အခန်း (၃၄) အခွင့်အရေးပေးရင်တောင် ငါ့ကို သတ်နိုင်မှာ မဟုတ်ဘူး

ညအမှောင်ထု၏ အရိပ်အောက်တွင် တာ့ချန်းအင်ပါယာ၏ အစွမ်းထက်ဆုံး အကြီးအကဲ တစ်နည်းအားဖြင့် အရိပ်ထဲတွင်ဝှက်ထားသော နယ်ရုပ်ကြီးဖြစ်သူသည် ဧကရာဇ်အသစ်ကို ရင်ဆိုင်ရန် ထွက်ပေါ်လာခဲ့ပြီ ဖြစ်သည်။

သူ ဤသို့ လုပ်ဆောင်ရန် လိုအပ်သည်

ဖန်းဟို့ရန်သည် ချူနင့်ကို သတ်ရန် မဝံ့ရဲသလို သတ်၍လည်း မရပါ။ လက်ရှိတွင် ချူနင်သည် ရဲ့ချန်းလျန် ကိုယ်တိုင် ခန့်အပ်ထားသော ဧကရာဇ်ဖြစ်ပြီး သူမကပင် အမြင့်ဆုံး အာဏာကို လွှဲအပ်ထားသဖြင့် ဧကရာဇ်တစ်ပါးနှင့် တန်းတူပင် ဖြစ်သည်။

ယနေ့တွင်ပင် ဘိုးဘေးဘုရားကျောင်း၌ ပူဇော်မှု ပြုလုပ်ရန် ခေါ်ဆောင်သွားခဲ့သေးသည်။

ထိုအကြီးအကဲသည် ချူနင်၏ လုပ်ဆောင်ချက်များကို သိရှိထားသည် မင်းတက်နန်းဆောင်၌ အစီရင်ခံစာများကို ကျွမ်းကျင်စွာ ကိုင်တွယ်ဖြေရှင်းပေးခဲ့သဖြင့် အရှင်မက ယခုအခါ သူ့ကို အကြွင်းမဲ့ ယုံကြည်နေပြီ ဖြစ်သည်။

သို့သော် ဤကဲ့သို့သော လူမျိုးသည် ဒုက္ခပေးမည့်သူ ဖြစ်လာနိုင်သည်။ သာမန်လူတစ်ယောက်က ဤမျှ ထက်မြက်သော နည်းလမ်းများကို ဘယ်လိုလုပ် ပိုင်ဆိုင်နိုင်မည်နည်း။

သူသည် ဒုက္ခပေးမည့်သူ မဟုတ်ခဲ့လျှင်တောင် ယခုရရှိထားသော အဆင့်အတန်းကြောင့် ချူနင်၏ စိတ်ကူးများ တဖြည်းဖြည်း ပြောင်းလဲလာကာ အမြင့်ဆုံးသော ရာထူးကို မက်မောပြီး ပုန်ကန်ရန် ကြံစည်လာမည်မှာ အမှန်ပင်။

အရင်ဧကရာဇ်ကြီး၏ နောက်ဆုံး မှာကြားချက်မှာ အင်ပါယာနှင့် ရဲ့မိသားစုကို ကာကွယ်ရန် ဖြစ်သည်။

သူသည် အရင်မင်းကြီး၏ ကျေးဇူးကို သေသည့်တိုင် မဆပ်နိုင်သဖြင့် ဤတာဝန်ကို အလေးအနက်ထားခြင်း ဖြစ်သည်။

ထို့ပြင် သူသည် ဤလူ၏ အထောက်အထားကို စုံစမ်းခဲ့သော်လည်း ဘာမှ ရှာမတွေ့ခဲ့ပေ။ 

အကယ်၍ ချူနင်သည် သာမန်လူတစ်ယောက်သာ ဖြစ်ခဲ့လျှင် ဧကရာဇ်အဖြစ် ခန့်အပ်ခံရသော်လည်း သူစကားတစ်ခွန်းမှ ပြောမည်မဟုတ်ပါ။

သို့သော် ဤလူ၏ အထောက်အထားမှာ လျှို့ဝှက်လွန်းပြီး နည်းလမ်းများမှာလည်း အလွန် ထူးခြားနေသည်။

