဟက် ဒါဆိုရင် ငါကအမြင့်ဆုံးကို ရောက်နေပြီပေါ့ ပညာရှင်လို့ခေါ်တာ မခေါ်တာက ငါ့အတွက် ဘာမှမထူးခြားပါဘူး"

ရှောင်ပင်းကတော့ ပြုံးပြီး တိတ်နေလိုက်သည်။ ချူနင်က သူမကို တစ်ချက် ကြည့်လိုက်ပြီး "အို နင်က ငါ့ကိုမယုံဘူးလား"

"ယုံပါတယ် ယုံပါတယ် သခင်လေးက ပညာရှင်ကြီးပါ"

"ဟင်း... နင်က လုံးဝ မယုံတာပဲ ကဲ... ဒီလိုလုပ် အရင်က ငါနင့်ကိုပေးထားတဲ့ တာယန် ကောင်းကင်ဘုံကျမ်းထဲက နင်နားမလည်တာရှိရင် ငါ့ကို မေး ငါ ရှင်းပြပေးမယ်။ ဘယ်နေရာကို နားမလည်တာလဲပြော"

ရှောင်ပင်း ခဏမျှ ကြောင်သွားသည်။ သူမ အခန်းထဲမှာ ဖုန်တက်နေတဲ့ အဲဒီကျင့်စဉ် စာအုပ်ကို သတိရသွားပြီး အိုးတိုးအောင့်တေး ဖြစ်သွားရသည်။

သူမက အဲဒီစာအုပ်ကို တစ်ခါမှတောင် မလှန်ကြည့်ရသေးဘူးလို့တော့ မပြောရဲပါဘူး။

"ဟို ကျွန်မက ဉာဏ်နည်းတော့ ဘာတစ်ခုမှ နားမလည်ဘူး ဖြစ်နေလို့ပါ"

ချူနင် သက်ပြင်းချလိုက်သည်။

"ထားလိုက်ပါတော့ နင်ငါတို့နှစ်ယောက်ကို ကူညီပေးထားတဲ့အတွက် ငါကိုယ်တိုင်ပဲ သင်ပေးတော့မယ်။ မဟုတ်ရင် ငါ့ရဲ့ ပညာရှင်ဆိုတဲ့ ဂုဏ်ပုဒ်က နင်တို့ရှေ့မှာ ပျက်စီးသွားလိမ့်မယ်"

"သွားကြစို့"

ရှောင်ပင်း ကြောင်အမ်းအမ်း ဖြစ်ကျန်ခဲ့သည်။ အဲဒီစာအုပ်က နောက်နေတာ မဟုတ်ဘူးလား ချူနင်က တကယ်ပဲ သင်ပေးမလို့လား သူက တကယ်ကြီး ပြောနေတာလား။

ဒါပေမဲ့ အရှင်မင်းကြီးက ပြောမှတော့။

ထားလိုက်ပါတော့လိုက်သွားလိုက်တာပေါ့အရှင်မင်းကြီးရဲ့စေတနာကိုအလကားမဖြစ်စေချင်ဘူး။