အခန်း (၃၈) ခွေးကိုက်ခံရတယ်လို့ပဲ သဘောထားလိုက်မယ်

မင်းတက်နန်းဆောင်အတွင်း၌ ရဲ့ချန်းလျန်၏ မျက်နှာအမူအရာမှာ တဖြည်းဖြည်း ရှုပ်ထွေးလာသည်။

ကျန်းနန်ဒေသ၏ ကိစ္စပြေလည်သွားခြင်းမှာ သူမရှေ့တွင်ရှိသော ဤလူ၏ စီမံကိန်းများနှင့် ခွဲခြား၍မရပေ။ သူ ပေါ့ပေါ့ပါးပါး ရေးပေးခဲ့သော မူဝါဒများမှာ ကျန်းနန်ဒေသရှိ ပြည်သူအမြောက်အမြားကို အမှန်တကယ် ကယ်တင်နိုင်ခဲ့သည်။

လူအချို့ သေဆုံးခဲ့ရသော်လည်း ထိုထက်မကသော လူများစွာအသက်ရှင်ခဲ့ရပြီး ဆန်စျေးနှုန်းကိုလည်း ပြန်နှိမ်နိုင်ခဲ့သည်။

ဤနည်းဖြင့် အင်ပါယာသည် ဘဏ္ဍာတိုက်ရှိ ဆန်များဖြင့် ရိက္ခာများ ပြန်လည်ဝယ်ယူကာ ဘေးဒုက္ခသည်များကို ကူညီနိုင်မည်ဖြစ်ရာ ကျန်းနန်ပြည်သူများအတွက် အသက်ရှူပေါက် ရသွားစေခဲ့သည်။

ဒါဟာ တကယ့်ကို ကောင်းချီးတစ်ခုပါပဲ ရဲ့ချန်းလျန်၏ရင်ထဲတွင် ကြာရှည်စွာ ကိန်းအောင်းနေခဲ့သော အုံ့မှိုင်းမှုများ ပျောက်ကွယ်သွားပြီး သူမ စိတ်ကြည်လင်နေသည်။

သို့သော်လည်း ဤအကြံအစည်၏ နောက်ကွယ်က လူသားမှာတော့ အလွန်အမင်း တည်ငြိမ်နေသဖြင့် သူမကိုဇဝေဇဝါ ဖြစ်စေသလို စိုးရိမ်လည်း ဖြစ်စေသည်။ ချူနင်က ဒီကိစ္စကို သူမနာမည်နဲ့ လုပ်ခဲ့လို့ မကျေမနပ် ဖြစ်နေတာလား။

ရဲ့ချန်းလျန် ခဏမျှ တုံ့ဆိုင်းနေပြီးမှ ချူနင့်ကို ကြည့်ကာ ဖြည်းဖြည်းချင်း ပြောလိုက်သည်။

နင်သာ အလိုမရှိဘူးဆိုရင် မနက်ဖြန် ညီလာခံမှာ ဒီအကြံအစည်ရဲ့ နောက်ကွယ်က လူက နင်ပဲဆိုတာ ငါကြေညာပေးလို့ ရပါတယ်။

အဲဒီတုန်းက ဒီအစီရင်ခံစာကို ငါ့နာမည်နဲ့ပဲ ကိုင်တွယ်ခဲ့တာဆိုတော့။

ချူနင်၏ စရိုက်အရဆိုလျှင် ဘာလို့ သူက တစ်ချက်ကလေးတောင် မပျော်ရတာလဲ ဒါက အဓိပ္ပာယ် မရှိဘူးလေ။

"ငါ မကျေမနပ်ဖြစ်နေတာ မဟုတ်ပါဘူး။ ဒီလောက် မြန်မြန်ဆန်ဆန် ပြီးသွားလိမ့်မယ်လို့ မထင်ထားလို့ အံ့သြနေရုံပါ"