ရန်သူ့နိုင်ငံက လွှတ်လိုက်သူသာ ဆိုရင်ကော အဲဒါဆိုရင်တော့ သူရဲ့ချန်းလျန်ကို အကြောင်းကြားပြီး သူ့ကို အပြစ်ပေးဖို့ တောင်းဆိုရလိမ့်မည်။

ဒါပေမဲ့ မဟုတ်ဘူးဆိုရင်တော့ သူ ဒီနေ့ ထွက်လာရခြင်းမှာ တစ်နိုင်ငံလုံးအတွက် သြဇာအာဏာကို တည်ဆောက်ရန် ဖြစ်သည်။ ၎င်းမှာ ချူနင့်ကို မဆင်မခြင် မလုပ်မိစေရန် သတိပေးလိုက်ခြင်းလည်း ဖြစ်သည်။

"မင်းကို အသက်ရှူ အကြိမ် ၃၀ စာ အချိန်ပေးမယ်။ငါ မင်းရဲ့ အထောက်အထားနဲ့ နောက်ကြောင်းကို ယုံကြည်သွားအောင် မလုပ်နိုင်ဘူးဆိုရင်တော့"

ချူနင်က စကားကို ဖြတ်ပြောကာ စပ်စုလိုက်သည်။ "မယုံကြည်ရင် မင်း ငါ့ကို သတ်မလို့လား"

သူက ပြုံးလျက် ရှေ့သို့ တစ်လှမ်း တိုးလိုက်ရာ အကြီးအကဲမှာ မျက်မှောင်ကြုတ်သွားပြီး ဓားကွေးကြီးကို ကိုင်လျက် နောက်သို့ တစ်လှမ်း ဆုတ်လိုက်ရသည်။ "မင်း ဘာလုပ်တာလဲ"

ဒီလူက သေမှာကို မကြောက်ဘူးလား

ချူနင်က လက်ကို လက်အင်္ကျီထဲ ထည့်လျက် ပြုံးပြလိုက်သည်။ "မင်း ငါ့ကို သတ်မလို့ မဟုတ်ဘူးလား ငါ ဒီမှာရှိနေတာပဲလေ။ အကြီးအကဲ မင်း သတ်ချင်ရင် သတ်လို့ရပါတယ်"

အကြီးအကဲမှာ သွားကြိတ်လိုက်မိသည်။ သူသည် သူတော်စင်အဆင့်ကျင့်ကြံသူဖြစ်ပြီး ရဲ့ချန်းလျန်ထက်ပင် ကျင့်စဉ် အဆင့်မြင့်သူ ဖြစ်သည်။ သို့သော် ယခုအခါ သူသည် အထင်သေးခံနေရသည်။

"ငါ မင်းကို တကယ် မသတ်ရဲဘူးလို့ ထင်နေတာလား"

ချူနင်က ပြုံးလျက် "အရင်အတိုင်းပါပဲ  မင်း ငါ့ကိုတကယ် သတ်ချင်ရင် ခုနက နောက်ဆုတ်သွားမှာ မဟုတ်ဘူး"

ထို့နောက် သူက အကြီးအကဲ၏ ဓားရှည်ကို အသာလေး တွန်းဖယ်လိုက်ပြီး ပြုံးနေဆဲပင်။ 

"အဲဒါကြောင့် အေးအေးဆေးဆေး ထိုင်ပြီး စကားပြောတာက ပိုမကောင်းဘူးလား လက်နက်တွေ သုံးနေတာက အဓိပ္ပာယ် မရှိပါဘူး"

ဖန်းဟို့ရန်၏ မျက်နှာမှာ ပို၍ ဆိုးရွားသွားသော်လည်း သူ ဘာမှ ပြောစရာ မရှိတော့ပေ။ သူသည် တိုးတိုးလေး ကျိန်ဆဲရင်း ဓားရှည်ကို ပြန်သိမ်းလိုက်သည်။

အရှင်မရဲ့ မျက်နှာကို ထောက်လို့သာပေါ့ မဟုတ်ရင်တော့ မင်းကို ဟင်းသီးဟင်းရွက်တွေလိုပဲ လှီးဖြတ်ပစ်လိုက်ပြီ။

"ကောင်းပါပြီ ကောင်းပါပြီ အကြီးအကဲ ပြောတာ မှန်ပါတယ်"

