အခန်း (၄၂) ခေါင်းကိုယူပြီး နောက်ကွယ်ကလူကို ရှာခြင်း

နက္ခတ်ဗေဒင်ဌာနက လူတွေ သေကုန်ပြီ တစ်ယောက်မှ ပြန်မလာဘူး ရန်သူက ဘယ်သူလဲဆိုတာတောင် သူတို့ မသိလိုက်ကြဘူး။

လက်ရှိ တာ့ချန်းအင်ပါယာမှာဆိုရင် သူတော်စင်အလယ်အလတ်အဆင့်ကျင့်ကြံသူတစ်ယောက်ဟာ နိုင်ငံတော်အတိုင်ပင်ခံလိုမျိုး အလေးထားခံရမှာ ဖြစ်သည်။

ဒီလောက်များပြားတဲ့ လူတွေကို ဘယ်သူက အသံတိတ်သတ်ဖြတ်နိုင်တာလဲ သတင်းတွေ အခုမှ ရောက်လာတယ်ဆိုကတည်းက ရန်သူက သူတို့ကို အစောကြီးကတည်းက ကိုင်တွယ်ပြီးသား ဖြစ်နေပုံရသည်။

ဝမ်ကျင့်ကျုံး၏ မျက်နှာမှာ အလွန်ပင် တင်းမာနေသည်။ တာ့ချန်းအင်ပါယာမှာ တကယ်ပဲ ကြောက်စရာကောင်းတဲ့ ခွန်အားရှိသူတစ်ယောက် ရှိနေတာ သေချာသွားပြီ။ 

သူတော်စင်အဆင့်ကို ဒီလောက်လွယ်လွယ် သတ်နိုင်တယ်ဆိုရင် အနည်းဆုံးတော့ အဋ္ဌမအဆင့် အနန္တအဆင့် ဖြစ်ရမယ်။ ဒါပေမဲ့ တာ့ချန်းလို နေရာမျိုးမှာ အဲဒီလိုလူ ဘယ်လိုရှိနိုင်မှာလဲ။

အထိန်းတော်ကြီး အဘိုးကြီးမှာတော့ ဆုတ်လမ်းမရှိတော့ပေ။ သူ တာ့ချန်းကို လာရခြင်းမှာ ၎င်း၏ နဂါးသွေးကြောကို ဖြတ်တောက်ရန် ဖြစ်သည်။ တာ့ကျိုးအင်ပါယာ၏ ကမ္ဘာကြီးကို သိမ်းပိုက်မည့် လမ်းကြောင်းကို ဘယ်အရာမှ အဟန့်အတား မဖြစ်စေရဘူး။

တကယ်လို့ တစ်ဖက်လူက အနန္တအဆင့်ဆိုရင်တောင် အစောပိုင်းအဆင့်ဆိုရင် သူ သတ်နိုင်တယ်လို့ ယုံကြည်ချက်ရှိသည်။

အလယ်အလတ်အဆင့်ဆိုရင်တော့ ပြင်းပြင်းထန်ထန် ဒဏ်ရာရအောင် လုပ်နိုင်ပေမဲ့ သတ်ဖို့တော့ မသေချာဘူး။ နောက်ဆုံးအဆင့်ဆိုရင်တော့ သူ လွတ်အောင်ပြေးနိုင်မယ်လို့ ယုံကြည်သည်။

ဝမ်ကျင့်ကျုံးက မျက်လုံးလေး မှေးစင်းကာ ဖြည်းဖြည်းချင်း ထရပ်လိုက်သည်။

"အရှင်မင်းကြီးဆီ သတင်းပို့ခိုင်းလိုက် ငါသာ ဒီနေ့ တာ့ချန်းနန်းတော်မှာ သေသွားခဲ့ရင် တာ့ချန်းနဲ့ ချက်ချင်း ငြိမ်းချမ်းရေးယူပြီး မဟာမိတ်ဖွဲ့ဖို့ ပြောလိုက် ငါသာ မသေခဲ့ရင်တော့"

ကျန်တဲ့ ကျင့်ကြံသူတွေက ခေါင်းငြိမ့်လိုက်ကြသည်။ ရလဒ်ကို သူတို့ သိပြီးသားပါ။ ဒီအထိန်းတော်ကြီးတောင် သေသွားပြီဆိုရင် တာ့ချန်းမှာ အနန္တအဆင့်ထက် မြင့်တဲ့ ပုဂ္ဂိုလ်တစ်ယောက် ရှိနေတာ သေချာပြီမို့ မဟာမိတ်ဖွဲ့ဖို့ကလွဲလို့ တခြားနည်းလမ်း မရှိတော့ဘူး။ 