ရဲ့ချန်းလျန်က ပြန်ရှင်းပြသည် "အင်ပါယာအတွင်းက ကူးတို့သင်္ဘောအများစုမှာ အရှိန်မြှင့်ပေးတဲ့ အနိမ့်စားမှော်လက်နက်တွေ တပ်ဆင်ထားတယ်။ သာမန်ပြည်သူတွေလည်း ဝယ်သုံးလို့ရတယ် အများပြည်သူသုံးတွေလည်း ရှိတယ်လေ"

ချူနင် ချက်ချင်းပင် နားလည်သွားသည်။ 

"အော် အဲဒီလိုလား ထုတ်လုပ်မှု ကိရိယာတွေက အစောကြီးတည်းက တိုးတက်နေတာပဲ ငါ ဒါကို ထည့်မတွက်မိခဲ့ဘူး"

"ဒါဆိုရင်တော့ သေဆုံးတဲ့သူ အရေအတွက်က ငါထင်ထားတာထက် ပိုနည်းမှာပေါ့"

ရဲ့ချန်းလျန် မျက်မှောင်ကြုတ်သွားပြီး မကျေမနပ် ဖြစ်သွားသည်။ "ဒီနေ့လို သတင်းကောင်း ရတဲ့နေ့မှာနင်ကသေတာ တွေအကြောင်းပဲ ပြောနေတာလား နင်ငါ့ကို သက်သက်မဲ့ ရန်စနေတာလား"

ချူနင်က ခုံပေါ်တွင် ခန္ဓာကိုယ်ကို မှီချလိုက်ပြီး အနည်းငယ် ပေါ့ပါးသော အမူအရာဖြင့် "မဟုတ်ပါဘူး ငါက အရှိကိုအရှိအတိုင်း ပြောတာပါ။ဒီလောက်ကြီးတဲ့ ဘေးဒုက္ခမျိုးဆိုရင် တခြားခေတ်တွေမှာဆိုရင် သေတဲ့သူ အရေအတွက်က ထင်ထားတာထက် အများကြီး ပိုများနိုင်တယ်"

သူက စားပွဲပေါ်က အစီရင်ခံစာတွေကို ကြည့်ကာ ပြောလိုက်သည် "ကျန်သေးတဲ့ အစီရင်ခံစာ အချို့ကို အရင်ဆုံး လက်စသတ်လိုက်ဦးမယ် ဒါတွေပြီးသွားရင် မင်းလည်း စိတ်အေးလက်အေး ဖြစ်သွားမှာပေါ့"

ယခု သူသည် ဧကရာဇ်မုဒ်ဝင်နေပြီး သူ၏ မျက်လုံးထဲတွင် တိုင်းပြည်အရေးကလွဲ၍ ဘာမှ မရှိတော့ပေ။

အလုပ်ကို အရင်ပြီးအောင်လုပ် ပြီးမှ စကားပြောမယ်။

ရဲ့ချန်းလျန် ဘာပြောရမှန်း မသိတော့ပေ။ ချူနင်က ဘာလို့ တစ်စက်မှ မပျော်သလို ဖြစ်နေရတာလဲ။

ဒီလောက် သတင်းကောင်း ရတာတောင်မှ ပြီးတော့ မင်္ဂလာဆောင်ခါနီးမှာ နိမိတ်ကောင်း ရတာတောင်မှ ချူနင်က စကားပို တစ်ခွန်းမှ မပြောပါဘူး။ သူမက ဒီရက်ပိုင်း အလုပ်တွေ မလုပ်ဘဲ သူ့အပေါ်မှာပဲ ပုံချထားလို့ စိတ်ဆိုးနေတာလား ဒါမှမဟုတ် တခြားတစ်ခုခုကို မကျေနပ်တာလား။

ဘာလို့ သူက အရင်လိုပဲ ရုတ်တရက် စကားပြန်မပြောတော့တာလဲ သူမကို တမင် လျစ်လျူရှုနေတာလား မင်္ဂလာဆောင်တော့မှာဆိုတော့ သူတို့က လင်မယားတွေလို ဖြစ်နေပြီလေ။