ချူနင်သည် ဤလူကို သိသည်။ ဘိုးဘေးဘုရားကျောင်းကို စောင့်ရှောက်နေသော ဤကျင့်ကြံသူသည် အင်ပါယာ၏ အကြီးမြတ်ဆုံးသော အစောင့်အရှောက်ဖြစ်ပြီး ရဲ့ချန်းလျန်၏ အရေးအကြီးဆုံးသော နယ်ရုပ်ဖြစ်သည်။

သူ့ဇနီးက သူ့ကိုယုံကြည်သလို သူ တစ်ခါမှ မတွေ့ဖူးသော ယောက္ခမကြီးကလည်း ယုံကြည်ခဲ့သူဖြစ်သဖြင့် ချူနင် ဘာမှ မလုပ်ရန် ဆုံးဖြတ်လိုက်သည်။

အဓိကအချက်ကတော့ ထိုအကြီးအကဲတွင် သူ့ကို သတ်လိုစိတ် မရှိခြင်းကြောင့်ပင် ဖြစ်သည်။ မဟုတ်လျှင်တော့ ဒီအဘိုးကြီးအတွက် နောက်တစ်ခါဆိုတာ ရှိလာမှာ မဟုတ်ဘူး။

ချူနင် လက်ကို လက်အင်္ကျီထဲ ထည့်လျက် ဖန်းဟို့ရန်ကို စပ်စုကြည့်သည်။

"ငါ့ရဲ့ အထောက်အထားကို မေးတာ ဘာလို့ မေးတာလဲ"

"ငါက အရှင်မ ကိုယ်တိုင် ခန့်အပ်ထားတဲ့ ဧကရာဇ်ပဲ ငါ့ရဲ့အာဏာကိုလည်း အရှင်မကပဲ ပေးထားတာ အရှင်မမှာ သူမရဲ့ အကြောင်းပြချက် ရှိမှာပေါ့။ အကြီးအကဲက အရှင်မရဲ့ ဆုံးဖြတ်ချက်မှာ ပြဿနာရှိတယ်လို့ ထင်နေတာလား"

အကြီးအကဲ၏ မျက်မှောင်များ ပို၍ ကြုတ်သွားသည်။ ချူနင်က သူ့အတွက် ကျင်းတူးနေမှန်း သူ သိသဖြင့် လုံးဝ အကျခံမည် မဟုတ်ပါ။

"အရှင်မရဲ့ ဒီလုပ်ရပ်က ဘိုးဘေးတို့ရဲ့ ထုံးတမ်းစဉ်လာနဲ့ ဥပဒေတွေကို ဆန့်ကျင်နေမှန်း မင်းသိလား စည်းမျဉ်းတွေအရ မင်းက နန်းတွင်းထဲက လူတစ်ယောက်ပဲ"

"မဟာအင်ပါယာ ငါးခုမှာ ဒီလိုမျိုး တစ်ခါမှ မဖြစ်ဖူးဘူး နန်းတွင်းက လူတွေက အင်ပါယာရဲ့ အရေးကိစ္စတွေမှာ ဝင်မပါရဘူး အရှင်မရဲ့ အစီရင်ခံစာတွေကို ကိုင်တွယ်ဖို့ ဆိုတာ ပိုလို့တောင် မဖြစ်နိုင်ဘူး"

ချူနင်က ခေါင်းညိတ်ပြသည်။ "အဲဒါဆိုရင် ငါ့ကို အကြီးအကဲက စောင့်ကြည့်နေတာပေါ့"

ဖန်းဟို့ရန်က လှောင်ပြုံးပြုံးကာ "ခြိမ်းခြောက်မှု ဖြစ်လာနိုင်တဲ့ အရာအားလုံးကို ငါ စောင့်ကြည့်နေမှာပဲ မင်း တစ်ယောက်တည်း မဟုတ်ဘူး"

ချူနင်က သက်ပြင်းချလိုက်သည်။ "တကယ်တော့ ငါ့ကိုသံသယဝင်နေစရာ မလိုပါဘူး။ ချန်းလျန်က ဒီလိုလုပ်နိုင်တယ်ဆိုကတည်းက အချို့အရာတွေကို မင်းကိုရှင်းပြလို့ မရနိုင်လို့ပါ"

"အခု အင်ပါယာက ဝရုန်းသုန်းကား ဖြစ်နေလို့လား"

အကြီးအကဲ ခေတ္တ တွန့်ဆုတ်သွားသည်။

"ငါက အာဏာလုပြီး နိုင်ငံကို သစ္စာဖောက်နေလို့လား"