သူ မသေခဲ့ရင်တော့ တာ့ချန်းရဲ့ နဂါးသွေးကြော ဖြတ်တောက်ခံလိုက်ရပြီမို့ သူတို့ရဲ့ ခရီးစဉ်က အောင်မြင်သွားပြီ ဖြစ်သည်။

"ရတနာရှိတဲ့သူက အပြစ်ရှိတာပဲ မင်းတို့ ငါ့ရဲ့ နက္ခတ်ဗေဒင်ဌာနကလူတွေကို သတ်ရဲမှတော့ ငါ ရက်စက်တာကို အပြစ်မတင်နဲ့တော့"

......

နန်းတော်အတွင်း၌ ချူနင်သည် တစ်မြို့လုံးကို အပေါ်စီးမှ ကြည့်ကာ အနားသို့ တိုးကပ်လာသော ပုံရိပ်ကိုကြည့်ပြီး ပြုံးလိုက်သည်။ 

နန်းတော်အတွင်းရှိ ကျင့်ကြံသူ အမြောက်အမြားလည်း သတိအနေအထားဖြင့် စောင့်ကြည့်နေကြသည်။ ဒါပေမဲ့ ဒီကျင့်ကြံသူတွေကတော့ အဲဒီ အဘိုးကြီးကို ယှဉ်နိုင်မှာ မဟုတ်ဘူး။

ဟင်း တာ့ကျိုးအင်ပါယာက လူတွေပေါ့လေ။

ချူနင်က ပြုံးလျက် ဖြည်းဖြည်းချင်း ထရပ်လိုက်သည်။ ငါမကြာခင် မင်္ဂလာဆောင်တော့မယ် ငါ့ဇနီးက တကယ့်ဇနီးဖြစ်လာတော့မယ်။

အဲဒီအချိန်မျိုးမှာ ငါ့ဇနီးကို လာပြီး ဒုက္ခပေးချင်နေတဲ့သူ ရှိနေတယ်ပေါ့။ ငါ ဘာလုပ်နိုင်မလဲ ငါဘာမှ မတတ်နိုင်ဘူးလေ (အေးဆေးပဲ ကိုင်တွယ်လိုက်မှာပေါ့)။

ရုတ်တရက် မိုးတွေ သည်းထန်စွာ ရွာချလာပြီး ထစ်ချုန်းနေသော မိုးသံများကြားတွင် အသံပေါင်းစုံ ဖုံးကွယ်သွားတော့သည်။

ဗြုန်း... ဗြုန်း... ဗြုန်း...

ရေဖုံးလွှမ်းနေသော မြေပြင်ပေါ်တွင် ခြေလှမ်းအနည်းငယ်တိုင်းမှာ ခြေရာတွေ ထင်ကျန်ခဲ့သော်လည်း လူ့ပုံရိပ်ကိုတော့ မမြင်ရပေ။ 

သူ၏ အရှိန်မှာ အလွန်မြန်ပြီး ရဲ့ချန်းလျန် ရှိရာ ချန်ရှင်းနန်းဆောင်ဆီကို ချက်ချင်း ဦးတည်သွားသည်။

နဂါးအရှိန်အဝါက ဘာကြောင့် ပေါ်လာတာပဲဖြစ်ဖြစ် အဲဒါက ဒီဧကရီမလေးနဲ့ သက်ဆိုင်နေတာ သေချာသည်။ တာ့ချန်းရဲ့ နန်းတော်မြို့ရိုးတွေက သူ့အဆင့်ရှိတဲ့ လူတစ်ယောက်ကို မတားဆီးနိုင်ပါဘူး။

နီရဲသော နံရံများနှင့် ရွှေရောင် အမိုးပြားများလျှပ်စီးလက်မှုများက တစ်ကမ္ဘာလုံးကို ခဏတာ လင်းထိန်သွားစေသည်။ ဝမ်ကျင့်ကျုံး ရောက်လိုရာ ပန်းတိုင်ကတော့ ရှေ့နားတင် ရှိနေပြီ။

သို့သော် လျှပ်စီးသံနှင့် အလင်းအမှောင်တွေ ရှုပ်ထွေးသွားသည့် တစ်ခဏမှာပင် အထိန်းတော်ကြီး၏ ရှေ့တွင် ပုံရိပ်တစ်ခု ရုတ်တရက် ပေါ်လာသည်။