သူ ဘာလိုချင်တယ်ဆိုတာကို တိုက်ရိုက် ပြောပါလား ဘာလို့ ဒီလိုမျိုးဖြစ်နေရတာလဲ။

ဒေါသထွက်နေသော ရဲ့ချန်းလျန်သည် ချူနင်၏လက်ထဲမှ စုတ်တံကို ဆွဲယူကာ နှစ်ပိုင်းချိုးပစ်လိုက်သည်။

"နင် တစ်ခါလောက်တောင် ပုံမှန်မနေနိုင်ဘူးလား ဒီရက်ပိုင်း ငါနင့်အပေါ် ဘာတွေ လုပ်မိလို့ နင်ဒီလောက်တောင် ငါ့ကို မကျေမနပ် ဖြစ်နေရတာလဲ"

ဧကရာဇ်မုဒ် ဝင်နေသော ချူနင်သည် လက်တွေ့လောကထဲ ပြန်ရောက်လာပြီး ကြောင်အမ်းအမ်းဖြင့် မော့ကြည့်လာသည်။

"ဟင်"

"ဒီကိစ္စရဲ့ ဂုဏ်သတင်းက နင့်အတွက် မဟုတ်ဘဲ ငါကနင့်ရဲ့ နာမည်ကောင်းကို ခိုးယူသွားတယ်လို့ နင်ခံစားနေရတာ မဟုတ်လား။

 မနက်ဖြန် ညီလာခံမှာ ဒါတွေအားလုံးက နင့်ရဲ့လက်ရာပါလို့ ငါကြေညာပေးမယ်။ အဲဒါဆိုရင် နင်ကျေနပ်ပြီလား"

ကြောင်နေသော ချူနင်သည် တဖြည်းဖြည်း သတိဝင်လာပြီး နှုတ်ခမ်းလေး တွန့်သွားသည်။ "ငါ ငါ ဘာမှမပြောရသေးပါဘူး မင်း ဘာလို့ အဲဒီလို တွေးတာလဲ"

ရဲ့ချန်းလျန်က မကျေမနပ်ဖြင့် "သာမန်ကိစ္စဆိုရင်တော့ ဘာမှမပြောတာ ကိစ္စမရှိပါဘူး။ ဒါပေမဲ့ အခုလိုကြီးကျယ်တဲ့ သတင်းကောင်း ရတာကို နင်က ဘာမှ မပြောဘူးဆိုတော့ ငါ့အပေါ် မကျေနပ်တာ မဟုတ်လို့ ဘာလဲ"

အော် သူ အခုမှသတိထားမိတော့သည်။

ဒါပေမဲ့ သူက ဒီကိစ္စ ပြေလည်သွားမယ်ဆိုတာ ကြိုသိနေတာပဲလေ။ ဘယ်ကုန်သည်က အမြတ်ကို မမက်ဘဲနေမှာလဲ သူက နည်းလမ်းလေးပဲ ပေးလိုက်တာပါ။

အခု ပြဿနာ ပြေလည်သွားပြီဆိုတော့ အရင်က စိုးရိမ်မှုတွေ ဖယ်ရှားလိုက်ရုံပါပဲ။ ပြီးတော့ ကျန်နေတဲ့ အစီရင်ခံစာတွေကို အရင် ပြီးအောင် လုပ်သင့်တာ မဟုတ်လား။

အစီရင်ခံစာတွေမပြီးရင် သူ ဘယ်လိုလုပ် ရဲ့ချန်းလျန်ကို ခေါာပြီး နန်းတော်ထဲ လည်ပတ်နိုင်မှာလဲ ဘယ်လိုလုပ် အခွင့်အရေး ရှာနိုင်မှာလဲ ရဲ့ချန်းလျန်က ရုတ်တရက် ရောက်လာပြီး သူ့စုတ်တံကို ချိုးပစ်လိမ့်မယ်လို့ သူ လုံးဝ မထင်ထားခဲ့ဘူး။