အကြီးအကဲမှာ သံသယများဖြင့်သာ ကြည့်နေသည်။

ချူနင်က ပြုံးလျက် နိဂုံးချုပ်လိုက်သည်။ "အဲဒါကြောင့် အကြီးအကဲ မင်း ဘာမှလည်း မတွေ့ရသေးဘဲနဲ့ ငါ့ကို တိုင်းပြည်ဖျက်မယ့် မိန်းမလှ  အဲ... ဒုက္ခပေးမယ့်သူလို့ သေချာပေါက် ပြောနေတာက မစောလွန်းဘူးလား"

"အခု မဟုတ်ရင်တောင် အနာဂတ်မှာ ဖြစ်လာနိုင်တယ်လေ"

"အဲဒါက ပြောရခက်ပါတယ် ဘယ်သူက အနာဂတ်ကို အတပ်ပြောနိုင်မှာလဲ ငါတို့ထဲက ဘယ်သူက အာမခံနိုင်မှာလဲ"

ဖန်းဟို့ရန် ခဏမျှ ဆွံ့အသွားပြီးနောက် "ငါက အရင်မင်းကြီးရဲ့ မှာကြားချက်ကို လက်ခံထားသူ ဖြစ်တယ်။ ငါက အင်ပါယာကို နှစ်ပေါင်း ရာချီ ကာကွယ်လာခဲ့တာ တာ့ချန်းအင်ပါယာရဲ့ တိုးတက်မှုကို ဘယ်သူ့ကိုမှ နှောင့်ယှက်ခွင့် မပြုနိုင်ဘူး"

"အခုတော့ မင်းမှာ အပြစ်ရှာမတွေ့သေးပေမဲ့ မင်းရဲ့အထောက်အထားက အလွန် သံသယဖြစ်ဖွယ် ကောင်းနေတယ် ပြီးတော့ မင်းက တာ့ချန်းအင်ပါယာက လူလည်း မဟုတ်ဘူး"

ဤသို့ ပြောပြီးနောက် အကြီးအကဲသည် ခါးက ဓားရှည်ကို ကိုင်လိုက်ပြီး သူ၏ မျက်လုံးများတွင် တည်ကြည်မှုများသာ ရှိနေသည်။ 

"ဒါကြောင့် မင်းရဲ့ အမှားကို ငါ့လက်ထဲ မိအောင် မလုပ်နဲ့ မဟုတ်ရင်တော့"

"မဟုတ်ရင် မင်း ငါ့ကို သတ်မယ်ပေါ့" ချူနင်က ထပ်ပြီး သက်ပြင်းချပြန်သည်။

"မင်းတို့ တော်ဝင်မိသားစုဝင်တွေက ပြောရင် ဒီစကားတွေချည်းပဲ မသတ်ရဲရင် ဘာလို့ ဒီလောက် ပြောနေရတာလဲ လက်နက်တွေ ကိုင်တာက သံယောဇဉ်ကို ထိခိုက်စေတယ်လေ"

အကြီးအကဲမှာ ရင်ထဲက အရှိန်အဝါတွေ တစ်ဆို့သွားသလို ခံစားလိုက်ရသည်။

ဒီကောင်လေး တော်တော် သတ္တိရှိတာပဲ

ငါ့ကို ဒီလောက်အထိ အရေးမလုပ်တာလား။ 

မင်းသာ ဧကရာဇ် မဟုတ်ရင်တော့ ငါ သေချာပေါက် ခုတ်သတ်လိုက်ပြီ။

သူက နှာခေါင်းရှုံ့ကာ ချူနင့်ကို စိုက်ကြည့်လိုက်သည်။ "ငါ ပြောစရာရှိတာ ပြောပြီးပြီ။ အရာရာမှာ လူကကြံစည်ပြီး နတ်က စီရင်တယ်ဆိုတာ မှတ်ထားပါ ငါလည်း စောင့်ကြည့်နေမှာပဲ"

စကားဆုံးသည်နှင့် အကြီးအကဲမှာ ရုတ်တရက် ပျောက်ကွယ်သွားသည်။ ခုနက သရဲတံတိုင်း ကာနေတာလည်း ပျောက်သွားပြီဖြစ်ရာ ၎င်းမှာ အကြီးအကဲ သုံးလိုက်သော ကျင့်စဉ်ဖြစ်မှန်း သိသာလှသည်။