ဝုန်း

ဝမ်ကျင့်ကျုံး၏ မျက်နှာမှာ အမူအရာ ကင်းမဲ့နေသည်။ သူ၏ ဝတ်ရုံနီကြီးပေါ်က နီရဲသော ချည်မျှင်ပေါင်း သန်းနှင့်ချီသည် ကမ္ဘာအနှံ့ ပျံ့လွင့်သွားသည်။

သူသည် ရှေ့က နဂါးဝတ်ရုံ ဝတ်ထားသော အမျိုးသားကို စိုက်ကြည့်ကာ သူ့အမှတ်အသားကို ခန့်မှန်းလိုက်သည်။

"မင်းက တာ့ချန်းရဲ့ ဧကရာဇ်အသစ်လား"

ချူနင်က ပြုံးလိုက်သည်။

"ဂုဏ်ယူပါတယ် မင်း မှန်သွားပြီ ဒါပေမဲ့ ဆုတော့ မရှိဘူးနော်"

"ဒါနဲ့ ဒီလောက် အရေးကြီးတဲ့ ဧည့်သည်က ဘာလို့ ညကြီးမင်းကြီး နန်းတော်ထဲကို အသိမပေးဘဲ ရောက်လာရတာလဲ"

အထိန်းတော်ကြီးက နှာခေါင်းရှုံ့လိုက်သည်။

"ဒါဆို ခန့်မှန်းနေဖို့ မလိုတော့ဘူး တာ့ချန်းရဲ့ နဂါးအရှိန်အဝါ အားလုံးက မင်းဆီက လာတာပဲ ငါ ရက်စက်တာကိုအပြစ်မတင်နဲ့"

စကားဆုံးသည်နှင့် မရေမတွက်နိုင်သော ချည်မျှင်များသည် ချူနင်ထံသို့ ချက်ချင်း တိုးဝင်သွားသည်။ မြင်နေရရုံတင် မဟုတ်ဘဲ ချူနင် ဘေးနားက ဟင်းလင်းပြင်တွေ ကွဲအက်သွားပြီး ချည်မျှင်ပေါင်း ထောင်သောင်းချီ ထွက်ပေါ်လာကာ ချူနင့်ကို ပတ်ပတ်လည် ဝိုင်းထားတော့သည်။

ကောင်းကင်ဘုံလမ်းစဉ် အနန္တအဆင့်အထိန်းတော်ကြီး၏ နည်းစနစ်များသည် ကောင်းကင်ဘုံ၏အင်အားနှင့် ဟင်းလင်းပြင် အင်အားကို သုံးထားခြင်း ဖြစ်သည်။ ဤအဆင့်ရှိသူများကြားမှာတောင် ရလဒ်က ပြောရခက်လှသည်။

"ငါက မင်းကို တစ်ခုခုများလားလို့ ထင်နေတာ ငါ လာမယ်ဆိုတာကို သိပြီးကြိုစောင့်နေတာတောင် မင်းရဲ့ခွန်အားက ဒီလောက်ပဲလား"

သူက လှောင်ပြုံးပြုံးလိုက်ပြီး ထိုဟင်းလင်းပြင်ကို ချက်ချင်း ချေဖျက်လိုက်သည်။ မိုးခြိမ်းသံကြီးကြောင့် ထိုအသံမှာ ဖုံးကွယ်သွားတော့သည်။

ဝမ်ကျင့်ကျုံး ဆက်ပြီး လှုပ်ရှားဖို့ ပြင်လိုက်စဉ်မှာပင် လက်တစ်ဖက်က သူ၏ ပခုံးပေါ်သို့ ရုတ်တရက် ရောက်ရှိလာသည်။

"ငါတို့ကြားမှာ ဘာရန်ငြိုးမှ မရှိပါဘူး တာ့ကျိုးအင်ပါယာနဲ့ တာ့ချန်းအင်ပါယာက အဆင့်ချင်းတောင် မတူဘူး မဟုတ်လား မင်းတို့ ငါတို့ကို ပစ်မှတ်ထားဖို့ မလိုပါဘူး ငါ့ရဲ့ တာ့ချန်း နဂါးအရှိန်အဝါက တိုးတက်နေရင်တောင် ငါတို့ မဟာမိတ် မဖွဲ့နိုင်စရာ အကြောင်းမရှိဘူးလေ။ ဘာလို့ အတင်းအကျပ် တိုက်ခိုက်သတ်ဖြတ်နေချင်ရတာလဲ"