သူမရှေ့က အမျိုးသမီး၏ မျက်လုံးများမှာ ရှုပ်ထွေးလာပြီး ချူနင့်ကို စိုက်ကြည့်နေသည်။

"နင့်ရဲ့ စစ်ရေးနဲ့ နိုင်ငံရေး ကိုင်တွယ်ပုံတွေက တကယ်ကို ထူးချွန်ပါတယ်။ ဒါပေမဲ့ ဒါက နင့်အတွက်အရမ်း မတရားဘူးလို့ ငါခံစားရတယ်။ နောက်ဆိုရင် ဒါတွေကို ငါ့ကိုပဲထားခဲ့လိုက်ပါ။ တိုင်းပြည်ရဲ့ အုပ်ချုပ်သူ ဖြစ်ပြီးတော့ အခုလို နန်းတွင်းရေးတွေမှာ ငါ မပါဝင်တာက တကယ်ကို ရယ်စရာကောင်းလှပါတယ်"

"ပြီးတော့ ငါ နင့်ကို အစကတည်းက ပြောထားတယ်လေ နင် ဘာပဲဖြစ်ဖြစ် ငါ့ကိုပြောလို့ရတယ်လို့ မကျေနပ်တာတွေကို အောင့်မထားပါနဲ့ ငါ နင့်ကိုဒီလိုပုံစံမျိုးနဲ့ မမြင်ချင်ဘူး"

ချူနင်က သက်ပြင်းချလျက် ပြုံးလိုက်သည်။ "မင်း ထင်သလို မဟုတ်ပါဘူး ဒီလို အစီရင်ခံစာလေးတွေကို ငါနာရီဝက်အတွင်း ပြီးအောင်လုပ်ပြီး မင်းကို ပေးလို့ရပါတယ် ဟုတ်ပါတယ် မင်းက နှေးတယ်လို့ ဒါမှမဟုတ် မတော်ဘူးလို့ပြောတာ မဟုတ်ပါဘူး။ အဓိကက မင်း အခုကိုယ်ဝန်ရှိနေတာဆိုတော့ ဒီလို စိတ်ဖိစီးမှုတွေ နည်းသင့်တယ် မဟုတ်လား"

ပြီးတော့ ငါက အစီရင်ခံစာ ကိုင်တွယ်ရင် အာရုံစိုက်ဖို့ လိုအပ်တယ် အမှန်အတိုင်း ပြောရရင် ကျန်းနန်ရေဘေးက အဓိက စစ်ရေးနဲ့ တိုင်းပြည်ရေးရာတောင် မဟုတ်သေးဘူး။ 

ကျန်သေးတဲ့ ဒုက္ခပေးမယ့် ကိစ္စတွေ အများကြီး ရှိသေးတယ်။ ငါသာ အာရုံလွင့်သွားရင် နောက်က အစီရင်ခံစာတွေ ကိုင်တွယ်တာ ကြန့်ကြာသွားလိမ့်မယ်။ အလုပ်လုပ်ရင် ထိရောက်မှု မြင့်ဖို့ လိုတယ်လေ မဟုတ်ရင် ငါ့မှာ ဘယ်လိုလုပ် အားလပ်ချိန်တွေ အများကြီး ရှိမှာလဲ။

ထိုစကားကို ကြားသောအခါ ရဲ့ချန်းလျန်သည် ချူနင့်ကို သံသယဖြင့် ကြည့်မိသလို ဒီရက်ပိုင်းက ချူနင်၏ပုံစံကိုလည်း ပြန်စဉ်းစားမိသည်။ ကြည့်ရတာ သူ ပြောတာ တကယ် မှန်ပုံရသည်။

မင်းတက်နန်းဆောင်ထဲက ချူနင်နဲ့ ချန်ရှင်းနန်းဆောင်ထဲက ချူနင်က လူနှစ်ယောက်လိုပဲ။ ရှေ့က ချူနင်ကတော့ ဧကရာဇ် အရှိန်အဝါတွေနဲ့ စီမံခန့်ခွဲနေပြီး နောက်က တစ်ယောက်ကတော့။

သူဟာ တကယ့်ကို အရှက်မရှိတဲ့ ကပ်တွယ်တတ်တဲ့လူယုတ်မာလေး ဖြစ်ပြီး သူမဆီကနေ အခွင့်အရေးယူဖို့ပဲ ကြံနေတာ။ ချူနင်က တစ်နေ့ကို နာရီဝက် ဒါမှမဟုတ် တစ်နာရီလောက်ပဲ အလုပ်ကို အလေးအနက်ထား လုပ်တာဖြစ်ပြီး သူမက ဒါကိုသတိမထားမိခဲ့တာ ဖြစ်နိုင်ပါတယ်။