ချူနင်က ထွက်သွားသော ကျောပြင်ကို ကြည့်ကာ ပြုံးလိုက်မိသည်။ "သူမရဲ့ ဘေးနားမှာ အားကိုးရတဲ့သူတွေ ရှိသေးတာပဲ။ အဲဒါဆိုရင်တော့ ငါစိတ်အေးရပြီ။ ဒါကြောင့်လည်း သူမ တစ်ယောက်တည်း ဒီလောက်အထိ လျှောက်လှမ်းနိုင်ခဲ့တာပဲ"

သူ့ဇနီးက တော်တော်လေး ကောင်းမွန်သလို ဒီအဘိုးကြီးကလည်း တာဝန်သိလှသည်။ ဒါပေမဲ့ ဘာလို့ လူတိုင်းက သူ ရာထူးလုပြီး ပုန်ကန်မယ်လို့ ထင်နေကြတာလဲ လိုအပ်လို့လား။

ငါက မင်းတို့ တိုင်းပြည်ကို တကယ် စိတ်မဝင်စားပါဘူး မင်းတို့ရဲ့ ဧကရီမလေး တစ်ယောက်တည်းကပဲ ငါ့နှလုံးသားကို လှုပ်ခတ်စေတာ သူမကိုပဲ နမ်းချင်တာ။

သူသည် ထိုနေရာမှ ပြန်ထွက်လာခဲ့သည်။ သူ့နောက်မှာတော့ ရှောင်ပင်းက သူမ၏ ကျင့်စဉ်အကြောင်းကို သေချာစဉ်းစားနေသည်။

တကယ်ပဲ ထမင်းစားပြီးနောက် သူမ၏ ကိုယ်ထဲတွင် ဝိညာဉ်စွမ်းအင်တွေ လှည့်ပတ်မှု ပိုမြန်လာသည်ကို ခံစားရသည်။

သို့သော် ချူနင်၏ ပုံရိပ်က သူမရှေ့တွင် ရုတ်တရက် ပေါ်လာသဖြင့် ရှောင်ပင်း မျက်နှာ ဖြူဖျော့သွားရသည်။

"သရဲ အရှင်မ... သရဲကြီး"

"သေချာ ကြည့်ပါဦး ဒီလောကမှာ ငါ့လောက် ချောတဲ့သရဲ ရှိလို့လား"

ရှောင်ပင်း သတိဝင်လာမှ သက်ပြင်းချနိုင်တော့သည်။ သူမက မကျေမနပ်ဖြင့်"ချူသခင်လေး ညကြီးမင်းကြီး မအိပ်ဘဲနဲ့ လူကို လာခြောက်နေတာလား"

ချူနင်က လက်ကာပြလိုက်ပြီး သူက အဲဒီလို ဝါသနာ မရှိကြောင်း ပြလိုက်သည်။ "ငါ ခုနက အဘိုးကြီး တစ်ယောက်ရဲ့ ခြုံခိုတိုက်ခိုက်တာကို ခံလိုက်ရလို့ပါ ငါ သွားတော့မယ်"

ဤသို့ ပြောပြီး သူက သူ့နန်းဆောင်ထဲ ဝင်အိပ်တော့သည်။ ရှောင်ပင်းကတော့ ကြောင်အမ်းအမ်းဖြင့် ခေါင်းကုတ်နေမိသည်။ 

ဘယ်အဘိုးကြီးက သူ့ကို တိုက်ခိုက်တာလဲ ဒီမှာ ဘယ်အဘိုးကြီးမှ မရှိပါဘူး။ ပြီးတော့ ဧကရီရဲ့ ကျင့်စဉ်က ဒီလောက် မြင့်တာကို၊ ဘယ်က အဘိုးကြီးက နန်းတော်ထဲ ခိုးဝင်ပြီး သူ့ကို တိုက်ခိုက်မှာလဲ။

ချူသခင်လေးက သက်သက်မဲ့ လုပ်တာပဲ ဖြစ်ရမယ် သူမကို သရဲထင်အောင် ခြောက်တာ။

ကျင့်စဉ်ပဲ ဆက်ကျင့်တော့မယ်။

ဒီခံစားချက်ရှိနေတုန်းကျင့်စဉ်ကိုဆက်ကျင့်ပြီးအဆင့်၅ကိုတစ်ခါတည်းတက်လှမ်းပစ်မယ်ဟွန့်။