အဘိုးကြီး နေရာတင် အေးခဲသွားသည်။ ဒီလူက ဘယ်လိုလုပ် လွတ်သွားတာလဲ သူ တွန့်ဆုတ်မနေဘဲ တစ်ကိုယ်လုံးကနေ ချည်မျှင်ပေါင်းများစွာကို ထပ်ပြီး ထုတ်လွှတ်လိုက်ပြန်သည်။

ထိုတိုက်ကွက်သည် ချူနင်၏ ခန္ဓာကိုယ်ကို တည့်တည့် ဖောက်ထွက်သွားပြီး ခေါင်းကိုပါ ထိမှန်သွားသည်။

သူ သေမှာ သေချာပြီ။

ဒါပေမဲ့ ဝမ်ကျင့်ကျုံး သတိပြန်ဝင်လာချိန်မှာတော့ နောက်ထပ် လက်တစ်ဖက်က သူ၏ တခြားပခုံးပေါ်မှာ ရှိနေပြန်သည်။ သူ၏ နှလုံးသားမှာ ပြာကျသွားသလို ခံစားလိုက်ရတော့သည်။

ထိုအချိန်တွင် ဝမ်ကျင့်ကျုံး နားလည်သွားသည်။ နက္ခတ်ဗေဒင်ဌာနက နန်းတော်ထဲက နဂါးအရှိန်အဝါကို စတင်စုံစမ်းကတည်းက သူတို့ ပစ်မှတ်ထားခံလိုက်ရပြီ ဆိုတာကိုပါ။

ဒီလူက သူတော်စင်အဆင့်လည်း မဟုတ်ဘူး အနန္တအဆင့်လည်း မဟုတ်ဘူး သူက ကောင်းကင်ဖြစ်စဥ်အဆင့်ပဲ။

ကောင်းကင်နဲ့ မြေကြီးကြားမှာ အသန်မာဆုံး ကျင့်ကြံသူ ကောင်းကင်ဖြစ်စဥ်အဆင့်

ဒါက ကြောင်က ကြွက်ကို ဖမ်းသလို ကစားနေတာပဲ တစ်ဖက်လူက သူ့ကို အရူးလုပ်နေတာ။ 

တာ့ချန်းအင်ပါယာမှာ ကောင်းကင်ဖြစ်စဥ်အဆင့် ကျင့်ကြံသူ ရှိနေဖို့ဆိုတာ ဘယ်လိုမှ မဖြစ်နိုင်ဘူးလေ။

"ငါပြောတာ အဓိပ္ပာယ်ရှိတယ်လို့ မင်း ထင်လား"

ထိုအချိန်တွင် ဝမ်ကျင့်ကျုံး၏ စိတ်ထဲတွင် မျှော်လင့်ချက် ကင်းမဲ့သွားပြီး ခုခံလိုစိတ်ပင် မရှိတော့ပေ။ သူ နန်းတော်ထဲကို ခြေချလိုက်ကတည်းက သူ သေဖို့ ကံပါလာခဲ့ပြီ။

ဝမ်ကျင့်ကျုံး၏ စိတ်တွေ တုန်ရင်နေပြီး စကားတွေ ထစ်ကုန်သည်။ "ငါ ..ငါ အခု အသနားခံရင် အသက်ရှင်ခွင့် ရနိုင်ဦးမလား"

ချူနင်က ဝတ်ရုံနီနှင့် အထိန်းတော်ကြီးကို ကြည့်ကာ ပြုံးလိုက်သည်။ "မရဘူး"

"ဒါဆို ဘာလို့ အဲဒီ စကားတွေကို ပြောနေသေးတာလဲ"

"ဘာလို့လဲဆိုတော့ အဲဒါတွေက ငါ့ရဲ့ စကားပြောခန်းတွေမို့လို့လေ အဲဒါတွေကို ငါ မပြောရင် မင်းက ငါ့ကို အနိုင်ကျင့်လို့ လွယ်တယ်လို့ ထင်နေမှာပေါ့"

ချူနင်က ပြုံးလျက် လက်လှမ်းကာ ဝမ်ကျင့်ကျုံး၏ ခေါင်းကို ဆွဲဖြုတ်လိုက်သည်။ ဘာအားမှ စိုက်စရာမလိုဘဲ အလွန် လွယ်ကူလှသည်။ ဝမ်ကျင့်ကျုံး၏ မျက်နှာတွင် ထိတ်လန့်ကြောက်ရွံ့မှုတွေ အေးခဲနေပြီး သူ၏ ခန္ဓာကိုယ်မှ သွေးတွေ ပန်းထွက်လာသည်။