"နင် တကယ် စိတ်မဆိုးဘူးလား"

ချူနင်က ထရပ်ပြီး ရှေ့တိုးကာ ရဲ့ချန်းလျန်၏ လက်ကို ဆုပ်ကိုင်လိုက်သည်။

"ဒါမှမဟုတ် ငါက မင်းရဲ့အလုပ်တွေကို အကုန်ယူလုပ်နေလို့ မင်းပဲ စိတ်မကျေမနပ် ဖြစ်နေတာလား ဒါမှမဟုတ် ကျန်းနန်ကိစ္စက ငါ့အကြံဖြစ်နေလို့ မင်းက မကျေမနပ် ဖြစ်နေတာလား"

ရဲ့ချန်းလျန်က ဒေါသတကြီး ပြန်ပြောသည် "ဘယ်သူ့အကြံပဲဖြစ်ဖြစ် ပြဿနာ ပြေလည်သွားရင်ပြီးတာပဲ မဟုတ်လား ငါက ဘာလို့ မကျေမနပ် ဖြစ်ရမှာလဲ"

"ပြီးတော့ နင်က ငါ့ကို ကူညီပေးနေတာပဲ အခုဆို ငါ့မှာကျင့်စဉ်ကျင့်ဖို့ အချိန်တွေ ပိုရလာပြီ။ ငါက ဘာလို့မကျေနပ်ရမှာလဲ"

ချူနင်က ရယ်မောလိုက်သည်။ "အဲဒါပဲ မဟုတ်လား"

"အဲဒီ ခံစားချက်ပါပဲ မင်းက ဒီအရာတွေကို အများကြီး မတွေးဘူးဆိုရင် ငါကကော ဘာလို့ အများကြီး တွေးနေရမှာလဲ"

ရဲ့ချန်းလျန်က ခေါင်းခါပြသည်။ "ဒါပေမဲ့ ဒီနာမည်ကောင်းက နင့်အတွက် ဖြစ်သင့်တာလေ ငါ့အတွက် မဟုတ်ဘူး"

"ဟူး... အဲဒီ နာမည်ကောင်းတွေက ငါ့အတွက် ဘာအသုံးကျမှာလဲ ငါတို့က အင်ပါယာကို ပိုကောင်းအောင် အုပ်ချုပ်ဖို့ ကြိုးစားနေတာ မဟုတ်လား။ ပြီးတော့ ငါ့ဟာက မင်းဟာပဲ မင်းဟာကလည်း ငါ့ဟာပဲ မဟုတ်လား"

ရဲ့ချန်းလျန်သည် သူ၏ စကားကြောင့် ခေတ္တမျှ ကြောင်သွားပြီးနောက် ခေါင်းငုံ့ကာ အင်း လို့ တိုးတိုးလေး ဖြေလိုက်သည်။

ချူနင်က ထပ်ပြုံးလိုက်ပြီး "လင်မယားကြားမှာ ဒီလောက်ကြီး အားနာမနေပါနဲ့ တစ်ယောက်နဲ့ တစ်ယောက် သဘောတူညီမှု ရှိရင် ရပါပြီ"

"မင်း တစ်ခုခု လုပ်ပေးချင်တယ်ဆိုရင်တော့ ကလေးမွေးပြီးမှ ဒီအလုပ်တွေကို မင်းကို ပြန်ပေးမယ်။ အခုတော့ ငါ့ကိုပဲ ထားခဲ့လိုက် မင်းလည်း စိတ်အေးလက်အေး နေရတာပေါ့"

သူ့စကားအဆုံးတွင် ရဲ့ချန်းလျန်၏ ရင်ထဲ၌ ရှုပ်ထွေးသော ခံစားချက်များ ဖြစ်ပေါ်လာသည်။ သူမ ချူနင့်ရဲ့ စေတနာကို တကယ်ပဲ အထင်လွဲခဲ့တာပါ သူ စိတ်မဆိုးပါဘူ။

"ဒါပေမဲ့ ငါ ခံစားရတာက"

"ဘာမှမခံစားနဲ့တော့ မင်းက အရမ်း အားနေပြီးတော့ အများကြီးလျှောက်တွေးနေတာ။ ငါ့ကို ကျေးဇူးတင်ချင်တယ် ဟုတ်လား အဲဒါဆိုရင် ငါ့ကိုနမ်းတာဖြစ်ဖြစ် ဖက်တာဖြစ်ဖြစ် လုပ်ပေးလေ ပြီးတော့ မင်းရဲ့ အိပ်ဆောင်ထဲကို ငါ့ကို ပေးဝင်အိပ်လေ။ အဲဒါဆို ငါ ကလေးကိုလည်း ပိုပြီး ဂရုစိုက်ပေးလို့ ရသလို ငါလည်း"

သူ့စကား မဆုံးခင်မှာတင် ရဲ့ချန်းလျန်၏ မျက်လုံးများ ပြူးကျယ်သွားသည်။ "ငါတို့က အလေးအနက် စကားပြောနေတာကို နင်က ဘာလို့ အမြဲတမ်း ပေါက်ကရတွေဆီ ရောက်သွားရတာလဲ"

"ငါလည်း အလေးအနက် ပြောတာပါ ပြောရရင် ဒီရက်ပိုင်းအတွင်း မင်းငါ့ကို အကြွေးတွေ အများကြီး တင်နေတာနော်"

ရဲ့ချန်းလျန် ခဏမျှ တိတ်ဆိတ်သွားသည်။ သူမ သူ့ကိုပေးနိုင်သမျှ အကုန် ပေးခဲ့ပြီးပြီ ဧကရာဇ် ရာထူး၊ အာဏာ၊ ပြီးတော့ တန်ဖိုးကြီးတဲ့ ကျင့်စဉ်တွေ။ ဒါပေမဲ့ သူမက အကြွေးတင်နေသလို ခံစားနေရဆဲပဲ။ ချူနင့်ရဲ့ မျက်လုံးထဲမှာတော့ ဒါတွေက သိပ်ပြီး အရေးမကြီးပုံပဲ။ သူက သူပြောတဲ့ အရာတွေကိုပဲ ပိုပြီး စိတ်ဝင်စားနေတာ ဒါပေမဲ့ အဲဒါက။

ချူနင်က သူမကို မျက်မှောင်ကြုတ်ပြီး ကြည့်လိုက်သည်။ "ဒါဆို  မင်း ငါ့ကို ဘာမှပြန်မပေးတော့ဘူးပေါ့"

ရဲ့ချန်းလျန်က စိတ်လှုပ်ရှားစွာဖြင့်"ငါ နင့်ကို နိုင်ငံတော်၏မဏ္ဍိုင်ကြီးဘွဲ့ ပေးမယ် လစာတွေ တိုးပေးမယ် ကျင့်စဉ် အရင်းအမြစ်တွေလည်း ပိုပေးမယ်"

"ဟူး..." ချူနင်က သက်ပြင်းချလိုက်သည်။ 

"ထားလိုက်ပါတော့ ငါ အလုပ်ပဲ ဆက်လုပ်တော့မယ်"

"ပြီးသွားတဲ့ အစီရင်ခံစာတွေကို အရင် ဖတ်ကြည့်လိုက်ဦး မသင့်တော်တာ ရှိရင် ငါ့ကို ပြော"

ချူနင် လှည့်ထွက်သွားမည်အပြုတွင် ရဲ့ချန်းလျန်က အသည်းအသန် ဖြစ်သွားပြီး သူ့ကို လှမ်းဆွဲလိုက်သည်။

"ငါ ပေးနိုင်တာ ဒါတွေပဲ ရှိတာလေ ဒါက တစ်နိုင်ငံလုံးမှာ အကြီးဆုံး ဆုလာဘ်တွေပဲ"