ချူနင်၏ ရွှေရောင် နဂါးဝတ်ရုံမှာ သွေးတွေ ပေကျံသွားသည်။ သူက မျက်မှောင် အနည်းငယ် ကြုတ်လိုက်သည်။

"သေတာတောင်မှ စတိုင်မကျလိုက်တာ။ အနည်းဆုံးတော့ မင်းရဲ့ ဝိညာဉ်ကို ဖောက်ခွဲပြီး ငါနဲ့အတူ သေဖို့ ကြိုးစားသင့်တာပေါ့ အခုတော့ အသနားခံဖို့ပဲ စဉ်းစားတယ်"

ချူနင်က လက်ကို မြှောက်ကာ ဝမ်ကျင့်ကျုံး၏ ခန္ဓာကိုယ်နှင့် သွေးများကို ချေမှုန်းပစ်လိုက်ရာ ၎င်းတို့မှာ ဝိညာဉ်စွမ်းအင်အဖြစ် ပြောင်းလဲကာ ကမ္ဘာအနှံ့ ပျံ့လွင့်သွားသည်။ သူ၏ လက်ထဲတွင်တော့ ခေါင်းတစ်လုံးသာ ကျန်ခဲ့သည်။

ဟင်း.

အင်ပါယာ ငါးခုလုံးကို သိမ်းပိုက်ဖို့ဆိုတာ ပြဿနာ မဟုတ်ပါဘူး။ ဒါပေမဲ့ အကုန်လုံးကို သိမ်းပိုက်လိုက်ရင် ငါ့ဇနီးအတွက် ကြိုးစားစရာ ဘာမှကျန်တော့မှာ မဟုတ်ဘူး။

သူမက ကျင့်စဉ်ကိုပဲ အာရုံစိုက်ပြီး တိုင်းပြည်ရေးရာတွေ မလုပ်တော့ရင် ငါသူမနဲ့ စကားပြောဖို့ သံယောဇဉ် တည်ဆောက်ဖို့ အခွင့်အရေး မရတော့ဘူးလေ။

ဒါ့အပြင် ချူနင်၏ အကြံအစည်မှာ တာ့ချန်းအင်ပါယာကို စနစ်တကျ ဖွံ့ဖြိုးတိုးတက်စေပြီး တဖြည်းဖြည်းနှင့် အသန်မာဆုံး အင်အားစု ဖြစ်လာစေဖို့ ဖြစ်သည်။

သူကိုယ်တိုင်လည်း ကျင့်စဉ်ဂိမ်းတစ်ခု ဆော့နေသလိုမျိုး သူ မွေးမြူထားတဲ့ အင်အားစုက ပိုသန်မာလာတာကို ကြည့်ပြီး အောင်မြင်မှု အမှတ်တွေ ရချင်တာပါ။

သူက ဝင်မပါချင်ပေမဲ့ တာ့ကျိုးအင်ပါယာရဲ့ လုပ်ရပ်ကတော့ ကျင့်ဝတ်နဲ့ မညီဘူး။ အဲဒါဆိုရင်တော့ သူတို့ရဲ့ နန်းတော်ဆီ တစ်ခေါက်လောက် သွားလည်ရမှာပေါ့။ ဝမ်ကျင့်ကျုံး ဒီကို လာခဲ့သလိုမျိုး အတိအကျပေါ့။

သူ တစ်ချက် ခြေလှမ်းလိုက်ရာ ဟင်းလင်းပြင်ကြီးကွဲအက်သွားပြီး ပိုမို ခမ်းနားထည်ဝါသော တာ့ကျိုးအင်ပါယာ၏ နန်းတော်အတွင်းသို့ တိုက်ရိုက် ရောက်ရှိသွားတော့သည်။

ခမ်းနားလှသောနန်းဆောင်ကြီး၏အပြင်ဘက်တွင်ရပ်လိုက်စဉ်မှာပင်သူ့ကိုသတိထားမိလိုက်သောကျင့်ကြံသူအချို့သည်ချက်ချင်းပင်ဖုန်မှုန့်အဖြစ်ပြောင်းလဲသွားသည်ချူနင်သည်တာ့ကျိုးဧကရာဇ်ရင်းတန်း၏အိပ်ဆောင်အတွင်းသို့ခန့်ခန့်ညားညားပင်လမ်းလျှောက်ဝင်သွားတော့သည်။