"ဒါပေမဲ့ ဒါက ငါလိုချင်တာ မဟုတ်ဘူးဆိုတာ မင်း သိသားပဲ"

ရဲ့ချန်းလျန်၏ မျက်နှာလေး ရဲတက်လာပြီး ချူနင့်ကို ဒေါသတကြီး စိုက်ကြည့်လိုက်သည်။

"နင် ပြောတဲ့ အရာတွေက ဘာဆုလာဘ်မျိုးလဲ နင် အဲဒါတွေကို လိုချင်ရင် ငါ့ကို မေးနေဖို့ လိုလို့လား"

သူမရဲ့ လက်ကို ကိုင်ချင်တာလား ဖက်ချင်တာလား အရင်က ငါသဘောမတူတုန်းကတည်းက နင် ငါ့လက်ကို ကိုင်ခဲ့တာပဲ မဟုတ်လား။

ဒါပေမဲ့ နင်ပြောတဲ့ ထူးဆန်းတဲ့ အရာတွေကိုတော့ ငါ ဘယ်လိုလုပ်သဘောတူနိုင်မှာလဲ။

နင် ငါ့ကိုနမ်းချင်ရင် နမ်းလိုက်ရုံပဲလေ ငါက အတည်ပြုချက် ပေးရမှာလား ဘယ်လိုလုပ် အရှက်မရှိ ပြောထွက်မှာလဲ။

ထိုစကားကို ကြားသောအခါ ချူနင်၏ မျက်နှာအမူအရာက မပြောင်းလဲသော်လည်း ရင်ထဲမှာတော့ ခိုးပြီး ပျော်နေသည်။

အကွက်ဆင်တာ အောင်မြင်ပြီ။

မင်းက ငါ့ကို စိတ်ဝင်စားနေပြီး ငါက ပိုပြီး အတင့်ရဲချင်နေမှန်း မင်းသိပေမဲ့ ငါက တမင် မလုပ်ဘဲ နေတာ။ မင်း ကိုယ်တိုင် ပြောလာအောင် လုပ်တာ အချစ်ရေးဆိုတာ နှစ်ဦးသဘောတူ ဖြစ်ရမယ် မဟုတ်လား။

"မင်း ဘာပြောနေတာလဲ ငါ မသိဘူး။ ငါ အလုပ် ပြန်လုပ်ရမယ်"

ရဲ့ချန်းလျန် သွားကြိတ်လိုက်မိသည်။ ချူနင်ရဲ့ဒီအကွက်ကို သူမ ဘာလို့မသိဘဲ နေမှာလဲ သူက တမင်လုပ်နေတာလေ သူမ သူ့ကို ပေးနိုင်သမျှ အကုန်ပေးခဲ့ပေမဲ့ ဒီလူက သူမကိုပဲ စိတ်ဝင်စားနေတာ အဲဒါဆိုလည်း သူ ဖြစ်ချင်သလို ဖြစ်ပါစေတော့။

"နင် လိုချင်သလား မလိုချင်ဘူးလား မလိုချင်ရင် နောက်ဆို လုံးဝ "မစဉ်းစားနဲ့တော့"

ချူနင်က မသိနားမလည်ဟန်ဖြင့် "ဘာကိုလဲ"

ရဲ့ချန်းလျန် စိတ်ကုန်သွားပြီ။ ခွေးကိုက်ခံရတယ်လို့ပဲ သဘောထားလိုက်မယ် ချူနင့်ရဲ့ ပါးစပ်ကို ခွေးပါးစပ်လို့ပဲ မှတ်လိုက်တော့မယ်။

ရဲ့ချန်းလျန်သည် ချူနင့်ကို ဆွဲယူကာ သူ၏ ခွေးလို ပါးစပ်ကို ပြင်းပြင်းထန်ထန် နမ်း (ကိုက်) လိုက်တော့သည်။ ပြီးမှ ချက်ချင်း ပြန်လွှတ်ပေးလိုက်သည်။

"သွား... အလုပ်သွားလုပ်တော့"

တကယ့်ကိုစိတ်ပျက်ဖို့ကောင်းတဲ့လူရှုပ်ကလေး။